ಕಾರ್ಕಳಾಂತು ಕೊಂಕಣಿ ಗೌರವ ಪ್ರಶಸ್ತಿ ಪಾವಿತ

“ಜ್ಞಾನ ಆಸ್ಸ ಕೋರ್ನು ಘೆವ್ಚೆ ದಾಕೂನು ಜೀವನ ಸಾರ್ಥಕ ಜಾತ್ತಾ. ಹೇ ನಿಟ್ಟಾಂತು ಕೊಂಕಣಿ ಸಮಾಜಾಚಾನ  ಶೈಕ್ಷಣಿಕ, ವೈದ್ಯಕೀಯ, ಧಾರ್ಮಿಕ, ಸಾಮಾಜಿಕ, ರಾಜಕೀಯ ಕ್ಷೇತ್ರ ಸಮೇತ ಸರ್ವ ಕ್ಷೇತ್ರಾಕ ಅನನ್ಯ ದೇಣಿಗಾ ದಿಲ್ಲ್ಯಾ, ಕೊಂಕಣಿ ಸಮಾಜ ಲೋಕಾಲೆ ಭಾಷಾ ಸಂಸ್ಕೃತಿಯುತ ಜೀವನ ಮ್ಹೊಣು ಕರ್ನಾಟಕ ವಿಧಾನಸಭಾ ಉಪ ಸಭಾಪತಿ ಎನ್. ಯೋಗೀಶ್ ಭಟ್ ತಾನ್ನಿ ಸಾಂಗಲೆ. ತಾನ್ನಿ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ತರಪೇನ  ನವೆಂಬರ್ ೧೧ಕ ಕಾರ್ಕಳ ಶ್ರೀ ಬಿ. ಮಂಜುನಾಥ ಪೈ ಸಭಾಂಗಣಾಂತು ಘಡೀಲೆ ಕೊಂಕಣಿ ಗೌರವ ಪ್ರಶಸ್ತಿ- ಪುಸ್ತಕ ಬಹುಮಾನ ಪಾವಿತ ಸಮಾರಂಭ ಉದ್ಘಾಟನ ಕೋರ್ನು, ಗೌರವ ಪ್ರಶಸ್ತಿ ಪ್ರದಾನ ಕೋರ್ನು ಉಲೈತಾಶ್ಶಿಲೆ.
ಅಧ್ಯಕ್ಷತೆ ಘೆತ್ತಿಲೆ ಶಾಸಕ ಎಚ್. ಗೋಪಾಲ ಭಂಡಾರಿ ತಾನ್ನಿ “ಕೊಂಕಣಿ ಅಕಾಡೆಮಿ ದಾಕೂನು ಕೊಂಕಣಿಗಾಲೆ ಕಲೆ, ಸಂಸ್ಕೃತಿ, ಪರಂಪರೆ ವರೋಚೆ ಕಾಮ ಜಾಂವೊ.  ಮ್ಹೊಣು ಸಾಂಗಲಿಂತಿ. ಸಮ್ಮಾನಿತಾಂಗೆಲೆ ಪರಿಚಯ ಪುಸ್ತಕ ಉಗ್ತಾವಣ ಕೋರ್ನು, ಪುಸ್ತಕ ಬಹುಮಾನ ಪ್ರದಾನ ಕೆಲೀಲೆ  ವಿಧಾನ ಪರಿಷತ್ ಸದಸ್ಯ ಕ್ಯಾ| ಗಣೇಶ್ ಕಾರ್ಣಿಕ್ ತಾನ್ನಿ ಉಲೋವ್ನು “ಚರ್ಡುವಾಂಕ ಭಾಷೆ, ಸಂಸ್ಕೃತಿ ಶಿಕೋವ್ಚೆ ಕಾಮ ಕೆಲೀಲ ತೆದ್ದನಾ ಆಕಾಡೆಮಿ ಸ್ಥಾಪನ ಕೆಲೀಲೆ  ಸಾರ್ಥಕ ಜಾತ್ತಾ. ಮ್ಹಳ್ಳಿಂತಿ. ಮಾಜಿ ಶಾಸಕ ವಿ. ಸುನಿಲ್ ಕುಮಾರ್ ತಾನ್ನಿ ಫೆಲೋಶಿಪ್ ವಾಂಟಿಲೆ.
ಕೊಂಕಣಿ ಸಾಹಿತಿ ವಲೇರಿಯನ್ ಡಿ’ಸೋಜಾ (ವಲ್ಲಿ ವಗ್ಗ) ತಾನ್ನಿ ಯುವ ಪ್ರಶಸ್ತಿ ಪ್ರದಾನ ಕೆಲ್ಲಿ. ರಾಷ್ಟ್ರ ಪ್ರಶಸ್ತಿ ವಿಜೇತ ಗೋಪಾಲಕೃಷ್ಣ ಪೈ ತಾನ್ನಿ ಅಕಾಡೆಮಿ ವಾರ್ತಾ ಸಂಚಿಕೆ ’ಕೊಂಕಣಿ ಉಜ್ವಾಡು’ಚೆ ಉಗ್ತಾವಣ ಕೆಲ್ಲಿ.
ಪ್ರಶಸ್ತಿ ಪುರಸ್ಕೃತ: ಬೆಂಗಳೂರ್‍ಚೆ ಸಾಹಿತಿ ಶಾ. ಮಂ. ಕೃಷ್ಣರಾಯ, ಮುಂಬಯ್ಚೆ ರಂಗನಟ ಹೆರಿ ಡಿ’ಸೋಜಾ ಆನಿ ಉಡುಪಿಚೆ ಜಾನಪದ ಕಲಾವಿದ ಬಾಬಿ ನಾಯಕ್ ತಾಂಕಾ ಗೌರವ ಪ್ರಶಸ್ತಿ, ಸಾಹಿತಿ ಜಾಲೀಲೆ ಮ್ಯಾಕ್ಸಿಮ್ ಜೆ. ಪಿಂಟೊ, ರೋನ್ ಮೈಕೆಲ್ ಮತ್ತು ರೊನಾಲ್ಡ್ ವಾಜ್ ತಾಂಕಾ ಪುಸ್ತಕ ಬಹುಮಾನ, ಕುಂಬಾರಿಕೆ ಕಲೆಚೆ ಮಹಾದೇವಿ ಕುಲಾಲ್, ವರ್ಣಚಿತ್ರ ಕಲೆಚೆ ವಿಲಾಸ್ ನಾಯಕ್ ಆನ್ತಿ ಶಾಸ್ತ್ರೀಯ ಸಂಗೀತಾಚೆ ಮಹಾಲಕ್ಷ್ಮೀ ಶೆಣೈ ತಾಂಕಾ ಯುವ ಪ್ರಶಸ್ತಿ ಪ್ರಧಾನ ಕೆಲ್ಲಿ. ವಿದ್ಯಾ ಜೆ. ನಾಯಕ್, ಮಾರ್ಸೆಲ್ ಎಂ. ಡಿ’ಸೋಜಾ, ವಿಕ್ಟರ್ ಡಿ’ಸಿಲ್ವಾ, ಸಾವೆರ್ ಸಂತಾನ್ ಸಿದ್ಧಿ ಆನಿ ಕೆವಿನ್ ಮಿಸ್ಕಿತ್ ತಾಂಕಾ ಫೆಲೋಶಿಪ್  ವಾಂಟಿಲೆ.
ಅಕಾಡೆಮಿ ಅಧ್ಯಕ್ಷ ಕಾಸರಗೋಡು ಚಿನ್ನಾ ಯೇವ್ಕಾರ ಕೋರ್ನು ಪ್ರಸ್ತಾವನ ಕೆಲ್ಲಿಂತಿ. ರಿಜಿಸ್ಟ್ರಾರ್ ಡಾ| ಬಿ. ದೇವದಾಸ್ ಪೈ ತಾನ್ನಿ ಆಬಾರ ಮಾನಲೆ. ಸದಸ್ಯ ಜಾಲೀಲೆ ಸುಭಾಷ್ ಕಾಮತ್, ಮಹೇಶ್ ಆರ್. ನಾಯಕ್, ಚಿದಾನಂದ ಭಂಡಾರಿ, ಟಿ.ಎ.ಪಿ. ಶೆಣೈ, ರಾಯ್ ಕ್ಯಾಸ್ಟೆಲಿನೋ ಆನಿ ಓಂ ಗಣೇಶ್ ತಾನ್ನಿ ಒಳಕ ಕೋರ್ನು ದಿಲ್ಲಿ. ಫ್ಲೋರಿನ್ ರೋಶ್ ಆನಿ ಕುಂಬ್ಳೆ ನರಸಿಂಹ ಪ್ರಭು ತಾನ್ನಿ ಕಾರ್ಯಕ್ರಮಾಚೆ ನಿರೂಪಣ ಕೆಲ್ಲಿ