ರಾಷ್ಟ್ರಮಟ್ಟಾಚೆ ದೈವಜ್ಞ ಮಹಾಸಮ್ಮೇಳನ

“ಬಂಗಾರ- ರುಪ್ಪೆ ವರ್ತಕಾಂಕ ಅನ್ಕೂಲ  ಕೋರ್ನು ದಿವಚೆ ಉದ್ದೇಶಾನ ರಾಜ್ಯಾಚೆ ಸಬಾರ ಕಡೇನ ‘ಜ್ಯುವೆಲರಿ ಪಾರ್ಕ್ ಸ್ಥಾಪನ ಕೊರಚೆ ವಿಷಯು ಬಜೆಟಾಂತು  ಪ್ರಸ್ತಾಪ ಕೆಲೀಲೆ ಆಸ್ಸುನು. ಸದ್ಯಾಂತೂ ಜ್ಯುವೆಲರಿ ಪಾರ್ಕ್ ಸ್ಥಾಪನೆಕ ಸರಕಾರ ಅಗತ್ಯ ಕಾಮ ಕರ್ತಾ. ಮ್ಹೊಣು ಮುಖ್ಯಮಂತ್ರಿ ಜಗದೀಶ್ ಶೆಟ್ಟರ್ ತಾನ್ನಿ ಸಾಂಗಲೆ. ತಾನ್ನಿ ಶಿವಮೊಗ್ಗಾಚೆ ಎನ್‌ಇ‌ಎಸ್ ಮೈದಾನಾಂತು ತಾ. ೨-೧೨-೨೦೧೨ ದಿವಸು ದೈವಜ್ಞ ಸಂಘಾನ  ಆಯೋಜನ ಕೆಲೇಲೆ ರಾಷ್ಟ್ರ ಮಟ್ಟಾಚೆ ದೈವಜ್ಞ ಮಹಾ ಸಮ್ಮೇಳನ ಉದ್ಘಾಟನ ಕೋರ್ನು ಉಲೈತಾಶ್ಶಿಲೆ. ಮುಖಾರ್‍ಸುನು ತಾನ್ನಿ ‘ಬಂಗ್ರಾ ವರ್ತಕಾಂಕ ಶೇ. ೩ಚೆ ವ್ಯಾಜಾಂತು ರೀಣ ದಿವಚೆ ಸಂಬಂಧ ಚರ್ಚ ಕೋರ್ನು ಅಖೈರಾಚೆ ತೀರ್ಮಾನ ಬೆಗ್ಗಿ ಘೆತ್ತಾತಿ ಆನಿ ಬೆಂಗಳೂರಾಂತು ದೈವಜ್ಞ ಬ್ರಾಹ್ಮಣ ಸಮಾಜಾಕ ಸರಕಾರ ನಿವೇಶನ ದಿತ್ತಾ. ಮ್ಹಣ್ಚೆ ಭರ್‍ವಸ ದಿಲ್ಲಿಂತಿ. ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಅನಂತ್‌ಕುಮಾರ್ ಉಲೋವ್ನು  ಬೆಂಗಳೂರಾಂತು ದೈವಜ್ಞ ಬ್ರಾಹ್ಮಣ ಸಮಾಜಾಚಾನ ಬಾಂಚೆ ಇಮಾರತ್ತಾಕ ಆಪಣಾಲೆ ಲೋಕಸಭಾ ಸದಸ್ಯ ನಿಧಿಚಾನ ೨೫ ಲಾಕ್ ರೂ. ಅನುದಾನ ದಿವ್ಚೆ ಭರ್‍ವಸ ದಿಲ್ಲಿ.
ಸಮಾರಂಭಾಚೆ ಸಾನಿಧ್ಯ ದೈವಜ್ಞ ಬ್ರಾಹ್ಮಣ ಪೀಠಾಧಿಪತಿ  ಶ್ರೀ ಶ್ರೀ ಸಚ್ಚಿದಾನಂದ ಜ್ಞಾನೇಶ್ವರ ಭಾರತಿ ಮಹಾ ಸ್ವಾಮೀಜಿ ತಾನ್ನಿ ಘೆತ್ತಿಲೆ. ಉಪ ಮುಖ್ಯಮಂತ್ರಿ ಕೆ.ಎಸ್. ಈಶ್ವರಪ್ಪ, ಸಚಿವ ವಿಶ್ವೇಶ್ವರ ಹೆಗಡೆ ಕಾಗೇರಿ, ಸಂಸದ ಬಿ.ವೈ.ರಾಘವೇಂದ್ರ, ಮಾಜಿ ಸಚಿವ ಆರ್.ವಿ. ದೇಶಪಾಂಡೆ, ಶಾಸಕ ಬೇಳೂರು ಗೋಪಾಲಕೃಷ್ಣ, ಜೆಡಿ‌ಎಸ್ ಮುಖಂಡ ಮಧು ಬಂಗಾರಪ್ಪ, ದೈವಜ್ಞ ಬ್ರಾಹ್ಮಣ ಸಮಾಜಾಚೆ ರಾಮರಾವ್ ರಾಯ್ಕರ್  ಆದಿ ಗಣ್ಯ ಉಪಸ್ಥಿತ ಆಶ್ಶಿಲೆ. ಹೇಂಚಿ ಪ್ರಪ್ರಥಮ ಪಂತಾ ಘಡೀಲೆ ರಾಷ್ಟ್ರೀಯ ಸಮ್ಮೇಳನಾಂತು ವಾಂಟೊ ಘೆವಚಾಕ ರಾಜ್ಯಾಚೆ ವಿಂಗವಿಂಗಡ ಜಿಲ್ಲ್ಯಾಚಾನ ಹಜಾರಭರಿ ಸಂಖ್ಯಾನ ದೈವಜ್ಞ ಬ್ರಾಹ್ಮಣ ಬಾಂಧವ ಆಯ್ಯಿಲೆ.