ಹೆಬ್ರಿ ಜಿ.ಎಸ್.ಬಿ. ಯುವಸಭಾಚೆ ವಾರ್ಷಿಕೋತ್ಸವು

ಪ್ರತಿ ವರ್ಷ ಚೊಲ್ಚೆ ಮ್ಹಣ್ಕೆ ಹೆಬ್ರಿಚೆ ಜಿ.ಎಸ್.ಬಿ. ಯುವಜನ  ಸಭಾಚೆ ೩೭ ವಷಾಚೆ ವಾರ್ಷಿಕೋತ್ಸವು ಆನಿ ೨೭ ವಷಾಚೆ ಶಾರದಾ ಮಹೋತ್ಸವು ತಾ. ೨೦-೧೦-೨೦೧೨ ಆನಿ ೨೧ -೧೦-೨೦೧೨ ಹೇ ದೋನ ದಿವಸು ವಿಜೃಂಭಣೇರಿ ಸಂಪನ್ನ ಜಾಲ್ಲೆ. ೨೦-೧೦-೧೨ಕ ಶ್ರೀ ಶಾರದಾ ಮಾತೇಲೆ ವಿಗ್ರಹ ಪ್ರತಿಷ್ಠ ಜಾವ್ನು ದೊನ್ನೀ ದಿವಸು ಪೂಜಾ ಕಾರ್ಯಕ್ರಮ, ವಿಂಗವಿಂಗಡ ಸೇವಾ, ಸಮಾರಾಧನ ಸಾಂಸ್ಕೃತಿಕ ಕಾರ್ಯಾವಳಿ ಚಲ್ಲೆ. ತತ್ಸಂಬಂಧ ತಾ. ೧೪-೧೦-೨೦೧೨ ಸಗಳೆ ದಿವಸು ಸಮಾಜಾಚೆ ಅಬಾಲವೃದ್ದರಾದಿ ದಾರ್‍ಲೆ, ಬಾಯ್ಲಮನಿಷ ಆನಿ ಯುವಕ-ಯುವತಿನ ವಿಂಗವಿಂಗಡ ನಮೂನ್ಯಾಚೆ ಕ್ರೀಡೋತ್ಸವು ಖಾಣ-ಜವಣಾಂತು ವಾಂಟೊ ಘೇವ್ನು ಗಮ್ಮತ್ತಾರಿ ಕಾಳ್ಳೆ.
ತಾ. ೨೧-೧೦-೨೦೧೨ ದಿವಸು ಸಾಂಜ್ವಾಳಾ ಚಲ್ಲಿಲೆ ಸಮಾರೋಪ ಸಮಾರಂಭಾಚೆ ಅಧ್ಯಕ್ಷತಾ ಹೆಬ್ರಿ ಜಿ.ಎಸ್.ಬಿ. ಹಿತಾಭಿವೃದ್ಧಿ ಸಂಘಾಚೆ ಅಧ್ಯಕ್ಷ ಎಚ್. ಸುಬ್ರಾಯ್ ನಾಯಕ್ ತಾನ್ನಿ ಘೆತ್ತಿಲೆ. ಸಮಾರಂಭಾಕ ಸೊಯರೆ ಜಾವ್ನು ಉಡುಪಿ ಜಿಲ್ಲಾ ಜಿ.ಎಸ್.ಬಿ. ಹಿತರಕ್ಷಣಾ ವೇದಿಕೆಚೆ ಅಧ್ಯಕ್ಷ ಡಾ. ಬಸ್ತಿ ದಾಮೋದರ ಪೈ, ಹೆಬ್ರಿಚೆ ಮ್ಹಾಲ್ಗಡೆ ವ್ಯವಹಾರಸ್ಥು  ಎಚ್. ಹರಿದಾಸ ನಾಯಕ್, ಜಿ.ಎಸ್.ಬಿ. ಯುವಜನ ಸಭಾಚೆ ಅಧ್ಯಕ್ಷ ಎಚ್. ನರೇಂದ್ರ ನಾಯಕ್, ಕಾರ್ಯದರ್ಶಿ ಎಚ್. ಉಮೇಶ ನಾಯಕ್ ಹಾಂಗೆಲೆ ಉಪಸ್ಥಿತೀರಿ ಚಲ್ಲೆ. ಹರಿಖಂಡಿಗೆ ದಾಕೂನು ತಿರುಪತಿಕ ಚಲ್ಲಿಲೆ ಶ್ರೀ ರಾಮದಂಡು ಪಾದಯಾತ್ರೆಂತು ಹೆಬ್ರಿ ತಾಕೂನು ವಾಂಟೊ ಘೆತ್ತಿಲೆ ಪಾಂಚ ಲೋಕಾಲೆ ತರಪೇನ ಶ್ರೀ ಎಚ್. ಸದಾನಂದ ನಾಯಕ್ ಆನಿ ಶ್ರೀ ಎಚ್. ಮನೋಹರ ಎನ್. ಪ್ರಭು ಹಾಂಕಾ ಆನಿ ಯಾತ್ರೆಚ್ಜೆ ಮುಖಾಲ್ಪಣ ಘೆತ್ತಿಲೆ ವೇ.ಮೂ. ರುಕ್ಮಯ್ಯ ಭಟ್ ಹಾಂಕಾ ಪಾದಯಾತ್ರೆಂತು ವಾಂಟೊ ಘೆತ್ತಿಲೆ ಸರ್ವಾಲೆ ತರಪೇನ ಸಂಮಾನು ಕೆಲ್ಲೊ. ನ್ಹಂಹಿಸಿ ಎಸ್.ಎಸ್.ಎಲ್.ಸಿ. ಪರೀಕ್ಷೆಂತು ರಾಜ್ಯಮಟ್ಟಾರಿ ತಿನ್ನಿ ರ್‍ಯಾಂಕ್ ಘೆತ್ತಿಲಿ ಕುಮಾರಿ ಶ್ರೇಯಾ ಮಲ್ಯಾಕ ಗಾಂವಚೆ ಮ್ಹಾಲಗಡೆಂ ಕೆರೆದಂಡೆ ಸುಶೀಲ ಮಾಯ್ಯೇನ ಶಾಲ, ಫುಲ್ಲಾ ಹಾರು ಘಾಲ್ನು, ಫಳ, ತಾಂಬೂಲ ಆನಿ ಶ್ರೀ ಶಾರದೇಲಿ ಮೂರ್ತಿ, ಸನ್ಮಾನ ಪತ್ರ ದೀವ್ನು ಸನ್ಮಾನ ಕೆಲ್ಲಿ. ಹಿಗೇಲಿಂ ಆವಯಿ-ಬಾಪಯಿಂಕ ಫೂಲ ದೀವ್ನು, ವ್ಹೋಂಟಿ ಭೋರ್ನು ಶ್ರೀಮತಿ ಆನಿ ಶ್ರೀ ಕೆರೆದಂಡೆ ದೇವು ನಾಯಕ ದಂಪತಿನ ಸತ್ಕಾರ ಕೆಲ್ಲೊ. ಕು|| ಶ್ರೇಯಾ ಮಲ್ಯಾನ ಧನ್ಯವಾದು ಸಾಂಗಲೊ. ಕ್ರೀಡೋತ್ಸವು ಆನಿ ಸಾಂಸ್ಕೃತಿಕ ಸ್ಪರ್ಧೆಂತು ಜಿಕ್ಕಿಲೆ ಲೋಕಾಂಕ(ವಿಜೇತಾಂಕ) ಸಮಾರಂಭಾಚೆ ಅಧ್ಯಕ್ಷ ಆನಿ ಅತಿಥಿ ಮಹೋದಯಾನಿ ಬಹುಮಾನ ವಾಂಟಿಲೆ. ಪ್ರೋತ್ಸಾಹಕದಾಯಕ ಜಾವ್ನು ಸ್ಫರ್ಧೆಂತು ವಾಂಟೊ ಘೆತ್ತಿಲೆ ಸಕಟಾಂಕ ಮೆ|| ಪ್ರಭು ಎಂಟರ್‌ಪ್ರೈಸಸ್ ಹಾನ್ನಿ ಪ್ರಾಯೋಜನ ಕೆಲೀಲೆ ಬಹುಮಾನ ಶ್ರೀಮತಿ ಆನಿ ಶ್ರೀ  ರಮೇಶ ಪ್ರಭು ಹಾನ್ನಿ ಕೆಲ್ಲೆ. ಶ್ರೀ ಎಚ್. ನರೇಂದ್ರ ನಾಯಕ್ ಹಾನ್ನಿ ಸುರವೇಕ ಯೇವ್ಕಾರ ಕೋರ್ನು, ಕಾರ್ಯಕ್ರಮಾಚೆ ನಿರೂಪಣ ಕೆಲ್ಲೆ. ಸನ್ಮಾನ ಪತ್ರ ಶ್ರೀ ಎಚ್. ಎಮ್. ನಾಯಕ್  ಹಾನ್ನಿ ವಾಜ್ಜಿಲೆ. ಶ್ರೀಮತಿ ಅರುಣಾ ಪ್ರಭು ಹಾನ್ನಿ ಆಬಾರ ಮಾನಲೆ. ಮಂಗಳಾರ್ತಿ ನಂತರ ರಾಮಂದಿರಾಚೆ ತಂಳೆಂತು ಶಾರದಾ ಮಾತೆಲೆ ಮೂರ್ತಿ ಜಲಸ್ಥಂಭನ ಕಾರ್ಯಕ್ರಮ ಚಲ್ಲೆ. ದೋನ ದಿವಸಾಚೆ ಸರ್ವ ಕಾರ್ಯಕ್ರಮ ಮಸ್ತ ವಿಜೃಂಭಣೇರಿ ಘಡ್ನು ಜಮಿಲೆ ಭಕ್ತ ಹರಿ ಕೃಪೇಕ ಪಾತ್ರ ಜಾಲ್ಲೆ.
- ಬಿ. ಲಕ್ಷ್ಮಣ ನಾಯಕ್, ಹೆಬ್ರಿ