ಮಂಗಳೂರು ತೇರು ವಿಜೃಂಭಣೆನ ಚಲ್ಲೆ.

ಗೌಡ ಸಾರಸ್ವತ ಬ್ರಾಹ್ಮಣಾಲೆ ಆರಾಧನಾ ಕೇಂದ್ರ ಜಾವ್ನಾಶ್ಶಿಲೆ ಮಂಗಳೂರ್‍ಚೆ ಶ್ರೀ ವೆಂಕಟರಮಣ ದೇವಳಾಂತು ವರ್ಷಂಪ್ರತಿ ಚೊಲಚೆ ‘ಮಂಗಳೂರು ತೇರು ಮ್ಹೊಣು ನಾಂವ ಪಾವ್ವಿಲೆ ರಥೋತ್ಸವವು ಆಲ್ತಾಂತು ವಿಜೃಂಭಣೇರಿ ಚಲ್ಲೆ.ರಥೋತ್ಸವ ಕಾರ್ಯಕ್ರಮ ಪಾಂಚ ದಿವಸು ವೈದಿಕ ವಿಧಿವಿಧಾನ ಬರಶಿ ವಿಜೃಂಭಣೇರಿ ಚೇಲ್ನು ಯವ್ನು ಆಯ್ತವಾರು ಸಕ್ಕಾಣಿ ಪೂಡೆ ಮಹಾ ಪ್ರಾರ್ಥನೆ ಬರಶಿ ಆರಂಭ ಜಾಲೇಲೆ ಉತ್ಸವಾಂತು ಶ್ರೀ ದೇವಾಕ ಸಿಯಾಳಾಭಿಷೇಕ ಚಲ್ಲೆ. ಉಪರಾಂತ ಶ್ರೀ ಕಾಶಿಮಠ ಸಂಸ್ಥಾನಾಚೆ ಮಠಾಧೀಶ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಆದೇಶ ಪ್ರಮಾಣೆ  ತಾಂಗೆಲೆ ಪಟ್ಟ ಶಿಷ್ಯ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ  ದಿವ್ಯ ಹಸ್ತಾನಿ ಶ್ರೀ ದೇವಾಕ ಶತಕಲಶಾಭಿಷೇಕ, ಗಂಗಾಭಿಷೇಕ, ಪಂಚಾಮೃತ ಅಭಿಷೇಕ ಚಲ್ಲೆ. ಮಾಗಿರಿ ದೊನ್ನೀ ಯತಿವರ್ಯಾಂಗೆಲೆ ದಿವ್ಯ ಉಪಸ್ಥಿತಿರಿ  ಶ್ರೀದೇವಾಕ ಮಹಾಪೂಜಾ ಚಲ್ಲೆ.
ಯಜ್ಞ ಮಹಾಪೂರ್ಣಾಹುತಿ ಉಪರಾಂತ ಶ್ರೀ ವೀರ ವೆಂಕಟೇಶ ದೇವಾಲೆ ವಿಗ್ರಹಾಕ ವಿಶೇಷ ಅಲಂಕಾರ ಕೋರ್ನು ಸ್ವರ್ಣ ಪಲ್ಲಕಿಂತು ದವರೂನು, ಹಾಣು ರಥಾರೋಹಣ ಕೆಲ್ಲಿ. ದೇವಾಕ ತೇರಾ ವಯರಿ ದವರ್‍ಲೆ ಮಾಗಿರಿ ಯತಿವರ್ಯ ದಾಕೂನು ಪೂಜಾ ಚೆಲ್ಲಿ. ರಾತ್ರಿ ೧೨ ಗಂಟ್ಯಾಕ ಜಮಿಲೆ ಅಪಾರ ಭಕ್ತ ಸಮೂಹ ತೇರು ತಾಂಡೂನು ಪುನೀತ ಜಾಲ್ಲೆ. ದೇಶ ವಿದೇಶಾಚಾನ ಆಯ್ಯಿಲೆ ಗೌಡ ಸಾರಸ್ವತ ಬಾಂದವ ಹೇ ವಾರ್ಷಿಕ ಕಾರ್ಯಕ್ರಮಾಂತು ಶೃದ್ಧಾ-ಭಕ್ತಿನ ವಾಂಟೊ ಘೆತಲಿಂತಿ.

ಮೂಡುಬಿದ್ರೆ ಕಿಂಗ್ ಫಿಶರ್ಸ್ ಪಂಗ್ಡಾಕ ಕ್ರಿಕೆಟ್ ಕಪ್

ಮೂಡುಬಿದಿರೆಚೆ ಜಿ.ಎಸ್.ಬಿ ಬಾಂದವ್ಯ ತರಪೇನ ಹಾಂಗಾಚೆ ಬಾಬು ರಾಜೇಂದ್ರ ಹೈಸ್ಕೂಲ್ ಮೈದಾನಾಂತು ಚಲೇಲೆ ೧೪ ವರ್ಷಾಚೆ ಜಿ.ಎಸ್.ಬಿ.ಕ್ರಿಕೆಟ್ ಕಪ್ ೨೦೧೩ ಪ್ರಶಸ್ತಿ ಮೂಡುಬಿದಿರೆಚೆ ಜಿ.ಎಸ್.ಬಿ. ಕಿಂಗ್ ಫಿಶರ್ಸ್ ತಂಡಾನಿ ಜಿಕ್ಕುನು ಘೆತಲ್ಯಾ. ಫೈನಲ್ ಪಂದ್ಯಾಂತು ಕೆಸರಗದ್ದೆ ಶ್ರೀರಾಮ್ ಕ್ರಿಕೆಟರ್ಸ್ ಪಂಗ್ಡಾ ವಿರುದ್ಧ ೯ ವಿಕೆಟ್ ಭರ್ಜರಿ ಜೀಕ ದಾಖಲ ಕೆಲೇಲೆ ಕಿಂಗ್ ಫಿಶರ್ಸ್ ತಂಡಾಚೆ ಸಂದೇಶ ಶೆಣೈ ಫೈನಲ್ ಪಂದ್ಯ ಶ್ರೇಷ್ಠ ಆನಿ ಸರಣಿ ಶ್ರೇಷ್ಠ ಪ್ರಶಸ್ತಿ ಘೆತಲೀಂತಿ. ಪ್ರತಾಪ್ ನಾಯಕ್ (ಬೆಸ್ಟ್ ಬ್ಯಾಟ್ಸ್ ಮ್ಯಾನ್) ನರೇಂದ್ರ ಪ್ರಭು (ಬೆಸ್ಟ್ ಬೌಲರ್) ಪ್ರಶಸ್ತಿ ಜಿಕಲಿಂತಿ.
ದಾಕಯ್ಯಾಲೆ(ಕಿರಿಯರ) ವಿಭಾಗಾಂತು ವೀರಮಾರುತಿ ಕ್ರಿಕೆಟರ್ಸ್ ಪ್ರಥಮ ,ವೀರಾಂಜನೇಯ ಕ್ರಿಕೆಟರ್ಸ್ ದ್ವಿತೀಯ ಪ್ರಶಸ್ತಿ ಘೆತಲಾ. ವೀರಾಂಜನೇಯ ಕ್ರಿಕೆಟರ್ಸ್ ಚೆ ಶ್ರೀಕಾಂತ ಪೈ ಫೈನಲ್ ಪಂದ್ಯ ಶ್ರೇಷ್ಠ ಪ್ರಶಸ್ತಿ, ಆದೀಶ್ ನಾಟೇಕರ್(ಬೆಸ್ಟ್ ಬ್ಯಾಟ್ಸ್ ಮ್ಯಾನ್) ರಘುನಂದನ ಕಾಮತ್ (ಬೆಸ್ಟ್ ಬೌಲರ್) ಪ್ರಶಸ್ತಿ ಜಿಕ್ಲಿಂತಿ. ಶ್ರೀ ವೆಂಕಟರಮಣ ಆನಿ ಶ್ರೀ ಹನುಮಂತ ದೇವಳಾಚೆ ಆಡಳಿತ ಮೊಕ್ತೇಸರ ಜಿ.ಉಮೇಶ ಪೈ, ಮೊಕ್ತೇಸರ ಕೆ.ವಿಶ್ವನಾಥ ಪ್ರಭು, ಉದ್ಯಮಿ ದಯಾನಂದ ಮಲ್ಯ, ಪಿ.ರಾಜಾರಾಮ ಭಟ್, ಅನಂತ ಪ್ರಭು, ಎಂ.ಏಕನಾಥ ಮಲ್ಯ, ಎಂ.ಯೋಗೀಶ ಪ್ರಭು, ಎಂ.ವಿಶ್ವಾಮಿತ್ರ ಪೈ ಸೊಯರೆ ಜಾವ್ನು ವಾಂಟೊ ಘೇವ್ನು ಬಹುಮಾನ ವಾಂಟಿಲಿಂತಿ. ಸಂಘಟಕ ಪಿ.ಮುರಲೀಧರ ಭಟ್ ಉಪಸ್ಥಿತ ಆಶ್ಶಿಲೆ. ಪಿ.ರಾಮನಾಥ ಭಟ್ ಆನ್ತಿ ಕೆ.ಸತೀಶ್ ಕಾಮತ್ ಕಾರ್ಯಕ್ರಮ ನಿರ್ವಹಣ ಕೆಲ್ಲಿಂತಿ.

ದಾವಣಗೆರೆಂತು ಯೋಗ ಶಿಬಿರ

“ಮನುಷ್ಯಾಲೆ ಸರ್ವಾಂಗೀಣ ಅಭಿವೃದ್ಧಿಕ, ಸ್ತಾಸ್ಥ ಸಮಾಜ ನಿರ್ಮಾಣಾಕ ಧ್ಯಾನ ಪೂರಕ ಜಾತ್ತಾ ಮ್ಹೊಣು ದಾವಣಗೆರೆಚೆ ವಿರಕ್ತ ಮಠಾಧೀಶ ಶ್ರೀ ಶ್ರೀ ಬಸವಪ್ರಭು ಸ್ವಾಮಿ ತಾನ್ನಿ ಸಾಂಗಲಿಂತಿ. ಆಲಾಂತು ತಾನ್ನಿ ದಾವಣಗೆರೆಚೆ ಜಿ.ಎಸ್.ಬಿ. ಸಮಾಜಾಚೆ ಶ್ರೀ ಸುಕೃತೀಂದ್ರ ಕಲಾಮಂದಿರಾಂತು ಚಲೇಲೆ ಉಚಿತ ಯೋಗ ಆನಿ ಆಯುರ್ವೇದ ತಪಾಸಣಾ ಶಿಬಿರಾಚೆ ಉದ್ಘಾಟನಾ ಸಮಾರಂಭಾಚೆ ಸಾನಿಧ್ಯ ಘೇವ್ನು ಉಲೈತಾಶ್ಶಿಲೆ. ಶ್ರೀ ರಾಮಕೃಷ್ಣ ಕೇರಳ ಆಯುರ್ವೇದ ಕೇಂದ್ರ ದಾವಣಗೆರೆ ಆನಿ ದಾವಣಗೆರೆಚೆ ಗೌಡ ಸಾರಸ್ವತ ಸಮಾಜಾಚೆ ಸಂಯುಕ್ತಾಶ್ರಯಾರಿ ಚಲೇಲೆ ಹೇ ಸಮಾರಂಭ ಉದ್ಘಾಟನ ಕೆಲೇಲೆ ಡಾ|| ಆರತಿ ಸುಂದರೇಶ ತಾನ್ನಿ ಉಲೋನು “ಮನುಷ್ಯು ಮಸ್ತ ಜೋರಾರಿ ಆಧುನಿಕತೆಚೆ ಅವ್ಸರಾರಿ ಜೀವನ ಚಲೈತಾ  ಆಮಗೇಲೆ ಪುರಾತನ ಭಾರತೀಯ ಸಂಸ್ಕೃತಿ ವಿಸರತಾ ಆಸ್ಸುಚೆ ವಿಷಾದನೀಯ. ಆಡಂಭರಾಚೆ ಯಾಂತ್ರಿಕ ಜೀವನಾಂತು ಆಪ್ಣಾಪಣ, ಸ್ವಂತಿಕಾ  ವಿಸೋರ್ನು ವತ್ತಾ ಆಸ್ಸತಿ. ಪುರಾತನ ಋಷಿ-ಮುನಿಂಗೆಲೆ ದೇಣಿಗಾ ಜಾಲೇಲೆ ಆಯುರ್ವೇದ ಆನಿ ಯೋಗ ಆಮ್ಮಿ ನಿತ್ಯ ಜೀವನಾಂತು ವಾಪರತಾ ಆಯಲೇರಿ ಜೀವನ ಸಾರ್ಥಕ ಜಾತ್ತಾ. ಮ್ಹಳ್ಳಿಂತಿ. ಮುಖೇಲ ಸೊಯರೆ ಗೌಡ ಸಾರಸ್ವತ ಸಮಾಜಾಚೆ ಉಪಾಧ್ಯಕ್ಷ ಜಾಲೇಲೆ ಎ.ಜೆ.ಆರ್. ಕಿಣಿ ಉಲೋನು “ಪುಕ್ಕಟ ಜಾವ್ನು ಚಲ್ಚೆ ಹೇ ಶಿಬಿರಾಚೆ ಮುನಾಪೊ ಸಾರ್ವಜನಿಕಾನಿ ಘೆತಲ್ಯಾರಿ ಮಾತ್ರ ತ್ಯಾ ಆಯೋಜನ ಕೆಲೇಲ್ಯಾಕ ಸಾರ್ಥಕ ಜಾತ್ತಾ ಮ್ಹಳ್ಳಿಂತಿ. ಶ್ರೀಮತಿ ರೇಖಾ ಓಂಕಾರಪ್ಪ ಆನಿ ಸಾಂಗಾತಿಲೆ ಪ್ರಾರ್ಥನೆ ಬರಶಿ ಸುರುವಾತ ಜಾಲೇಲೆ ಸಭಾಕ ಆಯುರ್ವೇದ ಕೇಂದ್ರಾಚೆ ಅಧ್ಯಕ್ಷ ಜಾಲೇಲೆ ಡಾ|| ಸುಚಿತ್ರಾ ಎಸ್. ಪಾಟೀಲ ತಾನ್ನಿ ಯೇವ್ಕಾರ ಕೆಲ್ಲಿ. ಜಿ.ಎಸ್.ಬಿ. ಸಮಾಜಾಚೆ ಪ್ರಧಾನ ಕಾರ್‍ಯದರ್ಶಿ ಸಾಲಿಗ್ರಾಮ ಗಣೇಶ ಶೆಣೈ ತಾನ್ನಿ ಪ್ರಾಸ್ತಾವಿಕ ಜಾವ್ನು ಉಲೋವ್ನು ಕಾರ್ಯಕ್ರಮಾಚೆ ನಿರೂಪಣ ಕೆಲ್ಲಿ. ಸಮಾಜಾಚೆ ಕೋಶಾಧ್ಯಕ್ಷ ಆರ್.ವಿ.ಶೆಣೈ ತಾನ್ನಿ ಉಪಸ್ಥಿತ ಆಶ್ಶಿಲೆ. ಶಿಬಿರಾಂತು ಶಂಬರಿ ಪಶಿ ಚ್ಹಡ ಲೋಕಾನಿ ವಾಂಟೊ ಘೇವ್ನು, ತಾಜ್ಜ ಮುನಾಪೋ ಘೆತ್ಲೆ.
ವರದಿ : ಶ್ರೀಮತಿ ಜ್ಯೋತಿ ಗಣೇಶ ಶೆಣೈ.