Saraswati Prabha News 6/12-kan6

ಮೂಡುಬಿದಿರೆಚಾನ ಶ್ರೀ ವ್ಯಾಸ ಸಂಕೀರ್ತನಾ ಪಾದಯಾತ್ರಾ

ಮಂಗಳೂರ್‍ಚೆ ರಥಬೀದಿ ಶ್ರೀ ವೆಂಕಟರಮಣ ದೇವಳಾಂತು ಚಲೇಲೆ ಶ್ರೀ ಸಂಸ್ಥಾನ ಕಾಶೀಮಠಾಚೆ ಆರಾಧ್ಯ ದೇವಾಲೆ  ಪುನಃಪ್ರತಿಷ್ಠೆ ಮಹೋತ್ಸವ ಅಂಗ ಜಾವ್ನು  ಮೂಡುಬಿದಿರೆ ಚಾನ  ಶ್ರೀ ವ್ಯಾಸ ಸಂಕೀರ್ತನಾ ಪಾದಯಾತ್ರಾ ಮೇ ೨೭ದಿವಸು ಚಲ್ಲೆ. ತ್ಯಾ ದಿವಸು ಸಕ್ಕಾಣಿ ಇಕ್ರಾಕ ಮೂಡಬಿದ್ರೆ ಕಲ್ಸಂಕ ಪೆಂಟಾಂತು ಕಾರ್ಕಳಾ ದಾಕೂನು ಆಯ್ಯಿಲೆ ಶ್ರೀ ವ್ಯಾಸ ಸಂಕೀರ್ತನಾ ಪಾದಯಾತ್ರೆ ತಂಡಾಕ ಸ್ವಾಗತ ಕೋರ್ನು ದೇವಳಾಚೆ ಆಡಳಿತ ಮೊಕ್ತೇಸರ ಜಿ.ಉಮೇಶ್ ಪೈನಿ ರಥಾಕ ಮಾಳ ಘಾಲ್ನು ಶ್ರೀ ವೆಂಕಟರಮಣ ದೇವಳಾಕ ಆಪೋವ್ನು ವ್ಹರಲೆ. ಧೋಂಪಾರಾ ವೆಂಕಟರಮಣ ದೇವಳಾಂತು ವಿಶೇಷ ಪೂಜೆ ಚಲೈಲೆ. ಕಾರ್ಕಳಾಚೆ ರವೀಂದ್ರ ಭಟ್ ತಾನ್ನಿ ರಥಯಾತ್ರೆಚೆ ಉದ್ದೇಶ ವಿವರ ಜಾವ್ನು ಸಾಂಗ್ಲೆ. ಮೊಕ್ತೇಸರ ಕೆ.ವಿಶ್ವನಾಥ ಪ್ರಭು, ಪಿ.ರಾಮನಾಥ ಭಟ್, ಎಂ.ಅಶೋಕ್ ಮಲ್ಯ, ರಾಮ್ ದಾಸ್ ಪೈ, ಶಿವಾನಂದ ಪ್ರಭು, ಐ ರಾಘವೇಂದ್ರ ಪ್ರಭು, ಮನೋಜ್ ಶೆಣೈ ಉಪಸ್ಥಿತ ಆಶ್ಶಿಲೆ. ಸಾಂಜ್ವಾಳಾ ೪ ಗಂಟ್ಯಾಕ ಮೂಡುವೇಣುಪುರ  ಶ್ರೀ ವೆಂಕಟರಮಣ ದೇವಳಾ ದಾಕೂನು  ವ್ಯಾಸ ಸಂಕೀರ್ತನಾ ಪಾದಯಾತ್ರಾ ಗುರುಪುರ ಶ್ರೀ ವರದರಾಜ ವೆಂಕಟರಮಣ ದೇವಳಾಕ ಬಾಯರ ಸರಲೆ. ಮೂಡಬಿದ್ರೆ ಪೆಂಟಾಚಾನ ಬಾಯರ ಸೋರ್ನು ಎನ್.ಎಚ್ಚಾಂತು ವಚ್ಚೂನ್ಚು ಸಂಕೀರ್ತನಾ ಪಾದಯಾತ್ರಾ ಹಂಡೇಲು, ಮಿಜಾರು, ಎಡಪದವು, ಗಂಜೀಮಠ, ಕೈಕಂಬ ಮಾರ್ಗ ಜಾವ್ನು ಗುರುಪುರ ದೇವಸ್ಥಾನಾಕ ಯೇವ್ನು ಪಾವಲೆ. ಶ್ರೀ ಕಾಶೀ ಮಠಾಚೆ ದೇವಾಲೆ ಪುನಃಪ್ರತಿಷ್ಠೆ ಮಹೋತ್ಸವಾಕ ಮೂಡುಬಿದಿರೆ ಹೋಬಳಿಚೆ ಜಿ.ಎಸ್.ಬಿ. ಸಮಾಜಾಚೆ ಪ್ರತೀ ಘರಣೆಚಾನ ದೋನ ನಾರ್‍ಲು, ಆನಿ ಮುಷ್ಠಿ ಕಾಣಿಕಾ ಮೂಡುಬಿದಿರೆಚೆ ಶ್ರೀ ವೆಂಕಟರಮಣ ದೇವಳಾಂತು   ಪಾವಿತ ಕೆಲ್ಲಿಂತಿ. ಮಹೋತ್ಸವಾಕ ದೇಣಿಗೆ ಹೊರೆಕಾಣಿಕೆ ಸಮರ್ಪಣ ಕರ್ತಲ್ಯಾಲೆ ಖಾತ್ತಿರಿ  ಮೇ ೩೦ ದಾಕೂನು ಜೂನ್ ೨ ಪರ್ಯಂತ ವಿಶೇಷ ಕಛೇರಿ ಕಾರ್ಯನಿರ್ವಹಣ ಕೆಲ್ಲಾ ಮ್ಹೊಣು ದೇವಳಾಚೆ ಆಡಳಿತೆ ಮೊಕ್ತೇಸರ ಜಿ.ಉಮೇಶ ಪೈನಿ ಕಳೈಲಾ.
ದೇವಾಲೆ ಪುನಃ ಪ್ರತಿಷ್ಠಾ ಮಹೋತ್ಸವ
ಮೂಡುಬಿದಿರೆಚೆ ಮೂಡು ವೇಣುಪುರ ಶ್ರೀ ವೆಂಕಟರಮಣ ದೇವಾಲೆ ಪುನಃ ಪ್ರತಿಷ್ಠೆಚೆ ಪ್ರಥಮ ವರ್ಧಂತಿ ಮೇ ೩೦ದಿವಸು ಚಲ್ಲೆ. ತ್ಯಾಸು ಶ್ರೀ ದೇವಾಕ  ಶತಕಲಶಾಭಿಷೇಕ, ಧೋಂಪಾರಾ ವಿಶೇಷ ಮಹಾಪೂಜಾ, ಸಾಂಜ್ವಾಳಾ ಭಜನಾ ಸೇವಾ, ರಾತ್ರಿಕ ವಿಶೇಷ ರಂಗಪೂಜಾ ಚಲ್ಲೆ ಮ್ಹೊಣು ದೇವಳಾಚೆ ಆಡಳಿತೆ ಮೊಕ್ತೇಸರ ಜಿ.ಉಮೇಶ ಪೈನಿ ಕಳೈಲಾ
 ಶ್ರೀ ಕಾಶೀ ಮಠಾಚೆ ದೇವಾಲೆ ಪುನಃಪ್ರತಿಷ್ಠೆಚೆ ಮಹೋತ್ಸವಾಂತು ಜೂನ್೩ ಧೋಂಪಾರಾ ೩ ದಾಕೂನು  ಕೊಂಚಾಡಿ ಶ್ರೀ ಕಾಶೀಮಠಾಚಾನ ರಥಬೀದಿಚೆ ಶ್ರೀ ವೆಂಕಟರಮಣ ದೇವಳಾ ಪರ್ಯಂತ ಚಲೇಲೆ ಶ್ರೀ ವ್ಯಾಸ ರಘುಪತಿ ರಥಯಾತ್ರೆ, ಶ್ರೀ ವ್ಯಾಸ ಸಂಕೀರ್ತನಾ ಪಾದಯಾತ್ರೆ,ಶ್ರೀ ಹೊರೆಕಾಣಿಕೆ ಅರ್ಪಣೆಚೆ ಮೆರವಣಿಗೆಂತು ಸಮಾಜಬಾಂಧವಾನಿ ಚಡ್ತೆ ಸಂಖ್ಯಾರಿ ವಾಂಟೊ ಘೆತಲೀಂತಿ.
ಶ್ರೀ ಕಾಶೀ ಮಠಾಚೆ ದೇವಾಲೆ ಪುನಃಪ್ರತಿಷ್ಠೆ  ಮಹೋತ್ಸವಾಂತು ಜೂನ್ ೮ದಿವಸು  ಮೂಡುಬಿದಿರೆ ಹೋಬಳಿಚೆ ಸಮಾಜಬಾಂಧವ ತಾಕೂನು ಸ್ವಯಂ ಸೇವಕ ಸೇವಾ ಚಲ್ಲೆ. ಪುನಃಪ್ರತಿಷ್ಠೆ ಮಹೋತ್ಸವಾಚೆ ಅಂಗಜಾವ್ನು ಜೂನ್ ೧೩ ದಿವಸು ಮೂಡುಬಿದಿರೆಚೆ ಶ್ರೀ ವೆಂಕಟರಮಣ ದೇವಳಾಂತು ವಿಶೇಷ ಪೂಜಾ ಚಲ್ಲಾ ಮ್ಹೊಣು ದೇವಳಾಚೆ ಆಡಳಿತ ಮೊಕ್ತೇಸರ ಶ್ರೀ ಜಿ.ಉಮೇಶ್ ಪೈ ತಾನ್ನಿ ಕಳೈಲಾ.
ಸಿ.ಡಿ. ಉಗ್ತಾವಣ ಸಮಾರಂಭಮೂಡುಬಿದರೆಚೆ ಮೂಡುವೇಣುಪುರ ಶ್ರೀ ವೆಂಕಟ ರಮಣ ದೇವಳಾಚೆ ಪುನರ್ ಪ್ರತಿಷ್ಠಾ ಮಹೋತ್ಸವ ಆನಿ ಸಹಸ್ರ ಕುಂಭಾಭಿಷೇಕಾಚೆ ಸಿಡಿ ಉಗ್ತಾವಣ ಸಮಾರಂಭ, ಪುನರ್ ಪ್ರತಿಷ್ಠಾ ಮಹೋತ್ಸವಾಚೆ ಪ್ರಥಮ ವರ್ಧಂತಿ ದಿವಸು ರಾತ್ರಿ ಚಲ್ಲೆ. ದೇವಳಾಚೆ ಮಾಜಿ ಮೊಕ್ತೇಸರ, ಹಾಲಿ ಜೀರ್ಣೋಧ್ಧಾರ ಸಮಿತಿ ಅಧ್ಯಕ್ಷ ಡಾ.ಎಂ.ರಾಮಭಟ್ ತಾನ್ನಿ ಸಿ.ಡಿ ಲೋಕಾರ್ಪಣ ಕೆಲ್ಲಿಂತಿ. ದೇವಳಾಚೆ ಆಡಳಿತ ಮೊಕ್ತೇಸರ ಜಿ.ಉಮೇಶ ಪೈ ಸಹಿತ ಸರ್ವ ಮೊಕ್ತೇಸರ ಉಪಸ್ಥಿತ ಆಶ್ಶಿಲೆಂ. ವೇ. ಮೂ. ಎಂ.ಹರೀಶ ಭಟ್ ತಾನ್ನಿ ಪ್ರಾರ್ಥನ ಮ್ಹಳ್ಳೆ.
ಅಜಂತಾ ಡಿಜಿಟಲ್ಸ್‌ಚೆ ರಾಜೇಶ್ ಶ್ಯಾನುಭಾಗ್ ತಾನ್ನಿ ಸೇವಾರೂಪಾಂತು ದಿಲೇಲೆ ಹೇ ಸಿ.ಡಿ. ಜಾವ್ಕಾ ಜಾಲೇಲ್ಯಾನಿ ದೇವಾಲೆ ಭಂಢಾರಾಕ ರೂ ಶಂಬರಿ ದೀವ್ನು ಘೇವ್ಯೇತ ಮ್ಹೊಣು ಕಳೈಲಾ. ಎಂ.ಗಣೇಶ ಕಾಮತ್ ತಾನ್ನಿ ಪ್ರಾಸ್ತಾವಿಕ ಜಾವ್ನು ಉಲೋವ್ನು ಕಾರ್ಯಕ್ರಮಾಚೆ ನಿರ್ವಹಣ ಕೆಲ್ಲಿ.