“ಕೊಂಕಣಿಗ ಆಪಣಾಂಗೆಲೆ ಭಾಷೆ, ಸಂಸ್ಕೃತಿಚೆ ರಾಕ್ವಣ ಆನಿ ಅಭಿವೃದ್ಧಿ ಖಾತ್ತಿರಿ ಸರ್ಕಾರಾಚಾನ ಖಂಚೇಯಿ ಮದ್ದತ್, ಸಹಕಾರು ಮಾಗ್ಗಿಲೆ ಲೋಕ ನ್ಹಂಹಿ. ತಶ್ಶಿ ಜಾವ್ನು ಸರ್ಕಾರಾ ತಾಕೂನು ಮೆಳಚೆ ಸೌಲಭ್ಯ ಖಾತ್ತಿರಿ ಮಾಹಿತಿ ಘೇವ್ನು ಕಾರ್ಯಕ್ರಮ ಘಾಲ್ನು ಘೆವ್ಕಾ. ತಾಕ್ಕಾ ಜಾಯ ಜಾಲೇಲೆ ಮದ್ದತ್, ಸಹಕಾರ ಆಕಾಡೆಮಿ ತಾಕೂನು ದಿತ್ತಾತಿ. ಕೊಂಕಣಿ ಭಾಸ, ಸಂಸ್ಕೃತಿ ಉದರ್ಗತಿ ಖಾತ್ತಿರಿ ಘಾಲ್ನು ಘೆವಚೆ ಪ್ರತಿಯೇಕ ಕಾರ್ಯಕ್ರಮಾಂಕ ಆಕಾಡೆಮಿ ತರಪೇನ ಸಹಕಾರ ದಿತ್ತಾತಿ. ಅಶ್ಶಿ ಮ್ಹೊಣು ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಕಾಸರಗೋಡ ಚಿನ್ನಾ ತಾನ್ನಿ ಸಾಂಗ್ಲಿಂತಿ. ತಾನ್ನಿ ಗಂಗೊಳ್ಳಿಚೆ ಮಲ್ಯರಮಠ ಶ್ರೀ ವೆಂಕಟರಮಣ ದೇವಳಾಚೆ ಶ್ರೀ ದ್ವಾರಕಾನಾಥ ತೀರ್ಥ ಕಲ್ಯಾಣ ಮಂಟಪಾಂತು ತಾ. ೨೦-೦೫-೨೦೧೨ ದಿವಸು ಸಂಪನ್ನ ಜಾಲೇಲೆ ಗಂಗೊಳ್ಳಿಚೆ ನಿನಾದ ಸಂಸ್ಥೆಚೆ ೭ಚೆ ವಾರ್ಷಿಕೋತ್ಸವ ಸಮಾರಂಭಾಂತು ಮುಖೇಲ ಸೊಯರೆ ಜಾವ್ನು ಯೇವ್ನು ಉಲೈತಾಶ್ಶಿಲೆ. “ಆಮಗೇಲೆ ಸಮಾಜಾಂತು ಚರ್ಡುವಾಂಕ ತರ್ನಟೆ ತಾಕೂನು ಸಂಸ್ಕಾರ ದೀನಾಶಿ ಆಸ್ಸುಚೆ ತಾಕೂನು ತಾಂಕಾ ಜನ್ಮ ದಿಲೇಲೆ ಆವಯ-ಬಾಪಯಿ ವೃದ್ಧಾಶ್ರಮಾಕ ಸೇರ್‍ವಚೆ ವಾಯ್ಟ ಪರಿಸ್ಥಿತಿ ನಿರ್ಮಾಣ ಜಾಲ್ಯಾ. ಸಂಸ್ಕೃತಿ ಆನಿ ಸಂಸ್ಕಾರ ನಾಶ ಜಾಲ್ಲ್ಯಾ. ಘರ ಚಲೋವನು ವ್ಹರಚಾಂತು ಬಾಯ್ಲಮನ್ಶೆನ ಮುಖೇಲ ಪಾತ್ರ ಘೆವ್ಕಾ, ಚರ್ಡುವಾಂಕ ಶಿಕ್ವಣ, ಸಂಸ್ಕಾರ ದಿವಚೆ ವ್ಹಡ ಜವಾಬ್ದಾರಿ ತಾಂಗೇಲೆ ವಯರಿ ಆಸ್ಸ. ಚರ್ಡುವಾಂಕ ಆವಯ ಭಾಸ ಕೊಂಕಣಿ ಶಿಕಚಾಕ ಉಮೇದ ದಿವಕಾ. ಆಪ್ಪಣಾನ ನಿರ್ದೇಶನ ಕೆಲೇಲೆ ಉಜ್ವಾಡು ಸಿನೇಮಾಚೆ ಹರ್‍ಯೇಕ ದೃಶ್ಯಾಂತು ಏಕ್ಕೇಕ ಸಂದೇಶ ದಿಲ್ಲ್ಯಾ ಮ್ಹಳ್ಳಿಂತಿ. ಮಲ್ಯರಮಠ ಶ್ರೀ ವೆಂಕಟರಮಣ ದೇವಳಾಚೆ ಆಡಳಿತ ಮೊಕ್ತೇಸರ ಬೈಲೂರು ಮಂಜುನಾಥ ಶೆಣೈ ತಾನ್ನಿ ಸಮಾರಂಭಾಚೆ ಅಧ್ಯಕ್ಷತೆ ಘೆತ್ತಿಲೆ. ಸಿದ್ಧಾಪುರ್‍ಚೆ ಉದ್ಯಮಿ ಡಿ.ಗೋಪಿನಾಥ ಕಾಮತ್ ತಾನ್ನಿ ದೇವು ಬರೆ ಕೊರೊಂ ಮ್ಹಳ್ಳಿಂತಿ. ಮಂಗಳೂರು ವಿಶ್ವವಿದ್ಯಾನಿಲಯಾಚೆ ರ್‍ಯಾಂಕ್ ವಿಜೇತೆ ಅಂಕಿತಾ ನಾಯಕ್ ತಾಂಕಾ ಹೇಂಚಿ ವೇಳ್ಯಾರಿ ಹಾರ್ದಿಕ ಜಾವ್ನು ಸನ್ಮಾನ ಕೆಲ್ಲೆ. ಸಂಸ್ಥೆಚೆ ಅಧ್ಯಕ್ಷ ಎಂ.ಮುಕುಂದ ಪೈ ತಾನ್ನಿ ಸುರವೇಕ ಸರ್ವಾಂಕ ಸ್ವಾಗತ ಕೆಲ್ಯಾರಿ, ಕಾರ್ಯದರ್ಶಿ ಎನ್.ಗಜಾನನ ನಾಯಕ್ ತಾನ್ನಿ ವರದಿ ವಾಚನ ಕೆಲ್ಲಿಂತಿ. ಜಿ.ರೋಹಿದಾಸ್ ನಾಯಕ್ ಸನ್ಮಾನಿತಾಂಗೆಲೆ ಪರಿಚಯ ಕೋರ್ನು ದಿಲ್ಲಿಂತಿ. ಜಿ.ಸುದರ್ಶನ ವಿ.ಆಚಾರ್ಯ ತಾನ್ನಿ ಕಾರ್ಯಕ್ರಮ ನಿರೂಪಣ ಕೋರ್ನು ಆಬಾರ ಮಾನಲೆ. ಸಮಾರಂಭ ಉಪರಾಂತ ಶ್ರೀ ಕಾಸರಗೋಡು ಚಿನ್ನಾ ನಿರ್ದೇಶನಾಚೆ ಕೊಂಕಣಿ ಸಿನೇಮ “ಉಜ್ವಾಡು ಹಾಜ್ಜೆ ಪ್ರದರ್ಶನಾಂಯಿ ಚಲ್ಲೆ. ತ್ಯಾ ದಿವಸು ಸಕ್ಕಾಣಿ ಪೂಡೆ ಮಲ್ಯರಮಠ ಶ್ರೀ ವೆಂಕಟರಮಣ ದೇವಳಾಂತು ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜಾ, ಮಹಾ ಸಮಾರಾಧನ ಇತ್ಯಾದಿ ಕಾರ್ಯಕ್ರಮ ಚಲೇಲೆ ಖಬ್ಬರ ಮೆಳ್ಳಾ.
ಭಜನ ಗಂಗಾ ಸಿ.ಡಿ. ಉಗ್ತಾವಣ
ಪಂಚಗಂಗಾವಳಿಂಚೆ ಜಿ.ಎಸ್.ಬಿ. ಸಮಾಜಾಚೆ ರಾಮಪೈ ಮಠ ಶ್ರೀ ವೆಂಕಟರಮಣ ದೇವು, ಗುಜ್ಜಾಡಿ ಶ್ರೀ ಲಕ್ಷ್ಮೀನಾರಾಯಣ ದೇವು, ಪೇಟೆ ಶ್ರೀ ವಿಠ್ಠಲ ರಕುಮಾಯಿ ದೇವು, ಶ್ರೀ ಜಗದಂಬಾ ಗೋಪಾಲಕೃಷ್ಣ ದೇವು ಆನಿ ಮಲ್ಯರಮಠ ಶ್ರೀ ವೆಂಕಟರಮಣ ದೇವು ಅಶ್ಶಿ ಪಾಂಚ ದೇವಳಾಚೆ ಶ್ರೀ ದೇವಾಲೆ ಭಜನೇಚೆ ಸಿ.ಡಿ. “ಭಜನ ಗಂಗಾ ಹಾಜ್ಜೆ ಉಗ್ತಾವಣ ತಾ. ೧೨-೦೫-೨೦೧೨ ದಿವಸು ಮಲ್ಯರಮಠ ಶ್ರೀ ವೆಂಕಟರಮಣ ದೇವಳಾಂತು ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾಂನಿ ಕೆಲ್ಲಿ. ಸಭಾ ಕಾರ್ಯಕ್ರಮಾಚೆ ಮುಖೇಲ ಸೊಯರೆ ಜಾವ್ನು ಶ್ರೀ ಭದ್ರಗಿರಿ ಅಚ್ಯುತ್‌ದಾಸಜಿ, ಬೆಂಗಳೂರು ಹಾನ್ನಿ ಉಪಸ್ಥಿತ ಆಶ್ಶಿಲೆ. ತಾಜ್ಜ ಉಪರಾಂತ ಸಿ.ಡಿ. ಸಾಹಿತ್ಯ ವಿವರಣ ತಶ್ಶೀಚಿ ಭಜನಾ ಕಾರ್ಯಕ್ರಮ ಶ್ರೀ ಶಂಕರ ಶ್ಯಾನುಭಾಗ ತಾನ್ನಿ ಚಲೋವನು ದಿಲ್ಲೆ. ಗಂಗೊಳ್ಳಿಚೆ ಸಮಾಜ ಬಾಂಧವ ಉಪಸ್ಥಿತ ಆಶ್ಶಿಲೆಂ.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ