Saraswati Prabha News 6/12-kan4

ಪುತ್ತೂರಾಚೆ ಶ್ರೀ ಲಕ್ಷೀ ವೆಂಕಟೇಶ ದೇವಳಾಚೆ ಯುವಕ ಮಂಡಳಿಚೆ ರುಪ್ಪೆ ಪರಭ

ಪುತ್ತೂರಾಚೆ ಶ್ರೀ ಲಕ್ಷೀ ವೆಂಕಟೇಶ ದೇವಳಾಚೆ ಯುವಕ ಮಂಡಳಿಚೆ ಸಾಂಸ್ಕೃತಿಕ ರುಪ್ಪೆ ಪರಭ ಶ್ರೀನಿವಾಸ ಕಲ್ಯಾಣ ಮಂಟಪಾಂತು ಚಲ್ಲೆ. ಮುಖೇಲ ಸೊಯರೆ ಜಾವ್ನು ಆಯ್ಯಿಲೆ  ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಕಾಸರಗೋಡು ಚಿನ್ನ ತಾನ್ನಿ ಉಲೈತಾ “ಸಂಸ್ಕೃತಿಕ ವಿಸರ್ಲೀಲೆ ಆಯಚೆ  ಯುವಕಾರ ಸಾಂಸ್ಕೃತಿಕ ಅಭಿರುಚಿ ವಾಡ್ಡೋನು ಘೆವಚಾಕ ಸಾಹಿತ್ಯ, ನಾಟಕ, ಕಲಾಕ್ಷೇತ್ರಾಂತು ದೇವ್ನು ಸಂಘಟಿತ ಜಾವ್ನು ವಾವ್ರೋ ಕೊರಕಾ. ತಾಂಕಾ ಸಾಂಸ್ಕೃತಿಕ ಜಾವ್ನು ಜಾವಕಾ ಜಾಲೇಲೆ ಪ್ರೋತ್ಸಾಹ, ಸಹಕಾರ ಆಕಾಡೆಮಿ ತರಪೇನ ದಿತ್ತಾತಿ ಮ್ಹೊಣು ಸಾಂಗೂನು ಹ್ಯಾ ಯುವಕ ಮಂಡಳೀನ ೨೫ ವರ್ಷಾಚಾನ ಸಾಂಸ್ಕೃತಿಕ ಕಾರ್ಯಕ್ರಮ ಚಲೋವ್ನು ಹಾಳ್ಳಿಲೆ ಖಾತ್ತಿರಿ ಶ್ಲಾಘನ ಕೆಲ್ಲಿ.
      ಆನ್ನೇಕ್ಲಿ ಮುಖೇಲ ಸೊಯರೆ ಶಾಸಕ ಕೆ.ರಘುಪತಿ ಭಟ್, ಸುರತ್ಕಲ್ ಎನ್‌ಐಟಿಕೆಚೆ ಪ್ರಾಧ್ಯಾಪಕ ಪೊ| ಕೆ.ಸಿ. ಶೇಟ್, ರಂಗ ನಿರ್ದೇಶಕ ಸುರೇಂದ್ರ ಶೇಟ್, ದೇವಳಾಚೆ ಟ್ರಸ್ಟಿ ವಸಂತ್ ಕೆ. ನಾಯಕ್, ಪ್ರಧಾನ ಅರ್ಚಕ ಜಾಲೇಲೆ ಅನಂತ್ ಭಟ್ ಉಪಸ್ಥಿತ ಆಶ್ಶಿಲೆಂ. ಸೊಯರೆ ಜಾವ್ನು ಶಿವಾನಂದ ನಾಯಕ್, ಬಾಲಕೃಷ್ಣ ಗಾಂವ್ಸ್, ಆನಂದರಾಯ ಆರ್. ನಾಯಕ್, ಗಣಪತಿ ಜಿ. ಶೇಟ್, ಕೊಳಂಬೆ ಪಾಂಡುರಂಗ ಪ್ರಭು ಉಪಸ್ಥಿತ ಆಶ್ಶಿಲೆಂ.  ಹೇ ಶುಭ ವೇಳ್ಯಾರಿ ೨೫ ವರ್ಷಾಚಾನ ಸಾಂಸ್ಕೃತಿಕ ಕ್ಷೇತ್ರಾಂತು ಜೊಳ್ಳಿಲೆ ೨೫ ಕಲಾವಿದಾಂಕ ಆತ್ಮೀಯ ಜಾವ್ನು ಸನ್ಮಾನ ಕೆಲ್ಲೆ. ರಂಗ ನಿರ್ದೇಶಕ ಕೋಣಿ ಶೇಷಗಿರಿ ನಾಯಕ್ ತಾಂಕಾ ’ವೈಶ್ಯವಾಣಿ ರಂಗ ಕಲಾ ರತ್ನ’ ಮ್ಹಣಚೆ ಬಿರುದು ದೀವ್ನು ಸನ್ಮಾನ ಕೆಲ್ಲಿ. .ರಘುಪತಿ ಭಟ್ ತಾನ್ನಿ ಕಾಸರಗೋಡು ಚಿನ್ನ ತಾಂಕಾ ಗೌರವ ಕೋರ್ನು ಉಲೈಲೀಂತಿ.
ಸಂಘಾಚೆ  ಸದಸ್ಯ ಮಂಜುನಾಥ ನಾಯಕ್ ತಾನ್ನಿ ಸ್ವಾಗತ ಕೆಲ್ಯಾರಿ, ಅಧ್ಯಕ್ಷ ಕೊಳಂಬೆ ಪಾಂಡುರಂಗ ಪ್ರಭು ವರದಿ ವಾಚನ ಕೆಲ್ಲಿಂತಿ. ಕಾರ್ಯದರ್ಶಿ ಕಮಲಾಕ್ಷ ಶೇಟ್ ತಾನ್ನಿ ಕಾರ್ಯಕ್ರಮ ನಿರೂಪಣ ಕೆಲ್ಲೆ. ಮುರುಳಿ ನಾಯಕ್ ಕಲಾವಿದಾಂಕ ಪರಿಚಯ ಕೋರ್ನು ದಿಲ್ಲಿಂತಿ. ಕಡೇರಿ  ಲಕ್ಷ್ಮೀಕಾಂತ್ ಶೇಟ್ ತಾನ್ನಿ ಆಬಾರ ಮಾನಲೆ.