Saraswati Prabha News 6/12-Kan1

ಮಂಚಿಕೇರಿಂತು ಕೊಂಕಣಿ ಲೋಕವೇದ ಕಲಾಮೇಳ

ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ, ಮಂಗಳೂರು ಹಾನ್ನಿ ಮಾಂಡುನು ಹಾಡಿಲೆ “ಕೊಂಕಣಿ ಲೋಕವೇದ ಕಲಾಮೇಳ ತಾ. ೦೩-೦೬-೨೯೧೨ ದಿವಸು ಯಲ್ಲಾಪುರ ತಾ||ಚೆ ಮಂಚಿಕೇರಿ ಸಮಾಜ ಮಂದಿರಾಂತು ಚೋಲ್ನು ಕೊಂಕಣಿ ಜಾನಪದ ಸಂಪತ್ತಾಚೆ ಒಳಕ ಜಮಿಲೆ ಲೋಕಾಂಕ ಕೋರ್ನು ದಿಲ್ಲೆ.  ಪಯಲೆ ಚಲೇಲೆ ಉದ್ಘಾಟನಾ ಸಮಾರಂಭಾಕ ಉದ್ಧಾಟಕ ಜಾವ್ನು ಮಂಚಿಕೇರಿ ಗ್ರಾಮಪಂಚಾಯತ್ ಅಧ್ಯಕ್ಷ ಶ್ರೀ ಪವನಕುಮಾರ ಬಿ. ಕೇಸರಕರ ಹಾನ್ನಿ ಆಯ್ಯಿಲೆ.  ತಾನ್ನಿ ದೀವಲಿ ಲಾವ್ನು ಸಮಾರಂಭಾಚೆ ಉದ್ಘಾಟನ ಕೆಲ್ಲಿ. ಸಮಾರಂಭಾಚೆ ಅಧ್ಯಕ್ಷತಾ ಘೇವ್ನು ಉಲೆಯಿಲೆ ಆಕಾಡೆಮಿ ಅಧ್ಯಕ್ಷ ಶ್ರೀ ಕಾಸರಗೋಡ ಚಿನ್ನಾ ತಾನ್ನಿ “೪೨ ಜನಾಂಗಾಚಾನ ಆನಿ ತೀನಿ (ಹಿಂದೂ, ಕ್ರೈಸ್ತ ಆನಿ ಮುಸ್ಲಿಮ್) ಧರ್ಮಾಚಾನ ಉಲೈಚೆ ವಿಶ್ವಾಚೆ ಏಕೈಕ ಭಾಸ ಕೊಂಕಣಿ. ಅವುಂದು ಪ್ರಪ್ರಥಮ ಜಾವ್ನು ಎಸ್.ಎಸ್.ಎಲ್.ಸಿಂತು ತಿನ್ನಿ (ಥರ್ಡ್ ಲಾಂಗ್ವೇಜ್) ಭಾಸ ಜಾವ್ನು ಕೊಂಕಣಿ ಭಾಷಾ ಪರೀಕ್ಷಾ ಬರೆಯಿಲೆ ೬೬ ವಿದ್ಯಾರ್ಥಿ ಲೋಕ ಹಾಂತು ಪಸ್ಟ್ ಕ್ಲಾಸಾಂತು ಉತ್ತೀರ್ಣ ಜಾಲ್ಲಿಂತಿ. ಪೂರಾ ಲೋಕಾನಿ ಮೇಳ್ನು ಭಾಷಾ ಅಭಿವೃದ್ಧಿಕ ಪ್ರಯತ್ನ ಕೊರಕಾ ಮ್ಹಳ್ಳಿಂತಿ.  ಹೇಂಚಿ ಸಂದರ್ಭಾರಿ ಮಾಲ್ಗಡೆ ಶಿಕ್ಷಕ ಆನಿ ಕಲಾವಿದ ಶ್ರೀ ಪದ್ಮಾಕರ ಶಂಕರ ಫಾಯದೆ ತಾಂಕಾ ಆಕಾಡೆಮಿ ಅಧ್ಯಕ್ಷ ಶ್ರೀ ಕಾಸರಗೋಡ ಚಿನ್ನಾ ತಾನ್ನಿ ಶಾಲ ಪಾಂಗೂರ್ನು, ಸ್ಮರಣಿಕಾ, ಪೂಲ ದೀವ್ನು ಸನ್ಮಾನ ಕೆಲ್ಲೆ. ತಶ್ಶಿ ಶ್ರೀ ಶಾಂತಾರಾಮ ಸಿದ್ದಿ ಆನಿ ಶ್ರೀ ಪಿಲಿಪ್ಸ್ ತಾಂಕಾ ಆಕಾಡೆಮಿ ರಜಿಸ್ಟ್ರಾರ್ ಡಾ|| ದೇವದಾಸ ಪೈ ತಾನ್ನಿ ಸ್ಮರಣಿಕಾ ದೀವ್ನು, ಶಾಲ ಪಾಂಗೂರ್ನು ಸನ್ಮಾನ ಕೆಲ್ಲೆ. ಮುಖೇಲ ಸೊಯರೆ ಜಾವ್ನು ಮಂಚಿಕೇರಿ ಚರ್ಚಾಚೆ ಧರ್ಮದರ್ಶಿ ಫಾದರೆ ಲಾಝೆಸ್ ಮಿರಾಂಡಾ, ಜಿಲ್ಲಾ ಪಂಚಾಯತ್ ಸದಸ್ಯ ಶ್ರೀ ರಾಘವೇಂದ್ರ ಭಟ್ಟ ಹಾಸಣಗಿ, ರಂಗಕರ್ಮಿ ಶ್ರೀ ರಾಮಕೃಷ್ಣ ಭಟ್, ದುಂಡಿ ಹಾನ್ನಿ ಉಪಸ್ಥಿತ ಉರ್ನು, ಸಂದರ್ಭೋಚಿತ ಜಾವ್ನು ಉಲೈಲೆ. ಶ್ರೀಮತಿ ಶೀಲಾ ನಾಯಕ್ ಹಾಂಗೇಲೆ ಪ್ರಾರ್ಥನೆ ಬರೋಬರಿ ಸೂರು ಜಾಲೇಲೆ ಸಮಾರಂಭಾಂತು ಆಕಾಡೆಮಿ ರಜಿಸ್ಟ್ರಾರ್ ಡಾ|| ದೇವದಾಸ ಪೈ ತಾನ್ನಿ ಸುರವೇಕ ಯೇವ್ಕಾರ ಕೆಲ್ಲೆ. ಸಮಾರಂಭಾಚೆ ಅಂತ್ಯಾರಿ ಶ್ರೀ ನಾಗೇಶ ಅಣ್ವೇಕರ ಹಾನ್ನಿ ಆಬಾರ ಮಾನಲೆ.
ಮಾಗಿರಿ ಚಲೇಲೆ ಕಲಾಮೇಳಾಂತು ಶ್ರೀ ಗಿರೀಶ ಪರಶುರಾಮ ಸಿದ್ದಿ ಆನಿ ಪಂಗಡಾ ದಾಕೂನು ಪುಗಡಿ ನಾಚ, ಶ್ರೀ ನಾಗೇಶ ಅಣ್ವೇಕರ ಆನಿ ಪಂಗ್ಡಾಚಾನ ಪ್ರಸ್ತುತ ಕೆಲೇಲೆ ಏಕವ್ಯಕ್ತಿ ಯಕ್ಷಗಾನ ಪ್ರಸಂಗ “ವಾಲಿಮೋಕ್ಷ, ಗೋರ್ಸಗದ್ದೆ ಶ್ರೀಮತಿ ಸುಶೀಲಾ ಆನಿ ಪಂಗ್ಡಾಚಾಲೆ ಡಮಾಮಿ ನಾಚ, ಉದಗೇರಿ ಶ್ರೀ ಜಾಣು ನವಲು ಪಾಟೀಲ ಆನಿ ಪಂಗ್ಡಾ ತಾಕೂನು ಗೌಳಿ ಸುಗ್ಗಿ ನಾಚ, ಮಾವಿನಕಟ್ಟಾಚೆ ಶ್ರೀಮತಿ ವಸುಧಾ ಶೇಟ ಆನಿ ಪಂಗ್ಡಾ ತಾಕೂನು ಕೊಂಕಣಿ ಭಜನ, ಕೋಟೆಮನೆ ಶ್ರೀಮತಿ ಲಕ್ಷ್ಮೀಸಿದ್ದಿ ಆನಿ ಪಂಗ್ಡಾಚಾಲೆ ಡಮಾಮಿ ನಾಚ, ಶ್ರೀ ಎಂ.ಬಿ.ಶೇಟ್ ಆನಿ ಪಂಗ್ಡಾಚಾಲೆ “ಪುರುಸೊತ್ತು ನಾತಿಲ್ಲೆ ಜೀವನ ರೂಪಕ, ಮುಂಡಗೋಡು ಸಾವೆರ್ ಸಂತಾನ ಸಿದ್ದಿ ಆನಿ ಪಂಗ್ಡಾಚಾಲೆ ಪುಗ್ಡಿ ಆನಿ ಜಾಕೆ ನಾಚ, ಶಿರಸಿ ಶ್ರೀ ಗಿರೀಶ ಶಿರೋಡಕರ ಹಾಂಗೆಲೆ “ಪ್ರಲ್ಲಾದ ಚರಿತೆ ಪೌರಾಣಿಕ ಏಕ ವ್ಯಕ್ತಿ ನಾಟಕ ಆನಿ ಆಕಾಡೆಮಿ ಪ್ರಶಸ್ತಿ ವಿಜೇತ ಹಾರ್ಸಿಕಟ್ಟಾ ಶ್ರೀ ವಿಶ್ವನಾಥ ಶೇಟ ಆನಿ ಪಂಗ್ಡಾ ತಾಕೂನು ಕೊಂಕಣಿ ಗಮಕ ಕಾವ್ಯವಾಚನ ಆನಿ ಪ್ರವಚನ ಚಲ್ಲೆ. ಜಮಿಲೆ ಪ್ರೇಕ್ಷಕ ಹೇ ಸರ್ವ ಕಲೆಚೆ ಪರ್‍ಮೋಳು ಘೇವ್ನು ಸಂತೃಪ್ತ ಜಾಲ್ಲಿಂತಿ. ಆಕಾಡೆಮಿ ಸದಸ್ಯ ಶ್ರೀ ಮಂಜುನಾಥ ರಾಯಸಿದ್ದಿ ಶ್ರೀ ಮಹೇಶ ನಾಯಕ್, ಶ್ರೀ ಓಂಗಣೇಶ, ಶ್ರೀಮತಿ ಆಶಾ ನಾಯಕ, ಶ್ರೀ ಅಶೋಕ ಶೇಟ್, ಶ್ರೀ ಚಿದಾನಂದ ಭಂಡಾರಿ ಆದಿ ಲೋಕ ಹೇ ಸಂದರ್ಭಾರಿ ಉಪಸ್ಥಿತ ಉರಲೀಲೆ.