Karwar Konkani News

 ಶ್ರೀ ವಸಂತ ಬಾಂದೇಕರಾಂಗೆಲೆ ಕಲಾ ಸೇವೆಚೆ 

ಬಾಂಗ್ರಾ ವರ್ಷ

ರಾಜ್ಯ, ರಾಷ್ಟ್ರ, ಅಂತಃರ್ರಾಷ್ಟ್ರೀಯ ಮಟ್ಟಾರಿ ಪ್ರಶಸ್ತಿ ವಿಜೇತ ಚತುರ್ಭಾಷಾ ಹಾಸ್ಯ ಕಲಾವಿದ ಶ್ರೀ ವಸಂತ ಬಾಂದೇಕರಾಂಗೆಲೆ ೫೦ ವರ್ಷಾಂಚೆ ರಂಗ ಕಲಾ ಸೇವಾ ಸಾಧನೆಚೆ ಕಾರ್ಯಕ್ರಮ ಆಲ್ತಾಂತು ಕಾರ್‍ವಾರಾಚೆ ಆಶಾನಿಕೇತನ ಶಾಳಾ ಸಭಾಂಗಣಾಂತು ಆಯೋಜಿತ ಜಾಲೀಲೆ.ಸೇವಾ ಆರಾಧಕಾಲೆ ಸುಂದರ ಕಾರ್ಯಕ್ರಮ ಉದ್ಘಾಟನ ಕೆಲೀಲೆ ರಾಮಕೃಷ್ಣ ಆಶ್ರಮಾಚೆ ಪ|ಪೂ| ಶ್ರೀ ಭಾವೇಶಾನಂದ ಸ್ವಾಮ್ಯಾನಿ “ಕಲೆಚೆ ಜೀವನೋತ್ಸಾಹಾಚೆ ಸೆಲೆ(ಒಜರ) ಹೃದಯಾಚೆ ಜ್ಯೋತಿ ಫುಲಚಾಕ ಏಕ್ಕೇಕ ಕಲೆ ಅವಶ್ಯ, ತಸ್ಸಾಲೆ ವಿಶಿಷ್ಠ ಕಲೆ ಜೋಡ್ನು ಘೇವ್ನು ಕಲಾವಿದ ಜಾವ್ನು ೫೦ ವಸಂತ ಸಾರ್ಥಕ ಜಾವ್ನು ಪೂರ್ಣ ಕೆಲೀಲೆ ಏಕ ಮಹಾಭಾಗ್ಯ ಮ್ಹಳ್ಳಿಂತಿ.
ಮುಖೇಲ ಸೊಯರೆ ಜಾವ್ನು ತಾ.ಕ.ಸಾ.ಪ.ಅಧ್ಯಕ್ಷ ಶ್ರೀ ರಾಮಾ ನಾಯ್ಕ ಆಯ್ಯಿಲೆ. ತಾನ್ನಿ ಶ್ರೀ ವಸಂತ ಬಾಂದೇಕರಾಂಗೆಲೆ ಸಾಧನೆ ಖಾತ್ತಿರ ಪ್ರಶಂಸ ಕೋರ್ನು, ಕಾರ್‍ಯಕ್ರಮ ಖಾತ್ತಿರ ಶ್ಲಾಘನ ಕೆಲ್ಲಿ. ಸಮಾರಂಭಾಕ ಆಯ್ಯಿಲೊ ಆನ್ನೇಕ್ಳೊ ಸೊಯರೊ ಕಂದಾಯ ನಿರೀಕ್ಷಕ ಶ್ರೀ ಪರಶುರಾಮ ನಾಯಕ ತಾನ್ನಿ ಶ್ರೀ ವಸಂತ ಬಾಂದೇಕರಾಂಗೆಲೆ ಸೇವಾ, ಸಾಧನೆ ಖಾತ್ತಿರಿ ತಾಂಕಾ ಹರ್‍ಯೇಕ್ಳ್ಯಾನಿ ಅಭಿನಂದನ ದೀವ್ಕಾ ಮ್ಹಳ್ಳಿಂತಿ. ಸಮಾರಂಭಾಚೆ ಅಧ್ಯಕ್ಷತಾ ಶಾಳೆಚೆ ಮುಖ್ಯಸ್ಥ ಜಾಲೀಲೆ ಸಿಸ್ಟರ್ ಎಲಿಜಾ ತಾನ್ನಿ ಘೆತ್ತಿಲೆ. ತಾನ್ನೀಯಿ ಶ್ರೀ ಬಾಂದೇಕರಾಂಗೆಲೆ ಪ್ರತಿಭೆಚೆ ತಾರೀಪು ಕೆಲ್ಲಿಂತಿ. ವೇದಿಕೇರಿ ಕೊಂಕಣಿ ಕವಿ ಶ್ರೀ ನಾಗೇಶ ಅಣ್ವೇಕರ ಉಪಸ್ಥಿತ ಆಶ್ಶಿಲೆ. ಚರ್ಡುವಾಲೆ ಸುಂದರ ನಾಚಾ ಬರೋಬರಿ ಕಾರ್ಯಕ್ರಮ ಸೂರ ಜಾಲ್ಲೆ. ರಹಿಮಖಾನ ತಾನ್ನಿ ಸ್ವಾಗತ ಕೆಲ್ಯಾರಿ, ಶಿಕ್ಷಕ ಗಣೇಶ ಬಿಷ್ಟನ್ನವರ ತಾನ್ನಿ ನಿರೂಪಣ ಕೆಲ್ಲಿ. ಶ್ರೀ ವಸಂತ ಬಾಂದೇಕರ ತಾನ್ನಿ ಅಖೈರೀಕ ಆಬಾರ ಮಾನ್ಲೆ. ಮಾಗಿರಿ ಆಶಾನಿಕೇತನಾಚೆ ಚರ್ಡುಂವಾ ತಾಕೂನು ವಿಂಗವಿಂಗಡ ಮನೋರಂಜನಾ ಕಾರ್ಯಕ್ರಮ ಚಲ್ಲೆ.
ವರದಿ : ಗಣೇಶ ಬಿಷ್ಟನ್ನವರ.