ಕೊಂಕಣಿ ಸಂಪದ ಕೈಪಿಡಿ ಆನಿ ವಿಚಾರ ಗೋಷ್ಠಿ

ಕರ್ನಾಟಕ ರಾಜ್ಯಾಂತು ಕೊಂಕಣಿ ಭಾಷಾ ಜಾವ್ನು ಶಿಕೋವಚೆ  ಉದ್ದೇಶಾನ ಹೇಂಚಿ ಪಯಲೆ ಪಂತಾ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚಾನ ತಯಾರ ಕರತಾ ಆಸ್ಸುಚೆ ಶಿಕ್ಷಕ ಶಿಕ್ಷಣ “ಕೊಂಕಣಿ ಸಂಪದ ಸಂಪನ್ಮೂಲ ಕೈಪಿಡಿ ೨೦೧೨  ಜನವರಿ- ಫೆಬ್ರವರಿ ಮ್ಹಹಿನ್ಯಾಂತು ತಯಾರ ಜಾವಚೆ ಸಾಧ್ಯತಾ ಆಸ್ಸ ಮ್ಹೊಣು ಖಬ್ಬರ ಮೆಳ್ಳಾ. ಸಗಳೆ ಹಿಂದೂಸ್ತಾನಾಂತು ಅತ್ಯಧಿಕ ಕೊಂಕಣಿ ಉಲಯಚೆ ಲೋಕ ಕರ್ನಾಟಕಾಂತು ಆಶ್ಶಿಲೆ ಆಸ್ಸೂನು, ತಾಂಕಾ ಶಾಳಾ ಮಟ್ಟಾರಿ ಕೊಂಕಣಿ ಭಾಷಾ ಒಳಕ ಕೋರ್ನು ದಿವಚೆ ಪರಿಪೂರ್ಣ ಪ್ರಯತ್ನ ಆನ್ನಿಕೆ ಚೇಲ್ನೂ ನಾ.  ತಾಜ್ಜ ಬರ್ಶಿ ಕೊಂಕಣಿ ಭಾಸ ಶಾಸ್ತ್ರಬದ್ಧ ಜಾವ್ನು ಶಿಕೋವನು ದಿವಚೆ ಮಾಸ್ತರಾಲೊ ಊಣೆಪಣ ಆಸ್ಸ. ಹ್ಯಾ ಪರಿಹಾರ ಕೊರಚಾಕ ಕೊಂಕಣಿ ಸಂಪದ ಸಂಪನ್ಮೂಲ ಕೈಪಿಡಿ ಆಕಾಡೆಮಿನ ತಯಾರ ಕೆಲ್ಯಾ.
ಚರ್ಡುವಾಂಕ ಪಾಠ ಸಾಂಗಚೆ ಡಿ.ಇಡಿ ಆನಿ ಬಿ.ಎಡಿ ಪದವೀಧರಾನಿ ಕೊಂಕಣಿ ಭಾಷ ಶಿಕ್ಕಾ ಜಾತ್ತಾ. ಕೊಂಕಣಿ ಭಾಷೇಕ ಏಕ ಭಾಸ ಜಾವ್ನು ಇಸ್ಕೂಲಾಂತು ಶಿಕೋವಕಾ ಮ್ಹೊಣು ಅಕಾಡೆಮಿನ ರಾಜ್ಯ ಸರ್ಕಾರಾಕ ೨೦೦೯ಂತು ಪ್ರಸ್ತಾವನ ದಿಲೇಲೆ ಆಸ್ಸೂನು, ತಾಕ್ಕಾ ಸ್ಪಂದನ ಕೋರ್ನು ಸರಕಾರಾನ ದಿಲೇಲೆ ಆದೇಶಾನುಸಾರ ಆತ್ತ ‘ಕೊಂಕಣಿ ಸಂಪದ ತಯಾರ ಕೊರಚೆ ಕಾಮ ಮಸ್ತ ಇತ್ಲೆ ಪೂರ್ತಿ ಜಾಲ್ಲಾ.
ಕಸ್ಸಲೆ ಹೇ ಕೊಂಕಣಿ ಸಂಪದ? ಇಸ್ಕೂಲಾಂತು ಪಾಠ ಸಾಂಗಚೆ ಶಿಕ್ಷಕಾಂಕ ಕೊಂಕಣಿ ಪರಿಪೂರ್ಣ ಜಾವ್ನು ಶಿಕೈಚೆ ಕೈಪಿಡಿ ಹೆಂ. ಶಾಳೆಂತು ತಿನ್ನೀ ಭಾಸ ಜಾವ್ನು ಕೊಂಕಣಿ ಶಿಕೈಕಾ ಜಾಲ್ಯಾರಿಚಿ ಶಿಕ್ಷಕಾಂಕ ಟ್ರೈನಿಂಗ್ ಜಾವ್ಕಾ ಪಡ್ತಾ. ತ್ಯಾ ಟ್ರೈನಿಂಗ್ ದಿವಚಾಕ“ಸಂಪದ ಮದ್ದತ್ ಕರ್ತಾ. ಒಟ್ಟು ದೋನ ಸಂಪುಟಾಂತು ಸಂಪದ ತಯಾರ ಜಾತ್ತಾ ಆಸ್ಸುನು ಪಯಲೆ ಸಂಪುಟಾಂತು ಕೊಂಕಣಿ ಭಾಷೆ ಒಳಕ, ಲಿಪಿ, ಉಚ್ಚಾರ, ಧ್ವನಿ, ಶಬ್ಧ ಉತ್ಪತ್ತಿ, ವಾಕ್ಯ ರಚನಾ, ಪದಕೋಶ, ಸಾಹಿತ್ಯ ಪ್ರಕಾರ, ಕಾವ್ಯ, ಛಂಧಸ್ಸ ತಶ್ಶಿಚಿ ವ್ಯಾಕರಣ ಶಿಕೈಚಾಕ ಮಹತ್ವ ದಿಲಯಾ. ಹೇಂ ಡಿ.ಇಡಿ ನಾಂವೆ ಬಿ.ಇಡಿ ಶಿಕಚೆ ಶಿಕ್ಷಕ ಮಾಗಿರಿ ಸ್ಕೂಲಾಂತು ಸ್ವಸಂತ್ರ ಜಾವ್ನು ಕೊಂಕಣಿ ಶಿಕೈತಾತಿ. ದೊನ್ನಿ ಸಂಪುಟಾಂತು ‘ಬೋಧನಾ ಶಾಸ್ತ್ರ ಆಸ್ಸೂನು ೨೦೧೨ಚೆ ಫೆಬ್ರವರಿ ನಂತರ ತಾಜ್ಜೆ ತಯಾರಿ ಚಾಲು ಜಾತ್ತಾ.
ಕೈಪಿಡಿ ನಿರ್ಮಾಣಾ ಖಾತ್ತಿರಿ ಕೊಂಕಣಿ ಸಾಹಿತಿ, ಭಾಷಾ ತಜ್ಞ ಆನಿ ಶಿಕ್ಷಕಾಲೊ ಸಲಹಾ, ಸಹಾಯು ಘೆತ್ತಿಲೆ ಆಸ್ಸುನು ಮಂಗಳೂರಾಚೆ ಚಾರ ಶಿಕ್ಷಕ ಶಿಕ್ಷಣ ಸಂಸ್ಥೆಂತು ಕೋರ್ಸ್ ಶೂರ ಕೊರಚಾಕ ಮಾಗಣಿ ಕೆಲ್ಯಾ ಮ್ಹೊಣು ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೆ ರಿಜಿಸ್ಟ್ರಾರ್ ಡಾ.ಬಿ. ದೇವದಾಸ ಪೈನಿ ಆಲ್ತಾಂತು ಕಳೈಲೆ.
 ಕರ್ನಾಟಕಾಂತು ಕೊಂಕಣಿ ಉಲೈತಲೇಲೊ ಸಂಖ್ಯೊ ೨೫ ಲಾಕ್ ಆಸ್ಸುನು. ಗೋವಾಂತು ಖಾಲಿ ೧೫ ಲಾಕ್ ಲೋಕ ಆಸ್ಸತಿ. ಜಾಲ್ಯಾರಿ ಗೋವಾಂತು ವ್ಯವಸ್ಥಿತ ಜಾವ್ನು ಕೊಂಕಣಿ ಶಿಕೈಚೆ ವ್ಯವಸ್ಥ ಆಸ್ಸ. ಪಠ್ಯಕ್ರಮ, ಪಠ್ಯಪುಸ್ತಕ ತಯಾರ ಜಾಲ್ಲಾ.  ಜಾಲ್ಯಾರಿ ಕರ್ನಾಟಕಾಂತು ಹೇ ಪ್ರಯತ್ನ ಜಾಯ್ನಿ. ಸುರುವಾತ ಜಾವ್ನು ಮಂಗಳೂರು, ಉಡುಪಿ ಆನಿ ಉತ್ತರ ಕನ್ನಡ ಹೇ ತೀನ ಜಿಲ್ಲ್ಯಾಂತ್ಲು ಕೊಂಕಣಿ ಶಿಕೈಚೆ ಮೂಖಾಂತರ ಮುಖಾರ ರಾಜ್ಯವ್ಯಾಪಿ ಕೊಂಕಣಿ ಶಿಕೋವಚೆ ಆಮಗೇಲೆ ಉದ್ದೇಶ ಮ್ಹೊಣು ತಾನ್ನಿ ಸಾಂಗ್ಲೆ.. ಇತ್ಲ ಭಿತ್ತರಿ ೬ ತಾಕೂನು ೧೦ ಪರ್ಯಂತಾಚೆ ೧೦೮ ಶಾಳೆಚೆ ೮೦೦ ಚರ್ಡುಂವ ಕೊಂಕಣಿ ಶಿಕತಾ ಆಸ್ಸುನು  ೨೦೧೨ ಂತು ಪಯಲೆ ಪಂತಾ ೬೦ ವಿದ್ಯಾರ್ಥ್ಯೊ ಎಸ್ಸೆಸ್ಸೆಲ್ಸಿ ಪರೀಕ್ಷೆಕ ಹಾಜರ ಜಾತ್ತಾ ಆಸ್ಸುಚೆ ವಿಶೇಷ.
ಕೊಂಕಣಿ ಶಿಕ್ಷಕ್ ಶಿಕ್ಷಣಾಚೆ ಸಂಪನ್ಮೂಳ್ ಕೈಪಿಡಿ “ಕೊಂಕಣಿ ಸಂಪದ ವಾಡುನ್ ಹಾಡ್ಚೆ ವಿಷಯಾಂತು ಏಕ ವಿಚಾರ ಗೋಷ್ಠಿ ಜನವರಿ ೧೬, ೧೭ ಆನಿ ೧೮ ತಾರೀಖೆಕ ಕುಮಟಾಚೆ ಕಮಲಾ ಬಾಳಿಗಾ ಶಿಕ್ಷಣ ಮಹಾ ವಿದ್ಯಾಲಯಾಂತು ಆಯೋಜಿತ ಜಾಲೇಲೆ. ಹಾಜ್ಜ ಆಯೋಜನ ಸಾರ್ವಜನಿಕ ಶಿಕ್ಷಣ ಇಲಾಖೊ, ರಾಜ್ಯ ಶಿಕ್ಷಣ ಸಂಶೋಧನೆ  ನಿರ್ದೇಶನಾಲಯ, ಡಯಾಟ್ ಕುಮಟಾ, ಕನ್ನಡ ಆನಿ ಸಂಸ್ಕೃತಿ ಇಲಾಖೊ, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಹಾನ್ನಿ ಮೇಳ್ನು ಕೆಲೇಲೆ. ಉದ್ಘಾಟನ ಸಮಾರಂಭಾಂತು ಉದ್ಘಾಟಕ ಜಾವ್ನು ಕುಮಟಾ ಎಮ್.ಎಲ್.ಎ. ಶ್ರೀ ದಿನಕರ ಶೆಟ್ಟಿ ಆಯ್ಯಿಲೆ. ಅಧ್ಯಕ್ಷತಾ ಅಕಾಡೆಮಿ ಅಧ್ಯಕ್ಷ ಶ್ರೀ ಕಾಸರಗೋಡು ಚಿನ್ನಾ ತಾನ್ನಿ ಘೆತ್ತಿಲೆ. ಮುಖೇಲ ಸೊಯರೆ ಜಾವ್ನು ಕರ್ನಾಟಕ ಗೇರು ಅಭಿವೃದ್ಧಿ ನಿಗಮಾಚೆ ಅಧ್ಯಕ್ಷ ಶ್ರೀ ವಿನೋದ ಪ್ರಭು, ಶ್ರೀ ಎ.ಪಿ.ಶ್ಯಾನಭಾಗ್, ಶ್ರೀ ಆರ್.ಎನ್. ಶೇಟ್, ಶ್ರೀ ಎಮ್.ಬಿ.ಪೈ ಆದಿ ಸಬಾರ ಗಣ್ಯ ಲೋಕ ಆಯ್ಯಿಲೆ.  ಡಾ|| ಎಸ್.ಜಿ.ರಾಯ್ಕರ್ ತಾನ್ನಿ ಪ್ರಾಸ್ತಾವಿಕ ಜಾವ್ನು ಉಲೈಲಿಂತಿ ಆನಿ ಕೊಂಕಣಿ ಅಕಾಡೆಮಿ ರಿಜಿಸ್ಟ್ರಾರ್ ಡಾ|| ಬಿ. ದೇವದಾಸ ಪೈ ತಾನ್ನಿ ಪ್ರಾಸ್ತಾವಿಕ ಭಾಷಣ ಕೆಲ್ಲೆಂ.
ಉಗ್ತಾವಣ್ ಸುವಾಳೆ(ಸಮಾರಂಭ) ಉಪರಾಂತ ೮ ವಿಚಾರ ಗೋಷ್ಠಿ ಘಡಲೆ. ಪಯಲೆ ಗೋಷ್ಠಿ ಮಾತೃಭಾಷೆ ಬೋಧನಾ ಉದ್ದೇಶಾಂ, ಮಹತ್ವ ಆನಿ ಶಿಕ್ಚೆಂ ತತ್ವಾಂ ಮ್ಹಳ್ಳಿಲೆ ವಿಷಯಾ ವಯರ ಆಶ್ಶಿಲೆಂ. ಉಪನ್ಯಾಸಕ್ ಜಾವ್ನು ಡಾ|| ಯು.ಜಿ.ಶಾಸ್ತ್ರಿ ಆಯ್ಯಿಲೆ. ದೊನ್ನಿ ಗೋಷ್ಟಿ ವಿಷಯ ಭಾಷಾ ಸಂಪನ್ಮೂಲ, ಉಪನ್ಯಾಸಕ ಶ್ರೀ ಅರುಣ ಉಭಯಕರ, ಭಾಷಾ ಕೌಶಲ್ಯಚೆಂ ಅಭಿವೃದ್ಧಿ ವಿಧಾನಾಂ ಹೇ ವಿಷಯಾಚೇರಿ ತಿನ್ನಿ ಗೋಷ್ಠಿ ಘಡಲೆ. ಡಾ|| ಪಿ.ಪಿ. ಭಂಡಾರ್‌ಕರ್  ಉಪನ್ಯಾಸಕ ಜಾವ್ನು ಆಯ್ಯಿಲೆ. ಚಾರಿ ಗೋಷ್ಠಿ ವಿಷಯು ಕೊಂಕಣಿ ಭಾಷಾ ಶಿಕ್ಷಕ ಅರ್ಹತಾ ಆನಿ ಗುಣಾಂ, ಡಾ|| ಎಸ್.ಜಿ.ರಾಯ್ಕರ್ ಉಪನ್ಯಾಸಕ ಜಾವ್ನು ಆಯ್ಯಿಲೆಂ. ಡಾ|| ಜಿ.ಪಿ. ಶೇಟ್ ತಾನ್ನಿ ಉಪನ್ಯಾಸ್ ದಿಲೇಲೆ ಕೊಂಕಣಿ ಭಾಷಾ ಬೋಧನಾ ವಿಧಾನಾಂ ಮ್ಹಣಚೆ ವಿಷಯಾಚೇರಿ ಪಾಂಚಾ ಗೋಷ್ಠಿ ಚಲಯಾರಿ ಸಂಚೆ ಗೋಷ್ಠಿ ವಿಷಯು ಜಾವ್ನಾಶ್ಶಿಲೆಂ ಭಾಷಾ ಪಾಠ ಯೋಜನ, ಸ್ವರೂಪ, ವಿಧಾ. ಉಪನ್ಯಾಸಕ ಜಾವ್ನು ಆಯ್ಯಿಲೆ ಡಾ|| ಪಿ.ಪಿ. ಭಂಡಾರ್‌ಕರ್, ಸಾತ್ತವೆಂ ಗೋಷ್ಠಿ ಉಪನ್ಯಾಸಕ ಡಾ|| ಸುವರ್ಣಾ ಗಡ್, ವಿಷಯು ಜಾವ್ನಾಶ್ಶಿಲೆಂ ಪಠ್ಯಪುಸ್ತಕ ಸಮೀಕಾ ಆನಿ ಅಖೇರಿಕ ಭಾಷಾ ಮೌಲ್ಯ ಮಾಪನ-ಸ್ವರೂಪ ಆನಿ ವಿಧಾನಾಂ ಮ್ಹಣಚೆ ವಿಷಯಾಚೇರಿ ಚಲೇಲೆ ಗೋಷ್ಠಿಂತು ಡಾ| ಶೋಭಾ ನೀಲಾವರ ತಾನ್ನಿ ಉಪನ್ಯಾಸ ದಿಲ್ಲೆ. ಡಾ|| ಶಿವರಾಮ ಕಾಮತ್ ತಾನ್ನಿ ಗೋಷ್ಠಿಚೆ ಸಂಚಾಲಕ್ ಜಾವ್ನಾಶ್ಶಿಲೆ. ಹೇ ಕೊಂಕಣಿ ಭಾಷಾಭಿವೃದ್ಧಿಂತು ಚಾಂಗ ಸುರುವಾತ ಮ್ಹೊಣು ಸಾಂಗುಯೇತ.