Saraswati Prabha News

ಪ್ರಕಟಣೆಚೆ ೨೫ ವರ್ಷಾಂತು ಆಸ್ಸುಚೆ

ಕೊಂಕಣಿ ಪತ್ರಿಕಾ

ಸರಸ್ವತಿ ಪ್ರಭಾ ರಜತ ಮಹೋತ್ಸವ ಉಡ್ಗಾಸಾಕ ದೋನ ಕೃತಿ ಉಗ್ತಾವಣ

“ಸರಸ್ವತಿ ಪ್ರಭಾ ಕೊಂಕಣಿ ಮ್ಹಹಿನ್ಯಾಳೆ ಹುಬ್ಬಳ್ಳಿಂತು ೨೫ ವರ್ಷ ಪ್ರಕಟ ಜಾಲೀಲೆಚಿ ಏಕ ಅತ್ಯಾಶ್ಚರ್ಯ! ಕಿತಯಾಕ ಮ್ಹಳಯಾರಿ ಹುಬ್ಬಳ್ಳಿಂತು ಕೊಂಕಣಿ ಪರಿಸರ ಮಸ್ತ ಕ್ಷೀಣ ಜಾವ್ನು ಆಸ್ಸ. ತಾಜ್ಜ ಬಾಯ್ರಿ ಪತ್ರಿಕೆ ಆಶ್ರಯಾರಿ ಸ್ಕಾಲರ್‌ಶಿಫ್ ಫಂಡ್, ಯುವ ಪರಿಷತ್ತ, ೨೦ ವರ್ಷಾಕ ೨೦ ಕೊಂಕಣಿ ಪುಸ್ತಕ ಪ್ರಕಟಣ  ಕೆಲೀಲೆ, ಪರತ ಆತ್ತ ೨ ಕೊಂಕಣಿ ಕೃತಿ ಪ್ರಕಟಣ, ಹೇ ಪೂರಾ ಯವಜಿತಾನಾ ಏಕ ಸಂಸ್ಥ್ಯಾನ ಕೋರ‍್ಕಾ ಜಾಲೇಲೆ ಕಾಮ ಆರ‍್ಗೋಡು ಸುರೇಶ ಶೆಣೈ ಆಪಣಾಲೆ ಮಾತೃ ಭಾಷೆ ಖಾತ್ತಿರಿ ಕರ್ತಾ ಆಸ್ಸ ಮ್ಹೊಣು ಸಾಂಗೇತ. ಸಮಸ್ತ ಕೊಂಕಣಿ ಬಾಂಧವಾನಿ ತಾಂಕಾ ಬರಪೂರ ಸಹಕಾರ ದೀವ್ಕಾ. ಅಶ್ಶಿ ಮ್ಹೊಣು ಸಿಂಡಿಕೇಟ್ ಬ್ಯಾಂಕಾಚೆ ನಿವೃತ್ತ ಶ್ರೀ ಮೋಹನ ಆರ್. ಪ್ರಭು ತಾನ್ನಿ ಸಾಂಗಲೆ. ತಾನ್ನಿ ಆಲ್ತಾಂತು ಸರಸ್ವತಿ ಪ್ರಭಾ ದಪ್ತಾರಾಂತು “ಸರಸ್ವತಿ ಪ್ರಭಾ ಕೊಂಕಣಿ ಪತ್ರಾಚೆ ರಜತೋತ್ಸವಾಚೆ ಉಡ್ಗಾಸಾ ಖಾತ್ತಿರಿ ಪ್ರಕಟ ಕೆಲೀಲೆ ಶ್ರೀ ಕೆ. ಜನಾರ್ಧನ ಭಟ್, ಮೈಸೂರು ಹಾಂಗೆಲೆ “ಉಪನಿಷತ್ ಪ್ರಭಾ ಆನಿ ಶ್ರೀಮತಿ ಜಯಶ್ರೀ ನಾಯಕ್ ಯಕ್ಕಂಬಿ ಹಾಂಗೆಲೆ “ಕೊಂಕಣಿ ಕಾವ್ಯ ಮಾಳಾ ಕೊಂಕಣಿ ಕೃತಿ ಉಗ್ತಾವಣ ಕೋರ್ನು ಉಲೈತಾಶ್ಶಿಲೆ.
ಯೇವ್ಕಾರ ಕೋರ್ನು ಉಲೆಯಿಲೆ ಸಂಪಾದಕ ಆರ‍್ಗೋಡು ಸುರೇಶ ಶೆಣೈನ ‘ಹಾಕ್ಕ ಪೂರಾ ದಯಾಮಯ ಜಾಲೀಲೆ ಪರಮಾತ್ಮಾಲೆ ಕೃಪೇಚಿ ಕಾರಣ ಕೊಂಕಣಿ ಲೋಕಾನಿ ಸಕಾಲಿಕ ಮದ್ದತ್ ದಿಲ್ಲಿ. ಹಾಜ್ಜ ಒಟ್ಟು “ವಿವೇಕಾನಂದ ಜೀವನ ಘಟನಾ, ಚೆಟ್ನಿ, ಸಾರು, ತಾಂಬಳಿ ಆನಿ ಕಾಶಿ ತೀರ್ಥ ಮ್ಹಣಚೆ ವ್ಹರಲೀಲೆ ತೀನಿ ಕೃತಿ ಪ್ರಕಟ ಜಾತ್ತಾ ಆಸ್ಸುನು, ರಜತ ಮಹೋತ್ಸವ ಉಡ್ಗಾಸಾಕ ಸ್ಕಾಲರ್‌ಶಿಫ್ ನಿಧಿಕ ಕನಿಷ್ಠ ೨೫,೦೦೦/- ಘಾಲ್ಚೆ ಉದ್ದೇಶಯಿ ದವರೂನು ಘೆತ್ಲ್ಯಾ. ಪ್ರಕಟಿತ ಕೃತಿ ಕೊಂಕಣಿಗಾನ ಖರೀದಿ ಕೋರ್ನು ಪ್ರೋತ್ಸಾಹ ದಿವ್ಕಾ ಮ್ಹೊಣು ವಿನಂತಿ ಕೆಲ್ಲಿ. ಪತ್ರಿಕೆಚೆ ಅಭಿಮಾನಿ ಲೋಕ ಹೇ ವೇಳ್ಯಾರಿ ಉಪಸ್ಥಿತ ಆಶ್ಶಿಲೆ.