ಮೆ|| ಎಸ್.ಪಿ.ಕಾಮತಾಂಗೆಲೆ ಕಾಮತ್ ಹೊಟೇಲ್ ಅಲಂಕಾರಾಕ ೫೧ ವರ್ಷ
ಆಜಿ ಹೊಟೇಲ್ ಬಿಜಿನೆಸ್ ವರೇಕ ಗೌರವಾನ್ವಿತ ಸ್ಥಾನಾಕ ಪಾವಲಾ. ಶಂಬರಿಗಟ್ಲೆ, ಹಜಾರಗಟ್ಲೆ ಕೋಟಿ ರೂಪಯ ಹೇ ಕ್ಷೇತ್ರಾಕ ಹಾಡ್ನು ರೊಕೆಚೆ ವ್ಹಡ ವ್ಹಡ ಬಿಜಿನೆಸ್‌ಮೆನ್ ಆಜಿ ದೇಶ ವಿದೇಶಾಂತು ಬರಪೂರ ಲೋಕ ಆಸ್ಸತಿ. ಜಾಲ್ಯಾರಿ ಪನ್ನಾಸ-ಸಾಠ ವರ್ಷಾ ಮಾಗಶಿ ಹೊಟೇಲ ಚಲೈಚೆ ಮಸ್ತ ನಿಕೃಷ್ಟ ವೃತ್ತಿ ಜಾವ್ನಾಶ್ಶಿಲೆ. ದಾನ ಕೋರ್ಕಾ ಜಾಲೀಲೆ ಅನ್ನ; ವಿಕ್ಚೆ ನಿಕೃಷ್ಟ ಮ್ಹಣ್ಚೆ ಭಾವನಾ ಲೋಕಾಂತು ಆಶ್ಶಿಲೆ. ಅಸ್ಸಲೆ ಸಂಕ್ರಮಣ ಕಾಲಾರಿ ಜನ್ಮ ಭೂಂಯಿ ಬೇಂಗ್ರೆ ಸೋಡ್ನು ಹುಬ್ಬಳ್ಳಿಕ ಯವ್ನು ಹೊಟೇಲ್ ಉದ್ಯಮಾಂತು ‘ಕಾಮತ್ ಗ್ರೂಪ್ ಹೊಟೇಲ್ ಕೋರ್ನು ದೇಶ, ವಿದೇಶಾಂತು ನಾಂವ ಕಮಾಯ್ಲೆ ಮಹಾನುಭಾವ ದಿ|| ರಂಗಪ್ಪಾ ಪಾಂಡುರಂಗ ಕಾಮತ್. ಹಾಂಗೆಲೆ ಪ್ರೇರಣೆನ ಹೊಟೇಲ್ ಉದ್ಯಮಾಕ ಪಾಯು ದವರೂನು ಹೊಟೇಲ್ ಉದ್ಯಮಾಂತು ಆಪಣಾಲೆ ವಿಶೇಷತಾ ಆಸ್ಸ ಕೆಲೀಲೆ ದಿ|| ಶೇಷಗಿರಿ ಪಾಂಡುರಂಗ ಕಾಮತ್, ಜಾಂವೊ ಎಸ್.ಪಿ.ಕಾಮತ್ ಹಾನ್ನಿ. ಆಜಿಕ ಸುಮಾರ ೮೮ ವರ್ಷಾ ಮಾಕಶಿ ದಿನಾಂಕ. ೨೧-೧೧-೧೯೨೬ ಶ್ರೀ ಶೇಷಗಿರಿ ಕಾಮತ್ ಮಾಮ್ಮಾಲೆ ಶುಭ ಜನನ ಬೇಂಗ್ರೆಂತು ಜಾಲ್ಲೆ. ಆಪಣಾಲೆ ೧೮ ವರ್ಷ ವಯಾಂತು ಹುಬ್ಬಳ್ಳಿಕ ಆಯ್ಯಿಲೆ ಹಾನ್ನಿ ಜಲಾವ ರಾಕ್ಡಾ ಆಡ್ಡೆ ಸುರುವಾತ ಕೆಲ್ಲಿಂತಿ. ೨೧ ವರ್ಷ ವಯಾಂತು ಮ್ಹಳಯಾರಿ ಮೇ ೧೯೪೭ಕ ಶ್ರೀಮತಿ ಪ್ರೇಮಾ ಯಾನೆ ಸರಸ್ವತಿ ಮಾಯ್ಯೆ ಬರಶಿ ಹಾಂಗೆಲೆ ಲಗ್ನ ಜಾಲ್ಲೆ. ವ್ಹರಡೀಕೆಚೆ ಉಡ್ಗಿರೆ ಮ್ಹಣ್ಚವರಿ ಹಾಂಗೆಲೆ ಮ್ಹಾಲ್ಗಡ ಭಾಂವ ಶ್ರೀ ರಂಗಪ್ಪ ಕಾಮತ್ ಮಾಮ್ಮಾನಿ ಹಾಂಕಾ ದಿಲ್ಲೆ ಹುಬ್ಬಳ್ಳಿಚೆ ಗೂಡ್ಸಶೆಡ್ ರಸ್ತ್ಯಾರಿ ಆಸ್ಸುಚೆ “ಇಂಡಿಯನ್ ರೇಲ್ವೆ ಇನ್ಸಟ್ಯೂಟ್ ಕ್ಯಾಂಟೀನ. ಹೇಂಚಿ ಶ್ರೀ ಶೇಷಗಿರಿ ಮಾಮ್ಮಾಲೆ ಪಯಲೇಚೆ ಹೊಟೇಲ್ ಜಾವ್ನಾಸ್ಸ. ೯ ವರ್ಷಾ ನಂತರ ಮ್ಹಳಯಾರಿ ೧೯೫೬ಂತು ತಾನ್ನಿ ಗದಗ ರಸ್ತ್ಯಾಂತು ರೇಲ್ವೆ ಡಬ್ಬಿಂತು ಹೊಟೇಲ್ ಸುರುವಾತ ಕೆಲ್ಲೆ. ತಾಕ್ಕಾ “ಡಬ್ಬಾ ಕ್ಯಾಂಟೀನ “ರೇಲ್ವೆ ಕಾ ಡಬ್ಬಾ ಮ್ಹೊಣೂ ಆಪೈತಾಶ್ಶಿಲೆ. ಆಜಿ ಸುಸಜ್ಜಿತ ಇಮಾರತ್ತಾಂತು ಸರ್ವ ಸುವಿಧ ಉಪಲಬ್ಧ ಆಶ್ಶಿಲೆ “ಕಾಮತ ಕೆಫೆ ಮ್ಹೊಣು ಜಾಲ್ಯಾರಿಚಿ ಲೋಕ ಪೂರಾ ತಾಕ್ಕಾ ಡಬ್ಬಾ ಕ್ಯಾಂಟೀನ ಮ್ಹೊಣೂಚಿ ಆಪೈತಾತಿ.ಶ್ರೀ ಶೇಷಗಿರಿ ಕಾಮತ್ ಮಾಮ್ಮಾಲೆ ಜೀವನಾಕ ಏಕ ಟರ್ನಿಂಗ್ ಪಾಯಿಂಟ ಜಾಲೀಲೆ ೧೯೬೨ ಇಸ್ವೆಂತು ತಾನ್ನಿ ಹುಬ್ಬಳ್ಳಿಚೆ ದಾಜೀಬಾನ ಪೇಟೆಂತು “ಅಲಂಕಾರ ಹೊಟೇಲ್ ಸುರುವಾತ ಕೆಲ್ಲ ಮಾಗಿರಿ. ಅಲಂಕಾರ ಹೊಟೇಲ್ ಆರಂಭ ಜಾಲ್ಲ ಉಪರಾಂತ ತಾನ್ನಿ ಮಾಕ್ಷಿ ಘೂವ್ನು ಪಳೋವ್ಕಾ ಜಾಲೀಲೆ ಪರಿಸ್ಥಿತಿ ಯೇನಿ. ಪುಲ್ಲಾ ಮಾಳಾಕ ಫೂಲ ಗಾಂತಿಲಿ ವರಿ ಏಕ್ಕಾ ಮಾಕಶಿ ಏಕ ಹೊಟೇಲ್ ಆರಂಭ ಕರ್ತಾ ಘೆಲ್ಲಿಂತಿ. ೧೯೬೩ಂತು ನಿಪ್ಪಾಣಿಂತು ‘ಕೆ.ಎಸ್.ಆರ್.ಟಿ.ಸಿ. ಕ್ಯಾಂಟೀನ, ೧೯೬೭ಂತು ಬೆಂಗ್ಳೂರಾಂತು ಕಾಮತ ರೆಸ್ಟೋರೆಂಟ್, ೧೯೭೦ಂತು ಬೆಂಗ್ಳೂರ‍್ಚೆ ಜೆ.ಸಿ. ರಸ್ತ್ಯಾರಿ ಆನ್ನೇಕ ಕಾಮತ ರೆಸ್ಟೋರೆಂಟ್, ೧೯೭೧ಂತು ಬೆಂಗಳೂರ‍್ಚೆ ಮಿನರ್ವ ವೃತ್ತಾಂತು ‘ಕಾಮತ ಲಾಡ್ಜ & ರೆಸ್ಟೋರೆಂಟ್, ೧೯೭೨ಂತು ಬೆಂಗಳೂರ‍್ಚೆ ಯುನಿಟಿ ಬಿಲ್ಡಿಂಗಾಂತು ಆನ್ನೇಕ ಕಾಮತ ರೆಸ್ಟೋರೆಂಟ್, ೧೯೭೫ಂತು ಬೆಂಗಳೂರ‍್ಚೆ ರಿಸರ್ವ ಬ್ಯಾಂಕಾ ಎದ್ರಾಕ ಕಾಮತ್ ರಿಫ್ರೆಶ್‌ಮೆಂಟ್, ಆನಿ ಟೌನ್ ಹಾಲಾ ಎದ್ರಾಕ ಕಾಮತ ರೆಸ್ಟೋರೆಂಟ್.
೧೯೭೬ಂತು ಹುಬ್ಳಿಚೆ ದುರ್ಗದ ಬೈಲಾಂತು ಕಾಮತ್ ಕೆಫೆ, ೧೯೭೯ಂತು ಹುಬ್ಳಿಂತು ಕಾಮತ ಟೀ ಡಿಪೋ, ೧೯೮೧ಂತು ಬೆಳಗಾವಿಂತು ಕಾಮತ ರೆಸ್ಟೋರೆಂಟ್, ೧೯೮೨ಂತು ಮುಂಬೈಂತು ಕಾಮತ್ ರೆಸ್ಟೊರೆಂಟ್ ಅಶ್ಶಿ ವೀಸಾ ಪಶಿ ಚ್ಹಡ ಸಂಸ್ಥೊ ಆರಂಭ ಕೋರ್ನು ದೇಡ ಹಜಾರಾ ಪಶಿ ಚ್ಹಡ ಲೋಕಾಂಕ ತಾನ್ನಿ ಶಿತ್ತಾ ವಾಟ ದಾಖಯಿಲೆ. ವ್ಹಡ ದಾನಿ, ಆರಂಭ ಕಾಲಾರಿ ಸರಸ್ವತಿ ಪ್ರಭಾ ಕೊಂಕಣಿ ಮ್ಹಹಿನ್ಯಾಳ್ಯಾಚೆ ಪೋಷಕ ಸೈತ ಜಾವ್ನಾಶ್ಶಿಲೆ ಶ್ರೀ ಶೇಷಗಿರಿ ಕಾಮತ ಮಾಮ್ಮಾಲೆ ಸಾಧನಾ ಅಪಾರ. ಏಕ್ದೋನ ಗ್ರಂಥ ಬರೈಚೆ ತಿತ್ತುಲೆ ಅಪರಿಮಿತ.
ಹಾನ್ನಿ ೧೯೬೨ ಇಸ್ವೆಂತು ಸುರುವಾತ ಕೆಲೀಲೆ ಹೊಟೇಲ್ ಅಲಂಕಾರ ಆತ್ತ ‘ಕಾಮತ್ ಹೊಟೇಲ್ ಅಲಂಕಾರ ಜಾವ್ನು ಪೂರ್ತಿ ೫೧ ವರ್ಷಾಚೆ ಸಾರ್ಥಕ ಸೇವಾ ಪೂರ್ತಿ ಕೆಲ್ಲಯಾ. ಶ್ರೀ ಶೇಷಗಿರಿ ಕಾಮತ್ತಾಂಗೆಲೆ ಮೆ|| ಎಸ್.ಪಿ. ಕಾಮತ್ ಗ್ರೂಪ್ ಆಪ್ ಹೊಟೇಲ್ಲಾಚೆ ಕೇಂದ್ರ ಕಛೇರಿ “ಕಾಮತ್ ಹೊಟೇಲ್ ಅಲಂಕಾರ ಜಾವ್ನಾಶ್ಶಿಲೆ. ಹಾಂಗಾ ದಾಕೂನೂಂಚಿ ರಾಜ್ಯ, ಪರ ರಾಜ್ಯಾಂತು ಆಸ್ಸುಚೆ ತಾಂಗೆಲೆ ಹೊಟೇಲ್ಲಾಚೆ ನಿಯಂತ್ರಣ ಚಲ್ತಾಶ್ಶಿಲೆ.
ಹೇ ಕಾಮತ್ ಹೊಟೇಲ ಅಲಂಕಾರ ಪೂಡೆಚಾನ ಸುಸಜ್ಜಿತ. ಹಾಂಗಾ ಜನರಲ್ ವಿಭಾಗ, ಏರ್‌ಕಂಡಿಶನ್ ರೆಸ್ಟೋರೆಂಟ್, ಜವಣ, ದಕ್ಷಿಣ ಆನಿ ಉತ್ತರ ಭಾರತೀಯ ಖಾಣ-ಜವಣ, ಥಂಡ ಪಾನೀಯ ಸರ್ವ ಮೆಳ್ತಾ. ಸುರುವಾತ ಜಾಲೀಲ ದಾಕೂನು ಚ್ಹೊಖ ಆನಿ ರೂಚಿ ಹಾಜ್ಜೆ ವೈಶಿಷ್ಠ್ಯ ಜಾವ್ನಾಸ್ಸ. ಶ್ರೀ ಶೇಷಗಿರಿ ಪಾಂಡುರಂಗ ಕಾಮತ್ ಮಾಮ್ಮಾನಿ ಹುಬ್ಬಳ್ಳಿ ಗೌಡ ಸಾರಸ್ವತ ಸಮಾಜಾಚೆ ಅಧ್ಯಕ್ಷ ಆಶ್ಶಿಲೆ ಸಂದರ್ಭಾರಿ ಪ್ರತಿ ವರ್ಷ ಜೂನ್ ೨೪ ತಾರೀಖೆಕ ‘ಸಮಾಜ ಡೇ ಚಲ್ತಾಶ್ಶಿಲೆ. ತೆದ್ದನಾ ಸಮಾಜಾಚೆ ಗಣ್ಯ ಆನಿ ವಿಂಗಡ ಗಾಂವ್ಚಾನ ಸಮಾಜ ಡೇಕ ಆಯ್ಯಿಲೆ ಸರ್ವ ಸೊಯರ‍್ಯಾಂಕ ಆಪಣಾಲೆ ಸ್ವಂತ ಖರ್ಚಾಂತು ತಾನ್ನಿ ಹಾಂಗಾಚಿ ಔತಣ ಕೂಟ ವ್ಯವಸ್ಥ ಕರ್ತಾ ಆಶ್ಶಿಲೆ. ತಾನ್ನಿ ೧೭ ವರ್ಷ ಕಾಳ ‘ಹೊಟೇಲ್ ಉದ್ದಿಮೆದಾರರ ಸಂಘಾಚೆ ಅಧ್ಯಕ್ಷ ಜಾವ್ನಾಶ್ಶಿಲೆ. ಸುಮಾರ ತಿತ್ಲೆ ಕಾಳ ಹುಬ್ಬಳ್ಳಿ ಜಿ.ಎಸ್.ಬಿ. ಸಮಾಜಾಚೆ ಅಧ್ಯಕ್ಷ ಜಾವ್ನಾಶ್ಶಿಲೆ. ಕೆಲವ ವರ್ಷಾ ಮಾಕಶಿ ಹಾನ್ನಿ ದೈವಾಧೀನ ಜಾಲೇಲ ನಂತರ ಸೈತ ಹಾಂಗೆಲೆ ಚರ್ಡುಂವಾನಿ ಬಾಪಯ್ನ ದಾಖಯ್ಲೆ ವಾಟ್ಟೇರಿ ಚಮ್ಕತಾ ಮೆ|| ಎಸ್.ಪಿ ಕಾಮತ್ ಗ್ರೂಪ್ ಆಪ್ ರೆಸ್ಟೋರೆಂಟಾಚೆ ಪ್ರತಿಷ್ಠಾ ಆನಿ ಕೀರ್ತಿ ದಶ ದಿಕ್ಕಾಂತು ಪಸರೂಚೆ ವರಿ ಕೆಲ್ಲಯಾ. ಆತ್ತ “ಕಾಮತ್ ಹೊಟೇಲ್ ಅಲಂಕಾರ ಶ್ರೀ ಸದಾನಂದ ಶೇಷಗಿರಿ ಕಾಮತ್ ಹಾಂಗೆಲೆ ಸಮರ್ಥ ನಾಯಕತ್ವಾರಿ ಚಲ್ತಾ ಆಸ್ಸುನು ಮಸ್ತ ಜನಾನುರಾಗಿ ಜಾಲ್ಲಯಾ. ಮುಖಾವೈಲೆ ದಿವಸಾಂತು ಹೇ ಹೊಟೇಲ್ ಆನಿ ಮೆ|| ಎಸ್.ಪಿ. ಕಾಮತ್ ಗ್ರೂಪಾಚೆ ಸರ್ವ ಹೊಟೇಲ್ ಆನ್ನಿಕೆ ಜನಾನುರಾಗಿ ಜಾಂವೊ ಮ್ಹೊಣು ಆಮ್ಮಿ ಆಶಯ ಕರತಾತಿ. - ಸುರೇಶ
ಅಖಿಲ ಭಾರತ ಕೊಂಕಣಿ ಪರಿಷತ್ ಅಧಿವೇಶನ
ಅಖಿಲ ಭಾರತ ಕೊಂಕಣಿ ಪರಿಷತ್ತಾಚೆ ೨೯ವೆಂ ಅಧಿವೇಶನ ಬೆಳಗಾವಿಚೆ ಮಹಾತ್ಮಾಗಾಂಧಿ ಭವನಾಂತು ೨೦೧೪ಚೆ ಫೆಬ್ರವರಿ. ೨೮, ಮಾರ್ಚ ೧ ಆನಿ ೨ಕ ಆಯೋಜನ ಜಾಲ್ಲ್ಯಾ ಮ್ಹಣಚೆ ಖಬ್ಬರ ಮೆಳ್ಳಾ. ೧೯೩೯ ಇಸ್ವೆಂತು ಮಾಧವ ಮಂಜುನಾಥ ಶಾನಭಾಗ ಮಾಮ್ಮಾ ದಾಕೂನು ಕಾರವಾರಾಂತು ಸ್ಥಾಪಿತ ಜಾವ್ನು ದೋನ ವರ್ಷಾಕ ಏಕ್ಪಂತ ಚೊಲ್ಚೆ ಅಧಿವೇಶನ ಇತ್ತುಲೆ ಭಿತ್ತರಿ ದೇಶಾಚೆ ವಿಂಗವಿಂಗಡ ರಾಜ್ಯಾಂತು ಚಲ್ಲಾ. ೭೫ ವರ್ಷಾಚೆ ಅಮೃತ ಮಹೋತ್ಸವ ವರ್ಷಾಂತು ಬೆಳಗಾವಿಂತು ಆಯೋಜನ ಕೆಲೀಲೆ ೨೯ವೆಂ ಅಧಿವೇಶನ ಅರ್ಥಪೂರ್ಣ ಜಾವ್ನು ಯಶಸ್ವಿ ಕೊರಚಾಕ ಸಂಘಟಕ ಸರ್ವ ಪ್ರಯತ್ನ ಕರತಾ ಆಸ್ಸತಿ.
ಡಿ. ೨೯ ದಿವಸು ಪಣಜಿಚೆ ಮನೊಶಾಂತಿ ಹೋಟೆಲಾಂತು ಅಧ್ಯಕ್ಷ ಅರವಿಂದ ಭಾಟಿಕರ್ ಅಧ್ಯಕ್ಷತೆಂತು ಚಲೇಲೆ ಪರಿಷತ್ತಾಚೆ ಜನರಲ್ ಕೌನ್ಸಿಲ್ ಸಭಾಂತು ೨೯ವೆಂ ಅಧಿವೇಶನಾಚೆ ಸ್ವಾಗತ ಸಮಿತಿಚೆ ಅಧಿಕೃತ ಘೋಷಣ ಜಾಲ್ಲೆ.
ಸ್ವಾಗತ ಸಮಿತಿ ಪದಾಧಿಕಾರಿಗಳು : ಬಿ.ಎ. ಕುಟಿನೊ (ಗೌರವಾಧ್ಯಕ್ಷ), ವಿ.ವಿ. ಶೆಣೈ (ಅಧ್ಯಕ್ಷ), ಮುಕುಂದ ಕಾಮv (ಪ್ರ.ಕಾರ್ಯದರ್ಶಿ), ಜಾನ್ ಡಿಸೊಜಾ (ಕೋಶಾಧಿಕಾರಿ), ಬಸವರಾಜ ರೊಟ್ಟಿ, ವಿ.ಎ. ಬಾಂದೊಡೆಕರ, ಮುರಳಿಧರ ಪ್ರಭು, ಡಿ.ಜಿ. ಬೊರಕರ, ರಾಮಮೋಹನ ನಾಯಕ, ಪೂಜಾ ನಾಯಕ, ಪುಷ್ಪಾ ಪಾಟೀಲ, ವಿನಾಯಕ ಕಾಮತ, ಅನುರಾಧಾ ಕೆ., ತೇಜಸ್ವಿನಿ ಪೈ, ವಿ.ವಿ. ಪೈ, ಹೆನ್ರಿ ಪಿಂಟೋ, ರಾಜಾರಾಮ ರಾಯ್ಕರ (ಸದಸ್ಯ). ಹೇ ಅಧಿವೇಶನಾಂತು ಕೊಂಕಣಿಗಾನ ಸರ್ವಾನಿ ವಾಂಟೊ ಘೇವ್ನು ಕೊಂಕಣಿ ಭಾಷಾಭಿವೃದ್ಧಿಕ ತಾಂಗೆಲೆ ಬಲ, ಪ್ರೋತ್ಸಾಹ ದೀವ್ನು, ಆಮ್ಗೆಲೆ ಸಂಘಟನಾ ಶಕ್ತಿ ದುಸರ‍್ಯಾಂಕ ದಾಖಯ್ಕಾ. ಕೊಂಕಣಿ ಭಾಷ ವಿಂಗಡ ಭಾಷೆಚೆ ಸ್ಥರಾಕ ಯವ್ಚೆ ವರಿ ಕೋರ್ಕಾ.
ವಿಶ್ವ ಕೊಂಕಣಿ ಕೇಂದ್ರ ದಾಕೂನು ಪುಸ್ತಕ ಮೇಳ.
ಕೇಂದ್ರ ಸರಕಾರ‍್ಚೆ ಅಧೀನ ಸಂಸ್ಥೆ ನವದಿಲ್ಲಿ ನ್ಯಾಷನಲ್‌ಬುಕ್ ಟ್ರಸ್ಟ್, ಕೊಂಕಣಿ ಭಾಸ ಅನಿ ಸಂಸ್ಕೃತಿ ಪ್ರತಿಷ್ಠಾನ ವಿಶ್ವ ಕೊಂಕಣಿ ಕೇಂದ್ರ ಸಹಯೋಗಾನಿ ಜ. ೪ ದಾಕೂನು ೧೨ ಪರ್ಯಂತ ರಾಷ್ಟ್ರ ಮಟ್ಟಾಚೆ ’ಮಂಗಳೂರು ಪುಸ್ತಕ ಮೇಳ’ ನೆಹರೂ ಮೈದಾನಾಂತು ಚಲ್ಲೆ. ಅಂದಾಜು ೨೦೦ ಪಶಿ ಚ್ಹಡ ಪುಸ್ತಕ ದುಕಾನಾಚಿ ಹೇ ಪ್ರದರ್ಶನಾಂತು ವಾಂಟೊ ಘೆತ್ತಿಲಿ. ಮಂಗಳೂರಾಂತು ಜನ್ಮುನು, ಶಿಕ್ಪಣ ಘೇವ್ನು ಅಂತಾಃರಾಷ್ಟ್ರೀಯ ಸ್ಥರಾರಿ ನಾಂವ ಕಮಾಯ್ಲಿ ಕಮಲಾದೇವಿ ಚಟ್ಟೋಪಾಧ್ಯಾಯ ತಾಂಗೆಲೆ ೧೧೦ ಜನ್ಮದಿವಸಾಚೆ ಉಡ್ಗಾಸಾಕ ಸಾಹಿತ್ಯ, ಸಂಸ್ಕೃತಿ ಆನಿ ಮಹಿಳಾ ಸಶಕ್ತೀಕರಣಾಚೆ ೩ ದಿವಸಾಚೆ ಅಧಿವೇಶನ ಚಲ್ಲೆ. ಅಧಿವೇಶನಾಂತು ಪ್ರಬಂಧ ಮಂಡನ, ಚರ್ಚಾಗೋಷ್ಠಿ, ಸಂವಾದ ಆನಿ ಸಾಂಸ್ಕೃತಿಕ ಕಾರ್ಯಕ್ರಮ ಆಶ್ಶಿಲೆ. ಕಮಲಾದೇವಿ ಚಟ್ಟೋಪಾಧ್ಯಾಯ ಕೊಂಕಣಿ ನಾಟಕ ಮಹೋತ್ಸವು ಜ. ೮ ದಾಕೂನು ೧೦ ಪರ್ಯಂತ ಪ್ರತಿ ದಿವಸು ಸಾಂಜೆಕ ಮಂಗಳೂರು ಪುರಭವನಾಂತು ಚಲ್ಲೆ.
ತೊನ್ಸೆಂತು ಧಾರ್ಮಿಕ ಚಿಂತನ
ತೋನ್ಸೆ ಪೈ ಕುಟುಂಬಸ್ಥಾಲೆ ಮ್ಗಾಲ್ಗಡೆ ಘರಾಂತು ಆಚರಣ ಕೋರ್ನು ಘೇವ್ನು ಎತ್ತಾ ಆಶ್ಶಿಲೆ ಶ್ರೀ ಸತ್ಯನಾರಾಯಣ ವ್ರೃತಾಚೆ ೧೫೧ಚೆ ಆಚರಣ ತಾ. ೨೯.೧೨.೨೦೧೩ ದಿವಸು ಶ್ರೀಮತಿ ಹೇಮಲತಾ ಆನಿ ಶ್ರೀ ಬಿ. ಚಂದ್ರಕಾಂತ ಪೈ, ಉಡುಪಿ ಹಾಂಗೆಲೆ ಸುಪುತ್ರ ರವಿಕಿರಣ್ ಪೈ ದಂಪತಿನ ಸೇವಾದಾರ ಜಾವ್ನು ಚಲೈಲೆ. ಸೇವೆದಾರಾಲೆ ೨೫೦ ವರ್ಷಾಂಚೆ ಇತಿಹಾಸ ಆಸ್ಸುಚೆ ೯ ಪೀಳ್ಗಿಚೆ ವಂಶಾಚೆ ವಿವರ ಸಭೆಕ ದೀವ್ನು ಮ್ಹಾಲ್ಗಾಡ್ಯಾಲೆ ಸ್ಮರಣ ಕೆಲ್ಲೆ. ವೃತ ವೇ. ಶ್ರೀ ಕೆ. ರಾಮಚಂದ್ರ ಅವಧಾನಿ ಹಾಂಗೆಲೆ ಪುರೇತು ಪಣಾಂತು ಚಲ್ಲೆ. ತೋನ್ಸೆ ಶ್ರೀ ಮಹಾಲಸಾ ನಾರಾಯಣೀ ಭಜನಾ ಮಂಡಳಿ ದಾಕೂನು ಭಜನಾ ಸೇವಾ ಚಲ್ಲೆ. ಅಧ್ಯಕ್ಷ ಪಣ ನಾರಾಯಣ ಕುಡ್ವಾ, ಮಣಿಪಾಲ ತಾನ್ನಿ ಘೆತ್ತಿಲೆ. ನಾಗೇಶ್ ಕಾಮತ್, ಮಣಿಪಾಲ ಆನಿ ಟಿ. ಲಕ್ಷ್ಮೀನಾರಾಯಣ ಪೈ, ಉಡುಪಿ ಹಾನ್ನಿ ಸೊಯರೆ ಜಾವ್ನು ಆಯ್ಯಿಲೆ. ಟಿ. ಗಣೇಶ್ ಪೈನಿ ಯೇವ್ಕಾರ ಕೋರ್ನು ಆಬಾರ ಮಾನ್ಲೆ. ಮುಖಾವೈಲೆ ೧೫೨ಚೆ ಶ್ರೀ ಸತ್ಯನಾರಾಯಣ ವೃತವು ತಾ. ೨೬-೧-೨೦೧೪ ದಿವಸು ಚಲ್ತಾ.
ಸರಸ್ವತಿ ಪ್ರಭಾ ರಜತ ಮಹೋತ್ಸವ ಉಡ್ಗಾಸಾಕ ದೋನ ಕೃತಿ ಉಗ್ತಾವಣ
“ಸರಸ್ವತಿ ಪ್ರಭಾ ಕೊಂಕಣಿ ಮ್ಹಹಿನ್ಯಾಳೆ ಹುಬ್ಬಳ್ಳಿಂತು ೨೫ ವರ್ಷ ಪ್ರಕಟ ಜಾಲೀಲೆಚಿ ಏಕ ಅತ್ಯಾಶ್ಚರ್ಯ! ಕಿತಯಾಕ ಮ್ಹಳಯಾರಿ ಹುಬ್ಬಳ್ಳಿಂತು ಕೊಂಕಣಿ ಪರಿಸರ ಮಸ್ತ ಕ್ಷೀಣ ಜಾವ್ನು ಆಸ್ಸ. ತಾಜ್ಜ ಬಾಯ್ರಿ ಪತ್ರಿಕೆ ಆಶ್ರಯಾರಿ ಸ್ಕಾಲರ್‌ಶಿಫ್ ಫಂಡ್, ಯುವ ಪರಿಷತ್ತ, ೨೦ ವರ್ಷಾಕ ೨೦ ಕೊಂಕಣಿ ಪುಸ್ತಕ ಪ್ರಕಟಣ ಕೆಲೀಲೆ, ಪರತ ಆತ್ತ ೨ ಕೊಂಕಣಿ ಕೃತಿ ಪ್ರಕಟಣ, ಹೇ ಪೂರಾ ಯವಜಿತಾನಾ ಏಕ ಸಂಸ್ಥ್ಯಾನ ಕೋರ್ಕಾ ಜಾಲೇಲೆ ಕಾಮ ಆರ್ಗೋಡು ಸುರೇಶ ಶೆಣೈನಿ ಆಪಣಾಲೆ ಮಾತೃ ಭಾಷೆ ಖಾತ್ತಿರಿ ಕರ್ತಾ ಆಸ್ಸ ಮ್ಹೊಣು ಸಾಂಗೇತ. ಸಮಸ್ತ ಕೊಂಕಣಿ ಬಾಂಧವಾನಿ ತಾಂಕಾ ಬರಪೂರ ಸಹಕಾರ ದೀವ್ಕಾ. ಅಶ್ಶಿ ಮ್ಹೊಣು ಸಿಂಡಿಕೇಟ್ ಬ್ಯಾಂಕಾಚೆ ನಿವೃತ್ತ ಶ್ರೀ ಮೋಹನ ಆರ್. ಪ್ರಭು ತಾನ್ನಿ ಸಾಂಗಲೆ. ತಾನ್ನಿ ಆಲ್ತಾಂತು ಸರಸ್ವತಿ ಪ್ರಭಾ ದಪ್ತಾರಾಂತು “ಸರಸ್ವತಿ ಪ್ರಭಾ ರಜತೋತ್ಸವಾಚೆ ಉಡ್ಗಾಸಾ ಖಾತ್ತಿರಿ ಪ್ರಕಟ ಕೆಲೀಲೆ ಶ್ರೀ ಕೆ. ಜನಾರ್ಧನ ಭಟ್, ಮೈಸೂರು ಹಾಂಗೆಲೆ “ಉಪನಿಷತ್ ಪ್ರಭಾ ಆನಿ ಶ್ರೀಮತಿ ಜಯಶ್ರೀ ನಾಯಕ್ ಯಕ್ಕಂಬಿ ಹಾಂಗೆಲೆ “ಕೊಂಕಣಿ ಕಾವ್ಯ ಮಾಳಾ ಕೊಂಕಣಿ ಕೃತಿ ಉಗ್ತಾವಣ ಕೋರ್ನು ಉಲೈತಾಶ್ಶಿಲೆ.
ಯೇವ್ಕಾರ ಕೋರ್ನು ಉಲೆಯಿಲೆ ಸಂಪಾದಕ ಆರ್ಗೋಡು ಸುರೇಶ ಶೆಣೈನ ಹಾಕ್ಕ ದಯಾಮಯ ಜಾಲೀಲೆ ಪರಮಾತ್ಮಾಲೆ ಕೃಪೇಚಿ ಕಾರಣ ಹಾಜ್ಜ ಒಟ್ಟು “ವಿವೇಕಾನಂದ ಜೀವನ ಘಟನಾ, “ಚೆಟ್ನಿ, ಸಾರು, ತಾಂಬಳಿ ಆನಿ “ಕಾಶಿ ತೀರ್ಥ ಮ್ಹಣಚೆ ವ್ಹರಲೀಲೆ ತೀನಿ ಕೃತಿ ಪ್ರಕಟ ಜಾತ್ತಾ ಆಸ್ಸುನು, ರಜತ ಮಹೋತ್ಸವ ಉಡ್ಗಾಸಾಕ ಸ್ಕಾಲರ್‌ಶಿಫ್ ನಿಧಿಕ ಕನಿಷ್ಠ ೨೫,೦೦೦/- ಘಾಲ್ಚೆ ಉದ್ದೇಶಯಿ ದವರೂನು ಘೆತ್ಲ್ಯಾ. ಪ್ರಕಟಿತ ಕೃತಿ ಕೊಂಕಣಿಗಾನ ಖರೀದಿ ಕೋರ್ನು ಪ್ರೋತ್ಸಾಹ ದಿವ್ಕಾ ಮ್ಹೊಣು ವಿನಂತಿ ಕೆಲ್ಲಿ. ಹೇ ವೇಳ್ಯಾರಿ ಸುಮಾರ ಅಭಿಮಾನಿ ಲೋಕ ಉಪಸ್ಥಿತ ಆಶ್ಶಿಲೆ.
