J.V.Pai, Bangalore

ಕೆಂಪೇಗೌಡ ಪ್ರಶಸ್ತಿ ಪುರಸ್ಕೃತ ಶ್ರೀ ಜಗನ್ನಾಥ ವಿ.ಪೈ, ಬೆಂಗಳೂರು

ಬೆಂಗಳೂರ್‍ಚೆ ಪೈ ಗ್ರೂಪ್ಸ್ ಆಫ್ ಹೋಟೇಲ್ಸ್ ಹಾಜ್ಜೆ ಮ್ಯಾನೆಜಿಂಗ್ ಡೈರೆಕ್ಟರ್ ಶ್ರೀ ಜಗನ್ನಾಥ್ ವಿ.ಪೈ ಹಾನ್ನಿ ಬೆಂಗಳೂರು ಮಹಾ ನಗರ ಪಾಲಿಕೆಚೇನ( ಬಿ.ಬಿ.ಎಮ್.ಪಿ.) ದಿವಚೆ ೨೦೧೩ ಸಾಲಾಚೆ ಪ್ರತಿಷ್ಠಿತ ಕೆಂಪೇಗೌಡ ಪ್ರಶಸ್ತಿನ ಪುರಸ್ಕೃತ ಜಾಲೇಲೆ ಸಮಗ್ರ ಜಿ.ಎಸ್.ಬಿ. ಬಾಂಧವಾಂಕ ಅಭಿಮಾನಾಚೆ ವಿಷಯು. ತಾ. ೨೯-೦೬-೨೦೧೩ ದಿವಸು ಬೆಂಗಳೂರ್‍ಚೆ ಬಿಬಿ‌ಎಂಪಿ ಪ್ರಧಾನ ಕಛೇರಿಂತು ಡಾ|| ರಾಜಕುಮಾರ ಗಾಜಿನಮನೆ ಆವಾರಾಂತು ಕರ್ನಾಟಕ ರಾಜ್ಯಾಚೆ ಮುಖ್ಯಮಂತ್ರಿ ಶ್ರೀ ಸಿದ್ದರಾಮಯ್ಯ ತಾಂಗೆಲೆ ಉಪಸ್ಥಿತೀರಿ ಹ್ಯಾ ಪ್ರಶಸ್ತಿ ಪ್ರಧಾನ ಜಾಲ್ಲೆ.
ಶ್ರೀ ಜಗನ್ನಾಥ ವಿ.ಪೈ ಮಾಮು ವ್ಹಡ ಪ್ರಮಾಣಾರಿ ಸಮಾಜ ಸೇವಾ ಕರತಾ ಆಸ್ಸತಿ. ಹಾನ್ನಿ ಸಬಾರ ಗರೀಬ ಲೋಕಾಂಕ ನೌಕರಿ ದೀವ್ನು, ಯೋಗ್ಯ ಪಗಾರು, ಸರ್ವ ಸೌಲಭ್ಯ ದೀವ್ನು ಆದರ್ಶನೀಯ ಹೋಟೇಲ್ ಉದ್ಯಮಿ ಮ್ಹಣೋವ್ನು ಘೆತಲ್ಯಾ. ಆನಿ ಸಬಾರ ಸಂಘ-ಸಂಸ್ಥೆಂತು ಸಕ್ರಿಯ ಜಾವ್ನು ವಾಂಟೊ ಘೇವ್ನು ಆಪಣಾಂಗೆಲೆ     ತನು-ಮನ-ಧನಾಚೆ ಸೇವಾ ಪಾವೈತಾ ಆಸ್ಸತಿ.  ಹಾಂಗೆಲೆ ಪೈ ಗ್ರೂಪ್ಸ್ ಹೋಟೇಲ್ ಬೆಂಗಳೂರ, ತಿರುಪತಿ, ಮೈಸೂರಾಂತು ಜನಪ್ರಿಯ ಜಾವ್ನು ಆತ್ತ ಉತ್ತರ ಕರ್ನಾಟಕಾಚೆ ವಾಣಿಜ್ಯ ರಾಜಧಾನಿ ಮ್ಹಣೋವ್ನು ಘೆವ್ಚೆ ಹುಬ್ಬಳ್ಳಿಕ ಸೈತ ಪಾದಾರ್ಪಣ ಕರತಾ ಆಸ್ಸ. ಹುಬ್ಬಳ್ಳಿ-ಧಾರವಾಡ ಹೈವೇ ವಯರಿ ಉಣಕಲ್ ಥಂಳೆ ಲಾಗ್ಗಿಚೆ ಶ್ರೀನಗರ ಕ್ರಾಸಾಂತು ಹಾಂಗೆಲೆ ಗ್ರೂಪಾಚೆ “ದಿ ಪ್ರೆಸಿಡೆಂಟ್ ಹೋಟೇಲ್ ಸದ್ಯಾಂತು ಆರಂಭ ಜಾವ್ಚೆ ಆಸ್ಸುನು ಹಾಂತು ೭೦ ರೂಮ್ಸ್ ಆನಿ ಸೂಟ್ಸ್, ಉಪಹಾರ ಗೃಹ, ಬೋರ್ಡ ರೂಮ್, ಬ್ಲ್ಯಾಂಕೇಟ್ ಹಾಲ್, ಕಾನ್ಪರೆನ್ಸ್ ಹಾಲ್ ಇತ್ಯಾದಿ ಸುವಿಧ  ಉಪಲಬ್ಧ ಜಾತ್ತಾ. ಹ್ಯಾ ಪೂರಾ ಸಾಕಾರ ಜಾವ್ಚೆ ಖಾತ್ತಿರಿ ಶ್ರೀ ಜಗನ್ನಾಥ ವಿ.ಪೈ ಆನಿ ತಾಂಗೆಲೆ ಟೀಮ್ ತಯಾರ ಜಾವ್ನು ಆಸ್ಸತಿ. ಮೆ|| ಪೈ ಗ್ರೂಪಾಂಚೇಲೆ ಸೇವಾ ಬೆಗ್ಗಿ ಹುಬ್ಬಳ್ಳಿ -ಧಾರವಾಡ ಲೋಕಾಂಕ ಮೆಳೊ ಮ್ಹೊಣು ಸರಸ್ವತಿ ಪ್ರಭಾ ಆಶಯ ಕರ್ತಾ.
ಶ್ರೀ ಜಗನ್ನಾಥ ವಿ. ಪೈ ಮಾಮ್ಮಾಕ ತಾಂಗೇಲೆ ಸೇವಾ ಆನಿ ದಾನ ಗುಣ ಖಾತ್ತರಿ ವಿಂಗಡ ಸಬಾರ ಕಡೇನ ಹಾರ್ದಿಕ ಸತ್ಕಾರ ಚಲ್ಲೆಲೆ ಆಸ್ಸ. ಘೆಲೇಲೆ ವರ್ಷ ಮಂಡ್ಯ ಜಿಲ್ಲಾ ಹೋಟೇಲು ಮಾಲಕರ ಸಂಘಾಚಾನ ಹಾಂಕಾ “ಆತಿಥ್ಯ ರತ್ನ ಮ್ಹಣಚೆ ಪ್ರಶಸ್ತಿ ದೀವ್ನು  ಸನ್ಮಾನ ಕೆಲ್ಲ್ಯಾ. ತಶ್ಶಿಚಿ ವಿಂಗ ವಿಂಗಡ ಹೋಟೇಲು ಮಾಲಕಾಲೆ ಸಂಘಾಚಾನ, ಜಿ.ಎಸ್.ಬಿ. ಸಮಾಜಾಚಾನ, ದುಸ್ರೆ ಸಂಘ ಸಂಸ್ಥ್ಯಾಚಾನ ಸೈತ ಹಾಂಕಾ ಆಪೋವ್ನು ಸನ್ಮಾನ ಕೆಲ್ಲ್ಯಾ. ಮುಖಾರಚೆ ದಿವಸಾಂತು ಶ್ರೀ ಜಗನ್ನಾಥ ವಿ. ಪೈ ಮಾಮ್ಮಾ ನಿಮಿತ್ತ ಸಮಾಜಾಕ, ಹೊಟೇಲು ಉದ್ಯಮಾಕ ಆನ್ನಿಕೆ ಚ್ಹಡ ಚ್ಹಡ ಸೇವಾ ಪಾವೋ, ಹಾಂಕಾ ಪದ್ಮ ಭೂಷಣ ತಸ್ಸಾಲೆ ರಾಷ್ಟ್ರೀಯ ಪ್ರಶಸ್ತಿ ಮೆಳೊ ಮ್ಹೊಣು ಸರಸ್ವತಿ ಪ್ರಭಾ ಆಶಯ ಕರ್ತಾ.