“ಹಿತೈಷಿ ದಾಕೂನು ಮುದ್ದುಕೃಷ್ಣ-ಮುದ್ದುರಾಧೆ ಸ್ಪರ್ಧೆ

ಕಾರ್ಕಳಾಚೆ “ಹಿತೈಷಿ ತರಪೇನ ವರ್ಷಾಂಪ್ರತಿ ಕೃಷ್ಣಾಷ್ಟಮಿ ಪ್ರಯುಕ್ತ ಆಯೋಜನ ಕೋರ್ನು ಯವಚೆ ‘ಮುದ್ದು ಕೃಷ್ಣ -ಮುದ್ದು ರಾಧೆ ಸ್ಪರ್ಧಾ ತಾ. ೨೪-೮-೧೩ ದಿವಸು ಕಾರ್ಕಳಾಚೆ ಅಂಡಾರು ವಿಠಲ ರುಕ್ಮಿಣಿ ಕಿಣಿ ಪ್ರತಿಷ್ಠಾನಾಚೆ ಸಹಭಾಗಿತ್ವಾರಿ ಶ್ರೀ ಶ್ರೀನಿವಾಸ ಕಲಾಮಂದಿರಾಂತು ಚಲ್ಲೆ.  ಶ್ರೀ ವೆಂಕಟರಮಣ ದೇವಳಾಚೆ ಮೊಕ್ತೇಸರ ಶ್ರೀ ಮೋಹನದಾಸ ಶೆಣೈ ತಾನ್ನಿ ದೀವೊ ಜಳೋವ್ನು ಕಾರ್ಯಕ್ರಮಾಚೆ ಉದ್ಘಾಟನ ಕೆಲ್ಲೆ. ಹಿತೈಷಿ ಸಂಸ್ಥೆ ಅಧ್ಯಕ್ಷ ಶ್ರೀ ಗಣಪತಿ ಕಾಮತ್ ತಾನ್ನಿ ಸರ್ವಾಂಕ ಯೇವ್ಕಾರ ದಿಲ್ಲೆ.  ಹೇ ಸ್ಪರ್ಧಾ ಕಾರ್ಯಕ್ರಮಾಂತು ಒಟ್ಟು ೪೧ ಲೋಕ ಚರ್ಡುಂವಾನಿ ವಾಂಟೊ ಘೆತ್ತಿಲೆ. ಫಲಿತಾಂಶ ಅಶ್ಶಿ ಆಸ್ಸ.
ಮುದ್ದುಕೃಷ್ಣ ವಿಭಾಗ : (೩ ದಾಕೂನು ೬ ವರ್ಷ) : ಮನೋಜ್ ಕಾಮತ್(ಪ್ರಥಮ), ಪ್ರಣಮ್ಯ ಕಾಮತ್(ದ್ವಿತೀಯ),  (೭ ದಾಕೂನು ೧೧ ವರ್ಷ) : ವೃದ್ಧಿ ಕಿಣಿ(ಪ್ರಥಮ), ಅಂಜನಾ ಶೆಣೈ(ದ್ವಿತೀಯ)
ಮುದ್ದುರಾಧೆ ವಿಭಾಗ (೩ ದಾಕೂನು ೬ ವರ್ಷ) : ಪ್ರಾರ್ಥನಾ ಪ್ರಭು(ಪ್ರಥಮ), ಶಾರ್ವರೀ ಶ್ಯಾನುಭಾಗ (ದ್ವಿತೀಯ). (೭ ದಾಕೂನು ೧೧ ವರ್ಷ) :  ವಂದನಾ ಪ್ರಭು(ಪ್ರಥಮ), ನಿರ್ಮಿತಿ ಕಿಣಿ (ದ್ವಿತೀಯ)
ಹೇ ಸ್ಪರ್ಧೆಂತು ವಾಂಟೊ ಘೆತ್ತಿಲೆ ಸರ್ವ ಚರ್ಡುವಾಂಕ ಪ್ರೋತ್ಸಾಹಕ ಬಹುಮಾನ ಆನಿ ಗೊಡಶೆ ದೀವ್ನು ಉಮೇದಿ ದಿಲ್ಲಿ. ಜಡ್ಜ ಜಾವ್ನು ಶ್ರೀಮತಿ ಪೂರ್ಣಿಮಾ ಶೆಣೈ, ಶ್ರೀಮತಿ ಭಾವನಾ ಶೆಣೈ, ಶ್ರೀ ಸುಮಂತ್ ಭಟ್, ಆನಿ ಶ್ರೀಮತಿ ಸುವರ್ಣ ನಾಯಕ್ ಹಾನ್ನಿ ಆಯ್ಯಿಲೆ.  ಶ್ರೀ ಮೋಹನದಾಸ ಶೆಣೈಮಾಮ್ಮಾನಿ ಬಹುಮಾನ ವಾಂಟಿಲೆ. ಶ್ರೀ ನಾರಾಯಣ ಶೆಣೈನಿಂ ಕಾರ್ಯಕ್ರಮಾಚೆ ನಿರ್ವಹಣ ಕೆಲ್ಲಿ.

ಶಿರ್ಶಿಂತು ಕೊಂಕಣಿ ಮಾನ್ಯತಾ ದಿವಸ ಆಚರಣ

ಶಿರ್ಶಿಂತು ಚಲೀಲೆ “ಕೊಂಕಣಿ ಮಾನ್ಯತಾ ದಿವಸ ಕಾರ್ಯಕ್ರಮಾಚೆ ಉದ್ಘಾಟನ ಕೊಂಕಣಿ ಕಲಾವಿದ ಅಂತೋನ ನೊರೊನ್ಹಾ  ತಾನ್ನಿ ಉದ್ಘಾಟನ ಕೆಲ್ಲೆ. “ಕೊಂಕಣಿ ಭಾಷೆಚೆ  ಅಭಿವದ್ಧಿ ಖಾತ್ತಿರಿ ಕೊಂಕಣೀ ಭಾಷಿಕಾನಿ ಸರ್ವಾನಿ ಮೇಳ್ನು ಪ್ರಯತ್ನ ಕೋರ್‍ಕಾ ಮ್ಹೊಣು ಹೇ ವೇಳ್ಯಾರಿ ತಾನ್ನಿ ಆಪೋವ್ಣಿ ದಿಲ್ಲಿ. ಎಂಎಂಕಲಾ ಆನಿ ವಿಜ್ಞಾನ ಮಹಾವಿದ್ಯಾಲಯಾಚೆ ಹಿಂದಿ ಉಪನ್ಯಾಸಕಿ ಸುಜಾತಾ ತಾನ್ನಿ ಉಲೋವ್ನು “ಕೊಂಕಣಿ ಭಾಷೆಕ ಕೇಂದ್ರ ಸರಕಾರಾನಿ ೨೦-೦೮-೧೯೯೨ಕ ಸಂವಿಧಾನಾಚೆ ೮ಚೆ ಪರಿಚ್ಛೇದಾಂತು ಮೆಳೋವ್ನು ತಾಕ್ಕಾ ರಾಷ್ಟ್ರಾಚೆ ಅಧಿಕೃತ ಭಾಸ ಮ್ಹೊಣು ಮಾನ್ಯತ ದಿವ್ಚಾ ವೊಚ್ಚುನು  ಕೊಂಕಣಿ ಭಾಷಿಕಾಂಕ ಸಬಾರ ಸೌಲಭ್ಯ ಮೆಳ್ತಾ. ಕೊಂಕಣಿ ಉಲೈತಲ್ಯಾನಿ ತ್ಯಾ ಪೂರಾ ಮುನಾಪೋ ಘೆವ್ಕಾ. ಮ್ಹಳ್ಳಿಂತಿ.  ಪ್ರಾಸ್ತಾವಿಕ ಜಾವ್ನು ಉಲೋವ್ನು ಜಿಲ್ಲಾ ಕೊಂಕಣಿ ಪರಿಷತ್ ಉಪಾಧ್ಯಕ್ಷ ಕೂಡ್ಲ ಆನಂದು ಶಾನಭಾಗ, “ಮುಖಾವೈಲೆ ವರ್ಷ ಪರಿಷತ್ ರಜತಮಹೋತ್ಸವ ಆಚರಣ ಕರತಾ ಮ್ಹಳ್ಳಿಂತಿ. ಶಿರಸಿ ಅರ್ಬನ್ ಬ್ಯಾಂಕಾಚೆ ನಿವತ್ತ ಜನರಲ್ ಮೆನೇಜರ ಎಂ.ಎಸ್.ಪ್ರಭು ತಾನ್ನಿ ಅಧ್ಯಕ್ಷತ ಪಣ ಘೆತ್ತಿಲೆ.
ಪರಿಷತ್ತಾಚೆ ಕಾರ್ಯದರ್ಶಿ ರಾಮಚಂದ್ರ ಜಿ.ನಾಯಕಾನಿ ಯೇವ್ಕಾರ ಕೆಲ್ಲಿ.ಮಾಗಿರಿ  ಪ್ರೌಢಶಾಲಾ ಚರ್ಡುಂವಾ ಖಾತ್ತಿರಿ ಕೊಂಕಣಿ ಲೇಖನ .ಕೊಂಕಣಿ ಭಾಷಣ ತಶ್ಶೀಚಿ ಕೊಂಕಣಿ ಗೀತಗಾಯನ ಸ್ಪರ್ಧೆ ಚಲೋವ್ನು  ವಿಜೇತ ಜಾಲೇಲ್ಯಾಂಕ ಬಹುಮಾನ ವಿತರಣ ಚಲ್ಲೆ. ಜಗದೀಶ ಎನ್., ಗೀತಾ ಉದಯ ನಿಲೇಕಣಿ, ಶೈಲಾ ಮಂಗಳೂರ ಆನಿ ಸೂರಜರಾಣಿ ಪ್ರಭು ನಿರ್ಣಾಯಕ ಜಾವ್ನಾಶ್ಶಿಲೆ. ನಿರ್ವಹಣ ವಾಸುದೇವ ಶಾನಭಾಗ ತಾನ್ನಿ ಕೆಲ್ಲೆ. ವಾಲ್ಟರ ಡಿಕೋಸ್ಟಾ ತಾನ್ನಿ ಆಬಾರ ಮಾನಲೆ.

ಅಕಾಡೆಮಿ ತರಪೇನ ಕೊಂಕಣಿ ಪುಸ್ತಕ ಸಿ.ಡಿ. ಖರೀದಿ

ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಕೊಂಕಣಿ ಬರೋಪಿಂಕ, ಲೇಖಕಾಂಕ ಆನಿ ಸಂಗೀತಗಾರಾಂಕ, ಸಿ.ಡಿ. ಕರ್ತಲ್ಯಾಂಕ ಪ್ರೋತ್ಸಾಹ ದಿವ್ಚೆ ಉದ್ದೇಶಾನ ಆನಿ ಕೊಂಕಣಿ ಸಾಹಿತ್ಯಾಭಿವೃದ್ಧಿ ಖಾತ್ತಿರಿ ಪುಸ್ತಕ ಆನಿ ಸಿ.ಡಿ. ಸಗಟು ಖರೀದಿ ಕೊರ್‍ಚೆ ಯೋಜನಾ ಘಾಲ್ನು ಘೆತಲ್ಯಾ. ರೂ. ೨,೦೦೦/- ಮೊತ್ತಾಚೆ ಕೊಂಕಣಿ ಪುಸ್ತಕ ಆನಿ ಸಿ.ಡಿ. ಖರೀದಿ ಕರತಾತಿ. ತಾ. ೧-೧-೨೦೧೩ ದಾಕೂನು ೩೧-೧೨-೨೦೧೩ ಭಿತ್ತರಿ ಪ್ರಕಟ ಜಾಲೇಲೆ ಪುಸ್ತಕ ಮಾತ್ರ ಸಗಟು ಖರೀದಿಕ ಪರಿಗಣನ ಕರತಾತಿ. ಪುಸ್ತಕ ಆನಿ ಸಿ.ಡಿ.ಚೆ ವಿಕ್ರಿ ಮ್ಹೊಲ್ಲಾಂತು ೨೦% ರಿಬೇಟ್ ದೀವ್ನು ೨,೦೦೦/- ರೂಪ್ಪಯಾಕ ಬಿಲ್ ತಯಾರ ಕೋರ್ನು ತಿತ್ಲೇಕ ಸಮ್ಮ ಜಾವ್ಚೆ ಪುಸ್ತಕ ಜಾಂವೊ ಸಿ.ಡಿ. ಅಕಾಡೆಮಿಕ ದಿವ್ಕಾ. ಪುಸ್ತಕ ಜಾಂವೊ ಸಿ.ಡಿ. ವಯ್ರಿ ತ್ಯಾ ಪ್ರಕಟ ಜಾಲೇಲೆ ವರ್ಷ(೨೦೧೩) ನಮೂದ ಜಾವ್ನು ಆಸ್ಸುಕಾ. ಪುಸ್ತಕ ಜಾಂವೊ ಸಿ.ಡಿ. ಪೆಟೈಕಾ ಜಾಲೇಲೆ ಪತ್ತೊ ರಿಜಿಸ್ಟ್ರಾರ್, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ, ಮಹಾನಗರ ಪಾಲಿಕಾ ಕಟ್ಟಡ, ಲಾಲ್ ಭಾಗ್, ಮಂಗಳೂರು - ೫೭೫೦೦೩. ಚಡ್ತೆ ಖಂಚೇ ಮಾಹಿತಿ ಜಾವ್ಕಾ ಜಾಲೇಲ್ಯಾನಿ ಅಕಾಡೆಮಿ ಪೋನ್ (ನಂ. ೦೮೨೪ - ೨೪೫೩೧೬೭) ಹಾಂಗಾಕ ಸಂಪರ್ಕ ಕೊರಯೇತ ಮ್ಹೊಣು ಅಕಾಡೆಮಿ ರಿಜಿಸ್ಟ್ರಾರ ಶ್ರೀ ಬಿ. ದೇವದಾಸ ಪೈ ತಾನ್ನಿ ಕಳೈಲಾ.

ಶ್ರೀ ಮೋಹನದಾಸ ಭಟ್ ದಂಪತೀಂಕ ಸನ್ಮಾನು

ಕೋಟೇಶ್ವರಾಚೆ ಮ್ಹಾಲ್ಗಡೆ ಛಾಯಗ್ರಾಹಕ, ಶಿಕ್ಷಕ ಶ್ರೀ ಮೋಹನದಾಸ ಭಟ್ ಆನಿ ಶ್ರೀಮತಿ ನಿರ್ಮಲಾ  ಭಟ್ ದಂಪತೀಂಕ ಆಲ್ತಾಂತು ಕುಂದಾಪುರಾಂತು ಚಲೇಲೆ ಸೌತ್ ಕೆನರಾ  ಪೋಟೋಗ್ರಾಫರ್ ಅಸೋಸಿಯೇಶನ್ನ ಕುಂದಾಪುರ ವಲಯಾಚೆ ೧೯ಚೆ ವಾರ್ಷಿಕ ಮಹಾ ಸಭಾಂತು ಆತ್ಮೀಯ ಜಾವ್ನು ಸನ್ಮಾನು ಕೆಲ್ಲೊ. ಉದ್ಘಾಟಕ ಜಾವ್ನು ಕುಂದಾಪುರ ಪೋಲೀಸ್ ವೃತ್ತ ನಿರೀಕ್ಷಕ ಮಂಜುನಾಥ ಕುವರಿ ಹಾನ್ನಿ ಆಯ್ಯಿಲೆ. ಸಭಾಚೆ ಅಧ್ಯಕ್ಷತಾ ಕುಂದಾಪುರ ವಲಯ ಅಧ್ಯಕ್ಷ ಹರೀಶ್ ಕುಂದಾಪುರ ತಾನ್ನಿ ಘೆತ್ತಿಲೆ. ತಾಲೂಕು ಕಾರ್ಯನಿರತ ಪತ್ರಕರ್ತ ಸಂಘಾಚೆ ಅಧ್ಯಕ್ಷ ಶಶಿಧರ್ ಹೆಮ್ಮಾಡಿ ತಾನ್ನಿ ಪ್ರದರ್ಶನ ಮಳಿಗೆಚೆ ಉದ್ಘಾಟನ ಕೆಲ್ಲಿ.ಮಾತೃ ಸಂಸ್ಥೆ ಅಧ್ಯಕ್ಷ ವಾಸುದೇವರಾವ್ ಸಮೇತ ನವೀನ್ ರೈ ಪುತ್ತೂರು, ಮಧು, ಗಣೇಶ ಬೆನಕ, ರಾಬರ್ಟ್ ಡಿಸೋಜಾ, ರಾಜೀವ್ ನಾಯ್ಕ,ಪ್ರಮೋದ್ ಆಚಾರ್ಯಾ, ರಾಜಾ ಮಠದ ಬೆಟ್ಟು ಹೇ ಸಂದಭಾರಿ ಉಪಸ್ಥಿತ ಉರಲೀಲೆ.  ಅಶೋಕ ಕುಮಾರ ಶೆಟ್ಟಿನ ಪ್ರಾಸ್ತಾವಿಕ ಜಾವ್ನು ಉಲೈಲೆ. ಸುರೇಶ್ ಪೂಜಾರಿನ ಕಾರ್ಯಕ್ರಮಾಚೆ ನಿರೂಪಣ ಕೆಲ್ಲಿ ಪ್ರಮೋದ ಆಚಾರ್ಯಾನಿ ವರದಿ ಸಾದರ ಕೆಲ್ಲೆ ಆನಿ ನಾಗರಾಜ ರಾಯಪ್ಪನಮಠ ತಾನ್ನಿ ಆಬಾರ ಮಾನಲೆ. ಹೇ ವೇಳ್ಯಾರಿ ಗೌರವಾದರಾಕ ಪಾತ್ರ ಜಾಲೇಲೆ ಶ್ರೀ ಮೋಹನದಾಸ ಭಟ್ ಹಾಂಕಾ ಸರಸ್ವತಿ ಪ್ರಭಾ ತರಪೇನ ಅಭಿನಂದನ ಪಾವೈತಾ ಆಸ್ಸ.