ಜನವರಿ ೨೦೧೪ ಮೈನ್ಯಾ ಡೈರಿ
ಶ್ರೀ ಆರ್ಯದುರ್ಗ ದೇವಳ, ಅಂಕೋಲಾ : ಜ. ೯, ೨೫ ನವಮಿ ಪಾಲಕಿ ಉತ್ಸವು, ಜ.೧೪. ಮಕರ ಸಂಕ್ರಾಂತಿ, ರಥೋತ್ಸವ.
ಶ್ರೀ ವೆಂಕಟರಮಣ ದೇವಳ, ಬೆಂಗಳೂರು : ಜ.೧೧- ವೈಕುಂಠ ಏಕಾದಶಿ, ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಾಕ ವಿಶೇಷ ಅಲಂಕಾರ, ಪೂಜಾ, ಪುನಸ್ಕಾರ ಸಹಿತ ವೈಕುಂಠ ದ್ವಾರ ಸ್ಥಾಪನ, ಸಕ್ಕಾಣಿ ೬.೦೦ ಗಂಟ್ಯಾಚಾನ ರಾತ್ತಿಕ ೯-೩೦ ಗಂಟ್ಯಾ ಪರ್ಯಂತ ಭಕ್ತಾಂಕ ಶ್ರೀ ದೇವಾಲೆ ದಿವ್ಯ ದರ್ಶನ. ಜ ೩೦ - ೪ ವರ್ಷಾಚೆ ಶ್ರೀ ಗರುಡ ಜಯಂತಿ. (ಮಾಹಿತಿಕ : ೯೪೮೦೬೯೬೮೮೨)
ಶ್ರೀ ಲಕ್ಷ್ಮೀವೆಂಕಟರಮಣ ದೇವಳ, ಉಪ್ಪಿನಂಗಡಿ : ಜ೬- ಕಿರುಷಷ್ಠಿ, ರಾತ್ತಿಕ ಪೇಟೆ ಉತ್ಸವು. ಜ ೭- ವನಭೋಜನ, ಶ್ರೀ ವೀರಾಂಜನೇಯ ದೇವಾಲೆ ಪುನಃ ಪ್ರತಿಷ್ಠಾ ವರ್ಧಂತಿ, ಪಂಚಾಮೃತಾಭಿಷೇಕ, ಪವಮಾನ ಕಲಶಾಭಿಷೇಕ, ಸಾನಿಧ್ಯ ಹವನ, ಶ್ರೀ ದೇವಾಲೆ ವನಭೋಜನ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಘಡ್ತಾ. (ಮಾಹಿತಿಕ: ಪೋನ : ೦೮೨೫೧-೨೫೧೦೧೧)
ಶ್ರೀ ವೆಂಕಟರಮಣ ದೇವಳ, ಕಾರ್ಕಳ : ಜ. ೫ - ರುಪ್ಪೆ ಮಂಟ್ಪಾ ಉತ್ಸವು, ಜ. ೬ - ರುಪ್ಪೆ ಶೇಷವಾಹನ ಉತ್ಸವು, ಜ.೧೦- ದಿಂಡಿ ಉತ್ಸವು, ಜ. ೧೪ - ಮಕರ ಸಂಕ್ತಾಂತಿ - ಪಾಲಂಖಿ ಉತ್ಸವು, ಜ-೧೬- ಫುನ್ನವ, ರುಪ್ಪೆ ಮಂಟವಾ ಉತ್ಸವು, ೧೯ - ಸಂಕಷ್ಠಿ, ಜ. ೨ - ಸಮಾರಾಧನ, ರುಪ್ಪೆ ಮಾಂಟ್ವಾ ಉತ್ಸವು.ಜ.೨೬ -ದಿಂಡಿ ಉತ್ಸವು. ಜ.೩೦- ಸಮಾರಾಧನ. (ಮಾಹಿತಿಕ ಪೋನ್ : ೦೮೨೫೮-೨೩೦೩೧೧)
ಶ್ರೀ ಮಹಾಗಣಪತಿ ಮಹಮ್ಮಾಯಾ ದೇವಳ, ಶಿರಾಲಿ : ಜ.೩ - ಚೌತಿ, ರಾತ್ತಿಕ ಉತ್ಸವು, ಜ.೫-ಷಷ್ಠಿ, ರಾತ್ತಿಕ ಉತ್ಸವು. (ಮಾಹಿತಿಕ ಪೋನ್ : ೦೮೩೮೫-೨೫೮೨೭೪)
ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳ, ಉಡ್ಪಿ : ಜ. ೧- ಎಳ್ಳಾಮವಾಸ, ಜ.೨ - ಪಾಲಂಖಿ ಉತ್ಸವು, ಜ.೧೪- ಮಕರ ಸಂಕ್ರಾಂತಿ, ಹಳದಿ-ಕುಂಕುಮು, ಜ.೧೫- ಪಾಲಂಖಿ ಉತ್ಸವು. (ಮಾಹಿತಿಕ ಪೋನ್ : ೦೮೨೦-೨೫೨೦೮೬೦)
ಶ್ರೀ ವರದರಾಜ ವೆಂಕಟರಮಣ ದೇವಳ, ಗುರುಪುರ : ಜ.೧೧ - ಅಹೋರಾತ್ರಿ ಭಜನ, ಜ.೧೨- ದ್ವಿತೀಯ ಮುಕ್ಕೋಟಿ ಉತ್ಸವು
ಶ್ರೀ ಮಹಾಲಸಾ ನಾರಾಯಣೀ ದೇವಿಕ್ಷೇತ್ರ, ಹರಿಖಂಡಿಗೆ : ಜ.೨೬ - ಪ್ರತಿ ಮ್ಹಹಿನೋ ಆಯೋಜನ ಕೆಲೀಲೆ ನವಚಂಡಿ ಹವನ ಆನಿ ಸತ್ಯನಾರಾಯಣ ಪೂಜಾ. (ಮಾಹಿತಿಕ ಪೋನ್ : ೯೩೪೩೦೭೩೫೧೬)
ಗೌಡ ಸಾರಸ್ವತ ಸಮಾಜ, ದ್ವಾರಕಾನಾಥ ಭವನ, ಬೆಂಗಳೂರು : ಜ.೧೨ - ಸಾಮೂಹಿಕ ಸತ್ಯನಾರಾಯಣ ವೃತ. ಜ.೧೬. ಸಾಂಜ್ವಾಳಾ - ಸತ್ಯನಾರಾಯಣ ಪೂಜಾ ಆನಿ ಸತ್ಸಂಗ. ಪ್ರತಿ ಶನ್ವಾರು ಸಾಂಜ್ವಾಳಾ -ಭಜನಾ ಸೇವಾ. (ಮಾಹಿತಿಕ ಪೋನ್ : ೦೮೦ - ೨೬೬೧೨೧೧೬)
ಶ್ರೀಮತ್ ಅನಂತೇಶ್ವರ ದೇವಳ, ಮಂಜೇಶ್ವರ : ಜ.೨೬ - ದಶಮೀ ದಿಂಡಿ, ಪಾಲಂಖಿ ಉತ್ಸವು, ಜ.೩೧ - ಶ್ರೀಮತ್ ಸುಮತೀಂದ್ರ ತೀರ್ಥ ಸ್ವಾಮಿ ಪುಣ್ಯತಿಥಿ, ಪಾಲಂಖಿ ಉತ್ಸವು, ವಸಂತ ಪೂಜಾ.
ಗೌಡ ಸಾರಸ್ವತ ಸಮಾಜ(ರಿ) ದಾವಣಗೆರೆ
ದಾವಣಗೆರೆ ಗೌಡ ಸಾರಸ್ವತ ಸಮಾಜಾಚೆ ಆಶ್ರಯಾರಿ ಕಾರ್ತಿಕ ಏಕಾದಶಿ ಪ್ರಯುಕ್ತ ಸಾಮೂಹಿಕ ಭಜನ, ವಸಂತೋತ್ಸವ, ದೀಪೋತ್ಸವ ಆಲ್ತಾಂತು ಯಶಸ್ವಿ ಜಾವ್ನು ಚಲ್ಲೆ. ದಾವಣಗೆರೆಚೆ ಶ್ರೀ ಸುಕೃತೀಂದ್ರ ಕಲಾಮಂದಿರಾಂತು ಚಲೀಲೆ ಹೇ ಧಾರ್ಮಿಕ ಸಮಾರಂಭಾಂತು ಸಮಾಜಾಚೆ ಅಧ್ಯಕ್ಷ ಸಿ.ಪಿ.ಕಾಮತ, ಉಪಾಧ್ಯಕ್ಷ ಎ.ಜೆ.ರಘುಪತಿ ಕಿಣಿ, ಖಜಾಂಚಿ ಆರ್.ವಿ. ಶೆಣೈ, ಸಮಿತಿ ಸದಸ್ಯ ಜಾಲೀಲೆ ಕೆ. ವೆಂಕಟರಮಣ ಭಟ್, ಕಿರಣ್ ಕುಮಾರ ವಿ. ಶೆಣೈ, ನಿಕಟಪೂರ್ವ ಅಧ್ಯಕ್ಷಿಣಿ ಶೋಭಾ ವೆಂಕಟೇಶ ಕಿಣಿ, ಮಹಿಳಾ ವಿಭಾಗದ ಅಧ್ಯಕ್ಷೆ ಸುಶೀಲಾ ಉಮೇಶ ಕಾಮತ್ ಆದಿ ಗಣ್ಯ ಉಪಸ್ಥಿತ ಉರಲೀಲೆ. ವಿಶೇಷ ಜಾವ್ನು ಸಮಾಜಾಚೆ ಮ್ಹಾಲ್ಗಡೆ ಬಾಂಧವ ಯೋಗಾಚಾರ್ಯ ವಿಠಲ್‌ದಾಸ ಶೆಣೈಲೆ ಮರಾಠಿ ಅಭಂಗ ಶೀಲಾ ರವಿಚಂದ್ರ ನಾಯಕ್, ರವಿಕಲಾ ಯೋಗೀಶ ಪೈ, ಮುಕ್ತ ಶ್ರೀನಿವಾಸ ಪ್ರಭು ಆದಿ ಲೋಕಾನಿ ದಾಸಾಂಗೆಲೆ ಪದ, ಕೊಂಕಣಿ ಭಜನ, ಮ್ಹಳ್ಳೆ. ವಸಂತೋತ್ಸವ ವಿಶೇಷ ಆಕರ್ಷಣ ಜಾವ್ನಾಶ್ಶಿಲೆ.
ವರದಿ - ಸಾಲಿಗ್ರಾಮ ಗಣೇಶ ಶೆಣೈ, ದಾವಣಗೆರೆ
ದಾವಣಗೆರೆ ಕನ್ನಡ ರಾಜ್ಯೋತ್ಸವಾಂತು ‘ಯಕ್ಷಗಾನ
ದಾವಣಗೆರೆ ಜಿಲ್ಲಾಡಳಿತಾಚೆ ಆಶ್ರಯಾರಿ ಚಲೀಲೆ ಕನ್ನಡ ರಾಜ್ಯೋತ್ಸವಾಚೆ ಮೆರವಣಿಗೇರಿ ಗಾಂವ್ಚೆ ಕಲಾಕುಂಚ ಸಾಂಸ್ಕೃತಿಕ ಸಂಸ್ಥೆಚೆ ಅಂಗಸಂಸ್ಥೆ ಜಾಲಿಲೆ ಯಕ್ಷರಂಗ ಯಕ್ಷಗಾನ ಸಂಸ್ಥೆ ತರಪೇನ ‘ಯಕ್ಷಗಾನ ಸ್ತಬ್ಥಚಿತ್ರ ವಿಶೇಷ ಜಾವ್ನು ಸರ್ವಾಂಕ ಆಕರ್ಷಣ ಕೋರ್ನು ಲೋಕಾಲೆ ಮನ ಪಸಂದ ಕೆಲ್ಲೆ. ದೀಪಾವಳಿ ಪ್ರಯುಕ್ತ ನರಕಾಸುರವಧೆಚೆ ಚಿತ್ರಣಾಚೆ ಪರಿಕಲ್ಪನ ಕೆಲೀಲೆ ಹೇ ಪಂಗ್ಡಾಂತು ನರಕಾಸುರ(ಬಲಿಚಕ್ರವರ್ತಿ) ಜಾವ್ನು ಕಲಾಕುಂಚ, ಯಕ್ಷರಂಗಾಚೆ ಸಂಸ್ಥಾಪಕ ಸಾಲಿಗ್ರಾಮ ಗಣೇಶ ಶೆಣೈ, ಶ್ರೀ ಕೃಷ್ಣ(ವಾಮನ) ಜಾವ್ನು ಆಕಾಶ ಪೂಜಾರಿ, ಮಂತ್ರಿ ಜಾವ್ನು ಪ್ರಕಾಶ ಶೆಟ್ಟಿ, ದೇವೇಂದ್ರ ಜಾವ್ನು ರಘುರಾಮ ಶೆಟ್ಟಿ, ವರುಣ ಜಾವ್ನು ಚೇತನ ಕುಮಾರ.ಎಸ್. ಹಾನ್ನಿ ಪಾತ್ರ ನಿರ್ವಹಣ ಕೆಲ್ಲೆ. ಮುಖವರ್ಣಿಕಾ ತಶ್ಶಿಚಿ ವೇಷ ಭೂಷಣ, ಸಹಕಾರ ಹೊಸಂಗಡಿ ಲಕ್ಷ್ಮಣ ಭಂಡಾರಿ, ಬೇಳೂರು ಸಂತೋಷಕುಮಾರ್ ಶೆಟ್ಟಿ, ನೀಲಾವರ ಭಾಸ್ಕರ ಶೆಟ್ಟಿ ಹಾನ್ನಿ ದಿಲ್ಲೆ.
ಶ್ರೀ ಕಾಶೀಮಠ ವೆಂಕಟರಮಣ ಮಂದಿರ, ಹುಬ್ಬಳ್ಳಿ
ಹುಬ್ಬಳ್ಳಿ ಶಕ್ತಿಕಾಲನಿಂತು(ನೃಪತುಂಗ ಗುಡ್ಡೆ ಮಾಕಶಿ ಬಗಲೇನ) ಆಸ್ಸುಚೆ ಗೌಡ ಸಾರಸ್ವತ ಬ್ರಾಹ್ಮಣ ಬಾಂಧವಾಲೆ ಶ್ರೀ ಕಾಶೀಮಠ ವೆಂಕಟರಮಣ ಮಂದಿರಾಂತು ಚಾರಿ ವರ್ಷಾಚೆ ಕಾರ್ತಿಕ ಮ್ಹಹಿನ್ಯಾಚೆ ಪಕ್ಷಿ ಜಾಗರ ಪೂಜಾ, ಶ್ರೀ ದೇವಾಲೆ ಚಾತುರ್ಮಾಸು ಸಮಾಪ್ತಿ, ಏಕಾದಶಿ ಪ್ರಯುಕ್ತ ಅಹೋರಾತ್ರಿ ಜಾಗರಣ, ಭಜನ, ತುಳಸಿ ಪೂಜಾ, ತಶ್ಶೀಚಿ ಕಾರ್ತಿಕ ಫುನ್ವೆಚೆ ದೀವೆಂ ಅಪಾರ ಭಕ್ತ-ಬಾಂಧವಾಲೆ ಉಪಸ್ಥಿತೀರಿ ವಿಜೃಂಭಣೇರಿ ಚಲೀಲೆ ಖಬ್ಬರ ಮೆಳ್ಳಾ. ತಾ. ೭-೧೧-೧೩ ದಾಕೂನು ೧೩-೧೧-೧೩ ಪರ್ಯಂತ ಪ್ರತಿ ದಿವಸು ಸಕ್ಕಾಣಿಪೂಡೆ ಕಾಕಡಾರತಿ ಚಲ್ಲೆ. ೧೨-೧೧-೧೩ ದಿವಸು ಶ್ರೀ ದೇವಾಲೆ ಚಾತುರ್ಮಾಸ ಸಮಾಪ್ತಿ ಜಾಲೀಲೆ ಪ್ರಯುಕ್ತ ಕಲಶ ಅಭಿಷೇಕ, ಪಂಚಾಮೃತಾಭಿಷೇಕ, ಪವಮಾನ ಅಭಿಷೇಕ, ಸಾನಿಧ್ಯ ಹವನ, ಪೂಜಾ, ಪ್ರಸಾದ ವಿತರಣ ಚಲ್ಲೆ. ಕಾರ್ತಿಕ ಏಕಾದಶಿ ದಿವಸು ಅಹೋರಾತ್ರಿ ಭಜನ ೧೩-೧೧-೧೩ಕ ಸಾಂಜ್ವಾಳಾ ದೀಪ ಪ್ರಜ್ವಲನ ಬರಶಿ ಸುರುವಾತ ಜಾಲ್ಲೆ. ಭಜನ ಹೆರ್ದೀಸು ಸಕ್ಕಾಣಿ ೬ ಗಂಟ್ಯಾ ಪರ್ಯಂತ ಚಲ್ಲೆ. ಕಾರ್ತಿಕ ಫುನ್ವೆ ದಿವಸು ಚಲೀಲೆ ದೀವೆಂತು ರಾತ್ತಿಕ ೧೦೮ ಆರ್ತಿ ಸೇವಾ ಆಯೋಜನ ಕೆಲೀಲೆ. ಸರ್ವ ಧಾರ್ಮಿಕ ಕಾರ್ಯಕ್ರಮ ಮಸ್ತ ಶೃದ್ಧಾ-ಭಕ್ತೀರಿ ಘಡಲೆ.
ಶ್ರೀ ಲಕ್ಷ್ಮೀನಾರಸಿಂಹ ಭಜನಾ ಮಂದಿರ ನಿಡ್ಡೋಡಿ.
ನಿಡ್ಡೋಡಿ - ಕಲ್ಲುಮಂಡ್ಕೂರು ಶ್ರೀ ಲಕ್ಷ್ಮೀ ನಾರಸಿಂಹ ಭಜನಾ ಮಂದಿರಾಚೆ ಪ್ರತಿಷ್ಠಾ ವರ್ಧಂತಿ ತಾ. ೧೮-೧೧-೨೦೧೩ ದಿವಸು ಶ್ರೀ ಸತ್ಯನಾರಾಣ ಪೂಜಾ, ಭೂರಿ ಸಮಾರಾಧನ , ಮಹಾ ಪೂಜಾ ಆನಿ ಅನ್ನ ಸಂತರ್ಪಣೆ ಬರಶಿ ಮಸ್ತ ವೈಭವಾರಿ ಸಂಪನ್ನ ಜಾಲ್ಲೆ. ತ್ಯಾ ದಿವಸು ಸುರುವಾತ ಜಾಲೀಲೆ “ನಗರ ಭಜನೆಚೆ ಮಂಗಲೋತ್ಸವು ತಾ. ೩೦-೧೧-೧೩ ದಿವಸು ಚೇಲ್ನು, ಮಹಾ ಪೂಜಾ, ಪ್ರಸಾದ ವಿತರಣ, ಭೂರಿ ಸಮಾರಾಧನ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಚಲೀಲೆ ಖಬ್ಬರ ಮೆಳ್ಳಾ. ನಗರ ಭಜನಾ ಸಂಕೀರ್ತನೆ ಉಪರಾಂತ ಪ್ರತಿ ದಿವಸು ರಾತ್ತಿಕ ಮಹಾ ಪೂಜೆ ನಂತರ ಅನ್ನ ಸಂತರ್ಪಣ ಸೈತ ಚಲ್ಲೆ. ಗಾಂವ್ಚೆ, ಪರಗಾಂವ್ಚೆ ಅಪಾರ ಸಮಾಜ ಬಾಂಧವ ಹೇ ಪುಣ್ಯಕಾರ್ಯಾಂತು ವಾಂಟೊ ಘೇವ್ನು ಹರಿ ಕೃಪೇಕ ಪಾತ್ರ ಜಾಲ್ಲಿಂತಿ.
ಶ್ರೀ ಮಹಾಗಣಪತಿ ದೇವಳ ಶಿರಾಲಿ
ಶಿರಾಲಿಚೆ ಶ್ರೀ ಮಹಾಗಣಪತಿ ಮಹಾಮಾಯಾ ದೇವಾಲೆ ವಿಜಯನಾಮ ಸಂವತ್ಸರಾಚೆ ಬ್ರಹ್ಮರಥೋತ್ಸವು ತಾ. ೧೧-೧೨-೧೩ ದಿವಸು ಅಪಾರ ಕುಳಾವಿ ಆನಿ ಭಕ್ತ ಬಾಂಧವಾಲೊ ಉಪಸ್ಥಿತೀರಿ ವಿಜೃಂಭಣೇರಿ ಚಲ್ಲೆ. ತತ್ಸಂಬಂಧ ೩-೧೨-೧೩ ದಾಕೂನು ೧೨-೧೨-೧೩ ಪರ್ಯಂತ ವಿಂಗವಿಂಗಡ ಧಾರ್ಮಿಕ ಕಾರ್ಯಕ್ರಮ ಘಡ್ಲೆ. ವಿಶೇಷ ಪಾತ್ರಿ ಮುಖೇನ ದರ್ಶನ ತಾ. ೬-೧೨-೧೩, ೧೦-೧೨-೧೩ ಆನಿ ೧೨-೧೨-೧೩ಕ ಚಲ್ಲೆ. ಕುಳಾವಿ ಮಹಾಸಭಾ ತಾ. ೧೧-೧೨-೧೩ ದಿವಸು ಸಾಂಜ್ವಾಳಾ ದೇವಳಾಚೆ ಆವಾರಾಂತು ಚಲ್ಲೆ. ಜಯ ನಾಮ ಸಂವತ್ಸರಾಚೆ ಅಕ್ಷಯ ತದಿಗೆ ದಿವಸು ೨೪ ವಷಾಚೆ ‘ಸಾಮೂಹಿಕ ಉಪನಯನ ಸಂಸ್ಕಾರ ಸಮಾರಂಭ ಆಯೋಜನ ಕೊರ‍್ಚೆ ಆಸ್ಸುನು, ಆಸಕ್ತ ಕುಳಾವಿ ಬಾಂಧವಾನಿ ತಾಂಗೆಲೆ ಚರ್ಡುವಾಂಕ ಹೇ ಸಂದರ್ಭಾರಿ ಬ್ರಹ್ಮೋಪದೇಶ ದಿವಚಾಕ ಇಚ್ಛಾ ಆಸಲೇರಿ ತಾ. ೫-೪-೧೩ ಭಿತ್ತರಿ ತಾಂಗೆಲೆ ನಾಂವ, ಗೋತ್ರ, ರಾಶಿ, ಜನ್ಮ ನಕ್ಷತ್ರ ಇತ್ಯಾದಿ ಸರ್ವ ವಿವರ ಸಮೇತ ನೋಂದ ಕೊರಕಾ ಮ್ಹೊಣು ದೇವಳಾ ತರಪೇನ ಕಳೈಲಾ.
ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಳ, ಉಪ್ಪುಂದ
ಉಪ್ಪುಂದ ಶ್ರೀ ವರಮಹಾಲಕ್ಷ್ಮೀ ವೃತ ಸೇವಾ ಸಮಿತಿ ತರಪೇನ ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಳಾಂತು ಶ್ರೀ ವರಮಹಾಲಕ್ಷ್ಮೀ ವೃತ ಶ್ರಾವಣ ಮಾಸಾಂತು ವಿಜೃಂಭಣೇರಿ ಚಲೀಲೆ ಖಬ್ಬರ ಮೆಳ್ಳಾ. ಹೇ ಸಂದರ್ಭಾರಿ ದೇವತಾ ಪ್ರಾರ್ಥನ, ಶ್ರೀ ವರಮಹಾಲಕ್ಷ್ಮೀ ಕಲಶ ಸ್ಥಾಪನ, ಪುಣ್ಯಕಥಾ ಶ್ರವಣ, ಹಳದಿ, ಕುಂಕುಮು, ಲಕ್ಷ್ಮೀದಾರ ವಿತರಣ, ಭೂರಿ ಸಮಾರಾಧನ ಭಜನ, ಶ್ರೀ ದೇವಾಕ ಪುಷ್ಪಾಲಂಕಾರ ಇತ್ಯಾದಿ ಕಾರ್ಯಕ್ರಮ ಚಲ್ಲೆ. ಆನಿ ವಿಶೇಷ ಜಾವ್ನು ಶ್ರೀ ವರಮಹಾಲಕ್ಷ್ಮೀ ಸೇವಾ ಸಮಿತಿ ಉಪ್ಪುಂದ ತಶ್ಶಿಚಿ ಮಹಿಳಾ ಭಜಕ ವೃಂದ ಸಹಕಾರಾನಿ ಶ್ರೀ ವರಮಹಾಲಕ್ಷ್ಮೀಕ ಸಾತ(೭) ಪವನ್ನಾಚೆ ದಾರೇಮಣಿಚೆ ಅರ್ಪಣ ಜಾಲ್ಲೆ.
ಶ್ರೀ ಮಹಾಲಸಾ ಸಿದ್ಧಿವಿನಾಯಕ ದೇವಳ, ಮಾದನಗೇರಿ
ಮಾದನಗೇರಿಚೆ ಶ್ರೀ ಮಹಾಲಸಾ ಸಿದ್ಧಿ ವಿನಾಯಕ ದೇವಳಾಂತು ಕಾರ್ತಿಕ ಸಂಕಷ್ಠಿ ಗಣಹವನ ತಾ. ೨೧-೧೧೨೦೧೩ ದಿವಸು ಪ್ರಾರ್ಥನಾ, ೧೦೮ ನಾರ‍್ಲಾಚೆ ಗಣಹವನ, ದರ್ಶನ, ಅನ್ನ ಸಂತರ್ಪಣ, ರಾತ್ತಿಕ ಪೂಜಾ, ದರ್ಶನ, ನಾರ‍್ಲಾ ಫಲಸಮರ್ಪಣ ಸೇವಾ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಬರಶಿ ಅಪಾರ ಕುಳಾವಿ, ಭಕ್ತಾಂಗೆಲೆ ಉಪಸ್ಥಿತಾರಿ ಚಲ್ಲೆ. ಅವುಂದು ವರ್ಷಾಚೆ ವರ್ಧಂತಿ ತಾ. ೨೧-೩-೧೩ಕ ಘಡ್ಚೆ ಆಸ್ಸ ಮ್ಹಣ್ಚೆ ಮಾಹಿತಿ ಮೆಳ್ಳಾ.
ಜಿ.ಎಸ್.ಬಿ. ಸಭಾ, ಮೈಸೂರು
ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಸ್ವಾಮೆ ತಾ. ೨೯-೧೧-೨೦೧೩ ದಿವಸು ಮೈಸೂರು ಜಿ.ಎಸ್.ಬಿ. ಸಭಾ ಆನಿ ಕಾಶೀಮಠಾಚೆ ಶ್ರೀ ರಾಮಮಂದಿರಾಕ ಯವ್ನು ದೇವಾಲೆ ದರ್ಶನ, ಪೂಜಾ ಕೋರ್ನು ಪಾದಪೂಜಾ ಸ್ವೀಕಾರ ಕೆಲ್ಲಿಂತಿ. ಆನಿ ಜಮಿಲೆ ಸಮಾಜ ಬಾಂಧವಾಂಕ ಆಶೀರ್ವಚನ, ಫಲಮಂತ್ರಾಕ್ಷತ ದಿಲ್ಲಿಂತಿ. ಸಮಾಜಾಚೆ ಅಧ್ಯಕ್ಷ ಶ್ರೀ ಜಗನ್ನಾಥ ಶೆಣೈ ಆನಿ ಇತರ ಪದಾಧಿಕಾರಿ ಸಮೇತ ಅಪಾರ ಸಮಾಜ ಬಾಂಧವ ಹೇ ವೇಳ್ಯಾರಿ ಉಪಸ್ಥಿತ ಆಶ್ಶಿಲೆ.
ಕರ್ನಾಟಕ ಕ್ರಿಕೆಟ್ ಸಂಸ್ಥೆಚೆ ಖಜಾಂಚಿ ಜಾವ್ನು ಡಾ|| ಪಿ. ದಯಾನಂದ ಪೈ ವೆಂಚೂನು ಆಯ್ಲಿಂತಿ.
ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೆ ಅಭಿಮಾನಾಚೆ ಬಾಂಧವ, ದಾನ ಶಿರೋಮಣಿ, ಬೆಂಗಳೂರ‍್ಚೆ ಮೆ|| ಸೆಂಚುರಿ ಗ್ರೂಪ್ಸ್ ಹಾಜ್ಜೆ ಡಾ|| ಪಿ ದಯಾನಂದ ಪೈ ಹಾನ್ನಿ ಆಲ್ತಾಂತು ಚಲೀಲೆ ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಸ್ಥೆಚೆ ಚುನಾವಣೆಂತು ಚ್ಹಡ ವೋಟ್ ಘೇವ್ನು ಖಜಾಂಚಿ ಜಾವ್ನು ವಿಂಚೂನು ಆಯ್ಯಿಲೆ ಸರ್ವ ಗೌಡ ಸಾರಸ್ವತ ಸಮಾಜ ಬಾಂಧವಾಂಕ ಅಭಿಮಾನಾಚೆ ವಿಷಯು. ತಾ. ೧-೧೨-೧೩ ದಿವಸು ೧೧ ಗಂಟ್ಯಾಕ ರಿವಾಜಾ ಮ್ಹಣಕೆ ಆಡಳಿತ ಮಂಡಳಿಚೆ ವಾರ್ಷಿಕ ಸಭಾ ಚಲ್ಲೆ ಉಪರಾಂತ ನವೀನ ಕಮಿಟಿ ಖಾತ್ತಿರಿ ಇಲೆಕ್ಷೇನ್ ಚಲ್ಲೆ. ಒಟ್ಟು ೧೮೦೦ ವೋಟಾ ಪೈಕಿ ೧೫೦೦ ತಿತ್ತುಲೆ ಲೋಕ ಮತದಾನ ಕೆಲೀಲ ಆಸ್ಸುನು ತಾಂತು ಖಜಾಂಚಿ ಜಾವ್ನು ವೆಂಚುನು ಆಯ್ಯಿಲೆ ಡಾ|| ದಯಾನಂದ ಪೈ ಹಾಂಕಾ ೯೩೨ ವೋಟ್ ಮೆಳ್ಳಾ. ಡಾ|| ಪೈ ಮಾಮು ಶ್ರೀಕಂಠದತ್ತ ಒಡೆಯರ್ ಪಂಗ್ಡಾ ದಾಕೂನು ಇಲೇಕ್ಷನ್ನಾಕ ರಾಬ್ಬಿಲೆ. ಉರಲೀಲ ತಶ್ಶಿ ಅಧ್ಯಕ್ಷ ಜಾವ್ನು ವೆಂಚುನು ಆಯ್ಯಿಲೆ ಶ್ರೀಕಂಠದತ್ತ ಒಡೆಯರಾಂಕ ೯೨೩ ವೋಟ, ಕಾರ್ಯದರ್ಶಿ ಜಾವ್ನು ವೆಂಚುನು ಆಯ್ಯಿಲೆ ಬ್ರಿಜೇಶ್ ಪಟೇಲ್ ತಾಂಕಾ ೯೭೭ ವೋಟ ಮೆಳ್ಳೆ. ಹೇ ಚುನಾವಣೆಂತು ಸರ್ವ ೨೪ ಸ್ಥಾನ ಶ್ರೀಕಠದತ್ತ ಒಡೆಯರ್ ಪಂಗ್ಡಾಕ ಮೆಳ್ಳಿಲೆ ಆಸ್ಸುನು ಹಾಂಗೆಲೆ ಎದೂರು ರಾಬ್ಬಿಲೆ ಸದಾನಂದ ಮಯ್ಯ ತಾಂತೂಯಿ ತಾಂಕಾ ಮಾಜಿ ಕ್ರಿಕೆಟರ‍್ಸ್ ಅನಿಲ ಕುಂಬ್ಳೆ ಆನಿ ಜಾವಗಲ್ ಶ್ರೀನಾಥ ತಾನ್ನಿ ಪಾಟಿಬಲಾಕ ಆಸಲೇರಿಚಿ ಪರಾಭವಾನಿ ಚುಕ್ಕುನು ಘೆವಚಾಕ ಜಾಯನಿ. ಡಾ|| ದಯಾನಂದ ಪೈ ಮಾಮ್ಮಾಂಕ ಆನಿ ತಾಂಗೆಲೆ ಪಂಗ್ಡಾಕ ಆಮಗೇಲೆ ಸರ್ವ ವಾಚಕಾ ತರಪೇನ ಅಭಿನಂದನ ಪಾವೈತಾ ತಾಂಗೆಲೆ ಅಧಿಕಾರಾವಧಿಂತು (೨೦೧೩ ದಾಕೂನು ೧೬) ಕರ್ನಾಟಕಾಂತು ಕ್ರಿಕೆಟ್ ವಾಡಪಣಾಕ, ಕ್ರಿಕೆಟ್ ಚಟುವಟಿಕೇಕ ಚ್ಹಡ ಪ್ರೋತ್ಸಾಹ ಮೆಳೊ ಮ್ಹೊಣು ಆಶಯ ಕರ್ತಾ. ಡಾ|| ದಯಾನಂದ ಪೈ ಮಾಮ್ಮಾಕ ದೇವು ಬರೆಂ ಕೊರೊಂ ಮ್ಹಣತಾ.
ಬಸ್ತಿ ವಾಮನ ಶೆಣೈ ೮೦ ಸಂಭ್ರಮ
“ವಿಶ್ವ ಕೊಂಕಣಿ ಸರದಾರ ಬಸ್ತಿ ವಾಮನ ಶೆಣೈ ೮೦ ವರ್ಷಾಚೆ ಜಲ್ಮದಿಸಾಚೆ ಸಂಭ್ರಮು ತಾ. ೧೦-೧೧-೧೩ಕ ಬಂಟ್ವಾಳಾಚೆ ಎಸ್. ವಿ. ಎಸ್. ಹೈಸ್ಕೂಲಾಚೆ ಸಭಾಂಗಣಾಂತ ಬಸ್ತಿ ವಾಮನ ಶೆಣೈ - ೮೦ ಚೆ ಸಂಭ್ರಮ ಸಮಾರಂಭ ಭಾರೀ ಸಂಭ್ರಮಾರಿ ಚಲ್ಲೆಂ.
ತತ್ಸಂಬಂಧ ಸಕಾಳಿ ಬಸ್ತಿ ವಾಮನ ಶೆಣೈ ಹಾಂಕಾ ಸಾರ್ವಜನಿಕ ಸನ್ಮಾನ, ಗೌರವ ದಿವಚೆ ಆನಿ ಯುವಕಾಂಗೆಲೆ ಆಯಚೆ ಆನಿ ಫಾಯಚೆ ಸಾಂಸ್ಕೃತಿಕ ಜೀವನ ಹ್ಯಾ ವಿಷಯಾಂತ ಗೋಷ್ಠಿ ಕಾರ್ಯಾವಳ್ ಮಂಗಳೂರು ವಿಶ್ವ ವಿದ್ಯಾಲಯಾಚೆ ಕುಲಪತಿ ಪ್ರೊ. ಟಿ. ಸಿ. ಶಿವಶಂಕರ ಮೂರ್ತಿನ ಉಗ್ತಾವಣ ಕೆಲೆಂ. ಬಿಜಾಪುರ ಕರ್ನಾಟಕ ವಿಶ್ವ ವಿದ್ಯಾನಿಲಯಾಚೆ ಕುಲಪತಿ ಡಾ. ಮೀನಾ ಚಂದಾವರ್ಕರ ಸಮಾವೇಶ ಕಾರ್ಯೆಚೆ ಅಧ್ಯಕ್ಷಪಣ ಘೇವ್ನು ಆಯಚೆ ಯುವ ಸಮುದಾಯಾಕ ಸ್ಕೂಲ, ಕಾಲೇಜ ದಿವಚೆ ಶಿಕ್ಷಣಾಚೆ ಒಟ್ಟೂಚಿ ಮ್ಹಾಲ್ಗಡ್ಯಾಲೆ ಆನಿ ಗುರೂಲೆ ಮಾರ್ಗದರ್ಶನ ಅತ್ಯಗತ್ಯ ಹಾಜ್ಜೆ ನಿಮಿತ್ತಿ ಸುಶಿಕ್ಷಿತ ಸಮಾಜ ನಿರ್ಮಾಣ ಜಾತ್ತಾ ಮ್ಹೊಣು ಸಾಂಗ್ಲೆಂ.
ಮೂಡಬಿದ್ರೆ ಆಳ್ವಾಸ್ ಶಿಕ್ಷಣ ಸಂಸ್ಥೆಚೆ ಅಧ್ಯಕ್ಷ ಡಾ. ಮೋಹನ ಆಳ್ವಾ, ಆನಿ ಇನ್‌ಫೋಸಿಸ್ ಸಂಸ್ಥೆಚೆ ಮ್ಹಾಲ್ಗಡೆ ಉಪಾಧ್ಯಕ್ಷ ರಾಮದಾಸ್ ಕಾಮತ್ ಯು. ಹಾನ್ನಿ ವಿದ್ಯಾರ್ಥ್ಯಾಂಕ ಉಪದೇಶಾತ್ಮಕ ಉತ್ರ ಸಾಂಗುನು ಮಾರ್ಗದರ್ಶನ ದಿಲ್ಲೆಂ. ಮ್ಹಾಲ್ಗಡೆ ಸಾಹಿತಿ, ಸಮಾವೇಶ -ಗೋಷ್ಠಿ ಸಮಿತಿಚೆ ಅಧ್ಯಕ್ಷ ಡಾ. ಏರ್ಯ ಲಕ್ಷ್ಮೀ ನಾರಾಯಣ ಆಳ್ವಾನ ಸ್ವಾಗತ ಕೆಲ್ಲೆಂ. ಬಂಟ್ವಾಳ ಎಸ್. ವಿ. ಎಸ್. ಕಾಲೇಜಾಚೆ ಉಪನ್ಯಾಸಕ ಪ್ರೊ. ತುಕಾರಾಮ ಪೂಜಾರಿನ ವಂದನಾರ್ಪಣ ಕೆಲ್ಲೆಂ. ಕಾರ್ಯಕ್ರಮಾಚೆ ಸಂಯೋಜಕ ಪ್ರೊ. ಎಂ ರಾಮಚಂದ್ರ ಹಾನ್ನಿ ಕಾರ್ಯಕ್ರಮ ನಿರೂಪಣ ಕೆಲ್ಲೆಂ.
ಬಸ್ತಿ ವಾಮನ ಶೆಣೈ - ೮೦ ಸಂಭ್ರಮ ಸಾಂಜೆವೆಳಾಚೆ ಕಾರ್ಯಕ್ರಮಾಂತ ಜಿಲ್ಲಾ ಉಸ್ತುವಾರಿ ಸಚಿವ ಬಿ. ರಮಾನಾಥ ರೈ ನ ಶ್ರೀ ಬಸ್ತಿ ವಾಮನ ಶೆಣೈಕ ಶಾಲ ಪಾಂಗುರ್ನು, ಮಾತ್ಯಾರ ಪೇಟಾ ಆನಿ ಸ್ಮರಣಿಕೆ ದೀವ್ನು ಸನ್ಮಾನ ಕರನ ಬಸ್ತಿ ವಾಮನ ಶೆಣೈ ೮೦ ವರ್ಷ ಪ್ರಾಯೆರೀಯ ಆರತಾಚೆ ಯುವಕಾಂಕ, ಚೆರ್ಡುಂವಾಕ ಏಕ ಮಾದರಿ ಜಾಲ್ಲ್ಲಿಂತಿ. ತಾಂಗೆಲಾಗಿ ಹೊಡ ಅಧಿಕಾರ, ಜವಾಬ್ದಾರಿ ನಾ ಜಾಲ್ಲ್ಯಾರೀಯ ಪ್ರತಿಫಲ ಅಪೇಕ್ಷಾ ಕರನಾಶಿ, ಸೇವಾ ಕಾರ್ಯ ಕರೂನ ಸಮಾಜಾಂತ ಏಕ ಸ್ಥಾನ ಪಾವಿಲೊ ಏಕ ಮಹಾನ ಪುರುಷ ಅಶಿಂ ಮ್ಹಣಾಲೊ. ‘ಬಸ್ತಿ ವಾಮನ ಶೆಣೈ-೮೦ ವರ್ಷ ಸಂತೋಷದಾಯಕ ಜಾವ್ನು ಗೌರಿ ಮಾಧವ ಶೆಣೈ, ಗೀತಾ ಸಿ. ಕಿಣಿ ಆನಿ ಕಸ್ತೂರಿ ಉಷಾ ಪೈ ಹಾನ್ನಿ ೮೦ ದಿವೊ ಲಾವನ ಶುಭ ಸಾಂಗ್ಲೆ. ಬೇಬಿ ಮಹಿಮಾ ಕಿಣಿನ ಸಂಸ್ಕೃತ ಶ್ಲೋಕ ಸಾಂಗುನು ಶೆಣೈ ಮಾಮಾಕ ಅಭಿನಂದನ ಗೀತೆ ಸಾಂಗ್ಲೆಂ. ಶ್ರೀ ಪುತ್ತೂರು ಪಾಂಡುರಂಗ ನಾಯಕಾನಿ ಕೊಂಕಣಿ ಭಾವ ಗೀತೆ ಸಾಂಗ್ಲೆ.
ಸನ್ಮಾನ ಘೆತ್ತಿಲೆ ಶ್ರೀ ವಾಮನ ಶೆಣೈನ ‘ಅಪಣ್ಯಾಲ ಜೀವನ ಸಫಲ ಜಾವಚಾಕ ಬಂಟ್ವಾಳ ಶ್ರೀ ವೆಂಕಟರಮಣ ದೇವಾಲೆ ದಯಾ ಕಾರಣ ಅಶಿಂ ಸಾಂಗಲೆ. ಅವಕಾಶ ಮೆಳ್ತಾನಾ ಕಾಮ ಕರನ ದಾಕಯಲಾ, ಆನಿ ಮ್ಹಾಲ್ಗಡೆ ವ್ಯಕ್ತಿಲೆ ಸಹಾಯ, ಸಹವಾಸ, ಪ್ರೇರಣಾನ ಹಾಂವೆ ಇತಲೆ ವಾವ್ರ ಕರೂಂಕ ಜಾಲ್ಲೆಂ ಮ್ಹೊಣು ಸಾಂಗ್ಲೆಂ. ಹ್ಯಾ ಸಂದರ್ಭಾರಿ ಶ್ರೀ ಬಸ್ತಿ ವಾಮನ ಶೆಣೈ ಆತ್ಮ ಕಥನ ಏಕ ಭಿಕ್ಷುಕ ಚಕ್ರವರ್ತಿಲಿ ಕಾಣಿ ಆನಿ ಬಸ್ತಿ-೮೦ ಸಂಭ್ರಮ ಮ್ಹಳೆಲೆ ಸ್ಮರಣಿಕಾ (ಸೊವಿನರ್) ಬುಕ್ ಉಗ್ತಾವಣ ಜಾಲ್ಲೆಂ.
ಮ್ಹಾಲ್ಗಡೆ ಸಾಹಿತಿ ಡಾ. ಏರ್ಯ ಲಕ್ಷ್ಮೀ ನಾರಾಯಣ ಆಳ್ವ ಮಣಿಪಾಲ ಗ್ಲೋಬಲ್ ಎಜುಕೇಶನ್ ಸರ್ವಿಸಸ್, ಬೆಂಗಳೂರು ಅಧ್ಯಕ್ಷ ಮಾನೆಸ್ತ ಟಿ.ವಿ. ಮೋಹನದಾಸ ಪೈ. ಇನ್‌ಫೋಸಿಸ್ ಸಂಸ್ಥೆಚೆ ಮ್ಹಾಲ್ಗಡೆ ಉಪಾಧ್ಯಕ್ಷ ರಾಮದಾಸ ಕಾಮತ್ ಯು. ಗೋವಾ ಕೊಂಕಣಿ ಅಕಾಡೆಮಿ ಅಧ್ಯಕ್ಷ ಪುಂಡಳೀಕ ನಾರಾಯಣ ನಾಯಕ್ ಹಾನ್ನಿ ಉಪಸ್ಥಿತ ಆಶಿಲಿಂಚಿ.
ಬಸ್ತಿ ವಾಮನ ಶೆಣೈ ಸಂಭ್ರಮ ಸಮಿತಿಚೆ ಕಾರ್ಯಾಧ್ಯಕ್ಷ ಮಾಣೂರು ಲಕ್ಷ್ಮಣ ಕಾಮತ್ ಹಾನ್ನಿ ಸ್ವಾಗತ ಕೆಲ್ಲೆಂ. ಮುಖೇಲ ಸಂಚಾಲಕ ಪಿ. ನಾರಾಯಣ ಕಾಮತ್, ಕಾರ್ಯದರ್ಶಿ ಬಿ. ಪ್ರಭಾಕರ ಪ್ರಭು, ಬಿ. ಕೃಷ್ಣ ಪ್ರಭು ಉಪಸ್ಥಿತಿ ಆಶಿಲಿಂಚಿ. ವಸಂತ ಪ್ರಭುನ ವಂದನಾರ್ಪಣ ಕೆಲ್ಲೆಂ. ಮಂಗಳೂರು ಆಕಾಶವಾಣಿ ಉದ್ಘೋಷಕಿ ಎಂ. ಶಕುಂತಳಾ ಆರ್ ಕಿಣಿನ ಕಾರ್ಯಕ್ರಮ ಚೆಂದಾಯೇರಿ ನಿರ್ವಹಣ ಕೆಲ್ಲೆಂ. ಕಾರ್ಯಕ್ರಮಾಚೆ ಆಖೇರೀಕ ಪುತ್ತೂರು ನರಸಿಂಹ ನಾಯಕ ಆನಿ ಪಂಗಡಾ ದಾಕೂನ ಕೊಂಕಣಿ-ಕನ್ನಡ ಭಾವಗೀತ ಕಾರ್ಯಕ್ರಮ ಚಲ್ಲೆಂ. ಅಶಿಂ ಸಕಾಳಿ ದಾಕುನು ರಾತ್ರಿ ಪರ್ಯಂತ ಕಾರ್ಯಕ್ರಮ ಚಲ್ಲೆಂ. ಶ್ರೀ ಬಸ್ತಿ ವಾಮನ ಶೆಣೈ ಮಾಮ್ಮಾಕ ೮೦ ಭರಲೀಲೆ ಹೇ ವೇಳ್ಯಾರಿ ಸರಸ್ವತಿ ಪ್ರಭಾಚೆ ಸರ್ವ ವಾಚಕಾ ತರಪೇನ ತಾಂಕಾ ದೇವು ಬರೆಂ ಕೊರೊಂ ಮ್ಹಣತಾ.
ತೋನ್ಸೆ ಪೈ ಕುಟುಂಬಾಚೆ ಧಾರ್ಮಿಕ ಕಾರ್ಯ
ಕಲ್ಯಾಣಪುರ ತೋನ್ಸೆ ಪೈ ಕುಟುಂಬಸ್ಥಾಲೆ ಮ್ಹಾಲ್ಗಡೆ ಘರಾಂತು ಪ್ರತಿ ಮ್ಹಹಿನೋ ಶ್ರೀ ಸತ್ಯನಾರಾಯಣ ವೃತ ಚಲ್ತಾ ಆಸ್ಸುನು ಕುಟುಂಭಾಚೆ ಅಭ್ಯುದಯ ಆನಿ ಲೋಕ ಕಲ್ಯಾಣಾ ಖಾತ್ತಿರಿ ೧೫೦ಚೆ ಶ್ರೀ ಸತ್ಯ ನಾರಾಯಣ ವೃತ ಮಹೋತ್ಸವು ತಾ. ೨೨-೧೧-೧೩ ದಾಕೂನು ೨೪-೧೧-೧೩ ಪರ್ಯಂತ ವೇ| ಶ್ರೀ ಕೆ. ಶ್ರೀಕಾಂತ ಅವಧಾನಿ ಹಾಂಗೆಲೆ ಪುರೇತಪಣಾರಿ ಶ್ರೀ ವಿಷ್ಣು ಸಹಸ್ರನಾಮ ಮಹಾಯಾಗ(೨೨-೧೧-೧೩), ಶ್ರೀ ಗೀತಾ ಮಹಾಯಾಗ(೨೩-೧೧-೧೩), ಶ್ರೀ ಶಾಂತೇರಿ ಮಹಾಲಸಾ ನಾರಾಯಣೀ ಮಹಾಯಾಗ, ತಶ್ಶಿಚಿ ೧೫೦ಚೆ ಶ್ರೀ ಸತ್ಯನಾರಾಯಣ ವೃತ ಇತ್ಯಾದಿ ಧಾರ್ಮಿಕ ಆನಿ ಸಾಂಸ್ಕೃತಿಕ ಕಾರ್ಯಕ್ರಮ ಬರಶಿ ವಿಜೃಂಭಣೇರಿ ಸಂಪನ್ನ ಜಾಲ್ಲೆ. ಹಾಜ್ಜ ಒಟ್ಟು ಪ್ರತಿ ನಿತ್ಯ ಭಜನ, ಧಾರ್ಮಿಕ ಚಿಂತನ, ಯೋಗ ಪ್ರದರ್ಶನ, ಗೀತಾ ಭಾವಮಂಜರಿ ಮ್ಹಣ್ಚೆ ಅಮೂಲ್ಯ ಧಾರ್ಮಿಕ ಕೃತಿ ಉಗ್ತಾವಣ, ಕುಟುಂಬಸ್ಥಾಲೆ ವಂಶವೃಕ್ಷ ಆನಿ ಎಡ್ರಾಸಾಚೆ ವೆಬ್‌ಸೈಟ್ ಉಗ್ತಾವಣ, ಚಿತ್ರಕಲೆ, ಛಾಯಚಿತ್ರ ಪ್ರದರ್ಶನ, ಮಹಾ ಪೂಜಾ, ಮಹಾಸಮಾರಾಧನ ಇತ್ಯಾದಿ ಕಾರ್ಯಕ್ರಮ ಚಲ್ಲೆ.
ತಾ. ೨೩-೧೧-೧೩ಕ ಶ್ರೀ ಕವಳೇ ಮಠಾಧೀಶ ಶ್ರೀಮದ್ ಶಿವಾನಂದ ಸರಸ್ವತಿ ಸ್ವಾಮೀಜಿ, ೨೪-೧೧-೧೩ಕ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮೀಜಿ ಆನಿ ೨೪-೧೧-೧೩ಕ ಸಾಂಜ್ವಾಳಾ ಚಲೀಲೆ ಸಮಾರೋಪ ಸಮಾರಂಭಾಕ ಶ್ರೀಮದ್ ವಿದ್ಯಾಧಿರಾಜ ಶ್ರೀಪಾದ ವಡೇರ ಸ್ವಾಮಿಜಿ ಉಪಸ್ಥಿತಿ ವ್ಹೊರ್ನು ಕುಟುಂಬಾಚೆ ಸರ್ವ ಸದಸ್ಯಾಂಕ ಆಶೀರ್ವಚನ ಆನಿ ಫಲ ಮಂತ್ರಾಕ್ಷತ ದೀವ್ನು ಆಶೀರ್ವಾದ ಕೆಲ್ಲೆ. ಹೇ ಸಂದರ್ಭಾರಿ ದೀಪಾರಾಧನ, ರಂಗಪೂಜಾ ಇತ್ಯಾದಿ ಸೇವಾಯಿ ಚಲ್ಲೆ. ದೇಶ, ವಿದೇಶಾಂತು ಆಶ್ಶಿಲೆ ತೋನ್ಸೆ ಕುಟುಂಭಾಚೆ ಸದಸ್ಯಾನಿ ಹಾಂತು ವಾಂಟೊ ಘೆತ್ತಿಲೆ.
ಇಸ್ಕಾನ್ ತರಪೇನ ಶ್ರೀ ಕೆ. ಜನಾರ್ಧನ ಭಟ್ಮಾಮ್ಮಾಂಕ ಸನ್ಮಾನು
ಇಸ್ಕಾನಾಚೆ ಅಕ್ಷಯ ಪಾತ್ರೆ ಪ್ರತಿಷ್ಠಾನಾಚೆ ತರಪೇನ ಸರಸ್ವತಿ ಪ್ರಭಾಚೆ ನಿರಂತರ ಪ್ರೋತ್ಸಾಹಕ ಮೈಸೂರ‍್ಚೆ ಶ್ರೀ ಕೆ. ಜನಾರ್ಧನ ಭಟ್ಮಾಮ್ಮಾP ಆತ್ಮೀಯ ಸನ್ಮಾನು ತಾ. ೪-೧೧-೨೦೧೩ ದಿವಸು ಮಂಗಳೂರಾಂತು ಚಲ್ಲೆ. ಸಮಾರಂಭಾಕ ಮುಖೇಲ ಸೊಯರೆ ಜಾವ್ನು ಎಮ್.ಆರ್.ಪಿ.ಎಲ್. ಆಡಳಿತ ನಿರ್ದೇಶಕ ಶ್ರೀ ಪಿ.ಪಿ. ಉಪಾಧ್ಯಾಯ ಆಯ್ಯಿಲೆ. ಮಂಗಳೂರ್ಚೆ ಡಾ. ಟಿ.ಎಮ್.ಎ. ಪೈ ಅಂತಾರಾಷ್ಟ್ರೀಯ ಸಭಾಂಗಣಾಂತು ಘಡಿಲೆ ಅಕ್ಷಯ ಪಾತ್ರೆ ಪ್ರತಿಷ್ಠಾನ ೨೦೦೫ ದಾಕೂನು ಆಯ್ಚೆ ಪರ್ಯಂತ ೧೪೫ ಸರಕಾರಿ ಅನುದಾನಿತ ಶಾಳೆಚೆ ಸುಮಾರ ೨೫,೦೦೦ ವಿದ್ಯಾರ್ಥ್ಯಾಂಕ ೨.೫ ಕೋಟಿ ಧೋಂಪಾರಾ ಜವಣ ಪಾವಿತ ಕೆಲೀಲೆ ವಿಶೇಷ ಸಂಭ್ರಮಾಚರಣೆ ಸಂದರ್ಭಾರಿ ಹೇ ಯೋಜನೆಕ ನಿರಂತರ ಜಾವ್ನು ಆರ್ಥಿಕ ಮದ್ದತ್ ಕರತಾ ಆಸ್ಸುಚೆ ಶ್ರೀ ಭಟ್ಮಾಮ್ಮಾಕ ಸನ್ಮಾನು ಕೆಲ್ಲೊ.
ಹೇ ಸಮಾರಂಭಾಕ ಗೌರವ ಸೊಯರೆ ಜಾವ್ನು ಯವ್ನು ಸನ್ಮಾನ ಸ್ವೀಕಾರ ಕೋರ್ನು ಉಲೈಲೆ ಮೈಸೂರಾಚೆ ಆರ್ಥಿಕ ಸಲಹೆಗಾರ ಆನಿ ನಿವೃತ್ತ ಸಿಂಡಿಕೇಟ್ ಬ್ಯಾಂಕ್ ಪ್ರಬಂಧಕ ಶ್ರೀ ಜನಾರ್ಧನ ಭಟ್ ಮಾಮು “ಗರೀಬ ಚರ್ಡುವಾಂಲೆ ಪೊಟ್ಟಾಭೂಕಿ ನಿವಯ್ಚೆ ಅಕ್ಷಯ ಪಾತ್ರಾ ಕಾರ್ಯ ಮಹತ್ವಾಚೆ ಆಸ್ಸುನು, ಹ್ಯಾ ಪ್ರೇರಣೇನ ಆಪಣಾನ ಚರ್ಡುಂವಾಂಕ ಜವಣ ವ್ಹೋರ್ನು ಪಾವಯಚಾಕ ಸುಮಾರ ೧.೧೫ ಕೋಟಿ ಕಿಮ್ಮತ್ತಾಚೆ ೧೨ ವಾಹನ ದಾನ ಜಾವ್ನು ದಿಲೇಲೆ ಆಸ್ಸುನು, ವಿಂಗಡ ದಾನಿ ಲೋಕಾನಿ, ಸಂಘ-ಸಂಸ್ಥ್ಯಾನಿ ಹಾಜ್ಜೇನ ಪ್ರಭಾವಿತ ಜಾವ್ನು ಸ್ವಯಂ ಪ್ರೇರಣೆನ ಮುಖಾರಿ ಯವ್ನು ಹೇ ಅಕ್ಷಯ ಪಾತ್ರೆ ಪ್ರತಿಷ್ಠಾನಾಕ ಪ್ರೋತ್ಸಾಹ ದಿವ್ಕಾ. ಮ್ಹೊಣು ವಿನಂತಿ ಕೆಲ್ಲಿಂತಿ. ಮಂಗಳೂರು ಅಕ್ಷಯ ಪಾತ್ರೆ ಪ್ರತಿಷ್ಠಾನ ಶಾಖೆಚೊ ಮುಖ್ಯಸ್ಥ ಶ್ರೀ ಕಾರುಣ್ಯಸಾಗರ ದಾಸ ತಾನ್ನಿ ಅಧ್ಯಕ್ಷತಾ ಘೆತ್ತಿಲೆ. ವೇದಿಕೇರಿ ಮಣಿಪಾಲ ವಿಶ್ವವಿದ್ಯಾಲಯಾಚೆ ಕುಲಪತಿ ಡಾ. ರಾಮದಾಸ ಪೈ ಆನಿ ಕ್ಯಾ. ಗಣೇಶ್ ಕಾರ್ಣಿಕ್ ಉಪಸ್ಥಿತ ವ್ಹರಲೀಲೆ.
ಈ ಸಂದರ್ಭಾರಿ ಶ್ರೀ ಕೆ. ಜನಾರ್ಧನ ಭಟ್ ಸಮೇತ ೨೦ ಲೋಕ ಉದಾರ ದಾನಿಂಕ ಹಾರ್ದಿಕ ಜಾವ್ನು ಸನ್ಮಾನ ಕೆಲ್ಲೆ. ಎಮ್.ಆರ್.ಪಿ.ಎಲ್. ಉಪ ಮಹಾ ಪ್ರಬಂಧಕ ಶ್ರೀಮತಿ ಲಕ್ಷ್ಮೀಕುಮಾರನ್ ತಾನ್ನಿ ಆಭಾರ ಮಾನಲೆ.
ಶ್ರೀ ತಿರುಮಲ ದೇವಳ, ಮೂಡಭಟ್ಕಳ
ಶ್ರೀ ಸಾಂತಪ್ಪ ನಾಯಕ ಶ್ರೀ ತಿರುಮಲ ದೇವಳ, ಮೂಡಭಟ್ಕಳ ಹಾಂಗಾ ಶ್ರೀ ಸುಬ್ರಹ್ಮಣ್ಯ ಷಷ್ಠಿಚೆ ಕಾರ್ಯಕ್ರಮ ದೇವಾಕ ಅಭಿಷೇಕ, ಮಹಾಪೂಜಾ, ಉಪರಾಂತ ಮಹಾ ಸಂತರ್ಪಣ, ರಾತ್ತಿಕ ದೇವಾಲೆ ಪಾಲ್ಕಿ ಉತ್ಸವು ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಬರಶಿ ತಾ. ೮-೧೨-೨೦೧೩ ದಿವಸು ಚಲ್ಲೆ. ತಾ. ೧೩-೧೨-೧೩ ದಿವಸು ಏಕಾದಶಿ, ಗೀತಾ ಜಯಂತಿ, ಅಖಂಡ ಭಜನಾ ಆನಿ ದೀಪಾರಾಧನ, ರಾತ್ತಿಕ ದ್ವಾದಶ ಸ್ತ್ರೋತ್ರ, ಪಾರಾಯಣ, ಪನವಾರ ಮಹಾ ಮಂಗಳಾರ್ತಿ ಚಲ್ಲೆ. ತಾ. ೧೪-೧೩-೧೩ಕ ದೇವಾಲೆಂ ನಿರ್ಮಾಲ್ಯ ವಿಸರ್ಜನಾ, ಪವಮಾನ ಪಂಚಾಮೃತಾಭಿಷೇಕ, ಧೋಂಪಾರಾ ಮಹಾಪೂಜಾ, ಮಹಾ ಸಂತರ್ಪಣ, ರಾತ್ತಿಕ ದೇವಾಲೆ ಪಾಲ್ಕಿ ಉತ್ಸವು, ಅಷ್ಟಾವಧಾನ, ಸೇವಾ ಪ್ರಸಾದ ವಿತರಣ ಇತ್ಯಾದಿ ಕಾರ್ಯಕ್ರಮ ಮಸ್ತ ವಿಜೃಂಭಣೇರಿ ಗಾಂವ್ಚೆ ಆನಿ ಪರಗಾಂವ್ಚೆ ಅಪಾರ ಭಕ್ತ ಬಾಂಧವಾಲೆ ಉಪಸ್ಥಿತೀರಿ ಚಲ್ಲೆ.
ವರದಿ : ಸರ್ವೋತ್ತಮ ವೆಂಕಟನಾರಾಯಣ ಭಟ್, ಭಟ್ಕಳ
ಭಟ್ಕಳ ಶ್ರೀ ಕಾಶೀಮಠ
ಭಟ್ಕಳ ಶ್ರೀ ಕಾಶೀಮಠಾಚೆ ಜೀಣೋದ್ಧಾರ ಸುವರ್ಣ ಮಹೋತ್ಸವ ಆನಿ ನವಮ ಪುನರ್ ಪ್ರತಿಷ್ಠಾ ವರ್ಧಂತಿ ಉತ್ಸವು ತಾ. ೧೪-೧೨-೧೩ ದಾಕೂನು ೧೭-೧೨-೧೩ ಪರ್ಯಂತ ಶ್ರೀಮತ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪಟ್ಟಶಿಷ್ಯ ಶ್ರೀಮತ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯ ಉಪಸ್ಥಿತೀರಿ ಸಂಪನ್ನ ಜಾಲ್ಲೆ. ಸ್ವಾಮ್ಯಾಂಕ ೧೪-೧೨-೧೩ ದಿವಸು ಪುಷ್ಪಾಂಜಲಿ ಕ್ರಾಸಾಚಾನ ಸಾಲಂಕೃತ ಪುಷ್ಪ ಪಾಲ್ಕಿಂತು ಮೆರವಣಿಗೇರಿ ಮಠಾಕ ಆಪ್ಪೋನು ಹಾಳ್ಳೆ. ಮೆರವಣಿಗೇರಿ ಮಹಿಳಾ ವಿಭಾಗಾಚಾನ ಪೂರ್ಣಕುಂಭ ಧೋರ್ನು ಸ್ವಾಗತ ಕೆಲಯಾರಿ, ಕೇರಳಾಚೆ ಪ್ರಸಿದ್ಧ ಚಂಡೆ ವಾದನ ಆನ್ನೇಕ ಆಕರ್ಷಣ ಜಾವ್ನು ಆಶ್ಶಿಲೆ. ಹೇ ಸಂದರ್ಭಾರಿ ದೇವತಾಪ್ರಾರ್ಥನಾ, ಶತಕಲಶಾರ್ಚನ ಆನಿ ಪ|ಪೂ| ಸ್ವಾಮ್ಯಾಂಗೆಲೆ ಕರಕಮಲಾನಿ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಾಕ ಆನಿ ಶ್ರೀ ಮುಖ್ಯಪ್ರಾಣ ದೇವಾಕ ಶತಕುಂಭಾಭಿಷೇಕ, ಸಾನಿಧ್ಯ ಹವನ, ಭಿಕ್ಷಾ ಸೇವಾ, ಸಭಾ ಕಾರ್ಯಕ್ರಮ, ಶ್ರೀ ಲಕ್ಷ್ಮೀವೆಂಕಟೇಶ ದೇವಾಲೆ ನಗರೋತ್ಸವು, ವಸಂತ ಪೂಜಾ, ಲಘುವಿಷ್ಣು ಪಾರಾಯಣ, ಪ|ಪೂ| ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ಶ್ರೀ ದೇವಾಂಕ ಲಘುವಿಷ್ಣು ಕಲಶಾಭಿಷೇಕ, ಲಘುವಿಷ್ಣು ಹವನಮನ್ಯುಸೂಕ್ತ ಪಾರಾಯಣ, ಭೂರಿ ಸಮಾರಾಧನ, ಶ್ರೀಮದ್ ಸಂಯಮೀಂಧ್ರ ತೀರ್ಥ ಸ್ವಾಮ್ಯಾಂಕ ಶುಭ ವಿದಾಯ ಇತ್ಯಾದಿ ಕಾರ್ಯಕ್ರಮ ಚಲೇಲೆ ಖಬ್ಬರ ಮೆಳ್ಳಾ.
ಶ್ರೀ ಮಹಾಗಣಪತಿ ಮಹಮ್ಮಾಯಾ ದೇವಳ, ಶಿರಾಲಿ
ಶಿರಾಲಿಚೆ ಶ್ರೀ ಪೇಟೆ ವಿನಾಯಕ ಶಾಂತಾದುರ್ಗಾ ಯಾನೆ ಮಹಾಗಣಪತಿ ಮಹಾಮಾಯಾ ದೇವಳಾಂತು ಉಭಯ ದೇವಾಕ ಸಮರ್ಪಣ ಕೆಲೀಲೆ ರಜತ ದ್ವಾರಾಚೆ ಉದ್ಘಾಟನ ತಾ. ೨೨-೧೧-೨೦೧೩ ದಿವಸು ಶ್ರೀ ಕಾಶೀಮಠಾಧೀಶ ಶ್ರೀಮತ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪಟ್ಟಶಿಷ್ಯ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ಸಂಪನ್ನ ಜಾಲ್ಲೆ. ವಿಜೃಂಭಣೇರಿ ಚಲೀಲೆ ಹೇ ಸಮಾರಂಭಾಕ ಅಪಾರ ಕುಳಾವಿ ಆನಿ ಭಕ್ತ ಬಾಂಧವ ಯವ್ನು ಹರಿ-ಗುರು ಕೃಪೇಕ ಪಾತ್ರ ಜಾಲ್ಲಿಂತಿ.
ದುಃಖಾಶ್ರು
ಬೆಜ್ಜವಳ್ಳಿಚೆ ಶ್ರೀ ಕೋಡಿ ಪ್ರಕಾಶ ಕಿಣ ಹಾನ್ನಿ ತಾ. ೬-೧೧-೧೩ ಕ ದೈವಾಧೀನ ಜಾಲ್ಲಿಂತಿ ಮ್ಹೊಣು ಕಳೋವಚಾಕ ಮಸ್ತ ವಿಷಾಧ ಜಾತ್ತಾ. ಹಾಂಗೆಲೆ ಆತ್ಮ ಸದ್ಗತಿ ಖಾತ್ತಿರಿ “ಮಿತ್ರ ಭೋಜನ ತಾ. ೧೭-೧೧-೨೦೧೩ ದಿವಸು ತೀರ್ಥಹಳ್ಳಿಚೆ ಶ್ರೀ ಕೋದಂಡರಾಮ ದೇವಳಾಂತು ವ್ಯವಸ್ಥೆ ಕೆಲೀಲೆ. ತಾಂಗೆಲೆ ಕುಟುಂಬಾಚೆ ಬಂಧು-ಮಿತ್ರ ಹೇ ಸಂದಭಾರಿ ಉಪಸ್ಥಿತ ಆಶ್ಶಿಲೆ.
ಶಿರಸಿ ಜಿ.ಎಸ್.ಬಿ. ಲೀಗಾ ತರ್ಫೆನ್ ಶಾರದ ಉತ್ಸವ ಆನಿ ಸ್ಕಾಲರ್ಶಿಪ್ ವಿತರಣ
ಶಿರಸಿ ಜಿ.ಎಸ್.ಬಿ. ಲೀಗ್ ಆನಿ ಶಿರಸಿ ತಾಲೂಕಾ ಜಿ.ಎಸ್.ಬಿ. ಸೇವಾ ವಾಹಿನಿ ಹಾಂಗೆಲ್ಯಾ ಸಂಯುಕ್ತಾಶ್ರಯಾಂತು ಹ್ಯಾ ವರ್ಷಾಚೆ ನವರಾತ್ರಿ ಉತ್ಸವಾ ನಿಮಿತ್ತಿ ಶಾರದಾ ಪೂಜಾ ವಿದ್ಯುಕ್ತ ಜಾವನು ಚಲೋವ್ನ ಹಾಡ್ಲಿ. ಹ್ಯಾ ಸಂಬಂಧ ಚಲಿಲ್ಯಾ ಸಭಾ ಕಾರ್ಯಕ್ರಮಾಂತು ಪ್ರತಿಭಾ ಪುರಸ್ಕಾರ ಆನಿ ವಿದ್ಯಾರ್ಥಿವೇತನ ವಿತರಣ ಘಡೋವನು ಹಾಡ್ಲೆಂ. ಮುಖೇಲ ಸೊಯ್ರೆ ಜಾವನು ಆಯ್ಯಿಲೇ ಸಿದ್ಧಾಪುರ ಎಂ.ಜಿ.ಸಿ. ಕಾಲೇಜಾಚೆ ಪ್ರಾಧ್ಯಾಪಕ ಶ್ರೀ ಸುರೇಶ ಗುತ್ತೀಕರ ಹಾನ್ನಿ ಉಲೈತಾ “ಸಮಾಜಾಚೇ ವಿದ್ಯಾರ್ಥಿ ಶಿಕ್ಷಣಾಂತು ಮುಖಾರಿ ಆಸ್ಸೂನು ಆನೇಕ ಕ್ಷೇತ್ರಾಂತು ಸಾಧನ ಕರ್ತ ಆಶ್ಶಿಲ್ಲೆಂ ಆಮ್ಕಾ ಸರ್ವಾಂಕ ಅಭಿಮಾನಾಚೋ ವಿಷಯು. ಖಂಚೇ ಪರಿಸ್ಥಿತೀಂತು ಆರ್ಥಿಕ ಮುಗ್ಗಟ್ಟು ತಾಂಗೆಲ್ಯಾ ಶಿಕ್ಷಣಾಕ ಅಡ್ಡಿ ಜಾವ್ನಯೇ ಮ್ಹಣ್ಣು ಅನೇಕ ಸಂಘ ಸಂಸ್ಥೆ ತಾಂಕಾ ಸ್ಕಾಲರ‍್ಶೀಫ್ ದಿತ್ತಾ ಆಸ್ಸಾಚಿ. ಸಮಾಜಾಚೆ ವಿದ್ಯಾರ್ಥಿನಿ ಹೇ ಸೌಲಭ್ಯಾಚೆ ಸದುಪಯೋಗ ಕರ್ನು ಘೇವನು ಶಿಕ್ಷಣ ಪೂರ್ಣ ಜಾಯ್ನಾ ಪುಡೆ ತಾಂಗೆಲೆ ಪಾಯಾರಿ ತಾನ್ನಿ ರಾಬಚೇ ವೇಳ ಆಯ್ಯಿಲ ತೆನ್ನಾ ಮಾತೃ ಸಂಸ್ಥೆನ ಕೆಲ್ಲಲೋ ಸಹಾಯ ವಿಸರ್ನಾಶ್ಶಿ ತ್ಯಾ ಸಂಸ್ಥೇಕ ಆರ್ಥಿಕ ಮದ್ದತ್ ಕರ್ನು ತೋ ಸಂಸ್ಥೊ ಘಟ್ಟಿ ಕೊರ್ಕಾ ಆನಿ ತ್ಯಾ ಸಂಸ್ಥೆಚೆಂ ಕಾರ್ಯ ನಿರಂತರ ಚೋಲ್ಕಾ ಆಶ್ಶಿಂ ಆಪೋವ್ಣೆ ದಿಲ್ಲೆಂ.
ಶಿರಸಿ ಜಿ.ಎಸ್.ಬಿ. ಲೀಗ್ ಕಾರ್ಯದರ್ಶಿ ಶ್ರೀ ಎಂ.ಎಸ್. ಪ್ರಭು ಹಾನ್ನಿ ಸಭಂತು ಸ್ವಾಗತ ಕರ್ನು “ಹ್ಯಾ ವರ್ಷ ಲೀಗಾ ವತೀನ ಪಿ.ಯು.ಸಿಕ ೪೦, ಪದವಿ ಶಿಕ್ಷಣಾಕ ೩೨, ಸ್ನಾತಕೋತ್ತರ ಪದವಿ-೯, ಇಂಜಿನಿಯರಿಂಗ್ ಆನಿ ಡಿಪ್ಲೋಮಾ-೩೧ ಅಶ್ಶಿಂ ಸುಮಾರ ೧೪೫ ವಿದ್ಯಾಂರ್ಥ್ಯಾಂಕ ೧,೪೬,೦೦೦/- ರೂಪೈ ವಿದ್ಯಾರ್ಥಿ ವೇತನ ವಿತರಣ ಕರ್ತ ಆಸ್ಸಾಚಿ ಮ್ಹಣು ಸಾಂಗ್ಲೆ ಆನಿ ಪ್ರತಿವರ್ಷ ಥೊಡೆ ಪರ್ಸೆಂಟ ಸಮಾಜ ಬಾಂಧವಾಲೇ ಆರೋಗ್ಯ ಆನಿ ಸಾಮಾಜಿಕ ಅಗತ್ಯಾಕ ಖರ್ಚು ಕರ್ತಾಚಿ ಆಶ್ಶಿಂ ತಾನ್ನಿ ಸಾಂಗ್ಲೆಂ ‘ಇತ್ಲೆ ದಿಸಾಂತು ಲೀಗಾಚೆಂ ಮೂಲ ಧನ ಸುಮಾರ ೨೯ ಲಾಖ ಅಸ್ಸೂನು ತಾಜ್ಜಿ ವಾಡೀನ ಪ್ರತಿ ವರ್ಷ ಹೆಂ ಸ್ಕಾಲರ್ಶಿಪ್ ದಿವಚೆಂತು ಜಾತ್ತಾ. ಆಶ್ಶಿಂ ವಿವರಣ ದೀವನು ಸಮಾಜ ಬಾಂಧವಾನಿ ಆನೀಕ ಜಾಸ್ತಿ ಆರ್ಥಿಕ ದೇಣಿಗಾ ದೀವ್ನು ಹೇಂ ಲೀಗ ಸಧೃಡ ಕೊರ್ಕಾ ಆಶ್ಶಿಂ ತಾನ್ನಿ ಆಪೋವಣೆ ದಿಲ್ಲೆಂ.
ಅಧ್ಯಕ್ಷ ಪಣ ಸಾಂಭಾಳಿಲೆ ಲೀಗಾಚೇ ಡಾ. ವಿ.ಎಸ್. ಸೋಂದೆ ಹಾನ್ನಿ ತಾಂಗೆಲ್ಯಾ ಅಧ್ಯಕ್ಷೀಯ ಭಾಷಣಾಂತು ವಿದ್ಯಾರ್ಥಿ ಜನಾಲೆ ಪಾಲಕಾನಿ ತಾಂಗೆಲ್ಯಾ ಚರ್ಡುವಾಂಕ ಲಭ್ಯ ಅಶಿಲ್ಲೆ ಶಿಕ್ಷಣಾವಕಾಶ ಆನಿ ಭಾರತಾಂತು ಲಭ್ಯ ಅಶಿಲ್ಲೇ ಆರ್ಥಿಕ ಮದ್ದತ್ತಿಚೇ ಸಂಘ ಸಂಸ್ಥೆ ಕಡೇನ ಮದತ್ ಘೇವನು ವಿದ್ಯಾರ್ಥ್ಯಾಲೆಂ ಶಿಕ್ಷಣ ಪೂರ್ಣ ಕರ್ಚಾಂತು ಲಕ್ಷ ಘಾಲಕಾ. ಇತ್ಲೆ ನ್ಹಂಯಿ ಅಶ್ಶಿಂ ಸಮಾಜ ಬಾಂಧವಾಲೇ ಚೆರ್ಡಾಂಕ‌ಆರ್ಥಿಕ ಮದ್ದತ್ ಕರ್ಚೆ ಕಷ್ಟಾಂತು ಆಶ್ಶಿಲೆಂ ಸಂಘ ಸಂಸ್ಥೆಕ ಉದಾರ ಸಹಾಯು ಕೊರ್ನು ತ್ಯಾ ಸಂಸ್ಥೆಚಿ ಹಾತ- ಪಾಯ ಘಟ್ಟಿ ಕೊರ್ಚಾಂತು ಸಕ್ರೀಯ ಸಹಾಯ ಕೊರ್ಕಾ ಅಶ್ಶಿಂ ತಾನ್ನಿ ಸಾಂಗ್ಲೆ. ನವರಾತ್ರಿ ಚ್ಯಾ ಹ್ಯಾ ಶುಭ ಸಂಧರ್ಭಾಂತು ಚಲಚಾ ಶಾರದಾ ಪೂಜಾ ಉತ್ಸವಾಂತು ಆನೀಕ ಜಾಸ್ತಿ ಸಂಖ್ಯೆಂತು ವಿದ್ಯಾರ್ಥಿನಿ ಆನಿ ತಾಂಗೆಲ್ಯಾ ಪಾಲಕಾನಿ ಭಾಗ ಘೇವಚೆ ಅವಶ್ಯ ಆಸ್ಸಾ ಆಶ್ಶಿಂ ತಾನ್ನಿ ಅಪೋವ್ಣೆ ದಿಲ್ಲೆಂ.
ಹ್ಯಾ ಸಂದರ್ಭಾಂತು ದಿ. ಪುಂಡಲೀಕ ಪ್ರಭು ದತ್ತಿ ನಿಧಿ, ದಿ. ನಾಗೇಶ ಗಣೇಶ ಸೊಂದೆ ದತ್ತಿ ನಿಧಿ ಆನಿ ದಿ. ವಸಂತ ಮುಡ್ಲಗಿರಿ ಶಾನಭಾಗ ದತ್ತಿ ನಿಧಿಂತುಲ್ಯಾನ ಲಭ್ಯ ಆಶಿಲೆಂ ವಿದ್ಯಾರ್ಥಿ ವೇತನ ವಿತರಣ ಕೆಲ್ಲೆಂ. ಮುಖೇಲ ಸೊಯರೆ ಶ್ರೀ ಸುರೇಶ ಗುತ್ತೀಕರ ಆನಿ ಶಿಕ್ಷಣ ರಂಗಾಕ ೩೩ ವರ್ಷಾ ಸೇವಾ ಕರ್ನು ನಿವೃತ್ತ ಜಾಲ್ಲಲಿ ಶಿಕ್ಷಕಿ ಶ್ರೀಮತಿ ಸುಖಾ ರಮೇಶ ನಾಯಕ ತಾಂಕಾ ಸಮಾಜ ತರ್ಫೆನ ಸತ್ಕಾರ ಕೆಲ್ಲೊ. ಪಠ್ಯೇತರ ಚಟುವಟಿಕೇಂತು ವಿಶೇಷ ಸಾಧನಾ ಕೆಲ್ಲಿಲ್ಯಾ ಕು. ಸೌಭಾಗ್ಯ ಭಟ್, ದರ್ಶನ ಕಿಣಿ, ಮಾನಸಾ ಪೈ ಆನಿ ರೋಹನ ನಾಯಕ ಹಾಂಕಾ ಗೌರವ ಕೆಲ್ಲೊ.
ಶ್ರೀಮತಿ ಸೂರಜರಾಣಿ ಪ್ರಭು, ಪ್ರಭಾ ಬಾಳೂರ ಆನಿ ಶ್ರೀದೇವಿ ನಾಯಕ ಹಾನ್ನಿ ಪ್ರಾರ್ಥನ ಸಾಂಗ್ಲೆ ಜ್ಞಾನಜ್ಯೋತಿ ಆರ್ಥಿಕ ಸಾಕ್ಷರತಾ ಕೇಂದ್ರಾಚೆ ಶ್ರೀ ಎಲ್.ವಿ.ನಾಯಕ ಹಾನ್ನಿ ಬ್ಯಾಂಕಾಂತು ಲಭ್ಯ ಆಶ್ಶಿಲೆ ಶೈಕ್ಷಣಿಕ ಲೋನ ಹ್ಯಾ ಬದ್ದಲ ಮಾಹಿತಿ ದಿಲ್ಲಿ. ಶ್ರೀ ಮಹಾವಿಷ್ಣು ದೇವಳಾಚೆ ಮೊಕ್ತೇಸರ ಶ್ರೀ ವಿಷ್ಣುದಾಸ ಕಾಸರಕೋಡ ಉಪಸ್ಥಿತಿ ಆಶಿಲೆ. ವಾಸುದೇವ ಶಾನಭಾಗ ಹಾನ್ನಿ ನಿರೂಪಣ ಕೋರ್ನು ಅಖೇರಿಕ ವಂದನಾರ್ಪಣ ಕೆಲ್ಲೆಂ. ವರದಿ : ವಾಸುದೇವ ಶಾನಭಾಗ
ಗೊಂದ್ಲಾಂತು ಗೋಂದೋಳು
ಶ್ರೀ ಲಕ್ಷ್ಮೀವೆಂಕಟೇಶ ನಾಟಕ ಸಭಾ ಉಡುಪಿ ಹಾಜ್ಜೆ ಮಹಿಳಾ ಕಲಾವಿದೆನ ಪ್ರಸ್ತುತ ಕೆಲ್ಲೆಲೆ ಮುಂಡಾಶಿ ದೇವದಾಸ ಪೈ ವಿರಚಿತ ಹಾಸ್ಯಮಯ ಕೊಂಕಣಿ ನಾಟಕ ಗೊಂದ್ಲಾಂತು ಗೋಂದೋಳು ಶ್ರೀ ಲಕ್ಷ್ಮೀವೆಂಕಟೇಶ ದೇವಸ್ಥಾನಾಚೆ ಶಾರದಾ ಮಹೋತ್ಸವ ಸಮಿತಿ ಆನಿ ಜಿ.ಎಸ್.ಬಿ. ಯುವಕ ಮಂಡಳಿಚೆ ಪ್ರಾಯೋಜಕತ್ವಾರಿ ನವರಾತ್ರಿಂತು ಚಲ್ಲೆ.೯ ಹಾಂತು ಶ್ರೀಮತಿ ಸುಧಾ ಎಸ್. ನಾಯಕ್ ಸುಜಾತ ಎಸ್. ಪೈ ಕುಮಾರಿ ಸುಷ್ಮಾ ಆರ್. ಭಟ್, ಭವ್ಯಾ ಎಸ್. ಭಟ್ ಭಾಗಿ ಜಾಲ್ಲಂತಿ ಹಿಮ್ಮೇಳಾಂತು ಶ್ರೀಮತಿ ವಂದನಾ ದೇವಾನಂದ ಶೆಣೈ ಮುಂಡಾಶಿ ಪಾಂಡುರಂಗ ಪಿ. ಪೈ ರಾಧಿಕಾ ಜಿ. ಪ್ರಭು, ರಕ್ಷಾ ಭಟ್, ಗೀತಾ ಜಿ. ಶೆಣೈ, ವಿಠಲದಾಸ ನಾಯಕ ಅಮ್ಮುಂಜೆ, ಸುನೀತಿ ಆರ್. ಪೈ ಹಾನ್ನಿ ಸಹಕಾರು ದಿಲ್ಲಾಲೊ.
ವರದಿ : ಮುಂಡಾಶಿ ಶ್ವೇತಾಸುಧಾ
ಗಾಂಯ, ಗಂಗಾ, ಗೌರಿ
ಹಿಂದೂ ಪುರಾಣಾಂತು ಗಾಂಯಿ, ಗಂಗಾ ಆನಿ ಗೌರಿ ಹಾಂಕಾ ತಿನ್ನೀಂಕ ಪವಿತ್ರ ಸ್ಥಾನ ಆಶ್ಶಿಲೆ ಸರ್ವ ಜಾಣೂನು ಆಸ್ಸತಿ. ಗಾಂಯ -ಗೊರವ ಪುರಾಣ ಕಾಲಾಂತು ಶ್ರೀಮಂತಿಕೇಚೆ ಮುದ್ರೆ ಜಾವ್ನು ಆಶ್ಶಿಲೆ. ಜಾಲ್ಯಾರಿ ೨೫-೩೦ ವರ್ಷಾ ಆಲ್ತಾಂತು ಗೊರವಾಂಕ ಪೊಸ್ಸಿತಾಲಿ ಮಸ್ತ ಕಮ್ಮಿ ಜಾತ್ತಾ ಆಯಲೀಂತಿ. ಗಾಂಯಿ ಗರ್ಭಾ ವಯರಿ, ಗೊರವಾಚೆ ಮಾಸಾ ವಯ್ರಿ ಮನುಷ್ಯಾಲೆ ಖೇಳು ಸುರುವಾತ ಜಾಲೀಲ ದಾಕೂನು ಗಾಂವ್ಗೇರಿ ಗಾಂಯ್ಯೋ ವಾಸ್ರ ಘಾಲತಾನಾ ಮರತಾ ಆಶ್ಶಿಲೆ. ಕಿತಯಾಕ ಮ್ಹಳಯಾರಿ ಕೃತಕ ಗರ್ಭಧಾರಣೆ ಮೂಖಾಂತರ ಊಣೆ ದೂದ ದಿವ್ಚೆ ಸಾನ ಸಾನ ಗಾಂಯ್ಕ ಜರ್ಸಿ ಬಯಲಾಚೆ ವೀರ್ಯಾಣು ದಾಕೂನು ಸಂತಾನ ಕರತಾ ಆಶ್ಶಿಲೆ. ದುಡ್ವಾ ವ್ಯಾಮೋಹಾನ ಆನಿ ಚಂದ ಆಸ್ಸತಿ ಮ್ಹಣ್ಚೆ ಕಾರಣಾನ ಸಾನ ಸುಮಾರ ೫೦,೦೦೦ ಗಾಂಯ್ಕ ಕೃತಕ ಗರ್ಭಧಾರಣ ಮೂಖಾಂತರ ಗುರ್ಭಿಣಿ ಜಾವ್ಚೆ ವರಿ ಕೋರ್ನು ತ್ಯಾ ವಂಶ ನಿರ್ನಾಮ ಕೆಲ್ಲೆ. ಕಡ ಕಡೇರಿ ದೋಳೆ ನಾಶಿ, ಅಂಗ ಹೀನ ಜಾವ್ನು ಜಲ್ಮಿಲೆ ಕಿತ್ಲಕಿ ವಾಸ್ರಾಂಕ ಪೊಸ್ಸುಚಾಕ ಜಾಯನಾಶಿ ಮಾಸಾ ಖಾತ್ತಿರಿ ಕಸಾಯಿಖಾನೆಕ ವ್ಹೋರ್ನು ಸೊಡ್ಚೆ ತಸ್ಸಾಲೆ ಪರಿಸ್ಥಿತಿ ನಿರ್ಮಾಣ ಕೆಲ್ಲೆ. ಅಶ್ಶಿ ಗಾಂಯಿ, ಗೊರವಾಂಕ ಪೊಸ್ಸಿತಲ್ಯಾಂಕ ಸಮಷ್ಠಿ ಪಾಪ ಲಾಗ್ನಾವೇ? ಮ್ಹೊಣು ಮಸ್ತ ಲೋಕ ಗೋ ಪೋಷಣ ಕೊರ‍್ಚೆ ಸೋಡ್ನು ಸೊಳ್ಳಿಂತಿ.
ಗಂಗಾ : ಗಂಗಾ ಖಾಲಿ ಏಕ ನ್ಹಂಯ ಮಾತ್ರ ನ್ಹಂಹಿ. ಏಕ ಕಾಲಾಂತು ಹಿಮಾಲಯ ದಾಕೂನು ಹೋಳ್ನು ಯವ್ಚೆ ಔಷಧಿಯ ಗುಣಾನಿ ತ್ಯಾ ಪವಿತ್ರ ಜಾವ್ನು ಆಶ್ಶಿಲೆ. ಜಾಲ್ಯಾರಿ ಮನುಷ್ಯಾಲೆ ದುರಾಶೇನ ಫ್ಯಾಕ್ಟರಿಚಾನ ಆಯ್ಯಿಲೆ ಅಪಾರ ರಾಸಾಯನಿಕ ಕೂಸ್ಸಡಾನ ಆಜಿ ಗಂಗಾ ನ್ಹಂಯ ಮಸ್ತ ಕಲುಷಿತ ಜಾಲ್ಲಾ. ಗಂಗಾ ಮಾತ್ರ ನ್ಹಂಹಿ ಹರ‍್ಯೇಕ ನಂಯ್ಚೆ ಕಾಣಿ ಅಶ್ಶಿಚಿ ಜಾಲ್ಲಾ. ಆನಿ ಥಂಳೆ, ಬಾಂಯಿ ದಾಂಪೂನು ಲೋಕ ವ್ಹಡ ವ್ಹಡ ಇಮಾರತ್ತ ಬಾಂತಾ ಆಸ್ಸತಿ. ತಾಂಕಾ ಭೃಷ್ಟ ರಾಜಕಾರಣಿ ಲೋಕಾಲೆ ಕುಮ್ಮಕ್ಕು ಆಸ್ಸುಚೆ ನಿಮಿತ್ತ ಸಾಮಾನ್ಯ ಲೋಕಾಂಕ ಕಸ್ಸಲೇ ಕೊರಚಾಕ ಜಾಯ್ನಾ ಜಾಲೇಲೆ ತಶ್ಶಿ ಜಾಲ್ಲ್ಯಾ. ನಂಯಿ ಕಲುಷಿತ ಜಾಲ್ಲೆ, ಥಂಳೆ ಬಾಂಯಿ ದಾಂಪಿಲೆ ಸಹಜ ಜಾವ್ನು ಉದ್ಕಾಕ ಹಾಹಾಕಾರ ಜಾತ್ತಾ. ತೆದ್ದನಾ ಬೋರ್‌ವೆಲ್ಲಾಕ ಮ್ಹೊಣು ಸರ್ಕಾರಿ ದುಡ್ಡು ಸಾಂಕ್ಷೇನ್ ಕೋರ್ನು, ತಾಂತೂಯಿ ಕಮೀಸನ್ ಮಾರತಾತಿ ಹಾನ್ನಿ. ಪೊಂವ್ಚೆ ನಂಯ್ಕ ಡ್ಯಾಮ್ ಬಾಂದೂನು ರೇಶನ್ ಪ್ರಮಾಣೆ ಉದ್ದಾಕ ಸೊಡ್ತಾ ಆಸ್ಸುಚೆ ಅಧಿಕಾರಿ ವರ್ಗ ತಾಂಗೆಲೆ ಸಾಥ ಆಸತಾತಿ. ಹಾಂಕಾ ಸರ್ಕಾರಿ ದುಡ್ಡಾಂತು ನಿರಾಯಾಸ ಜಾವ್ನು ಮಿನರಲ್ ಉದ್ದಾಕ ಮೆಳ್ಚೆ ವೊಚ್ಚುನು ಉದ್ಕಾ ಕಷ್ಟ ಅರ್ಥು ಜಾತ್ತಾ ನಾ. ಹೇ ಸಾಮಾನ್ಯ ಲೋಕಾಲೆ ದೌರ್ಭಾಗ್ಯ.
ಗೌರಿ ಮ್ಹಳಯಾರಿ ಸ್ತ್ರೀ ಜಾಂವೊ ಬಾಯ್ಲಮನಿಷಿ. ಚೆಲ್ಲಿಯಾನ ಪ್ರಾಯಾಕ ಯವ್ಚೆ ಪರ್ಯಂತ ತಿಕ್ಕಾ ರಾಕ್ಕಾ ಜಾಲೀಲೆ ಲೋಕಂಚಿ ತಿಕ್ಕಾ ರೇಪ್ ಕೊರಚೆ ಪಳೇಯಲ್ಯಾರಿ, ಗರ್ಭಾಂತು ಆಸ್ಸುಚೆ ಚೆರ್ಡು ಚೆಲ್ಲಿ ಮ್ಹೊಣು ಕಳ್ಳಿಲ ತೆದ್ದನಾ ಭ್ರೂಣಹತ್ಯೆ ಕೊರಚಾಕ ತ್ಯಾ ಮುಗ್ಧ ಆವಯಿಕ ಒತ್ತಾಯು ಕೊರಚೆ ಪಳೇಯಲಿ ತೆದ್ದನಾ, ಜಲ್ಮಿಲೆ ನಂತರ ತೂಂ ಹೇ ಘರಾಕ ಸೇರ‍್ವಲೇಲಿ ನ್ಹಂಹಿ, ಬಾಯ್ರಿ ವಚ್ಕಾ ಜಾಲೇಲಿ ಮ್ಹೊಣು ಪ್ರತಿಘಡೇಕ ಏಕ್ಪಂತ ಸಾಂಗ್ಚೆ ಪಳೇಯಲ್ಯಾರಿ “ಬಾಯ್ಲಮನ್ಶೆ ತುಕ್ಕಾ ರಕ್ಷಣ ಖಂಯಿ ಆಸ್ಸ? ಮ್ಹೊಣು ನಿಮ್ಗೂಚೆ ತಶ್ಶಿ ಜಾಲ್ಲಾ. ಗಾಂಯಿ, ಗಂಗಾ, ಗೌರಿ ತಿಗ್ಗಾಂಕ ಪೂಜಾ ಕೊರಚೆ ನಿಮಿತ್ತಾನ ಮಾತ್ರ ಹೇ ದೇಶ ಬಲಾಢ್ಯ ಜಾತ್ತಾ. ತ್ಯಾ ಖಾತ್ತಿರಿ ಹೇ ತಿನ್ನೀಚೆ ರಕ್ಷಣ ಕೋರ್ನು, ಗೌರವಾದರಾನ ಪಳೈಚೆ ತಶ್ಶಿ ಜಾಂವೊ ತೆದ್ದನಾಂಚಿ ರಾಕ್ಷಸಾಲೆ ನಾಶ ಜಾತ್ತಾ.
- ಪವಿತ್ರಾ ಶೆಣೈ, ಹುಬ್ಬಳ್ಳಿ.
ಪ್ರತಿಭಾವಂತೆ ಕು|| ಸ್ನೇಹಾ ಸದಾನಂದ ಭಟ್
ಹುಬ್ಬಳ್ಳಿ ಮೆ|| ಕಾಮತ್ ಟೀ ಡಿಪೋಚೆ ಶ್ರೀ ಸದಾನಂದ ಭಟ್ ಆನಿ ಶ್ರೀಮತಿ ಸವಿತಾ ಭಟ್ ಹಾಂಗೆಲಿ ಧೂವ ಕು|| ಸ್ನೇಹಾ ಭಟ್ ಹಾನ್ನಿ ಬಿ.ಕಾಂ. ಅಖೈರಿ ವರ್ಷಾಂತು(೨೦೧೨-೧೩ ಸಾಲಾಂತು) ೯೨.೬% ಮಾರ್ಕ್ಸ್ ಘೇವ್ನು ಚಾಂಗ ಸಾಧನ ಕೆಲ್ಲಯಾ. ಹಾನ್ನಿ ಹುಬ್ಬಳ್ಳಿಚೆ ಜೆ.ಜಿ. ಕಾಲೇಜ ಆಪ್ ಕಾಮರ್ಸ್ ಹಾಂಗ್ಚೆ ವಿದ್ಯಾರ್ಥಿನಿ ಜಾವ್ನಾಸ್ಸುನು ಕಾಲೇಜಾಕ ಆನಿ ಆವಯಿ, ಬಾಪಯಿಂಕ, ಸಮಾಜಾಕ ಕೀರ್ತಿ ಹಾಡೈಲಾ. ಹಾಂಕಾ ಮುಖಾರಿ ಚಾಂಗ ಭವಿಷ್ಯ ಮೆಳ್ಚವರಿ ದೇವು ಬರೆಂ ಕೊರೊಂ.
ಶ್ರೀಮದ್ ಸಂಯಮೀದ್ರ ತೀರ್ಥ ಸ್ವಾಮ್ಯಾಂಗೆಲೆ ಚಾತುರ್ಮಾಸ ವೃತಾಚೆ ‘ದಿಗ್ವಿಜಯ ಮಹೋತ್ಸವ
ಶ್ರೀ ಕಾಶೀಮಠಾಧೀಶ ಪ|ಪೂ| ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪಟ್ಟ ಶಿಷ್ಯ ಶ್ರೀಮದ್ ಸಂಯಮೀದ್ರ ತೀರ್ಥಸ್ವಾಮ್ಯಾಂಗೆಲೆ ವಿಜಯನಾಮ ಸಂವತ್ಸರಾಚೆ ಚಾತುರ್ಮಾಸ ವೃತಾಚೆ ಸಮಾಪ್ತಿ ಆನಿ ‘ದಿಗ್ವಿಜಯ ಮಹೋತ್ಸವ ತಾ. ೯-೧೧-೨೦೧೩ಕ ಬೆಂಗಳೂರಾಂತು ಚಲ್ಲಿ. ತತ್ಸಂಬಂಧ ಬೆಂಗಳೂರಾಚೆ ಮಲ್ಲೇಶ್ವರಂಚೆ ೧೯ಚೆ ಆಡ ರಸ್ತೆಂತು ಆಸ್ಸುಚೆ ಶ್ರೀ ಕಾಶೀಮಠಾಂತು ತಾ. ೫-೧೧-೧೩ ದಾಕೂನು ೧೧-೧೧-೧೩ ಪರಿಯಂತ ಬೆಂಗಳೂರ‍್ಚೆ ಇತಿಹಾಸಾಂತು ಪಯ್ಲೆ ಪಂತಾ ಅತಿ ವಿಷ್ಣು ಮಹಯಾಗಾ ಆಯೋಜನ ಕೆಲೀಲೆ. ತಾ. ೧೧-೧೧-೧೩ಕ ಅತಿ ವಿಷ್ಣು ಮಹಯಾಗಾಚೆ ಪೂರ್ಣಾಹುತಿ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾರಿ ಚಲ್ಲೆ. ತಾ. ೧೦-೧೧-೧೩ ದಿವಸು ಸಾಂಜ್ವಾಳ ಚಲೀಲೆ ಮಹಾಸಭಾಂತು ಸ್ವಾಗತ, ಪಾದ್ಯಪೂಜಾ ಆನಿ ಪ|ಪೂ| ಸ್ವಾಮ್ಯಾಂಗೆಲೆ ಆಶೀರ್ವಚನ ಚಲ್ಲೆ. ರಾಜ್ಯ ಪರರಾಜ್ಯಾಚೆ ಅಪಾರ ಸಮಾಜ ಬಾಂಧವ ಹೇ ಸರ್ವ ಕಾರ್ಯಕ್ರಮಾಂತು ವಾಂಟೊ ಘೇವ್ನು ಹರಿ ಗುರು ಕೃಪೇಕ ಪಾತ್ರ ಜಾವ್ನು ಪುನೀತ ಜಾಲ್ಲೆ.
‘ಸರಸ್ವತಿ ಪ್ರಭಾ ೨೫ ವರ್ಷಾಕ ಯವ್ನು ಪಾವ್ವಿಲೆ ಕಾಣಿ-೭
೧೯೯೪ಂತು ಆಯೋಜಿತ ದ್ವಿತೀಯ ಯುವ ಸಮ್ಮೇಳನ ಪಳೋವ್ನು ಮಸ್ತ ಲೋಕಾನಿ ಯುವ ಪರಿಷತ್ತಾಚೆ ತಾರೀಪು ಕೆಲ್ಲಿಂತಿ. ಆಮಗೇಲಿ ಜಾಲೀಲೆ ಶ್ರೀ ಆರೂರು ಲಕ್ಷ್ಮಣ ಶೇಟ್ ಮಾಮ್ಮಾನಿ “ಸಂಯುಕ್ತ ಕರ್ನಾಟಕಾಚೆ ಪುರವಣಿಂತು “ಹುಬ್ಬಳ್ಳಿಯಲ್ಲಿ ಯುವ ಜನತೆಯ ಹಿಗ್ಗು ಮ್ಹಣ್ಚೆ ಲೇಖನ ಬರೈಲೆ. ಸಮ್ಮೇಳನಾಕ ಆಯ್ಯಿಲೆ ಗಣ್ಯಾನ ಸೈತ ಆಮಗೇಲೆ ಸಾಧನೆಚೆ ತಾರೀಪು ಕೆಲ್ಲೆ.ಸಹಜ ಜಾವ್ನು ಆಮಗೇಲೆ ಉಮೇದ ಆನ್ನಿಕೆ ಚ್ಹಡ ಜಾಲ್ಲೆ. ಆನಿ ತೀಸ್ರೆ ಯುವ ಸಮ್ಮೇಳನ ತಾ. ೨೩ -೭-೧೯೯೫ ದಾಕೂನು ೨೯-೭-೯೫ ಪರ್ಯಂತ ಬರೋಬ್ಬರಿ ಏಕ ಹಪ್ತೆ (೭ ದಿವಸು) ಆಯೋಜನ ಕೊರಚಾಕ ಠರಯ್ಲೆ. ತಾ. ೨೩-೭-೯೫ಕ ಸಮ್ಮೇಳನಾಚೆ ಉದ್ಘಾಟನ ಮ್ಹಾಲ್ಗಡೆ ಪತ್ರಕರ್ತ ಡಾ. ಪಾಟೀಲ ಪುಟ್ಟಪ ಹಾನ್ನಿ ಕೆಲ್ಲೆ. ಅಧ್ಯಕ್ಷತಾ ತೆದ್ದನಾ ಗುರುಸಿದ್ದೇಶ್ವರ ಸಹಕಾರಿ ಬ್ಯಾಂಕಾಚೆ ಅಧ್ಯಕ್ಷ ಜಾವ್ನು ಆಶ್ಶಿಲೆ ಶ್ರೀಮತಿ ತಾರಾದೇವಿ ವಾಲಿನ ಘೆತ್ತಿಲೆ. ಸೊಯರೆ ಜಾವ್ನು ಶಿಕ್ಷಣಾಧಿಕಾರಿ ಆರ್.ಸಿ. ಹಲಗತ್ತಿ, ಎಸ್.ಬಿ. ಹುಬ್ಬಳ್ಳಿ ಇತ್ಯಾದಿ ಲೋಕ ಆಯ್ಯಿಲೆ. ಆನಿ ಮುಖಾವೈಲೆ ಪಾಂಚ ದಿವಸು ವಿಂಗ ವಿಂಗಡ ಶಾಳೆ, ಕಾಲೇಜಾಂತು ವೃತ್ತಿ ಮಾರ್ಗದರ್ಶನ ಉಪನ್ಯಾಸ, ಪ್ರದರ್ಶನ, ಜಾನಪದ ಗೀತಾ ಸ್ಪರ್ಧೆ, ನವಸಾಕ್ಷರಾಂಕ ವಾಜ್ಜುಚೆ ಸ್ಪರ್ಧಾ, ಕವಿಗೋಷ್ಠಿ, ವಿದ್ಯಾರ್ಥಿ ಗೋಷ್ಠಿ, ಭಾಷಣ ಸ್ಪರ್ಧೆ ಇತ್ಯಾದಿ ಆಯೋಜನ ಕೆಲೀಲೆ.
೨೯-೭-೯೫ಕ ಚಲೀಲೆ ಸಮಾರೋಪ ಸಮಾರಂಭಾಕ ಮುಖೇಲ ಸೊಯರೆ ಜಾವ್ನು ತೆದ್ದನಾ ಶಾಸಕ ಜಾವ್ನಾಶ್ಶಿಲೆ ಶ್ರೀ ಜಗದೀಶ ಶೆಟ್ಟರ(ಮುಖಾರಿ ಮುಖ್ಯಮಂತ್ರಿ ಜಾಲ್ಲೆ) ಆಯ್ಯಿಲೆ. ಮಹಾನಗರ ಸಭೆಚೆ ಕಮೀಶನರ್ ಶ್ರೀ ಅರವಿಂದ ಜನ್ನು ಬಹುಮಾನ ವಿತರಣ ಕೆಲ್ಲಿಂತಿ. ಸೊಯರೆ ಜಾವ್ನು ಶ್ರೀ ಶೇಷಗಿರಿ ಪಾಂಡುರಂಗ ಕಾಮತ್ ಆಯ್ಯಿಲೆ. ಹೇ ಸಂದರ್ಭಾರಿ ಡಾ. ಎನ್.ಎಮ್. ಪ್ರಭುಂಕ ಸರಸ್ವತಿ ಪ್ರಭಾ ವರ್ಷಾಚೆ ಅತ್ಯುತ್ತಮ ವ್ಯಕ್ತಿ ಆನಿ ಶ್ರೀಮತಿ ಸಾವಿತ್ರಿ ಮರಗಾಲ ತಿಕ್ಕಾ ವರ್ಷಾಚೆ ಅತ್ಯುತ್ತಮ ಮಹಿಳೆ ಮ್ಹಣಚೆ ಪ್ರಶಸ್ತಿ ತಾಂಗೆಲ ಬರಶಿ ಎಸ್.ಎಸ್. ವಿದ್ವಾನ್, ವಿ.ಎಲ್.ಗಾಯ್ತೊಂಡೆ, ವಿದ್ಯಾಧರ ಹುಲಮನಿ, ಜೆ.ಕೆ. ಶೆಟ್ಟಿ ತಾಂಕಾಯಿ ಶಾಳ ಪಾಂಗೂರ್ನು, ಮಾಳ ಘಾಲ್ನು, ಸ್ಮರಣಿಕ, ಸನ್ಮಾನ ಪತ್ರ ದೀವ್ನು ಸನ್ಮಾನ ಕೆಲ್ಲೆ. ಸಮ್ಮೇಳನಾಂತು ಉಲೈಲೆ ಶ್ರೀ ಶೆಟ್ಟರಾನಿ ‘ಯುವಕಾರ ದೇಶಾಚೆ ಆಸ್ತಿ, ತಾಂಕಾ ಸಂಘಟನ ಕೊರ‍್ಚೆ ಹೇ ಏಕ ಚಾಂಗ ಪ್ರಯತ್ನ ಮ್ಹಳಯಾರಿ, ಸೊಯರೆ ಜಾವ್ನು ಆಯ್ಯಿಲೆ ಅರವಿಂದ ಜನ್ನು ತಾನ್ನಿ ಯವಕಾರಾನಿ ಅನ್ಯಾಯು ಪಳೈಲ್ಯಾರಿ ವಿರೋಧ ಕೋರ್ಕಾ ಮ್ಹಳ್ಳಿಂತಿ. ಒಟ್ಟಾರೆ ಹೇ ಸಮ್ಮೇಳನ ವರಿ ಮಸ್ತ ಯಶಸ್ವಿ ಜಾವ್ನು ಸರ್ವಾನಿ ಆಮ್ಕಾ ತಾರೀಪು ಕೆಲ್ಲೆ. ಜಾಲ್ಯಾರಿ ಏಕ ದುಃಖಾಚೆ ವಿಷಯು ಮ್ಹಳಯಾರಿ ಮೆಗೇಲೊ ಬಾಪಯಿ ಖ್ಯಾತ ಯಕ್ಷಗಾನ ಕಲಾವಿದ ಆರ್ಗೋಡು ರಾಮಚಂದ್ರ ಶೆಣೈ ಹಾನ್ನಿ ಹೇ ಸಮ್ಮೇಳನ ಜಾವ್ನು ದೊನ್ನೀ ದಿವಸಾನ ಮ್ಹಳಯಾರಿ ೩೧-೭-೯೫ಕ ದೈವಾಧೀನ ಜಾಲ್ಲೆ. (ಸಶೇಷ)
