Saraswati Prabha

‘ಸರಸ್ವತಿ ಪ್ರಭಾ ೨೫ ವರ್ಷಾಕ ಯವ್ನು ಪಾವ್ವಿಲೆ ಕಾಣಿ-೫

ಮೆಗೇಲೆ ಮಾತೃಭಾಸ ಕೊಂಕಣಿ ಜಾಲಯಾರಿಚಿ ಹಾಂವೆ ಆಸ್ಸುಚೆ ಕರ್ನಾಟಕಾಂತು, ನ್ಹಂಹಿತಾ ಹಾಂವೆ ಹೇ ಪತ್ರಿಕಾ ರಂಗಾಕ ಆಯ್ಯಿಲ ಸೈತ “ಆಶಾ ಜನಕ ಮ್ಹಣ್ಚೆ ಕನ್ನಡ ಹಪ್ತಾಳೆ ಮೂಖಾಂತರ. ತಾಜ್ಜ ಋಣ ಹಾಂವೆ ಪಾರಿಗತ ಕೊರಚೆ ನಾಕ್ಕವೇ? ತ್ಯಾ ಕಾರಣಾನ ೧೯೯೧ಂತು “ಸರಸ್ವತಿ ಪ್ರಭಾ ಬರಸಿ ಹಾಂವೆ ‘ಹೊಟೇಲ್ ಸಂದೇಶ ಮ್ಹಣಚೆ ಏಕ ಕನ್ನಡ ಮಾಸಿಕ ಪತ್ರ ಸುರುವಾತ ಕೆಲ್ಲೆ. ಹಾಕ್ಕ ಮೂಲ ಕಾರಣ ತೆದ್ದನಾ ಹೊಟೇಲ್ಸ್ ಮಾಲಕಾ ವಯ್ರಿ ಕೆಲವ ಕಡೇನ ಸರಕಾರಿ ಅಧಿಕಾರಿ ಲೋಕ ಮಸ್ತ ಶೋಷಣ ಕರ್ತಾ ಆಶ್ಶಿಲೆ. ಪ್ರತಿಯೇಕ ಉತ್ಸವ, ಸಮಾರಂಭ, ಜಾಂವೊ ಸಾಮಾಜಿಕ ಕಾರ್ಯಾಕ ವ್ಹಡ ಪ್ರಮಾಣಾರಿ ಹೊಟೇಲ್ ಮಾಲಕಾ ದಾಕೂನು ದೇಣಿಗಾ ಘೆತ್ತಾ ಆಶ್ಶಿಲೆ ಜಾಲ್ಯಾರಿ ರಾಂದಯಾಕ ಘಾಲ್ಚೆ ಪಣ್ಣಾ ಪಾಲ್ಲೊ ಜವತಾನಾ ಕಾಡ್ನು ಬಗಲೇನ ದವರ್‍ಚ ವರಿ ಖಂಚೇಯಿ ಪ್ರಸಿದ್ಧಿ, ಪುರಸ್ಕಾರ ದೀನಾಶಿ ಹೋಟೇಲು ಉದ್ದಿಮೆದಾರಾಂಕ ಸಸಾರ ಕೋರ್ನು ದೂರ ದವರ್‍ತಾ ಆಶ್ಶಿಲೆ. ತ್ಯಾ ಖಾತ್ತಿರಿ ಹೊಟೇಲು ಉದ್ದಿಮೆದಾರಾಂಗೆಲೆ ತಾಳೊ ಜಾವ್ಕಾ ಮ್ಹೊಣು “ಹೊಟೇಲ್ ಸಂದೇಶ ಪತ್ರಿಕೆಚೆ ಆರಂಭ ಕೆಲ್ಲೆ. ತಾಂತು ಪ್ರಪ್ರಥಮ ಜಾವ್ನು ಹಾಂವೆ ಕೆಲೀಲ ಮ್ಹಳಯಾರಿ “ಹೊಟೇಲು ಮಾಲಕರ ಸನ್ಮಾನ  ಪ್ರಪ್ರಥಮ ಜಾವ್ನು ಸಾತಾಠ ಹೋಟೇಲು ಉದ್ದಿಮೆದಾರಾಂಕ ವೇದಿಕೇರಿ ಆಪ್ಪೋನು ವ್ಹಡ ವರ್ಣರಂಜಿತ ಸಮಾರಂಭ ಆಯೋಜನ ಕೋರ್ನು ಸನ್ಮಾನು ಕೆಲೀಲೆ. ತಾಂತುಲೆ ಏಕ ವಿಷಯು ಹಾಂವೆ ಹಾಂಗಾ ಸಾಂಕಾಚಿ. ಹಾಂವೆ ತ್ಯಾ ಸಮಾರಂಭಾಂತು ಸನ್ಮಾನ ಕೆಲೇಲೆ ಸರ್ವಯಿ ಹೊಟೇಲ್ ಉದ್ದಿಮೆಕ ಪನ್ನಾಸ ವರ್ಷಾ ಪಶಿ ಚ್ಹಡ ಸೇವಾ ಪಾವಯಿಲೆ ಮ್ಹಲಗಡೆ. ತಾಂತು ಏಕಳ್ಯಾಂಕ ಕ್ಯಾನ್ಸರ್ ಕಾಯ್ಲೊ ಆಶ್ಶಿಲೆ. ತಾಂಕಾ ಆಮ್ಮಿ ಸನ್ಮಾನು ಕೆಲೇಲ ತೆದ್ದನಾ ತಾಂಗೆಲೆ ಪೂತು ಮೆಗೇಲಾಗ್ಗಿ ಯವ್ನು “ಮರಣಶಯ್ಯೆಂತು ಆಸ್ಸುಚೆ ಮೆಗೇಲೆ ಬಾಪಸೂಕ ಸನ್ಮಾನ ಕೋರ್ನು ತಾಂಕಾ ತುಮ್ಮಿ ಸಂತೋಷ ಜಾವ್ಚೆ ವರಿ ಕೆಲ್ಲೆ. ಥ್ಯಾಂಕ್ಸ ಮ್ಹೊಣು ಸಾಂಗೂನು ಘೆಲ್ಲೊ.
ಹೊಟೇಲು ಉದ್ದಿಮೆದಾರಾಂಕ ಸನ್ಮಾನ ಕೊರಚೆ ಬರಶಿ ಹಾಂವೆ ಹೊಟೇಲು ಉದ್ದಿಮೆದಾರಾಲೆಂ ಸೇವಾ ದಾಖಲ ಕೋರ್ನು ದವರಚೆ ಖಾತ್ತಿರಿ “ಧಾರವಾಡ ಜಿಲ್ಲಾ ಹೊಟೇಲು ಉದ್ದಿಮೆದಾರರ ಡೈರೆಕ್ಟರಿ ಭಾಗ-೧, ೧೯೯೦ ಇಸ್ವೆಂತು ಪ್ರಕಟ ಕೆಲ್ಲೆ. ಹೊಟೇಲ ಸಂದೇಶ ಪತ್ರ ೧೯೯೦ ದಾಕೂನು ೨೦೦೧ ಪರ್ಯಂತ ನಿಯಮಿತ ಜಾವ್ನು ಪ್ರಕಟ ಜಾಲ್ಲೆ. ಮುಖಾರಿ ಹೊಟೇಲ್ ಉದ್ದಿಮೆಕ ಸಂಬಂಧ ಪಾವ್ನು ವ್ಹಡ ವ್ಹಡ ಪತ್ರಿಕಾ ಬಾಯ್ರಿ ಪಳ್ಳಿಂತಿ, ಸರಸ್ವತಿ ಪ್ರಭಾಕ ಹಾಂವೆ ಚ್ಹಡ ಗಮನ ದಿವ್ಕಾ ಜಾಲೇಲೆ ಅಗತ್ಯ ಪಳ್ಳೆ. ತ್ಯಾ ಕಾರಣಾನ ಹಾಂವೆ ಹೊಟೇಲ್ ಸಂದೇಶ ಪತ್ರಿಕಾ ಬಂದ್ ಕೆಲ್ಲಿ.
ಹೊಟೇಲ್ ಸಂದೇಶಾ ಮ್ಹಣಕೆ ಪರಮಾತ್ಮಾಲೆ ಕೃಪೇನ ಹಾಂವೆ ಸುರುವಾತ ಕೆಲೇಲೆ ಆನ್ನೇಕ ಪತ್ರಿಕಾ “ಶಿಕ್ಷಣ ಸಂದೇಶ ಶಿಕ್ಷಣ ಕ್ಷೇತ್ರಾಚೆ ಸುದ್ಧಿ, ಸಮಾಚಾರ, ಸರಕಾರಿ ಸುತ್ತೋಲೆ ಇತ್ಯಾದಿ ಪ್ರತಿ ಮ್ಹಹಿನೋ ಹಾಂತು ಪ್ರಕಟ ಕರ್ತಾ ಯತ್ತಾ ಆಶ್ಶಿಲೆ.  ಪುಸ್ತಕಾಂತುಲೆ ಶಿಕ್ಷಣ ಪಶಿ ವಿಂಗಡ ಮಾಹಿತಿ ವಿದ್ಯಾರ್ಥಿ ಆನಿ ಶಿಕ್ಷಣ ರಂಗಾಕ ದಿವಚೆ ಏಕ ಪ್ರಯತ್ನ ಜಾವ್ನು ಹಾಂವೆ ಹೇ ಪತ್ರ ಕಾಳ್ಳೆ. ಸಾರ್ವಜನಿಕ ಶಿಕ್ಷಣ ಇಲಾಖೆಚಾನ ಸೈತ ಹೇ ಪತ್ರಿಕಾ ಸರ್ವ ಪ್ರೌಢ ಆನಿ ಪ್ರಾಥಮಿಕ ಶಾಳೆಚಾನ ಘೆವ್ಕಾ ಮ್ಹೊಣು ಆದೇಶ ಕೆಲೀಲೆ. ೧೯೯೪ ದಾಕೂನು ೧೯೯೭ ಪರ್ಯಂತ ಸುಮಾರ ತೀನ ವರ್ಷ ಕಾಳ ಹೇ ಪತ್ರಿಕಾ ನಿಯಮಿತ ಜಾವ್ನು ಪ್ರಕಟ ಕೆಲ್ಲೆ. ಹಾಂಗಾಚಿ ತಶ್ಶಿ ಜಾಲ್ಲೆ ಶಾಳೆ ಶಾಳೆಕ ವಚ್ಚುನು ಚಂದಾದಾರಾಂಕ ಒಟ್ಟು ಕೊರಚೆ ಆಮಕಾ ಸಮಸ್ಯೆ ಜಾವಚಾಕ ಲಾಗಲೆ. ಖಾಲಿ ಪತ್ರಿಕಾ ಮಾತ್ರ ಚಲೋವ್ನು ಆಮ್ಮಿ ಗಪ್ ರಾಬ್ನಿ ಶಿಕ್ಷಣ ಸಮಾಗಮ,  ಉಪನ್ಯಾಸ, ಶಿಕ್ಷಣ ಆನಿ ವೃತ್ತಿ ಮಾರ್ಗದರ್ಶನ ಶಿಬಿರ ಇತ್ಯಾದಿ ಆಯೋಜನ ಕೋರ್ನು ವಿಂಗವಿಂಗಡ ಗಣ್ಯ ಲೋಕಾಂಕ ಆಪೋವ್ನು ತಾಂಗೆಲೆ ಜ್ಞಾನ, ಅನುಭವ ಮುಖಾವೈಲೆ ಪೀಳಿಗೇಚೆ ಲೋಕಾಂಕ ಮೆಳ್ಚೆ ತಶ್ಶಿ ಕೆಲ್ಲೆ.
ವ್ಹಯಿ ಹೇ ಪೂರಾ ಹಾಂವೆ ಕೆಲ್ಲೆ ಮ್ಹಳಯಾರಿ ಗಮಂಢಿಪಣ ಜಾವಚಾಕ ಪುರೊ ಪರಮಾತ್ಮಾನ ಕರೈಲೆ ಮ್ಹಣ್ಚೇಚಿ ಚ್ಹಡ ಸೂಕ್ತ ಮ್ಹೊಣು ಮಾಕ್ಕಾ ದಿಸ್ತಾ. ಜಾಲಯಾರಿ ಸರಸ್ವತಿ ಪ್ರಭಾಚೆ ಅಭಿವೃದ್ಧಿಕ ವಿಂಗವಿಂಗಡ ಲೋಕಾಂಗೆಲೆ ಗುರ್‍ತ ಜಾವ್ನು, ತಾಂಗೆಲೆ ಸಹಕಾರ ಮೆಳಚಾಕ ಆಮಗೇಲೆ ಹೇ ಯೋಜನಾ ಸಹಕಾರಿ ಜಾಲ್ಲೆ ಮ್ಹೊಣು ಮಾತ್ರ ಖಂಡಿತ ಜಾವ್ನು ಸಾಂಗೂಕಾ ಜಾತ್ತಾ. ಡಾ|| ಎನ್.ಎಮ್.ಪ್ರಭು ಮಾಮ್ಮಾನಿ ಹುಬ್ಬಳ್ಳಿ-ಧಾರವಾಡ ಮಹಾನಗರಾಂತು ವ್ಹಡ ಪ್ರಮಾಣಾರಿ ಯೋಗ ಆನಿ ಧ್ಯಾನ ಶಿಬಿರ, ಸೂರ್ಯನಮಸ್ಕಾರ ಶಿಬಿರ ಆಯೋಜನ ಕೆಲೇಲ ತೆದ್ದನಾ ಸೈತ ತಾಂತು ಕಿಂಚಿತ್ ಸೇವಾ ಪಾವೈಚೆ ಭಾಗ್ಯ ಮಾಕ್ಕಾ ಮೆಳೀಲೆ ಹಾಂವೆ ಹಾಮಗಾ ಕೃತಜ್ಞತೇನ ಉಡಗಾಸು ಕೋರ್ನು ಘೆವ್ಕಾ. ಹೇ ಪೂರಾ ಪಳೇಯಲ್ಯಾರಿ ಹೇ ಪೂರಾ ತರ್ನೆ ಫಳ ಜೂನ್ ಜಾವಚಾಕ ಪರಮಾತ್ಮನ ದಿಲೀಲೆ ಅವಕಾಶ ಮ್ಹೊಣು ಮಾಕ್ಕಾ ದಿಸ್ತಾ. (ಸಶೇಷ)