Saraswati Prabha Konkani News 10/12-3

ವಿಂಗವಿಂಗಡ ಕಡೇನ ಶ್ರೀ ಗಣೇಶೋತ್ಸವು

ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜ ಹುಬ್ಬಳ್ಳಿಹುಬ್ಬಳ್ಳಿ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜ ತರಪೇನ ಶ್ರೀ ಗಣೇಶೋತ್ಸವು ತಾ. ೧೯-೦೯-೨೦೧೨ ದಾಕೂನು ೨೩-೦೯-೨೦೧೨ ಪರ್ಯಂತ ಶ್ರೀ ಗಣೇಶ ಮೂರ್ತಿ ಪ್ರತಿಷ್ಠಾಪನ, ಗಣೋಮು, ಭಜನ, ಚುಕ್ಕಿ ರಂಗೋಲಿ ಆನಿ ರಂಗ ಭರಚೆ ಸ್ಪರ್ಧಾ, ಯಕ್ಷಗಾನ ಆನಿ ಸಾಂಸ್ಕೃತಿಕ ಸಂಘ ಧಾರವಾಡ ಹಾನ್ನಿ ಪ್ರಸ್ತುತ ಕೆಲೀಲೆ “ಕೃಷ್ಣ ಸಂಧಾನ ಯಕ್ಷಗಾನ ಖೇಳು, ಮಾಳ ಬಾಂಚೆ ಸ್ಪರ್ಧಾ, ಮೂಡ ಗಣಪತಿ, ಶ್ರೀಮತಿ ಸ್ವಾತಿ ಕಾಮತ್ ಆನಿ ಸಂಗಾತೀನ ಪ್ರಸ್ತುತ ಕೆಲೀಲೆ “ಮೆಗ್ಗೆಲೊ ಬಾಮ್ಮುಣು ಕೋಣಾ ಚೋಯ್ತಾ ಕೊಂಕಣಿ ನಾಟಕ, ಗ್ರೀಟಿಂಗ್ ಕಾರ್ಡ ತಯಾರ ಕೊರಚೆ ಸ್ಪರ್ಧಾ, ತಳ್ಳಿಲೆ ಮೋದಕ ಸ್ಫರ್ಧಾ, ಬಹುಮಾನ ವಾಂಟಪ, ರಂಗಪೂಜಾ, ಫುಲ್ಲಾ ಪೂಜಾ, ಉತ್ತರ ಪೂಜಾ, ಫಲಾವಳಿ ಲಿಲಾವು, ಪಾನಕ ಪ್ರಸಾದ ಶ್ರೀ ಗಣೇಶ ಮೂರ್ತಿ ವಿಸರ್ಜನ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಬರಶಿ ಸಂಪನ್ನ ಜಾಲೇಲೆ ಮಾಹಿತಿ ಮೆಳ್ಳಾ.

ಶ್ರೀ ವೆಂಕಟ್ರಮಣ ದೇವಳ, ಹರಿಖಂಡಿಗೆ

ಹರಿಖಂಡಿಗೆಚೆ ಶ್ರೀ ಲಕ್ಷ್ಮೀವೆಂಕಟರಮಣ ದೇವಳಾಂತು ವರ್ಷಂಪ್ರತಿ ಚೋಲ್ನು ಆಯ್ಯಿಲೆ ಶ್ರೀ ಗಣೇಶೋತ್ಸವು ತಾ. ೧೯-೦೯-೨೦೧೨ ತಾಕೂನು ೨೯-೦೯-೨೦೧೨ ಪರ್ಯಂತ ವಿಂಗವಿಂಗಡ ಧಾರ್ಮಿಕ ತಥಾ ಸಾಂಸ್ಕೃತಿಕ ಕಾರ್ಯಕ್ರಮಾ ದ್ವಾರಾ ವಿಜೃಂಭಣೇರಿ ಚಲೀಲೆ ಖಬ್ಬರ ಮೆಳ್ಳಾ. ಆನಿ ಪ್ರತಿ ದಿವಸು ಸಾಂಜ್ವಾಳಾ ವಿಂಗವಿಂಗಡ ಭಜನಾ ಪಾಳಿ ತಾಕೂನು ಭಜನಾ ಸೇವಾಯಿ ಆಶ್ಶಿಲೆ. ತಾ. ೨೯-೦೯-೨೦೧೨ ಚೆ ಶ್ರೀ ಅನಂತ ನೋಂಪಿ ದಿವಸು ಶ್ರೀ ಗಣೇಶ ಮೂರ್ತಿಚೆ ವಿಸರ್ಜನಾ ಪೂಜಾ ಜಾಲ್ಲ ಉಪರಾಂತ ಪುರಮೆರವಣಿಗಾ ಆನಿ ವಿಸರ್ಜನ ಚಲ್ಲೆ.

ಆರ್‍ಗೋಡಾಂತು ೧೪೭ ವರ್ಷಾಚೆ ಶ್ರೀ ಗಣೇಶೋತ್ಸವು

ಕುಂದಾಪುರ ತಾ||ಚೆ ಆರ್‍ಗೋಡು ಶ್ರೀ ಶೆಣೈ ಕುಟುಂಬಾಚಾನ ೧೪೭ ವರ್ಷಾಚಾನ ನಿಯಮಿತ ಆನಿ ನಿರಂತರ ಜಾವ್ನು ಚಲ್ಲೋವನು ಘೇವ್ನು ಆಯ್ಯಿಲೆ ಶ್ರೀ ಗಣೇಶೋತ್ಸವು ಅವುಂದು ಶ್ರೀ ಶ್ರೀಪತಿ ನರಸಿಂಹ ಶೆಣೈ ಹಾಂಗೆಲೆ “ಶ್ರೀ ಮಾತೃಕೃಪಾಂತು ದೋನ ದಿವಸು ವಿಜೃಂಭಣೇರಿ ಚಲ್ಲೆ. ಚೌತಿ ಫುಳ್ದೀಸು ಗೌರಿ ಸ್ಥಾಪನ, ಪೂಜಾ, ಕುಟುಂಬಾಚೆ ಸರ್ವ ಸುವಾಸಿನಿ ಬಾಯ್ಲಮನ್ಶೆ ದಾಕೂನು ವಾಯಣ ಪೂಜಾ, ಭಜನ, ರಾತ್ರಿ ಪೂಜಾ, ಸಮಾರಾಧನ ಚಲಯಾರಿ. ಚೌತಿ ದಿವಸು ಸಕ್ಕಾಣಿಪೂಡೆ ೭-೩೦ಕ ಶ್ರೀ ಗಣೇಶ ಮೂರ್ತಿ ಪ್ರತಿಷ್ಠಾಪನ, ಪೂಜಾ, ಭಜನ, ಧೋಂಪಾರಾ ಆನಿ ರಾತ್ತಿಕ ರಂಗಪೂಜಾ, ಯಕ್ಷಗಾನ ಕಲಾವಿದಾಂಕ ಸನ್ಮಾನು, ಯಕ್ಷಗಾನ ತಾಳಮದ್ದಲೆ, ಚೌತಿ ಹೆರ್ದೀಸು(೨೦-೯-೨೦೧೨ಕ) ಸತ್ಯನಾರಾಯಣ ಪೂಜಾ, ಭಜನ, ರಾತ್ರಿ ಪೂಜಾ ಜಾಲ್ಲ ಉಪರಾಂತ ಶ್ರೀ ಗಣೇಶ ಮೂರ್ತಿ ಜಲಸ್ಥಂಭನ ಇತ್ಯಾದಿ ಕಾರ್ಯಕ್ರಮ ಚಲ್ಲೆ. ಹೇಂಚಿ ಸಂದರ್ಭಾರಿ ಚೌತಿ ದಿವಸು ಸಾಂಜ್ವಾಳಾ ಶ್ರೀ ಆರ್‍ಗೋಡು ರಾಮಚಂದ್ರ ಶ್ಯಾನುಭಾಗ ಯಕ್ಷಗಾನ ಕಲಾ ವೇದಿಕೆ ತರಪೇನ ಚಲೇಲೆ ಸನ್ಮಾನ ಸಮಾರಂಭಾಂತು ಯಕ್ಷಗಾನಾಚೆ ಹಾಸ್ಯ ಕಲಾವಿದ ಶ್ರೀ ಕಮಲಶಿಲೆ ಮಹಾಬಲ ದೇವಾಡಿಗ ಹಾಂಕಾ ಸನ್ಮಾನ ಚಲ್ಲೆ. ಹೇ ಸಮಾರಂಭಾಚೆ ಅಧ್ಯಕ್ಷತಾ ಶ್ರೀ ಭಾಗವತ ಆರ್‍ಗೋಡು ಗೋವಿಂದರಾಯ ಶ್ಯಾನುಭಾಗ ಹಾನ್ನಿ ಘೆತ್ತಿಲೆ. ಸೊಯರೆ ಜಾವ್ನು ಸಿದ್ದಾಪೂರ ಸಂಯುಕ್ತ ಜಿ.ಎಸ್.ಬಿ.ಚೆ ಶ್ರೀ ಗೋಪಿನಾಥ ಕಾಮತ್, ಶ್ರೀ ವೆಂಕಟೇಶ್ವರ ಕ್ಯಾಶ್ಯೂ, ಕೆಳಾಕೊಡ್ಲು ಹಾಜ್ಜೆ  ಶ್ರೀ ವಿಠೋಭ ಶೆಣೈ ಆನಿ ಉಡುಪಿಚೆ ಡಾ|| ಶ್ರೀಕಾಂತ ರಾವ್ ಆಯ್ಯಿಲೆ. ಸಭಾ ಕಾರ್ಯಕ್ರಮ ಉಪರಾಂತ ಗಾಂವ್ಚೆ, ಪರಗಾಂವ್ಚೆ ಮಾಲ್ಗಡೆ ಯಕ್ಷಗಾನ ಕಲಾವಿದಾ ದಾಕೂನು “ಯಕ್ಷಗಾನ ತಾಳಮದ್ದಲೆ ಚಲ್ಲೆ.

ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜ, ದಾವಣಗೆರೆ

ದಾವಣಗೆರೆಚೆ ಗೌಡ ಸಾರಸ್ವತ ಸಮಾಜಾ ತರಪೇನ ಶ್ರೀ ಗಣೇಶೋತ್ಸವು ತಾ. ೧೯-೦೯-೨೦೧೨ ದಾಕೂನು ೨೩-೦೯-೨೦೧೨ ಪರ್ಯಂತ ವಿಜೃಂಭಣೇರಿ ಚಲೀಲೆ ಖಬ್ಬರ ಮೆಳ್ಳಾ. ತತ್ಸಂಬಂಧ ಶ್ರೀ ವಿಘ್ನೇಶ್ವರ ವಿಗ್ರಹ ಪ್ರತಿಷ್ಠಾಪನ, ತ್ರಿಕಾಲ ಪೂಜಾ, ಅನ್ನ ಸಂತರ್ಪಣ, ಯಕ್ಷರಂಗ ಯಕ್ಷಗಾನ ಸಂಸ್ಥೆಚೆ ಕಲಾವಿದ ದಾಕೂನು ಸಾಮೂಹಿಕ ವಸಂತೋತ್ಸವ ಕಾರ್ಯಕ್ರಮ. ಸಾಲಿಗ್ರಾಮ ಗಣೇಶ ಶೆಣೈ ದಾಕೂನು ಪ್ರೇಕ್ಷಕಾಂಕ ಸ್ಫರ್ಧಾ. ದಾವಣಗೆರೆ ಗೌಡ ಸಾರಸ್ವತ ಸಮಾಜಾಚೆ  ಮಹಿಳಾ ಮಂಡಳಿ ತಾಕೂನು ವಿಂಗವಿಂಗಡ ಸಾಂಸ್ಕೃತಿಕ ಕಾರ್ಯಾವಳಿ, ಸಮಾಜ ಬಾಂಧವಾಂಕ ಛದ್ಮವೇಷ ಸ್ಪರ್ಧಾ, ಕಡೇರ್‍ಚೆ ದಿವಸು ಸ್ಪಧಾ ವಿಜೇತಾಂಕ ಬಹುಮಾನ ವಿತರಣ, ಪ್ರತಿಭಾವಂತ ಚರ್ಡುವಾಂಕ ಪ್ರತಿಭಾ ಪುರಸ್ಕಾರ, ವಿಸರ್ಜನಾ ಪೂಜಾ, ಮಾಗಿರಿ ಪುಷ್ಕರಣಿಂತು ಶ್ರೀ ಗಣೇಶ ಮೂರ್ತಿ ವಿಸರ್ಜನ ಇತ್ಯಾದಿ ಕಾರ್ಯಕ್ರಮ ಚಲ್ಲೆ. ನ್ಹಂಹಿಸಿ ಚೌತಿ ಪ್ರಯುಕ್ತ ೯-೯-೨೦೧೨ ದಿವಸು ದಾರ್‍ಲ್ಯಾಂಕ ಕ್ರಿಕೆಟ್ಪಂದ್ಯ ಚಲ್ಯಾರಿ, ೧-೦೯-೨೦೧೨ ದಿವಸು ಚರ್ಡುವಾಂಕ ಆನಿ ದಾರ್‍ಲ್ಯಾಂಕ ಆಟೋಟ ಸ್ಪರ್ಧಾ ಚಲ್ಲೆ.

ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜ ಧಾರವಾಡ

ಪ್ರತಿ ವರ್ಷಾ ಮ್ಹಣಕೆ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾ ತರಪೇನ ಶ್ರೀ ಗಜಾನೋತ್ಸವು ತಾ. ೧೯-೯-೨೦೧೨ ದಾಕೂನು ೨೩-೯-೨೦೧೨ ಪರ್ಯಂತ ವಿಜೃಂಭಣೇರಿ ಚಲ್ಲೆ. ತತ್ಸಂಬಂಧ ಶ್ರೀ ಗಣೇಶ ಮೂರ್ತಿ ಪ್ರತಿಷ್ಠಾಪನ, ಪೂಜಾ, ಆರ್ತಿ, ದೇವತಾ ಪ್ರಾರ್ಥನ, ಪುಣ್ಯಾಹವಾಚನ, ಶ್ರೀ ಗಣಪತಿ ಅಥರ್ವ ಶೀರ್ಷ ಪಾರಾಯಣ ಸೂಕ್ತಾಭಿಷೇಕ, ಗಣಹೋಮು, ಅಷ್ಟೋತ್ತರ ಮೋದಕ ಹವನ, ಮಹಾ ಪೂಜಾ, ರಂಗಪೂಜಾ, ಸಮಾರಾಧನ, ಭಜನ, ವಿಸರ್ಜನ ಪೂಜಾ, ಶ್ರೀ ದೇವಾಕ ಅಲಂಕಾರ ಕೆಲೀಲೆ ಫಲ, ಪುಷ್ಪ ಲಿಲಾವ, ಶ್ರೀ ಗಣೇಶಮೂರ್ತಿ ವಿಸರ್ಜನ ಇತ್ಯಾದಿ ಕಾರ್ಯಕ್ರಮ ಚಲೀಲೆ ಖಬ್ಬರ ಮೆಳ್ಳಾ. 

Saraswati Prabha Konkani Monthly10/12-1

 ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಚಾತುರ್ಮಾಸ ಸಮಾಪ್ತ.

ಶ್ರೀ ಕಾಶೀಮಠ ಸಂಸ್ಥಾನಾಚೆ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ನಂದನ ನಾಮ ಸಂವತ್ಸರಾಚೆ ಚಾತುರ್ಮಾಸ ವ್ರತ ಮಂಗಳೂರಾಚೆ ಶ್ರೀ ವೆಂಕಟರಮಣ ದೇವಳಾಂತು ದಿನಾಂಕ. ೩೦-೦೯-೨೦೧೨ ದಿವಸು ಅಪಾರ ಭಕ್ತ ಬಾಂಧವಾಲೆ ಉಪಸ್ಥಿತೀರಿ ಸಮಾಪ್ತ ಜಾಲ್ಲೆ. ತ್ಯಾ ಪ್ರಯುಕ್ತ ಪ|ಪೂ| ಸ್ವಾಮ್ಯಾನಿಂ ಮೃತ್ತಿಕಾ ಪೂಜಾ ಆನಿ ವಿಸರ್ಜನಾ  ವಿಧಿ ಪೂರ್ವಕ ಜಾವ್ನು ಕೆಲ್ಲಿ. ಮಾಗಿರಿ ಸೀಮೋಲ್ಲಂಘನ ಕಾರ್ಯಕ್ರಮ ಪ್ರಯುಕ್ತ ಪ|ಪೂ| ಸ್ವಾಮೆಂ ಶ್ರೀ ವೆಂಕಟರಮಣ ದೇವಾಕ ಭೆಟ್ಟಲಿಂತಿ.  ಉಪರಾಂತ ಬಂಟ್ವಾಳಾಚೆ ತಿರುಮಲ ತಥಾ ಶ್ರೀ ವೆಂಕಟರಮಣ ದೇವಳಾಕ ಆನಿ ಶ್ರೀ ಕಾಶೀಮಠ ಪರಂಪರೆಚೆ ಶ್ರೀಮದ್ ದೇವೇಂದ್ರ ತೀಥ್ ಸ್ವಾಮ್ಯಾಂಗೆಲೆ ವೃಂದಾವನ ಆನಿ ಪಾಣೆ ಮಂಗಳೂರ್‍ಚೆ ಶ್ರೀ ವೀರ ವಿಠಲ ದೇವಳಾಕ ಭೇಟಿ ದೀವ್ನು ದೇವಾಲೆ ದರ್ಶನ ಘೆತಲೀಂತಿ.
ಉಪರಾಂತ ಪರತ ಮಂಗಳೂರಾಕ ಪರತೂನು ಎವ್ನು ಪ|ಪೂ| ಸ್ವಾಮೆಂ ಥಂಯಿ ಆಯೋಜನ ಕೆಲೇಲೆ ದಿಗ್ವಿಜಯ ಶೋಭಾಯಾತ್ರೆಂತು ವಾಂಟೊ ಘೆತಲೀಂತಿ. ದಿಗ್ವಿಜಯ ಡೊಂಗರಿಕೇರಿ ಕೆನರಾ ಹೈಸ್ಕೂಲಾಚೆ ಆವಾರಾ ತಾಕೂನು ಸೂರ ಜಾವ್ನು ನ್ಯೂ ಚಿತ್ರಾ ಜಂಕ್ಷನ್,  ಬಾಲಾಜಿ ಟಾಕೀಸ, ಸ್ವದೇಶಿ ಸ್ಟೋರ್‍ಸ, ರಥಬೀದಿ ರಸ್ತ್ಯಾರಿ  ಶ್ರೀ ದೇವಳಾಕ ಪರತೂನು ಆಯಲೆ. ಕಡೇರಿ ಸ್ವಾಮ್ಯಾನಿ ಶ್ರೀ ವೀರ ವೆಂಕಟೇಶ ದೇವಾಲೆ ದರ್ಶನ ಕೆಲ್ಲೆ. ದಿಗ್ವಿಜಯ ಯಾತ್ರೆಂತು ಚೆಂಡೆ, ಪಂಚವಾದ್ಯ, ಭಜನಾ ಸಂಕೀರ್ತನ ತಶ್ಶೀಚಿ ಜಿ‌ಎಸ್‌ಬಿ ಯುವಕಾರಾ ತಾಕೂನು  ವಾಘಾ ವೇಷಾಚೆ ಸ್ತಬ್ದ ಚಿತ್ರಾಚೆ  ಪ್ರದರ್ಶನ ಚಲ್ಲೆ.  ದೇಶಾದ್ಯಂತಾಚೆ ಜಿ‌ಎಸ್‌ಬಿ ಸಮಾಜ ಬಾಂಧವ ಅಪಾರ ಸಂಖ್ಯಾರಿ ಹೇ ಕಾರ್ಯಕ್ರಮಾಂತು ವಾಂಟೊ ಘೆತಲೀಂತಿ. ಆನಿ ಸರ್ವ ಬಗಲೇನ ಪ|ಪೂ| ಸ್ವಾಮ್ಯಾಂಗೆಲೆ ದಿಗ್ವಿಜಯ  ಶೋಭಾ ಯಾತ್ರೆಕ ಭವ್ಯ ಸ್ವಾಗತ ದಿಲ್ಲಿಂತಿ.
ಶ್ರೀಮದ್ ಭಾಗವತ ಸಪ್ತ : ಶ್ರೀ ಕಾಶೀಮಠಾಧೀಶಾಂಗೆಲೆ ಚಾತುಮಾಸ್ಯ ವೇಳ್ಯಾರಿ ತಾ. ೨೧-೦೮-೨೦೧೨ ದಾಕೂನು ೨೭-೦೮-೨೦೧೨  ಪರ್ಯಂತ ಶ್ರೀ ಭಾಗವತ ಸಪ್ತ ಆಯೋಜಿತ ಕೆಲೀಲೆ. ಪ್ರತಿ ದಿವಸು ಸಾಂಜ್ವಾಳಾ ೬-೩೦ಚಾನ ೮-೦೦  ಗಂಟ್ಯಾ ಪರ್ಯಂತ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂ ದಾಕೂನು ವ್ಯಾಖ್ಯಾನ ಆನಿ ಆಶೀರ್ವಚನ ಆಶ್ಶಿಲೆ. ಭಾಗವತ ಮಹಾ ಪುರಾಣಾಚೆ ಪಾರಾಯಣ ಶ್ರೀ ವಿ.ಎಮ್.ಪೈ ಬೆಂಗಳೂರು ಹಾನ್ನಿ ಕೆಲ್ಲೆ.
ಅಖಂಡ ಭಜನಾ ಕಾರ್ಯಕ್ರಮ : ಪ|ಪೂ| ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ  ಚಾತುರ್ಮಾಸ್ಯ ವೇಳ್ಯಾರಿ ತಾ. ೧೯-೦೮-೨೦೧೨ ದಿವಸು ಶ್ರೀ ಪುರುಷೋತ್ತಮ ಮ್ಹಹಿನ್ಯಾ ಪ್ರಯುಕ್ತ  ಶ್ರೀ ಸುಧೀಂದ್ರ ಸಭಾ ಭವನಾಂತು ಅಖಂಡ ಭಜನಾ ಕಾರ್ಯಕ್ರಮ ಚಲ್ಲೆ. ತ್ಯಾ ದಿವಸು ಸಕ್ಕಾಣಿ ೮-೦೦  ಗಂಟ್ಯಾಕ ಪ|ಪೂ| ಸ್ವಾಮ್ಯಾನಿಂ ದೀಪ ಪ್ರಜ್ವಲನ ಕೋರ್ನು ಏಕಾಹ ಭಜನೇಕ ಚಾಲನ ದಿಲ್ಲಿ. ೨೦-೦೮-೨೦೧೨ ದಿವಸು ಸಕ್ಕಾಣಿ ೮-೩೦ಕ  ಮಂಗಲ ಬರಶಿ ಭಜನಾ ಕಾರ್ಯಕ್ರಮ ಸಮಾಪ್ತಿ ಜಾಲ್ಲೆ. ಗಾಂವ್ಚೆ, ಪರಗಾಂವ್ಚೆ ಸಬಾರ ಭಜನಾ ಮಂಡಳಿಚಾನ ಹೇ ಸಂದರ್ಭಾರಿ ಎವ್ನು, ಭಜನ ಸಾಂಗೂನು ಹರಿ -ಗುರು ಕೃಪೇಕ ಪಾತ್ರ ಜಾಲ್ಲಿಂತಿ. 

Heart

“ಹಾರ್ಟ್ ಆಟ್ಯಾಕ್ ಥೊಡೆ ಮಾಹಿತಿ

ಮನುಷ್ಯು ಹೋ ಪ್ರಕೃತೀಚೆ ಏಕ ವಾಂಟೊ. ರೂಖು, ಜಾಡ, ನಂಯಿ, ಸಮುದ್ರ, ಗುಡ್ಡೊ, ವಾರೆ, ಉಜ್ಜೆ ವರೀ ತೋವಯಿ ಏಕ ವಾಂಟೊ. ಜಾಲ್ಯಾರಿ ಉರಲೇಲೆ ಸರ್ವ ವಸ್ತು ಪಶಿ ತೊಂ ಉನ್ನತ ಜ್ಞಾನ, ನಾಗರಿಕತಾ ಆಸ್ಸ ಕೋರ್ನು ಘೇವ್ನಾಸ್ಸ ವ್ಹಯಿ. ಜಾಲ್ಯಾರಿ ಆಪಣಾಲೆ ಹೇ ಗರೀಮೆಕ ಸಮ ಜಾವ್ನು ತೊಂ ಆಸ್ವೆ? ಮ್ಹೊಣು ಪ್ರಶ್ನೆ ಘಾಲೇಲ ತೆದ್ದನಾ ‘ನಾ.. ಮ್ಹಣಚೆ ನಿರಾಸೇಚಿ ಆಮಕಾ ಮೆಳಚೆ ಜವಾಬ. ಜಾಲ್ಯಾರಿ  ಮನುಷ್ಯು ಆಪ್ಪಣ ಹೇ ನಿಸರ್ಗಾಚೆ ಏಕ ವಾಂಟೊ ಮ್ಹಣಚೆ ವಿಸೊರೂನು, ನಿಸರ್ಗಾಂತು ಆಶ್ಶಿಲೆ ಪೂರಾ ಆಪ್ಣಾ ಖಾತ್ತಿರಿ ಆಸ್ಸುಚೆ ಮ್ಹೊಣು ಸಮಜೂನು ಪ್ರಕೃತಿ, ಪರಿಸರ ನಾಶ ಕರತಾ ಆಸ್ಸ. ಪ್ರಕೃತೀಂತು ಆಸ್ಸುಚೆ ವಿಂಗಡ ಸರ್ವ ಜಡ ವಸ್ತು, ಮೂಕ ಜೀವಿ, ಪ್ರಕೃತಿ ನಿಯಮು ಆಜಿ ಥಾಂಯಿ ಪಾಲನ ಕರತಾ ಆಸಲೇರಿ ಜ್ಞಾನ, ಉಲ್ಲಣಿ, ವಿವೇಕ ಆಸ್ಸುಚೆ ಮನುಷ್ಯು ತಾಂಕಾ ಆದರ್ಶ ಜಾವ್ನಾಸ್ಸುಚೆ ಸೋಡ್ನು ಆಪಣಾಲೆ ಸೂಖ-ಭೋಗಾ ಖಾತ್ತಿರಿ ತ್ಯಾ ಪ್ರಕೃತಿ ನಿಯಮು ಮೊಡಚಾಂತು ಮಗ್ನ ಜಾವ್ನು ಆಸ್ಸ. ಆನಿ ನಿಸರ್ಗ ಚಕ್ರ ತುಂಟೋನು  ಘಾಲ್ನು ಆಪಣಾಲೆ ಮನ ಆನಿ ಶರೀರಾ ವಯ್ರಿ ವಾಯ್ಟ ಪರಿಣಾಮು ತಾಂಡೂನು ಘೆತ್ತಾ ಆಸ್ಸ. ಪರಿಸರ ಮಾಲಿನ್ಯ, ಪ್ರಕೃತಿ ವಿಕೋಪ, ಜೀವವೈವಿಧ್ಯಾಚೆ ನಾಶ ಅಶ್ಶೀ ಪಟ್ಟಿ ಕರ್ತಾ ಘೆಲಿಯಾರಿ ತಾಕ್ಕಾ ಅಂತ್ಯ ಮ್ಹೊಣು ನಾ. ತಾಂತು ಪ್ರಕೃತಿ ನಾಶಾನ ಡೈರೆಕ್ಟ್ ಜಾವ್ನು ಮನುಷ್ಯಾ ವಯ್ರಿ ಪರಿಣಾಮು ಪೊಡಚೆ ಏಕ ವಿಧಾನ ಮ್ಹಳಯಾರಿ ಅನಾರೋಗ್ಯ. ಅನಾರೋಗ್ಯ ಮಸ್ತ ನಮೂನ್ಯಾನ ಆಸಲೇರಿಚಿ ಪ್ರತಿ ವರ್ಷ ಸಪ್ಟಂಬರ್ ೨೯ ತಾರೀಖೆಕ “ವಿಶ್ವ ಹೃದಯ ದಿವಸ ಮ್ಹೊಣು ಆಚರಣ ಕರತಾತಿ. ತ್ಯಾ ಖಾತ್ತಿರಿ “ಹಾರ್ಟ್ ಆಟ್ಯಾಕಾ ಖಾತ್ತಿರಿ ಥೊಡೆ ಮಾಹಿತಿ ಕೋರ್ನು ಘೆವ್ಯಾ.
ಆಮಗೇಲೆ ಹಾರ್ಟಾಚೆ ವಜನ ಸುಮಾರ ೨೫೦ ದಾಕೂನು ೩೦೦ ಗ್ರಾಂ ತಿತ್ತುಲೆ ಆಸ್ತಾ. ಆನಿ ಪ್ರತಿ ನಿಮಿಷಾಕ ಸುಮಾರ ೭೨ ಪಂತ ಹಾರ್ಟ್ ಬಡೋವನು ಘೆತ್ತಾ. ಮ್ಹಳಯಾರಿ ಏಕ ದಿವಸಾಕ ಸುಮಾರ ೧,೦೩,೬೮೦ ಪಂತಾ ಬಡೋನು ಘೇವ್ನು ಪ್ರತಿ ದಿವಸು ಸಾತ ದಾಕೂನು ಆಠ ಹಜಾರ ಲೀಟರ್ ತಿತ್ಲೆ ರಗತ್ ಪಂಪ್ ಕರ್ತಾ. ಆನಿ ಸುಮಾರ ಸತ್ತರ ವರ್ಷಾಚೆ ಏಕ ಮನುಷ್ಯಾಲೆ ಜೀವಮಾನಾಂತು ಸುಮಾರ ೧೫ ಕೋಟಿ ಲೀಟರ್ ರಗತ ಚ್ಹೊಕ ಕರ್ತಾ ಮ್ಹಳಿಲೆ ತೆದ್ದನಾ ತಾಜ್ಜೆ ಕಾರ್ಯಕ್ಷಮತೆ ಕಿತ್ಲೆ ಆಸ್ಸುಚಾಕ ಪುರೊ ಮ್ಹೊಣು ತುಮ್ಮೀ ಯವಜಿಯಾ! ಆಮ್ಮಿ ನಿಸರ್ಗಾಕ ವಿರುದ್ಧ ಜಾವ್ನು ಘೆಲಯಾರಿಚಿ ಆಮಗೇಲೆ ಶರೀರಾ ಭಿತ್ತವೈಲೆ ಅಂಗಾಂಗ ಪ್ರಕೃತಿಚಾನ ನಿರ್ಮಿತ ಜಾಲೇಲೆ ನಿಮಿತ್ತ, ತ್ಯಾ ಪ್ರಕೃತಿ ವಿರುದ್ಧ ಜಾವ್ನು ವಚ್ಚೇಕ ಶಕ್ಯ ನಾ. ತಾಕ್ಕಾ ಬರಪೂರ ಆಹಾರ ಮೆಳೀಲ ಕೂಡ್ಲೆ ಜಾಲೀಲ್ನಾ. ಮೆಳೀಲೆ ಆಹಾರ ಪ್ರಕೃತಿ ಸಹಜ ಜಾವ್ನು ಜಿರಕಾ ಜಾಲೇಲೆ ಅತ್ಯಗತ್ಯ ಆಸ್ತಾ. ಜಾಲ್ಯಾರಿ ಆಯಚೆ ಆಮಗೇಲೆ ಜೀವನ ಕ್ರಮಾನ ತ್ಯಾ ಅಸಾಧ್ಯ ಜಾಲ್ಯಾ. ತಾಜ್ಜ ವಾಯ್ಟ ಪರಿಣಾಮಾನಿ ಜಿರಚೆ ವ್ಯವಸ್ಥೆ ವಯ್ರಿ ಅಪಾರ ಒತ್ತಡ ಪೋಡ್ನು  ಹಾಕ್ಕಾ ಹಾರ್ಟ್, ಕಿಡ್ನಿ, ಲಿವರ್ ಇತ್ಯಾದಿ ಅಂಗ ಬೆಗ್ಗಿ ಪ್ರತಿಕ್ರಿಯಾ ದಾಖಯತಾ.  ಆನಿ ತಾಜ್ಜೇನ ಆಮ್ಮಿ ನ್ಹಂಹಿ ನಾತ್ತಿಲೆ ಕಂಟಾಳೇಂತು ಶಿರ್‍ಕೂನು ಪಡತಾತಿ. ಹರ್ದೆ ವಯ್ರಿ ಪರಿಣಾಮು ಜಾವಚಾಕ ಮೂಲ ಕಾರಣ ಮ್ಹಳಯಾರಿ ಆಯಚೆ ಲೋಕ ಆಧುನಿಕ ಜೀವನ ಕ್ರಮಾಕ ಹೊಂದೂನು ಘೆತಲೀಂತಿ. ಅತಿ ಭೋಗ ಲಾಲಸೇನ ತ್ಯಾ ಜಾವ್ಕಾ, ಹ್ಯಾ ಜಾವ್ಕಾ ಮ್ಹಣಚೆ ಹಪಾಹಪಿಕ ಪೋಣು ನಾಕ್ಕ ನಾತ್ತಿಲೆ ಒತ್ತಡಾಂತು ಶಿರ್‍ಕೂನು ಪಡತಾತಿ. ಜಿಬ್ಬೆ ರೂಚಿಕ ಪೋಣು ಪರಿಸರ ಆನಿ ಸಂದರ್ಭಾಕ ಸಂಬಂಧ ನಾತ್ತಿಲೆ ಆಹಾರ-ವಿಹಾರಾ ತಾಕೂನು ಆಪಣಾಲೆ ಶರೀರಾಕ ಲುಕ್ಸಾನ ಕೋರ್ನು ಘೆತ್ತಾತಿ. ಆನಿ ವೈಜ್ಞಾನಿಕ ಆವಿಷ್ಕಾರಾನಿ ಆಯ್ಯಿಲೆ ಯಂತ್ರ, ಕರೆಂಟಾ ವಯ್ರಿ ಅತಿ ಅವಲಂಭಿತ ಜಾವ್ನು ಮಿಷನ್ನಾ ವರಿ ಚಟುವಟಿಕೆ ರಹಿತ ಜೀವನ ಚಲೈತಾ ಆಸ್ಸತಿ. ಹಾಜ್ಜ ಪೂರಾ ಫಲಚಿ ಆಮಗೇಲೆ ಹಾರ್ಟಾ ವಯರಿ ಚ್ಹಡ ವಜನ ಪಡತಾ ಆಸ್ಸ. ತಾಜ್ಜೇನ ಹಾರ್ಟ್ ಅವಧಿಪೂರ್ವ ನಿಷ್ಕೀಯ ಜಾತ್ತಾ ಆಸ್ಸ, ನಾಂವೆ ಅನಾರೋಗ್ಯಾಕ ಪೋಣು ಮರಣ ಪಾವಚೆ ಉಡ್ಗಿರೆ ಹಾಣು ದಿತ್ತಾ ಅಸ್ಸ.
ತುಮ್ಕಾ ಗೊತ್ತಾಸ್ಸಕಿ ನಾಂಕಿ ಹಿಂದೂಸ್ತಾನಾಂತು ಅತ್ಯಧಿಕ ಮ್ಹಳಯಾರಿ ಒಟ್ಟು ಮರಣಾಂತು ಕಾಲಂಶ ತಿತ್ಲೆ ಹಾರ್ಟ್ ಸಂಬಂಧಿ ರೋಗಾನ ಘಡ್ತ ಖಂಯಿ. ಮ್ಹಳ್ಯಾರಿ ಸುಮಾರ ೩೫ ಲಾಕ್ ಲೋಕ ಹಾರ್ಟ್ ಡಿಸೀಸಾನ ಮರ್‍ತಾತಿ. ಆನಿ ವಿಶ್ವಾದ್ಯಂತ ಲ್ಯಾಕ ಘೆತಲೀರಿ ಹೇ ಅಂಕಡೊ ಏಕ ಕೋಟಿ ಪಶಿ ಚ್ಹಡ ಖಂಯಿ. ಪೆಂಟಾಂತು ಅಶ್ಶಿ ಮರ್‍ತಲ್ಯಾಲೆ ಅಂಕಡೊ ೩೨.೮ ಪರ್ಸೆಂಟ್ ಆಸಲೇರಿ ಖೇಡೆಂತು ೨೨.೯ ಪರ್ಸೆಂಟ್ ಆಸ್ಸ ಖಂಯಿ. ಆನಿ ದಕ್ಷಿಣ ಭಾರತಾಂತು ಹರ್ದೆ ಸಂಬಂಧಿ ರೋಗಾಕ ಶಿರ್‍ಕೂಚೆ ಲೋಕಾಲೆ ಪ್ರಮಾಣ ೨೫ % ಆಸ್ಸ ಖಂಯಿ. ವೈದ್ಯ ಲೋಕಾನಿ ಹೃದಯಾಘಾತಾಕ ಪಟ್ಟಿ ಕೊರಚೆ ಪಾಂಚ ಸರಳ ಕಾರಣ ಮ್ಹಳಯಾರಿ ಬಿ.ಪಿ. ಗೋಡ ಮೂತ, ಕೊಲೆಸ್ಟ್ರಾಲ್, ಚ್ಹಡ ವಜನ, ಆನಿ ಅತಿಯಾಸೆ ಖಂಯಿ. ಪಯಲೆ ೫೦-೬೦ ವರ್ಷಾ ನಂತರ ಯತ್ತಾಸ್ಸುಚೆ ಹಾರ್ಟ್ ಡಿಸೀಸ್ ಆತ್ತ ೪೦ ಭಿತ್ತರಿ ಯವಚಾಕ ಲಾಗಲಾ. ಆನಿ ಪಯಲೆ ಚರ್ಡುಂವ ಆವಯಿ-ಬಾಪಯಿಕ ಹಾರ್ಟ್ ಚೆಕಪ್ಪಾಕ ಆಪೋನು ವ್ಹರತಾಶ್ಶಿಲೆ. ಜಾಲ್ಯಾರಿ ಆವಯಿ-ಬಾಪಯಿನ ಚರ್ಡುವಾಂಕ ಹಾರ್ಟ್ ಚೆಕ್ಕಪ್ಪಾಕ ಆಪೋವ್ನು ವ್ಹರಕಾ ಜಾಲೇಲೆ ಪರಿಸ್ಥಿತಿ ಆತ್ತ ಆಯಲಾ. ಹೃದಯಾಘಾತಾ ಪಯಲೆ ದಾರ್‍ಲಮನ್ಶಾಂಕ ಆನಿ ಬಾಯ್ಲಮನ್ಶಾಂಕ ವಿಂಗ ವಿಂಗ ನಮೂನ್ಯಾ ರೋಗ ಲಕ್ಷಣ ದೆಕ್ಕು ಪಡ್ತಾ ಖಂಯಿ. ಆನಿ ರಾತ್ತಿಚೆ ೧ ಗಂಟ್ಯಾ ನಂತರ ಸಕ್ಕಾಣಿ ಪೂಡೆ ೫ ಗಂಟ್ಯಾ ಭಿತ್ತರಿ ಹೃದಯಾಘಾತ ಜಾಲೇಲೆ ಲೋಕಾನಿ ವಾಂಚೆ ಮಸ್ತ ಅಪರೂಪ ಖಂಯಿ.
ತ್ಯಾ ಕಾರಣಾನ ಆಮ್ಮಿ ಆಜಿ ದಾಕೂನು ಪೂಣಿ ಪ್ರಕೃತಿ ಸಹಜ ಜಾವ್ನು ವಾಂಚೇಕ ಪ್ರಯತ್ನ ಕೋರ್‍ಯಾ. ಚಡುವಟಿಕೇಚೆ ಜೀವನ ಚಲೋವ್ಯಾ. ದೈಹಿಕ ವ್ಯಾಯಾಮು, ಯೋಗಾಸನ ನಾಂವೆ ವಾಕಿಂಗ್ ಪೂಣಿ ಕೊರಕಾ. ರಾತ್ತಿಕ ಮಸ್ತ ತೊಡೊವು ಜಾವ್ನು  ಜವ್ಚೆ ಆನಿ ನಿಚ್ಚೆ, ರೆಡಿ ಫುಡ್ ಖಾವಚೆ, ಚರ್ಡುವಾಂಕ ಮಸ್ತ ಐಸ್‌ಕ್ರೀಂ, ಚಿಪ್ಸ್ ಆದಿ ತೆಲ್ಕಟ್ ಖಾವ್ಚೇಕ ದಿವ್ಚೆ ಊಣೇ ಕರಾ. ತ್ಯಾ ತ್ಯಾ ಕಾಲಾಂತು ಮೆಳಚೆ ತರಕಾರಿ, ಫಳ ಚ್ಹಡ ಚ್ಹಡ ಖಾಯ್ಯಾತಿ. ದಿವಸಾಂತು ಥೊಡೆ ಕಾಳ ಆರಾಮ ಕೊರಚಾಕ ವೇಳು ದವರೂನು ಘೆಯ್ಯಾತಿ. ಮಾಂಸಾಹಾರ ಸೋಡಾಂತಿ. ದಿವಸಾಕ ೩-೪ ಲೀಟರ್ ಉದ್ದಾಕ ಪಿವಚಾಕ ವಿಸೋರ್‌ನಾಕ್ಕಾತಿ. ಚಿಕ್ಕೆ ಮುಂಜಾಗ್ರತಾ, ಆಹಾರಾಂತು ನಿಯಂತ್ರಣ, ಚಟುವಟುಕೇಚೆ ಜೀವನ ಹಾಜ್ಜೇನ ಮಸ್ತ ಪ್ರಮಾಣಾನ ಹೃದಯಾಘಾತಾ ತಾಕೂನು ಚುಕ್ಕುನು ಘೆವ್ಯೇತ. ತುಮ್ಮಿ ಏಕ್ಪಂತ ಕಿತಯಾಕ ಪ್ರಯತ್ನ ಕೊರಚಾಕ ನಜ್ಜ.?

ಚಿತ್ರ ಕೃಪೆ : ಇಂಟರ್ ನೆಟ್
(ಸಂಗ್ರಹ)

Cough

ಕಾಂಕಿಕ ದೋನಿ ಘರಾ ವಾಕ್ಕದ

ಸೈತ್ಯ, ಕಾಂಕಿ ಹೇ ಪೂರಾ ಆಪಯನಾಶಿ ಯವಚೆ ಸೊಯರೆ ವರಿ. ಸಾನ ಚರ್ಡುಂವಾನ ಆಶ್ಶಿಲೆ ಘರಾಂತು,  ಆನಿ ಪಾವ್ಸಾಡಿ ತಶ್ಶೀಚಿ ಥಂಡೆ ಕಾಲಾಂತು ಅಂತೂ ಹಾಜ್ಜೆ ಉಪಟಳಾನ ಕಿತ್ಲಕಿ ಆವಯಿ ಬಾಪಯಿನ ರಾತಿ ಸಗಳೆ ನೀದ ನಾಶಿ ಕಾಡಚೆ ಆಸ್ಸ. ಆನಿ ಆಶ್ಶಿಲೆ ಏಕ್ದೋನಿ ಚರ್ಡುಂವಾನಿ ಕಾಂಕಿನ ವಳವಳ್ತಾನಾ ತಾಂಗೆಲೆ ಅಂತಾಂತು ಮಿರ್ಸಾಂಗೆ ಪಿಟ್ಟಿ ಕಾಲೇಲ ತಿತ್ತುಲೆ ಧೂಖಿ ಜಾತ್ತಾ. ತ್ಯಾ ಕಾರಣಾನ ಚರ್ಡುಂವಾಂಕ ಬೆಗ್ಗಿ ಆರಾಮ ಜಾಂವೊ ಮ್ಹೊಣು ಡಾಕ್ಟ್ರಾಲಾಗ್ಗಿ ಆಪೋವ್ನು ವ್ಹರಚೆ ಸರ್ವೇ ಸಾಮಾನ್ಯ. ಥಂಯಿ ಘೆಲ್ಲ ಕೂಡ್ಲೆ ಸಾಮಾನ್ಯ ಸೈತ್ಯ, ಕಾಂಕಿಕ ಪವರ್ ಫುಲ್ ಅಂಟಿಬಯೋಟಿಕ್ಸ್ ದಿತ್ತಾತಿ. ತಾಜ್ಜೇನ ಮುಖಾರಿ ಖಂಚೇ ಸಂದರ್ಭಾರಿ ಸಾನ್ಸಾನ ಅನಾರೋಗ್ಯಾಕ ತಾಂಕಾ ಅಂಟಿಬಯೋಟಿಕ್ಸ್ ದಿವಚೆ ಅನಿವಾರ್‍ಯ ಜಾತ್ತಾ.
ಪೂಡೆ ಚರ್ಡುಂವ ಸಾನ್ನ ಆಸತಾನಾ ಆಮ್ಮಾ ಶುಂಠಿ ಕಷಾಯು, ಮೀರ್‍ಯಾಕಣಾ ಕಷಾಯು ಕೋರ್ನು ದಿತ್ತಾಶ್ಶಿಲಿ. ದೋನ-ತೀನ ದಿವಸಾನ ಸೈತ್ಯ, ಕಾಂಕಿ ಗಪ್-ಚಿಪ್ ಜಾತ್ತಾಶ್ಶಿಲೆ. ಆಜಿ ಹರ್‍ಯೇಕ ವ್ಯಾಪಾರಿ ದೃಷ್ಟೀನ ಪಳೈಚಾ ವೊಚ್ಚುನು ಸಾನ್ಸಾನ ಅನಾರೋಗ್ಯಾಕ ಹಜಾರೋ ಭರಿ ದುಡ್ಡು ಖರ್ಚುಕಾ ಪಳ್ಳಾ. ತಸ್ಸಾಲೆ ವೇಳ್ಯಾರಿ ಆಮಗೇಲೆ ಮ್ಹಾಲಗಡ್ಯಾನಿ ಕರತಾ ಆಶ್ಶಿಲೆ ಪ್ರಥಮೋಪಚಾರ ಏಕ್ದೋನಿ ದಿವಸು ಕೋರ್ನು ಮಾಗಿರಿ ಡಾಕ್ಟ್ರಾಲಾಗ್ಗಿ ವಚ್ಚೆ ಚಾಂಗ ಮ್ಹೊಣು ಮಗೇಲೆ ಅಭಿಪ್ರಾಯು. ಆನ್ನೇಕ ವಿಷಯು ಮ್ಹಳ್ಯಾರಿ ಸಾನಶಿ ತಾಪು ಆಯ್ಲೆ ಮ್ಹೊಣು ಕಳ್ಳ ಕೂಡ್ಲೆ ಮುಖಾರಿ ಚ್ಹಡ ಜಾವ್ಕೆ ನಾಕ್ಕಾ, ಕಾಮ - ಕಾರ್ಯಾಕ ತ್ರಾಸ ಜಾತ್ತಾ ಮ್ಹೊಣು ಆಮ್ಮಿ ಡಾಕ್ಟ್ರಾಲಾಗ್ಗಿ ಧಾವ್ನು ವತ್ತಾತಿ. ಪೆಂಟಾಂತು ಕಿತ್ಲಕಿ ಡಾಕ್ಟರ್‍ಸ್ ಕೂಡ್ಲೆ ರಗತ, ಮೂತ ಟೆಸ್ಟಾಕ ಬರೋವ್ನು ದಿತ್ತಾತಿ. ಹಾಂವೆ ಆಯ್ಕಲಿ ಮ್ಹಣಕೆ ಖಂಚೆ ತಾಪು ಎವ್ವೊ, ತೀನಿ ತಾಕೂನು ಪಾಂಚ ದಿವಸ ಪರ್ಯಂತ ಕಸ್ಸಲೆ ಟೆಸ್ಟ ಕೆಲ್ಯಾರಿಚಿ ತ್ಯಾ ಕಸ್ಸಲೆ ಇನ್‌ಫೆಕ್ಷನ್ ಮ್ಹೊಣು ಕಳ್ನಾ ಖಂಯಿ. ತ್ಯಾ ಕಾರಣಾನ ಅಶ್ಶಿ ಸೈತ್ಯ, ಕಾಂಕಿ ಆಯ್ಯಿಲ ತೆದ್ದನಾ ಏಕ್ದೋನಿ ದಿವಸು ಘರಾ ವಾಕ್ಕದ ಕೋರ್ನು ಪಳೋವ್ನು ಘೆವಚೆ ಚೂಕಿ ಜಾಯಸನಾ ನ್ಹಂಹಿವೇ?
ಶುಂಠಿ ಕಷಾಯು
ಜಾವ್ಕಾ ಜಾಲೇಲೆ ಸಾಮಾನು : ಶುಂಠಿ(ಸುಕ್ಕಿಲೆ) - ಸಾನ ಚೂರು. ಮೀರ್‍ಯಾ ಕಣ, ಜೀರೆಂ, ಕೊತ್ತಂಬರಿ ಬೀ - ಎಕ್ಕೇಕ ಚಮಚೊ. ಮೀಟ - ಥೊಡೆಚಿ. ಚೂರ ಗೋಡ. ಖಡೇ ಸಾಕ್ಕರ(ತಾಂಬ್ಡೆ) - ಜಾವ್ಕಾ ಜಾಲ್ಯಾರಿ. ಆನಿ ಲಿಂಬಿಯಾ ರೋಸು.
ಕೊರಚೆ ವಿಧಾನ : ಸುಕ್ಕಿಲೆ ಶುಂಠಿ ಚಾಂಗ ಕೋರ್ನು ಪುಸ್ಸುನು ದಾಡ್ಡೊನು ದವೋರ್ನು ಘೆಯ್ಯಾತಿ. ಮೀರ್‍ಯಾಕಣ, ಜೀರೆಂ, ಕೊತ್ತಂಬರಿ ಬೀ ವಿಂಗವಿಂಗಡ ಜಾವ್ನು ಬಾಜ್ಜೊನು ಘೆಯ್ಯಾತಿ. ತಾಕ್ಕಾ ದಾಡ್ಡೋನು ಘೆತ್ತಿಲೆ ಶುಂಠಿ  ಘಾಲ್ನು ರಗಡೇಂತು ಘಾಲ್ನು ಪೂರಾ ಚಾಂಗ ಜಾವ್ನು ಪುಡ್ಡಿ ಜಾವಚೆ ವರಿ ದಾಡ್ಡೊನು ಘೆಯ್ಯಾತಿ. ರಗಡೊ ನಾತಲೀರಿ ಮಿಕ್ಸಿಂತು ಘಾಲ್ನು ಘೆತಲ್ಯಾರಿ ಅಡ್ಡಿ ನಾ.  ಅಶ್ಶಿ ತಯಾರ ಕೋರ್ನು ಘೇವ್ನು ದವರೂನು ಘೆತಲೀಲೆ ಹೇ ಪುಡ್ಡಿ ಏಕ ವಾರೆಂ ರಿಗನಾಶ್ಶಿಲೆ ಗಾಜಾ ಬಾಟ್ಲೆಂತು ಘಾಲ್ನು ದವರೂನು ಘೆಯ್ಯಾತಿ. ಆನಿ ಕೆದ್ನತರಿ ವಾಪರ್‍ಚಾಕ ಜಾತ್ತಾ.
ಹಾಜ್ಜೆ ಕಷಾಯ ಕರತಾಸ್ತನಾ ಗ್ಯಾಸಾ ವಯರಿ ಏಕ ಲೋಟೊ ತಿತ್ತುಲೆ ಉದ್ದಾಕ ದವರೂನು ಉದಕಾಕ ಕತಕತ ಯತ್ತನಾ ಲಿಂಬಿಯಾ ರೋಸು, ಮೀಟ, ಗೊಡ್ಡಾ ಪುಡ್ಡಿ, ಏಕ್ಚೂರು ಗೋಡಕಾಷ್ಟ  ಆನಿ ತಯಾರ ಕೋರ್ನು ಬಾಟ್ಲೆಂತು ಘಾಲ್ನು ದವರೂನು ಘೆತ್ತಿಲೆ ಶುಂಠಿ ಪುಡ್ಡಿ ಹ್ಯಾ ಪೂರಾ ಘಾಲ್ನು ದಾ-ಪಂದ್ರ ಮಿನಿಟ ಚಾಂಗ ಕೋರ್ನು ಕತ್ಕತ ಹಾಡೇಯಾ. ಗೊಡಶೆ ಜಾವ್ಕಾ ಜಾಲ್ಯಾರಿ ಕತ್ಕತೊ ಯತ್ತನಾ ತಾಂಬಡೆ ಖಡೆಂ ಸಾಕ್ಕರ ಘಾಲ್ಯೇತ. ತೊಗ್ಗು ದೇವೋನು ಗಾಳ್ಸುನು, ಚಿಕ್ಕೆ ಹೂನ ಆಶ್ಶಿಲ ತೆದನಾಂಯಿ ದೂದ ಘಾಲ್ನು, ಜಾಂವೊ ಘಾಲನಾಶಿ ದಿವಸಾಕ ದೋನ್ಪಟಿ ಪಿತ್ತಾ ಯಯ್ಯಾ. ತೀನ ದಿವಸು ವರಂತ ಪಿಲ್ಯಾರಿ ಸೈತ್ಯ, ಕಾಂಕಿ ಊಣೆ ಜಾತ್ತಾ. ಉತ್ತರ ಕರ್ನಾಟಕಾಂತು ಹಾಕ್ಕಾ ‘ಆಲ್ಲಾ ಕಾಡೆ ಮ್ಹೊಣು ಆಪಯತಾತಿ.
ಕಾಂಕಿ ಯತ್ತಾ ಆಸತಾನಾ ರಾತಿ ಜಾಲೇಲ ತಶ್ಶೀ ಕಾಂಕಿ, ತಾಳೆ ದೂಖಿ ಚ್ಹಡ ಜಾತ್ತಾ ಘೆಲಯಾರಿ ಗಳೇಕ ಏಕ ಬಾಟವೆಲ್ ಜಾಂವೊ ಕಾಟನ್ ಆಂವ್ಗಲೆ ಸುತ್ತೊನು ಘೆತಲ್ಯಾರಿ ಸೈತ ಕೆಲವ ಪಂತಾ ಕಾಂಕಿ ಯವಚೆ ಊಣೆ ಜಾತ್ತಾ.
ಚರ್ಡುವಾಂಕ ಕಾಂಕಿ ಆಯ್ಯಿಲೆ ವೇಳ್ಯಾರಿ ಪ್ರತಿ ದಿವಸು ಸಕ್ಕಾಣಿಪೂಡೆ ಬೆಚ್ಚಗಾಶ್ಶಿಲೆ ಉದಕಾಕ ಥೊಡೆ ಮ್ಹೋವು ಘಾಲ್ನು ಥೊಡೆ ವೇಳು ನಿರಂತರ ಜಾವ್ನು ಪಿವೈಕಾ. ಚರ್ಡುಂವ ಹೇ ಮಸ್ತ ಸಂತೋಷಾನ ಪಿತ್ತಾತಿ ಆನಿ ಕಾಂಕಿ ಸೈತ ಹಾಜ್ಜೇನ ಬೆಗ್ಗಿ ಗೂಣ ಜಾತ್ತಾ. ಚರ್ಡುಂವ ಮಾತ್ರ ನ್ಹಂಹಿ ಖಂಚೆ ವಯಾಚಾನ ಮೋವಾ ತ್ಹೂಪ ವಾಪರ್‍ಯೇತ. ಮಸ್ತ ಲೋಕ ಮೋವಾತ್ಹೂಪ ಮಸ್ತ ಉಷ್ಣ ಮ್ಹೊಣು ತಾಕ್ಕಾ ದೂರ ದವರತಾತಿ. ಏಕ ಅಳ್ತೆ ಪ್ರಕಾರ ಘೆವಚೆ ನಿಮಿತ್ತಾನ ಖಂಡಿತ ಉಷ್ಣ ಜಾಯನಾ. ನ್ಹಂಹಿಸಿ ಆಯುರ್ವೇದಾಂತು ಮೋವಾ ತೂಪ್ಪಾಕ ವಿಶೇಷ ಸ್ಥಾನ ಆಸ್ಸ. ಮೋವಾತ್ಹೂಪ ರಗತ ಶುದ್ಧ ಕರತಾ ಆನಿ ಶರೀರಾಚೆ ರೋಗ ನಿರೋಧಕ ಶಕ್ತಿಥಾಂಯಿ ಚ್ಹಡ ಜಾವಚೆ ವರಿ ಕರತಾ. ಖಾಲಿ ಮೋವಾ ತ್ಹೂಪ ಘೆವಚಾಕ ಜಾಯನಾತ್ತಿಲ್ಯಾನ ಕೃಷ್ಣ ತುಳ್ಸಿ ರೋಸು ಆನಿ ಮೋವಾತ್ಹೂಪ ಮೆಳೋವನು ಪಿವ್ಯೇತ.
ಕಾಂದೊ, ಲೊಸೋಣಿ, ಆನಿ ಮೀರ್‍ಯಾಕಣಾ ಪಿಟ್ಟಿ ಮೆಳೋವನು ಖಾಲ್ಯಾರಿಚಿ ಕಾಂಕಿ ಆನಿ ಸೈತ್ಯ ರಾಬತಾ. ಚಿಕ್ಕ ತೀಕ ಜಾವ್ನು ಕೋರ್ನು ಖಾವಕಾ. ಖಾವಚೆ ಭಿತ್ತರಿ ದೋಳೆಂತು, ನಾಂಕಾಂತು ಪೂರಾ ಬರಪೂರ ಉದ್ದಾಕ ಯವ್ಕಾ.
ಸೈತ್ಯ, ಕಾಂಕಿ, ತಾಪು ಆಯ್ಯಿಲ ತೆದ್ದನಾ ಶರೀರಾಕ ಜಾಲೇಲೆ ತಿತ್ಲೆ ವಿಶ್ರಾಂತಿ ದಿಯ್ಯಾತಿ. ಶಾಳುದ್ದಾಕ, ಕೋಲ್ಡಡ್ರಿಂಕ್ಸ್, ತೆಲ್ಕಟ್ ಖಾವ್ನಾಕ್ಕಾತಿ. ಮಸ್ತ ದೂಳ್ಯಾಂತು, ವಾತ್ತಾಂತು, ಪಾವ್ಸಾಂತು ವಚ್ಚುನಾಕ್ಕಾತಿ. ಐಸ್‌ಕ್ರೀಂ, ಜಂಕ್‌ಫುಡ್ಸ್ ಇತ್ಯಾದಿ ಮಸ್ತ ಖಾವ್ಚೆ ತಾಕೂನು ಕೆಲವ ಆತಂಕಕಾರಿ ರೋಗ ಯವಚೆ ಫಾವ ಆಸ್ಸ ಮ್ಹೊಣು ವೈದ್ಯ ವಿಜ್ಞಾನ ಮ್ಹಣತಾ. ವಾಕ್ದಾ ಪಶಿ ಮುಂಜಾಗ್ರತ ಚಾಂಗ ನ್ಹಂಹಿವೇ? *

ಸಂಗ್ರಹ : ಆರ್ಗೋಡು ಸುರೇಶ ಶೆಣೈ.
ಪೋಟೊ ಕೃಪೆ : ಇಂಟರ್ ನೆಟ್
***

Happy Navarathri

ಸರ್ವಾಂಕ ನವರಾತ್ರಿ ವೇಳ್ಯಾರಿ

ಮಹಾನವಮಿ ಆನಿ ವಿಜಯ ದಶಮಿಚೆ

ಹಾರ್ದಿಕ ಶುಭಾಶಯು.

ಸರ್ವಾಂಕ ದೇವು ಬರೆಂ ಕೊರೊಂ

ಆರ್ಗೋಡು ಸುರೇಶ ಶೆಣೈ 

ಆನಿ ಸರಸ್ವತಿ ಪ್ರಭಾ ಪತ್ರಿಕಾ ಬಳಗ, ಹುಬ್ಬಳ್ಳಿ

Saraswati Prabha Konkani News-1

ಸಮಾಜ ಜೀವಿ, ಮಹಾ ದಾನಿ ಶ್ರೀ ಕೆ. ಜನಾರ್ಧನ ಭಟ್ ಮೈಸೂರ

ಏಕ ಫೂಲ ಫೂಲ್ನು, ದೇವಾಕ ಮಾಳ್ನು, ಭಕ್ತಾಂಕ ಪ್ರಸಾದ ರೂಪಾನ ಮೆಳ್ಳಿಲ ತೆದ್ದನಾ, ತಾನ್ನಿ ತ್ಯಾ ವ್ಹಡ  ಅಷ್ಟೈಶ್ವರ್ಯ ಮೆಳೀಲ ವರಿ ದೋಳ್ಯಾಕ ಒತ್ತುನು ಘೇವ್ನು ಮಾತ್ತೇಕಕಿ, ಖಾನ್ನಾರಿ ಮಾಳ್ನು ಘೆತ್ತಾತಿ. ತೆದ್ದನಾ ತ್ಯಾ ಪೂಲ ಆಪಣಾಲೆ ಜೀವನ ಸಾರ್ಥಕ ಜಾಲ್ಲೆ ಮ್ಹೊಣು ಲೆಕ್ತ ಖಂಯಿ. ಜಾಲ್ಯಾರಿ ಮನುಷ್ಯು ಸಂಘ ಜೀವಿ. ಆಮಗೇಲೆ ವೇದ, ಶಾಸ್ತ್ರ, ಪುರಾಣ ಸರ್ವಾಂತು ಸಾಂಗಚೆ ಮ್ಹಳಯಾರಿ “ಸರ್ವೇ ಜನಃ ಸುಖಿನೋ ಭವಂತು ಮ್ಹೊಣು. ಕೋಣ ಸರ್ವ ಲೋಕಾಲೆ ಸೂಖ, ಸಂತೋಷಾ ಖಾತ್ತಿರಿ ವಾವ್ರೊ, ದಾನ, ತ್ಯಾಗ ಕರ್‍ತಾಕಿ ತಾಂಗೇಲೆ ಜೀವನ ಸಾರ್ಥಕ ಜಾಲೇಲ ವರಿ, ಖಂಡಿತ ತಾನ್ನಿ ಪರಮಾತ್ಮಾಕ ಪರಮಾಪ್ತು ಜಾತ್ತಾತಿ. ಹೇವಯಿ ಆಮಗೇಲೆ ವೇದ -ಶಾಸ್ತ್ರಾಂತು ಸಾಂಗಲಾ. ಜಾಲ್ಯಾರಿ ಕಿತ್ಲ ಲೋಕಾಂಕ ಆಸ್ತಾ ಅಸ್ಸಲೆ ಉದಾರತಾ?  ಆಜಿ ಕಿತ್ಲೆ ಆಸಲೇರಿಚಿ ಆನಿ ಇತ್ಲೆ ಜಾವ್ಕಾ ಮ್ಹಣಚೆ ಹಪಾಹಪಿಪಣ ಪೂರಾ ಕಡೇನ ಭೋರ್ನು ಆಶ್ಶಿಲ ತೆದ್ದನಾ ಸಮಾಜಾಚೆ, ಲೋಕಾಲೆ ಅಭಿವೃದ್ಧಿ ಖಾತ್ತಿರಿ ಖಂಚೇಯಿ ಫಲಾಪೇಕ್ಷೆ ನಾಶಿ, ಪ್ರಾಮಾಣಿಕ ಜಾವ್ನು ವಾಘತಾಲೆ ಹಾತ್ತಾ ಬೊಟ್ಟಾನ ಮೆಜ್ಜೂಚೆ ತಿತ್ಲೆ ಪೂಣಿ ಮೆಳಚೆ ಕಷ್ಟ. ತಸ್ಸಾಲೆ ಏಕಳೆ ಅಪರೂಪಾಂತು ಅಪರೂಪ ಜಾವ್ನು ಮೆಳ್ಚೆ ಸಮಾಜ ಜೀವಿ, ಮಹಾದಾನಿ ಮೈಸೂರಾಚೆ ಶ್ರೀ ಕೆ. ಜನಾರ್ಧನ ಭಟ್ ಮಾಮು. ಹಾನ್ನಿ ಆಮಗೇಲೆ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚಿ ಮ್ಹಣಚೆ ಆಮಕಾ ಪೂರಾ ಅತಿ ಅಭಿಮಾನಾಚೆ ವಿಷಯು.
ಮೂಲತಃ ಹಾನ್ನಿ ಕುಂದಾಪುರ ತಾ||ಚೆ ಕೋಟೇಶ್ವರಾಚಿ.   ಹಾಂಗೆಲೆ ಶುಭ ಜನನ ತಾ. ೩೦-೧೦-೧೯೪೯ ದಿವಸು ಚಲ್ಲೆ. ಬಾಪಯಿ ದಿ|| ಕೆ. ಕೇಶವ ನಾಗಪ್ಪ ಭಟ್ ಆನಿ ಆವಯಿ ದಿ|| ಶ್ರೀಮತಿ ಬಾಯಿ. ಹಾಂಗೆಲೆ ಬಾಯ್ಲ ಶಂಕರನಾರಾಯಣಾಚೆ ಜವಳಿ ವ್ಯಾಪಾರಿ ದಿ|| ಎಚ್. ದಾಮೋದರ ಪ್ರಭು ಹಾಂಗೆಲಿ ಧೂವ ಶ್ರೀಮತಿ ಶ್ಯಾಮಲಾ ಭಟ್. ಹೇ ದಂಪತೀಂಕ ದೊಗ್ಗ ಲೋಕ ಚರ್ಡುಂವ. ಮ್ಹಾಲಗಡೆಂ ಶ್ರೀ ಸಂತೋಷ ಭಟ್. ಬೆಂಗಳೂರಾಚೆ ಟಿಸಿ‌ಎಸ್ ಹಾಂಗಾ ಕಾಮ ಕರ್‍ತಾ ಆಸ್ಸತಿ. ದುಸರೆ ಚಾಲ್ಲೊ ಶ್ರೀ ಸತ್ಯನಾಥ ಭಟ್. ಹಾನ್ನಿ ಕಂಪ್ಯೂಟರ್ ಇಂಜಿನಿಯರಾಂತು ಬೆಂಗಳೂರಾಚೆ ಇಂಡಿಯನ್ ಇನ್ಸ್‌ಸ್ಟಿಟ್ಯೂಟ್ ಆಫ್ ಸೈನ್ಸ ಹಾಂಗಾ ಪಿ.ಎಚ್.ಡಿ. ಡಿಗ್ರಿ ಕರತಾ ಆಸ್ಸತಿ ಆನಿ ಹಾನ್ನಿ ಕಂಪ್ಯೂಟರ್ ಸೈನ್ಸಾಂತು ೪ಚೆ ರ್‍ಯಾಂಕ್ ಘೆತಲೇರಿ, ಆಲ್ ಇಂಡಿಯಾ ಲೆವೆಲ್ಲಾಂತು ಚಲೀಲೆ ಸೂಪರ್ ಕಂಪ್ಯೂಟರ್ ವಿಷಯಾಂತು ೧೧ ರ್‍ಯಾಂಕ್ ಘೆತಲ್ಯಾ.
ಶ್ರೀ ಕೆ. ಜನಾರ್ಧನ ಭಟ ಮಾಮು ಆಪಣಾಲೆ ೨೦ ವರ್ಷ ವಯಾಂತು ಸಿಂಡಿಕೇಟ್ ಬ್ಯಾಂಕಾಕ ಕಾಮ್ಮಾಕ ಸೇರ್‍ವಲೀಂತಿ. ಆನಿ ೩೦-೪-೨೦೦೧ ಪರ್ಯಂತ   ಕರ್ನಾಟಕ, ಆಂಧ್ರಪ್ರದೇಶ, ಗುಜರಾತ ಆನಿ ಉತ್ತರ ಪ್ರದೇಶಾಂತು ಅಖಂಡ ೨೨ ವರ್ಷ ಮ್ಯಾನೇಜರ್ ಜಾವ್ನು ಸೇವಾ ಪಾವೋವ್ನು ದಿನಾಂಕ. ೩೦-೪-೨೦೦೧ಕ ವಾಲಂಟರಿ ಜಾವ್ನು ಉ‌ಔ‌ಐ‌ಆ‌ಇ‌ಓ ಊಂಓ‌ಆ Sಊಂಏ‌ಇ  ಸಮೇತ ನಿವೃತ್ತ ಜಾಲ್ಲಿಂತಿ. ಆನಿ ಉಪರಾಂತ ಮೈಸೂರಾಂತು ಸ್ಥಾಯಿ ಜಾವ್ನು ರಾಬಲೀಂತಿ.
ಶ್ರೀ ಭಟ್‌ಮಾಮ್ಮಾಲೆ ಚರ್ಡಪಣಾಂತು ತಾಂಗೇಲೆ ಆವಯೀನ ಭಗವದ್‌ಗೀತಾ ವಾಚ್ಚೇಕ ತಾಂಕಾ ಉತ್ತೇಜನ ದಿಲೀಲೆ. ತಾಜ್ಜೇನ ತಾಂಕಾ ಆಧ್ಯಾತ್ಮಿಕ ಗೋಡಿ ಆಸ್ಸ ಜಾಲ್ಲೆ. ತಾನ್ನಿ ಕೋಟೇಶ್ವರ ಶ್ರೀ ಪಟ್ಟಾಭಿ ರಾಮಚಂದ್ರ ಭಜನಾ ಮಂಡಳಿಚೆ ಸಕ್ರೀಯ ಸದಸ್ಯ ಜಾವ್ನು ಸಬಾರ ವರ್ಷಾ ದಾಕೂನು ಭಗವದ್ ಸೇವಾ ಕರತಾ ಆಸ್ಸತಿ.
ನಿವೃತ್ತಿ ನಂತರ ಹಾನ್ನಿ ವಿಂಚೂನು ಘೆತ್ತಿಲೆ ಸೇವಾ ಕ್ಷೇತ್ರ. ಸಮಾಜಾಕ, ಸನಾತನ ಧರ್ಮಾಕ ಆನಿ ಆಮಗೇಲೆ ದೇಶಾಕ ಸೇವಾ ಪಾವಯ್ಚೆ ಉದ್ದೇಶು ಹಾಂಗೇಲೆ ಜಾವ್ನಾಶ್ಶಿಲೆಂ. ತಾನ್ನಿ ಸಂತ ಭದ್ರಗಿರಿ ಅಚ್ಯುತ್ ದಾಸಜಿ ಒಟ್ಟು ಸಾಡಿ ಆಠ ಮೈನೋ ವಿಂಗ ವಿಂಗಡ ಗಾಂವಾಂತು ಘಡೀಲೆ ಹರಿಕಥಾ ಕಾಲಕ್ಷೇಪಾಂತು ವಾಂಟೊ ಘೇವ್ನು ಶ್ರೀಮದ್ ಭಾಗವತಾಚೆ ಪರಿಚಯ ಕೋರ್ನು ದಿಲ್ಲ್ಯಾ.  ಮಾಗಿರಿ ಹಾನ್ನಿ ‘ರಿಯಲ್ ಎಸ್ಟೇಟ್ ಬಿಜಿನೆಸ್ ಸುರುವಾತ ಕೆಲ್ಲೆ. ತಾಜ್ಜ ಒಟ್ಟೂ ಸಮಾಜಾಕ ಆನಿ ಗರೀಬಾಂಕ ಸೇವಾ ಪಾವಯ್ಕಾ ಮ್ಹಣಚೆ ನಿರ್ಣಯ ಕೆಲ್ಲೆ. ಹಾಂಗೆಲೆ ಠರಾವಾಕ ಹಾಂಗೆಲೆ ಬಾಯ್ಲ, ಚರ್ಡುವಾನಿ ಸಂತೋಷಾನ ಸಹಮತ ವ್ಯಕ್ತ ಕೆಲ್ಲೆ.
ಹಾನ್ನಿ ಇನ್‌ಕಂ ಟ್ಯಾಕ್ಸ್ ಆನಿ ಸರ್ವೀಸ್ ಟ್ಯಾಕ್ಸ್ ದಿಲ್ಲ ಉಪರಾಂತ ಆಪಣಾಲೆ ಉತ್ಪನ್ನಾಚೆ ಅರ್ಧ ವಾಂಟೊ ಮ್ಹಳಯಾರಿ ಪನ್ನಾಸ ಪರ್ಸೆಂಟ್ ದಾನ-ಧರ್ಮಾಕ ಕಾಣು ದವರ್‍ಕಾ ಮ್ಹೊಣು ಠರಾವ ಕೆಲ್ಲೆ. ಆನಿ ಘೆಲೇಲೆ ಸಬಾರ ವರ್ಷಾಚಾನ ೧೫ % ಶ್ರೀ ಕಾಶೀಮಠಾಕ ಆನಿ ೧೫ % ಪ್ರತಿ ದಿವಸು ೧೪ ಲಾಕ್ ಇಸ್ಕೂಲಾ ಚರ್ಡುವಾಂಕ ಧೋಂಪಾರಾಚೆ ಜವಣ ದಿವಚೆ ಬೆಂಗಳೂರಾಚೆ ಅಕ್ಷಯ ಪಾತ್ರಾ ಫೌಂಡೇಶನ್ನಾಕ ನಿಯಮಿತ ಜಾವ್ನು ಪಾವೈತಾ ಆಸ್ಸಂತಿ.  ಹಾನ್ನಿ ಪ್ರಮುಖ ಜಾವ್ನು ವ್ಹಡ ಪ್ರಮಾಣಾರಿ ವಿಂಗವಿಂಗಡ ದೇವಳ, ಸಮಾಜಾಕ ದಿಲೇಲೆ ದಾನಾಚೆ ವಿವರ ಅಶ್ಶಿ ಆಸ್ಸ. ೧. ಪ್ರಯಾಗಾಂತು ನವೀನ ಜಾವ್ನು ಬಾಂತಾ ಆಶ್ಶಿಲೆಂ ಶ್ರೀ ಕಾಶೀಮಠಾಕ ರೂ. ೫೬ ಲಾಕ್ ರೂಪಯ. ೨. ಹುಬ್ಬಳ್ಳಿ ಕಾಶಿಮಠಾಚೆ ವಿಗ್ರಹ, ಆಭರಣ, ಪ್ರಭಾವಳಿ ಆನಿ ಗೋಪುರ ಖಾತ್ತಿರಿ ಸುಮಾರ ರೂ. ೨೩ ಲಾಕ್. ೩. ಕೋಟಾ ಕಾಶೀಮಠಾಚೆ ಗೋಪುರಾಕ ೧೫ ಲಾಕ್ ರೂಪಯ. ೪. ಮಂಗಳೂರಾಂತು ಚಲೀಲೆ ಶ್ರೀ ಕಾಶಿಮಠಾಚೆ ಪರಿಹಾರ ಉತ್ಸವಾಕ ೧೫ ಲಾಕ್ ರೂಪಯ. ೫. ಶ್ರೀ ಮಠಾಚೆ ರುಪ್ಪೆ ಪೂಜಾ ವಸ್ತುಂಕ ಜಾವ್ನು ೧೩.೫ ಲಾಕ್ ರೂಪಯ. (ಹಾಂತು ವಜ್ರ ಲೇಪಿತ ವಸ್ತು ಆಸ್ಸ.) ೬. ಹರಿದ್ವಾರಾಂತು ಬಾಂಚಾಕ ಠರಾಯಲೆ ವ್ಯಾಸ ಘಾಟಾಕ ೧೦ ಲಾಕ್ ರೂಪಯ ಆನಿ ಸ್ಮೃತಿ ಭವನಾಕ ೫ ಲಾಕ್ ರೂಪಯ, ಒಟ್ಟು ೧೫ ಲಾಕ್ ರೂಪಯ. ೭. ವಾರಣಾಸಿಚೆ ಶ್ರೀ ಕಾಶಿಮಠಾಚೆ ಪುನರ್ ಪ್ರತಿಷ್ಠೆಕ ೮ ಲಾಕ್ ರೂಪಯ. ೮ ಕಲ್ಕತ್ತಾಚೆ ಶ್ರೀ ಕಾಶೀಮಠಾಚೆ ಆಸ್ತಿಚೆ ರಿಜಿಸ್ಟ್ರೇಷನ್ ಆನಿ ರಿಪೇರಿಕ ೧೧.೫ ಲಾಕ್ ರೂಪಯ. ೯. ಉಡುಪಿ, ಮಂಗಳೂರು, ಶಿವಮೊಗ್ಗ ಜಿಲ್ಲ್ಯಾಂತು ಪುಕ್ಕಟ ಜಾವ್ನು ವಾಂಟಿಲೆ ‘ನಮನ ಪುಸ್ತಕಾಚೆ ಪ್ರಕಟಣೆ ಖಾತ್ತಿರಿ ೫ ಲಾಕ್ ರೂಪಯ. ೧೦. ಬಸರೂರು, ಕಾರ್ಕಳಾಚೆ ಬಾಲಕಾಶ್ರಮಾಕ ಆನಿ ನಿಗಮಾಗಮ ಪಾಠಶಾಳಾ ಮಂಗಳೂರು ಹಾಂಗಾಕ ೨.೫ ಲಾಕ್ ರೂಪಯ. ೧೧. ಹೆಮ್ಮಾಡಿ ಶ್ರೀ ಕಾಶೀಮಠಾಕ ೧.೫೦  ಲಾಕ್ ರೂಪಯ. ೧೨. ವಾಲ್ಕೇಶ್ವರ ಕಾಶಿಮಠಾಚೆ ನವೀಕರಣ ಆನಿ ಶಾಶ್ವತ ಪೂಜೆ ಖಾತ್ತಿರಿ ೩.೫೦ ಲಾಕ್ ರೂಪಯ. ೧೩. ಪ|ಪೂ| ಶ್ರೀಮದ್ ವಿಜಯೇಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಬೃಂದಾವನಾಕ ಘೆಲೇಲೆ ಚಾರ ವರ್ಷಾಚಾನ ಪಂಚಾಮೃತಾಭಿಷೇಕ ಕೊರಚಾಕ ೧.೨೫ ಲಾಕ್ ರೂಪಯ ಆನಿ ೧೪. ತಾನ್ನಿ ಶ್ರೀಮಠಾಕ ದಿಲೇಲೆ ದೇಣಿಗೆಚೆ ಒಟ್ಟು ಮೌಲ್ಯ ಸುಮಾರ ೧.೯೦ ಕೋಟಿ ಪಶಿ ಚ್ಹಡ. ತಶ್ಶಿಚಿ ಶೃಂಗೇರಿ, ಶಿರಿಯಾರ, ವಾಸಿ, ಮುಂಡ್ಕೂರ, ಕೋಟೇಶ್ವರ, ಮಲ್ಪೆ, ಸೌಡಾ ಇತ್ಯಾದಿ ಗೌಡ ಸಾರಸ್ವತ ಬ್ರಾಹ್ಮಣ ದೇವಳಾಕ ೦.೩೫ ಕೋಟಿ ರೂಪಯ ಪಶೀ ಚ್ಹಡ ದೇಣಿಗಾ ತಾನ್ನಿ ದಿಲ್ಲಯಾ. ತಶ್ಶೀಚಿ ಶ್ರೀ ಚಾಮುಂಡೇಶ್ವರಿ ದೇವಳ ಮೈಸೂರು ಆನಿ ಮೈಸೂರಾಚೆ ರಾಮಕೃಷ್ಣಾಶ್ರಮಾಕ ತಾನ್ನಿ ಬರಪೂರ ದೇಣಿಗಾ ದಿಲ್ಲ್ಯಾ.  ಹಾನ್ನಿ ಹೇ ಪರ್ಯಂತ ಇಸ್ಕಾನಾಚಾಲೆ Akshaya patra Foundation Food delivery vehicles ಖಾತ್ತಿರಿ ಸುಮಾರ ೧.೧೫ ಕೋಟಿ ರೂಪಯ ಮೌಲ್ಯಾಚೆ  ೧೨ ವೆಹಿಕಲ್ಸ್ ದಿಲ್ಲಾ. ತ್ಯಾ ನ್ಹಂಹಿತಾ ೨ ಸ್ಕೂಟರ್ ಆನಿ ೨ ಪ್ರೊಜಕ್ಟರ್ ಪ್ರತ್ಯೇಕ ಜಾವ್ನು ದಿಲ್ಲಯಾ. ಆನಿ ರೂ. ೫ಲಾಕ್ ಮೌಲ್ಯಾಚೆ ೩ ಫೀಟ್ ಎತ್ರಾಚೆ ಶ್ರೀ ಕೃಷ್ಣ ಬಲರಾಮ ಮೂರ್ತಿ(ಪ್ರತಿಷ್ಠಾಪನ ಜಾಲ್ಲ್ಯಾ), ಆನ್ನೇಕ ೧೦ ಲಾಕ್ ರೂಪ್ಪಯಾಚೆ ೮ ಫೀಟ್ ರೂಂದಾಯಿ ಆನಿ ೪ ಫೀಟ್ ಲಾಂಬಾಯಿ ಆಸ್ಸುಚೆ ಶ್ರೀ ಪದ್ಮನಾಭ ಮೂರ್ತಿಚೆ ಪ್ರಾಯೋಜಕತ್ವ ಕೆಲ್ಲಯಾ.
ಹೇ ಪೂರಾ ಪಟ್ಟಿ ಇತ್ಲೆ ವಿವರ ಜಾವ್ನು ದಿವಚಾಕ ಕಾರಣ ಮ್ಹಳಯಾರಿ ತಾಂಗೇಲೆ ಸೇವೆಚೆ ಅಗಾಧತಾ ಸರ್ವ ಲೋಕಾಂಗೆಲೆ ಮನಾಕ ವಚ್ಕಾ ಆನಿ ತ್ಯಾ ವಾಟ್ಟೇರಿ ವಿಂಗಡ ಲೋಕಾನಿ ಮುಖಾರೂನು ಹರಿ-ಗುರು ಸೇವಾ ಪಾವಯ್ಕಾ ಮ್ಹಣಚೆ ಮೆಗೇಲೆ ಪ್ರಾರ್ಥನಾ. 
 ಶ್ರೀ ಭಟ್ ಮಾಮ್ಮಾಕ ಆರ್ತಾಂತು ಶ್ರೀ ಕಾಶೀ ಮಠಾಚೆ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾನ ಪೆಟೇಯಿಲೆ ರಾಯಸ ಪತ್ರಾಂತು ಮುಂಬೈಚೆ SADGURU  SUDHINDRA EDUCATIONAL CHARITABLE TRUST,c/o Dahisar Kashimath, ಹಾಕ್ಕಾ ಟ್ರಸ್ಟಿ ಜಾವ್ನು ನೇಮಣೂಕಿ ಕೋರ್ನು ಪುರಸ್ಕಾರ ಕೆಲ್ಲಿಯಾ. ತಶ್ಶಿಚಿ ವಿಂಗ ವಿಂಗಡ ಗಾಂವಾಂತು ಹಾಂಕಾ ಜಿ.ಎಸ್.ಬಿ. ಆನಿ ವಿಂಗಡ ಸಮಾಜಾ ತರಪೇನ ಬರಪೂರ ಹಾರ್ದಿಕ ಸನ್ಮಾನು ಚಲ್ಲಾ. ತೀರ್ಥಹಳ್ಳಿ ಜಿ.ಎಸ್.ಬಿ. ಸಮಾಜಾಚೆ ದೊನ್ನಿ ವರ್ಷಾಚೆ ಪ್ರತಿಷ್ಠಿತ  “ಶ್ರೀ ಲಕ್ಷ್ಮೀ ವೆಂಕಟರಮಣ ಪುರಸ್ಕಾರ ಅವುಂದು ಶ್ರೀ ಕೆ. ಜನಾರ್ಧನ ಭಟ್ಟ ಮಾಮ್ಮಾಂಕ ಪಾವಿತ ಜಾಲ್ಯಾ. ಹೇ ಪುರಸ್ಕಾರ ಪಯಲೆ ವರ್ಷ ಬೆಂಗಳೂರ್‍ಚೆ ಡಾ|| ದಯಾನಂದ ಪೈ ಮಾಮ್ಮಾಕ ಪಾವಿತ ಜಾಲೇಲೆ ಹಾಂಗಾ ಯಾದು ಕೋರ್ನು ಘೆವ್ಯೇತ. 
ಹಾನ್ನಿ ಇಸ್ಕಾನಾಚಾಲೆ “ಅಕ್ಷಯಪಾತ್ರೆ ಯೋಜನೇಕ ದಿಲೇಲೆ ಆರ್ಥಿಕ ಮದ್ದತ್ತಾ ಫಲ ಖಂಡಿತ ದೇಶಾಚೆ ಅತ್ಯಂತ ದುರ್ಬಲ  ಲೋಕಾಂಕ ವಚ್ಚುನು ಪಾವಚಾಂತು ಖಂಚೆ ಅನುಮಾನ ನಾ. ಪರಮಾತ್ಮಾನ ಸಾಂಗಚೆ ತ್ಯಾಂಚಿ ನ್ಹಂಹಿವೇ? ಸಮಾಜಾಚೆ ದುರ್ಬಲ ಲೋಕಾಂಕ ಫಲಾಫೇಕ್ಷ ನಾಶಿ ಕೋಣ ಸಹಾಯು ಕರತಾತಿಕಿ ತಾನ್ನಿ ಆಪಣಾಲೆ ಆಪ್ತ ಮ್ಹೊಣು! ತಾನ್ನಿ ಸರಕಾರಾಚೆ ಕಾರ್ಯಕ್ರಮಾಂತು ಹಾತು ಮೆಳೋವನು ತಾಜ್ಜ ಯಶಾಕ ಘೊಳ್ತಾ ಆಸ್ಸತಿ.  ಆಪಣಾಲೆ ಹೇ ಸರ್ವ ಅಭಿವೃದ್ಧಿಕ ಶ್ರೀ ಕಾಶೀಮಠಾಧೀಶ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯ ಆಶೀರ್ವಾದೂಚಿ ಕಾರಣ ಮ್ಹೊಣು ವಿನಮ್ರ ಜಾವ್ನು ಸಾಂಗಚೆ ಶ್ರೀ ಭಟ್ಟ ಮಾಮ್ಮಾನ ಆಪಣಾಲೆ ಹೇ ಕಾರ್ಯಾನಿ ದುಸ್ರೆ ಲೋಕ ಪ್ರೇರಪಣ ಪಾವ್ನು ಸನಾತನ ಧರ್ಮ, ಸಮಾಜ ರಕ್ಷಣೆಕ ಮುಖಾರ ಯವ್ಚೆ ತಶ್ಶಿ ಜಾವ್ಕಾ ಮ್ಹೊಣು ಅಪೇಕ್ಷ ಕರತಾತಿ.
“ಪೂರ್ತಿ ಭರಲೀಲೊ ಕೊಳಸೊ ತೊಳಕನಾ ಮ್ಹಣಚೆ ಆದ್ಗತಿ ಪ್ರಮಾಣೆ ಸರಳತಾ, ನಮ್ರತ ವಾಡ್ಡೋವನು ಘೇವ್ನು ಮಹಾ ಸಾಗರಾ ವರಿ ಶಾಂತ ಆಸ್ಸುಚೆ ಶ್ರೀ ಕೆ. ಜನಾರ್ಧನ ಭಟ್ಟ ಮಾಮು ಕೆದ್ನಾಯಿ ಕೀರ್ತಿ ಪ್ರತಿಷ್ಠೆ ಜಾವ್ಕಾ ಮ್ಹೊಣು ಆಸೆ ಪಾವ್ವಿಲೆ ನ್ಹಂಹಿ. ಸರ್ವ ಹಿಂದೂ ಧರ್ಮ ಗ್ರಂಥಾಂತು ಸಾಂಗಿಲ್ವರಿ ಹೇ ಸೂರ್ಯ, ಚಂದ್ರ, ರೂಖು, ಜಾಡ, ನ್ಹಂಹಿ, ಸಮುದ್ರ ಖಂಚೇಯಿ ಫಲಾಫೇಕ್ಷೆ ನಾಶಿ ದುಸರ್‍ಯಾಲೆ ಬರೇಪಣಾ ಖಾತ್ತಿರಿ  ಕಶ್ಶಿ ಜೊಡ್ತಾ ಆಸ್ಸಕಿ, ಶ್ರೀ ಭಟ್ಟ ಮಾಮು ತಶ್ಶೀಚಿ ಆಪಣಾನ ಕೊರಚೆ ದಾನ, ಸೇವೆಕ ಖಂಚೇಯಿ ಅಪೇಕ್ಷಾ ದವರೂನು ಘೇನಾಶಿ ನಿರಂತರ ಜಾವ್ನು ಕರತಾ ಆಸ್ಸತಿ. ಹೇಂ ಸರ್ವ ಗುಣಾಂತು ಶ್ರೇಷ್ಠ ಗೂಣ ಮ್ಹಣೋವ್ನು ಘೆತ್ತಾ. ಶ್ರೀ ಕೆ. ಜನಾರ್ಧನ ಭಟ್ಟ ಮಾಮು ಸರಸ್ವತಿ ಪ್ರಭಾಕ ವಿಶೇಷ ಸಹಕಾರ ದಿವಚಾಕ ಮುಖಾರಿ ಆಯ್ಯಿಲೆ ಹಾಂವ ನಂಬ್ಗಿಲೀಲೆ ಪರಮಾತ್ಮಾಲೆ ದಿವ್ಯ ಕೃಪೆ ಮ್ಹೊಣು ಸಮಜಿತಾ. ಆನಿ ತಾಂಕಾ ಹೇ ಮೂಖಾಂತರ ಆಬಾರ ವ್ಯಕ್ತ ಕರತಾ ಆಸ್ಸ. ಮುಖಾರ್‍ಚೆ ದಿವಸಾಂತು ಶ್ರೀ ಭಟ್ ಮಾಮ್ಮಾಲೆ ಸೇವಾ ಸರ್ವ ಮನುಕುಲಾಕ ಪಾವೋ, ತಾಂಕಾ ದೇವು ಬರೆಂ ಕೊರೊಂ ಮ್ಹೊಣು ಆಶಯ ಕರ್ತಾ.   - ಆರ್‍ಗೋಡು ಸುರೇಶ ಶೆಣೈ.

ಸರಸ್ವತಿ ಪ್ರಭಾ 15-10-2012 ಸಂಚಿಕಾ ಪೂರಾ ಲೋಕಾಂಕ ಬಟವಾಡೆ ಜಾಲ್ಯಾ.

ತಾಂತುಲೆ ವಿಶೇಷ ಮ್ಹಳಯಾರಿ

1. ನವರಾತ್ರಿ ಪರಭೆ ಖಾತ್ತಿರಿ ವಿಶೇಷ ಲೇಖು.

2. ಮೈಸೂರು ಶ್ರೀ ಕೆ. ಜನಾರ್ಧನ ಭಟ್ ಮಾಮ್ಮಾ ಖಾತ್ತಿರಿ ಪರಿಚಯಾತ್ಮಕ ಲೇಖು.

3. ಮೈನ್ಯಾ ಕಾಣಿಂತು ಪತ್ತೇದಾರಿ ಕಾಣಿ ``ದಾವ್ನು ಘೆಲ್ಲಿಂತಿ''

4. ಖಂಚೆ ದೇವಾಕ ಖಂಚೆ ಫೂಲ? 

5. ಹೃದಯಾಘಾತಾ ಖಾತ್ತಿರಿ ಮಾಹಿತಿ.

6. ಶ್ರೀ ನಾಗೇಶ ಅಣ್ವೇಕರ ಹಾಂಗೆಲೆ ದಶಾವತಾರ ಮಾಲಿಕೇಂತು ಕೂರ್ಮಾವತಾರ.

7. ರಾಜ್ಯಾಚೆ ವಿಂಗ ವಿಂಗಡ ಬಗಲ್ಯಾ ದಾಕೂನು ಸರ್ವ ಸಮಾಜಾಚೆ ಸುದ್ಧಿ-ಸಮಾಚಾರ ತುಮಗೇಲೆ ಅಭಿಮಾನಾಚೆ ``ಸರಸ್ವತಿ ಪ್ರಭಾ'' ಅಕ್ಟೋಬರ್ 2012 ಸಂಚಿಕೆಂತು.

ಆಜೀಚಿ ವಾಜ್ಜೂನು ಅಭಿಪ್ರಾಯು ಸಾಂಗಾ.