ಶ್ರೀ ದುರ್ಗಾ ಹೊನ್ನಮ್ಮ ದೇವಳ, ಸಿದ್ದಾಪೂರ

ಸಿದ್ದಾಪೂರ್‍ಚೆ ತೊಗ್ಗೂ ಪೇಂಟಾಚೆ ಶ್ರೀ ದುಗಾ ಹೊನ್ನಮ್ಮ ದೇವಿಲೆ ಮೂಲಸ್ಥಾನಾಂತು ಪ್ರತಿಷ್ಠಾ ವರ್ಧಂತ್ಯುತ್ಸವು ತಾ. ೩-೪-೧೪ ಆನಿ ೪-೪-೨೦೧೪ ದಿವಸು ಪ್ರಾರ್ಥನ, ಕಲಾಸಾನಿಧ್ಯ ಹವನ, ಶತಕಲಶಾಭಿಷೇಕ, ಮಂಗಲನಿರೀಕ್ಷಣ, ಪಟ್ಟಕಾಣಿಕಾ, ಮಹಾಮಂಗಳಾರ್ತಿ, ದರ್ಶನ ಸೇವಾ, ಮಹಾಸಂತರ್ಪಣ, ಪೇಂಟಾಚೆ ಪಾಲಂಖೀ ಉತ್ಸವು, ವಸಂತ ಪೂಜಾ , ಫುಲ್ಲಾ ಪೂಜಾ, ಅನ್ನ ಸಂತರ್ಪಣ, ಉದಯಾಸ್ತಮಾನ ಸೇವಾ, ಕುಂಕುಮಾರ್ಚನ, ಜಟ್ಟಿಗೇಶ್ವರಾಕ ನಾರ್‍ಲು-ಗೋಡ ಅರ್ಪಣ ಇತ್ಯಾದಿ ಧಾರ್ಮಿಕ ಕಾರ್ಯಾವಳಿ ಬರಶಿ ವಿಜೃಂಭಣೇರಿ ಚಲ್ಲೆ. ಹೇ ದೇವಳಾಂತು ಪ್ರತಿ ಮೈನೋ ಪಯ್ಲೆ ಭುಧ್ವಾರ ದರ್ಶನ ಸೇವಾ ಆಸ್ತಾ. ಚಡ್ತೆ ಮಾಹಿತಿ ಖಾತ್ತಿರಿ ದೇವುಳಾಚೆ ಕಮಿಟಿ ಅಧ್ಯಕ್ಷ ಶ್ರೀ ಸುಧೀರ್ ಜೆ. ನಾಯಕ್ (ಪೋನ್ : ೦೯೫೯೪೨೯೧೯೩೯) ಜಾಂವೊ ಕಾರ್ಯದರ್ಶಿ ಶ್ರೀ ಬಾಲರಾಜ ನಾಯಕ್ (ಪೋನ್ : ೦೯೦೨೯೩೪೮೩೨೮) ಹಾಂಕಾ ಸಂಪರ್ಕು ಕೊರಯೇತ.

ಶ್ರೀ ಚೌಡೇಶ್ವರಿ ಮಹಾಲಸಾ ದೇವುಳ, ಕಾರ್ಗಲ್

ಸಾಗರ ತಾ||ಚೆ ಪ್ರಸಿದ್ಧ ಕಾರ್ಗಲ್ ಶ್ರೀ ಚೌಡೇಶ್ವರಿ ಮಹಾಲಸಾ ದೇವುಳಾಚೆ ೧೬ಚೆ ವರ್ಧಂತಿ ಉತ್ಸವು ಆನಿ ರಥೋತ್ಸವು ತಾ. ೧೭-೩-೨೦೧೪ ಥಾಕೂನು ೧೯-೩-೨೦೧೪ ಪರ್ಯಂತ ವಿಜೃಂಭಣೇರಿ ಚಲೇಲೆ ಖಬ್ಬರ ಮೆಳ್ಳಾ. ತತ್ಸಂಬಂಧ ಮಾರ್ಚ್ ೧೭ಕ ಶ್ರೀ ದೇವತಾ ಪ್ರಾರ್ಥನಾ, ಸರ್ವಾಲಂಕಾರ ಪೂಜನ, ಮಹಾ ಅನ್ನ ಸಂತರ್ಪಣ, ಪ|ಪೂ|ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾಂಕ ಪೂರ್ಣಕುಂಭ ಸ್ವಾಗತ, ಶ್ರೀ ಮಾರುತಿ ರಂಗಮಂದಿರಾಂತು ಶಾಳಾ ಚೆರ್ಡುವಾಂಕ ಪ್ರತಿಭಾ ಪುರಸ್ಕಾರ, ಶ್ರೀ ಮಾರುತಿ ಪ್ರತಾಪ ಯಕ್ಷಗಾನ ಪ್ರದರ್ಶನ ಚಲ್ಲೆ. ಮಾರ್ಚ್ ೧೮ಕ ಸಾಮೂಹಿಕ ಗಣೋಮು, ಮಹಾ ಅನ್ನ ಸಂತರ್ಪಣ, ರಥೋತ್ಸವು, ಪ|ಪೂ|ಸ್ವಾಮ್ಯಾಂಗೆಲೆ ಪಾದ್ಯ ಪೂಜಾ, ಆನಿ ಸ್ವಾಮ್ಯಾಂಗೆಲೆ ಪಾದ್ಯಪೂಜಾ ಆನಿ ಸ್ವಾಮ್ಯಾ ಥಾಕೂನು ಆಶೀರ್ವಚನ, ರೂಪಕಲಾ ತಂಡ, ಕುಂದಾಪುರ ಹಾಜ್ಜೆ ಸದಸ್ಯ ಥಾಕೂನು ನಾಟಕ ಇತ್ಯಾದಿ ಕಾರ್ಯಕ್ರಮ ಚಲ್ಲೆ. ಕಡೇರ್‍ಚೆ ದಿವಸು ಮಾರ್ಚ್ ೧೯ಕ ನವಚಂಡಿ ಹವನ, ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜನ, ಸರ್ವಾಲಂಕಾರ ಪೂಜನ, ಮಹಾ ಅನ್ನಸಂತರ್ಪಣ, ಚರ್ಡುಂವಾಲೆ ಕೃಷ್ಣವೇಷ ಪ್ರದರ್ಶನ, ನೃತ್ಯಸಂಜೆ ಇತ್ಯಾದಿ ಕಾರ್ಯಕ್ರಮ ಚಲೇಲೆ ಖಬ್ಬರ ಮೆಳ್ಳಾ. ಹೇ ದೇವ್ಳಾ ಖಾತ್ತಿರಿ ಖಂಚೇ ಮಾಹಿತಿ ಜಾವ್ಕಾ ಜಾಲ್ಯಾರಿ ಪೋನ್ ನಂ. ೯೪೪೮೧೨೪೩೫೭ ಹಾಂಕಾ ಸಂಪರ್ಕು ಕೊರಯೇತ.

ಶ್ರೀ ಶಾಂತಿಕಾ ಪರಮೇಶ್ವರಿ ದೇವಳ, ಕುಮಟಾ

ಕುಮಟಾಚೆ ಶಾಂತಿಕಾ ಪರಮೇಶ್ವರಿ ದೇವಳಾಚೆ ಸಹಸ್ರಚಂಡಿ ಮಹಾಯಾಗಾಚೆ ಸಾಂಗತ್ಯ ಪ್ರತಿಷ್ಠಾವರ್ಧಂತಿ ತಾ. ೪-೩-೧೪ ಥಾಕೂನು ೯-೩-೧೪ ಪರ್ಯಂತ ಎಡನೀರು ಮಠಾಚೆ ಶ್ರೀ ಶ್ರೀ ಕೇಶವಾನಂದ ಭಾರತಿ ಸ್ವಾಮೀಜಿ ಹಾಂಗೆಲೆ ಉಪಸ್ಥಿತಿ ಆನಿ ಮಾರ್ಗದರ್ಶನಾರಿ ವಿಜೃಂಭಣೇರಿ ಚಲ್ಲೆ. ತತ್ಸಂಬಂಧ ವರ್ಧಂತಿ ಉತ್ಸವು, ಸಹಸ್ರಚಂಡಿ ಮಹಾಯಾಗ, ಶ್ರೀ ಸತ್ಯನಾರಾಯಣ ವೃತಾಚರಣ, ರುಪ್ಪೆಚೆ ಫುಲ್ಲಾ ರಥಾಂತು ಶ್ರೀ ದೇವಿಲೆ ನಗರೋತ್ಸವು, ಪುಕ್ಕಟ ಆಯುರ್ವೇದ ಆರೋಗ್ಯ ತಪಾಸಣಾ ಶಿಬಿರ, ವಿವಿಧ ನೃತ್ಯ, ನಾಟಕ, ಗಾನ, ಭಕ್ತಿಸುಧಾ, ಉಪನ್ಯಾಸ, ಯಕ್ಷಗಾನ ಪ್ರದರ್ಶನ  ಇತ್ಯಾದಿ ಸಾಂಸ್ಕೃತಿಕ ಕಾರ್ಯಕ್ರಮು, ಉಪನ್ಯಾಸ ಇತ್ಯಾದಿ ಚಲೇಲೆ ಖಬ್ಬರ ಮೆಳ್ಳಾ.

ಶ್ರೀ ಮಹಾಲಕ್ಮೀ ರವಳನಾಥ ದೇವುಳ, ಹಿರೇಗುತಿ

ಕುಮಟಾ ತಾ|| ಹಿರೇಗುತ್ತಿ ಶ್ರೀ ಮಹಾಲಕ್ಷ್ಮೀ ರವಳನಾಥ ದೇವಾಲೆ ೩೫ಚೆ ಪ್ರತಿಷ್ಠಾ ವರ್ಧಂತಿ ಉತ್ಸವು ತಾ. ೧೮-೩-೨೦೧೪ ದಿವಸು ಪ್ರಾರ್ಥನ, ಲಘುರುದ್ರ ಹವನ, ಶಿಯಾಳ- ಪಂಚಾಮೃತಾಭಿಷೇಕ, ಕುಂಕುಮಾರ್ಚನ, ಮಹಾ ಮಂಗಳಾರ್ತಿ, ಮಹಾ ಸಂತರ್ಪಣ , ಹರಿನಾಮ ಸಂಕೀರ್ತನ, ಪಾಲಂಖೀ ಉತ್ಸವು, ದರ್ಶನ ಮುಖೇನ ಪ್ರಸಾದ ವಿತರಣ, ಮಹಾ ಸಭಾ ಇತ್ಯಾದಿ ಕಾರ್ಯಕ್ರಮ ಬರಶಿ ವಿಜೃಂಭಣೇರಿ ಚಲ್ಲೆ.
ಮುಖಾರಿ ತಾ. ೨೨-೪-೧೪ಕ ಶ್ರೀ ಗರುಡ ಆರೋಹಣ, ೨೩-೪-೧೪ಕ ಶ್ರೀ ದೇವಾಲೆ ಬ್ರಹ್ಮರಥೋತ್ಸವು, ೨೪-೪-೧೪ಕ ಅವಭೃತೋತ್ಸವು ಚೊಲ್ಚೆ ಆಸ್ಸುನು ಭಕ್ತ ಬಾಂಧವಾನಿ ಚಡ್ತೆ ಸಂಖ್ಯಾರಿ ತನು-ಮನ-ಧನಾನಿ ವಾಂಟೊ ಘೇವ್ಕಾ ಮ್ಹೊಣು ದೇವುಳ ತರಪೇನ ವಿನಂತಿ ಆಸ್ಸ. ಹೇ ದೇವುಳಾಂತು ಚೊಲ್ಚೆ ಸೇವೆ ಇನ್ನಿತರ ಖಂಚೇ ಮಾಹಿತಿ ಜಾವ್ಕಾ ಜಾಲೇಲ್ಯಾನ ಪೋನ್ ೯೭೪೧೬೪೪೯೩೭ ಹಾಂಗಾಕ ಸಂಪರ್ಕು ಕೊರಯೇತ.

ಶ್ರೀ ಮಹಾಲಸಾ ದೇವುಳ, ಮಾದನಗೇರಿ

ಪ|ಪೂ|ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾಂಗೆಲೆ ದಾಕೂನು ಪುನರ್ ಪ್ರತಿಷ್ಠಾ ಜಾಲೇಲೆ ಮಾದನಗೇರಿಚೆ ಶ್ರೀ ಮಹಾಲಸಾ ಸಿದ್ಧಿವಿನಾಯಕ ದೇವಾಲೆ ವರ್ಧಂತಿ ಉತ್ಸವು ತಾ. ೨೧-೩-೨೦೧೪ ದಿವಸು ಪ್ರಾರ್ಥನ, ಶ್ರೀ ಮಹಾಲಸಾ ದೇವಾಕ ಶತಕಲಶಾಭಿಷೇಕ,ಶ್ರೀ ಸಿದ್ದಿವಿನಾಯಕ ದೇವಾಕ ಅಥರ್ವಶೀರ್ಷ ಅಬಿಷೇಕ, ಮಹಾ ಮಂಗಳಾರ್ತಿ, ಮಹಾ ಅನ್ನಸಂತರ್ಪಣ, ಪ|ಪೂ| ಸ್ವಾಮ್ಯಾಂಗೆಲೆ ಶುಭಾಗಮನ, ದರ್ಶನ ಇತ್ಯಾದಿ ಕಾರ್ಯಕ್ರಮ ಬರಶಿ ವಿಜೃಂಭಣೇರಿ ಚಲೇಲೆ ಖಬ್ಬರ ಮೆಳ್ಳಾ.

ಶ್ರೀ ಲಕ್ಷ್ಮೀನಾರಾಯಣದೇವಳ, ಹನುಮಟ್ಟಾ

ಅಂಕೋಲೆ ತಾ|| ಹನುಮಟ್ಟಾ ವಂದಿಗೆಚೆ ಶ್ರೀ ಲಕ್ಷ್ಮೀನಾರಾಯಣ ಮಹಾಮಾಯಾ ದೇವಳಾಂತು ಕಲಾಭಿವೃದ್ಧಿ ಮಹೋತ್ಸವ ಸ್ಮರಣಾರ್ಥ ಶತಚಂಡಿ, ಲಘುವಿಷ್ಣು ಹವನ ತಾ. ೧೮-೨-೧೪ ದಾಕೂನು ೨೦-೨-೨೦೧೪ ಪರ್ಯಂತ ವಿಜೃಂಭಣೇರಿ ಚಲೇಲೆ ಖಬ್ಬರ ಮೆಳ್ಳಾ. ನೈಶಿ ಶ್ರೀ ದೇವಳಾಂತು ಸುಗ್ಗೀ ಉತ್ಸವು ತಾ. ೧೮-೩-೨೦೧೪ ದಿವಸು ಚಲೇಲೆ ಖಬ್ಬರ ಮೆಳ್ಳಾ.
ಶುಭ ವಿವಾಹ
ಚಿ|| ಹರೀಶ ಶೆಣೈ(ಶ್ರೀಮತಿ ಸುಲೋಚನಾ ಶೆಣೈ ಆನಿ ದಿ|| ಪ್ರಕಾಶ ಶೆಣೈ ಹಾಂಗೆಲ ಪೂತು) ಆನಿ ಚಿ||ಸೌ|| ಶಿಲ್ಪಶ್ರೀ (ಶ್ರೀಮತಿ ಸುಧಾ ಕೆ. ಕಾಮತ್ ಆನಿ ಶ್ರೀ ಕೇಶವ ಕಾಮತ್, ಶಿವಮೊಗ್ಗ ಹಾಂಗೆಲೆ ಧೂವ) ಹಾಂಗೆಲೆ ಲಗ್ನ ತಾ. ೨೩-೨-೨೦೧೪ ದಿವಸು ಶಿವಮೊಗ್ಗ ಜಿ.ಎಸ್.ಬಿ. ಕಲ್ಯಾಣ ಮಂದಿರಾಚೆ ಶ್ರೀ ಸುಧೀಂದ್ರ ಸಭಾಗೃಹಾಂತು ವಿಜೃಂಭಣೇರಿ ಚಲ್ಲೆ. ಆನಿ ನವೀನ ವ್ಹರೆತು-ವ್ಹಕಲ್ಯಾಲಿ ಗರ್ಭರೋಹಣ ತಾ. ೨೪-೨-೨೦೧೪ ದಿವಸು ಚಲ್ಲೆ.  ವ್ಹರೇತು, ವ್ಹಕಳ್ಯಾಂಕ ಆಮ್ಗೆಲೆ ಶುಭಾಶಯು.

ಶ್ರೀ ಸುರೇಂದ್ರ ಪಾಲನಕರ ಹಾಂಕಾ “ಕಲಾರತ್ನ ಪ್ರಶಸ್ತಿ

ಹುಬ್ಬಳ್ಳಿಚೆ ಖ್ಯಾತ ಜಾದುಗಾರು ಆನಿ ಶ್ಯಾಡೋಫ್ಲೇ ಕಲಾವಿದ ಶ್ರೀ ಸುರೇಂದ್ರ ಪಾಲನಕg ಹಾಂಕಾ ಆಲ್ತಾಂತು ಧಾರವಾಡಾಂತು ಕನ್ನಡ ಆನಿ ಸಂಸ್ಕೃತಿ ಇಲಾಖೆ ತರಪೇನ ಚಲೇಲೆ ಸಾಂಸ್ಕೃತಿಕ ಕಲಾಮೇಳ ಕಾರ್ಯಕ್ರಮಾಂತು  ಕಲಾರತ್ನ ಪ್ರಶಸ್ತಿ ದೀವ್ನು ಸತ್ಕಾರ ಕೆಲ್ಲೆ. ಹೇ ಸಂದರ್ಭಾರಿ ಮಾಜಿ ಶಾಸಕ ಶ್ರೀ ಚಂದ್ರಕಾಂತ ಬೆಲ್ಲದ, ಶ್ರೀ ಪ್ರಕಾಶ ಮಲ್ಲಿಗವಾಡ, ಶ್ರೀ ಅಶೋಕ ಚಲವಾದಿ, ಶ್ರೀ ಕೆ.ಎಚ್. ಚನ್ನೂರ ಆದಿ ಗಣ್ಯ ಉಪಸ್ಥಿತ ವ್ಹರಲೀಲೆ. ಶ್ರೀ ಪಾಲನಕರ ಹಾನ್ನಿ ಘೆಲೇಲೆ ೨೭ ವರ್ಷಾ ದಾಕೂನು ಜಾದುಗಾರ ಜಾವ್ನು ಕರ್ನಾಟಕ ಸಮೇತ ಮಹಾರಾಷ್ಟ್ರ, ಗೋಂಯ, ಕೇರಳಾಂತು ಸುಮಾರ ಹಜಾರಾ ಪಶಿ ಚ್ಹಡ ಕಾರ್ಯಕ್ರಮ ದೀವ್ನು ನಾಂವ ಪಾವ್ಲಿಂತಿ. ಹಾನ್ನಿ ಮಾತೃಭಾಷಾ ಕೊಂಕಣಿ ಸಮೇತ ಕನ್ನಡ, ಮರಾಠಿ, ಹಿಂದಿ ಭಾಷೆಂತು ಜಾದು ಪ್ರದರ್ಶನ ದಿತ್ತಾತಿ. (ಮಾಹಿತಿಕ : ೯೮೪೪೧೮೪೦೪೪)

ಧಾರವಾಡಾಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷು

‘ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಕ ಏಕ ನವೀನ ದಿಶಾ ದಿವ್ಕಾ ಮ್ಹೊಣು ಆಪಣಾಲೆ ಆಶಯು. ಕೊಂಕಣಿ ಉರ್‍ಕಾ ಜಾಲ್ಯಾರಿ ತ್ಯಾ ವಾಜ್ಜುಚೆ ಆನಿ ವಾಪರ್‍ಚೆ ತಶ್ಶಿ ಭವಿಷ್ಯಾಚೆ ನಾಗರಿಕ ಜಾಲೇಲೆ ಚೆರ್ಡುಂವಾಂಕ ತಯಾರ ಕೋರ್‍ಕಾ. ಹೇ ಖಾತ್ತಿರಿಚಿ ಆಪ್ಪಣ ಆಪಣಾಲೆ ಅಧಿಕಾರಾವಧಿಂತು ಚ್ಹಡ ನಜರ ಘಾಲ್ತಾ. ಅಶ್ಶಿ ಮ್ಹೊಣು ಕನಾಟಕ ಕೊಂಕಣಿ ಅಕಾಡೆಮಿಚೆ ನೂತನ ಅಧ್ಯಕ್ಷ ಶ್ರೀ ರೊನಾಲ್ಡ್(ರೊಯ್) ಕ್ಯಾಸ್ಟಲಿನೊ ತಾನ್ನಿ ಸಾಂಗ್ಲೆ. ತಾನ್ನಿ ಕೊಂಕಣಿ ಅಕಾಡೆಮಿ ಅಧ್ಯಕ್ಷ ಜಾಲ್ಲ ಮಾಗಿರಿ ಪ್ರಪ್ರಥಮ ಜಾವ್ನು ಮಾರ್ಚ ೨೦ಕ ಧಾರವಾಡಾಕ ಆಯ್ಯಿಲ ತೆದ್ನಾ ಚಲೇಲೆ ಕೊಂಕಣಿ ಲೋಕಾಂಗೆಲೆ ಏಕ ಸಭಾಂತು ಉಲೈತಾಶ್ಶಿಲೆ. ಹೇ ಸಂದರ್ಭಾರಿ ಆಪಣಾಲೆ ಅಭಿಪ್ರಾಯು ವಾಂಟೂನು ಘೆತ್ತಿಲೆ ಸರಸ್ವತಿ ಪ್ರಭಾಚೆ ಸಂಪಾದಕ ಆರ್‍ಗೋಡು ಸುರೇಶ ಶೆಣೈನ “ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೆ ಮೂಲ ಉದ್ದೇಶ ‘ಕೊಂಕಣಿ ಸಾಹಿತ್ಯಾಕ ಮದ್ದತ್ ದಿವ್ಚೆ. ಜಾಲ್ಯಾರಿ ಹೇ ಖಾತ್ತಿರಿ ಇತ್ತುಲೆ ದಿವಸಾಂತು ಆಕಾಡೆಮಿ ದಾಕೂನು ಚಲೇಲೆ ಸಾಧನ ಮಸ್ತ ಊಣೆ ತ್ಯಾ ಖಾತ್ತಿರಿ ತುಮಗೇಲೆ ಅಧಿಕಾರವಧಿಂತು ಪೂಣಿ ಕೊಂಕಣಿ ಸಾಹಿತ್ಯ, ಪುಸ್ತಕ ಪ್ರಕಟಣ ಆನಿ ಪತ್ರಿಕೋದ್ಯಮಾಕ ಪ್ರೋತ್ಸಾಹ ದೀವ್ಕಾ ಮ್ಹಣ್ಚೆ ಮಾಗಣಿ ದವರ್‍ಲೆ. ಹಾಕ್ಕಾ ಸಕಾರಾತ್ಮಕ ಜಾವ್ನು ಪ್ರತಿಕ್ರಿಯಾ ದಿಲೇಲೆ ಶ್ರೀ ಕ್ಯಾಸ್ಟಲಿನೊ ತಾನ್ನಿ ಕೊಂಕಣಿ ಪುಸ್ತಕ ವಿಕ್ರಯ ಕೊರಚಾಕ ಮೊಬೈಲ್ ವ್ಯಾನಾ ವ್ಯವಸ್ಥಾ ಕೊರಚೆ, ಆನಿ ಕೊಂಕಣಿಂತು ಪ್ರಕಟ ಜಾಲೇಲೆ ಪುಸ್ತಕಾಚೆ ರೂ. ೧೦,೦೦೦/- ಮೌಲ್ಯಾಚೆ ಪ್ರತಿ ಘೆವ್ಚೆ ವ್ಯವಸ್ಥಾ ಕೊರ್‍ಚೆ ಭರ್‍ವಸ ದಿಲ್ಲಿಂತಿ. ಆನಿ ಶಾಳೆಂತು  ಚ್ಹಡ ಚ್ಹಡ ವಿದ್ಯಾರ್ಥಿ ಲೋಕಾನಿ ಕೊಂಕಣಿ ಶಿಕಲ್ಯಾರಿ ಮುಖಾರಿ ಕೊಂಕಣಿ ವಾಚಪಾಲೆ ಅಂಕಡೊ ವೃದ್ಧಿ ಜಾತ್ತಾ ತ್ಯಾ ಖಾತ್ತಿರಿ ಆಪ್ಪಣ ವಾವ್ರೊ ಕರ್ತಾ ಮ್ಹಣ್ಚೆ ಭರ್‍ವಸ ದಿಲ್ಲಿಂತಿ. ಆನಿ ಅವುಂದು ವರ್ಷಾಚೆ ಪ್ರಶಸ್ತಿ ವಿತರಣ ಸಮಾರಂಭ ಧಾರವಾಡಾಂತು ಕೊರಚಾಕ ಠರಯಲಾ ಮ್ಹೊಣೂ ತಾನ್ನಿ ಸಾಂಗ್ಲೆ. ಧಾರವಾಡಾ ದಾಕೂನು ಕರ್ನಾಟಕ ಕೊಂಕಣಿ ಅಕಾಡೆಮಿಕ ನಿಯಕ್ತ ಜಾಲೇಲೆ ಸಾಂದೊ ಆಕಾಶವಾಣಿಚೆ ನಿವೃತ್ತ ನಿರ್ದೇಶಕ ಡಾ|| ಚೇತನ ಕುಮಾರ ನಾಯ್ಕ ತಾನ್ನಿ ಸುರವೇಕ ಸರ್ವಾಂಕ ಯೇವ್ಕಾರ ಕೋರ್ನು ಹೇ ಸಮಾರಂಭ ಯಶಸ್ವಿ ಕೊರಚಾಕ ಸರ್ವಾಲೆ ಸಹಕಾರ ಮಾಗ್ಲಿಂತಿ. ಆನಿ ಸಭೆಕ ಅಧ್ಯಕ್ಷ್ಯಾಂಗೆಲೆ ಒಳಕ ಕೋರ್ನು ದಿಲ್ಲೆ. ಸಭಾಕ ಆಯ್ಯಿಲೆ ಸರ್ವ ಮಹನೀಯಾನಿ ಕೊಂಕಣಿ ಭಾಷಾಭಿವೃದ್ಧಿ ಖಾತ್ತಿರಿ ತಾಂಗ ತಾಂಗೆಲೆ ಅಭಿಪ್ರಾಯು ವ್ಯಕ್ತ ಕೆಲ್ಲಿ. ಜಿ.ಎಸ್.ಬಿ. ಸಮಾಜಾಚೆ ಕಾರ್ಯದರ್ಶಿ ಶ್ರೀ ರಾಮಚಂದ್ರ ಶಾನಭಾಗ ತಾನ್ನಿ ಕಡೇರಿ ಸರ್ವಾಂಕ ಆಭಾರ ಮಾನಲೆ.
ಹೇ ಸಭೆಕ ಧಾರವಾಡ ಜಿ.ಎಸ್.ಬಿ. ಸಮಾಜಾಧ್ಯಕ್ಷ ಶ್ರೀ ಗಂಗಾಧರ ನಾಯಕ್, ಗೌರವ ಕಾರ್ಯದರ್ಶಿ ಶ್ರೀ ರಾಮಚಂದ್ರ ಶಾನಭಾಗ, ಪ್ರಖ್ಯಾತ ವೈದ್ಯ ಡಾ|| ರಾಜನ್ ದೇಶಪಾಂಡೆ, ಖ್ಯಾತ  ಗಾಯಕಿ ಶ್ರೀಮತಿ ಅನುರಾಧಾ ಧಾರೇಶ್ವರ, ಆಕಾಶವಾಣಿಚೆ ನಿವೃತ್ತ ಸುದ್ಧಿವಾಚಕ ಶ್ರೀ ನಾಗೇಶ ಶಾನಭಾಗ, ಆಕಾಶವಾಣಿ ಧಾರವಾಡಾಚೆ ಕೊಂಕಣಿ ವಿಭಾಗಾಚೆ ಶ್ರೀ ಅರುಣ ನಾಯಕ್, ಶ್ರೀಮತಿ ನೀಲಾವರ ಸರಸ್ವತಿ ಪ್ರಭಾಚೆ ಆರ್‍ಗೋಡು ಸುರೇಶ ಶೆಣೈ, ಆದಿ ಮಹನೀಯ ಆಯ್ಯಿಲೆ.

ಕೊಂಕಣಿ ಅಕಾಡೆಮಿಕ ನೇಮಕ

ಕರ್ನಾಟಕ ಕೊಂಕಣಿ ಅಕಾಡೆಮಿಕಚೆ ನೂತನ ಸದಸ್ಯ ಜಾವ್ನು ಉ.ಕ ಕೋಡಕಣಿಚೊ ಡಾ. ಅರವಿಂದ ಚಂದ್ರಕಾಂತ ಶ್ಯಾನಭಾಗ ಹಾಂಕಾ ನೇಮಕ ಕೆಲ್ಯಾ. ಡಾ. ಅರವಿಂದ ಶ್ಯಾನಭಾಗ ಹಾ ಸಂಸ್ಕೃತ ವಿಷಯಾಂತು ಎಂ.ಎ. ಪಿ.ಎಚ್.ಡಿ. ಪದವೀಧರ,  ಹಾನ್ನಿ ಸ್ನಾತಕೋತ್ತರ ಅಧ್ಯಯನಾಂತು ತೀನ ಭಾಂಗ್ರಾ ಪದಕ ಘೆಯ್ಲಾ. ಸಮಾಜಸೇವೆಂತು ಆಸಕ್ತ ಆಶ್ಚೆ ಹಾನ್ನಿ ಸ ಪಂತ ರಕ್ತದಾನ ಕೆಲ್ಯಾ. ರಾಷ್ಟ್ರೀಯ ಯುವ ಯೋಜನೆ, ರಾಷ್ಟ್ರೀಯ ಸೇವಾ ಯೋಜನೆಚೆ ಸ್ವಯಂಸೇವಕ ಜಾವ್ನು ಧಾರವಾಡ ವಿಶ್ವವಿದ್ಯಾಲಯಾಂತ್ಲೆನ ರಾಷ್ಟ್ರಸ್ತರಾಚೆ ನಾಯಕತ್ವ ಶಿಬಿರಾಂತು ಭಾಗ ಘೇವ್ನು, ಚಾಂಗ ಸ್ವಯಂಸೇವಕ ಪ್ರಶಸ್ತಿ ಪಾವೋನು ಘೆತ್ಲಾ. ಕೊಂಕಣಿ ಸಾಹಿತ್ಯಾಕ ಸಂಬಂಧಿತ ಸರಸ್ವತಿ ಪ್ರಭಾ ಆನಿಕ ಕೊಡಿಯಾಲ ಖಬರ ಪತ್ರಿಕೆಂಕ ಖಬರಿ, ಬರೋಪಿ ಜಾವ್ನು ಸೇವೆ ಕೆಲ್ಲಾ. ಕರಾವಳಿ ಮುಂಜಾವು, ಕನ್ನಡ ಜನಾಂತರಂಗ ದಿನಪತ್ರಿಕೆಕ ಉಪ ಸಂಪಾದಕ ಜಾವ್ನು ಸೇವೆ ಕೆಲ್ಲಾ. ಆತ್ತ ದೋನ ವರ್ಷ ಧೋರ್ನು ಬಿಜಾಪುರಾಚೆ ಸಂತ ಜೋಸೇಫ್ ಆಂಗ್ಲಮಾಧ್ಯಮ ಪ್ರೌಢಶಾಲೆಚೊ ಸಂಸ್ಕೃತ ಅಧ್ಯಾಪಕ ಜಾವ್ನು ಅರವಿಂದ ಶ್ಯಾನಭಾಗ ಕಾರ್ಯನಿರ್ವಹಣ ಕರ್ತಾ ಆಸ್ಸಾ. ಕೊಂಕಣಿ ಅಕಾಡೆಮಿಚೆ ಪದವಿಪೂರ್ವ ಶಿಕ್ಷಣ ಸ್ತರಾಚೆ ಪಠ್ಯಪುಸ್ತಕ ನಿರ್ಮಾಣ ಕರ್ಚೆ ಸಮಿತಿಚೊ ಸದಸ್ಯ ಜಾವ್ನು ಹಾನ್ನಿ ಕಾಮ ಕೆಲ್ಯಾ. ಮಂಗಳೂರಾಚೆ ಸಿಂಚನ ಸೇವಾ ಸಂಸ್ಥೆಚೊ ಸದಸ್ಯ ಜಾವನು ಹಾನ್ನಿ ಆಮ್ಚಿಂಗೆಲೆ  ಮ್ಹಣ್ಚೆ ಕೊಂಕಣಿ ಶಬ್ಧಕೋಶ ಡಾ. ದೇವದಾಸ ಪೈ, ಡಾ. ಜಯವಂತ ನಾಯಕ ಹಾಂಗೆಲೆ ಸಾಂಗತ ಮೇಳ್ನು ಕೆಲ್ಯಾ. ರಾಜ್ಯ ಸ್ತರಾಚೆ ಪ್ರತಿಭಾ ಕಾರಂಜಿಂತು ಕೊಂಕಣಿ ವಿಷಯಾಚೆ ಭಾಷಣ ಸ್ಪರ್ಧೆಕ ನಿರ್ಣಾಯಕ ಜಾವ್ನು ಕಾಮ ಕೆಲ್ಲಾ. ಬಿಜಾಪುರ ಆಕಾಶವಾಣಿಂತು ಹಾಂಗೆಲೆ ಚಿಂತನ ಪ್ರಸಾರ ಜಾಲ್ಯಾ. ಹಂಪಿ ವಿಶ್ವವಿದ್ಯಾಲಯಾಚೆ ವಿಜ್ಞಾನ ಸಂಗಾತಿ ಮಾಸಿಕಾಕ ಆತ್ತಾಚೆ ಚಾರ ವಷ ಧೋರ್ನು ಪ್ರಸಾರಾಂಗಾಚೆ ಲೇಖಕ ಜಾವ್ನು ಸೇವೆ ಘಡೈಲಾ. ರಾಜ್ಯಾಚೆ ಪ್ರಮುಖ ಪತ್ರಿಕೆ ಜಾವ್ನಾಶ್ಚೆ ಕರ್ಮವೀರ, ಕಸ್ತೂರಿ, ತರಂಗ, ಸುಧಾಂತು ಹಾಂಗೆಲೆ ಲೇಖನ ಪ್ರಕಟ ಜಾಲ್ಯಾ. ಕಾಳಿದಾಸ ಮಹಾಕವಿಲೆ ಮೇಘದೂತ ಕಾವ್ಯ ಕೊಂಕಣಿ ಹಾಡಿಲೆ ಶ್ರೇಯ ಹಾಂಕಾ ಮೆಳತಾ. ಪ್ರಸ್ತುತ ಹಾಂಕಾ ಉತ್ತರಕನ್ನಡ ಆನಿ ಉತ್ತರಕರ್ನಾಟಕ ಭಾಗಾಂತು ಕೊಂಕಣಿಚೆ ಪ್ರಸಾರ ಅಧಿಕ ಕೊರಚಾಕ ಅವಕಾಶ ದಿಲ್ಯಾ. *