ಶ್ರೀ ವೆಂಕಟರಮಣ ದೇವಳ, ತೀರ್ಥಹಳ್ಳಿ

ಶ್ರೀ ವೆಂಕಟರಮಣ ದೇವಾಲೆ ಮೂಲಕ್ಷೇತ್ರ ತಿರುಪತಿಚಾನ ಪ್ರಸಾದ ರೂಪಾಂತು ದಿಲೀಲೆ, ಶ್ರೀ ಕಾಶೀಮಠಾಧೀಶ ಶ್ರೀಮತ್  ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ಪ್ರತಿಷ್ಠಾಪಿತ ತೀರ್ಥಹಳ್ಳಿ ಜಿ.ಎಸ್.ಬಿ. ಸಮಾಜಾಚೆ ತಿರುಮಲ ಶ್ರೀ ಲಕ್ಷ್ಮೀವೆಂಕಟರಮಣ ದೇವಳಾಚೆ ಚತುರ್ಥ ಪ್ರತಿಷ್ಠಾ ವರ್ಧಂತಿ ಉತ್ಸವು ತಾ. ೧೩-೦೬-೨೦೧೩ ದಿವಸು ಶ್ರೀ ದೇವತಾ ಪ್ರಾರ್ಥನಾ,, ಪಂಚಾಮೃತಾಭಿಷೇಕ, ಶತಕಲಶಾಭಿಷೇಕ, ಬ್ರಹ್ಮಕಲಶಾಭಿಷೇಕ, ವರ್ಧನಿ ಕಲಶ, ಕನಕಾಭಿಷೇಕ, ಬಾಗೀರಥಿ ಅಭಿಷೇಕ, ಪ್ರಸನ್ನ ಪೂಜಾ, ಅಷ್ಟಮಂಗಲ ನಿರೀಕ್ಷಣ, ಮಹಾ ಪೂಜಾ, ಪಟ್ಟ ಕಾಣಿಕ, ಪ್ರಸಾದ ಗ್ರಹಣ, ಭೂರಿ ಸಮಾರಾಧನ, ಪ್ರಾಕಾರೋತ್ಸವು, ಅಷ್ಟಾವಧಾನ ಸೇವಾ, ವಸಂತ ಪೂಜಾ ಇತ್ಯಾದಿ ಧಾರ್ಮಿಕ ಕಾರ್ಯಾವಳಿ ಬರಶಿ ವಿಜೃಂಭಣೇರಿ ಚಲ್ಲೆ. ಆನಿ ಶ್ರೀ ದೇವಳಾ ತರಪೇನ ವಿಂಗವಿಂಗಡ ಉದ್ದೇಶಾ ಖಾತ್ತಿರಿ ದೇವಳಾಚೆ ಲಾಗ್ಗಿ ಸುಮಾರ ೧೦,೦೦೦ ಸ್ಕ್ವೇರ್‍ಫೂಟ್   ತಿತ್ಲೆ ವ್ಹಡ ನಿವೇಶನ ಖರೀದಿ ಕೆಲೀಲೆ ಆಸ್ಸುನು ತಾಂತು ವೈದಿಕ ಬರಶಿ ಗ್ರಹಸ್ಥಾನಿ ಅಧ್ಯಯನ ಕೊರಚಾಕ ಸಾಧ್ಯಜಾವ್ಚೆ ವರಿ “ಸಂಸ್ಕೃತ ವೇದ ಪಾಠ ಶಾಳಾ, ಸಂಸ್ಕೃತಿ ಆನಿ ಕೊಂಕಣಿ ಭಾಷಾ ಪ್ರಚಾರಾಕ ವಿಶೇಷ ಯೋಜನಾ, ಗುರು ವಾಸ್ತವ್ಯಾಕ ಭವ್ಯ ಗುರು ಮಂದಿರ, ಆನಿ ನಿತ್ಯ ಅನ್ನದಾನ ಖಾತ್ತಿರಿ ವಿಶಾಲ ‘ಅನ್ನ ಪೂರ್ಣಾಲಯ ಇತ್ಯಾದಿ ಯೋಜನಾ ಹಾತ್ತಾಕ ಘೆತ್ತಿಲೆ ಆಸ್ಸುನು ಹೇ ಖಾತ್ತಿರ ಚಡ್ತೆ ಮಾಹಿತಿ ಖಾತ್ತಿರಿ ಪೋನ್ ನಂ. ೯೯೦೦೮೨೭೨೬೬ ಜಾಂವೊ ೯೪೪೮೧೫೪೩೭೩ ಹಾಂಕಾ ಸಂಪರ್ಕ ಕೊರಯೇತ.

 ಮಂಗ್ಳೂರಾಂತು ಕೊಂಕಣಿ ಸಮಾವೇಶು

ಕೊಂಕಣಿ ಸಾಂಸ್ಕೃತಿಕ ಸಂಘ(ರಿ) ಹಾಂಗೆಲೆ ತರಪೇನ ಮಂಗಳೂರ್‍ಚೆ ಟಿ.ವಿ.ರಮಣ ಪೈ ಕನ್ವೆಷನ್ ಸೆಂಟರಾಂತು ದಿ. ೨೬-೦೫-೨೦೧೩ ದಿವಸು ಚಲೇಲೆ ಬೃಹತ್ ಕೊಂಕಣಿ ಸಮಾವೇಶಾಚೆ ಸಂದರ್ಭಾರಿ ಮಂಗಳೂರ್‍ಚೆ ಶ್ರೀ ಎಂ. ರಮೇಶಕೃಷ್ಣ ಶೇಟ್ ಹಾಂಕಾ “ಕೊಂಕಣಿ ಸಮಾಜ ಸೇವಾ ರತ್ನ ರಾಜ್ಯ ಪುರಸ್ಕಾರ ದೀವ್ನು ಗೌರವ ಕೆಲ್ಲೆ. ಮುಖಪುಟಾಂತು ಪ್ರಕಟಿತ ಚಿತ್ರಾಂತು ಶ್ರೀಮತಿ ಶೋಭಾ ರಮೇಶ ಶೇಟ್ ಸಹಿತ ಕಾರ್ಯಕಾರಿ ಮಂಡಳಿಚೆ ಸದಸ್ಯ ಆನಿ ಸಂಘಾಚೆ ಅಧ್ಯಕ್ಷ ಶ್ರೀ ವೆಂಕಟೇಶ ಬಾಳಿಗಾ ಉಪಸ್ಥಿತ ಆಸ್ಸಚಿ.

ಶ್ರೀ ವೆಂಕಟರಮಣ ದೇವಳ, ಬೆಂಗಳೂರು

ಬೆಂಗಳೂರ್‍ಚೆ ಅನಂತ ನಗರಾಂತು ಆಸ್ಸುಚೆ ಶ್ರೀ ವೆಂಕಟರಮಣ ದೇವಳಾಂತು ೫ ವರ್ಷಾಚೆ ಶ್ರೀ ರಾಮನವಮಿ ಉತ್ಸವು ತಾ. ೧೯-೦೪-೨೦೧೩ ದಿವಸು ಪ್ರಾರ್ಥನ, ಶ್ರೀ ರಾಮರಕ್ಷಾ ಹವನ, ಮಹಾ ಮಂಗಳಾರತಿ, ಸಂತರ್ಪಣ, ಪಾಲಂಖಿ ಉತ್ಸವು, ಅಷ್ಟಾವಧಾನ, ವಿಶೇಷ ಅಲಂಕಾರ ಸೇವಾ, ಉದಯಾಸ್ತಮಾನ ಸೇವಾ, ಇತ್ಯಾದಿ ಕಾರ್ಯಾವಳಿ ಬರಶಿ ಚಲ್ಲೆ. ಹನುಮ ಜಯಂತಿ ಉತ್ಸವು ಪ್ರಾರ್ಥನ, ಅಭಿಷೇಕ, ಮಂಗಳಾರತಿ, ಪ್ರಸಾದ ವಿತರಣೆ ಬರಶಿ ತಾ. ೨೫-೪-೧೩ಕ ಚಲ್ಲೆ. ಶ್ರೀ ವೆಂಕಟರಮಣ ಆನಿ ಪರಿವಾರ ದೇವಾಲೆ ೧೦ಚೆಂ ವಷಾಚೆ ಪ್ರತಿಷ್ಠಾಪನಾ ವರ್ಧಂತಿ ಉತ್ಸವು ತಾ. ೨೩-೦೫-೧೩ ದಿವಸು ಪ್ರಾರ್ಥನ, ಶತಕಲಶ, ಸಾನಿಧ್ಯ ಹವನ, ಅಲಂಕಾರ, ಹೋಮು, ಮಹಾ ಪೂಜಾ, ಮಹಾ ಮಂಗಳಾರತಿ, ಮಹಾ ಸಂತರ್ಪಣ, ಮಾಳಿಗೆ ಉತ್ಸವು, ಪಾಲಂಖೀ ಉತ್ಸವು, ಅಷ್ಟಾವಧಾನ, ವಸಂತ ಪೂಜಾ ಇತ್ಯಾದಿ ಧಾರ್ಮಿಕ ಕಾರ್ಯಾವಳಿ ಬರಶಿ ವಿಜೃಂಭಣೇರಿ ಚಲ್ಲೆ.
ಮುಖಾರಿ ತಾ. ೧೬-೦೭-೧೩ಕ ಶ್ರೀ ಚಪ್ಪರ ವಿನಾಯಕ ದೇವಾಲೆ ೧೩ಚೆ ಪ್ರತಿಷ್ಠಾ ವರ್ಧಂತ್ಯುತ್ಸವು, ೧೮-೭-೧೩ಕ ದೇವಾಲೆ ಚಾತುರ್ಮಾಸ ಆರಂಭ, ೯-೮-೧೩ಕ ೮ ವರ್ಷಾಚೆ ಸಾಮೂಹಿಕ ಕುಂಕುಮಾರ್ಚನ, ೧೧-೮-೧೩ಕ    ೧೦ಚೆಂ ವರ್ಷಾಚೆ ಶ್ರೀ ನಾಗರ ಪಂಚಮಿ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ದೇವಳಾಂತು ಚೊಲ್ಚೆ ಆಸ್ಸ ಮ್ಹೊಣು ಮಾಹಿತಿ ಮೆಳ್ಳಾ.

ಶ್ರೀ ಗೋಪಾಲಕೃಷ್ಣ ದೇವಳ, ಹೆಜಮಾಡಿ

ಹೆಜಮಾಡಿಚೆ ಶ್ರೀ ಬೆಣ್ಣೆ ಗೋಪಾಲಕೃಷ್ಣ ದೇವಳಾಚೆಂ ಪ್ರತಿಷ್ಠಾ ವರ್ಧಂತಿ ಉತ್ಸವು ಆಲ್ತಾಂತು ವಿಜೃಂಭಣೇರಿ ಚಲ್ಲೆ. ಹೇ ವೇಳ್ಯಾರಿ ದೇವಾಲೆ ಸನ್ನಿಧಾನಾಂತು ಪ್ರಾರ್ಥನಾ, ಶ್ರೀ ಕೃಷ್ಣ ಮಂತ್ರಹವನ, ಅಭಿಷೇಕ, ವೇದಮೂರ್ತಿ ಅನಿಲ ಭಟ್ ಮೂಲ್ಕಿ ತಾಂಗೆಲೆ ನೇತೃತ್ವಾರಿ ಚಲ್ಲೆ. ಮಾಗಿರಿ ಸಮಾರಾಧನ ಆಶ್ಶಿಲೆ. ಗಾಂವ್ಚೆ ಸರ್ವ ಸಮಾಜ ಬಾಂಧವ ಹೇ ವೇಳ್ಯಾರಿ ಉಪಸ್ಥಿತ ವ್ಹರ್ನು ಶ್ರೀ ದೇವಾಲೆ ಕೃಪೇಕ ಪಾತ್ರ ಜಾಲ್ಲೆಂ.

ಶ್ರೀ ರಾಮಂದಿರ ಮಿತ್ತಬೈಲ್

ಮಿತ್ತಬೈಲ್ ಶ್ರೀ ರಾಮಂದಿರಾಂತು ದೇವಾಲೆ ಪ್ರತಿಷ್ಠಾ ವರ್ಧಂತಿ ಉತ್ಸವು ತಾ. ೧೫-೫೧೩ ದಿವಸು ಪ್ರಾರ್ಥನಾ, ಅಭಿಷೇಕ, ಭಜನಾ, ಮಹಾ ಸಂತರ್ಪಣ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಬರಶಿ ವಿಜೃಂಭಣೇರಿ ಚಲ್ಲೆ.  ಹೇ ಪೂರಾ ಕಾರ್ಯಕ್ರಮ ಶ್ರೀಮತಿ ಪುಪ್ಪ ಪಾಂಡುರಂಗ ಕಾಮತ್, ಪುಲ್ಕೇರಿ ಹಾನ್ನಿ ಸೇವಾ ರೂಪಾರಿ ಚಲೋವ್ನು ದಿಲ್ಲೆ.

ಪೇಟೆ ಶ್ರೀ ವೆಂಕಟ್ರಮಣ ದೇವಳ,ಕುಂದಾಪುರ

ಕುಂದಾಪುರ್‍ಚೆ ಶ್ರೀ ಪೇಟೆ ವೆಂಕಟರಮಣ ದೇವಳಾಂತು ಕಾಶೀಮಠಾಧೀಶ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪಟ್ಟಶಿಷ್ಯ ಶ್ರೀಮದ್ ಸಂಯಮೀಂದ್ರ  ತೀರ್ಥ ಸ್ವಾಮ್ಯಾಲೆ ಮುಕ್ಕಾಂ ತಾ. ೨-೦೬-೧೩ ಚಾನ ೫-೬-೧೩ ಪರ್ಯಂತ ಚಲೇಲೆ ಖಬ್ಬರ ಮೆಳ್ಳಾ. ಹೇ ವೇಳ್ಯಾರಿ ಗಾಂವ್ಚೆ, ಪರಗಾಂವ್ಚೆ ಅಪಾರ ಸಮಾಜ ಬಾಂಧವ ಸ್ವಾಮ್ಯಾಂಕ ಭೆಟ್ಟೂನು, ಹರಿ, ಗುರುಕೃಪೇಕ ಪಾತ್ರ ಜಾವ್ನು ಪುನೀತ ಜಾಲ್ಲಿಂತಿ.

ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳ, ಉಡುಪಿ

ಉಡ್ಪಿಚೆ ಶ್ರೀ ಲಕ್ಷ್ಮೀವೆಂಕಟೇಶ ದೇವಳಾಂತು ಶ್ರೀ ನರಸಿಂಹ ಜಯಂತಿ ಪ್ರಯುಕ್ತ ತಾ. ೨೪-೫-೧೩ಕ ಪಂಚಾ ಮೃತ ಅಭಿಷೇಕ, ವಿಶೇಷ ಪೂಜಾ ಆನಿ ರಾತ್ರಿ ಉತ್ಸವು ಚಲ್ಲೆ. ಶ್ರೀ ಲಕ್ಷ್ಮೀ ವೆಂಕಟೇಶ ದೇವಾಲೆ ೧೧೭ಚೆ ಪ್ರತಿಷ್ಠಾ ವರ್ಧಂತಿ ತಾ. ೨೬-೫-೧೩ಕ ಉತ್ಸವು ಪಂಚಾಮೃತಾಭಿಷೇಕ, ಶತಕಲಶಾಭಿಷೇಕ, ಮಹಾ ಪೂಜಾ, ಮಹಾ ಸಮಾರಾಧನ, ರಾತ್ತಿಕ ಪೇಟೆ ಉತ್ಸವ ಬರಶಿ ಚಲ್ಲೆ.

saraswati Prabha Konkani News

ಗೌಡ ಸಾರಸ್ವತ ಸಮಾಜ, ದಾವಣಗೆರೆ

ದಾವಣಗೆರೆಕ ವಿ.ವಿ.ಚೆ ವಿಂಗವಿಂಗಡ ಕಾರ್ಯಕ್ರಮಾಂತು ವಾಂಟೊ ಘೆವಚಾಕ ದಾವಣಗೆರೆಕ ಆಯ್ಯಿಲೆ ಕರ್ನಾಟಕ ಪ್ರವಾಸೋದ್ಯಮ ಆನಿ ಉನ್ನತ ಶಿಕ್ಷಣ ಸಚಿವ ಆರ್.ವಿ. ದೇಶಪಾಂಡೆ ತಾಂಕಾ ದಾವಣಗೆರೆ ಜಿ.ಎಸ್.ಬಿ. ಸಮಾಜ ಬಾಂದವಾನಿ ಮೈಸೂರ ಪೇಟಾ ಬರಶಿ ಸನ್ಮಾನ ಕೋರ್ನು ದಾವಣಗೆರೆ ಸಮಾಜಾ ತರಪೇನ ಅಭಿನಂದನ ಕೆಲ್ಲಿ. ಪೇಂಟಾಚೆ ಆನಂದ ರೆಸಿಡೆನ್ಸ್ ಸಭಾಂಗಣಾಂತು ಚಲೀಲೆ ಸರಳ ಸಮಾರಂಭಾಂತು ದಾವಣಗೆರೆ ಜಿ.ಎಸ್.ಬಿ. ಸಮಾಜಾಚೆ ಅಧುಕ್ಷ ಕೆ.ಎನ್. ದೇವದಾಸ ಪೈ, ಉಪಾಧ್ಯಕ್ಷ ಎ.ಜೆ.ಕಿಣಿ, ಪ್ರಧಾನ ಕಾರ್ಯದರ್ಶಿ ಸಾಲಿಗ್ರಾಮ ಗಣೇಶ ಶೆಣೈ, ಸಮಿತಿ ಸದಸ್ಯ ಜಾಲೀಲೆ ರೇಖಾ ದೇವದಾಸ ಪ್ರಭು, ಸಿ.ಪಿ.ಕಾಮತ್, ಕೆ. ಗಣೇಶ ಕಿಣಿ, ವೈ. ಗಣೇಶ ಕಾಮತ, ಎನ್. ಹರೀಶ ನಾಯಕ್, ಪಿ. ನಾಗೇಶ ಶೆಣೈ ಆದಿ ಸಮಾಜ ಬಾಂಧವ ಉಪಸ್ತಿತ ವ್ಹರಲೀಲೆ.
- ವರದಿ : ಸಾಲಿಗ್ರಾಮ ಗಣೇಶ ಶೆಣೈ.

ಶ್ರೀಮತ್ ಆನಂತೇಶ್ವರ ದೇವಳ, ಮಂಜೇಶ್ವರ

ಮಂಜೇಶ್ವರಾಚೆ ಶ್ರೀ ಆನಂತೇಶ್ವರ ದೇವಳಾಂತು ವೈಶಾಕ ಮಾಸಾಂತು ತಾ. ೨೪-೦೫-೨೦೧೩ ದಿವಸು ಶ್ರೀ ನರಸಿಂಹ ಜಯಂತಿ ಪ್ರಯುಕ್ತ ಸಮಾರಾಧನ, ಹಗಲೋತ್ಸವ, ಪೂರ್ಣೋತ್ಸವು, ಶ್ರೀ ಉಗ್ರನರಸಿಂಹ ದೇವಾಕ ಕನಕಾಭಿಷೇಕ, ಗಂಗಾ ಜಲಾಭಿಷೇಕ, ಪಂಚಾಮೃತಾಭಿಷೇಕ, ವಸಂತ ಪೂಜಾ, ರಾತ್ತಿಕ ರುಕ್ಕಾಚೆ ಲಾಲ್ಕಿ ಉತ್ಸವ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಚಲೇಲೆ ಖಬ್ಬರ ಮೆಳ್ಳಾ.  ಜ್ಯೇಷ್ಠ ಮಾಸಾಂತು ೧೯-೦೬-೧೩ಕ ಶ್ರೀ ಕಲ್ಪವೃಕ್ಷ ಮಹಾಮಾಯಿ ಅಮ್ಮಲೆ ಪುನರ್ ಪ್ರತಿಷ್ಠಾ ವರ್ಧಂತಿ ಪ್ರಯುಕ್ತ ಶ್ರೀ ದೇವಳಾಂತು ಧೋಂಪಾರಾ ಮಹಾಪೂಜಾ, , ಸಂತರ್ಪಣ, ಸಾಂಜ್ವಾಳಾ ಪೂಜಾ ಇತ್ಯಾದಿ ಧಾರ್ಮಿಕ ಕಾರ್ಯಾವಳಿ ಚಲ್ಲೆ. ಮುಖಾರಿ ಶ್ರಾವಣ ಮ್ಹಹಿನ್ಯಾಂತು ದಿ. ೧೨-೦೮೧೩ಕ ನಾಗರ ಪಂಚಮಿ, ೧೬-೦೮-೧೩ಕ ವರಮಹಾಲಕ್ಷ್ಮೀ ವೃತಂ, ೨೮-೮-೧೩ಕ ಶ್ರೀ ಕೃಷ್ಣ ಜನ್ಮಾಷ್ಟಮಿ ಕಾರ್ಯಕ್ರಮ ವಿಂಗವಿಂಗಡ ವಿಧಿ-ವಿಧಾನ ಸಮೇತ ಚೊಲ್ಚೆ ಆಸ್ಸ ಮ್ಹೊಣು ಕೋಳ್ನು ಆಯಲಾ.

ಶ್ರೀ ವೆಂಕಟರಮಣ ದೇವಳ, ಕಾರ್ಕಳ

ಹಾಂಗಾಚೆ ರಥೋತ್ಸವು ತಾ. ೧೦-೦೫-೨೦೧೩ ದಾಕೂನು ೧೫-೧೦-೨೦೧೩ ಪರ್ಯಂತ ಮಹಾ ಪ್ರಾರ್ಥನ, ಧ್ವಜಾರೋಹಣ, ಬಲಿ, ಪಾಲಂಖಿ ಉತ್ಸವು, ಚಕ್ರೋತ್ಸವು, ರಾತ್ತಿಕ ರುಪ್ಪೆ ಗರುಡ ವಾಹನ ಉತ್ಸವು, ಕುವಾಳೆಂ ಹನುಮಂತ ವಾಹನ ಉತ್ಸವು, ಕಟ್ಟೆ ಪೂಜಾ, ತಾಂಬ್ಡೆ ಗರುಡ ವಾಹನ ಉತ್ಸವು, ಸ್ವರ್ಣ ಮಂಟಪಾಂತು ಮೃಗಬೇಟೆ, ಕೆರೆ ದೀಪ, ಸಾನ ತೇರಾ ಉತ್ಸವು, ೧೪-೫ಕ ರಥೋತ್ಸವ ಪ್ರಯುಕ್ತ ರಥಾರೋಹಣ, ಫಲಾವಳಿ, ಸಮಾರಾಧನ, ರಥೋತ್ಸವು, ಕಡೇರ್‍ಚೆ ದಿವಸು ಅವಭೃತೋತ್ಸವು ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಬರಶಿ ವಿಜೃಂಭಣೇರಿ ಚಲೀಲೆ ಖಬ್ಬರ ಮೆಳ್ಳಾ. ದಿ. ೨೫-೦೫-೧೩ದಿವಸು ವೈಶಾಖ ಫುನ್ವೆ ಪ್ರಯುಕ್ತ ಸಕ್ಕಾಣಿ ರಾಮಸಮುದ್ರ ಲಾಗ್ಗಿ ಪಾಲಂಖೀ ಉತ್ಸವು ಚಲ್ಯಾರಿ, ರಾತ್ತಿಕ ಬಂಡಿ ವಯ್ರಿ ಪಾಲಂಖೀ  ಉತ್ಸವು ಚಲ್ಲೆ. ಮುಖಾರಿ ದಿ. ೧೮-೦೭-೧೩ ದಾಕೂನು ಶ್ರೀ ದೇವಾಲೆ ಚಾತುರ್ಮಾಸ ಸುರುವಾತ ಜಾತ್ತಾ. ತ್ಯಾ ದಿವಸು ಪಂಚಾಮೃತಾಭಿಷೇಕ, ಶ್ರೀ ದೇವಾಕ ಕಲಶಾಭಿಷೇಕ, ಬ್ರಾಹ್ಮಣ ಸಂತರ್ಪಣ ಆದಿ ಕಾರ್ಯಕ್ರಮ ಚೊಲಚೆ ಆಸ್ಸ. ಆನಿ ಅಗಸ್ಟ ೧೨ಕ ನಾಗರ ಪಂಚಮಿ, ಅಗಸ್ಟ್ ೨೦ಕ ಋಗುಪಾಕರ್ಮ ಚೊಲಚೆ ಆಸ್ಸ

ಶ್ರೀ ವೆಂಕಟರಮಣ ದೇವಳ, ಮೂಡಬಿದ್ರೆ

ಹಾಂಗಾ ೧೩-೦೫೧೩ ದಿವಸು ಅಕ್ಷಯ ತದಿಗೆ ಪ್ರಯುಕ್ತ ದೇವತಾ ಪ್ರಾರ್ಥನ, ಶತಕಲಶಾಭಿಷೇಕ, ಭೂರಿ ಸಮಾರಾಧನ, ಸಾಂಜ್ವಾಳಾ ಉತ್ಸವು, ವಸಂತ ಪೂಜಾ ಚಲ್ಲಿ. ದಿ. ೧೫-೦೫-೧೩ ದಿವಸು ಶ್ರೀ ಹನುಮಂತ ದೇವಳಾಚೆ ನವೀಕೃತ ಇಮಾರತ್ತಾಚೆ ವರ್ಧಂತಿ ಉತ್ಸವ ಪ್ರಯುಕ್ತ ಮಹಾ ಪೂಜಾ ಚಲ್ಲಿ. ೧೭-೫-೧೩ಕ ಶ್ರೀ ಹನುಮಂತ ದೇವಳಾಚೆ ಪ್ರತಿಷ್ಠಾ ವರ್ಧಂತಿ ಪ್ರಯುಕ್ತ ಮಹಾಪೂಜಾ, ಭೂರಿ ಸಮಾರಾಧನ, ವಸಂತ ಪೂಜಾ ಚಲ್ಲಿ. ದಿ. ೨೬-೦೫-೧೩ ಶ್ರೀ ವೆಂಕಟರಮಣ ದೇವಾಲೆ ಪ್ರತಿಷ್ಠಾ ವರ್ಧಂತಿ ಪ್ರಯುಕ್ತ ದೇವತಾ ಪ್ರಾರ್ಥನ, ಶತಕಲಶಾಭಿಷೇಕ, ಭೂರಿ ಸಮಾರಾಧನ, ವಸಂತ ಪೂಜಾ ಇತ್ಯಾದಿ ಕಾರ್ಯಕ್ರಮ ಚಲ್ಲೆ. ೧೮-೬-೧೩ಕ ಶ್ರೀ ವೆಂಕಟರಮಣ ದೇವಾಲೆ ಪುನಃ ಪ್ರತಿಷ್ಠಾ ವರ್ಧಂತಿ ಪ್ರಯುಕ್ತ ದೇವತಾ ಪ್ರಾರ್ಥನಾ, ಶತಕಲಶಾಭಿಷೇಕ, ಭೂರಿ ಸಮಾರಾಧನ, ರಾತ್ತಿಕ ವಿಶೇಷ ರಂಗಪೂಜಾ ಇತ್ಯಾದಿ ಕಾರ್ಯಕ್ರಮ ಚಲ್ಲೆ. ಮುಖಾರಿ ಜುಲೈ ೧೮ಕ ಶ್ರೀ ದೇವಾಲೆ ಚಾತುರ್ಮಾಸ ಆರಂಭ, ಅಗಸ್ಟ ೨೦ಕ ಋಗುಪಾಕರ್ಮ, ಅಗಸ್ಟ ೨೮ಕ ಶ್ರೀ ಕೃಷ್ಣ ಜನ್ಮಾಷ್ಟಮಿ ಕಾರ್ಯಕ್ರಮ ಚೊಲಚೆ ಆಸ್ಸ.

ಕು| ವೈಷ್ಣವಿ ಎಸ್. ಪೈಕ ಸನ್ಮಾನು

ಸಿದ್ದಾಪೂರ್‍ಚೆ ದಿ|| ವೇ|| ಶ್ರೀ ಸರ್ವೋತ್ತಮ ಕೃಷ್ಣ ಭಟ್ಟ ಮೆಮೋರಿಯಲ್ ಟ್ರಸ್ಟ್(ರಿ) ತರಪೇನ ಪ್ರತಿಭಾ ಪುರಸ್ಕಾರ -೨೦೧೩ ಕಾರ್ಯಕ್ರಮಾಂತು ತಾ. ೯-೦೬-೨೦೧೩ ದಿವಸು ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಂತು ಚಲೇಲೆ ಸಮಾರಂಭಾಂತು ಎಸ್.ಎಸ್.ಎಲ್.ಸಿ. ಪರೀಕ್ಷೆಂತು ಚಾಂಗ ಮಾರ್ಕ್ಸ ಘೆತ್ತಿಲೆ ಕುಮಾರಿ ವೈಷ್ಣವಿ ಶಾಂತಾರಾಮ ಪೈ, ಬಿಳಗಿ ಹಾಂಕಾ ಪುರಸ್ಕಾರ ದಿಲ್ಲೆ. ಹೇ ಸಮಾರಂಭಾಕ ಮುಖೇಲ ಸೊಯರೆ ಜಾವ್ನು ಅಂತರಾಷ್ಟ್ರೀಯ ಮಟ್ಟಾಚೆ ಮನೋವಿಜ್ಞಾನಿ ಡಾ|| ರಮೇಶ ಕಾಮತ್, ಬೆಂಗಳೂರು ಆನಿ ಕುಮಟಾಚೆ ಉದ್ಯಮಿ ಶ್ರೀ ಮುರಳಿಧರ ವಿ. ಪ್ರಭು ಹಾನ್ನಿ ಆಯ್ಯಿಲೆ.

ಶುಭ ವಿವಾಹ

ಚಿ||ಸೌ|| ಲಕ್ಷ್ಮೀ (ಶ್ರೀಮತಿ ಪದ್ಮಾವತಿ ಭಟ್ ಆನಿ ಶ್ರೀ ವಾಸುದೇವ ಭಟ್, ಹರಿಖಂಡಿಗೆ ಹಾಂಗೆಲೆ ಧೂವ) ಆನಿ ಚಿ|| ಲಕ್ಷ್ಮೀದಾ (ಶ್ರೀಮತಿ ಮಿತ್ರಾ ಡಿ. ಭಟ್ ಆನಿ ಶ್ರೀ ದಾಮೋದರ ಭಟ್ ಪಾಣೆಮಂಗಳೂರು ಹಾಂಗೆಲೆ ಪೂತು) ಹಾಂಗೆಲೆ ಲಗ್ನ ತಾ. ೨೦-೦೫-೨೦೧೩ ದಿವಸು ಮೂಡಬಿದ್ರೆಚೆ ಶ್ರೀ ವೆಂಕಟರಮಣ ದೇವಳಾಚೆ ಶ್ರೀ ಸುಕೃತೀಂದ್ರ ಕಲಾಮಂದಿರಾಮತು ವಿಜೃಂಭಣೇರಿ ಚಲ್ಲೆ.
ಚಿ|| ಸೌ|| ಸ್ಮಿತಾ (ಶ್ರೀಮತಿ ಶೈಲಜಾ ಎನ್. ಭಟ್ ಆನಿ ಶ್ರೀ ನಾಗೇಂದ್ರ ಭಟ್ ಕೆನರಾ ಬ್ಯಾಂಕ್, ಬಂಟ್ವಾಳಾ ಹಾಂಗೆಲಿ ಧೂವ) ಆನಿ ಚಿ|| ನವನೀv(ಶ್ರೀಮತಿ ಸುಗಂಧ ಆನಿ ಶ್ರೀ ಸರ್ವೋತ್ತಮ ಕಾಮತ್, ಉಡುಪಿ ಹಾಂಗೆಲೆ ಪೂತು) ಹಾಂಗೆಲೆ ಲಗ್ನ ತಾ. ೧೫-೫-೨೦೧೩ ದಿವಸು ಶ್ರೀ ಮಹಾವೀರ ಭವನ, ಮೂಡಬಿದ್ರೆ ಹಾಂಗಾ ವಿಜೃಂಭಣೇರಿ ಚಲ್ಲೆ.
ಸರ್ವ ವ್ಹರೆತು, ವ್ಹಕಲ್ಯಾಂಕ “ಸರಸ್ವತಿ ಪ್ರಭಾ ತರಪೇನ ದೇವು ಬರೆಂ ಕೊರೊ ಮ್ಹಣತಾ.

ಶ್ರೀ ಸಿದ್ಧಿವಿನಾಯಕ ದೇವಳ, ಹೊಸಪೇಟೆ

ಹೊಸಪೇಟೆ ಶ್ರೀ ಸಿದ್ಧಿ ವಿನಾಯಕ ದೇವಳಾಚೆ ೧೪ಚೆ ವಾರ್ಷಿಕೋತ್ಸವು ದಿ. ೧೬-೦೬-೧೩ ದಿವಸು ಧ್ವಜಾರೋಹಣ, ಗಣಪತಿ ಪೂಜನ, ಸ್ವಸ್ತಿ ವಾಚನ, ಗಣಹೋಮು, ಶ್ರೀ ಗಣೇಶಾಕ ವಿಶೆಷ ಪೂಜೊ, ಧಿರ್ಮಾಕುರ ಅರ್ಚನ, ೧೦೮ ಶತಕಲಶ ಅಭಿಷೇಕ, ಶ್ರೀ ಗಣಪತಿಕ ಪುಷ್ಪಾಲಂಕಾರ, ಮಹಾ ನೈವೇದ, ಪಂಚಾಮೃತ ಅಭಿಷೇಕ ಇತ್ಯಾದಿ ವಿಂಗವಿಂಗಡ ಧಾರ್ಮಿಕ ಕಾರ್ಯಾವಳಿ,  ಭಜನ ಬರಶಿ ವಿಜೃಂಭಣೇರಿ ಚಲ್ಲೆ.  ತಾಜ್ಜ ಪುಳ್ದೀಸು ೧೫-೬-೧೩ಕ ಸಾಂಜ್ವಾಳಾ ಶ್ರೀ ಹನುಮಾನ ಸುಂದರ ಕಾಂಡ ಪಾಠ ಹಾಂಗಾಚಿ ಆಶ್ಶಿಲೆ. ಜಾತಿ, ಮತ ಬೇಧ ನಾಶಿ ಅಪಾರ ಲೋಕ ಹೇ ಕಾರ್ಯಕ್ರಮಾಂತು ವಾಂಟೊ ಘೇವ್ನು, ವಿಘ್ನ ವಿನಾಶಕಾಲೆ ಕೃಪೇಕ ಪಾತ್ರ ಜಾಲ್ಲಿಂತಿ.

ಬೇಡಕಣಿ ಶ್ರೀ ಸೀತಾರಾಮಚಂದ್ರ ದೇವಳ, ಬಿಳಗಿ

ಸಿದ್ದಾಪುರ ತಾ||ಚೆ ಬಿಳಗಿ ಬೇಡ್ಕಣಿ ಶ್ರೀ ಸೀತಾರಾಮಚಂದ್ರ ದೇವಳಾಂತು ಜಿ.ಎಸ್.ಬಿ. ಸಮಾಜ ಬಿಳಗಿ ಹಾಂಗೆಲೆ ತರಪೇನ ಚೈತ್ರಶುದ್ಧ ನವಮಿ ದಿವಸು ಬ್ರಹ್ಮರಥೋತ್ಸವು ವಿಜೃಂಭಣೇರಿ ಚಲ್ಲೆ. ತತ್ಸಂಬಂಧ ಅಷ್ಟಮಿ ದಿವಸು ಪುಷ್ಪ ರಥ ಆನಿ ದಶಮಿ ದಿವಸು ಅವಭೃತೋತ್ಸವು ಚಲ್ಲೆ. ವೈಶಾಖ ವದ್ಯ ದಶಮಿ ದಿವಸು ಬೇಡ್ಕಣಿ ಶ್ರೀ ಸೀತಾರಾಮಚಂದ್ರ ದೇವಾಲೆ ಪ್ರತಿಷ್ಠಾ ವರ್ಧಂತಿ ಪ್ರಯುಕ್ತ ಶತಕಲಶ ಪೂಜಾ ಪುರಸ್ಸತ ಚಲ್ಲೆ. ಮುಖಾರಿ ಕಾರ್ತಿಕ ಶುದ್ಧ ಪುನ್ವೆಕ ವೈಭವೊಪೇತ ಜಾವ್ನು ‘ವನಭೋಜನೋತ್ಸವ ಮನರಂಜನಾ ಕಾರ್ಯಕ್ರಮ ಘಡ್ಚೆ ಆಸ್ಸ ಮ್ಹೊಣು ಬಿಳಗಿಚೆ ವ್ಯಾಪಾರಸ್ಥ ಶ್ರೀ ವೆಂಕಟೇಶ ಬಾಳಗಿ ಹಾನ್ನಿ ಕಳೈಲಾ.
ಶ್ರೀ ಮಹಾವಿಷ್ಣು ದೇವಳ, ಶಿರಸಿ
ಶಿರ್ಶಿ ಶ್ರೀ ಮಹಾವಿಷ್ಣು ದೇವಾಲೆ ೧೭೩ಚೆ ವರ್ಧಂತಿ ಉತ್ಸವು ತಾ. ೧೦-೬-೨೦೧೩ ದಿವಸು ಪ್ರಾರ್ಥನಾ, ಶ್ರೀ ದೇವಾಕ ಶಿಯಾಳ ಅಭಿಷೇಕ, ಶತಕಲಶಾರ್ಚನ, ಶ್ರೀ ಲಘು ವಿಷ್ಣು, ೧೦೮ ಕಲಶಾಚೆ ಶ್ರೀ ಸತ್ಯನಾರಾಯಣ ಪೂಜಾ, ಅನ್ನ ಸಂತರ್ಪಣ, ಧಾ ಸಮಸ್ತಾಲೆ ವಾರ್ಷಿಕ ಸಭಾ, ರಾತ್ತಿಕ ಪಾಲಂಖೀ ಉತ್ಸವು, ಪಾನ್ನೇಢ ಸೇವಾ, ಅಷ್ಟಾವಧಾನ ಸೇವಾ, ಪನವಾರ ಸೇವಾ, ಪ್ರಸಾದ ಕಾರ್ಯಕ್ರಮ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಬರಶಿ ಚಲೇಲೆ ಖಬ್ಬರ ಮೆಳ್ಳಾ. 

ಶ್ರೀ ದೈವಜ್ಞ ಸಮಾಜ ಸೇವಾ ಟ್ರಸ್ಟ, ಗಂಗಾವತಿ

ಗಂಗಾವತಿಚೆ ಶ್ರೀ ದೈವಜ್ಞ ಸಮಾಜ ಸೇವಾ ಟ್ರಸ್ಟ(ರಿ) ಹಾನ್ನಿ ಆನೆಗುಂದಿ ರಸ್ತ್ಯಾರಿ ಶ್ರೀ ರಾಮುಲು ಕಾಲೇಜಾ ಮುಖಾರಿ ನವೀನ ಜಾವ್ನು ಬಾಂದಿಲೆ ಶ್ರೀ ಜ್ಞಾನ ಗಣಪತಿ ದೇವಾಲೆ ಮೂರ್ತಿ ಪ್ರತಿಷ್ಠಾಪನಾ ಸಮಾರಂಭ ಶ್ರೀ ದೈವಜ್ಞ ಮಠಾಧೀಶ ಶ್ರೀ ಶ್ರೀ ಸಚ್ಚಿದಾನಂದ ಜ್ಞಾನೇಶ್ವರ ಭಾರತಿ ಮಹಾ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ದಿ. ೨೮-೫-೧೩ ದಾಕೂನು ೩೧-೫-೧೩ ಪರ್ಯಂತ ಅಪಾರ ಸಮಾಜ ಬಾಂಧವಾಲೆ ಉಪಸ್ಥಿತೀರಿ ವಿಜೃಂಭಣೇರಿ ಚಲ್ಲೆ. ತತ್ಸಂಬಂಧ ಶ್ರೀ ಗಣೇಶ ಪೂಜಾ, ಬ್ರಹ್ಮಕೂರ್ಚೋಪವಾಸ, ಗ್ರಾಮದೇವತಾ, ಸ್ಥಾನ ದೇವತಾ ಪ್ರಾರ್ಥನ, ಶ್ರೀ ಲಂಭೋದರ ಪೂಜಾ, ಪುಣ್ಯಾಹ, ಮಾತೃಕಾ ಪೂಜಾ, ದೇವನಾಂದಿ, ಮಧುಪರ್ಕ, ಋತ್ವಿಕ್ ವರಣಿ, ದಿಕ್‌ಶುದ್ಧಿ, ಕೌತುಕ ಬಂಧನ, ವಾಸ್ತು, ರಾಕ್ಷೆಘ್ನ ಹವನ, ರಜ್ಜು ಬಂಧನ, ಬಲಿದಾನ, ಸುಮುಖ ಪೂಜಾ, ಆಧಿವಾಸ ಪೂಜಾ, ಜಲಾಧಿವಾಸ, ಧಾನ್ಯಾಧಿವಾಸ, ಸಪ್ತಾಧಿವಾಸ, ಗಣಹೋಮು, ನವಗ್ರಹ, ಮೃತ್ಯುಂಜಯಾದಿ ಕಲಶ ಸ್ಥಾಪನ, ಯಾಗೇಶ, ಕುಂಭೇಶ ಪ್ರಾಣಕಲಶ ಸ್ಥಾಪನ, ಉಪನಿಷತ್ ಪಾರಾಯಣ, ಪ್ರಸಾದ ಶುದ್ಧಿ, ಶಯ್ಯಾಧಿವಾಸ, ಏಕದಂತ ಪೂಜಾ, ೩೦-೫-೧೩ಕ ಮಿಥುನ ಲಗ್ನಾಚೆ ಇಷ್ಟಾಂಶಾಂತು ಪರಿವಾರ ಸಹಿತ ಶ್ರೀ ದೇವಾಲೆ ಸ್ಥಿರ ಪ್ರತಿಷ್ಠಾಪನ, ಕಲಾನ್ಯಾಸ ಪೂಜಾ, ಶಿಖರ ಸ್ಥಾಪನ, ಅಲಂಕಾರ ಪೂಜಾ, ಅನ್ನ ಸಂತರ್ಪಣ, ಕಲಾ ಹೋಮು, ಆಧಿವಾಸ ಹೋಮು, ದಿಕ್ ಬಲಿ, ರಾಜೋಪಚಾರ ಪೂಜಾ, ಕಪಿಲ ಹೋಮು, ಉಪನಿಷದ್ ಹೋಮು, ಯಾತ್ರಾ ಹೋಮು, ಚೂರ್ಣ ಹೋಮು, ಅವಶಿಷ್ಠ ಹೋಮು, ಪೂರ್ಣ ಕಲಾರೋಹಣ, ಕುಂಭಾಭಿಷೇಕ, ಬ್ರಹ್ಮಚಾರಿ ಪೂಜಾ, ದೀಕ್ಷಾ ವಿಸರ್ಜನ, ದೀಪಾಲಂಕಾರ ಪೂಜಾ ಇತ್ಯಾದಿ ಧಾರ್ಮಿಕ ಕಾರ್ಯಾವಳಿ ಬರಶಿ ಚಲೇಲೆ ಖಬ್ಬರ ಮೆಳ್ಳಾ.  ಹೇ ದೇವಳಾ ಖಾತ್ತಿರ, ಹಾಂಗಾ ಚೊಲಚೆ ಖಂಚೇ ಸೇವಾ ಖಾತ್ತಿರಿ ಮಾಹಿತಿ ಜಾವ್ಕಾ ಜಾಲೇಲ್ಯಾನ ಮೊಬೈಲ್ ನಂ. ೯೦೩೫೫೭೦೧೨೮, ೯೮೮೬೧೫೯೧೭೯ ಹಾಂಗಾಕ ಸಂಪರ್ಕು ಕೊರಯೇತ.

ಹುಬ್ಬಳ್ಳಿ ಶ್ರೀ ಕಾಶೀಮಠ ವೆಂಕಟ್ರಮಣ ದೇವಳ

ಹುಬ್ಬಳ್ಳಿಚೆ ಶಕ್ತಿ ಕಾಲನಿಂತು ನೃಪತುಂಗ ಗುಡ್ಡೆ ಮಾಕಶಿ ಬಗಲೇನ ಆಸ್ಸುಚೆ ಶ್ರೀ ಕಾಶೀಮಠಾಂತು ಶ್ರೀಮದ್ ವರದೇಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪುಣ್ಯ ತಿಥಿ ತಾ,. ೧೦-೭-೨೦೧೩ ದಿವಸು ಚಲ್ಲೆ. ಆನಿ ಮುಖಾರಿ ತಾ. ೧೮-೭-೧೩ಕ ಶ್ರೀ ವೆಂಕಟರಮಣ ದೇವಾಲೆ ಚಾತುರ್ಮಾಸ ಆರಂಭ, ೨೩-೭-೨೦೧೩ಕ ಶ್ರೀಮದ್ ಸುಕೃತೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪುಣ್ಯತಿಥಿ, ೧೬-೦೮-೧೩ಕ ಶ್ರೀ ವರಮಹಾಲಕ್ಷ್ಮೀ ವೃತ, ೧೮-೮-೧೩ಕ ಪವಿತ್ರಾರೋಪಣ ಆನಿ ೨೦-೮-೧೩ಕ ಋಗುಪಾಕರ್ಮ ಚೊಲಚೆ ಆಸ್ಸ ಮ್ಹಣಚೆ ಖಬ್ಬರ ಮೆಳ್ಳಾ.

ಮಂಗಳೂರಾಂತು ಲಗ್ನಾ ಪಿಶ್ಯೆ

ವಿಶ್ವ ಕೊಂಕಣಿ ಕೇಂದ್ರ (ರಿ) ಮಂಗಳೂರ ಆನಿ  ಕೊಂಕಣಿ ಸಾಂಸ್ಕೃತಿಕ ಸಂಘ ರಿ) ಮಂಗಳೂರ ಹಾಂಗೆಲೆ ಜೋಡ ಆಶ್ರಯರಿ ವಡಾಲಾ, ಮುಂಬಯಿಯ ರಾಮ ಸೇವಕ ಸಂಘ,   ಶ್ರೀ ಎ.ಜಿ. ಕಾಮತಾನ ನಿರ್ದೇಶನ ಕೆಲ್ಲೆಲೆ ಕೊಂಕಣಿ ಹಾಸ್ಯಮಯ ನಾಟಕ ಲಗ್ನಾ ಪಿಶ್ಯೆ ೨೫-೦೫-೨೦೧೩ಕ ವಿಶ್ವ ಕೊಂಕಣಿ ಕೇಂದ್ರಾಚೆ ಸ್ಥಾಪನಾಧ್ಯಕ್ಷ ಕೊಂಕಣಿ ಸರದಾರ ಬಸ್ತಿ ವಾಮನ ಶೆಣೈಲೆ ಅಧ್ಯಕ್ಷತೇರಿ  ಕೆನರಾ ಹೈಸ್ಕೂಲಾಚೆ ಮಿಜಾರ ಗೋವಿಂದ ಪೈ ಮೆಮೊರಿಯಲ್ ಹಾಲಾಂತು ಅತ್ಯುತ್ತಮ ಜಾವನು ಪ್ರದರ್ಶನ ಜಾಲ್ಲೆಂ. ಮುಖೇಲ ಸೊಯ್ರೆ ದಾವನ  ಖ್ಯಾತ ಕ್ಯಾನ್ಸರ್ ರಿಸರ್ಚ್ ವಿeನಿ ಡಾ. ಸಿ. ಎನ್. ಶೆಣೈ ಮುಂಬಯಿ ಆನಿ ನಾಟಕಾಚೆ ನಿರ್ದೇಶಕ ಶ್ರೀ ಎ.ಜಿ. ಕಾಮತ್ ಆನಿ ಎಸ್.ಸಿ.ಡಿ.ಸಿ.ಸಿ.  ಬ್ಯಾಂಕಾಚೆ ನಿವೃತ್ತ ಅಧಿಕಾರಿ ಬಂಟ್ವಾಳ ಶ್ರೀ ಪಿ. ನಾರಾಯಣ ಕಾಮತ ಹಾನ್ನಿ ಕಾರ್ಯಕ್ರಮ ನಿರ್ವಹಣ ಕೆಲ್ಲೆಂ. ಕೊಂಕಣಿ ಸಾಂಸ್ಕೃತಿಕ ಸಂಘಾಚೆ ಅಧ್ಯಕ್ಷ ಶ್ರೀ ವೆಂಕಟೇಶ ಎನ್ ಬಾಳಿಗಾ ಆನಿ ಕೋಶಾಧ್ಯಕ್ಷ ಶ್ರೀ ಗೋವಿಂದ ಪ್ರಭು,  ಶ್ರೀ ಎಮ್. ಆರ್ ಕಾಮತ್ ಉಪಸ್ಥಿತ ಆಶಿಲಿಂಚಿ. ಮುಂಬಯಿಚೆ ಪ್ರಸಿದ್ಧ ಹಾಸ್ಯ ರಂಗನಟ ಕಮಲಾಕ್ಷ ಸರಾಫ್, ಮಮತಾ ಭಟ್, ಹರಿ ಶ್ಯಾನಭಾಗ, ವಸುಧಾ ಪ್ರಭು, ಹರೀಶ್ ಚಂದಾವರಕಾರ, ಸುರೇಶ  ಕಿಣಿ, ವಿ.ವಿ. ಪೈ, ಎ.ಜಿ. ಕಾಮತ್ ಹಾನ್ನಿ  ನಾಟಕಾಂತು ಅಭಿನಯ ಕೆಲ್ಲಾಂ. ತಶ್ಶೀಚಿ ವಿಶ್ವ ಕೊಂಕಣೀ ಕೇಂದ್ರ ಆನಿ ಶ್ರೀ ಮಾಧವೇಂದ್ರ ಪ್ರಸಾದಿತ ಕೊಂಕಣೀ ಕಲಾವೃಂದ ಸಹಯೋಗಾನಿ ಪೂರ್ಣಿಮಾ ಜಿ.ರಾವ್ ಹಾನ್ನಿ ಬರೋವನು, ಪ್ರಸ್ತುತ ಕೆಲೇಲೆ ಭೂ ಕೈಲಾಸ ಮ್ಹಣಚೆ ಕೊಂಕಣೀ ನೃತ್ಯ ನಾಟಕ ತಾ. ೩೧-೦೫-೧೩ ದಿವಸು ಮಂಗಳೂರ್‍ಚೆ ಟೌನ್‌ಹಾಲಾಂತು ಚಲ್ಲೆ.

‘ಸರಸ್ವತಿ ಪ್ರಭಾ ೨೫ ವರ್ಷಾಕ ಯವ್ನು ಪಾವ್ವಿಲೆ ಕಾಣಿ-೨

ತ್ಯಾ ಪೂರಾ ವ್ಹಹಿ, ಜಾಲ್ಯಾರಿ ಪತ್ರಿಕಾ ಛಾಪಸೂಚೆ(ಪ್ರಿಂಟ್ ಕೊರ್‍ಚೆ) ಖಂಯಿ? ತೆದ್ದನಾ ಆತ್ತಾವರಿ ಡಿಟಿಪಿ, ಆಪ್‌ಸೆಟ್ ಪೂರಾ ಆಯ್ಯಿಲೆ ನಾಶ್ಶಿಲೆ. ಟ್ರಡೆಲ್ ಮಿಷನ್. ಮೊಳೆಂ ಜೋಡ್ಸುನು ಕಾಂಪೋಸ್ ಮ್ಹೊಣು ಕರ್‍ತಾ ಆಶ್ಶಿಲೆ. ತ್ಯಾ ತಿತ್ಲೇಕ ಸುಲಭಾ ಕಾಮ ನ್ಹಂಹಿ. ಆಯ್ಚೆ ಮುದ್ರಣ ರಂಗಾಂತು ಜಾಲೇಲೆ ಕ್ರಾಂತಿ ಪಳೆಯಿಲ ತೆದ್ದನಾ ಖಂಡಿತ ತ್ಯಾ ಮಸ್ತ ಪರಿಶ್ರಮಾಚೆ ಕಾರ್ಯ ಮ್ಹೊಣು ಧೈರ್ಯ್ಯಾನ  ಸಾಂಗುಯೇತ. ಕಷ್ಟಕಿ, ಸುಖಕಿ, ಜಾಲ್ಯಾರಿ ಕೊಂಕಣಿ ಕಂಪೋಸಿಂಗ್ ಕರತಾಲಿ ಜಾವ್ಕಾಮೂ! ತೆದ್ದನಾ ಮಾಕ್ಕಾ ಧೈರ್ಯ ದೀವ್ನು “ಆಪ್ಪಣ ತುಕ್ಕಾ ಕಂಪೋಸಿಂಗ್ ಆನಿ ಪ್ರಿಂಟ್ ಕೋರ್ನು ದಿತ್ತಾ ಮ್ಹೊಣು ಮುಖಾರ ಆಯ್ಯಿಲೆ ಶಕ್ತಿ ಪ್ರಿಂಟಿಂಗ್ ಪ್ರೆಸ್ಸಾಚೆ ಶ್ರೀ ಪವಾರ್ ಕುಟಂಬಾಚಿ. ತಾ‌ಒಗೆಲೆ ಜಾತಿ ಪಟ್ಟೆಗಾರ (SSಏಕ್ಷತ್ರೀಯ), ಕೊಂಕಣಿಚೆ ಸಂಪರ್ಕು ತಾಂಕಾ ನಾತಲೇರಿ ಸೈತ ತಾನ್ನಿ ತುಮ್ಮಿ ಚಂದ ಕೋರ್ನು ಬರೋವನು ದಿಯ್ಯಾತಿ, ಆನಿ ಕಂಪೋಸ್ ಜಾಲ್ಲ ಮಾಗಿರಿ ಕರೇಕ್ಷನ್ ಘಾಲ್ನು ದಿಯ್ಯಾತಿ. ಸೂರು ಕೋರ್‍ಯಾ, ಮುಖಾರಿ ಆಮ್ಚೇನ ಜಾಯ್ನಾ ಜಾಲ್ಯಾರಿ ತುಮಕಾ ಕಂಪೋಸಿಂಗ್ ಶಿಕ್ಕೊನು ದಿತ್ತಾತಿ, ತುಮ್ಮಿಚಿ ಕರಾ. ಮ್ಹಣ್ಚೆ ಪುಸ್ಸುನು ತಾನ್ನಿ ಮಾಕ್ಕಾ ಧೈರ್ಯ ದಿಲ್ಲೆ.
ಏಕ ಸಮಸ್ಯೆ ಆಯ್ಯಿಲೆ ತಿತ್ಲೆಚೆ ವೆಗ್ಗಿ ನಿವಾರಣ ಜಾಲ್ಲೆ. (ಮಾಕ್ಕ ಆತ್ತ ದಿಸ್ತಾ ಹೇಂಚಿ ನ್ಹಂಹಿವೇ ಪರಮಾತ್ಮಾಲಿ ಕೃಪಾ ಮ್ಹೊಣು.) ಮುಖಾರಿ ತಾಂತು ಕಸ್ಸಲೆ ಕಸ್ಸಲೆ ಘಾಲ್ಕಾ ಮ್ಹಣ್ಚೆ ಗೊಂದೋಳು ಮಾಕ್ಕಾ ಸೂರ ಜಾಲ್ಲೆ. ಕಿತಯಾಕ ಮ್ಹಳಯಾರಿ ಹೇ ಏಕ ಏಕವ್ಯಕ್ತಿ ಪ್ರಯತ್ನ. ಕೋಣಾಲಾಗ್ಗಿ ತರಿ ನಿಮ್ಗೂವ್ಯಾ ಮ್ಹಳಯಾರಿ ಹಾಂವ ಆಸ್ಸುಚೆ ಹುಬ್ಳಿಂತು, ಹಾಂಗಾ ಕೊಂಕಣಿ ಲೇಖಕ ಆಸ್ಸುಚೆ ದೂರ ಉರ್‍ಲೆ, ಕೆಲವ ಲೋಕ ತೆದ್ನಾ ಕೊಂಕಣಿಂತು ಉಲ್ಲೋವಚಾಕ ಸೈತ ಲಜ್ಜಿತಾ ಆಶ್ಶಿಲೆ. ತ್ಯಾ ಮಧ್ಯೆ ಹಾಂವ ಏಕ್ಪಂತಾ ಶಿರ್ಶಿಂತು ಉದ್ಘಾಟನಾ ಸಮಾರಂಭಾಚೆ ತಯಾರಿ  ಖಾತ್ತಿರಿ ಚಲೀಲೆ ಏಕ ಮೀಟೀಂಗಾಕ ವಚ್ಚುನು ಆಯಲೊ. ತೆದ್ದನಾ ಮಾಕ್ಕಾ ಡಾ|| ಎಲ್.ಎಚ್.ಪೈ, ಶ್ರೀ ಶಾಂ.ಮಾ. ಕೃಷ್ಣರಾಯ, ಕೋಡ್ಲು ಆನಂದು ಶ್ಯಾನುಭಾಗ, ಅನಿಲ ಪೈ ಆದಿ ಲೋಕಾಲೆ ಗುರ್‍ತು ಜಾಲ್ಲೆ. ತಾಂಕಾಯಿ ಹೇ ಸಂದಭಾರಿ ಹಾಂವ ಪತ್ರಿಕಾ ಉಗ್ತಾವಣ ಕರ್‍ತಾ ಮ್ಹಣ್ಚೆ ಪೂರ್ತಿ ಭರ್‍ವಸ ಆಯ್ಲಿ.
“ಸರಸ್ವತಿ ಪ್ರಭಾಚೆ ಪ್ರಯೋಗ ಸಂಚಿಕೆಚೆ ಬಾಯ್ಚೆ(ಕವರ್) ಪುಟಾಂತು ಬಾಲಕೃಷ್ಣಾಲೆ ಏಕ ಚಿತ್ತರ ತಾಜ್ಜ ಲಾಗ್ಗಿ “ದುಷ್ಟ ಶಿಕ್ಷಕು, ಶಿಷ್ಟ ರಕ್ಷಕು ಶ್ರೀ ಕೃಷ್ಣ ಪರಮಾತ್ಮಾನ ಕೊಂಕಣಿ ಜನಾಂಕ ಹೇ ಪುಸ್ತಕಾಕ ಚಂದಾದಾರ ಜಾವ್ನು, ಜಾಹೀರಾತು ದೀವ್ನು ಅಭಿವೃದ್ಧಿ ಕೊರ್‍ಚೆ ಬುದ್ಧಿ ದಿಂವೊ, ಆನಿ ಪರಮಾತ್ಮಾಲೆ ದಯಾ, ಜನಾಲೆ ಆಶೀರ್ವಾದು ಆಮ್ಗೆಲೆ ವಯ್ರಿ ಆಸೊ ಹೇ ಆಮ್ಗೆಲೆ ಭಕ್ತಿಪೂರ್ವಕ ಕೋರಿಕಾ -ಸಂ. ಮ್ಹೊಣು ಘಾಲ್ಲೆ. ಸರಸ್ವತಿ ಪ್ರಭಾಚೆ ಪಯ್ಲೆಚೆ ಪ್ರಯೋಗ ಸಂಚಿಕಾ ದಾಕೂನು ಆಜಪರ್ಯಂತ ಚುಕನಾಶಿ ಪ್ರಕಟ ಜಾಲೇಲೆ ಏಕೈಕ ಅಂಕಣ ಮ್ಹಳಯಾರಿ “ಮೆಗೇಲೆ ಉತ್ತರ ಸುರವೇಕ ಪತ್ರಿಕೆಚೆ ಕಷ್ಟ-ಸೂಖ ಪರಸ್ಪರ ವಾಂಟೂನು ಘೆವ್ಚೆ ಖಾತ್ತಿರಿ ಸುರುವಾತ ಕೆಲೇಲೆ ಹೇ ಅಂಕಣ ಆಜಿ ಮಸ್ತ ಲೋಕಾಲೆ ಅಭಿಮಾನಾಚೆ ಅಂಕಣ ಮ್ಹಣೋವ್ನು ಘೆತಲಾ. ಮೆಗೇಲೆ ಉತ್ತರ ಹಾಜ್ಜ ಬರಶಿ ಹಾಂವೆಚಿ ಬರೆಯಿಲೆ “ಕಡ್ಗಿ ಮಾಯ್ಯೆಲೆ ಯೋಗಾಭ್ಯಾಸು, ಆನಿ ಕಂದಾಯ ಫಲ, ಮೀಟ ಮಿರ್ಸಾಂಗ ಮ್ಹಣ್ಚೆ ಆನ್ನೇಕ ಅಂಕಣ, ಕೊಂಕಣಿ ಭಾಷೆ ಆನಿ ತಾಜ್ಜ ಅಭಿವೃದ್ಧಿ, ಅಂಕೋಲೆಚೆ ಶ್ರೀ ರಮಾಕಾಂತ ಆರ್ ಶೆಣೈ(ಮಡಗಾಂವಕರ್) ಹಾನ್ನಿ ಬರೆಯಿಲೆ ‘ಆಮ್ಗೇಲೆ ಸಮಾಜು-ಆಯ್ಚೆ ಸ್ಥಿತಿ ಆನಿ ಅಭಿವೃದಿ ಮ್ಹಣ್ಚೆ ಲೇಖನ, ಶ್ರೀ ಎನ್.ವಿ.ಆರ್.ಪ್ರಭು ಹಾನ್ನಿ ಬರೆಯಿಲೆ ‘ಸ್ವಾಮ್ಯಾಲೆ ಮಾರ್ಗದರ್ಶನಾಂತು ಸಾರಸ್ವತಾಲೆ ಅಭಿವೃದ್ಧಿ ಆಸ್ಸ. ಇತ್ಲೆ ಸಾಹಿತ್ಯ ಆನಿ ಥೊಡೆ ಕೊಂಕಣಿ ಖಬ್ಬರ ಪ್ರಯೋಗ ಸಂಚಿಕೆಂತು ಆಶ್ಶಿಲೆ. ಹಾಂವೆ ಹೇ ಪ್ರಯೋಗ ಸಂಚಿಕೆಚೆ ಫಾಯ್ಶಿ (೫೦೦) ಪ್ರತಿ ಪ್ರಕಟ ಕೆಲೇಲೆ. ತೆದ್ದನಾ ನ್ಯೂಸ್ ಪೇಪರ್ ಮ್ಹೊಲ ರೀಮಾಕ ರು. ೩೦/- ಆಶ್ಶಿಲ ಮ್ಹೊಣು ಉಡಗಾಸು. ಆತ್ತ ತ್ಯಾ ರೀಮಾಕ ೪೫೦/- ಪಶಿ ಚ್ಹಡ ಜಾಲ್ಲಯಾ. ಹಾಂವ ೧೩-೦೫-೧೯೮೯ ದಿವಸು  ಪ್ರಿಂಟ್ ಜಾಲೇಲೆ ಸುಮಾರ ೨೫೦ ಪ್ರತ್ಯೋ ಘೇವ್ನು ಶಿರ್ಶಿಕ ಘೆಲ್ಲೊ. ತೆದ್ದನಾ ಮಾಕ್ಕಾ ಥಂಯಿ ಚ್ಹಡ ಗುರ್‍ತು ನಾಶ್ಶಿಲೆ, ತ್ಯಾ ಖಾತ್ತಿರಿ ಲಾಜಾಂತು ರೂಮ್ ಕೋರ್ನು ರಾಬ್ಬಿಲೊ ಮ್ಹೊಣು ಉಡಗಾಸು. ಸಾಂಜ್ವಾಳಾ ಶ್ರೀ ಮಾರಿಕಾಂಬಾ ದೇವಳಾಕ ವಚ್ಚುನು, ತಿಗೇಲೆ ದರ್ಶನ ಕೋರ್ನು ಆಯಲೊ. ಮನಾ ಭಿತ್ತರಿ ಹಾಂವ ಏಕ ಕೊಂಕಣಿ ಪತ್ರಿಕಾ ಕಾಡ್ತಾ ಆಸ್ಸ ಮ್ಹಣ್ಚೆ ಸಂಭ್ರಮ ಜಾಲ್ಯಾರಿ ಆನ್ನೇಕ ಕಡೇನ ಲೋಕ ಕಶ್ಶಿ ಘೆತ್ತಾಕಿ? ಮುಖಾರಿ ಪತ್ರಿಕೆ ಭವಿಷ್ಯ ಕಶ್ಶಿಕಿ ಮ್ಹಣಚೆ ಆತಂಕ ಆಶ್ಶಿಲೆ.  ಹೊಟೇಲಾಂತು ಜೇವ್ನು ಯವ್ನು ಹೊಟೇಲಾಂತು ನಿದ್ದೆಲೊ.ನೀದ ಯವಚಾಕ ಚ್ಹಡ ವೇಳು ಲಾಗ್ಗನಿ. ಸಂಭ್ರಮು-ಆತಂಕ ಮಧ್ಯೇಚಿ ಚಾಂಗ ನೀದ ಪಳ್ಳೆ. ಕಿತಯಾಕ ಮ್ಹಳಯಾರಿ ಮಾಕ್ಕಾ ತೆದ್ದನಾ ಬರೇ ೨೩ ವರ್ಷ ಪ್ರಾಯು ಚಲ್ತಾ ಆಶ್ಶಿಲೆ.
ಹೆರ್‍ದೀಸು ಸಕ್ಕಾಣಿಫೂಡೆ ಹಾಂವೆ ಬೆಗ್ಗಿ ಉಟಾನು ಶ್ರೀ ಮಾರಿಕಾಂಬಾ ದೇವಳಾಕ ಪೇಪರಾಚೆ ಕಾಟು ಧೋರ್ನು ಘೆಲ್ಲೊ. ಥಂಯಿ ಸಮಾರಂಭಾಕ ಅಂತಿಮ ಘಡೇಚೆ ತಯಾರಿ ಚಲ್ತಾ ಆಶ್ಶಿಲೆ. ಗುರ್‍ತು ಆಶ್ಶಿಲ್ಯಾಲಾಗ್ಗಿ ಉಲೋವ್ನು, ವಿಂಗಡ ಲೋಕಾಲೆ ಗುರ್‍ತು ಕೋರ್ನು ಘೇವ್ನು, ಏಕ್ಪಂತಾ ಶ್ರೀ ಮಾರಿಕಾಂಬೆಲೆ ದರ್ಶನ ಘೇವ್ನು ಆಯಲೊ. ತೆದ್ದನಾ “ಉತ್ತರ ಕನ್ನಡ ಜಿಲ್ಲಾ ಕೊಂಕಣಿ ಸಾಹಿತ್ಯ ಪರಿಷತ್ತಾಚೆ ಉದ್ಘಾಟನಾ ಸಮಾರಂಭ ಆರಂಭ ಜಾಲೇಲೆ. ತ್ಯಾಂಚಿ ವೇದಿಕೇರಿ ಶ್ರೀಮಾರಿಕಾಂಬೆಲೆ ಮುಖಾರಿ “ಸರಸ್ವತಿ ಪ್ರಭಾ ಕೊಂಕಣಿ ಪತ್ರಿಕಾ ಶ್ರೀ ಪುಂಡಲೀಕ ನಾಯಕ್, ಗೋಂಯ ಹಾನ್ನಿ ಉಗ್ತಾವಣ ಕೆಲ್ಲೆ. ಹೇ ವೇಳ್ಯಾರಿ ಸಂಘಟಕಾನಿ ಮಾಕ್ಕಾಯಿ ಚಾರಿ ಉತ್ತರ ಉಲೋವಚಾಕ ಅವಕಾಶ ಕೋರ್ನು ದಿಲೀಲೆ. ಹಾಂವೆ ಹೇ ವೇಳ್ಯಾರಿ ಸರ್ವಾನಿ ಪತ್ರಿಕಾ ಅಭಿವೃದ್ಧಿ ಕೊರಚಾಕ ಸಹಾಯು ದಿವ್ಕಾ ಮ್ಹೊಣು ಮಾಗಲೆ. ಸಂಘಟಕಾನಿ ಕೋಣ್ತರಿ ನವೀನ ಉದ್ದಯಿಲೆ ಹೇ ಕೊಂಕಣಿ ಪತ್ರಾಕ ಚಂದಾದಾರ ಜಾವ್ಚೆ ಜಾಲ್ಯಾರಿ ಜಾವ್ಯೇತ ಮ್ಹೊಣೂ ಸಾಂಗಿಲೆ. ಹೇ ಸಂದರ್ಭಾರಿ ಮಾಕ್ಕಾ ಚಿಕ್ಕೆ ಬೇಜಾರ ಜಾವ್ಚೆ ತಸ್ಸಾಲೆ ಏಕ ವಿಷಯು ಘಡ್ಲೆ. ಹಾಂವೆ ವೇದಿಕೆಚಾನ ತೊಗ್ಗು ದೇವ್ನು ಆಯ್ಲ ಕೂಡ್ಲೆ ವ್ಹರಲೀಲೆ ಪ್ರತ್ಯೋ ವಾಂಟುಚಾಕ ಲಾಗಲೊ. ಕೆಲವ ಲೋಕ ನುತ್ ಘೆತಲಿಂತಿ ಆನಿ ಕೆಲವ ಲೋಕ ೧೫ ರೂಪಯ ಕಾಣು ದೀವ್ನು ಚಂದಾದಾರ ಜಾಲ್ಲಿಂತಿ. ತಶ್ಶಿ ಹಾಂವೆ ಪ್ರತ್ಯೋ ವಾಂಟಿತಾನಾ ಏಕಳೆಂ ವಯೋವೃದ್ಧ ಲಾಗ್ಗಿ ಘೆಲ್ಲೊ. ಆನಿ ತಾಂಕಾ ಏಕ ಪ್ರತಿ ದಿಲ್ಲೆ. ತ್ಯಾ ಘೆತ್ತಿಲೆ ತಾನ್ನಿ ಏಕ್ಪಂತಾ ಮಾಕ್ಕಾ ಸುದೀರ್ಘ ಜಾವ್ನು ಪಳೋವನು “ಖಂಚರೆ ತೂಂ? ಮ್ಹಳ್ಳಿಂತಿ. “ಮೂಲತಃ ಹಾಂವ ಕುಂದಾಪುರ ತಾ||ಚೆ ಆರ್‍ಗೋಡಾಚೊ, ಆತ್ತ ಹುಬ್ಳಿಂತು ಆಸ್ಸುಚೆ... ಮ್ಹೊಣು ಪೂರಾ ಸಾಂಗಲೆ. ತೆದ್ನಾ ತಾನ್ನಿ ಏಕ್ಕಾ ಉತ್ರಾಂತು ಮ್ಹಳ್ಳೆ “ಪಳೇ ಪೇಪರ್ ಚಲೈಚೆ ಮ್ಹಳ್ಯಾರಿ, ತಾಂತೂಚಿ ಕೊಂಕಣಿ ಪತ್ರಿಕಾ ಚಲೈಚ ಮ್ಹಳ್ಯಾರಿ ಚರ್ಡಪಣ ಮ್ಹೊಣು ಕೆಲ್ಲಯಾವೇ ತೂಂವೆ? ಒಟ್ಟೂ ಕಿತಯಾಕ ಪೂರಾ ಲೋಕಾಲಾಗ್ಗಿ ದುಡ್ಡು ಘೆತ್ತಾ... ಮೆಗೇಲೆ ಮನಾಕ ಲಾಗ್ಚೆ ವರಿ ಮ್ಹಣ್ತಾತಿ. ತಾಕ್ಕಾ ಹಾಂವೆ ಮ್ಹಳ್ಳೆ “ತುಮ್ಮಿ ಪೂರಾ ಮದ್ದತ್ ಕರಾ, ಮಾಕ್ಕಾ ಹೇ ಪಯ್ಲೆ ವಿಂಗಡ ಪತ್ರಿಕೆಂತು ಕಾಮ ಕೆಲೇಲೆ ಅನುಭವ ಆಸ್ಸ. ಮ್ಹಳ್ಳೆ. ತಿತ್ಲ ಭಿತ್ತರಿ ತಾಂಗೆಲೆ ಲಾಗ್ಗಿ ಬಶ್ಶಿಲೆ ದುಸ್ರೆ ಏಕಳೆಂ ತಾಂಕಾ “..ಮಾಮ್ಮಾ ತುಮ್ಮಿ ಕೊಂಕಣಿ ಬರೋಪಿ, ತಾಕ್ಕಾ ಉತ್ತೇಜನ ದಿವ್ಚೆ ಸೋಡ್ನು, ಹೇ ಕಿತಯಾಕ ಬೇಜಾರ ಜಾವ್ಚ ವರಿ ಉಲೈತಾತಿ. ಮ್ಹಣ್ತಾತಿ. ಆಪಣಾಲೆ ಉತ್ರಾಕ ದುಸ್ತ್ಯಾಂನಿ ಆಕ್ಷೇಪು ಕೆಲೀಲೆ ಪಳೋವ್ನು ಹೇ ವಯೋವೃದ್ಧಾಂಕ ಚಿಕ್ಕೆ ರಾಗು ಆಯ್ಲಶಿ ದಿಸ್ತಾ. ತಾನ್ನಿ ಪ್ರತಿಜ್ಞ ಕೆಲೀಲ ವರಿ ಮ್ಹಣತಾತಿ. “ತುಮ್ಮಿ ತಾಕ್ಕಾಚಿ ಸಪೋರ್ಟ್ ಕರತಾ ಆಸ್ಸಾತಿಮೂ. ಕೊಂಕಣಿ ಪತ್ರಿಕಾ ಕೊರಚಾಕ ವ್ಹಡ ವ್ಹಡ ಮನುಷ್ಯಾಕ ಸೈತ ಜಾಯ್ನಿ, ಹೋ ಇತ್ಲೆ ಲ್ಹಾನು(ಮಾಕ್ಕಾ ತೆದ್ನಾನ್ನಿಕೆ ೨೩ ವರ್ಷ ಭರ್ನಿ ಆಶ್ಶಿಲೆ) ಕೊಂಕಣಿ ಪೇಪರ ಕರ್ತವೇ? ಪೊಳೋವ್ಯಾ ಹೋ ಸ ಮೈನೋ ಸಮ ಕೋರ್ನು ಪೇಪರ್ ಚಲೋವ್ನು ದಾಕೋವೊ, ಆಪ್ಪಣ ಏಕ ಬಗಲೇಚೆ ಮೀಸ್ಯೋ ಕಾತ್ತೋರ್ನು ಘೆತ್ತಾ.. ಮ್ಹಣತಾತಿ. ಥಂಯಿ ಆಶ್ಶಿಲೆಂ ಪೂರಾ ಏಕ್ಪಂತ್ ಅಜಪ್ ಜಾವ್ನು ವತ್ತಾತಿ. ಮೆಗೇಲೆ ಮನಾಂತು ತಾನ್ನಿ ಕೆಲೀಲೆ ಶಪಥ ಘೂವ್ತಾ ಆಶ್ಶಿಲೆ. ಜಾಲ್ಯಾರಿ ಆಜಿ ದಿಸ್ತಾ ಆಸ್ಸ “ಮೆಗೇಲೆ ಮನಾಂತು ಏಕ ಛಲ ಉತ್ಪನ್ನ ಜಾವ್ಕಾ ಮ್ಹಣ್ಚೆ ಖಾತ್ತಿರಿ ದೇವಾನ ತಾಂಕಾ ಅಸ್ಸಲೆ ಬುದ್ಧಿ ದಿಲ್ಲೆ ಕಿತ್ಕಿ! ಮ್ಹೊಣು. ತ್ಯಾ ಸಭಾಂತು ಒಟ್ಟು ಆಮಗೇಲೆ ಪತ್ರಿಕೇಕ ೩೭ ಲೋಕ ಸದಸ್ಯ ಜಾಲ್ಲೆಂ.  ತಾಂತು ಹುಬ್ಳಿ-ಧಾರ್‍ವಾಡಾಚಿ ಏಕ್ಕೇಕ್ಲೆ, ೯ ಲೋಕ ಶಿರ್ಶಿಚೆ,  ೬ ಲೋಕ ಸಿದ್ದಾಪೂರೆ(ಉ.ಕ), ೫ ಲೋಕ ಕುಮಟಾಚಿ, ಎಕ್ಕಂಬಿಚಿ ೨ ಲೋಕ, ಚಾವತಿ(ಉ.ಕ), ಬಾಡಾ, ಹೆಗಡೆ, ಬಿಳಗಿ, ಮೈಸೂರು, ಉಡುಪಿ, ಕಾರವಾರ, ಜ್ಯೊಯಿಡಾ, ಗೋವಾ,  ಹಾಂಗಾಚೆ ಪೂರಾ ಏಕ್ಕೇಕ್ಲೆ ತ್ಯಾ ದಿವಸು ಪತ್ರಿಕೇಕ ಸದಸ್ಯ ಜಾಲ್ಲಿಂತಿ.  (ಸಶೇಷ)

ಹುಬ್ಬಳ್ಳಿ ಜಿ.ಎಸ್.ಬಿ. ಸಮಾಜಾಚೆ ೬೮ಚೆ ಸಮಾಜ ಡೇ

ಹುಬ್ಬಳ್ಳಿ ಜಿ.ಎಸ್.ಬಿ. ಸಮಾಜಾಚೆ ೬೮ ವರ್ಷಾಚೆ ಸಮಾಜ ಡೇ ತಾ. ೨೪-೦೬-೨೦೧೩ ದಿವಸು ಸಮಾಜ ಮಂದಿರ “ಸರಸ್ವತಿ ಸದನಾಂತು ಅಪಾರ ಸಮಾಜ ಬಾಂಧವಾಲೆ ಉಪಸ್ಥಿತೀರಿ ಚಲ್ಲೆ. ಅವುಂದು ಸಮಾಜ ಡೇಚೆ ಮುಖೇಲ ಸೊಯರೆ ಜಾವ್ನು  ಆಯ್ಯಿಲೆ ಕಾರವಾರಾಚೆ ಪ್ರಖ್ಯಾತ ವಾಗ್ಮಿ, ಆನಿ ಶಿಕ್ಷಣ ತಜ್ಞ ಶ್ರೀ ಶ್ರೀಧರ ಪಿ. ಕಾಮತ್ ಹಾನ್ನಿ ಉಲೈತಾ “ಆಮ್ಮಿ ಅಭಿವೃದ್ಧಿ ಜಾವ್ಕಾ ಮ್ಹಣಚೆ ಇಚ್ಛಾ ಆಸಲೇರಿ ಘರಾಂತು ವಾಯ್ಟ ಗೋಷ್ಠಿ ಉಲೋವಚಾಕ ನಜ್ಜ. ಆಮ್ಮಿ ಚರ್ಡುಂವಾನಿ ಡಾಕ್ಟರ, ಇಂಜಿನಿಯರ್ ಜಾವ್ಚೆ, ದುಡ್ಡು ಜೊಡಚೆ ಮಾತ್ರ ಅಭಿವೃದ್ಧಿ ಮ್ಹೊಣು ಸಮಜಿಲಾ. ಜಾಲ್ಯಾರಿ ಖರೇ ಅಭಿವೃದ್ಧಿ ಮ್ಹಳಯಾರಿ  ಆಮ್ಮಿ ಆಮಗೇಲೆ ಬರ್ಶಿ ಆನಿ ದುಸ್ರ್ಯಾಲೆ ಬರಶಿ ಚಾಂಗ ಸಂಬಂಧ ಜೋಡನು ಘೆವ್ಚಾಂತು ಆಸ್ಸ. ಆಮ್ಮಿ ಘರಾಂತು ವಾಯ್ಟ ಉಲೈತಾ, ಝಾಳ ಭೊಗತಾ ಬಸಲ್ಯಾರಿ ನಕಾರಾತ್ಮಕ ಅಂಶ ಚ್ಹಡ ಜಾತ್ತಾ ವತ್ತಾ. ತ್ಯಾ ಖಾತ್ತಿರಿ ಘರಾಂತು ನಕಾರಾತ್ಮಕ ಶಕ್ತಿ ಒಟ್ಟು ಜಾವಚಾಕ ಸೋಡ್ನಾಕ್ಕಾತಿ. ಹಾಜ್ಜೇನ ಅಭಿವೃದ್ಧಿಕ ಮಾರ ಬಸತಾ. ಅನಾರೋಗ್ಯ, ಅಶಾಂತಿ ಆಸಲೇರಿ ವಾಯ್ಟಪಣ ಆಪೋವ್ನು ಘೆತ್ತಿಲ ವರಿ ಜಾತ್ತಾ. ಜೀವನ ಏಕ ಎಕ್ಸಿಡೆಂಟ್ ನ್ಹಂಹಿ, ತ್ಯಾ ಸುಂದರ ಕೋರ್ನು ಘೆವ್ಚೆ ಆಮಗೇಲೆ ಹಾತ್ತಾಂತೂ ಆಸ್ಸ. ಸರ್ವ ವಿಷಯಾಂತೂ ಸಕಾರಾತ್ಮಕ ಭಾವನಾ ವಾಡ್ಡೋನು ಘೇವ್ನು, ಸಾಧನೆ ದಾಕೂನು ಮನಾಂತು ಚಾಂಗ ಯವಜಿಲ್ಯಾರಿ ಕೆದ್ನಾಯಿ ಯಶ ಆಮಗೇಲೆ ಪಾಟಿಬಲಾಕ ಉರ್‍ತಾ. ಆಮಗೇಲೆ ಗೌಡಸಾರಸ್ವತ ಸಮಾಜ ಏಕ ವಿಶೇಷ ಜನಾಂಗ. ಶ್ರೀ ರಾಮಚಂದ್ರಾನಿ ಅಶ್ವಮೇಧ ಯಜ್ಞ ಕೇಲೇಲೆ ತೆದ್ದನಾ ಆಮಗೇಲೆ ಜನಾಂಗಾಕ ವಿಶೇಷ ಜಾವ್ನು ಆಪೋವ್ನು ಘೆತ್ಲೆ ಖಂಯಿ. ಸರಸ್ವತಿ ನ್ಹಂಹಿ ಎಳೇರಿ ವಾಂಚಿಲೆ ಆಮಗೇಲೆ ಮ್ಹಾಲ್ಗಡೆ ೬೦೦೦ ವರ್ಷಾ ಮಾಗಶಿ ಥಂಯ್ಚಾನ ವಿಂಗವಿಂಗಡ ಬಗಲೇನ ಘೆಲ್ಲಿಂತಿ. ಚರ್ಡುವಾನಿ ನೈತಿಕ ಸ್ಥೈರ್ಯ ಆಸ್ಸ ಕೋರ್ನು ಘೆತಲ್ಯಾರಿ ಸುಲಭಾರಿ ಯಶ ಪಾವ್ಯೇತ  ಮ್ಹೊಣು ತಾನ್ನಿ ಸಾಂಗಲೆ. ತ್ಯಾ ಖಾತ್ತಿರಿ ಆಪ್ಪಣಾನ ಕೆಲೇಲೆ ಪ್ರಯೋಗ, ತ್ಯಾ ಖಾತ್ತಿರಿ ಮೆಳೇಲೆ ಯಶ ಇತ್ಯಾದಿ ವಿಷಯು ತಾನ್ನಿ ಸವಿವರ ಜಾವ್ನು ಸಾಂಗಲೆ. ತಾಂಗೆಲೆ ಬಾಯ್ಲ ಶ್ರೀಮತಿ ಶ್ರೀಲತಾ ಕಾಮತ್ ಹಾನ್ನಿ ಚರ್ಡುವಾಂಕ ಬಹುಮಾನ ವಿತರಣ ಕೆಲ್ಲಿಂತಿ. 
ಕುಮಾರಿ ಪೂಜಾ ನಾಯಕ್ ಹಿಗೇಲೆ ಪ್ರಾರ್ಥನೆ ಬರಶಿ ಸಮಾಜಡೇ   ಕಾರ್ಯಕ್ರಮ ಆರಂಭ ಜಾಲ್ಲೆ. ಸುರವೇಕ ಸರ್ವಾನ ಮೌನ ಜಾವ್ನು ಉಟೋವ್ನು ರಾಬೂನು ಆಲ್ತಾಂತು ಉತ್ತರ ಖಂಡಾಂತು ಘಡಿಲೆ ಮೇಘಸ್ಫೋಟಾಂತು ಸರಲೀಲೆ ಲೋಕಾಂಕ ಶೃದ್ಧಾಂಜಲಿ ಅರ್ಪಣ ಕೆಲ್ಲಿ. ಸಮಾಜಾಚೆ ಉಪಧ್ಯಕ್ಷ ಶ್ರೀ ಎಸ್.ಎಮ್.ಗೋಳಿ ತಾನ್ನಿ ಸುರವೇಕ ಸರ್ವಾಂಕ ಸ್ವಾಗತ ಸಾಂಗಲೆ. ಸೊಯರೆ ಆನಿ ಸಮಾಜಾಧ್ಯಕ್ಷಾನಿ ದೀವಲಿಂ ಪೆಟ್ಟೂನು ಸಮಾರಂಭಾಚೆ ಉದ್ಘಾಟನ ಕೆಲ್ಲಿ. ಸಮಾಜಾಚೆ ಘೆಲ್ಲಿಲ ವಷಾಚೆ  ವರದಿ ವಾಚನ ಸಮಾಜಾಚೆ ಕಾರ್ಯದರ್ಶಿ ಶ್ರೀ ವಿ.ಜಿ.ಶಾನಭಾಗ ಮಾಮ್ಮಾನಿ ಕೆಲ್ಲೆ. ಮಹಿಳಾ ವಿಭಾಗಾಚೆ ವರದಿ ವಾಚನ ವಂದನಾ ಶಾನಭಾಗ ತಾನ್ನಿ ಕೆಲ್ಲಿ. ಮಾಗಿರಿ ಸಮಾಜಾ ತರಪೇನ ಸೊಯರೆ ಶ್ರೀ ಎಸ್.ಪಿ.ಕಾಮತ್ ಹಾಂಕಾ ಪುಳ್ಳಾ ಮಾಳ ಘಾಲ್ನು, ಶಾಳ ಪಾಂಗೂರ್ನು, ಯಾದಗಾರ ದೀವ್ನು ಸನ್ಮಾನ ಕೆಲ್ಲೊ. ಶ್ರೀಮತಿ ಶ್ರೀಲತಾ ಎಸ್. ಕಾಮತ್ತಾಂಕ  ಸಮಾಜಾಚೆ ಮಹಿಳಾ ವಿಭಾಗ ತರಪೇನ ಹೂಂಟಿ ಭೋರ್ನು ಗೌರವ ದಾಕೈಲೆ. ಹೇ ಸಂದಭಾರಿ ಸಮಾಜಾಚೆ ಮ್ಹಾಲ್ಗಡೆ ಸದಸ್ಯ ಜಾಲೀಲೆ ಶ್ರೀ ಪಿ.ಆರ್.ಶೆಣೈ, ಡಾ|| ಜೆ.ಕೆ.ನಾಡಿಗ, ಡಾ|| ಆರ್.ವಿ.ಬಾಳಿಗಾ, ಶ್ರೀ ನಾಡಿಗ ಆನಿ ಶ್ರೀ ಪಿ.ಎಮ್.ಶಾನುಭಾಗ ಹಾಂಕಾ ಸಮಾಜಾ ತರಪೇನ ಸನ್ಮಾನು ಚಲ್ಲೊ. ಆನಿ ಚಾಂಗ ಸ್ವಯಂಸೇವಕ ಮ್ಹೊಣು ಶ್ರೀ ಬಿ. ರಘುವೀರ ಕಾಮತ ಆನಿ ಶ್ರೀಮತಿ ಸುಮನಾ ಆರ್. ಕಾಮತ್ ಹಾಂಕಾ ಸತ್ಕಾರು ಚಲ್ಲೆ. ಜೊತೆ ಕಾರ್ಯದರ್ಶಿ ಶ್ರೀ ರಾಮದಾಸ ಶಾನುಭಾಗ ತಾನ್ನಿ ಕಾರ್ಯಕ್ರಮಾಚೆ ನಿರೂಪಣ ಕೆಲ್ಲೆ. ಸಮಾರಂಭಾಚೆ ಉಪರಾಂತ ಜವಣ ವ್ಯವಸ್ಥೆ ಕೆಲೀಲೆ. ಹುಬ್ಬಳ್ಳಿ ಸಮಾಜಾಚೆ ಅಪಾರ ಸಮಾಜ ಬಾಂಧವ ಹೇ ಸಂದಭಾರಿ ಉಪಸ್ಥಿತ ಉರಲೀಲೆ.

ಪ|ಪೂ| ಸ್ವಾಮ್ಯಾಂಗೆಲೆ ಚಾತುಮಾಸ್ಯ ವೃತ

ಶ್ರೀ ಕಾಶೀಮಠಾಧೀಶ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೆಂ

ಶ್ರೀ ಸಂಸ್ಥಾನ ಕಾಶೀಮಠಾಧೀಶ ಶ್ರೀಮದ್ ಸುಧೀಂದ್ರ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾಂಗೆಲೆ ವಿಜಯನಾಮ ಸಂವತ್ಸರಾಚೆ ಚಾತುರ್ಮಾಸು ಶ್ರೀ ವೆಂಕಟರಮಣ ಆನಿ ಶ್ರೀ ಮಹಾಲಸಾ ನಾರಾಯಣಿ ದೇವಳ, ಕೊಂಚಾಡಿ ಶ್ರೀ ಕಾಶೀಮಠ, ಪದವಿನಂಗಡಿ, ಮಂಗಳೂರು - ೫೭೫೦೦೮ ಹಾಂಗಾ ೨೭-೭-೨೦೧೩ ದಿವಸು ಆರಂಭ ಜಾತ್ತಾ.   ಹೇ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ೭೦ಚೆ ಚಾತುರ್ಮಾಸ ವೃತ ಜಾವ್ನಾಸ್ಸುನು ಅತಿ ವಿಜೃಂಭಣೇರಿ ಘಡತಾ. ಚಾತುರ್ಮಾಸ್ಯ ಸಂಬಂಧ ಪ|ಪೂ| ಸ್ವಾಮೆಂ ತಾ. ೨೧-೦೭-೨೦೧೩ ದಿವಸು ಮಂಗಳೂರ್‍ಚೆ ಶ್ರೀ ವೆಂಕಟರಮಣ ದೇವಳಾಚಾನ ಕೊಂಚಾಡಿ ಶ್ರೀ ಕಾಶೀಮಠಾಕ ಶುಭಾಗಮನ ಕರತಾತಿ. ಪ|ಪೂ| ಸ್ವಾಮ್ಯಾಂಗೆಲೆ ಚಾತುರ್ಮಾಸ್ಯ ವೇಳ್ಯಾರಿ ಹರಿಗುರು ಸೇವೆಕ ಅವಕಾಶ ಆಸ್ಸುನು ಗುರು ಸೇವಾ : ರೂ. ೨೫೫/-, ಶ್ರೀ ಹರಿಗುರು ಸೇವಾ : ೧,೦೦೫/-, ಸಂತರ್ಪಣ ಸೇವಾ ರೂ. ೫೦೦೫/- ಆನಿ ೧೦,೦೦೫, ಏಕ ದಿವಸಾಚೆ ಸೇವಾ : ರೂ. ೨೫೦೦೫/- ಆಸ್ಸುನು ದುಡ್ಡು ಚಾತುರ್ಮಾಸ ಸಮಿತಿಚೆ ಬ್ಯಾಂಕ್ ಖಾತೆಕ ಪೆಟೋವ್ನು ದಿವಚೆ ಅವಕಾಶ ಆಸ್ಸ. ಬ್ಯಾಂಕ್ ಖಾತೆ ನಂ. ಕೆನರಾ ಬ್ಯಾಂಕ್ ಕಾವೂರ ಶಾಖಾ : ಎಸ್.ಬಿ. ೦೬೪೦೧೦೧೦೦೮೮೦೧, ಕಾರ್ಪೂರೇಶನ್ ಬ್ಯಾಂಕ್ ಕಾವೂರ ಶಾಖಾ : ಎಸ್.ಬಿ. ೦೧/೧೭೨೭, ಸಿಂಡಿಕೇಟ್ ಬ್ಯಾಂಕ್ ಲಾಲ್‌ಬಾಗ್ ಶಾಖಾ : ೦೨೪೧೨೨೦೦೦೧೮೧೭೩ ಖಂಚೇ ಚಡ್ತೆ ಮಾಹಿತಿ ಖಾತ್ತಿರಿ ಪೋನ್ ನಂ. ೨೨೧೧೪೦೦ ಹಾಂಗಾಕ ಸಂಪರ್ಕು ಕೊರಯೇತ.

ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮೆಂ

ಶ್ರೀ ಕಾಶೀಮಠಾಧೀಶ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪಟ್ಟಶಿಷ್ಯ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ವಿಜಯ ನಾಮ ಸಂವತ್ಸರಾಚೆ ಚಾತುರ್ಮಾಸು ತಾ. ೨೭-೭-೨೦೧೩ ದಿವಸು ಬೆಂಗಳೂರ್‍ಚೆ ಶ್ರೀ ಕಾಶಿಮಠಾಂತು ಆರಂಭ ಜಾತ್ತಾ. ತತ್ಸಂಬಂಧ ಸ್ವಾಮೆಂ ತಾ. ೧೮-೭-೨೦೧೩ಕ ಹುಬ್ಬಳ್ಳಿ ಮೊಕ್ಕಾಮ ದಾಕೂನು ಬೆಂಗಳೂರಾಕ ಯತ್ತಲೆ. ಹೇ ಸಂದಭಾರಿ ಪ|ಪೂ| ಸ್ವಾಮ್ಯಾಂಕ ಸ್ವಾಗತ ಕೋರ್ನು, ಮೆರವಣಿಗೆರಿ ಶ್ರೀ ಮಠಾಕ ಆಪೋವ್ನು ವ್ಹರಚೆ ವ್ಯವಸ್ಥಾ ಕೆಲೇಲೆ ಆಸ್ಸುನು ಸಮಾಜ ಬಾಂದವಾನಿ ವ್ಹಡ ಸಂಖ್ಯಾರಿ ಉಪಸ್ಥಿತ ಆಸ್ಸುನು ಶ್ರೀ ಗುರು ಕೃಪೇಕ ಪಾತ್ರ ಜಾವ್ಯೇತ. 

ಶ್ರೀಮದ್ ವಿದ್ಯಾಧಿರಾಜ ತೀರ್ಥ ವಡೇರ ಸ್ವಾಮೆಂ.

ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾಂಗೆಲೆ ವಿಜಯ ನಾಮ ಸಂವತ್ಸರಾಚೆ ಚಾತುರ್ಮಾಸು ಗೋಂಯ್ಚೆ ಮಡಗಾಂವಾಂತು ಆಸ್ಸುಚೆ ಗೊಗ್ಲಾ ಶ್ರೀ ವೆಂಕಟರಮಣ ಮಠಾಂತು ತಾ. ೨೭-೦೭-೨೦೧೩ ದಿವಸು ಆರಂಭ ಜಾತ್ತಾ ಮ್ಹಣಚೆ ಖಬ್ಬರ ಮೆಳ್ಳಾ.

ಶ್ರೀ ಶ್ರೀ ಸಚ್ಚಿದಾನಂದ ಜ್ಞಾನೇಶ್ವರ ಭಾರತೀ ಸ್ವಾಮಿ

ಕರ್ಕಿ ಶ್ರೀ ದೈವಜ್ಞ ಬ್ರಾಹ್ಮಣ ಮಹಾಸಂಸ್ಥಾನಾಧೀಶ್ವರ ಶ್ರೀ ಶ್ರೀ ಸಚ್ಚಿದಾನಂದ ಜ್ಞಾನೇಶ್ವರ ಭಾರತೀ ಮಹಾ ಸ್ವಾಮ್ಯಾಂಗೆಲೆ ೨೮ ವಷಾಚೆ ಚಾತುರ್ಮಾಸ್ಯ ವೃತ ಉತ್ತರಖಂಡ ರಾಜ್ಯಾಚೆ ಗಂಗಾ ನಂಯ್ಚೆ ಎಳೇರಿ ಆಸ್ಸುಚೆ ಪ್ರಸಿದ್ದ ಪುಣ್ಯಕ್ಷೇತ್ರ ಹರಿದ್ವಾರಾಚೆ ಬೋಲಗಿರಿ ರಸ್ತ್ಯಾರಿ ಉರಚೆ ಶ್ರೀ ಶ್ರೀ ಬೋಲಾನಂದ ಆಶ್ರಮಾಂತು ತಾ. ೨೨-೦೭-೨೦೧೩ ದಾಕೂನು ೧೯-೦೯-೨೦೧೩ ಪರ್ಯಂತ ಚಲ್ತಾ. ಸಾಧ್ಯ ಆಶ್ಶಿಲೆ ಶ್ರೀ ಮಠಾಚೆ ಅನುಯಾಯಿ, ಭಕ್ತಾನಿ ವಚ್ಚುನು ಪ|ಪೂ| ಸ್ವಾಮ್ಯಾಂಕ ಭೆಟ್ಟೂಚೆ ಬರಶಿ ತೀರ್ಥ ಕ್ಷೇತ್ರ ಯಾತ್ರಾ ಸಹಿತ ಕೋರ್ನು ಯವ್ಯೇತ. ಹೇ ಖಾತ್ತಿರಿ ಖಂಚೇಯಿ ಚ್ಹಡ ಮಾಹಿತಿ ಜಾವ್ಕಾ ಜಾಲೀಲ್ಯಾನ ಶ್ರೀ ಕ್ಷೇತ್ರ ಕರ್ಕಿಂತುಲೆ ದೈವಜ್ಞ ಬ್ರಾಹ್ಮಣ ಮಠಾಚೆ ಪೋನ್ ನಂ. ೦೮೩೮೭-೨೩೬೪೮೭ ಹಾಂಗಾಕ ಸಂಪರ್ಕ ಕೊರಯೇತ.

ಶ್ರೀಮತ್ ಸದ್ಯೋಜಾತ ಶಂಕರಾಶ್ರಮ ಸ್ವಾಮೆಂ

ಶ್ರೀ ಚಿತ್ರಾಪುರ ಮಠಾಧೀಶ ಶ್ರೀಮತ್ ಸದ್ಯೋಜಾತ ಶಂಕರಾಶ್ರಮ ಸ್ವಾಮೀಜಿಲೆ  ವಿಜಯ ನಾಮ ಸಂವತ್ಸರಾಚೆ ಚಾತುರ್ಮಾಸು ತಾ. ೨೨-೭-೨೦೧೩ ದಾಕೂನು ೧೯-೯-೨೦೧೩ ಪರ್ಯಂತ ಮಂಗಳೂರ್‍ಚೆ ಗಣಪತಿ ದೇವಳಾಚೆ ರಸ್ತ್ಯಾರಿ ಆಸ್ಸುಚೆ ಶ್ರೀ ಚಿತ್ರಾಪುರ ಮಠಾಂತು ಘಡಚೆ ಆಸ್ಸ. ತತ್ಸಂಬಂಧ ಪ|ಪೂ| ಸ್ವಾಮೆಂ ತಾ. ೨೧-೦೭-೨೦೧೩ಕ ಮಂಗ ಳೂರಾಕ ಯತ್ತಾತಿ. ೨೨-೭ಕ ಗುರು ಪೂರ್ಣಿಮಾ ದಿವಸು ಸಾಮೂಹಿಕ ಪ್ರಾರ್ಥನಾ, ಮಂಡಳ ಪೂಜಾ, ಪ|ಪೂ| ಸ್ವಾಮ್ಯಾ ದಾಕೂನು ವ್ಯಾಸ ಪೂಜನ, ಶ್ರೀ ಗುರು ಪಾದುಕಾ ಪೂಜಾ, ಸಂತರ್ಪಣ, ಭಜನ ಆನಿ ಸ್ತೋತ್ರ ಪಠಣ, ಧರ್ಮ ಸಭಾ, ಪ|ಪೂ| ಸ್ವಾಮ್ಯಾಂ ದಾಕೂನು ಆಶೀರ್ವಚನ, ದೀಪ ನಮಸ್ಕಾರ, ಪಟ್ಟಕಾಣಿಕಾ ಸಮರ್ಪಣ, ಅಷ್ಟಾವಧಾನ ಸೇವಾ ಇತ್ಯಾದಿ ಕಾರ್ಯಕ್ರಮ ಘಡ್ಚೆ ಆಸ್ಸ. ಹೇ ವೇಳ್ಯಾರಿ ಸೇವಾದಾರ ಜಾವಚಾಕ ಅವಕಾಶ ಆಸ್ಸುನು *ಮಹಾ ಪೋಷಕ(ರೂ. ೧೫,೦೦೦/-), *ಪೋಷಕ (ರೂ. ೧೨,೫೦೦/-), *ಸೇವಾ ಕರ್ತ (ರೂ. ೧೦,೦೦೦/-), *ಯಜಮಾನ ಸೇವಾ (ರೂ. ೭,೫೦೦/-) *ಸಂತರ್ಪಣ ಸೇವಾ (ರೂ. ೫,೦೦೦/-) ಇತ್ಯಾದಿ ಸೇವಾ  ಕೊರಯೇತ. ಚಡ್ತೆ ಮಾಹಿತಿ ಖಾತ್ತಿರಿ ಪೋನ್ ನಂ. ೦೮೨೪ - ೨೪೨೭೨೧೨ ಹಾಂಗಾಕ ಸಂಪರ್ಕ ಕೊರಯೇತ. 

ವಿ.ಸೂ. ಶ್ರೀ ಕವಳೇ ಮಠಾಧೀಶಾಂಗೆಲೆ ಚಾತುರ್ಮಾ

ಸು ಅವುಂದು ಹುಬ್ಬಳ್ಳಿಚೆ `ಸರಸ್ವತಿ ಸದನಾಂತು'' ಜುಲೈ 22 ದಾಕೂನು 2 ಮ್ಹಹಿನೋ ಕಾಳ ಘಡಚೆ ಆಸ್ಸ. ಮಾಹಿತಿ ಪಯಲೇಚಿ ಹೇ ಬ್ಲಾಗಾಂತು ಘಾಲ್ಲಯಾ.
ಅವುಂದೂಚೆ ಚಾತುರ್ಮಾಸ ಸಂದಭಾರಿ ತ್ಯಾ ತ್ಯಾ ಮಠಾಚೆ ಅನುಯಾಯಿ, ಭಕ್ತ ಜನಾನಿ ಮಠಾಚೆ ಪಟ್ಟ ದೇವಾಕ ಆನಿ ಪ|ಪೂ| ಸ್ವಾಮ್ಯಾಂಕ ಭೆಟ್ಟೂನು ಹರಿ-ಗುರು ಕಪೇಕ ಪಾತ್ರ ಜಾವ್ಚೆ ಬರಶಿ, ತಾಂಗೆಲೆ ಜೀವನ ಪಾವನ ಕೋರ್ನು ಘೆವ್ಯೇತ ಜಾಲಯಾ.

Saraswati Prabha july 2013

ಸರಸ್ವತಿ ಪ್ರಭಾ ಕೊಂಕಣಿ ಪತ್ರಾಚೆ 15 ಜುಲೈ 2013 ಸಂಚಿಕಾ ತಯಾರ ಜಾಲೇಲೆ ಆಸ್ಸ.

ಬಾಲ್ಯಾ ತೂ ವಚೂನಕಾ

“ಕೊಂಕಣಿ ಸುಂದರ ತಶ್ಶೀಚಿ ಗಾನಮಯ ಭಾಸ ಮ್ಹೊಣು ಕೇಂದ್ರ ಸಾಹಿತ್ಯ ಅಕಾಡೆಮಿಯ ಪ್ರಶಸ್ತಿ ಪುರಸ್ಕೃತ ಶ್ರೀ ಗೋಪಾಲಕೃಷ್ಣ ಪೈ ತಾನ್ನಿ ಸಾಂಗ್ಲೆ. ತಾನ್ನಿ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಬೆಂಗಳೂರ್‍ಚೆ ನಯನ ಸಭಾಂಗಣದಲ್ಲಿ ೧೬-೫-೨೦೧೩ ದಿವಸು ಆಯೋಜನ ಕೆಲೀಲೆ ಕೊಂಕಣಿ ಸಂಭ್ರಮ್ ಆನಿ ವೇದಮೂರ್ತಿ ಕೃಷ್ಣ ಭವಾನಿ ಶಂಕರ ಭಟ್ಟ ತಾನ್ನಿ ಬರೆಯಿಲೆ ಬಾಲ್ಯಾ ತೂ ವಚೂನಕಾ ಕವನ ಸಂಕಲನ ಉಗ್ತಾವಣ ಕಾರ್ಯಕ್ರಮಾಂತು ಕೃತಿ ಉಗ್ರಾವಣ ಕರ್‍ತಾ ಉಲೈತಾಶ್ಶಿಲೆ. ಹೇ ಕಾರ್ಯಕ್ರಮಾಕ ಮುಖೇಲ ಸೊಯರೆ ಜಾವ್ನು ಆಯ್ಯಿಲೆ ಉದ್ಯಮಿ ಶ್ರೀ ದಯಾನಂದ ಪೈ ಮಾಮ್ಮಾನಿ ಕೊಂಕಣಿ ಭಾಷೆಂತು ಕೋಣೆಯಿ, ಕಿತ್ಲೆಚಿ ಪುಸ್ತಕ ಬರೆಯಲ್ಯಾರಿಚಿ ತಾಜ್ಜೆ ಮುದ್ರಣಾಚೆ ಪೂರ್ತಿ ಖರ್ಚು ಆಪ್ಪಣ ಘೆತ್ತಾ ಮ್ಹಣಚೆ ಘೋಷಣ ಕೆಲ್ಲಿಂತಿ.  ನಟ ಅನಂತನಾಗ್, ಕನ್ನಡ ಆನಿ ಸಂಸ್ಕೃತಿ ಇಲಾಖೆಚೆ ಆಯುಕ್ತ ಕೆ.ಆರ್ ರಾಮಕೃಷ್ಣ, ಚಲನಚಿತ್ರ ಸಾಹಿತಿ ಜಯಂತ್ ಕಾಯ್ಕಿಣಿ ಇತ್ಯಾದಿ ಲೋಕ ಹೇ ಸಂದಭಾರಿ ಉಲೈಲಿಂತಿ.  ಕೊಂಕಣಿ ಅಕಾಡೆಮಿ ಅಧ್ಯಕ್ಷ ಶ್ರೀ ಕಾಸರಗೋಡು ಚಿನ್ನಾ , ರಿಜಿಸ್ಟ್ರಾರ್ ಡಾ.ಬಿ. ದೇವದಾಸ ಪೈ, ಸದಸ್ಯ ಶ್ರೀ ಅಶೋಕ ಶೇಟ್, ಶ್ರೀ ಮಹೇಶ್ ನಾಯಕ್, ಶ್ರೀಮತಿ ಶೀಲಾ ನಾಯಕ್ ಹಾನ್ನಿ ಹೇ ಸಂದರ್ಭಾರಿ ಉಪಸ್ಥಿತ ಆಶ್ಶಿಲೆ. ಅಖೇರಿಕ ಡಾ. ಸಂಪದಭಟ್ ಮರಬಳ್ಳಿ ದಾಕೂನು ಕೊಂಕಣಿ ಗಾಯನ, ಶ್ರೀ ಮನ್‌ದೀಪ್ ರಾಯ್ ಆನಿ ಸಾಂಗಾತಿ ದಾಕೂನು ಕೊಂಕಣಿ ನಾಟ್ಕುಳಿ,  ಶ್ರೀಮತಿ ರಜನಿ ಪೈ ಆನಿ ಸಾಂಗಾತಿ ದಾಕೂನು ಕೊಂಕಣಿ ಜಾನಪದ ನೃತ್ಯ, ಶ್ರೀಮತಿ ಐಡಾ ಮಾರ್ಗರೇಟ್ ಆನಿ ಸಾಂಗಾತಿ ದಾಕೂನು ಕೊಂಕಣಿ ನೃತ್ಯ ಪ್ರದರ್ಶಿತ ಜಾಲ್ಲೆ.

ಶ್ರೀ ಪಟ್ಟಾಭಿರಾಮಚಂದ್ರ ದೇವಳ, ಬಾರಕೂರು

ಬಾರಕೂರಾಚೆ ಶ್ರೀ ಪಟ್ಟಾಭಿ ರಾಮಚಂದ್ರ ದೇವಳಾಚೆ ೫೧ಚೆಂ ಪ್ರತಿಷ್ಠಾ ವರ್ಧಂತ್ಯುತ್ಸವ ತಾ. ೨೭-೦೫-೨೦೧೩ ದಿವಸು ದೇವತಾ ಪ್ರಾರ್ಥನಾ, ಭಜನ, ಫುಲ್ಲಾ ಪೂಜಾ, ಪಂಚಾಮೃತಾಭಿಷೇಕ, ಶತಕಲಶಾಭಿಷೇಕ, ಗಂಗಾಭಿಷೇಕ, ಮಹಾಪೂಜಾ, ಮಹಾ ಮಂಗಳಾರತಿ, ಮಹಾಸಂತರ್ಪಣ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಬರೋಬರಿ ವಿಜೃಂಭಣೇನ ಸಂಪನ್ನ ಜಾಲ್ಲೆ. ಗಾಂವ್ಚೆ, ಪರಗಾಂವ್ಚೆ ಅಪಾರ ಭಕ್ತ-ಬಾಂಧವ ಹೇ ಸಂದಭಾರಿ ಉಪಸ್ಥಿತ ಆಶ್ಶಿಲೆ.
ಶ್ರೀ ಕ್ಷೇತ್ರ ಮರ್ಲಮ್ಮ ಸಪರಿವಾರ ಉಪ್ಪುಂದ
ಉಪ್ಪುಂದ ಪಡಿಯಾರ್ ಆನಿ ಸರಾಫ್ ಪೈ ಕುಟುಂಬಸ್ಥಾಲೆ ಶ್ರೀ ಕ್ಷೇತ್ರ ಮರ್ಲಮ್ಮ ಸಪರಿವಾರ ಸನ್ನಿಧಿರಿ ಬೊಬ್ಬರ್ಯ, ಚಾಮುಂಡಿ, ಹೈಗುಳಿ ಪುನರ್ ಪ್ರತಿಷ್ಠಾ ಕಾರ್ಯಕ್ರಮ ತಾ. ೧೧-೦೫-೨೦೧೩ ದಿವಸು ಚಲ್ಲಿಲೆ ಖಬ್ಬರ ಮೆಳ್ಳಾ.

ಶ್ರೀ ಮಹಾಲಸಾ ನಾರಾಯಣೀ ದೇವಳ, ಬಸ್ರೂರು

 ಬಸ್ರೂರು ಶ್ರೀ ಮಹಾಲಸಾ ನಾರಾಯಣೀ ದೇವಳಾಚೆ ಪುನಃಪ್ರತಿಷ್ಠೆಚೆ ೧೪ಚೆ ವರ್ಧಂತಿ ಉತ್ಸವು ತಾ. ೨೫-೦೫-೨೦೧೩ ದಿವಸು ಪ್ರಾರ್ಥನಾ, ಸಾನಿಧ್ಯ ಹವನ, ಶತಕಲಶಾಭಿಷೇಕ, ಶ್ರೀ ನಾಗ ದೇವಾಂಕ ಆನಿ ಜಟ್ಟಿಗ ದೇವಾಂಕ ವಿಶೇಷ ಪೂಜಾ, ಹರ್‍ಕೆಕ ಆಯ್ಯಿಲೆ ಕಾಪ್ಡಾಚೆ ಲಿಲಾವ, ಮಹಾ ಮಂಗಳಾರತಿ, ದರ್ಶನ ಸೇವಾ, ಮಹಾ ಸಂತರ್ಪಣ, ಸಾಂಜ್ವಳಾ ರುಪ್ಪೆ ಪಾಲಂಖೀ ಸೇವಾ, ಅಷ್ಟಾವಧಾನ, ವಸಂತ ಪೂಜಾ, ಫುಲ್ಲಾ ಪೂಜಾ, ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಬರಶಿ ವಿಜೃಂಭಣೇರಿ ಸಂಪನ್ನ ಜಾಲೇಲೆ ಖಬ್ಬರ ಮೆಳ್ಳಾ.

ಶ್ರೀ ನಾಗದೇವಾಲೆ ಜೀಣೋದ್ಧಾರ

ತಲ್ಲೂರು ಗುಡ್ಡೆಯಂಗಡಿ ಬಾಡಬೆಟ್ಟು ಭಂಡಾರ್‌ಕಾರ್ ಕುಟುಂಬಸ್ಥಾಲೆ ಮೂಲ ನಾಗಬನಾಂತು ಶ್ರೀ ನಾಗದೇವಾಲೆ ಜೀಣೋದ್ಧಾರ ತಶ್ಶೀಚಿ ಪುನರ್ ಪ್ರತಿಷ್ಠಾ ಆನಿ ಆಶ್ಲೇಷ ಬಲಿ ತಾ. ೧೭-೦೫-೨೦೧೩ ದಿವಸು ಯಥಾ ಧಾರ್ಮಿಕ ವಿಧಿ ಆನಿ  ಅನ್ನ ಸಂತರ್ಪಣೆ ಬರೋಬರಿ ಸಂಪನ್ನ ಜಾಲೇಲೆ ಖಬ್ಬರ ಮೆಳ್ಳಾ.

ಶ್ರೀ ಮಹಾಲಸಾ ನಾರಾಯಣೀ ದೇವಿಕ್ಷೇತ್ರ, ಹರಿಖಂಡಿಗೆ

೪೧ ಶಿರೂರು, ಹರಿಖಂಡಿಗೆಚೆ ಶ್ರೀ ಮಹಾಲಸಾ ನಾರಾಯಣೀ ದೇವಿಕ್ಷೇತ್ರಾಂತು ಚೈತ್ರ ಮ್ಹಹಿನ್ಯಾಂತು ಸಂವ್ಸಾರಪಾಡ್ವೊ ತಾ. ೧೧-೦೪-೨೦೧೩ ದಿವಸು, ಹನುಮಾನ ಜಯಂತಿ ೨೫-೦೪-೨೦೧೩ ದಿವಸು ಚಲ್ಲೆ. ಚರ್ಡುಂವಾ ಖಾತ್ತಿರಿ ಸಂಸ್ಕಾರ, ಪೂಜಾ ವಿಧಾನ ಶಿಬಿರ ೨೦೧೩ಚೆ ಎಪ್ರಿಲ್ ೨೨ ದಾಕೂನು ಮೇ ೧೨ ಪರ್ಯಂತ  ಚಲ್ಲೆಲೆ. ಹೇ ಸಂದಭಾರಿ ಸರ್ವ ವಯೋಮಾನಾಚೆ ಚರ್ಡುಂವಾಂಕ ತಾಂಗೆಲೆ ನೈತಿಕ ಆನಿ ಆಧ್ಯಾತ್ಮಿಕ ವಾಡಪಣಾಚೆ ಉದ್ದೇಶ ಲಕ್ಷ್ಯಾಂತು ದವರೂನು ಘೇವ್ನು ದೇವ ಪೂಜಾ ವಿಧಿ, ಸಂಸ್ಕಾರ ವರ್ಗ, ಸಂಧ್ಯಾವಂದನ, ಸೂರ್ಯ ನಮಸ್ಕಾರ, ನವಗ್ರಹ, ಗಣಪತಿ, ರಾಮರಕ್ಷಾ, ವಿಷ್ಣು ಸಹಸ್ರನಾಮ ಇತ್ಯಾದಿ ಸ್ತೋತ್ರ ಪಠಣ, ಯಜ್ಜೋಪವಿತ ಧಾರಣ ವಿಧಿ ಇತ್ಯಾದಿ ಶಿಕೋವನು ದಿಲ್ಲೆ.
ವೈಶಾಖ ಮಾಸಾಂತು ಸಾಮೂಹಿಕ ಸತ್ಯನಾರಾಯಣ ಪೂಜಾ ಆನಿ ಚಂಡಿ ಹವನ, ೧೦-೦೬-೨೦೧೩ಕ ಶ್ರೀ ಗುರು ದೇವದತ್ತ ನವಗ್ರಹ ವರ್ಧಂತಿ ಉತ್ಸವು, ೧೧-೦೬-೧೩ಕ ಶ್ರೀ ಮಹಾಲಸಾ ದೇವಿಲೆ ವರ್ಧಂತಿ ಉತ್ಸವು, ೧೨-೦೬-೨೦೧೩ಕ ಶ್ರೀ ಗಣಪತಿ ದೇವಾಲೆ ವರ್ಧಂತಿ ಉತ್ಸವು ಅಪಾರ ಕುಳಾವಿ ಆನಿ ಭಕ್ತ ಬಾಂಧವಾಲೆ ಉಪಸ್ಥಿತೀರಿ ವಿಜೃಂಭಣೇರಿ ಚಲೀಲೆ ಖಬ್ಬರ ಮೆಳ್ಳಾ.

ಗೌಡ ಸಾರಸ್ವತ ಸಮಾಜ, ಶಿವಮೊಗ್ಗ

ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಮಂದಿರ, ಗೌಡ ಸಾರಸ್ವತ ಸಮಾಜ ಶಿವಮೊಗ್ಗ ಹಾಂಗಾಕ ಶ್ರೀ ಸಂಸ್ಥಾನ ಕಾಶೀ ಮಠಾಧೀಶ ಪ|ಪೂ| ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಆಜ್ಞಾನುಸಾರ ಶ್ರೀಮದ್ ಶ್ರೀ ಸಂಯಮೀಂದ್ರ ತೀರ್ಥ ಸ್ವಾಮೆಂ ತಾ. ೩೦-೦೫-೨೦೧೩ ಕ ಎವ್ನು ತಾ. ೨-೦೬-೨೦೧೩ ಪರ್ಯಂತ ಮೊಕ್ಕಾಂ ವರಲಿಲೆ. ತಾ. ೩೦-೦೫-೨೦೧೩ಕ ಪ|ಪೂ| ಸಂಯಮೀದ್ರ ಸ್ವಾಮ್ಯಾಂಕ ಎಂ. ಆರ್.ಎಸ್. ಸರ್ಕಲಾಂತು ಸ್ವಾಗತ ಕೋರ್ನು ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಳಾಕ ಆಪೋವ್ನು ವ್ಹರಲೆ. ಪ|ಪೂ| ಸ್ವಾಮ್ಯಾ ದಾಕೂನು ದೇವಾಲೆ ದರ್ಶನ, ದಾ ಸಮಸ್ತ ದಾಕೂನು ಸ್ವಾಗತ, ಪಾದಪೂಜಾ, ಸ್ವಾಮ್ಯಾ ದಾಕೂನು ಆಶೀರ್ವಚನ ಚಲ್ಲೆ. ತಾ. ೧-೦೬-೨೦೧೩ ದಿವಸು ಪ|ಪೂ| ಸ್ವಾಮ್ಯಾ ದಾಕೂನು ತಪ್ತಮುದ್ರಾಧಾರಣ, ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಾಕ ಶತಕಲಶಾಭಿಷೇಕ, ಮಹಾ ಮಂಗಳಾರತಿ, ಭಿಕ್ಷಾ ಸೇವಾ, ಮಹಾ ಸಮಾರಾಧನ ಇತ್ಯಾದಿ ಕಾರ್ಯಕ್ರಮು ವಿಜೃಂಭಣೇರಿ ಚಲೇಲೆ ಖಬ್ಬರ ಮೆಳ್ಳಾ. ಹೆರ್‍ದೀಸು ಸಕ್ಕಾಣಿ ಪೂಡೆ ನಿರ್ಮಾಲ್ಯ ವಿಸರ್ಜನ, ಧೋಂಪಾರಾ ಮಹಾ ನೈವೇದ್ಯ, ಮಹಾ ಮಂಗಳಾರತಿ, ಪ್ರಸಾದ ವಿತರಣ, ಮಹಾ ಸಮಾರಾಧನ, ಪ|ಪೂ| ಸ್ವಾಮ್ಯಾಂಗೆಲೆ ಪಾದ್ಯ ಪೂಜಾ, ಸ್ವಾಮ್ಯಾ ದಾಕೂನು ಆಶೀರ್ವಚನ ಜಾಲ್ಲ ಉಪರಾಂತ ತಾಂಕಾ ಕುಂದಾಪುರ ಮೊಕ್ಕಾಮಾಕ ಆತ್ಮೀಯ ಜಾವ್ನು ಪೆಟೋವ್ನು ದಿಲ್ಲಿಲೆ ಖಬ್ಬರ ಮೆಳ್ಳಾ.

ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳ, ಸಿದ್ದಾಪುರ(ಉ.ಕ)

ಸಿದ್ದಾಪೂರ ಗೌಡ ಸಾರಸ್ವತ ಬ್ರಾಹಣ ಸಮಾಜಾಚೆ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಂತು ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಶ್ರೀಪಾದ ವಡೇರ ಸ್ವಾಮೆಂ ತಾ. ೨-೦೫-೨೦೧೩ ದಾಕೂನು ೩-೦೫-೨೦೧೩ ಪರ್ಯಂತ  ಮೊಕ್ಕಾಂ ಆಶ್ಶಿಲೆ. ಹೇ ಸಂದರ್ಭಾರಿ ಗೌರವಾದರಾನಿ ಸ್ವಾಮ್ಯಾಂಕ ಪೂರ್ಣಕುಂಭ ಬರಶಿ ಸ್ವಾಗತ ಕೋರ್ನು ಶ್ರೀ ವಿದ್ಯಾಧಿರಾಜ ಕಲಾಮಂದಿರಾಕ ಆಪೋವ್ನು ವ್ಹರಲೆ. ದಾ ಸಮಸ್ತಾ ದಾಕೂನು ಪಾದ್ಯ ಪೂಜಾ, ಪ|ಪೂ| ಸ್ವಾಮ್ಯಾ ದಾಕೂನು ಆಶೀರ್ವಚನ ಸುಪ್ರಭಾತ ಪಠಣ, ಶ್ರೀ ಲಕ್ಷ್ಮೀ ವೆಂಕಟೇಶ ದೇವಾಕ ಕ್ಷೀರಾಭಿಷೇಕ, ದ್ವಾದಶ ಕಲಶಾರ್ಚನ, ಮಹಾನೈವೇದ್ಯ, ಭಿಕ್ಷಾಸೇವಾ, ಸಭಾ ಕಾರ್ಯಕ್ರಮಾಂತು ಕಲಶದಾನಿಂಕ ಪೂಜ್ಯ ಸ್ವಾಮ್ಯಾ ದಾಕೂನು ಫಲಮಂತ್ರಾಕ್ಷತ ವಿತರಣ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಚಲ್ಲೆ.
ಪ|ಪೂ| ಸ್ವಾಮ್ಯಾನಿಂ ಹಾಂಗಾ ತಾ. ೧೫-೦೫-೨೦೧೩ ದಾಕೂನು ೧೮-೦೫-೨೦೧೩ ಪರ್ಯಂತ ಮೊಕ್ಕಾಂ ಆಶ್ಶಿಲೆ ಸಂದರ್ಭಾರಿ ರಥೋತ್ಸವಾಂಗ ಹವನಾದಿ ಧಾರ್ಮಿಕ ಕಾರ್ಯಕ್ರಮ, ಶ್ರೀ ಲಕ್ಷ್ಮೀ ವೆಂಕಟೇಶ ರಥೋತ್ಸವ ಕಾರ್ಯಕ್ರಮ, ದೇವಾಲೆ ರಥಾರೋಹಣ, ಸಮಾಜ ಬಾಂಧವ ದಾಕೂನು ಶ್ರೀ ದೇವಾಕ ನಾರ್‍ಲ ಕೇಳಿ ಸಮರ್ಪಣ, ಗಾಂವಾಂತು ಶ್ರೀ ದೇವಾಲೆ ಉತ್ಸವು ಬಾಯ್ರಸೊರ್‍ಚೆ, ಅಷ್ಟಾವಧಾನ ಸೇವಾ, ಸಭಾ ಕಾರ್ಯಕ್ರಮಾಂತು ಪೂಜ್ಯ ಸ್ವಾಮ್ಯಾ ದಾಕೂನು ಆಶೀರ್ವಚನ ಇತ್ಯಾದಿ ಕಾರ್ಯಕ್ರಮ ಚಲ್ಲೆ.

ಮೆಗೇಲೆ ಉತ್ತರ

“ನಂಬಿ ಕೆಟ್ಟವರಿಲ್ಲವೋ ಗೋವಿಂದನ.. ಮ್ಹೊಣು ದಾಸ ಶ್ರೇಷ್ಠ ಸಾಂಗತಾತಿ. ಹೇ ಉತ್ತರ ಮೆಗೇಲೆ ಜೀವನಾಂತು ಸತ್ಯ ಜಾಲ್ಲಯಾ. ಹಾಂವ ಮಸ್ತ ಮ್ಹಣ್ಚೆ ತಿತ್ತುಲೆ ಶಿಕ್ಕಿಲೊ ನ್ಹಂಹಿ, ಮೆಗೇಲೆ ಜನ್ಮು ಜಾಲೇಲೆ ಏಕ ಕುಗ್ರಮಾಂತು, ಮೆಗೇಲೆ ಪಾಟೀಬಲಾಕ ಖಂಚೇಯಿ ಸಂಸ್ಥೊ, ದುಡ್ವಾಳು ಮನುಷ್ಯ ನಾಶ್ಶಿಲೆ ಜಾಲ್ಯಾರಿಚಿ ಚೋವೀಸ್(೨೪) ವರ್ಷ ಯಶಸ್ವಿ ಜಾವ್ನು ಪ್ರಕಟ ಜಾಲೀಲೆ “ಸರಸ್ವತಿ ಪ್ರಭಾ ಹೇ ಸಂಚಿಕೆ ಮೂಖಾಂತರ ಆಪಣಾಲೆ ಪಂಚ್ವೀಸ ವರ್ಷಾಚೆ(ರಜತ ವರ್ಷಾಚೆ) ಪ್ರಕಟಣಾ ಸುರುವಾತ ಕರತಾ ಆಸ್ಸ. ಹಾಕ್ಕಾ ಮೂಲ ಕಾರಣ ಹಾಂವೆ ತ್ಯಾ ಪರಮಾತ್ಮಾ ವಯರಿ ದವರಿಲೆ ಅಖಂಡ ವಿಶ್ವಾಸು ಮ್ಹೊಣು ಹಾಂವ ವಿನಮ್ರತೇನ ಸಾಂಗಚಾಕ ಇಚ್ಛಾ ಪಾವ್ತಾ. ಹಾಂತು ಹಾಂವೆ ಕೆಲೀಲೆ ಕಸ್ಸಲೇ ನಾ, ಮಾಜ್ಜೆ ದಾಕೂನು ಕರೆಯಿಲೆ ಪೂರಾ ತಾಣೇಚಿ. ತಾಣೆ ದಿಲೀಲೆ ಪ್ರೇರಣ ಪ್ರಕಾರ ಹಾಂವ ಭಾಷಾ ಸೇವಾ ಕರತಾ ಆಯಲೊ. ಪತ್ರಾಕ ಪಾಂಚ ವರ್ಷ ಭರಲೆ ವೇಳ್ಯಾರಿ ಆರಂಭ ಕೆಲೀಲೆ “ಸ್ಕಾಲರ್‌ಶಿಫ್ ಫಂಡಾ ದಾಕೂನು ಆಜ ಪರ್ಯಂತ ಆಮ್ಮಿ ಕಿಂಚಿತ್ ಧನ ಸಹಾಯು ದಿತ್ತಾ ಆಸ್ಸತಿ ಮ್ಹಳಯಾರಿ ತಾಕ್ಕಾ ತೋಂಚಿ ಕಾರಣು. ಖಂಚೇ ಕಷ್ಟಾಚೆ ವೇಳ್ಯಾರಿ ಸೈತ ಪ್ರತಿ ವರ್ಷ ಅರ್ಹ ವಿದ್ಯಾರ್ಥ್ಯಾಂಕ ತಾಜ್ಜೇನ ಧನಸಹಾಯು ವಾಂಟೂಚಾಕ ಆಮಕಾ ದೇವಾಲೆ ಕೃಪೇನ ಸಾಧ್ಯ ಜಾಲ್ಲಯಾ. ತಾಗೇಲೆ ಕೃಪೇಕ ಆನ್ನೇಕ ಉದಾಹರಣ ಸರಸ್ವತಿ ಪ್ರಭಾಚೆ “೨೦ ವರ್ಷಾಕ ೨೦ ಕೊಂಕಣಿ ಕೃತ್ಯೋ ಯೋಜನಾ ಯಶಸ್ವಿ ಜಾಲೀಲೆ.   ಹಾಂವೆ ಹೇ ಯೋಜನಾ ಹಾತ್ತಾಕ ಘೆತ್ತಿಲ ತೆದ್ದನಾ ಪೂರಾ ಲೋಕ ಮ್ಹಳ್ಳಿಂತಿ. “ತುಜ್ಜೇನ ಖಂಡಿತ ಹೇ ಯೋಜನಾ ಯಶಸ್ವಿ ಕೊರಚಾಕ ಜಾಯನಾ... ಮ್ಹೊಣು. ತೆದ್ದನಾ ಹೇ ಯಶಸ್ವಿ ಕೊರಚೆ ಪೂರ್ಣ ಜವಾಬ್ದಾರಿ ಹಾಂವೆ ಪರಮಾತ್ಮಾ ವಯರಿ ಘಾಲ್ಲೆ. ತ್ಯಾ ಯೋಜನಾ ಆಜಿ ಯಶಸ್ವಿ ಜಾಲ್ಲಯಾ. ಹೇ ಪೂರಾ ಯವಜಿಲಿ ತೆದ್ದನಾ ಮಾಕ್ಕಾ ದಿಸ್ತಾ “ಸರಸ್ವತಿ ಪ್ರಭಾ ಹುಬ್ಬಳ್ಳಿಚಾನ ೨೪ ವರ್ಷ ಯಶಸ್ವಿ ಜಾವ್ನು ಪ್ರಕಟ ಜಾವ್ನು ಆಯ್ಯಿಲೆ ಪೂರ್ತಿ ಯಶಾಫಲ ಪರಮಾತ್ಮಾಕ ಪಾವ್ಕಾ. ಮ್ಹೊಣು.
ತಾಜ್ಜ ಬರಶಿ ತುಮ್ಮಿ ಪೂರಾ ದಿಲೀಲೆ ಸಕಾಲಿಕ ಮದ್ದತ್ ಹಾಂವೆ ವಿಸರಚೆ ತಶ್ಶಿ ಆಸ್ಸವೇ? ತುಮ್ಮಿ ಮಾಜ್ಜೇರಿ ಭರ್‍ವಸ ದವರೂನು “ಸರಸ್ವತಿ ಪ್ರಭಾಕ ಚಂದಾದಾರ ಜಾಲ್ಲಿಂತಿ, ಜಾಹೀರಾತು ದೀವ್ನು, ದೇಣಿಗಾ ಸೈತ ದಿಲ್ಲಿಂತಿ. ಆಮ್ಮಿ ಕರಾವಳಿ ದಾಕೂನು ಮಸ್ತ ದೂರ ಆಸಲೇರಿಚಿ ಕರಾವಳಿಚೆ ಕೊಂಕಣಿ ಲೋಕಾನಿ, ಕರಾವಳಿಚಾನ ವ್ಯಾಪಾರು, ವೃತ್ತಿ, ಉದ್ಯೋಗಾ ಖಾತ್ತಿರಿ ವಿಂಗ ವಿಂಗಡ ಗಾಂವಾಕ ವಚ್ಚುನು ರಾಬ್ಬಿಲೆ ಆಮಗೇಲೆ ಲೋಕಾನಿ  ದಿಲೀಲೆ ನಿರಂತರ ಸಹಾಯು, ಮದ್ದತ್ತಾನ ಸರಸ್ವತಿ ಪ್ರಭಾ ಇತ್ತುಲೆ ಕಾಳ ನಿರಂತರ ಜಾವ್ನು ಚೇಲ್ನು ಆಯಲಾ ಮ್ಹಣಚೇಯಿ ಹಾಂವ ವಿನಮ್ರತೇನ ಸಾಂಗಚಾಕ ಇಚ್ಛಾ ಪಾವತಾ.
ಮಾಕ್ಕಾ ಖಂಚೇಯಿ ಪ್ರಶಸ್ತಿ, ಪುರಸ್ಕಾರ ದಿಯ್ಯಾತಿ, ಸನ್ಮಾನು ಕರಾ ಮ್ಹೊಣು ಖಂಡಿತ ಹಾಂವ ತುಮಗೇಲಾಗ್ಗಿ ಪೂರಾ ಮಾಗ್ಗನಾ, ಜಾಲಯಾರಿ ಹಾಂವ ತುಮಗೇಲಾಗ್ಗಿ ಮಾಗಚೆ ಮ್ಹಳಯಾರಿ ಆಮಗೇಲೆ ಮ್ಹಾಲಗಡ್ಯಾನಿ ೨೫೦ ವರ್ಷ ಕಾಲಾಚೆ ಪರ್‍ದೇಶಿ ಲೋಕಾಲೆ ಅಖಂಡ ದೌರ್ಜನ್ಯ, ಮತಾಂತರಾಕ ಭೀನಾಶಿ ಆಮಗೇಲೆ ಸಂಸ್ಕೃತಿ ಆನಿ ಭಾಷಾ ವಾಂಚೋವ್ನು ಘೇವ್ನು ಆಯಲೆಂ. ತ್ಯಾ ವೇಳ್ಯಾರಿ ತಾನ್ನಿ ವಾಂಚಿಲೆ ಘರ, ಗಾಂವ, ಆಸ್ತಿ, ಪಾಸ್ತಿ ಸರ್ವ ತ್ಯಾಗ ಕೋರ್ನು ಆಯಲೆ. ಆಜಿ ತಸ್ಸಾಲೆ ಕಷ್ಟಾಚೆ ಪರಿಸ್ಥಿತಿ ನಾ. ಅಸ್ಸಲೆ ವೇಳ್ಯಾರಿ ಮ್ಹಾಲ್ಗಡ್ಯಾನಿ ವರೋವ್ನು ಘೇವ್ನು ಆಯ್ಯಿಲೆ “ಕೊಂಕಣಿ ಭಾಸ ಆನಿ ಸಂಸ್ಕೃತಿ ಮುಖಾವೈಲೆ ಜನಾಂಗಾಕ ಪಾವೈಕಾ ಜಾಲೇಲೆ ಜವಾಬ್ದಾರಿ ಆಮ್ಚೇರಿ ಆಸ್ಸ. ತಾಜ್ಜ ಖಾತ್ತಿರಿಚಿ “ಸರಸ್ವತಿ ಪ್ರಭಾ ನಿರಂತರ ವಾವ್ರೊ ಕರ್ತಾ ಆಸ್ಸ. ತುಮ್ಮಿ ಸರ್ವ ಆಮಗೇಲೆ ಹೇ ಉದ್ದೇಶ ಸಾಕಾರ ಜಾವಚಾಕ ಮಾಕ್ಕಾ ಪ್ರೋತ್ಸಾಹ ದಿವ್ಕಾ ಮ್ಹೊಣು ತುಮಗೇಲೆ ಸರ್ವಾಲಾಗ್ಗಿ ಹೇ ಮೂಖಾಂತರ ವಿನಮ್ರ ಜಾವ್ನು ಮಾಗಣಿ ಕರ್ತಾ ಆಸ್ಸ. ತುಮಗೇಲೆ ಖಂಚೇಯಿ ಸಲಹಾ-ಸೂಚನಾ, ಮಾರ್ಗದರ್ಶನಾಕ ಸ್ವಾಗತ ಆಸ್ಸ.
ಸರ್ವಾಂಕ ದೇವು ಬರೆ ಕೊರೊಂ    - ಆರ್‍ಗೋಡು ಸುರೇಶ ಶೆಣೈ, ಸಂಪಾದಕು

ಉಪನಿಷದ್ ಕಾಣಿ -೭

ಬೃಹದಾರಣ್ಯಕ ಉಪನಿಷತ್ ಏಕ ಪ್ರಮುಖ ಉಪನಿಷತ್ ಮ್ಹಣ್ಯೇತ. ಸುಮಾರ ಕ್ರಿ.ಪೂ ೮ದಾಕೂನು ೭ನೇ ಶತಮಾನಾಂತು ಹಾಜ್ಜೆ ರಚನ ಜಾಲ್ಲ್ಯಾ ಮ್ಹಣತಾತಿ. ಹಾಂತು  ಮಧುಕಾಂಡ, ಯಾಜ್ಞವಲ್ಕೀಯ ಕಾಂಡ ಆನಿ ಖಿಲಕಾಂಡ ಮ್ಹಣಚೆ ತೀನಿ ಕಾಂಡ, ಸ ಅಧ್ಯಾಯ ಆಸ್ಸ. ಬೃಹದಾರಣ್ಯಕ ಉಪನಿಷತ್ತಾಂತು ಆತ್ಮವಿದ್ಯೆ ವಿಚಾರ ಜಾವ್ನು ಮಸ್ತ ವಿವರ ಜಾವ್ನು ಸಾಂಗಿಲೆ ಆಸ್ಸ. ಹಾಂತುಲೆ ಪ್ರಸಿದ್ಧ ಶ್ಲೋಕ ಅಸತೋ ಮಾ ಸದ್ಗಮಯ| ತಮಸೋ ಮಾ ಜ್ಯೋತಿರ್ಗಮಯ| ಮೃತ್ಯೋರ್ಮಾ ಅಮೃತಂಗಮಯ| ಓಂ ಶಾಂತಿ ಶಾಂತಿ ಶಾಂತಿಃ||
ಇತ್ಲೆ ಮಹತ್ವಾಚೆ ಬೃಹದಾರಣ್ಯಕ ಉಪನಿಷದಾಂತು ಏಕ ಕಾಣಿ ಆಸ್ಸ. ಆಮ್ಮಿ ಥೊಡೆ ಮನ ದಿಲೇರಿ ಆಮಗೇಲೆ ಅಜ್ಞಾನ, ಅಹಂಕಾರ, ಸ್ವಾರ್ಥ ದೂರ ಜಾವ್ನು, ಉರಲೇಲೆ  ಆಯಷ್ಯ ಸಾರ್ಥಕ ಜಾವ್ನು ವಾಂಚುಕ ಸಾಧ್ಯ ಜಾತ್ತಾ.
ಶ್ವೇತಕೇತು ಉದ್ದಾಲಕಾಲೆ ಪೂತು. ಬಾಪ್ಪುಸು ಪುತ್ತಾಕ ಮೂಂಜಿ ಕೋರ್ನು ಸಾಂಗ್ತಾ. “ಆಮಗೇಲೆ ವಂಶಾಂತು ಪ್ರತಿಯೆಕ್ಲೆ ವೇದ ಶಿಕ್ತಾ ಆಯ್ಲಿಂತಿ. ತೂಂಚಿ, ತಾಂಗೆಲ ವರಿ ಖಂಚತರಿ ಚಾಂಗ ಗುರು ಕಡೇನ ವಚ್ಚುನು ವೇದ ಶಿಕ್ಕೂನು, ಜ್ಞಾನ ಸಂಪಾದನ ಕೋರ್ನು ಘೇವ್ನು ಯೋ ಮ್ಹಣತಾ. ಶ್ವೇತಕೇತು ಗುರುಕುಲ ವಚ್ಚುನು ವೇದ ಜ್ಞಾನ ಬರಶಿ ಸಬಾರ ವಿಷಯ  ಅಧ್ಯಯನ ಕೋರ್ನು “ವಿದ್ಯಾಭೂಷಣ ಮ್ಹಣೋವ್ನು ಘೇವ್ನು ೨೪ ವರ್ಷಾ ನಂತರ ಪರತ ಘರ್‍ಕಡೆ ಎತ್ತಾ.
ತೆದ್ದನಾ ತಾಕ್ಕಾ ಆಪಣಾನ ಶಿಕ್ಕಿಲೆ ವಿದ್ಯೆ ಖಾತ್ತಿರಿ ಮಸ್ತ ಅಹಂಕಾರ ಎವ್ನು ಆಸ್ತಾ. ತಶ್ಶಿ ಮ್ಹೊಣು ಪುತ್ತಾಲೆ ತೋಂಡ ಪಳೈಚೆ ಭಿತ್ತರಿ ಉದ್ದಾಲಕಾಕ ಕೋಳ್ನು ವತ್ತಾ. ತೆದ್ದನಾ ಉದ್ದಾಲಕ ಪುತ್ತಾಕ ಲಾಗ್ಗಿ ಆಪೋವನು“ ಶ್ವೇತಕೇತು! ಇತ್ತುಲೆ ಭಿತ್ತರಿ ತೂಂವೆ ಜಗತ್ತಾಂತು ಆಸ್ಸುಚೆ ಸರ್ವ ವಿದ್ಯಾ ಶಿಕ್ಕೂನು ಜಾಲ್ಲ್ಯಾ ನ್ಹಂಹಿವೇ? ಮ್ಹಣತಾ. ತಾಕ್ಕಾ ಶ್ವೇತಕೇತು “ವ್ಹಹಿ ಮ್ಹೊಣು ಗರ್ವಾನಿ ಜವಾಬ ದಿತ್ತಾ.
ತೆದ್ದನಾ ಉದ್ದಾಲಕು “ಜಾಲ್ಯಾರಿ ಕಳ್ನಾತ್ತಿಲೆ ಕೊಳಚೆ, ಗ್ರಹಣ   ಕೊರಚಾಕ ಜಾಯನಾತ್ತಿಲೆ ಗ್ರಹಣ ಕೊರಚೆ, ಕಾನ್ನಾಕ ಆಯ್ಕನಾತ್ತಿಲೆ ಆಯ್ಕುಚೆ, ದಿಸ್ಸನಾ ಜಾಲೇಲೆ ವಿಷಯು ಪಳೈಚೆ ವಿದ್ಯಾ ತೂಂ ಶಿಕಲಾವೇ? ಮ್ಹಣ್ತಾ. ಹೇ ಪ್ರಶ್ನೆ ಆಯಕೂನು ಆಶ್ಚರ್ಯಚಕಿತ ಜಾಲೇಲೊ ಶ್ವೇತಕೇತು “ತಸ್ಸಾಲೆ ಏಕ ವಿದ್ಯೆ ಆಸ್ಸವೇ? ಗುರುಕುಲಾಂತು ಹೇ ವಿಷಯು ಮಾಕ್ಕಾ ಶಿಕಯನಿ, ತಸ್ಸಲೆ ವಿದ್ಯಾ ಅಸ್ಸ ಮ್ಹೊಣು ಜಾಲ್ಯಾರಿ ತೂಂವೆ ಮಾಕ್ಕಾ  ದಯದವೋರ್ನು ಕಳೋವ್ಕಾ. ಮ್ಹೊಣು ಮಾಗತಾ.
ತೆದ್ದನಾ ಉದ್ದಾಲಕು ಪುತ್ತಾಕ ಸಾಂಗ್ತಾ “ಸಕ್ಕಡ ಸೃಷ್ಠಿ ಜಾವ್ಚೆ ಪಯಲೆ ‘ಸತ್ ಮಾತ್ರ ಆಶ್ಶಿಲೆ. ತಾಕ್ಕಾ ಸಮಾನ ಜಾಲೇಲೆ ವಿಂಗಡ ಖಂಚೇ ನಾಶ್ಶಿಲೆ. ‘ಸತ್ ಸಮಜತಾ ಹಾಂವೂ ವೃದ್ಧಿ ಜಾವ್ನು ಸೃಷ್ಠಿ ಕೊರ್‍ಯಾ ಮ್ಹೊಣು ಸೃಷ್ಠಿ ಕರ್ತಾ.  ಪ್ರಥಮ ಅಗ್ನಿ ಸೃಷ್ಠಿ ಜಾತ್ತಾ. ಅಗ್ನಿ ಜಲದೇವತೆಕ ಸೃಷ್ಠಿ ಕರ್ತಾ. (ಆಮ್ಮಿ ರಳ್ಯಾಲೆ ವೇಳ್ಯಾರಿ ದೋಳೆಂತು ಉದಾಕ ಎವ್ಚೆ.)  ಜಲದೇವತಾ ಅನ್ನ ದೇವತೆಕ ಸೃಷ್ಠಿ ಕರತಾ. “ಸತ್ “ಹಾಂವೆ ತ್ಹೀನಿ ದೇವತೆಂಕ ಸೃಷ್ಠಿ ಕೆಲ್ಲೆ. ತಾಂಕಾ ಏಕ ರೂಪ ನಾಮ ದೀವೆಂ ಮ್ಹೊಣು ಲೆಕ್ತಾ.
ಹೇ ತ್ಹೀನಿ ರೂಪ ‘ಸತ್ಚೆ, ಅಗ್ನಿ ‘ಸತ್ಚೆ ಪೂರ್ಣ ಸರ್ವಶಕ್ತಿಮಾನ ಆನಿ ತ್ಹೀನಿ ದೇವತಾಲೆ ಶಕ್ತಿ. ಕೆದನಾ ಮನುಷ್ಯು ನಿದ್ದೆಂತು ಆಶ್ಶಿಲೆ ತೆದ್ದನಾ ‘ಸತ್ಚೆ ಸಂಪರ್ಕು ಜಾತ್ತಾ. ಮನುಷ್ಯು ಮರತಾನಾ ತಾಗೇಲೆ ವಾಕ್‌ಶಕ್ತಿ ತಾಗೇಲೆ ಮನಾಂತು ವಿಲೀನ ಜಾತ್ತಾ. ಮನ ತಾಗೇಲೆ ಶ್ವಾಸಾಂತು, ಶ್ವಾಸ ಅಗ್ನಿಂತು ಆನಿ ಅಗ್ನಿ ಪರಮಾತ್ಮಾಂತು ವಿಲೀನ ಜಾತ್ತಾ. ಅಶ್ಶಿ ಮ್ಹಳಯಾರಿ ಜೀವಾತ್ಮಕ ನಾಶ ನಾ. ಸಗಳೆ ಜಗತ್ತಾಕ ‘ಸತ್ ಆಪಣಾಲೆ ಅಧೀನಾಂತು ದವರ್ನು ಘೆತ್ತಾ. ಸರ್ವಾಂಕ ಉದ್ಧಾರ, ನಾಶ ಕರತಾಲೊ ‘ಸತ್ ವ ಪರಮಾತ್ಮು.
ಶ್ವೇತಕೇತು ಬಾಪ್ಸುಲೆ ವಿನಂತಿ ಕರ್ತಾ “ಮಾಕ್ಕಾ ಆನ್ನಿಕೆ ಚ್ಹಡ ವಿಷಯು ಕಳೇಯಿ ಮ್ಹೊಣು. ಉದ್ದಾಲಕು ಸಾಂಗ್ತಾ “ಕಶ್ಶಿ ಮ್ಹೋವಾ ಮೂಸ ಪೂರಾ ಕಡೇನ ಭೋವ್ನು ವಿಂಗವಿಂಗಡ ಪುಷ್ಪ ದಾಕೂನು ಮೋವು ಹಾಣು ತಟ್ಟೆಂತು ಒಟ್ಟು ಕರ್ತಾ. ಜಾಲ್ಯಾರಿ ಮೊಂವಾಕ ಪರಸ್ಪರ ಗೊತ್ತು ಆಸ್ಸನಾ ತಾಂಗೆಲೆ ಮೂಲಿ ಖಂಚೆ ಫುಲ್ಲಾಂತುಲೆ ಹಾಡಿಲೆ  ಮ್ಹೊಣು. ಅನೇಕ ನಂಯಿ ಸಮುದ್ರಾಂತು ವಿಲೀನ ಜಾತ್ತಾತಿ.  ಸಮುದ್ರ ಉದ್ದಾಕ ಆವಿ ಜಾವ್ನು, ಮೋಡ ಜಾವ್ನು, ಪಾವ್ಸು ಎವ್ನು ಅನೇಕ ನಂಯ್ಯೋ ಜಾತ್ತಾಚಿ. ಆನಿ ತ್ಯಾ ಪರತೂನು ಸಮುದ್ರಾಂತು ವಿಲೀನ ಜಾತ್ತಾತಿ. ಜಾಲ್ಯಾರಿ ಪರಸ್ಪರ ತಾಂಗೆಲೆ ಪರಿಚಯ ಜಾಯ್ನಾ. ತಸ್ಸೀಚಿಂ ಪ್ರಾಣಿಮಾತ್ರ ‘ಸತ್ ದಾಖೂನು ಎವ್ನು ಪರತ ‘ಸತ್ ಲೇ ವತ್ತಾತಿ. ಜಾಲ್ಯಾರಿ ತಾಂಕಾ ಹೇ ಜ್ಞಾನ ಆಸ್ಸನಾ. ಉದ್ದಾಲಕ ಪುತ್ತಾಕ “ಏಕ ಅಂಜುರಾಚೆ ಫಳ ಹಾಡಿ ಮ್ಹಣತಾ. “ತ್ಯಾ ಫಳ ಭಾಗಕರೀ ಮ್ಹಣ್ತಾ. ಆನಿ ತುಕ್ಕಾ ಕಸ್ಸಲೆ ದಿಸ್ತಾ? ಮ್ಹಣತಾ. ಶ್ವೇತಕೇತು “ಮಸ್ತ ಬಿಯ್ಯೋಂ ಮ್ಹಣತಾ. ಏಕ ಬೀ ಕಾಡಿ  ಆನಿ ಖೇತ್ತಿ ಮ್ಹಣತಾ. ಆತ್ತ ಕಸ್ಸಲೆ ದಿಸ್ತಾ? ಮ್ಹೊಣು ಉದ್ದಾಲಕು ನಿಮ್ಗಿತಾ. “ಕಸ್ಸಲೇ ದಿಸ್ಸನಾ, ಬೀ ಮಾತ್ತೆ ಭಿತ್ತರಿ ಮೇಳ್ನು ಘೆಲ್ಲಾ. ಮ್ಹಣ್ತಾ ಶ್ವೇತಕೇತು. ಹೇ ಭಿಯ್ಯಾ ನಿಮಿತ್ತ ವ್ಹಡ ವೃಕ್ಷ ಜಾತ್ತಾ. ಉದ್ದಾಲಕು ಪುತ್ತಾಕ ಮೀಟ (ಲವಣ) ಘೇವ್ನು ಏಕ ಉದಕಾಶಿಲೆ ಆಯ್ದನಾಂತು ಘಾಲಿ ಮ್ಹಣತಾ. ಹೆರ್‍ದೀಸು ತ್ಯಾ ಆಯದನ ಹಾಡಿ ಮ್ಹಣತಾ. ಲವಣ ಉದಕಾಂತು ವಿಲೀನ ಜಾವ್ನು ಆಸ್ತಾ. ಉದಕಾಚೆ ಖಂಚೆ ಭಾಗಂತುಲೆ ರೂಚಿ ಲವಣಾಚೆ ರೂಚಿ ವ್ಯತ್ಯಾಸು ನಾ.
ಹೇ ಜಗತ್ತಾಂತು ‘ಸತ್ ಸರ್ವ ವ್ಯಾಪಕ, ಪರಮಾತ್ಮು ಮೂಲಕಾರಣ ಪುರುಷು. ಶ್ರೀಮಾನ್ ಭಾಗವತಾಂತು ಪ್ರಥಮ ಅಧ್ಯಾಯಾಚೆ ಪ್ರಥಮ ಶ್ಲೋಕ “...ಸತ್ಯಂ ಪರಂ ಧೀ ಮಹಿ ಮ್ಹಣತಾ ಶ್ರೀ ಭಗವಾನ್ ವೇದವ್ಯಾಸು. ಸತ್ಯ ಮಳೇರಿ ಪೂರ್ಣ ಪರಮಾತ್ಮು. ಹಾಂವು ತುಗೇಲೆ ಧ್ಯಾನ ಕರತಾ.
- ಕೆ. ಜನಾರ್ಧನ ಭಟ್, ಮೈಸೂರು.

Saraswati Prabha

“ಸರಸ್ವತಿ ಪ್ರಭಾ ೨೫ ವರ್ಷಾಕ ಯವ್ನು ಪಾವ್ವಿಲೆ ಕಾಣಿ! -೧

ಮನುಷ್ಯ ಜೀವನಾಂತು ಜನ್ಮಿಲ ಮಾಗಿರಿ ಕಾಮ ಕರನಾಶಿ ಆಮಕಾ ವಿಂಗಡ ವಾಟ ನಾ. ಜನನ ದಾರಭ್ಯ ಥೊಡೆ ಕಾಳ ಚರ್ಡಪಣಾಂತು ವತ್ತಾ. ಯುವಕಾರ ಜಾವ್ಚೆ ಭಿತ್ತರಿ ಆಮ್ಮಿ ವಿದ್ಯಾವಂತ ಜಾವ್ನು ಜವಾಬ್ದಾರಿ ಘೆವ್ಚೆ ಸಾಮರ್ಥ್ಯ ವಾಡ್ಡೊವನು ಘೆವ್ಕಾ. ತ್ಯಾ ಖಾತ್ತಿರಿ ಆಮಗೇಲೆ ಆವಯ-ಬಾಪಯಿ ಆಮಕಾ ಸಂಸ್ಕಾರ, ಸಂಸ್ಕೃತಿ, ವಿದ್ಯಾ ಶಿಕೈತಾತಿ. ತ್ಯಾ ಆಮಗೇಲೆ ಜೀವನಾಂತು ಆಸ್ಸ ಕೋರ್ನು ಲೋಕಾರೂಢಿಕ ಚ್ಯುತಿ ಯಾನಾ ತಶ್ಶಿ ಸಂಪತ್ತಿ ಒಟ್ಟು ಕೊರಚೆ, ಭೋಗ ಜೀವನ ಚಲೈಚೆ ಶಾಸ್ತ್ರಬದ್ಧ ಮ್ಹಣೋವ್ನು ಘೆತ್ತಾ. ಪ್ರತಿಯೆಕ್ಲ್ಯಾನ ಶ್ರೇಷ್ಠ ಮ್ಹೊಣು ಏಕ್ಕಾ ಕಾಮ ಕರ್ತ ಉರಲ್ಯಾರಿ ದುಸ್ರೆ ಚಾಕ್ರಿ ಕರತಾಲಿ ಕೋಣ? ಪೂರಾ ಜನಾನ ಆಫೀಸರ ಜಾವ್ಕಾ ಮ್ಹೊಣು ಸಪಾಯಿ ಕಾಮ ಕೋಣಯಿ ಕರ್ನಿ ಮ್ಹೊಣು ಸಮಜಿಯಾ ತೆದ್ದನಾ ವಾತಾವರಣಾಂತು ಭೊರಚೆ ಕೂಸ್ಸಡ, ಕೋಯ್ರು ಕಾಡತಾಲಿ ಕೋಣ? ಬಾಮ್ಮುಣು ಬಾಯ್ರಿ ಭೋವ್ನು-ಘೂವ್ನು ಯತ್ತಾ, ಹಾಂವ ಮಾತ್ರ ಇತಯಾಕ ಘರಾ ಕಾಮ ಜಾಲೇಲೆ ಆಯ್ದನ ಗಾಸ್ಸುಚೆ, ಆಂವ್ಗಲೆ ಉಂಬಳ್ಚೆ ಕೋರ್‍ಕಾ ಮ್ಹೊಣು ಬಾಯಲೇನ ಖಾಲಿ ರಾಂದಪ ಮಾತ್ರ ಕೋರ್ನು ಪಾಯ್ಯಾರಿ ಪಾಯು ಘಾಲ್ನು ಬಸಲ್ಯಾರಿ ಪರತ ರಾಂದಪ ಕೊರಚಾಕ ತೀ ಖಂತುಲೇನ ಆಯ್ದನ ಹಾಡ್ತಾ? ಘಾಲ್ನು ಘೆವಚಾಕ ಕಂತುಲೇನ ಆಂವ್ಗಲೆ ಹಾಡ್ತಾ.
ತ್ಯಾ ನಿಮಿತ್ತಾನ ಆಮ್ಮಿ ಸಮಜೂಕಾ ‘ಕೊರಚೆ ಕಾಮ್ಮಾಂತು ಖಂಚೇಯಿ ಉತ್ಕೃಷ್ಟ ನ್ಹಂಹಿ ಜಾಂವೊ ನಿಕೃಷ್ಟ ನ್ಹಂಹಿ ಮ್ಹೊಣು. ಆಮ್ಮ ಆಮ್ಗೆಲೆ ವಾಂಟೆಕ ಆಯ್ಯಿಲೆ ಕಾಮ್ಮ ಪ್ರಾಮಾಣಿಕ ಜಾವ್ನು ಕೊರಚೆ ಮಾತ್ರ ಆಮಗೇಲೆ ಜವಾಬ್ದಾರಿ. ಹೇ ಹಾಂವೆ ಅನುಭವಾನಿ, ಪರಮಾತ್ಮಾಲೆ ಕೃಪೇನ ಕೋಳ್ನು ಘೆತ್ತಿಲೆ ಸತ್ಯ. ತ್ಯಾ ಖಾತ್ತಿರಿ ಹಾಂವ ಸುರವೇಕ ವಿನಮ್ರತೇನ ಸಾಂಗಚಾಕ ಇಚ್ಛಾ ಪಾವ್ತಾ. “ಸರಸ್ವತಿ ಪ್ರಭಾ ಕೊಂಕಣಿ ಮಾಸಿಕ ಚಲೈಲೆ ಹಾಂವ ನ್ಹಂಹಿ, ಹಾಂವ ಖಾಲಿ ನಿಮಿತ್ತ ಮಾತ್ರ. ಹ್ಯಾ ಯಶಾಚೆ ಪೂರ್ತಿ ಫಲ ಪಾವ್ಕಾ ಜಾಲೀಲೆ ಹಾಂವ ನಂಬ್ಗಿಲೀಲೊ ಪರಮಾತ್ಮಾಕ.
ಪರಮಾತ್ಮಾನ ಮಾಕ್ಕಾ ಹೇ ಕಾರ್ಯಾಕ ಕಶ್ಶಿ ವಿಂಚೂನು ಘೆತ್ಲೆ ಮ್ಹಣಚೆ ಕಾಣಿ ಸಾಂಗ್ತಾ. ೧೯೮೬ ಇಸ್ವೆಂತು ಹಾಂವ ಹೇ ಪತ್ರಿಕಾ ಕ್ಷೇತ್ರಾಕ ಆಯ್ಯಿಲೊ. ಆನಿ ೧೯೮೯ ಪರ್ಯಂತ ಆಶಾಜನಕ, ಕೈಗನ್ನಡಿ ಇತ್ಯಾದಿ ಪತ್ರಿಕೆಂತು ಪತ್ರಿಕೋದ್ಯಮಾಚೆ ಅ..ಆ.. ಶಿಕಲೊ. ತೆದ್ದನಾ ಹಾಂವ ಶ್ರೀ ಬಿ.ವಿ.ಬಾಳ ಮಾಮ್ಮಾಲೆ ಸಂಪಾದಕತ್ವಾರಿ ಪ್ರಕಟ ಜಾತ್ತಾಶ್ಶಿಲೆ “ಪಂಚ್ಕಾದಾಯಿಚೆ ಚಂದಾದಾರ ಜಾವ್ನಾಶ್ಶಿಲೆ ನಿಮಿತ್ತ “ಕೊಂಕಣಿ ಖಬ್ಬರ ತಾಜ್ಜ ನಿಮಿತ್ತ ಮಾಕ್ಕಾ ಕಳ್ತಾಶ್ಶಿಲೆ. ತಾಂತಾಯ್ಯಿಲೆ ೧೯೮೯ಂತು ಅಖಿಲ ಭಾರತ ಕೊಂಕಣಿ ಸಾಹಿತ್ಯ ಪರಿಷತ್ತಾಚೆ ಭಾಂಗಾರಾ ಮಹೋತ್ಸವ ಮಣಿಪಾಲಾಂತು ಜನವರಿ ೬,೭,ಆನಿ ೮ ತಾರೀಖೆಕ ಚಲ್ತ ಮ್ಹೊಣು. ತೆದ್ದನಾ ಧಾರವಾಡ ಆಕಾಣಿವಾಣಿಚೆ ಜಾಯಿ-ಜೂಯಿ ಕಾರ್ಯಕ್ರಮಾಂತು ಪ್ರಸಾರ ಜಾಲೀಲೆ ಮೆಗೇಲೆ ತೀನಿ ಕೊಂಕಣಿ ಲ್ಹಾನ ಕಾಣ್ಯೋ ಆಶ್ಶಿಲೆ. ತ್ಯಾ ಕಾಣಿ ಪ್ರಿಂಟ್ ಕೋರ್ನು ಹಾಂವೆ ೧೬ ಪುಟಾಚೆ ‘ಕಾಣ್ಯಾ ಗುಚ್ಛಾ ಪುಸ್ತಕ ಪ್ರದರ್ಶನಾಂತು ದವರಚಾಕ ಪೆಟೈಲೆ. ತ್ಯಾ ಸಮ್ಮೇಳನಾಚೆ ಪುಸ್ತಕ ಪ್ರದರ್ಶನ ಸಮಿತಿ ಅಧ್ಯಕ್ಷ ಜಾವ್ನು ಶ್ರೀ ಎಮ್.ವಿ. ಪಡಿಯಾರ ಮಾಮು ಆಶ್ಶಿಲೆ. ಮಾಕ್ಕಾ ಸಮ್ಮೇಳನಾಕ ಆಹ್ವಾನ ಆಯ್ಲೆ. ತೆದ್ದನಾ ಮಾಕ್ಕಾ ಖಾಲಿ ೨೨ ವರ್ಷ ಮಾತ್ರ ಭರಲೀಲೆ. ಆನಿ ಹಾಂವ ತ್ಯಾ ಸಮ್ಮೇಳನಾಂತು ವಾಂಟೊ ಘೆವಚಾಕ ಘೆಲೀಲೊ. ಥಂಯಿ  ಚಲೀಲೆ ವಿಂಗ ವಿಂಗಡ ಗೋಷ್ಠಿ, ಪುಸ್ತಕ ನಿಮಿತ್ತ ಕೊಂಕಣಿ ಭಾಷೆಚೆ ಇತಿಹಾಸಾ ಖಾತ್ತಿರಿ, ತಾಜ್ಜ ಪ್ರಾಚೀನತಾ, ಕೊಂಕಣಿಗಾನ ಗೋಂಯ ಸೋಣು ಯವ್ಕಾ ಜಾಲೀಲೆ ಪರಿಸ್ಥಿತಿ, ಪೋರ್ಚುಗೀಸಾನಿ ಕೊಂಕಣಿಗಾ ವಯರಿ, ಆಮಗೇಲೆ ಸಂಸ್ಕೃತಿ ವಯರಿ ಕೆಲೀಲೆ ದೌರ್ಜನ್ಯ ಇತ್ಯಾದಿ ವಿಷಯು ಮಾಕ್ಕಾ ವಿವರ ಜಾವ್ನು ಕಳ್ಳೆ. ತೆದ್ದನಾ ಮಾಕ್ಕಾ ದಿಸಲೆ ಹಾಂವೆ ಮಾತೃಭಾಷೆ ಕೊಂಕ್ಣಿ ಭಾಷೆ ಖಾತ್ತಿರಿ ಖಾಂಯ್ಪೂಣಿ ಕೋರ್‍ಕಾ ಮ್ಹೊಣು. ಏಕ ಕೊಂಕಣಿ ಪತ್ರ ಕಾಳ್ಯಾರಿ ಕಶ್ಶಿ? ಮ್ಹಣ್ಚೆ ವಿಚಾರು ಆಯ್ಲೆ. ಜಾಲ್ಯಾರಿ ಮೆಗೇಲೆ ವಿಚಾರ ಆಯಕೂನು ಪೂರಾ ಲೋಕ ಹಾಸಲೆ. ತಾಕ್ಕ ಕಾರಣ ಮ್ಹಳಯಾರಿ ಹಾಂವೆ ಹುಬ್ಬಳ್ಳಿಚಾನ ಕೊಂಕಣಿ ಪತ್ರಿಕಾ ಪ್ರಕಟ ಕರ್ತಾ ಮ್ಹೊಣು ಬಾಯರ ಸರಲೀಲೆ ತಾಂಕ ಪೂರಾ “ಮೂರ್ಖ ಪ್ರಯತ್ನ ಮ್ಹೊಣು ದಿಸ್ಲೆ.  ತಾಕ್ಕಾಯಿ ಕಾರಣ ಆಸ್ಸ ಕರಾವಳಿಚೆ ಕೊಂಕಣಿ ಪಟ್ಟಿಚಾನ ಮಸ್ತ ದೂರ ಆಸ್ಸುಚೆ ಹುಬ್ಬಳ್ಳಿಕ ‘ಕನ್ನಡದ ಗಂಡು ಮೆಟ್ಟಿನ ಸ್ಥಳ ಮ್ಹಣತಾತಿ. ಆನಿ ಹಾಂಗಾಸ್ಸುಚೆ ಚ್ಹಡ ಕೊಂಕಣಿ ಲೋಕಾಲೆ ಗೋಡಿ ಆಸ್ಸುಚೆ ವ್ಯಾಪಾರಾ ವಯ್ರಿ, ಹಾಂಗಾ ಹಾಂವೆ ಕೊಂಕಣಿ ಪತ್ರಿಕಾ ಪ್ರಕಟ ಕೊರಚೆ ಮ್ಹಳಯಾರಿ ಗರುಡಾ ಗಾಂವಾಂತು ನಾಗರ ಪಂಚಮಿ ಆಚರಣ ಕೆಲೇಲ ವರಿ! ಹೇ ಮಾಕ್ಕಾ ಗೊತ್ತಾಶ್ಶಿಲೆ, ಜಾಲ್ಯಾರಿಚಿ ಮೆಗೇಲೆ ಅಂತರಂಗಾಚೆ ಪ್ರೇರಣ, ತೂಂ ಕರಿ, ಕರಿ ಮ್ಹಣಚೆ ಒತ್ತಾಯು. (ತ್ಯಾ ದಿವಸು ಅಜ್ಞಾನಾನ ಹಾಂವೆ ತ್ಯಾ ಮೆಗೇಲೆ ಮನಾಚೆ ಒತ್ತಾಯು ಮ್ಹೊಣು ಸಮಜಿಲೀಲೆ, ಜಾಲ್ಯಾರಿ ಆಜಿ ಯವಜಿಲ್ಯಾರಿ ತ್ಯಾ ಮಾಕ್ಕಾ ಚಲೆಯಿಲೊ ಪರಮಾತ್ಮಾಲೆ ಪ್ರೇರಣ ಮ್ಹೊಣು ದಿಸ್ತಾ.) ಕಶ್ಶೀ ಜಾಂವೊ ಏಕ ಪ್ರಯತ್ನ ಕೋರ್ನು ಪೊಳೋವ್ಯಾ ಮ್ಹೊಣು ಪತ್ರಿಕೆಚೆ ಟೈಟಲ್ಲಾಕ ಅರ್ಜಿ ಘಾಲ್ಲೆ. ತೆದ್ದನಾ ಆಮ್ಮಿ ಚಾರ್‍ಪಾಂಚ ನಾಂವ ಘಾಲ್ನು ಏಕ ಅರ್ಜಿ ಆಮಗೇಲೆ ಜಿಲ್ಲೆಚೆ ಡಿ.ಸಿ.ಕ  ಪೆಟೈಕಾ ಆಶ್ಶಿಲೆ. ಥಂಯ್ಚಾನ ತ್ಯಾ ದೆಹಲಿಂತು ಆಸ್ಸುಚೆ “ರಿಜಿಸ್ಟಲ್ಡ್ ಆಫ್ ನ್ಯೂಸ್ ಪೇಪರ್ ಫಾರ್ ಇಂಡಿಯಾ ಆಫೀಸಾಕ ವತ್ತಾಶ್ಶಿಲೆ. ತಾನ್ನಿ ತಾಂತುಲೆ ನಾಂವಾಂತು ಖಂಚೆ ನಾಂವ ನಾಂಕಿ ತ್ಯಾ ನಾಂವಾಂತು ಪತ್ರಿಕಾ ಕಾಡಚಾಕ ಶಿಪಾರಸ್ ಕರತಾ ಆಶ್ಶಿಲೆ. ಮಾಗಿರಿ ಆಮ್ಮಿ ಪರತ ಜಿಲ್ಲೆಚೆ ಡಿ.ಸಿ.ಲಾಗ್ಗಿ ಡಿಕ್ಲೆರೇಶನ್ ದೀವ್ನು ತೀನ ಮ್ಹಹಿನ್ಯಾ ಭಿತ್ತರಿ ಪತ್ರಿಕೇಚೆ ಪ್ರಕಟಣಾ ಸುರುವಾತ ಕೋರ್‍ಕಾ ಆಶ್ಶಿಲೆ. ತುಮ್ಮಿ ನಂಬ್ಗಿತಾಂಕಿ ನಾಂಕಿ ಹಾಂವೆ ತಶ್ಶಿ ಅರ್ಜಿ ಪೆಟೋವ್ನು ವೀಸ ಪಂಚ್ವೀಸ ದಿವಸಾ ಭಿತ್ತರಿ ಮಾಕ್ಕಾ “ಸರಸ್ವತಿ ಸದನ ಮ್ಹಣಚೆ ಟೈಟಲ್ ಸಾಂಕ್ಷೇನ್ ಜಾವ್ನು ಆಯಲೆ. ಹೇ ಮೆಗೇಲೆ ಜೀವನಾಂತು ಏಕ ಸಂಭ್ರಮಾಚೆ ಘಡಿ ಮ್ಹೊಣು ಸಾಂಗಲ್ಯಾರಿ ಚೂಕಿ ಜಾಯಸನಾ.  ಹಾಂವೆ ತ್ಯಾ ಖಬ್ಬರ ತೆದ್ನಾ ಹುಬ್ಬಳ್ಳಿ ಜಿ.ಎಸ್.ಬಿ. ಸಮಾಜಾಚೆ ಅಧ್ಯಕ್ಷ ಜಾವ್ನು ಆಶ್ಶಿಲೆ ಶ್ರೀ ಶೇಷಗಿರಿ ಪಾಂಡುರಂಗ ಕಾಮತ್ ಮಾಮ್ಮಾಲಾಗ್ಗಿ ಸಾಂಗಲೆ. ತಾಕ್ಕಾ ತಾನ್ನಿ ‘ಹುಬ್ಳಿಚಾನ ತೂಂ ಕೊಂಕಣಿ ಪತ್ರಿಕಾ ಕಾಡ್ತವೇ? ಖಂಡಿತಾಕ ಸಂತೋಷಾ ಖಬ್ಬರ. ತೂಂ ಸಮಾಜಾಕ ಏಕ ಅರ್ಜಿ ಬರೋವ್ನು ದೀ, ಮೀಟಿಂಗಾಂತು ದವರೂನು ಖಾಂಯ್ತರಿ ಮದ್ದತ್ ದಿವಚಾಕ ಜಾತ್ವೆ ಪೊಳೋವ್ಯಾ. ಮ್ಹಳ್ಳಿಂತಿ. ಹಾಂವೆ ತಶ್ಶೀಚಿ ಏಕ ವಿನಂತಿ ಬರೋವ್ನು ವಚ್ಚುನು ದೀವ್ನು ಆಯಲೊ. ಏಕ ಆಠ್ವಡೇನ ಮಾಕ್ಕಾ ಸಮಾಜಾಚೆ ಸೆಕ್ರೆಟರಿ ದಾಕೂನು ಬುಲಾವ ಆಯಲೊ. ತೆದ್ದನಾ ಶ್ರೀ ಎನ್.ವಿ.ಆರ್. ಪ್ರಭ ಮಾಮು ಸೆಕ್ರೆಟರಿ ಆಶ್ಶಿಲೆ. ತಾನ್ನಿ ಮಾಕ್ಕ ಮ್ಹಳ್ಳೆ. “ಪಳೇ ತುಗೇಲೆ ಉದ್ದೇಶು ಚಾಂಗ ಆಸ್ಸ.  ಆಮಗೇಲೆ ಸಮಾಜಾ ತರಪೇನ ತುಕ್ಕಾ ಖಂಚೇ ಮದ್ದತ್ ಕೊರಚಾಕ ಮುಖಾರ ಪೊಳೋವ್ಯಾ, ಆನಿ ತೂಂವೆ “ಸರಸ್ವತಿ ಸದನ ಮ್ಹಣಚೆ ನಾಂವಾನಿ ಪತ್ರಿಕಾ ಕೆಲಯಾರಿ ಮುಖಾರಿ ಮಸ್ತ ಸಮಸ್ಯೆ, ಘರ್ಷಣ ಯವಚಾಕ ಪುರೊ. ಕಿತಯಾಕ ಮ್ಹಳಯಾರಿ ಆಮಗೇಲೆ ಸಮಾಜ ಮಂದಿರ ನಾಂವ “ಸರಸ್ವತಿ ಸದನ ಮ್ಹೊಣು ಆಸ್ಸ. ನುಸ್ತೆ ಘರ್ಷಣ ನಾಕ್ಕಾ, ತೂಂ ವಿಂಗಡ ನಾಂವಾಂತು ಪತ್ರಿಕಾ ಕರಿ.  ಮ್ಹೊಣು ಸಾಂಗೂನು ತ್ಯಾ ಖಾತ್ತಿರಿ ತಾಂಗೇಲೆ ಆಕ್ಷೇಪಾಚೆ ಏಕ ಪತ್ರ ಇಂಗ್ಲೀಷಾಂತು ಟೈಪ್ ಕೋರ್ನು ದಿಲ್ಲಿಂತಿ. ಮಸ್ತ ಆಸೆ, ಭರ್‍ವಸ ದವರೂನು ಘೆಲೇಲೊ ಹಾಂವ ಚಿಂತೆಚೆ ಬೋರೊ ವ್ಹೋವ್ನು ಪರತ ಆಯ್ಲೊ. ತೆದ್ದನಾ ಮೆಗೇಲೆ ಪರಿಸ್ಥಿತಿ “ಪ್ರಥಮ ಚುಂಬನಂ ದಂತಭಗ್ನ ಮ್ಹಣ್ತಾಮೂ, ತಶ್ಶಿ ಜಾಲ್ಲೆ. (ಜಾಲ್ಯಾರಿ ಆತ್ತ ಮಾಕಶಿ ಘೂವ್ನು ಪಳೈಲಿ ತೆದ್ದನಾ ತಾನ್ನಿ ತೆದ್ದನಾ ಕೆಲ್ಲಿಲೇಚಿ ಚಾಂಗ ಜಾಲ್ಲೆ ಮ್ಹೊಣು ದಿಸ್ತಾ.) ತತ್ಕಾಲಾಕ ಮೆಗೇಲೆ “ಕೊಂಕಣಿಂತು ಪತ್ರಿಕಾ ಕಾಡ್ಕಾ ಮ್ಹಣ್ಚೆ ಉದ್ದೇಶಾಕ ತೀಳಾ ಉದ್ದಾಕ ಸೊಡ್ಚೆಚಿ ಚಾಂಗ ಮ್ಹೊಣು ದೋನ್ಚಾರ ದಿವಸು ಗಫ್ ಉರಲೊ. ಜಾಲ್ಯಾರಿ ಅಂತರಾತ್ಮ ಗಫ್ ಉರ್ನಿ. ಆನ್ನೇಕ ಅರ್ಜಿ ಘಾಲಿ ಮ್ಹಣಚೆ ಪ್ರೇರಣ ದಿವಚಾಕ ಲಾಗಲೆ. ಹೇ ಅಂತರಾತ್ಮ ಒತ್ತಾಯು ದೀಸಾಂದೀಸಾಕ ಚ್ಹಡ ಜಾತ್ತಾ ಘೆಲ್ಲೆ. ಮೆಗೇಲೆ ದೋಸ್ತ ಸೈತ “ಆನ್ನೇಕ ಅರ್ಜಿ ಘಾಲಿ ಕಸ್ಸಲೆ ಜಾತ್ತಾ ಪೊಳೋವ್ಯಾ.. ಮ್ಹೊಣು ಒತ್ತಾಯು ಕೊರಚಾಕ ಲಾಗಲೆ. ಅಂತೂ ಸಾತಾಠ ದಿವ್ಸಾಂತು ಮೆಗೇಲೆ ದೋಸ್ತಾಲೆ ಏಕಳ್ಯಾಲೆ ಸಹಕಾರು ಘೇವ್ನು “ರಿಜಿಸ್ಟಲ್ಡ್ ಆಫ್ ನ್ಯೂಸ್ ಪೇಪರ್ ಫಾರ್ ಇಂಡಿಯಾಕ ಹಿಂದಿಂತು ಆನಿ ತೀನ್ಚಾರ ವಿಂಗಡ ನಾಂವ ಘಾಲ್ನು ಆನ್ನೇಕ ಅರ್ಜಿ ಬರೈಲೆ. ಆನಿ ತ್ಯಾ ಅರ್ಜಿ ಒಟ್ಟು ಶ್ರೀ ಪ್ರಭು ಮಾಮ್ಮಾನ ದಿಲೇಲೆ ಪತ್ರಾಚೆ ಝರಾಕ್ಸ ಸೈತ ಲಾಯಲೆ. ಮುಖಾರಿ ಖಾಲಿ ದಾ-ಬಾರ ದಿವ್ಸಾ ಭಿತ್ತರಿ ಮಾಕ್ಕಾ “ಸರಸ್ವತಿ ಪ್ರಭಾ ಮ್ಹಣಚೆ ಹೇ ಟೈಟಲ್ ಸಾಂಕ್ಷೇನ್ ಜಾವ್ನು ಆಯ್ಲೆ. ಆನಿ ಹಾಂವ ಧಾರ್‍ವಾಡ ಡಿ.ಸಿ. ಆಫೀಸಾಕ ವಚ್ಚುನು ಡಿಕ್ಲೆರೇಶನ್ ದಿಲ್ಲೆ. ತೆದ್ದನಾ ೧೯೮೯ಚೆ ಎಪ್ರಿಲ್ ಮ್ಹಹಿನೋ ಮ್ಹಣಚೆ ಉಡಗಾಸು.
ತೆದ್ದನಾ ಮಾಕ್ಕಾ ಏಕ ಮಾಹಿತಿ ಕಳ್ಳೆಕಿ ಮೇ ೧೫ ತಾರೀಖೆಕ ಶಿರ್ಶಿಂತು “ಉತ್ತರ ಕನ್ನಡ ಜಿಲ್ಲಾ ಕೊಂಕಣಿ ಸಾಹಿತ್ಯ ಪರಿಷತ್ತಾಚೆ ಉದ್ಘಾಟನ ಆಸ್ಸ ಮ್ಹಣಚೆ ವಿಷಯು. ಹಾಂವೆ ಕೂಡ್ಲೆ ತಾಜ್ಜೆ ಅಧ್ಯಕ್ಷ ಜಾವ್ನು ನಿಯೋಜಿತ ಜಾಲೇಲೆ ಪ್ರಸಿದ್ಧ ಡಾ|| ಎಲ್.ಎಚ್.ಪೈ ಮಾಮ್ಮಾಕ ಏಕ ಕಾಗತ ಬರೈಲೆ. ಆನಿ ತಾಂತು ಮಾಕ್ಕಾ ಕೊಂಕಣಿಂತು ಪತ್ರಿಕಾ ಕಾಡ್ಕಾ ಮ್ಹಣಚೆ ಆಶಾ ಆಶ್ಶಿಲೆ.“ಸರಸ್ವತಿ ಪ್ರಭಾ ಮ್ಹಣ್ಚೆ ಟೈಟಲ್ ಆಯ್ಯಿಲೆ ಪೂರಾ ವಿಷಯ ಬರೋವನು ತುಮಗೇಲೆ ಜಿಲ್ಲಾ ಸಾಹಿತ್ಯ ಪರಿಷತ್ತಾಚೆ ಉದ್ಘಾಟನೆ ವೇಳ್ಯಾರಿ ಮಾಕ್ಕಾ ಹೇ ಪೇಪರಾಚೆ “ಪ್ರಯೋಗ ಸಂಚಿಕಾ ಉಗ್ತಾವಣ ಕೊರಚಾಕ ಅವಕಾಶ ದಿವ್ಕಾ ಮ್ಹೊಣು ವಿನಂತಿ ಕೆಲ್ಲೆ.
ಮೆಗೇಲೆ ಮಾಗಣಿಕ ಪುರಸ್ಕಾರ ದಿಲೇಲೆ ತಾನ್ನಿ ತ್ಯಾ ದಿವಸು “ಸರಸ್ವತಿ ಪ್ರಭಾಚೆ ಪ್ರಯೋಗ ಸಂಚಿಕಾ ಉಗ್ತಾವಣ ಕೊರಚಾಕ ಒಪ್ಪಿಗಾ ದಿಲ್ಲಿ. ತೆದ್ನಾ ಮೆಗೇಲೆ ಮುಖಾರಿ ಆಯ್ಲಿ, ಹೇ ಸಂಚಿಕಾ ಕಿತ್ಲೆ ಪುಟ ಕಾಡ್ಕಾ ಆನಿ ಚಂದಾ ದರು ಕಿತ್ಲೆ ದವರಕಾ ಮ್ಹೊಣು. ಹೇ ಖಾತ್ತಿರಿ ಹಾಂವೆ ಶ್ರೀ ಎನ್.ವಿ.ಆರ್. ಪ್ರಭು ಸಮೇತ ದೋನ್ಚಾರ ಲೋಕಾಲೆ ಸಲಹಾ ಘೆತ್ಲೆ. ತಾನ್ನಿ ಪೂರಾ ಮ್ಹಳ್ಳಿಂತಿ. “ತೂಂ ಅಪರೂಪಾಚೆ ಕೊಂಕಣಿ ಪತ್ರಿಕಾ ಸೂರು ಕರ್ತಾ ಆಸ್ಸ. ಊಣೆ ಚಂದಾ ದರು ದವರಿ. ತಾಕ್ಕ ಸಮ ಜಾವ್ನು ಪಯ್ಲೆ ತಾಜ್ಜೆ ಪುಟ ಊಣೆ ಆಸ್ಸೊ. ಲೋಕ ಹೇ ಪತ್ರಿಕೇಕ ಕಶ್ಶಿ ಪ್ರೋತ್ಸಾಹ ದಿತ್ತಾತಿ ಪಳೆಂ.  ಚಾಂಗ ಪ್ರೋತ್ಸಾಹ ಮೆಳಯಾರಿ ಪುಟ ತಾಕ್ಕ ಸಮಜಾವ್ನು ಚಂದಾ ದರು ಚ್ಹಡ ಕರ್ತಾ ವಚ್ಚೆತ. ಮ್ಹಳ್ಳಿಂತಿ. ತ್ಯಾ ಕಾರಣಾನ ಹಾಂವೆ ಚಂದಾ ದರು ವರ್ಷಾಕ ೧೫ ರೂಪಯ ಚಂದಾ ದರು ದವರ್‍ಲೆ. ಆನಿ ಸುರವೇಕ ೧೦ ಪುಟಾಚೆ ಪತ್ರಿಕಾ ಕಾಡ್ಕಾ ಮ್ಹೊಣು ಠರೈಲೆ. (ಸಶೇಷ)