ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಕುಮಟಾಂತು ಗೌರವ ಪ್ರಶಸ್ತಿ ಪಾವಿತ 

“ಕೊಂಕಣಿ ಮ್ಹಳ್ಳ ಸತಾ ತಾನ್ನಿ ಆಮ್ಚಗೆಲೇಚಿ ಮ್ಹಣ್ಚೆ ಭಾವನಾ ಎತ್ತಾ. ಕೊಂಕಣಿ ಭಾಷೆಕ ಸರ್ಕಾರಾನ ಅಧಿಕೃತ ಮಾನ್ಯತಾ ದಿಲ್ಲ್ಯಾ. ಕೊಂಕಣಿ ಅಕಾಡೆಮಿ ಕೊಂಕಣಿ ಭಾಷಿಕಾ ಖಾತ್ತಿರಿ ವಾವ್ರೋ ಕರ್ತಾ ಆಸ್ಸುಚೆ ಶ್ಲಾಘನೀಯ. ಅಲ್ಪಸಂಖ್ಯಾತ ಖಾತ್ತಿರಿ ಸರ್ಕಾರಚಾನ ಮೆಳ್ಚೆ ಸರ್ವ ಸೌಲಭ್ಯ ಕೊಂಕಣಿಗಾಂಕ ದಿವೈಚಾಕ ಪ್ರಯತ್ನ ಕರ್ತಾ ಮ್ಹೊಣು ಶಾಸಕಿ ಶಾರದಾ ಶೆಟ್ಟಿ ತಾನ್ನಿ ಸಾಂಗಲೆ. ತಾನ್ನಿ ತಾ. ೨೫-೦೫-೨೦೧೩ ದಿವಸು ಕೊಂಕಣಿ ಸಾಹಿತ್ಯ ಅಕಾಡೆಮಿ ತರಪೇನ ಕುಮಟಾಂತು ಚಲೇಲೆ ಗೌರವ ಪ್ರಶಸ್ತಿ-ಪುಸ್ತಕ ಬಹುಮಾನ ಪಾವಿತ ಸಮಾರಂಭ ದೀವಲಿಂ ಪೆಟ್ಟೊನು ಉದ್ಘಾಟನ ಕೋರ್ನು ಉಲೈತಾಶ್ಶಿಲೆ. ಘೆಲೇಲೆ ಸಾಲಾಂಚೆ ಗೌರವ ಪ್ರಶಸ್ತಿ ಮಂಗಳೂರ್‍ಚೆ ಪೌಲ್ ಮೊರಾಸ್, ಹೊನ್ನಾವರ್‍ಚೆ ಕೃಷ್ಣ ಭವಾನಿ ಶಂಕರ ಭಟ್(ಕೃಷ್ಣಶರ್ಮಾ) ಆನಿ ಕುಂದಾಪುರ ಆರ್‍ಗೋಡಾಚೆ ಗೋವಿಂದರಾಯ ಶೆಣೈ ತಾಂಕಾ ಹೇ ಸಂದರ್ಭಾರಿ ಪಾವಿತ ಜಾಲ್ಲೆ. ಪುಸ್ತಕ ಬಹುಮಾನ ಮಂಗಳೂರ್‍ಚೆ ಫಾ| ಡಾ| ಪಿಯುಸ್ ಪಡೆಲಿಸ್ ಪಿಂಟೋ, ಮಂಗಳೂರ್‍ಚೆ ಕಿನ್ನಿಕಂಬಳಾಚೆ ತಾರಾ ಲವಿನಾ ಫರ್ನಾಂಡಿಸ್ ಆನಿ ಮುಂಬೈ ನಿವಾಸಿ ಅರುಣಾರಾವ್ ತಾಂಕಾ ದಿಲ್ಲೆ. ಯುವ ಪುರಸ್ಕಾರ ಮಂಗಳೂರ್‍ಚೆ ಅಂಕುಶ್. ಎನ್. ನಾಯಕ, ಮಂಗಳೂರ್‍ಚೆ ವಿಯಾನಿ ಆಂಟೋನಿಯೊ ಡಿಕುನ್ಹಾ, ಮಂಗಳೂರ್‍ಚೆ ರಾಮಕೃಷ್ಣ ನಾಯಕ.ವಿ., ಆನಿ ಅಂಕೋಲಾಚೆ ಅಂಧಯುವಕ ನಾರಾಯಣ ಭಗವಾನ್ ರಾಯ್ಕರ್ ತಾಂಕಾ ಪ್ರಧಾನ ಕೆಲ್ಲೆ. ಪ್ರಾಸ್ತಾವಿಕ ಜಾವ್ನು ಅಕಾಡೆಮಿ ಅಧ್ಯಕ್ಷ ಕಾಸರಕೋಡು ಚಿನ್ನಾ ತಾನ್ನಿ ಉಲೈಲೆ. ಸಾಧಕಾಂಗೆಲೆ ಪರಿಚಯ ಪುಸ್ತಕ ಪ್ರಾನ್ಸಿಸ್ ಫರ್ನಾಂಡಿಸ್ ತಾನ್ನಿ ಉಗ್ತಾವಣ ಕೆಲ್ಲೆ. ಗೌರವ ಸೊಯರೆ ಜಾವ್ನು ವಿನೋದ ಪ್ರಭು, ಪ್ರಾನ್ಸಿಸ್ ಫರ್ನಾಂಡಿಸ್, ವೀರಾನ್ ಸಾಹೇಬ್, ರೋಹಿದಾಸ ನಾಯಕ ಆನಿ ಅಕಾಡೆಮಿ ರಿಜಿಸ್ಟ್ರಾರ್ ಡಾ|| ದೇವಿದಾಸ ಪೈ ತಾನ್ನಿ ಉಪಸ್ಥಿತ ವ್ಹರಲೀಲೆ. ಅಕಾಡೆಮಿ ಸದಸ್ಯ ಓಂಗಣೇಶ ತಾನ್ನಿ ಕಾರ್ಯಕ್ರಮಾಚೆ ನಿರೂಪಣ ಕೆಲ್ಲಿ. ಸದಸ್ಯ ಜಾಲಿಲೆ ಸುಭಾಷ ಕಾಮತ, ರಾಜಾರಾಮ ನಾಯಕ, ಮಂಜುನಾಥ ಸಿದ್ಧಿ, ಮಹದೇವ ರೆಡ್ಡಿ ಕುಟ್ಟಿಕಾರ್, ಯಂ ಅಶೋಕ ಶೇಟ್, ಟಿ.ಎ.ಪಿ.ಶೆಣೈ, ಬಿ. ಎಸ್. ಕಾಮತ, ಮಹೇಶ ನಾಯಕ, ಚಂದ್ರಕಾಂತ ಕಾಮತ ಹಾನ್ನಿ ಅಗತ್ಯ ಸಹಕಾರು ದಿಲ್ಲೆ. ಸದಸ್ಯ ಚಿದಾನಂದ ಭಂಡಾರಿನ ಆಬಾರ ಮಾನಲೆ. ಮಾಗಿರಿ ವಿಜೇತಾ ಭಂಡಾರಿ ಸಾಂಗಾತಿನ, ವೆಂಚರ್ಸ್ ಕುಮಟಾ, ಸೀಮಾ ಸಾಂಗಾತಿನ, ಮೈಕಲ್ ರೊಡ್ರಿಗ್ಸ್ ಸಾಂಗಾತಿನ ಕೊಂಕಣಿ ನೃತ್ಯ, ಮೊಹಮದ್ ಅಲಿ ಉಪರಕರ ಸಾಂಗಾತಿನ ಧಪ್ ನೃತ್ಯ, ಕಾರ್ಕಳದ ಪಲ್ಲವಿ ಪಂಗ್ಡಾ ದಾಕೂನು “ಅಮ್ಮಿಸೊಣಾಂತಿ ಮ್ಹಣ್ಚೆ ಕೊಂಕಣಿ ನಾಟಕ ಪ್ರದರ್ಶಿತ ಜಾಲ್ಲೆ.