ಹುಬ್ಳಿ ಹೊಟೇಲಾಂತು “ಪ್ರೆಸಿಡೆಂಟ್  ದಿ ಪ್ರೆಸಿಡೆಂಟ್ ಹೋಟೇಲ್

“ರಾನ್ನಾ ಮಧ್ಯೆ ವ್ಯವಸ್ಥಿತ ಜಾವ್ನು ದವರಿಲೆ ಟೇಬಲ್ ಆನಿ ಕುರ್ಚಿಯೋ; ಥಂಯಿ ತುಮ್ಕಾ ಜಾಯಿ ಜಾಲೇಲೆ ಸಸ್ಯಾಹಾರಿ ಖಾಣ-ಜವಣ ಹಾಣು ದಿವಚೆ ಸಪ್ಲೇಯರ್, ಚೆರ್ಡುಂವ ರಡ್ತಾವೇ? ಬೋರ್ ಜಾತ್ತಾ ಮ್ಹೊಣು ಬೇಜಾರ್‍ತಾವೇ? ಚಿಂತಾ ಕೋರ್ನಕ್ಕಾತಿ ಥಂಯಿಚಿ ತಾಂಕಾ ಖೇಳಚಾಕ, ಮಸ್ತಿ ದಾಖಯಚಾಕ ಜಾಯಿ ಜಾಲೇಲೆ ಖೇಳಣಿ ಆಸ್ಸ, ತಾಂತು ತಾನ್ನಿ ಆರಾಮ ಜಾವ್ನು ಖೆಳತಾತಿ. ಚಿಕ್ಕೆ ತುಮ್ಕಾ ಮುಖಾರ್‍ಚೆ ಬಗಲೇಚೆ ಜಾಗೋ ಮೆಳ್ಳೆ ಮ್ಹೊಣು ಜಾಲ್ಯಾರಿ ತೊಗ್ಗು ಲ್ಹಾನ ಲ್ಹಾನ ಖೇಳಣಿ ವರಿ ವಚ್ಚೆ ಯವ್ಚೆ ವಾಹನ, ತಾಜ್ಜ ಮುಖಾರಿ ಪಾಚ್ವೆ ಹಾಂತೂಳ್ನು ನಿದ್ದೆಲೆ ಪಾರ್ಕಾ ಎದ್ರಾಕ ವಿಶಾಲ ಜಲರಾಶಿ...!  ರಾನ್ನಾ ಭಿತ್ತರಿ ಗುಹೆ ಆಸ್ಸುಚೆ ಸಹಜ ನ್ಹಂಹಿವೇ? ಆಮಗೇಲೆ ಪುರಾತನ ಋಷಿ-ಮುನಿ ತಾಜ್ಜ ಭಿತ್ತರಿ ಬೈಸೂನು ಘೋರ ತಪ-ಜಪ ಕೋರ್ನು ಪರಮಾತ್ಮಾಕ ಸಾಕ್ಷಾತ್ಕಾರ ಕೋರ್ನು ಘೆತ್ತಾ ಆಶ್ಶಿಲ ಖಂಯಿ. ಜಾಲ್ಯಾರಿ ತುಮ್ಮಿ ಹೇ ಆಫ್ರಿಕನ್ ಗುಹಾ ಭಿತ್ತರಿ ರಿಗಲೇರಿ, ಥಂಯಿಚಿ ಸುವ್ಯವಸ್ಥಿತ ಜಾವ್ನು ದವರೀಲೆ ಟೇಬಲ್ಲಾ ಮುಖಾರ್‍ಚೆ ಕುರ್ಚೆ ವಯ್ರಿ ಬಸಲ್ಯಾರಿ ಶುಚಿ- ರುಚಿ ಆಶ್ಶಿಲೆ ಖಾಣ, ಜವಣ ಮೆಳ್ತಾ.   
ಹೇ ಖಂಚೇಯಿ ಸಿನೇಮಾ ಸೆಟ್ಟಾಚೆ ವರ್ಣನ ನ್ಹಂಹಿ, ಎಪ್ರಿಲ್ ೨೮ಕ ಹುಬ್ಬಳ್ಳಿಂತು ಉಣಕಲ್ ಥಂಳೆ ಎದ್ರಾಕ “ಪೈ ಗ್ರೂಪ್ಸ್ ತರಪೇನ ಸುರುವಾತ ಜಾಲೇಲೆ “ದಿ ಪ್ರೆಸಿಡೆಂಟ್ ಹೊಟೇಲ್ ಹಾಂತುಲೆ ೪ ಮಾಳಯೇರಿ ಆಸ್ಸುಚೆ ವಿಶಿಷ್ಠ ಹವಾನಿಯಂತ್ರಿತ ರೆಸ್ಟೋರೆಂಟಾಚೆ ವರ್ಣನ ಹಾಂವೆ ಇತ್ಲೆ ವೇಳು ಕೆಲೀಲೆ.
‘ಪೈ ಗ್ರೂಪ್ಸ್   ಹಾಜ್ಜೆ ತರಪೇನ ವಾಣಿಜ್ಯ ನಗರಿ ಹುಬ್ಬಳ್ಳಿ ಲೋಕಾಲೆ ಸೇವೆ ಖಾತ್ತಿರಿ ಸಮರ್ಪಿತ ಜಾಲೇಲೆ “ದಿ ಪ್ರೆಸಿಡೆಂಟ್ ಹೊಟೇಲ್ಲಾಚೆ ಉದ್ಘಾಟನ ತಾ. ೧೨-೪-೨೦೧೪ ದಿವಸು ಆರ್.ಪಿ. ಕಾಮತ್ ಗ್ರೂಪಾಚೆ ಆಡಳಿತ ನಿರ್ದೇಶಕ ಶ್ರೀ ರಾಮಚಂದ್ರ ಆರ್. ಕಾಮತ್ತಾನಿ ಕೆಲ್ಲೆ.  ಹೇ ವೇಳ್ಯಾರಿ “ಪೈ ಗ್ರೂಪ್ ಆಫ್ ಹೊಟೇಲ್ಸ್ ಹಾಜ್ಜೆ ವ್ಯವಸ್ಥಾಪಕ ನಿರ್ದೇಶಕ ಆನಿ ಅಧ್ಯಕ್ಷ ಜಾವ್ನಾಶ್ಶಿಲೆ ಶ್ರೀ ಜಗನ್ನಾಥ ವಿ. ಪೈ, ಶ್ರೀಮತಿ ಶಾಂತಾ ಜಗನ್ನಾಥ ಪೈ, ಶ್ರೀ ಸುಜಯ ಜೆ. ಪೈ ಆನಿ ಶ್ರೀ ಅಜಯ ಜೆ. ಪೈ, ಡೈರೆಕ್ಟರ್  ರಮೇಶ ಪ್ರಭು ಸಮೇತ  ಅಪಾರ ಗಣಮಾನ್ಯ ಲೋಕ ಉಪಸ್ಥಿತ ವ್ಹರಲೀಲೆ.
ಹೇ ಹೊಟೇಲ್ಲಾಂತು ಉದ್ಯಮಿ ಆನಿ ಗ್ರಾಹಕಾಂಕ ಚಾಂಗ ಸೇವಾ ದಿವ್ಚೆ ಖಾತ್ತಿರಿ ಕಂಫರ್ಟ್ಸ್, ಲಕ್ಷುರಿ ಆನಿ ಕ್ಲಬ್ ಸೂಟ್ಸ್ ಮ್ಹಣಚೆ ತೀನಿ ನಮೂನ್ಯಾಚೆ ರೂಮ್ಸ್ ಉಪಲಬ್ಧ ಆಸ್ಸ. ಕೂಡಾಂತು ಜಾಯ ತಿತ್ಲೆ ವಿಶಾಲ ಸ್ಥಳಾವಕಾಶ ಆಸ್ಸ. ಸ್ಯಾಟ್ ಲೈಟ್ ಟಿ.ವಿ., ಕಾಫಿ ಮೇಕರ್‍ಸ್, ಮಿನಿ ಬಾರ್‍ಸ್, ಹೇರ್ ಡ್ರಯರ್‍ಸ್, ಡೈರೆಕ್ಟ್ ಎಸ್.ಟಿ.ಡಿ ಆನಿ ಐ.ಎಸ್.ಡಿ. ಡಯಲಿಂಗ್, ಇಲೆಕ್ಟ್ರಾನಿಕ್ಸ್ ಸೇಫ್ಸ್, ವೈ-ಫೈ ಇಂಟರ್‌ನೆಟ್, ಆಕ್ಸೆಸ್ ಸಮೇತ ವಿವಿಂಗಡ ನವೀನ ಸೌಲಭ್ಯ ಗ್ರಾಹಕಾಂಕ ಉಪಲಬ್ಧ ಆಸ್ಸ. ಕಾನ್ಫರೆನ್ಸ್, ಸಮ್ಮೇಳನ ಆಯೋಜನ ಕೊರ್‍ಚ ಜಾಲ್ಯಾರಿ ವರೇಕ ತಾಕ್ಕ ಜಾಯ ಜಾಲೇಲೆ ‘ಆರಿಯಾನ್ ಆನಿ ‘ಓಪಲ್ ಮ್ಹಣ್ಚೆ ಸಭಾಂಗಣ, ಹಾಲಾಕ ವೈಫೈ ಇಂಟರ್‌ನೆಟ್, ಆಡಿಯೋ - ವಿಜ್ಯುಯಲ್ ಟೆಕ್ನಾಲಜಿ, ಮಾಡರ್ನ್ ತಾಂತ್ರಿಕತಾ  ವಾಪರ್‍ಲ್ಯಾ. ಸಭಾಂಗಣಾಂತು ‘ಯು ಆಕಾರ, ಕ್ಲಾಸ್‌ರೂಮ್ ನಾಂವೆ ಥಿಯೇಟರ್ ನಮೂನ್ಯಾನ ಆಸನ ವ್ಯವಸ್ಥಾ ಕೊರಯೇತ. ‘ಸಮ್ಮಿಲನ ನಾಂವಾಚೆ ಪಾರ್ಟಿ ಹಾಲಾಂತು ವ್ಹರಡೀಕ, ಮೂಂಜಿ, ಆರ್ತಕ್ಷತ ಇತ್ಯಾದಿ ಶುಭ ಸಮಾರಂಭ ವ್ಯವಸ್ಥ ಕೊರಚಾಕ ಸೂಕ್ತ ಜಾವ್ನು ಆಸ್ಸ. ಹಾಂಗಾ ಗ್ರಾಹಕಾಲೆ ರುಚಿ-ಅಭಿರುಚಿಕ ಸಮ ಜಾವ್ನು ರಾಂದಪ ತಯಾರ ಕೋರ್ನು ವಾಡ್ಚೆ ವ್ಯವಸ್ಥಾಯಿ ಆಸ್ಸ.
ಲಿಪ್ಟ್ ಚೋಣು ಚಾರಿ ಮಾಳೇರಿ ಘೆಲಯಾರಿ ಕೃತಕ ರಾನ ಸೃಷ್ಠಿ ಕೋರ್ನು ತಯಾರ ಕೆಲೀಲೆ ‘ಜಂಗಲ್ ವೆಜ್ ರೆಸ್ಟೋರೆಂಟಾಂತು ರಾನ್ನಾ ಮಧ್ಯೆ ಬೈಸೂನು ಜವ್ಚೆ ಅನುಭವು ತುಮ್ಕಾ ಮೆಳ್ತಾ.ಎದ್ರಾಕ ಉಣಕಲ್ ಥಂಳೆಚೆ ವಿಹಂಗಮ ದೃಶ್ಯ ಮನಾಕ ಖಂಡಿತ ಮಸ್ತ ಆನಂದ ದಿತ್ತಾ. ಚೆರ್ಡುಂವ ಅಂತೂ ಖಂಡಿತ ಅಪಾರ ಖುಷಿ ಪಾವತಾತಿ. ತಾಕ್ಕ ಲಾಗ್ಗೂನೂ ಆಸ್ಸ ‘ಗುಫಾ ರೆಸ್ಟೋರೆಂಟ್ ಹಾಂಗಾ ಆಫ್ರಿಕನ್  ರಾನ್ನಾಚೆ ಆದಿವಾಸಿ ಲೋಕಾಲೆ ಪ್ರತಿಕೃತಿ, ಕೃತಕ ಜಲಪಾತ, ಆಫ್ರಿಕಾಚೆ ಹಿನ್ನಲೆ ಸಂಗೀತ ಮಧ್ಯೆ ಜವಣ ಕೊರಚೆ ಖಂಡಿತ ಏಕ ವಿಶೇಷ ಅನುಭವು. ಒಟ್ಟಾರೆ ಪ್ರತಿಯೆಕ್ಲ್ಯಾನ ಕುಟುಂಬ ಸಮೇತ ಭೆಟ್ಟೂಕಾಚಿ ಜಾಲೇಲೆ ಏಕ ಅಪರೂಪಾಚೆ ಹೊಟೇಲ್ ಹುಬ್ಬಳ್ಳಿಚೆ ‘ದಿ ಪ್ರೆಸಿಡೆಂಟ್ ಹೊಟೇಲ್. ಸಸ್ಯಾಹಾರಿ ರಾಂದಪ ತಯಾರ ಕೊರಚಾಕ ಪ್ರತ್ಯೇಕ ರಾಂದ್ಪಾ ಕೂಡ ಆಸ್ಸುಚೆ ಹಾಂಗಾಚೆ ಆನ್ನೇಕ ವಿಶೇಷ. ಯುವಜಣಾ ಖಾತ್ತಿರಿ “ದೇಸಿ ಬೀಟ್ ಪಬ್ ವರೇಕ ಆಸ್ಸ.
ಹೊಟೇಲ್ ಉದ್ಯಮ ಬರಶಿ ತಾಂತು ಘೊಳ್ಚೆ ನೌಕರಾ ಖಾತ್ತಿರಿ ಕಾಳ್ಜಿ ದವರಿಲೆ ‘ಪೈ ಗ್ರೂಪ್ ಆಫ್ ಹೊಟೇಲ್ಲಾಚೆ ಶ್ರೀ ಜಗನ್ನಾಥ ಪೈ ಮಾಮು ಮೂಲತಃ ಕುಂದಾಪುರ ತಾ||ಚೆ ಗಂಗೊಳ್ಳಿಚೆ. ೧೯೭೩ಂತು ಬೆಂಗಳೂರಾಂತು ಪಯ್ಲೆ ಹೊಟೇಲ್ ಸುರುವಾತ ಕೋರ್ನು ಬೆಂಗಳೂರು, ಮೈಸೂರಾಂತು ಸಬಾರ ಹೊಟೇಲ್ ಸುರುವಾತ ಕೋರ್ನು ಯಶಸ್ವಿ ಜಾಲ್ಲಿಂತಿ. ಹುಬ್ಬಳ್ಳಿಚೆ ‘ದಿ ಪ್ರೆಸಿಡೆಂಟ್ ಹೊಟೇಲ್ ಪೈ ಸಮೂಹ ಸಂಸ್ಥೆಚೆ ೧೦ ಚೆ ಹೊಟೇಲ್ ಮ್ಹಣ್ಚೆ ಆನ್ನೇಕ ವಿಶೇಷು. ನೈಶಿ ಸದ್ಯಾಂತು ಆಂಧ್ರ ಪ್ರದೇಶಾಚೆ ತಿರುಪತಿಂತು “ಪೈ ವೈಸರಾಯಿ ಮ್ಹಣ್ಚೆ ಆನ್ನೇಕ ಹೊಟೇಲ್ ಸುರುವಾತ ಜಾವ್ಚೆ ಆಸ್ಸ. ಪೈ ಗ್ರೂಪ್ಸ್ ಆಪ್ ಹೊಟೇಲ್ ವ್ಹಡ ವೃಕ್ಷ ಜಾವ್ನು ವಾಡ್ಡೆಯಿಲೆ ಶ್ರೀ ಜಗನ್ನಾಥ ಪೈ ಮಾಮ್ಮಾಕ ಸಬಾರ ಸಂಘ-ಸಂಸ್ಥೆ ದಾಕೂನು ವರೇಕ ಸತ್ಕಾರು, ಸನ್ಮಾನು ಪಾವಿತ ಜಾಲೇಲೆ ಆಸ್ಸುನು, ಬೆಂಗಳೂರು ಮಹಾನಗರಪಾಲಿಕೆಚೆ ಪ್ರತಿಷ್ಠಿತ ಕೆಂಪೇಗೌಡ ಪ್ರಶಸ್ತಿ ವರೇಕ ಹಾಂಕಾ ಪ್ರಾಪ್ತ ಜಾಲ್ಲಾ. ಹೊಟೇಲ್ ಉದ್ಯಮಾಂತು ಪರಮಾತ್ಮು ಹಾಂಕಾ ಆನ್ನಿಕೆ ಚ್ಹಡ ಯಶ ಪ್ರಾಪ್ತ ಜಾವ್ಚ ವರಿ ಕೊರೊ ಮ್ಹೊಣು ದಯಾಮಯಲಾಗ್ಗಿ ಹಾಂವ ಮಾಗ್ಣಿ ಕರ್ತಾ. -ಆಸು.

ಕೊಂಕಣಿ ಭಾಷಾಭಿವೃದ್ಧಿಕ ಖರೇಚಿ ಅಭಿಮಾನ ಜಾವ್ಕಾ
ಕೊಂಕಣಿ ಭಾಸ ಮಸ್ತ ಪುರಾತನ ಮ್ಹಣ್ಚೆ ಸರ್ವಾಂಕ ಗೊತ್ತಾಶ್ಶಿಲೆ ವಿಷಯೂಚಿ. ಪೋರ್ಚುಗೀಸಾಲೆ ಆನಿ ಇತರಾಲೆ ಬಲತ್ಕಾರಾಚೆ ಮತಾಂತರ, ದೌರ್ಜನ್ಯ ಕಾರಣಾನಿ ಕೊಂಕಣಿ ಲೋಕಾನಿ ಆಮ್ಗೆಲೆ ಭಾಸ, ಸಂಸ್ಕೃತಿ, ದೇವಾಕ ರಕ್ಷಣ ಕೋರ್ನು ಘೆವ್ಚೆ ಖಾತ್ತಿರಿ ಕಾಳ್ಳೆಲೆ ವಾವ್ರೊ ಇತಿಹಾಸಾಂತು ದಾಖಲ ಜಾಲ್ಲಾ. ಆಜಿ ಕೊಂಕಣಿ ಗೋಂಯ ರಾಜ್ಯಾಚೆ ರಾಜ್ಯ ಭಾಸ, ತಾಕ್ಕಾ ಸಂವಿಧಾನಾಚೆ ಆಠ್ಠಾ ವೆಳೆರೆಂತು ಮಾನ್ಯತಾಯಿ ಮೆಳ್ಳಾ. ಗೋಂಯ, ಕರ್ನಾಟಕ, ಕೇರಳಾಂತು ಕೊಂಕಣಿ ಅಭಿವೃದ್ಧಿ ಖಾತ್ತಿರಿ ಸರಕಾರಾ ಪೋಷಿತ ಕೊಂಕಣಿ ಅಕಾಡೆಮಿ ವರೇಕ ಅಸ್ತಿತ್ವಾಂತು ಆಸ್ಸ. ಜಾಲ್ಯಾರಿಚಿ ಕೊಂಕಣಿ ಭಾಸ ಯವಜಿಲಿ ತಿತ್ಲೆ ಜೋರಾನ ಅಭಿವೃದ್ಧಿ ಜಾತ್ತಾ ಆಸ್ವೆ? ನಾ. ಕಿತಯಾಕ ಮ್ಹಳಯಾರಿ ಆಮ್ಮಿ ಭಾಷಾಭಿವೃದ್ಧಿ ಜಾವಚಾಕ ಕಸ್ಸಲೆ ಕೋರ್‍ಕಾಕಿ ತ್ಯಾ ಕರ್ತಾ ನಾಂತಿ. ಪಯ್ಲೆಚೆ ಜಾವ್ನು ಆಮ್ಮಿ ಆಮಗೇಲೆ ಆವಯ ಭಾಷೆ ವಯ್ರಿ ದವರೂನು ಘೆತ್ತಿಲೆ ಅಭಿಮಾನು ಮಸ್ತ ಕಮ್ಮಿ. ತಾಜ್ಜ ಉದರ್ಗತಿಕ ಕರ್ತಾ ಆಸ್ಸುಚೆ ಪ್ರಯತ್ನ ಪುರ್‍ಜಾಯ್ನಾ.
ಹೇ ಸಂದರ್ಭಾರಿ ಆಮ್ಮಿ ಇತರ ಭಾಷೆ ಕಶ್ಶಿ ಉದರ್ಗತಿ ಪಾವ್ಲಿಂತಿ ಮ್ಹೊಣು ಚಿಕ್ಕೆ ನಜರ ಘಾಲ್ಕಾ. ಉದಾಹರಣೆಕ ಇಂಗ್ಲೀಷ್ ಘೆಯ್ಯಾ. ಆಜಿ ಇಂಗ್ಲೀಷ್ ವಿಶ್ವಮಾನ್ಯ ಭಾಸ ಜಾಲ್ಲಯಾ. ಜಾಲ್ಯಾರಿಚಿ ಪೂರಾ ಬಗಲೇನ ಏಕ್ಕಾ ನಮೂನ್ಯಾ ಇಂಗ್ಲೀಷ್ ನಾ. ನೈಶಿ ಇಂಗ್ಲೀಷ್ ಲೋಕ ತಾಂಗೆಲೆ ಭಾಷೆ ವಿಷಯಾಂತು ಮಸ್ತ ಅಭಿಮಾನ ಪಾವ್ಚೆ ಲೋಕ. ಇಂಗ್ಲೀಷ್ ಮಾತೃ ಭಾಷೆಚೆ ಲೋಕ ಹೇ ಭಾಷೆಚೆ ಪ್ರಭಾವ ಮಸ್ತ ಊಣೆ ಆಶ್ಶಿಲ ತೆದ್ನಾ ವರೇಕ ಕಿತ್ಲೆಚಿ ಉನ್ನತ ಸ್ಥಾನಾಕ ಘೆಲಯಾರಿಚಿ  ಇಂಗ್ಲೀಷಾಂತು ವ್ಯವಹಾರ ಕರ್ತಾ ಆಶ್ಶಿಲಿ ಖಂಯಿ. ತಾಜ್ಜ ಉಪರಾಂತ ವಿಜ್ಞಾನಿ, ರಾಜಕಾರಣಿ ಲೋಕಾನಿ ಸೈತ ಇಂಗ್ಲೀಷಾಕ ಫ್ರೆಜರ್ ದಿಲ್ಲಿ. ಇಂಗ್ಲೀಷ್ ವಾಡಚಾಕ ಆನ್ನೇಕ ಕಾರಣ ಮ್ಹಳಯಾರಿ ಇಂಗ್ಲೀಷ್ ಭಾಷೆಂತು ಅನ್ಯ ಭಾಷೆ ಶಬ್ಧ ಸೊಚ್ಚಾಕ ಘೆಲಯಾರಿ ಬಹುಶಃ ತ್ಯಾ ಅರ್ಧಂಶ ಪಶಿ ಚ್ಹಡ ಆಸ್ಸ. ಮ್ಹಳಯಾರಿ ತಾನ್ನಿ ಅನ್ಯ ಭಾಷೆ ಶಬ್ದಾಂಕ ದಾರಾಳ ಜಾವ್ನು ಸ್ವಾಗತ ಕೋರ್ನು ವಾಪರಚಾಕ ಲಾಗ್ಲೆ. ಹೇ ಪೂರಾ ಕಾರಣಾನ ಆಜಿ ಇಂಗ್ಲೀಷ್ ಭಾಸ ವಿಶ್ವ ಭಾಸ ಜಾಲ್ಲಯಾ.
ಕೆಲವ ವರ್ಷಾ ಮಾಕಶಿ ಕನ್ನಡಾಂತು ಇಂಗ್ಲೀಷ್ ಭಾಷೆ ಶಬ್ದು ನಾಕ್ಕಾ ಮ್ಹಣ್ಚೆ ಕಾರಣಾನ ಇಂಜಿನಿಯರಾಕ ಅಭಿಯಂತರರು, ಪೋಲೀಸಂಚಾಕ ಆರಕ್ಷಕರು ಇತ್ಯಾದಿ ನಾಂವಾನಿ ಆಪೈಚಾಕ ಲಾಗ್ಲೆ. ಜಾಲ್ಯಾರಿ ಲೋಕಾಂಕ ತ್ಯಾ ಅಪರಿಚಿತ ಜಾಲ್ಲೆ. ತಶ್ಶಿಚಿ ಕೊಂಕಣಿ ಲೋಕಾನಿ ವರೇಕ ಹೇ ವಿಷಯಾಂತು ಚಿಕ್ಕೆ ವಿಶಾಲ ಭಾವನಾ ವಾಡ್ಡೋವನು ಘೆವ್ಕಾ.  ಪಯ್ಲೆ ಆಮ್ಗೆಲೆ ವ್ಯವಹಾರಾಂತು ಕೊಂಕಣಿ ಚ್ಹಡ ಚ್ಹಡ ವಾಪರಕಾ. ಪತ್ರ ವ್ಯವಹಾರ, ಇಂಟರ್‌ನೆಟ್ಟಾಂತು, ಫೇಸ್‌ಬುಕ್ಕಾಂತು ಕೊಂಕಣಿಂತು ಬರಯಚಾಕ (ಲಿಪಿ ಖಂಚೇ ಆಸ್ಸೊ) ಪ್ರಯತ್ನ ಕೋರ್‍ಕಾ. ಆಮ್ಮಿ ಘರಾಂತು ಕೊಂಕಣಿ ಉಲೈತಾತಿ. ಖಂಚೇ ಕಾರಣಾಂತು ಹಾಕ್ಕಾ ಚ್ಯುತಿ ಯವಚಾಕ ನಜ್ಜ. ಕೆಲವ ಲೋಕ ಘರಾಂತು ಇಂಗ್ಲೀಷಾಂತು ಉಲೈಲ್ಯಾರಿ ಚೆರ್ಡುವಾಲೆ ಶಿಕ್ಪಣಾಕ ಮದ್ದತ್ ಜಾತ್ತಾ ಮ್ಹೊಣು ಇಂಗ್ಲೀಷ್ ಉಲೈತಾತಿ. ಹಾಜ್ಜೆನ ಇಂಗ್ಲೀಷ್ ಉದ್ದಾರ ಜಾವಚಾಕ ಪುರೊ, ಜಾಲ್ಯಾರಿ ಕೊಂಕಣಿ ನಾಶ ಜಾವಚಾಕ ಲಾಗ್ತಾ. ಕೊಂಕಣಿಗಾಂಕ ಆಮ್ಗೆಲೆ ಭಾಸ ವಿಶಾಲ ಪ್ರಪ್ರಂಚಾಂತು ಆಮ್ಗೆಲೆ ಸಂಸ್ಕೃತಿ, ಸಂಸ್ಕಾರಾಚೆ ಪ್ರತ್ಯೇಕತಾ ಉರೋನು ಘೆವಚಾಕ ಮದ್ದತ ಕರ್ತಾ. ದೊಗ್ಗ ಲೋಕ ಕೊಂಕಣಿ ಲೋಕ ಅಪರಿಚಿತ ಜಾಲ್ಯಾರಿಚಿ ತಾನ್ನಿ ತ್ಯಾ ಭಾಸ ಉಲೈತಾತಿ ಮ್ಹಳ್ಳ ಸತಾ ‘ಆಮ್ಚಗೇಲಿ ಮ್ಹಣ್ಚೆ ಭಾವನೇನ ಪರಿಚಿತ ಜಾತ್ತಾತಿ. ನಾ, ಪೂರಾ ಲೋಕ ಇಂಗ್ಲೀಷ್ ಉಲೈತಾ ಘೆಲಯಾರಿ ಮುಖಾರ ಏಕ್ದೀಸು ಆಮ್ಮಿ “ಗುಂಪಿನಲ್ಲಿ ಗೋವಿಂದ ಜಾವ್ನು ಆಮ್ಗೆಲೆ ಪ್ರತ್ಯೇಕತಾ ಲುಕ್ಸಾನ ಕೋರ್ನು ಘೆತ್ತಾತಿ.
ಆಮ್ಕಾ ಸರಕಾರಾ ದಾಕೂನು ಖಂಚೇ ಸೌಲಭ್ಯ ಮೆಳ್ನಾ. ಹೇ ವಿಷಯು ಸರ್ವ ಜಾಣೂನು ಆಸ್ಸತಿ. ತ್ಯಾ ಕಾರಣಾನ ಆಮ್ಮಿ ಪರಸ್ಪರ ಉದರ್ಗತಿ ಪಾವ್ಕಾ ಜಾಲ್ಯಾರಿ ಅಮ್ಚಗೆಲೇನ ಪರಸ್ಪರ ಸಹಾಯು, ಸಹಕಾರು ಘೇವ್ಕಾ-ದಿವ್ಕಾ. ತಾಕ್ಕಾ ಏಕ ಪ್ರತ್ಯೇಕತಾ; ಭಾಸ ಆಮ್ಕಾ ದಿತ್ತಾ. ತ್ಯಾ ಕಾರಣಾನ ಕೊಂಕಣಿ ಭಾಷೆ ವಯ್ರಿ ಸಾನ್ಪಣಾ ದಾಕೂನು ಚೆರ್ಡುವಾಂಕ ಅಭಿಮಾನ ಯವ್ಚವರಿ ಕೋರ್‍ಕಾ. ಒಟ್ಟಾರೆ ೪೨ ಪಂಗ್ಡಾಚಿ ಕೊಂಕಣಿ ಉಲೈತಾತಿ ಮ್ಹೊಣು ಕೊಂಕಣಿ ಅಕಾಡೆಮಿನ ಸೊದ್ಲಾ. ತ್ಯಾ ಕಾರಣಾನ ಕೊಂಕಣಿ ವಾಚನಾಭಿವೃದ್ಧಿ, ಸಾಹಿತ್ಯ ಕೃಷಿ ಚ್ಹಡ ಕೊರಚೆ ಜವಾಬ್ದಾರಿ ಅಕಾಡೆಮಿ ವಯ್ರಿ ಆಸ್ಸ. ಕೊಂಕಣಿಚೆ ವಿಂಗವಿಂಗಡ ಸಂಘ-ಸಂಸ್ಥೆ ವಯ್ರಿ ಆಸ್ಸ. ಕರ್ನಾಟಕಾಂತು ಸರ್ಕಾರಾನ ಕೊಂಕಣಿ ಸಾಹಿತ್ಯ ಅಕಾಡೆಮಿ ಸ್ಥಾಪನ ಕೆಲಯಾರಿಚಿ, ತಾಕ್ಕೇಕ ಅಧ್ಯಕ್ಷ, ದಾ ಸದಸ್ಯ, ರಿಜಿಸ್ಟ್ರಾರ ಇತರ ನೌಕರ ವರ್ಗ ದಿಲಯಾರಿಚಿ ತಾಜ್ಜ ನಿಮಿತ್ತ ಕೊಂಕಣಿ ಸಾಹಿತ್ಯಾ ಮೆಳ್ತಾ ಆಸ್ಸುಚೆ ಪ್ರೋತ್ಸಾಹ ಮಸ್ತ ಊಣೆ ಮ್ಹೊಣು ಖಂಚೇ ಅನುಮಾನ ನಾಶಿ ಸಾಂಗೇತ. ಅಕಾಡೆಮಿ ಸ್ಥಾಪನ ಜಾವ್ನು ೧೫-೧೬ ವರ್ಷ ಜಾಲ್ಯಾರಿಚಿ ಕರ್ನಾಟಕ ಭಿತ್ತರಿ ಆಸ್ಸುಚೆ ಕೊಂಕಣಿ ಕವಿ, ಸಾಹಿತಿ, ಬರೋಪಿಂಕ ವಿಶ್ವಾಸಾಕ ಘೆವ್ಚೆ ಕಾಮ ಆನ್ನಿಕೆ ಅಕಾಡೆಮಿನ ಕರ್ನಿ. ವರ್ಷಾಕ ದಾ-ಬಾರಾ ಕೊಂಕಣಿ ಕಾರ್ಯಕ್ರಮ ಘಡೋವ್ನು, ತಾಂತು ನಾಚೂನು, ಗಾನ ಗಾಯ್ಲ ಕೂಡ್ಲೆ ಕೊಂಕಣಿ ಉದ್ದಾರ ಜಾವ್ನು ಘೆಲ್ಲೆ ಮ್ಹೊಣು ಸಮಜೂನು ಘೆತ್ತಿಲ ವರಿ ದಿಸ್ತಾ. ಹಾಜ್ಜೇನ ಸರ್ಕಾರಾನ ದಿಲೇಲೆ ಅನುದಾನ ಖರ್ಚು ಜಾವಚಾಕ ಪುರೊ. ಜಾಲ್ಯಾರಿ ಮುನಾಪೊ ಕಸ್ಸಲೆ ಮೆಳ್ಳೆ? ಹೇ ಮನಾಕ ವ್ಹರಕಾ. ಮುಖಾವೈಲೆ ದಿವಸಾಂತು ಪೂಣಿ ಹೇ ದಿಕ್ಕಾನ ಕೊಂಕಣಿ ಅಕಾಡೆಮಿ ಭಾಷಾಬಿವೃದ್ದಿ, ಕೊಂಕಣಿ ಸಾಹಿತ್ಯಾಭಿವೃದ್ಧಿ, ಭಾಷಾಭಿಮಾನ ಚ್ಹಡ ಜಾವ್ಚ ತಸ್ಸಾಲೆ ಕಾರ್ಯಕ್ರಮ ಘಾಲ್ನು ಘೆವೋಂತಿ ಮ್ಹೊಣು ಅಪೇಕ್ಷ ಕರ್ತಾ.                       -ಆಸು

ತೋನ್ಸೆ ಪೈ ಕುಟುಂಬ, ತೆಂಕನಿಡಿಯೂರು
ತೆಂಕನಿಡಿಯೂರು ತೋನ್ಸೆ ಪೈ ಕುಟುಂಬಸ್ಥಾಲೆ ಮೂಲನಾಗದೇವಾಲೆ ೧೮ಚೆ ವರ್ಧಂತಿ, ಆಶ್ಲೇಷಾ ಬಲಿ ಸೇವಾ ಆನಿ ದೈವಾಚೆ ಭೋಗ ತಾ. ೨೦-೪-೨೦೧೪ ದಿವಸು ದೇವತಾ ಪ್ರಾರ್ಥನಾ, ನವಕ ಪ್ರಧಾನ ಹೋಮು, ಪಂಚಾಮೃತಾಭಿಷೇಕು, ೧೦೮ ಕಲಶಾಭಿಷೇಕು, ಆಶ್ಲೇಷಾ ಬಲಿ ಸೇವಾ, ಮಹಾ ಪೂಜನ, ಮಂಗಳಾರ್ತಿ, ವಟು ಆರಾಧನ, ದರ್ಶನ ಸೇವಾ, ಅನ್ನ ಸಂತರ್ಪಣ, ರಾತ್ತಿಕ ಶ್ರೀ ಬೈಕಾಡ್ತಿ- ಪಂಜುರ್ಲಿ ಭೋಗ ಇತ್ಯಾದಿ ಕಾರ್ಯಕ್ರಮ ಬರಶಿ ಚಲ್ಲೆ. ವಿವಿಂಗಡ ಗಾಂವಾಂತು ಆಶ್ಶಿಲೆ ಕುಟುಂಬಾಚೆ ಸರ್ವ ಸದಸ್ಯ ಹೇ ಸಂದರ್ಭಾರಿ ಉಪಸ್ಥಿತ ವ್ಹರಲೀಲೆ.
ಶ್ರೀ ಲಕ್ಷ್ಮೀನರಸಿಂಹ ಭಜನಾ ಮಂಡಳಿ, ನಿಡ್ಡೋಡಿ
ಶ್ರೀ ಲಕ್ಷ್ಮೀನರಸಿಂಹ ಭಜನಾ ಮಂಡಳಿ, ನಿಡ್ಡೋಡಿ, ಕಲ್ಲುಮುಂಡ್ಕೂರು ಹಾಂಗಾ ತಾ. ೧೩-೫-೧೪ಕ ಸಾಂಜ್ವಾಳಾ ಸೂರ್ಯಾಸ್ತ ದಾಕೂನು ಸುರುವಾತ ಜಾಲೇಲೆ ಅಖಂಡ ಭಜನ ಹೆರ್‍ದೀಸು ಸೂರ್ಯಾನಿ ಉದ್ದೇಚೆ ಪರ್ಯಂತ ಚಲ್ಲೆ. ಹೇ ಸಂದರ್ಭಾರಿ ಗಾಂವ್ಚೆ ಆನಿ ಪರಗಾಂವ್ಚೆ ಭಜನಾ ಪಾಳಿಚಾನ ಯವ್ನು ಭಜನಾ ಕಾರ್ಯಕ್ರಮ ಚಲೋವ್ನು ದಿಲ್ಲೆ. ತ್ಯಾ ದಿವಸು ರಾತ್ತಿಕ ಅನ್ನ ಸಂತರ್ಪಣ ಆಶ್ಶಿಲೆ. ಹೇ ಕಾರ್ಯಕ್ರಮ ವಿಜೃಂಭಣೇನ ಚಲಯಚಾಕ ಕಾರಣ ಜಾಲೇಲೆ ಸರ್ವಾಂಕ ಮಂಡಳಿಚೆ ಅಧ್ಯಕ್ಷ ಶ್ರೀ ಕೆ. ರವೀಂದ್ರ ವೆಂಕಟೇಶ ಪ್ರಭು ಆನಿ ಕಾರ್ಯದರ್ಶಿ ಶ್ರೀ ಗಣಪತಿ ನಾರಾಯಣ ಪ್ರಭು ಹಾನ್ನಿ ಆಬಾರ ವ್ಯಕ್ತ ಕೆಲ್ಲಾ.
ಶ್ರೀಮದ್ ವರದೇಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪುಣ್ಯತಿಥಿ ಶತಮನೋತ್ಸವಾಚೆ ರಥಯಾತ್ರಾ ತಾ. ೮-೪-೧೪ಕ ನಿಡ್ಡೊಡಿಚೆ ಶ್ರೀ ಲಕ್ಷ್ಮೀ ನರಸಿಂಹ ಭಜನಾ ಮಂಡಳಿಕ, ಕಿನ್ನಿಗೋಳಿಚಾನ ಸಾಂಜ್ವಾಳಾ ೬ ಗಂಟ್ಯಾಕ ಯವ್ನು ಪಾವ್ಲೆ. ರಥಯಾತ್ರೆಕ ಸ್ವಾಗತ ಕೆಲೇಲೆ ಉಪರಾಂತ ಮಂಡಳಿಚೆ ಅಧ್ಯಕ್ಷ ಶ್ರೀ ಕೆ. ರವೀಂದ್ರ ವೆಂಕಟೇಶ ಪ್ರಭು ಹಾನ್ನಿ ಸ್ವಾಮ್ಯಾಂಗೆಲೆ ಗುಣಗಾನ ಕೆಲ್ಲಿ. ಯೇವ್ಕಾರ ಶ್ರೀ ವಿವೇಕ ಮಾಧವರಾಯ ಪ್ರಭು ತಾನ್ನಿ ಕೆಲ್ಲಿ. ಉಪರಾಂತ ರಥಯಾತ್ರಾ ನಿಡ್ಡೋಡಿಚಾನ ಮೂಡಬಿದ್ರೆಕ ಘೆಲ್ಲಿ.
ವರದಿ : ಕೆ. ರವೀಂದ್ರ ವಿ. ಪ್ರಭು, ನಿಡ್ಡೋಡಿ.
ಕೊಂಕಣಿ ಮಠ ಶ್ರೀ ವೆಂಕಟರಮಣ ದೇವಳ, ಕಾಪು
ಶ್ರೀಮದ್ ವರದೇಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪುಣ್ಯತಿಥಿಚೆ ಶತಮಾನೋತ್ಸವ ಪ್ರಯುಕ್ತ ರಥಯಾತ್ರಾ ಮಹೋತ್ಸವ ಆನಿ ಪ|ಪೂ| ಸ್ವಾಮ್ಯಾಂಗೆಲೆ ಗುಣಗಾನ ಕಾರ್ಯಕ್ರಮ ತಾ. ೧೩-೪-೧೪ ದಿವಸು ಹಾಂಗಾ ಚಲ್ಲೆ. ಹೇ ಸಂದರ್ಭಾರಿ ಶ್ರೀ ಹಳೇಮಾರಿಯಮ್ಮ ಸ್ವಾಗತ ಗೋಪುರ ಮುಖಾರಿ ಪೂಜ್ಯ ಸ್ವಾಮ್ಯಾಂಗೆಲೆ ರಥಾಕ ಸ್ವಾಗತ ಕೋರ್ನು, ಮೆರವಣಿಗೇರಿ ಶ್ರೀ ದೇವಳಾಕ ಹಾಡ್ಲೆ. ದೇವಳಾಂತು ದೇವಾಲೆ ಪೂಜಾ, ಪ|ಪೂ| ಸ್ವಾಮ್ಯಾಂಗೆಲೆ ಪೋಟೊ ಪೂಜಾ, ಗುರುವರ್ಯಾಂಗೆಲೆ ಗುಣಗಾನ, ಆನಿ ಸ್ವಾಮ್ಯಾಂಕ ಕಾಣಿಕಾ ಅರ್ಪಣ ಇತ್ಯಾದಿ ಕಾರ್ಯಕ್ರಮ ಚಲ್ಲೆ.
ಶ್ರೀ ಲಕ್ಷ್ಮೀವೆಂಕಟರಮಣ ದೇವಳ, ಪಡುಬಿದ್ರೆ
ಶ್ರೀಮದ್ ವರದೇಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪುಣ್ಯ ತಿಥಿ ಶತಮಾನೋತ್ಸವ ಪ್ರಯುಕ್ತ ರಥಯಾತ್ರೆ ತಾ. ೧೩-೪-೧೪ ದಿವಸು ಪಡುಬಿದ್ರೆಕ ಆಯ್ಯಿಲ ತೆದ್ದನಾ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಳಾಚೆ ಸ್ವಾಗತ ಗೋಪುರಾ ಲಾಗ್ಗಿ ರಥಯಾತ್ರೆಕ ಸ್ವಾಗತ ಕೋರ್ನು ಶ್ರೀ ಲಕ್ಷ್ಮೀವೆಂಕಟರಮಣ ದೇವಳಾಕ ಹಾಡ್ಲೆ. ಧೋಂಫಾರಾ  ದೇವಾಲೆ ಪೂಜಾ ಜಾಲ್ಲ ಉಪರಾಂತ ಶ್ರೀಮದ್ ವರದೇಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪೋಟೋಕ ವಿಶೇಷ ಪೂಜಾ, ಪ|ಪೂ| ಸ್ವಾಮ್ಯಾಂಗೆಲೆ ಗುಣಗಾನ ಆನಿ ಸಮಾರಾಧನ ಚಲ್ಲೆ. ಉಪರಾಂತ ರಥಯಾತ್ರೆಕ ಕಾಪು ಶ್ರೀ ವೆಂಕಟರಮಣ ದೇವಳಾಕ ಪೆಟೋನು ದಿಲ್ಲೆ.
ಶ್ರೀ ಮಹಾಲಕ್ಷ್ಮೀ ರವಳನಾಥ ದೇವಳ, ಹಿರೇಗುತ್ತಿ
ಹಿರೇಗುತ್ತಿಚೆ ಶ್ರೀ ಮಹಾಲಕ್ಷ್ಮೀ ರವಳನಾಥ ದೇವಳಾಚೆ ತೃಯೋದಶಿ ವರ್ಷಾಚೆ ಬ್ರಹ್ಮರಥೋತ್ಸವು ತಾ. ೨೨-೪-೧೪ ದಾಕೂನು ೨೪-೪-೧೪ ಪರ್ಯಂತ ಅಗ್ರೋದಕ ಹರಣ, ದೇವತಾ ಪ್ರಾರ್ಥನ, ಮಣಿಕ, ಕೌತುಕ ಬಂಧನ, ಧ್ವಜಾರೋಹಣ, ಅಂಕುರಾರೋಹಣ, ಭೇರಿತಾಡನ, ಪಾಲಂಖೀ ಉತ್ಸವು, ನವಗ್ರಹ ವಾಸ್ತು ಹವನ, ಮಹಾಬಲಿ, ರಥಶುದ್ಧಿ, ರಥಾರೋಹಣ, ಶ್ರೀ ಬ್ರಹ್ಮರಥೋತ್ಸವ, ರಥ ಕಾಣಿಕಾ, ಅವಭೃತ ಉತ್ಸವು, ಸಂತರ್ಪಣ, ದರ್ಶನ ಮುಖಾಂತರ ಅಂಕುರ ಪ್ರಸಾದ ವಿತರಣ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಬರಶಿ ವಿಜೃಂಭಣೇರಿ ಚಲೇಲೆ ಖಬ್ಬರ ಮೆಳ್ಳಾ.

ಕೋಡಕಣಿಂತು ಯುಗಾದಿ, ರಾಮನವಮಿ ಉತ್ಸವಾಚರಣ
ಜಯ ನಾಮ ಸಂವತ್ಸರಾಚೆ ಸಂವತ್ಸರ ಪಾಡ್ವೆ ಉತ್ಸವು ಕೋಡಕಣಿಚೆ ವಿಠೋಬ ಕೂಡಿ ಆನಿ ಶ್ರೀ ವೀರವಿಟ್ಠಲ ಮಠಾಂತು ಸಂಭ್ರಮಾಚರಣೆನ ಚಲ್ಲೆ. ಸಕ್ಕಾಳಿ ವಿಠೋಬ ಕೂಡಿಂತು ವಾಸುದೇವ ಶಾನಭಾಗ ಹಾಂಗೆಲೆ ನೇತೃತ್ವಾಂತು ದೇವಪೂಜಾ, ಪಾನಕ ಪೂಜಾ ಘಡೈಲೆ. ಬಾಳೇರಿ ಕುಟುಂಬಾಚೆ ಬಾಂಧವ ದೇವತಾಕಾರ್ಯ ಆನಿ ಪೂಜಾ ಚಾಂಗ ಕೋರ್‍ನು ಚಲೈಲಾಲೆ. ಧೋಂಪಾರಾ  ಶ್ರೀ ವೀರವಿಟ್ಠಲ ಮಠಾಂತು ವೇ.ಮೂ. ರಾಧಾಕೃಷ್ಣ ಭಟ್ ಆನಿ ವೇ.ಮೂ. ದಾಮೋದರ ಭಟ್ ಹಾಂಗೆಲೆ ಪೌರೋಹಿತ್ವಾಂತು ವಿಟ್ಠಲ ರುಕುಮಾಯಿ ಪೂಜಾ ಚಲ್ಲೆ. ಭಟ್ಮಾಮಾನ ಜಯ ನಾಮ ಸಂವತ್ಸರಾಚೆ ಪಂಚಾಂಗ ಶ್ರವಣ ಕರೈಲೆ. ಆನಿ ಸಂಕ್ರಾಂತಿ ಫಲ, ರಾಶಿ ಫಲ ಸಾಂಗ್ಲೆ. ತಶ್ಯಿ ಕೋಡು ಆನಿ ಪಾನಕ, ಪ್ರಸಾದ ವಿತರಣಾ ಜಾಲ್ಲೆ. ರಾತ್ರಿ ಜಾಲ್ಲಿಲೆ ಕಾರ್ಯಕ್ರಮಾಂತು ಪಲ್ಲಕ್ಕಿ ಉತ್ಸವ ಚಲ್ಲೆ. ಶ್ರೀ ವೀರವಿಟ್ಠಲ ಮಠಾಂತ್ಲ್ಯಾನ ಬಾಳೇರಿಕೇರಿ, ದಸರೆಕಟ್ಟೊ, ಹೆಗಡೆಕೇರಿ ಪರ್ಯಂತ ವಚೂನು ಭಜಕ ಜನಾಲೆ ಪೂಜಾ ಆನಿ ಸೇವಾ ಘಡೋನು ದಿಲ್ಲೆ. ರಾತ್ರಿ ಮಹಾಮಂಗಲಾರತಿಚೆ ನಂತರ ಪಾನಕ ಆನಿ ಪ್ರಸಾದ ವಿತರಣ ಕೆಲ್ಲೆ. ಹ್ಯಾಂ ಒಟ್ಟೂ ಕಾರ್ಯಕ್ರಮಾಂತು ಗಾಂವಾಚೆ ಜಿ‌ಎಸ್‌ಬಿ ಸಮಾಜಬಾಂಧವ ಏಕತ್ರ ಮೇಳ್ನು ಚಂದ ರೀತಿರಿ ಚಲೋನು ದಿಲ್ಲಾಲೆ. ಹ್ಯಾಚಿ ನಮೂನೇರಿ ಅವುಂದೂಚೆ  ರಾಮನವಮಿ ಉತ್ಸವ ಭಿ ಶ್ರೀ ವೀರವಿಟ್ಠಲ ಮಠಾಂತು ಯಶಸ್ವಿ ಜಾವ್ನು ಚಲ್ಲೆ. ಚಿತ್ರವರದಿ : ಡಾ. ಅರವಿಂದ ಶ್ಯಾನಭಾಗ, ಬಾಳೇರಿ
ಶ್ರೀ ಪಟ್ಟಾಭಿ ರಾಮಚಂದ್ರ ದೇವಳ, ಬಾರ್ಕೂರು
ಬಾರ್ಕೂರು ಶ್ರೀ ಪಟ್ಟಾಭಿ ರಾಮಚಂದ್ರ ದೇವಳಾಂತು ತಾ. ೮-೪-೧೪ಕ ಶ್ರೀ ರಾಮನವಮಿ ಉತ್ಸವು ದೇವತಾ ಪ್ರಾರ್ಥನಾ, ಪವಮಾನ ಕಲಶ, ಮಹಾ ಪೂಜಾ, ಸಂತರ್ಪಣ, ಲಾಲಕಿ ಉತ್ಸವು, ರಾತ್ರಿ ಪೂಜಾ, ಅಷ್ಟಾವಧಾನ ಸೇವಾ, ಪ್ರಸಾದ ವಿತರಣ, ಭೋಜನ ಇತ್ಯಾದಿ ಕಾರ್ಯಕ್ರಮ ಬರಶಿ ವಿಜೃಂಭಣೇರಿ ಚಲೇಲೆ ಖಬ್ಬರ ಮೆಳ್ಳಾ.
ಶ್ರೀ ರಾಮಮಂದಿರ ಕಿನ್ನಿಗೋಳಿ
ಕಿನ್ನಿಗೋಳಿಚೆ ಶ್ರೀ ರಾಮಮಂದಿರಾಂತು ಪ|ಪೂ| ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾಂಗೆಲೆ ದಿವ್ಯ ಉಪಸ್ಥಿತೀರಿ ತಾ. ೯-೫-೧೪ ದಿವಸು ಶ್ರೀ ರಾಮ ಜನ್ಮೋತ್ಸವು, ಶ್ರೀ ಸೀತಾ ಸ್ವಯಂವರು ಆನಿ ಶ್ರೀ ರಾಮಚಂದ್ರ ಪಟ್ಟಾಭಿಷೇಕ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮು ಭಕ್ತಿಶೃದ್ಧೇರಿ ಘಡಿಲೆ ಮಾಹಿತಿ ಮೆಳ್ಳಾ. ತತ್ಸಂಬಂಧ ಪ|ಪೂ| ಸ್ವಾಮೆ ತಾ. ೮-೫-೧೪ ಥಾಕೂನು ೧೧-೫-೧೪ ಪರ್ಯಂತ ಹಾಂಗಾ ಮೊಕ್ಕಾಂ ವ್ಹರಲೀಲೆ. ಹೇ ವೇಳ್ಯಾರಿ ಸ್ವಾಮ್ಯಾಂಕ ಪೂರ್ಣಕುಂಭ ಸ್ವಾಗತ, ಗುರು ಭಿಕ್ಷಾ, ಪಾದ್ಯಪೂಜನ, ಏಕಾದಶಿ ದಿವಸು ಮುದ್ರಾಧಾರಣ, ತ್ರಿಕಾಲ ಪೂಜನ, ಭಕ್ತಿಸಂಗೀತ, ರಕ್ಷಾತ್ರಯ ಹವನ, ಪ|ಪೂ| ಸ್ವಾಮ್ಯಾಂಗೆಲೆ ದಾಕೂನು ಆಶೀರ್ವಚನ, ಆನಿ ತಾಂಕಾ ತಾಂಗೆಲೆ ಮುಖಾವೈಲೆ ಮೊಕ್ಕಾಂ ಖಾತ್ತಿರಿ ಶುಭ ವಿದಾಯ ಇತ್ಯಾದಿ ಕಾರ್ಯಕ್ರಮ ಚಲೇಲೆ ಖಬ್ಬರ ಮೆಳ್ಳಾ. ಗಾಂವ್ಚೆ ಗೌಡಸಾರಸ್ವತ ಸಮಾಜ ಬಾಂಧವ ಹೇ ವೇಳ್ಯಾರಿ ವ್ಹಡ ಅಂಕಡ್ಯಾರಿ ಉಪಸ್ಥಿತ ವ್ಹರಲೀಲೆ.
ಶ್ರೀ ರಾಮನಾಥ ಶಾಂತೇರಿ ಕಾಮಾಕ್ಷಿ ದೇವಳ, ಭಟ್ಕಳ
ಶ್ರೀ ಲಕ್ಷ್ಮೀನಾರಾಯಣ ರಾಮನಾಥ ಶಾಂತೇರಿ ಕಾಮಾಕ್ಷಿ ಬೇತಾಳ ದೇವಳ, ಭಟ್ಕಳ ಹಾಂಗಾ ಶ್ರೀ ದೇವಾಲೆ ಪುನರ್ ಪ್ರತಿಷ್ಠೆಚೆ ಇಕ್ರಾಚೆ ವರ್ಧಂತಿ ಉತ್ಸವು ತಾ. ೨೨-೫-೧೪ ದಿವಸು  ಚೊಲ್ಚೆ ಆಸ್ಸುನು ತತ್ಸಂಬಂಧ ತಾ. ೨೦-೫-೧೪ ತಾಕೂನು ೨೩-೫-೨೦೧೪ ಪರ್ಯಂತ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಶ್ರೀಪಾದ ವಡೇರ ಸ್ವಾಮೆಂ ಹಾಂಗಾ ಮೂಕ್ಕಾಂ ವ್ಹರತಾತಿ. ಹೇ ಸಂದಭಾರಿ ೨೦-೫ಕ ರಾತ್ತಿಕ ಪ|ಪೂ| ಸ್ವಾಮ್ಯಾಂಕ ಸ್ವಾಗತ. ಗುರು ಪಾದ್ಯ ಪೂಜನ, ಆಶೀರ್ವಚನ, ವಸಂತ ಪೂಜಾ ಚಲ್ತಾ. ೨೧-೫ಕ ಶ್ರೀ ಗುರು ಭಿಕ್ಷಾ ಸೇವಾ, ಶ್ರೀ ಹನುಮಂತ (ಪುತ್ತು) ಪೈ ಹಾಂಗೆಲೆ ಷಷ್ಠ್ಯಬ್ಧಿ ಪ್ರಯುಕ್ತ ಮಹಾ ಸಂತರ್ಪಣ ಚಲ್ತಾ. ೨೨-೫ಕ ಪ|ಪೂ| ಸ್ವಾಮ್ಯಾಂಗೆಲೆ ದಿವ್ಯ ಉಪಸ್ಥಿತೀರಿ ದೇವತಾ ಪ್ರಾರ್ಥನಾ, ಶತಲಕಶಾರ್ಚನ, ಶತಕುಂಭಾಭಿಷೇಕ, ಸಾನ್ನಿಧ್ಯ ಹವನ, ಶ್ರೀ ಲಕ್ಷ್ಮೀನಾರಾಯಣ ಹೃದಯ ಜಪ ಹವನ, ದರ್ಶನ ಸೇವಾ, ಮಹಾ ಸಂತರ್ಪಣ, ಸಾಂಜ್ವಾಳಾ ಪಾಲಂಖೀ ಉತ್ಸವು, ಅಷ್ಟಾವಧಾನ ಸೇವಾ, ವಸಂತ ಪೂಜನ ಚಲ್ತಾ. ೨೩-೫ಕ ಶ್ರೀ ಗುರು ಭಿಕ್ಷಾ ಸೇವಾ, ಮಹಾ ಸಂತರ್ಪಣ, ಶ್ರೀ ಗುರುಪಾದ್ಯ ಪೂಜನ, ಆಶೀರ್ವಚನ ಇತ್ಯಾದಿ ಕಾರ್ಯಕ್ರಮ ಚೊಲ್ಚೆ ಆಸ್ಸ ಮ್ಹಣ್ಚೆ ಮಾಹಿತಿ ಮೆಳ್ಳಾ. ಹೇ ಪೂರಾ ಸಮಾರಂಭಾಕ ಸಮಾಜ ಬಾಂಧವಾನಿ ತನು-ಮನ-ಧನಾನಿ ವಾಂಟೊ ಘೇವ್ನು ಶ್ರೀ ಹರಿ-ಗುರು ಕೃಪೇಕ ಪಾತ್ರ ಜಾವ್ಕಾ ಮ್ಹೊಣು ದೇವ್ಳಾಚೆ ಆಡಳಿತ ಮಂಡಳಿ ತರಪೇನ ವಿನಂತಿ ಆಸ್ಸ.
ಶಿರ್ಶಿಂತು ರಂಗ ತರ್ಬೆತಿ ಶಿಬಿರ್
ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿನ್, ಜಿ‌ಎಸ್‌ಬಿ ಸೇವಾ ವಾಹಿನಿ ಶಿರಸಿ ಆನಿ ಕೊಂಕಣಿ ಕಲಾಮಂಡಳ ಶಿರಸಿ ಹಾಂಚ್ಯಾ ಸಹಕಾರಾನ್ ಮಾಂಡುನ್ ಹಾಡಿಲ್ಲೆಂ ಚೆರ್ಡುಂವಾಲಿ ರಂಗ್‌ಮಾಂಚಿ ತರ್ಬೆತಿ ಶಿಬಿರಾಚಿ ಉಗ್ತಾವ್ಣಿ ೧೨-೦೪-೧೪ ಕ ಶಿರ್ಸಿಚ್ಯಾ ದ್ವಾರಕನಾಥ ಸಭಾಸಾಲಾಂತ್ ಚಲ್ಲಿ. ದಿವೊ ಪೆಟವ್ನ್ ಕಾರ್ಯಾಚಿ ಉಗ್ತಾವ್ಣಿ  ಅಕಾಡೆಮಿ ಅಧ್ಯಕ್ಷ್ ಶ್ರೀ ರೊಯ್ ಕ್ಯಾಸ್ತೆಲಿನೊನ್ ಕೆಲ್ಲಿ. ಕಾರ್ಯಾಚೆಂ ಅಧ್ಯಕ್ಷ್‌ಪಣ್ ಉತ್ತರ್ ಕನ್ನಡ ಜಿಲ್ಲಾ ಕೊಂಕಣಿ ಪರಿಷದೆಚೊ ಅಧ್ಯಕ್ಷ್ ಶ್ರೀ ವಿ. ಎಸ್. ಸೋಂದೆ ಮಾಮ್ಮಾನ ಘೆತ್ತಿಲ್ಲೆ.
ವೇದಿಕೇರಿ ಶ್ರೀ ಪಾಂಡುರಂಗ ಪೈ, ಅಕಾಡೆಮಿ ರಿಜಿಸ್ಟ್ರಾರ್ ಡಾ. ದೇವದಾಸ ಪೈ, ಡಾ. ಅರವಿಂದ ಶಾನುಭಾಗ್ ಹಾಜರ್ ಆಶ್ಶಿಲೆ. ಶ್ರೀ ವಾಸುದೇವ ಶಾನಭಾಗಾನಿ ಯೆವ್ಕಾರ್ ಕೋರ್ನು, ಕಾರ್ಯಕ್ರಮ ಚಲೈಲೆ. ಹಪ್ತಭರಿ ಚೆಲೇಲೆ ತರಬೇತಿ ಶಿಬಿರಾಂತು ಕೊಂಕಣಿಚೆ ೩೦ ಲೋಕ ಚೆರ್ಡುವಾಂಕ ರಂಗ ತರಬೇತಿ ದಿಲ್ಲೆ.

ಶ್ರೀ ವೆಂಕಟರಮಣ ದೇವಳ, ಮೂಡಬಿದರೆ
ಮೂಡಬಿದರೆ ಶ್ರೀ ವೆಂಕಟರಮಣ ಆನಿ ಶ್ರೀ ಹನುಮಂತ ದೇವಳಾಂತು ಪೂರ್ತಿ ಶಿಲಾಮಯ ಜಾವ್ನು ನವೀಕರಣ ಜಾಲೇಲೆ ಗರ್ಭಗೃಹಾಂತು ಅಷ್ಟಬಂಧ ಸಹಿತ ಶ್ರೀ ಹನುಮಂತ ದೇವಾಲೆ ಶಿಲಾಬಿಂಬಾಚೆ ಪುನಃ ಪ್ರತಿಷ್ಠಾ ಮಹೋತ್ಸವು ಶ್ರೀ ಕಾಶೀಮಠಾಚೆ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ತಾ. ೨೩-೪-೧೪ ದಿವಸು ವಿಜೃಂಭಣೇರಿ ಚಲ್ಲೆ. ತತ್ಸಂಬಂಧ ತಾ. ೨೦-೪-೧೪ ದಾಕೂನು ೨೪-೪-೧೪ ಪರ್ಯಂತ ಪ್ರಾರ್ಥನಾ, ಗಣೋಮು, ಪವಮಾನ ಸೂಕ್ತ ಪಾರಾಯಣ, ಭಜನ, ಅಂಕುರಾರೋಪಣ, ರಾಕ್ಷೆಘ್ನ ಹವನ, ದಿಕ್ಪಾಲ ಬಲಿ, ಧ್ವಜಾರೋಹಣ, ವಾಸ್ತು, ನವಗ್ರಹ ಹವನ, ಪ್ರಾಯಶ್ಚತ್ತ ಹೋಮು, ‘ಹೊರೆ ಕಾಣಿಕೆ ಮೆರವಣಿಗೆ, ಪ್ರಾಸಾದ ಶುದ್ಧಿ, ಶಿಖರ ಕಲಶಾಧಿವಾಸ, ಬಿಂಬ ಶುದ್ಧಿ, ಬಿಂಬ ಆಧಿವಾಸ ಪೂಜನ, ವಿಶೇಷ ವಾಯುಸ್ತುತಿ ಹವನ, ಶ್ರೀ ಹನುಮಂತ ದೇವಾಕ ರಾತ್ತಿಕ ಶಯ್ಯಾಧಿವಾಸ ಪೂಜನ, ೨೩-೪ಕ ಪ|ಪೂ| ಸ್ವಾಮ್ಯಾಂಗೆಲೆ ಶುಭಾಗಮನ ಜಾಲ್ಲ ಉಪರಾಂತ ಪ್ರತಿಷ್ಠಾ ಮೂರ್ತಾ ಪೂರ್ವಾಂಗ ದ್ವಾರಪೂಜನ, ಪ|ಪೂ| ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ಶ್ರೀ ಹನುಮಂತ ದೇವಾಲೆ ಬಿಂಬಾಚೆ ಅಷ್ಟಬಂಧ ಪುನಃ ಪ್ರತಿಷ್ಠೆ, ಪ್ರತಿಷ್ಠಾ ಕಲಶಾಭಿಷೇಕ, ಶಿಖರ ಕಲಶ ಪ್ರತಿಷ್ಠಾ, ಪ್ರತಿಷ್ಠೋತ್ತರ ಪ್ರಸನ್ನ ಪೂಜನ, ಪಟ್ಟ ಕಾಣಿಕಾ, ಗುರು ಕಾಣಿಕಾ, ಧಾ ಸಮಸ್ತಾಂಕ ಪ್ರಸಾದ ವಿತರಣ, ಪ|ಪೂ| ಸ್ವಾಮ್ಯಾಂಗೆಲೆ ಪಾದ್ಯಪೂಜನ, ಗುರುವರ್ಯಾ ಥಾಕೂನು ಆಶೀರ್ವಚನ, ದಂಪತಿ ಪೂಜನ, ಬ್ರಾಹ್ಮಣ ಪೂಜನ, ಸುವಾಸಿನಿ ಪೂಜನ, ಆಶೀರ್ವಾದ, ಶ್ರೀ ರಾಮಸಂಕೀರ್ತನ, ವಿಶೇಷ ರಂಗಪೂಜನ, ಸಪರಿವಾರ ಶ್ರೀ ರಾಮಚಂದ್ರ ದೇವಾಲೆ ಆರಾಧನ, ಶ್ರೀ ರಾಮಮಂತ್ರ ಹವನ, ಹನುಮಂತ ಮಂತ್ರ ಹವನ, ಇತ್ಯಾದಿ ಕಾರ್ಯಕ್ರಮ ಚಲೇಲೆ ಖಬ್ಬರ ಮೆಳ್ಳಾ. ಸಾಂಸ್ಕೃತಿಕ ಕಾರ್ಯಾವಳಿ ಜಾವ್ನು ಹರಿಗುರು ಸಂಕೀರ್ತನಾ ಮಣಿಪಾಲ ಥಾಕೂನು ಭಜನ, ಕು. ಶಾಂಭವಿ ಆನಿ ಕು. ವೈಭವಿ ಹಾಂಗೆ ಥಾಕೂನು ‘ಪರಮ ಪಾವನ ಶ್ರೀರಾಮ ಹರಿಕಥಾ ಕಾಲಕ್ಷೇಪ, ರಂಜಿತ ನಾಯಕ್ ಉಡುಪಿ ಥಾಕೂನು ಬಾನ್ಸುರಿ ವಾದನ, ಕಿರಣ್ ಕಾಮತ್, ಮುಂಬೈ ಥಾಕೂನು ಭಜನ್ ಸಂಧ್ಯಾ, ಯಕ್ಷ ಸಾರಸ್ವತ (ರಿ) ಮೂಡುಬಿದರೆ ದಾಕೂನು ಶ್ರೀ ಕೃಷ್ಣ ಲೀಲಾಮೃತ ಕೊಂಕಣಿ ಯಕ್ಷಗಾನ ಸಂಭಾಷಣ, ಸಮಾರೋಪ ಸಮಾರಂಭ ಆನಿ ಬಾಲಚಂದ್ರನ್ ಆನಿ ಪಂಗ್ಡಾ ತರಪೇನ ‘ಭಕ್ತಿ ಭಾವಗೀತಾ. ಇತ್ಯಾದಿ ಕಾರ್ಯಕ್ರಮ ಚಲ್ಲೆ,. ಗಾಂವ್ಚೆ, ಪರಗಾಂವ್ಚೆ ಅಪಾರ ಲೋಕ ಹೇ ವೇಳ್ಯಾರಿ ಉಪಸ್ಥಿತ ಆಸ್ಸೂನು ಹರಿ-ಗುರು ಕೃಪೇಕ ಪಾತ್ರ ಜಾಲ್ಲೆಂ.

ಶ್ರೀ ಪರಶುರಾಮ ದೇವಳ, ಗೋಕರ್ಣ
ಗೋಕರ್ಣಾಚೆ ಶ್ರೀ ಪರಶುರಾಮ ದೇವಳಾಂತು ಶ್ರೀ ಪರಶುರಾಮ ಜಯಂತಿ ನಿಮಿತ್ತ ಅಕ್ಷಯ ತೃತೀಯ; ತಾ. ೨-೫-೨೦೧೪ ದಿವಸು ಪ್ರತಿ ವಾರ್ಷಿಕ ಜಾವ್ನು  ಚೊಲ್ಚೆ ಸಗ್ರಹ ವಾಸ್ತುಮುಖ ಲಘುವಿಷ್ಣು ಹವನ, ಅನ್ನ ಸಂತರ್ಪಣ, ಅಷ್ಟಾವಧಾನ ಸೇವಾ, ದ್ವಾದಶ ಸ್ತೋತ್ರ ಪೂಜಾ, ವಸಂತ ಪೂಜಾ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ವಿಜೃಂಭಣೇರಿ ಚಲೇಲೆ ಖಬ್ಬರ ಮೆಳ್ಳಾ. ರಾತ್ತಿಕ ಚಲೇಲೆ ಸಭಾ ಕಾರ್ಯಕ್ರಮಾಂತು ಗೋಕರ್ಣಾಚೆ ಹಾರ್ಡವೇರ್ ಮರ್ಚಂಟ್ಸ್ ಶ್ರೀ ಮಾಧವ ಅಚ್ಯುತ ಪೈ ಆನಿ ಚುಟುಕು ಸಾಹಿತಿ ಶ್ರೀ ಅನಿಲ ವಸಂತ ಕಾಮತ್ ಹಾಂಕಾ ಸನ್ಮಾನಾಯಿ ಚಲ್ಲೆ. ತಾಜ್ಜ ಉಪರಾಂತ ಶ್ರೀ ಜೀವೋತ್ತಮ ಮಠಾಚೆ ಆವಾರಾಂತು ರೂಪಲಾವಣ್ಯ ನಾಟ್ಯ ಕಲಾ ಸಂಘ ಕುಂದಾಪುರ ಹಾಂಗೆಲ ನಿಮಿತ್ತ ಹಾಸ್ಯಭರಿತ ನಾಟಕ ಪ್ರದರ್ಶಿತ ಜಾಲ್ಲೆ. ಗೌಡ ಸಾರಸ್ವತ ಆನಿ ವೆಗ್ಳೆ ಸಮಾಜಾಚೆ ಅಪಾರ ಬಾಂಧವ ಹೇ ವೇಳ್ಯಾರಿ ಉಪಸ್ಥಿತ ವ್ಹರಲೀಲೆ.
ಶ್ರೀ ರಾಮನವಮಿ ಉತ್ಸವು, ಚಿಕ್ಕಮಗಳೂರು
ಚಿಕ್ಕಮಗಳೂರು ಜಿ.ಎಸ್.ಬಿ. ಸಮಾಜಾಚೆ ಶ್ರೀ ರಾಮ ದೇವ್ಳಾಂತು ಹ್ಹೆ ವರ್ಷ ಶ್ರೀ ರಾಮನವಮಿ ಉತ್ಸವು -೨೦೧೪ ಭಾರಿ ವಿಜೃಂಭಣೇರಿ ಸಂಪನ್ನ ಜಾಲ್ಲೊ. ತಾ. ೮-೪-೧೪ ಕ ಶ್ರೀ ದೇವಳಾಂತು ಸಮಾಜಾಚೆ ದ್ಹಾ ಸಮಸ್ತಾಂಗೆಲೆ ತರ್ಪೇನ ದೇವ ಪ್ರಾರ್ಥನಾ, ಶ್ರೀ ರಾಮ ತಾರಕ ಹವನ ಆರಂಭ, ಶ್ರೀ ರಾಮಲಿಲ್ಲಾ (ಬಾಲರಾಮಾ)ಂಕ ಫುಲ್ಲಾನ ಶ್ರೀಂಗಾರ ಕೆಲ್ಲೆ. ಮಾಗಿರಿ ಸಮಾಜಾಚೆ ಬಾಯ್ಲಮನ್ಶೆನ ಶಾಸ್ತ್ರೋಕ್ತ ಜಾವ್ನು ಫಾಣ್ಣೆಂತು ಘಾಲ್ನು, ನಾಮಕರಣ, ಉಡ್ಗಿರೆ ಸಮರ್ಪಣ, ಇತ್ಯಾದಿ ಕೆಲ್ಲೆ. ತಾರಕ ಹವನಾಚೆ ಪೂರ್ಣಾಹುತಿ, ಯಜ್ಞಾರತಿ, ಶ್ರೀ ದೇವಾಕ ಮಂಗಳಾರತಿ ನಂತರ ಪ್ರಸಾದ ವಿತರಣ, ಭೂರಿ ಸಂತರ್ಪಣ  ಚಲ್ಲೆ. ಸಂತರ್ಪಣೆಚೆ ಖಾಯಂ ಸೇವಾದಾರ ಶ್ರೀ ಬಿ.ಎಸ್. ಮಾಧವರಾವ್ ಕುಟುಂಬಸ್ಥ ಹೇ ಸಂದಭಾರಿ ಉಪಸ್ಥಿತ ವ್ಹರಲೀಲೆ. ಸಾಂಜ್ವಾಳಾ ೫-೩೦ ಗಂಟ್ಯಾಕ ಶ್ರೀ ರಾಮದೇವಾಕ ಪನಿವಾರ ಪಾನಕ ಪೂಜಾ ಚೊಲೋವ್ನು, ಹಜಾರಗಟ್ಲ್ಯಾನ ಭಕ್ತಾಂಕ ಪನಿವಾರ, ಪಾನಕ ವಾಂಟ್ಲೆ. ಮಾಗಿರಿ ಪ್ರಸಿದ್ಧ ಶಾಸ್ತ್ರೀಯ ಸಂಗೀತ ವಿಧೂಷಿ ಸುರಮಣಿ ಕು|| ಮಹಾಲಕ್ಷ್ಮೀ ಶೆಣೈ ಕಾರ್ಕಳ ಹಿಗೇಲೆ ‘ಭಕ್ತಿಗಾನ ಮಾಳಾ ಸಂಗೀತ ಕಾರ್ಯಕ್ರಮ ಭಾರಿ ಆಕರ್ಷಣ ಜಾವ್ನಾಶ್ಶಿಲೆ. ರಾತ್ತಿಕ ೯ ಘಂಟ್ಯಾಕ ಶ್ರೀ ದೇವಾಕ ಮಹಾಮಂಗಳಾರತಿ, ಶ್ರೀ ರಾಮಲಲ್ಲಾಕ ಆರತಿ, ಸೋಬಾನೆ, ಪ್ರಸಾದ ವಿನಿಯೋಗ ಚಲ್ಲೆ. ಅವುಂದು ಶ್ರೀ ರಾಮನವಮಿ ಜಿ.ಎಸ್.ಬಿ. ಸಮೂಹ ಆನಿ ವಿಂಗಡ ಸಮಾಜಾಚೆ ಲೋಕಾಲೆ ಉಪಸ್ಥಿತೀಂತು ಬಹು ವಿಜೃಂಭಣೇರಿ ಘಡ್ಲೆ.     - ವರದಿ : ಎಂ.ಡಿ. ಹೆಗ್ಡೆ, ಚಿಕ್ಕಮಗಳೂರು
ಪೇಟೆ ಶ್ರೀ ವೆಂಕಟರಮಣ ದೇವಳ, ಕುಂದಾಪುರ
ಕುಂದಾಪುರ್‍ಚೆ ಪೇಟೆ ಶ್ರೀ ವೆಂಕಟರಮಣ ದೇವಾಲೆ ಶ್ರೀ ಬ್ರಹ್ಮ ರಥೋತ್ಸವು  ತಾ. ೮-೪-೨೦೧೪ ದಿವಸು ವಿಜೃಂಭಣೇರಿ ಚಲೇಲೆ ಖಬ್ಬರ ಮೆಳ್ಳಾ. ತತ್ಸಂಬಂಧ ತಾ. ೪-೪-೨೦೧೪ ದಾಕೂನು ೯-೪-೨೦೧೪ ಪರ್ಯಂತ ಶ್ರೀ ದೇವಾಲೆ ಪ್ರಾರ್ಥನಾ, ಮೃತ್ತಿಕಾಹರಣ, ಅಂಕುರಾರೋಹಣ, ಧ್ವಜಾರೋಹಣ, ಬಲಿಪ್ರಧಾನ, ಗರುಡ ವಾಹನ ಬಂಡಿ ಉತ್ಸವು, ವಸಂತ ಪೂಜಾ, ಹಗಲೋತ್ಸವು, ಹನುಮಂತವಾಹನ ಬಂಡಿ ಉತ್ಸವು, ಚಂದ್ರಮಂಡಲ ಉತ್ಸವು, ಕಟ್ಟೆ ಪೂಜಾ, ಪುಷ್ಪ ರಥೋತ್ಸವು, ಪಂಚಾಮೃತಾಭಿಷೇಕ, ಕನಕಾಭಿಷೇಕು, ತುಲಾಭಾರ, ಮಹಾಬಲಿದಾನ, ರಥಾರೋಹಣ, ಮಹಾ ಸಮಾರಾಧನ, ಅಂಕುರ ಪ್ರಸಾದ, ಚೂರ್ಣೋತ್ಸವು, ತೀರ್ಥನಾಣ, ಧ್ವಜಾವರೋಹಣ, ಮೃಗಬೇಟೆ, ಕವಾಟ ಬಂಧನ ಇತ್ಯಾದಿ ಕಾರ್ಯಕ್ರಮ ಚಲ್ಲೆ. ಸಾಂಸ್ಕೃತಿಕ ಕಾರ್ಯಾವಳಿ ಜಾವ್ನು ಶ್ರೀ ಲಕ್ಷ್ಮೀವೆಂಕಟೇಶ ಕೊಂಕಣಿ ನಾಟಕ ಸಭಾ, ಕುಂದಾಪುರ ಹಾನ್ನಿ ಪ್ರಸ್ತುತ ಕೆಲೇಲೆ ನವೀನ ಹಾಸ್ಯಮಯ ಕೊಂಕಣಿ ನಾಟಕ ಆನಿ ಶ್ರೀ ಗೋಪಾಲಕೃಷ್ಣ ಯುವ ಸೇವಾ ಸಮಿತಿ ಯಕ್ಷಗಾನ ಕಲಾತಂಡ, ಉಪ್ಪಿನಕುದ್ರು ಹಾಂಗೆಲೆ ದಾಕೂನು ಮಥುರಾ ಮಹೀಂದ್ರಾ ಯಕ್ಷಗಾನ ಖೇಳು, ಬೊಂಬೆ ಖೇಳು ಚಲ್ಲೆ.
ರುಪ್ಪೆಚೆ ತೇರು ಸಮರ್ಪಣ : ಕುಂದಾಪುರ ಪೇಟೆ ಶ್ರೀ ವೆಂಕಟರಮಣ ದೇವಳಾಚೆ ತರಪೇನ ೧೭೫ ಕೆ.ಜಿ. ರುಪ್ಪೆ ವಾಪರೂನು ನಿರ್ಮಾಣ ಕೆಲೇಲೆ “ರುಪ್ಪೆ ತೇರ ಸಮರ್ಪಣ ತಾ. ೧೪-೫-೨೦೧೪ ದಿವಸು ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ಸಂಪನ್ನ ಜಾಲ್ಲೆ. ಹೇ ವೇಳ್ಯಾರಿ ಗಾಂವ್ಚೆ -ಪರಗಾಂವ್ಚೆ ಅಪಾರ ಸಮಾಜ ಬಾಂಧವ ಉಪಸ್ಥಿತ ಊರ್ನು ಶ್ರೀ ಹರಿ-ಗುರು ಕೃಪೆಕ ಪಾತ್ರ ಜಾಲ್ಲಿಂತಿ.  
ಶ್ರೀ ದುರ್ಗಾಪರಮೇಶ್ವರಿ ದೇವಳ, ಕೊಕ್ಕರ್ಣೆ
ಕೊಕ್ಕರ್ಣೆ ಶ್ರೀ ದುರ್ಗಾ ಪರಮೇಶ್ವರಿ ದೇವಳಾಂತು ಭಜನಾ ಏಕಾಹ ತಾ. ೧೫-೪-೧೪ ದಾಕೂನು ಸುರುವಾತ ಜಾವ್ನು ೨೬-೪-೨೦೧೪ ಪರ್ಯಂತ ಅರ್ಚಕ ಶ್ರೀ ಉಮಾನಾಥ ಪಡಿಯಾರ ಹಾಂಗೆಲೆ ಮುಖಾಲಪಣಾರಿ ವಿಜೃಂಭಣೇರಿ ಚಲೇಲೆ ಖಬ್ಬರ ಮೆಳ್ಳಾ.  ಆನಿ ರಾತ್ತಿಕ ನಗರ ಭಜನಾ ಆನಿ ಪೂಜಾ ಚಲ್ಲೆ. ತತ್ಸಂಬಂಧ ದೀಪಸ್ಥಾಪನ, ಶ್ರೀ ಉಮಾನಾಥ ಪಡಿಯಾರ ಘರ್‍ಚೆಲ ದಾಕೂನು ರಂಗಪೂಜಾ, ಮಾಗಿರಿ ಗಾಂವ್ಚೆ ವಿಂಗವಿಂಗಡ ಲೋಕಾ ದಾಕೂನು ಪೂಜಾ, ೨೬-೪-೧೪ಕ ಸೂರ್ಯು ಉದ್ದೆಚ ಪರ್ಯಂತ ಆಮಂತ್ರಿತ ಭಜನಾ ಮಂಡಳಿ ಆನಿ ಸ್ಥಳೀಯ ಭಜಕಾ ದಾಕೂನು ಭಜನಾ ಕಾರ್ಯಕ್ರಮ ನಿರಂತರ ಜಾವ್ನು ಚಲ್ಲೆ. ೨೬-೪-೧೪ ಓಕುಳಿ ಆನಿ ಧೋಂಪಾರಾ ಸಾರ್ವಜನಿಕ ಅನ್ನ ಸಂತರ್ಪಣ ಚಲ್ಲೆ.

ಆಮ್ಗೆಲೆ ಕೊಂಕಣಿ ಅಕಾಡೆಮಿ ಸಾಂದೆ
ಡಾ|| ಚೇತನ ಎಸ್. ನಾಯಕ, ಧಾರವಾq
ಮೂಲತಃ ಉತ್ತರ ಕನ್ನಡಾಚೆ ಕಾರವಾರ ಜಿಲ್ಲೆಚೆ ಡಾ|| ಚೇತನ ಕುಮಾರ ನಾಯಕಾಂಗೆಲೆ ಪ್ರಾಥಮಿಕ, ಮಾಧ್ಯಮಿಕ ಆನಿ ಉಚ್ಚಶಿಕ್ವಣ ರಾಜ್ಯಾಚೆ ಸಾಂಸ್ಕೃತಿಕ ಪೇಂಟ ಮ್ಹಣ್ಚೆ ನಾಂವ ಪಾವ್ವಿಲೆ ಧಾರ್‍ವಾಡಾಂತು ಜಾಲ್ಲೆ. ಹಾನ್ನಿ ಕನ್ನಡಾಂತು ಎಂ.ಎ.(ಸ್ನಾತಕ ಪದವಿ), ಹಿಂದೀ ಸಾಹಿತ್ಯಾಂತು ಎಂ.ಎ., ಎಂ.ಫಿಲ್, ಪಿ.ಎಚ್.ಡಿ. ಪದವಿ ನ್ಹಂಹಿಸಿ ಇಂಗ್ಲೀಷ್ ಸಾಹಿತ್ಯಾಂತು ಸ್ನಾತಕೋತ್ತರ ಡಿಪ್ಲೋಮೊ ಪದವೀಧರ. ದೇಶಾಚೆ ತಾಕತ್‌ವಾನ ಮಾಧ್ಯಮ ಮ್ಹಣೋವ್ನು ಘೆತ್ತಿಲೆ ಆಕಾಶವಾಣಿಂತು ೩೬ ವರ್ಷ ಸುದೀರ್ಘ ಸೇವಾ ಪಾವೋವ್ನು ಬೆಂಗಳೂರು ಆಕಾಶವಾಣಿ ದಾಕೂನು ಉಪ ಮಹಾನಿರ್ದೇಶಕ ಹುದ್ದೆರಿ ನಿವೃತ್ತ ಜಾಲ್ಲಿಂತಿ. ಸಂಗೀತ, ಗಾನ, ಸಾಹಿತ್ಯ, ಬರೈಚಾಂತು ಹಾಂಕಾ ವಿಶೇಷ ಆಸಕ್ತಿ ಆಸ್ಸುಚೆ ಹಾನ್ನಿ ಆಕಾಶವಾಣಿ ಖಾತ್ತಿರಿ ಹಜಾರಾ ಪಶಿ ಚ್ಹಡ ನಾಟ್ಕುಳಿ, ರೂಪಕ, ಶಬ್ಧಚಿತ್ರ, ಸಂಗೀತ ರೂಪಕ, ಸಂದರ್ಶನ, ಭಾಷಣ, ಆಮಂತ್ರಿತ ಶೋತೃಂಗೇಲೆ ಕಾರ್ಯಕ್ರಮ ತಯಾರ ಕೋರ್ನು ಪ್ರಸ್ತುತ ಕೆಲ್ಲಿಂತಿ. ಹಾಂಕಾ ಮಸ್ತ ಇತ್ತುಲೆ ರಾಜ್ಯ, ರಾಷ್ಟ್ರಮಟ್ಟಾಚೆ ಪ್ರಶಸ್ತಿ, ಪುರಸ್ಕಾರಾಯಿ ಮೆಳಿಲೆ ಆಸ್ಸ.
ಕನ್ನಡ, ಕೊಂಕಣಿ ಆನಿ ಹಿಂದಿ ಅಶ್ಶಿ ತೀನ ಭಾಷೆಂತು ಬರೈಚೆ ಹಾನ್ನಿ ಏಕಳೆ ಹವ್ಯಾಸಿ ಬರೋಪಿ. ಹಾಂಗೆಲೆ ಸಬಾರ ಲೇಖನ, ಕಾಣ್ಯೋ, ಕಾವ್ಯ ರಾಜ್ಯಾಚೆ ನಾಮಾಂಕಿತ ಪತ್ರಿಕೆಂತು ಪ್ರಕಟ ಜಾಲ್ಲಾ. ಸ್ವತಃ ಏಕಳೆ ಅನುಭವಿ ರಂಗಕಲಾವಿದ, ಜಾನಪದ ಗಾಯಕ ಆನಿ ನಿರ್ದೇಶಕ ಜಾವ್ನಾಸ್ಸುಚೆ ಹಾನ್ನಿ ಆಕಾಶವಾಣಿಕ ಸೇರವಚೆ ಪಶಿ ಫಯಲೆ ಧಾರವಾಡ, ಕಾರವಾರಾಚೆ ಸಬಾರ ಶಿಕ್ಷಣ ಸಂಸ್ಥೆಂತು ಅಧ್ಯಾಪನ ವೃತ್ತಿಂತು ಆಸ್ಸುನು ಸೇವಾ ಪಾವಯ್ಲ್ಯಾ. ಮಾಧ್ಯಮಾಚೆ ಖಾತ್ತಿರಿ ಅಧ್ಯಾಪನ ಕೊರಚಾಕ ರಾಜ್ಯ, ರಾಷ್ಟ್ರ, ವಿದೇಶಾಕಾಯಿ ಹಾನ್ನಿ ಭೇಟಿ ದಿಲ್ಲಯಾ. ಹಾನ್ನಿ ಮಂಗಳೂರು, ಧಾರವಾಡ, ಬೆಂಗಳೂರು ಇತ್ಯಾದಿ ಕರ್ನಾಟಕಾಚೆ ಪ್ರಮುಖ ಆಕಾಶವಾಣಿ ಕೇಂದ್ರಾಂತು ಸೇವಾ ಪಾವೋನು ಕರ್ನಾಟಕದಾದ್ಯಂತಾಚೆ ಲೋಕಾಂಕ ಚಿರಪರಿಚಿತ. ಹಾನ್ನಿ ಪ್ರಸ್ತುತ ಕೆಲೇಲೆ ನಾಟಕ, ರೂಪಕ, ಸಂದರ್ಶನ ಲೋಕ ಆಜಿಕಯಿ ಯಾದ ಕೋರ್ನು ಘೆತ್ತಾತಿ. ಪ್ರಸ್ತುತ ಹಾಂಕಾ ಕನಾಟಕ ಸರಕಾರಾ ದಾಕೂನು ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಕ ನೇಮಣೂಕಿ ಜಾಲೇಲೆ ಆಸ್ಸುನ, ಡಾ|| ನಾಯಕಾನಿ ಕೊಂಕಣಿ ಭಾಸ, ಸಾಹಿತ್ಯ, ಮಾಧ್ಯಮಾ ಖಾತ್ತಿರಿ ವಿಶೇಷ ಕಾರ್ಯಕ್ರಮ ಲೋಕಾಂಕ ಪಾವಯ್ಚೆ ಮಹತ್ತರ ಆಶಾ ದವರೂನು ಘೆತ್ಲ್ಯಾ ಮ್ಹಣ್ಚೆ ಸಂತೋಷಾಚೆ ವಿಷಯು. ಹಾಂಕಾ ಅಭಿನಂದನ ಪಾವೈತಾ.
ಶ್ರೀಮತಿ ಮಮತಾ ಕಾಮತ, ಮೈಸೂರು
ಗಾಯಕಿ, ಕಲಾಕಾರ, ನಾಟಕಕಾರ ಜಾವ್ನಾಶ್ಶಿಲೆ ಶ್ರೀಮತಿ ಮಮತಾ ಕಾಮತ ಮೂಲತಃ ಕುಂದಾಪುರ ತಾ||ಚೆ ಕೋಟೇಶ್ವರಾಚೆ ಶ್ರೀಮತಿ ಶಾಂತಾ ಆನಿ ಶ್ರೀ ಕೃಷ್ಣರಾಯ ಕಾಮತ್ತಾಂಗೆಲಿ ಧೂವ. ಮೈಸೂರಾಚೆ ಶ್ರೀ ಮಂಜುನಾಥ ಕಾಮತ್ತಾಂಗೆಲೆ ಹಾತು ಧೋರ್ನು ಥಂಯಿ ವಾಸ್ತವ್ಯ ಉರತಾತಿ. ಹಾಂಕಾಯಿ ಕರ್ನಾಟಕ ಸರಕಾರಾನಿ “ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೆ ಸಾಂದೆ ಮ್ಹೋಣು ನೇಮಣೂಕಿ ಕೆಲ್ಲ್ಯಾ. ಹಾನ್ನಿ ‘ಮಾಯಿ ಆನಿ ಸೂನ ಪುತಾಕ ಮಾತೆ ಹೂನ “ಘರಾ ಕಾಮಾಕ ಚೆಡು ಜಾಯ “ನಾಂಕುಟಿ ಕಲ್ಯಾಣ ಇತ್ಯಾದಿ ನಾಟಕ ಬರೋವ್ನು, ಪ್ರದರ್ಶನ ಕೋರ್ನು ಕೊಂಕಣಿ ಸಾಹಿತ್ಯ ಲೋಕಾಂತು ನಾಂವ ಪಾವ್ಲಿಂತಿ. ಉದ್ಯಮಿ ಸತಾ ಜಾವ್ನಾಸ್ಸುಚೆ ಹಾಂಕಾ ಮಹಿಮಾ ಆನೀ ಮನಿಶಾ ಮ್ಹಳೇಲೆ ದೊಗ್ಗ ಲೋಕ ಚೆಲ್ಲ್ಯಾ ಚರ್ಡುಂವ ಆಸ್ಸಾತಿ. ಕೊಂಕಣಿ ಸಾಹಿತ್ಯ ಸೇವಾ ಕೊರಚಾಕ ಬಾಮ್ಮುಣು ಶ್ರೀ ಮಂಜುನಾಥ ಕಾಮತಾಂಗೆಲೆ ಸಹಕಾರು, ಪ್ರೋತ್ಸಾಹು ವರೇಕ ಹಾಂಕಾ ಆಸ್ಸ. ಕೊಂಕಣಿ ಅಕಾಡೆಮಿಚೆ ಸಾಂದೆ ಜಾವ್ನು ನೇಮಣೂಕಿ ಜಾಲೇಲೆ ಖಾತ್ತಿರಿ ಹಾಂಕಾ ಅಭಿನಂದನ ಪಾವೈತಾ ದೇವು ಬರೆಂ ಕೊರೊಂ ಮ್ಹಣ್ತಾ.
ಕೊಂಕಣಿ ಶಿಕ್ಷಕಾಂಗೆಲೆ ಸಮಾವೇಶ
ಮಾಸ್ತರಾಂಗೆಲೆ ಸಹಕಾರ ಆನಿ ತ್ಯಾಗಾನಿ ಇಸ್ಕೂಲಾಂತು ಕೊಂಕಣಿ ಶಿಕ್ವಣ ಯಶಸ್ವಿ ಜಾಲ್ಲಾ. ಹರ್‍ಯೇಕ ಕೊಂಕಣಿ ಮಾತೃಭಾಷಿಕ ವಿದ್ಯಾರ್ಥಿ ಸ್ಕೂಲಾಂತು ಕೊಂಕಣಿ ಶಿಕಚೆ ಆಮ್ಗೆಲೆ ಸೊಪನ. ಜಾಲ್ಯಾರಿ ಚಮ್ಕಣಿ ಮಸ್ತ ಲಾಂಬ ಆಸ್ಸ. ಸರ್ಕಾರಾ ಥಾಕೂನು ಪಿಯುಸಿ ಆನಿ ಡಿ‌ಎಡ್/ಬಿ‌ಎಡ್ ಶಿಕ್ವಣಾಕ ಆದೇಶ ಘೆವ್ಚೆ ಮುಖಾವೈಲೆ ಕಾಮ. ಹಾಜ್ಜೆನ ಕೊಂಕಣಿ ಶಿಕ್ಷಕಾಂಗೆಲೆ ನೇಮಣೂಕಿ ಜಾವ್ಚೆ ಸುಲಭ ಜಾತ್ತಾ. ಅಕಾಡೆಮಿ ತರಪೇನ ಹೇ ಪೂರಾ ಕಾಮ ಕೊರಚಾಕ ತುಮಗೇಲೆ ಸಹಕಾರ ಜಾವ್ಕಾ. ಅಶ್ಶಿ ಮ್ಹೊಣು ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ರೊಯ್ ಕ್ಯಾಸ್ತೆಲಿನೊ ತಾನ್ನಿ ಸಾಂಗ್ಲೆ. ತಾನ್ನಿ ಕೊಂಕಣಿ ಪ್ರಚಾರ ಸಂಚಾಲನ, ಕೊಂಕಣಿ ಅಕಾಡೆಮಿ ಆನಿ ಮಾಂಡ್ ಸೊಭಾಣ್ ಹಾಂಗೆಲೆ ಸಂಯುಕ್ತ ಆಶ್ರಯಾರಿ  ಆಯೋಜನ ಕೆಲೇಲೆ ಕೊಂಕಣಿ ಶಿಕ್ಷಕಾಂಗೆಲೆ ವಾರ್ಷಿಕ ಸಮಾವೇಶ ಉದ್ಘಾಟನ ಕೋರ್ನು ಉಲೈತಾಶ್ಶಿಲೆ. ಮಂಗಳೂರ್‍ಚೆ ಸಂತ ಎಲೋಶಿಯಸ್ ಕಾಲೇಜಾಂತು ಹೋ ಕಾರ್ಯಕ್ರಮು ಆಯೋಜಿತ ಜಾಲೀಲೆ.  ಕಾರ್ಯಕ್ರಮಾಂತು ಕೊಂಕಣಿ ಶಿಕ್ಷಕಿ ಐರಿನ್ ಎಲ್ ಸಿಕ್ವೇರಾ ಹಾಂಕಾ ದಿ. ಜೆಸ್ಸಿ ಕ್ಯಾಸ್ತೆಲಿನೊ ಸ್ಮಾರಕ ಶ್ರೇಷ್ಟ ಕೊಂಕಣಿ ಶಿಕ್ಷಕ ಪುರಸ್ಕಾರ ದೀವ್ನು ಸನ್ಮಾನ ಕೆಲ್ಲಿ. ವೇದಿಕೆರಿ ಗೌರವ ಸೊಯರೆ ಜಾವ್ನು  ಮಾಂಡ್ ಸೊಭಾಣ್ ಅಧ್ಯಕ್ಷ ಲುವಿಸ್ ಜೆ ಪಿಂಟೊ, ಕೊಂಕಣಿ ಶಿಕ್ಷಣ ಸಂಸ್ಥೆ ಸಂಘಾಚೆ ಅಧ್ಯಕ್ಷ ಡಾ ಮೋಹನ್ ಪೈ, ಅಕಾಡೆಮಿ ರಿಜಿಸ್ಟ್ರಾರ್ ಡಾ ದೇವದಾಸ್ ಪೈ ಉಪಸ್ಥಿತ ವ್ಹರಲೀಲೆ. 
ಕೊಂಕ್ಣಿ ಪ್ರಚಾರ್ ಸಂಚಾಲನಾಚೆ ಅಧ್ಯಕ್ಷ ಸ್ಟ್ಯಾನಿ ಆಲ್ವಾರಿಸ್  ತಾನ್ನಿ ಯೇವ್ಕಾರ ಕೆಲ್ಲಿ , ಕಾರ್ಯದರ್ಶಿ ಅನಿಲ್ ಡಿಕುನ್ಹಾ  ತಾನ್ನಿ ಆಬಾರ ಮಾನಲೆ. ಲುಲ್ಲುಸ್ ಕುಟ್ಹಿನಾನಿ  ಕಾರ್ಯಕ್ರಮ ನಿರ್ವಹಣ ಕೆಲ್ಲಿ. ಸಕ್ಕಾಣಿ ರೊನಿ ಕ್ರಾಸ್ತಾ ತಾನ್ನಿ ಶಿಕ್ಷಕ ಖಾತ್ತಿರಿ ಕೊಂಕಣಿ ಕ್ವಿಜ್ ಚಲೈಲಿಂತಿ. ಕೊಂಕಣಿ ಕವಿ ಆಂಡ್ರ್ಯೂ ಎಲ್ ಡಿಕುನಾ ಉಲೈಲಿಂತಿ. ಮಾಗಿರಿ ಮುಖಾವೈಲೆ ಶೈಕ್ಷಣಿಕ ವರ್ಷಾಚೆ ಪೂರ್ವ ತಯಾರಿ ಡಾ ದೇವದಾಸ್ ಪೈ ಆನಿ ವಿತೊರಿ ಕಾರ್ಕಳ ತಾನ್ನಿ ಚಲೋವ್ನು ದಿಲ್ಲಿ. ಕಲಾಕುಲ್ ತಂಡ ಥಾಕೂನು ಬದ್ಲಾವಣ್ ಕಿರು ನಾಟಕ ಪ್ರದರ್ಶಿತ ಜಾಲ್ಲೆ. ಶಿಕ್ಷಕ ಆನಿ ಇತರ ಕೊಂಕಣಿ   ಲೋಕ ಹೇ ವೇಳ್ಯಾರಿ ವ್ಹಡ ಅಂಕಡ್ಯಾರಿ ಜಮಿಲೆ.

ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಳ, ಉಪ್ಪುಂದ
ಉಪ್ಪುಂದಾಚೆ ಶ್ರೀ ಲಕ್ಷ್ಮೀ ವೆಂಕಟರಮಣ ದೇವ್ಳಾಂತು ವರ್ಷಂಪ್ರತಿ ಮ್ಹಣಕೆ ಧಾ ಸಮಸ್ತಾ ದಾಕೂನು ಚೊಲಚೆ ಪ್ರತಿಷ್ಠಾ ವರ್ಧಂತಿ ತಾ. ೨೫-೩-೨೦೧೪ ದಿವಸು ಪ್ರಾರ್ಥನಾ, ಅಭಿಷೇಕು, ಸಂತರ್ಪಣೆ, ಉತ್ಸವಾದಿ ಸಮೇತ ವಿಜೃಂಭಣೇರಿ ಚಲೇಲೆ ಖಬ್ಬರ ಮೆಳ್ಳಾ.
ಶ್ರೀ ವೀರವಿಠ್ಠಲ ವೆಂಕಟರಮಣ ದೇವಳ, ಪಾಣೆಮಂಗಳೂರು
ಪಾಣೆ ಮಂಗಳೂರ್‍ಚೆ ಶ್ರೀ ವೀರ ವಿಠ್ಠಲ ವೆಂಕಟರಮಣ ದೇವ್ಳಾಚೆ ೩೭ ವರ್ಷಾಚೆ ಪುನರ್ ಪ್ರತಿಷ್ಠಾ ವರ್ಧಂತ್ಯುತ್ಸವು ತಾ. ೬-೫-೨೦೧೪ ದಿವಸು ಶ್ರೀ ದೇವತಾ ಪ್ರಾರ್ಥನಾ, ಪಂಚಾಮೃತಾಭಿಷೇಕ, ಶತಕಲಶಾಭಿಷೇಕು, ಪುಳುಕಾಭಿಷೇಕು, ಕನಕಾಭಿಷೇಕು, ಗಂಗಾಜಲಾಭಿಷೇಕು, ಮಹಾ ಮಂಗಳಾರ್ತಿ, ಮಹಾ ಸಮಾರಾಧನ, ರುಪ್ಪೆ ಲಾಲ್ಕಿ ಉತ್ಸವು, ಪ್ರಾಸಾದೋತ್ಸವು, ವಸಂತ ಪೂಜಾ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಬರಶಿ ಚಲೇಲೆ ಖಬ್ಬರ ಮೆಳ್ಳಾ. ತಶ್ಶಿಚಿ ಶ್ರೀ ದೇವಳಾಕ ಗಾಂವ್ಚೆ ಮ್ಹಾಲ್ಗಡ್ಯಾನ ರುಪ್ಪೆಚೆ ಲಾಲ್ಕಿ ಸಮರ್ಪಣ ಕೋರ್ನು ೫೦ ವರ್ಷ ಭರಲೀಲೆ ಉಡಗಾಸಾಕ “ರುಪ್ಪೆ ಲಾಲ್ಕಿ ಸಮರ್ಪಣಾ ಸುವರ್ಣ ಮಹೋತ್ಸವು ತಾ. ೨೬-೪-೨೦೧೪ ದಿವಸು ಪ್ರಾರ್ಥನ, ಲಘುವಿಷ್ಣು ಹವನ, ಶತಕಲಶಾಭಿಷೇಕ, ಸಭಾ ಕಾರ್ಯಕ್ರಮ, ಮಹಾ ಸಮಾರಾಧನ, ಸ್ಯಾಕ್ಸೋಪೋನ್ ವಾದನ, ದೀಪ ನಮಸ್ಕಾರು, ರುಪ್ಪೆ ಲಾಲ್ಕಿ ಪೇಟೆ ಉತ್ಸವು, ವಸಂತ ಪೂಜಾ ಇತ್ಯಾದಿ ಕಾರ್ಯಕ್ರಮ ಬರೋಬರಿ ಚೆಲೇಲೆ ಖಬ್ಬರ ಮೆಳ್ಳಾ.
ಬ್ರಹ್ಮೋಪದೇಶ
ಚಿ|| ಜ್ಞಾನೇಂದ್ರ (ಶ್ರೀ ಕೇಶವ ಭಟ್ ಆನಿ ಶ್ರೀಮತಿ ಸಹನಾ ಭಟ್, ಶೃಂಗೇರಿ ಹಾಂಗೆಲ ಪೂತು) ಹಾಕ್ಕಾ ತಾ. ೨೩-೪-೨೦೧೪ ದಿವಸು ಶೃಂಗೇರಿಚೆ ಶ್ರೀ ಚಪ್ಪರದಾಂಜನೇಯ ದೇವಳಾಂತು ಬ್ರಹ್ಮೋಪದೇಶ ಸಂಸ್ಕಾರ ಕೆಲೇಲೆ ಖಬ್ಬರ ಮೆಳ್ಳಾ.
ಚಿ|| ರಾಮಕೃಷ್ಣ ( ಶ್ರೀಮತಿ ರಕ್ಷಾ ಆನಿ ಶ್ರೀ ರಾಜೇಶ ವಿ. ಸಿಂಗನಕುಳಿ, ಹೆಗಡೆ ಹಾಂಗೆಲ ಪೂತು) ಹಾಕ್ಕಾ ತಾ. ೨ -೫-೨೦೧೪ ದಿವಸು ಅಂಕೋಲೆಚೆ ಶ್ರೀ ಆರ್ಯದುರ್ಗಾ ದೇವಳಾಂತು ಬ್ರಹ್ಮೋಪದೇಶ ಧೀಕ್ಷಾ ದಿಲೇಲೆ ಖಬ್ಬರ ಮೆಳ್ಳಾ.
ದೊನ್ನೀ ಮುಂಜಿ ವ್ಹರೆತಾಕ ದೇವು ಬರೆಂ ಕೊರೊಂ ಮ್ಹಣತಾ.
ಶುಭ ವಿವಾಹ
ಚಿ||ಸೌ|| ಶೃತಿ ವಿ. (ಶ್ರೀ ವೈಕುಂಠ ಭಗತ್ ಆನಿ ದಿ|| ವೈಶಾಲಿ, ಕೋಣಾಂದೂರು ಹಾಂಗೆಲಿ ಧೂವ) ಆನಿ ಚಿ|| ನಿತ್ಯಾನಂz (ಶ್ರೀಮತಿ ರಮಾ ಮತ್ತು ಶ್ರೀ ಜಿ. ನಾಗೇಂದ್ರ ಶೆಣೈ, ತೀರ್ಥಹಳ್ಳಿ ಹಾಂಗೆಲ ಪೂತು) ಹಾಂಗೆಲೆ ಲಗ್ನ ತಾ. ೨೧-೪-೨೦೧೪ ದಿವಸು ಶ್ರೀ ವಿನಾಯಕ ಮಾಂಗಲ್ಯ ಮಂದಿರ, ಕೋಣಂದೂರು ಹಾಂಗಾ ವಿಜೃಂಭಣೇರಿ ಚಲೇಲೆ ಖಬ್ಬರ ಮೆಳ್ಳಾ.
ಚಿ||ಸೌ|| ಪೂರ್ಣಿಮಾ (ಶ್ರೀಮತಿ ಮಮತಾ ಆನಿ ಲಕ್ಷ್ಮೀದಾಸ ಎನ್. ಪೈ, ಕಾಸರಕೋಡ ಹಾಂಗೆಲಿ ಧೂವ) ಆನಿ ಚಿ|| ಗೌತಮ (ಶ್ರೀಮತಿ ಸುಚೀತಾ ಆನಿ ಶ್ರೀ ರಾಜೇಂದ್ರ ಪೈ, ಬೆಳಗಾಂವಿ ಹಾಂಗೆಲ ಪೂತು) ಹಾಂಗೆಲೆ ಲಗ್ನ ತಾ. ೫-೫-೨೦೧೪ ದಿವಸು ಶ್ರೀ ಗೋಪಾಲಕೃಷ್ಣ ದೇವಳ, ಕಾಸರಕೋಡ ಹಾಂಗಾ ವಿಜೃಂಭಣೇರಿ ಚಲೇಲೆ ಖಬ್ಬರ ಮೆಳ್ಳಾ.
ನವೀನ ವ್ಹರೆತು, ವ್ಹಕಲಾಂಕ ದೇವು ಬರೆಂ ಕೊರೊಂ.