ಜಾಯಿ-ಜೂಯಿ

ಅಚಾನಕ್ ಹಾಂವು ಹುಬ್ಬಳ್ಳಿ ಜಯಶ್ರೀ ಅಕ್ಕಾಲೆ ಘರ್‍ಕಡೆ ಪಾವಲೊ. ಸಾಂಜ ಜಾಲ್ಲಿಲೆ.ತಾಂಗೆಲಿ ಘರಾಂತು ಏಕ ನಮೂನೆ ಸಂಭ್ರಮು! ಸಕ್ಕಟ ಲೋಕಾಲೆ ತೊಂಡಾ ವಯರಿ ಖಂಚಕಿ ಖುಷಿ!! ಮುಖಾರಿ ಏಕ ‘ರೇಡಿಯೊ ದವರೂನು ಘೇವ್ನು ಕಸಲ್ಕಿ ಆಯಕೂಚೆ ಆತುರ. ಮಾಕ್ಕಾ ಪಳೋವ್ನು ತಾಂಕಾ ಆನ್ನಿಕೆ ಖುಷಿ ಜಾಲ್ಲಿ. ಆಕ್ಕಾ ಸಾಂಗ್ಲೆಲಿ “ತೂಂವೆ ಆಯ್ಲಿಲೆ ಬರೆಂ ಜಾಲ್ಲೆ. ಆಜಿ ರೇಡಿಯೋಂತು “ಜಾಯಿ-ಜೂಯಿ ಕೊಂಕಣಿ ಕಾರ್ಯಕ್ರಮ ಆಸ್ಸ. ಮ್ಹೊಣು. ರೇಡಿಯೋಂತು ಮೆಗೇಲೆ ಮಾತೃಭಾಷಾ ಕಾರ್ಯಕ್ರಮ ಮ್ಹಳ್ಳಿಲಿಕೀ ಹಾಂವು ಭೀ ಬಸ್ಲೊ. ಧಾರವಾಡ ಕೇಂದ್ರ ಹುಬ್ಬಳ್ಳಿ ಲಾಗ್ಗಿ ಆಸ್ಚ್ಯಾ ದೆಕ್ಕೂನು ಕಾರ್ಯಕ್ರಮ ಬಾರೀ ಕ್ಲೀನ್ ಆಯ್ಕತಲೆ. ‘sಸಾಂಜ ಜಾಲ್ಲಿ ದೀವೊಂ ಲಾಯ್ಲೆ. ಸರ್ವ ಲೋಕಾಂಕ ಬರೆಂ ಜಾಂವೊ, ಅನುರಾಧಾ ಧಾರೇಶ್ವರಾಲೆ ಪದಾನ ಕಾರ್ಯಕ್ರಮ ಸೂರು ಜಾಲ್ಲೆ. ಕಾರ್ಯಕ್ರಮಾ ನಂತರ ಅಕ್ಕಾ ಕೋಣ ಕೋಣಲಕೀ ನಾಂವ ಸಾಂಗ್ಲಾಲೆ ಕುಡ್ವಾ ಘರಚಿ ಹಾನ್ನಿ ಪೂರಾ ಪ್ರತಿ ವಾರ ಕಾರ್ಯಕ್ರಮ ದಿತ್ತಾತಿ ಮ್ಹಣತಾನಾ ಅನಪಡ್ ಅಕ್ಕಾಲೆ ತೊಂಡಾರಿ ತಾಣೆ ಕೆಲ್ಲಿಲ ಸಂತೋಷು ಮಾಕ್ಕಾ ದಿಸ್ಲೆ. ಭಾವಾಜಿನ ಏಕ ಸಾನ ರೇಡಿಯೊ (ರೂ. ೧೦೦/- ಚೆ) ಮಾಕ್ಕಾ ದಿಲ್ಲೊ. ಜಾಲ್ಯಾರಿಚಿ ಶಿರ್ಶಿಂತು ಧಾರವಾಡ ಆಕಾಶವಾಣಿಚೆ ತ್ಯಾ ಕಾರ್ಯಕ್ರಮು ಆಯ್ಕುಚಾಕ ಮೇಳ್ನಾ ಆಶ್ಶಿಲೆ.  
ಮಾತೃಭಾಷಾ ಕಾರ್ಯಕ್ರಮ ಆಲ್ ಇಂಡಿಯಾ ರೇಡಿಯೊ ಧಾರವಾಡ ಕೇಂದ್ರಾಚಾನ ಪ್ರಸಾರ ಜಾವ್ಚೆ ಆಯಕೂನು ಅಭಿಮಾನ ದಿಸಲ್ಯಾರಿಚಿ, ಮಾಕ್ಕಾ ಏಕ ನಮೂನ್ಯಾ ವಿಷಾಧ ಜಾಲ್ಲೆ. ಆಮ್ಕ ತ್ಯಾ ಆಯ್ಕುಚೆ ಭಾಗ್ಯ ನಾ ಮೂ! ಮ್ಹೊಣು. ಮುಖಾರಿ ಹಳೂ ಹಳೂ ಆಮ್ಮಿ ಭೀ ಆಯ್ಕುಚಾಕ ಲಾಗಲೆ. ತಿತ್ಲೇಕ ಕ್ಲೀನ್ ಎನಾಶಿಲೆ. ಹಿಮಾಲಯ ಪರ್ವತ ಪಳೋವನು ತೇನ್‌ಸಿಂಗ್ ಆಪಣಾನ ತ್ಯಾ ಪರ್ವತಾ ವಯರಿ ಚಡಕಾ ಮ್ಹೊಣು ಆಶಾ ಕೆಲ್ಲ ಖಂಯಿ. ಮೆಗೇಲೆ ಮನಾಂತು ಭಿ ರೇಡಿಯೊಂತು ಕೊಂಕಣಿ ನಾಟಕ ಕೆನ್ನಾ ಕರತಾಲೊ ಮ್ಹೊಣು ಆಶಾ ಉತ್ಪನ್ನ ಜಾಲ್ಲಿ. ತೆದ್ನಾ ಹಾಂವ ಗಾಂವಾಂತು, ಸಮಾಜ ಮಂದಿರಾಂತು ನವೀನ ನಾಟ್ಕುಳಿ ಬರೋವನು ಖೆಳೈತಾಶ್ಶಿಲೊ.
೧೯೬೯ಂತು ಹಾಂವೆ ಕಾಲೇಜಾಕ ಪ್ರವೇಶ ಕೆಲ್ಲೊ. ಏಕ ಸಕ್ಕಾಣಿ ಭಾವಾಜಿಲ ಅಣ್ಣಾ ಎಂ.ವಿ. ಕಾಮತ್(ತಾಂಗೆಲೆ ಮೂಳ ಗಾಂವ ಶಿರಾಲಿ. ಆತ್ತ ಮಹಾರಾಷ್ಟ್ರಾಂತು ಉರತಾಲೊ.) ಹಾಂವು ಕಾಲೇಜಾಕ ವಚ್ಚೆ ಗಡ್ಬಿಡೇಂತು ಆಶ್ಶಿಲೊ.ಮೆಗೆಲೆ ಹಾತ್ತಾಕ ವಾಚ ನಾಶ್ಶಿಲೆ ಪೊಳೊವನು ಆಪಣಾಲೆ ಹಾತ್ತಾಕ ಬಾಂದುನುಗೆತ್ತಿಲೆ ಗೊಲ್ಡ ಬೆಲ್ಟಾಚೆ  ವಾಚ ಕಾಣು ಮೆಗೆಲೆ ಹಾತ್ತಾಕ ಬಾಂದಿಲೆ ಬರೆ ಕೋರ್ನು ಶಿಕ , ಕೊಂಕಣಿ ನಾಟಕ ಆನಿ ಬರೆಯ ಮುಖರಿ ಯೋ ಮ್ಹಳ್ಳಾಲೆ.ಶ್ರೀ ಶಾಮಂಕೃಷ್ಣರಾವ ಹಾನ್ನಿ ಹುಬ್ಬಳ್ಳಿ ಏಕ ಕೊಂಕಣಿ ಭಾಷೆಚೆ ಬೀಯಿ ರೊಯಿಲಿ. ತಾಜ್ಜೆ ಪರಿಣಾಮು  ಜಾಯಿ ಜುಯಿ ಕಾರ್ಯಕ್ರಮ ತಾನ್ನಿ ತಿho ಚಿಟಿಜ ತಿho? ಏಕ ಸೋವಿನಿಯರ ಕೋರ್ನು ತಾಜ್ಜ ತಾಕುನು ಕೊಣ ಕೊಣ ಹುಬ್ಬಳ್ಳಿಕ ಎವ್ನು ಸೆಟ್ಲ ಜಾಲ್ಲೆ ಮ್ಹಣ್ಚೆ ಏಕ ಪುಸ್ತಕ ರೂಪಾರಿ ತಯಾರ ಕೆಲ್ಲೆ.
ಕಾಲೇಜ ಗೆದರಿಂಗಾಕ ಧಾರವಾಡ ಆಕಾಶವಾಣಿ ಕೇಂದ್ರ ಮುಖ್ಯಸ್ಥ ಮುಖೇಲ ಸೂರೊ ಜಾವ್ನು ಆಯಿಲೆ. ಕೊಂಕಣಿ ನಾಟಕ ತೆಂ ಗೆದರಿಂಗಾತು ಆಶ್ಶಿಲೆ. ಆಮ್ಕಾ ಶಿಖಯಚೆ ಪ್ರೊ ಪಾರ್ಥ ಹಾನ್ನಿ ತಾಂಗೆಲೆ ಪರಿಚಯ ಕೋರ್ನು ದಿಲ್ಲೊ. ತಾನ್ನಿ ಹಾಂವ ಬರೆಯಿಲೆ  ಖಂಚೆ ನಾಟಕ ಆಸ್ಲೇರಿ ರೇಡಿಯೋಕ ಧಾಣುಂ ದಿ ಮ್ಹೋಣು ಎಡ್ರಾಸ ದಿಲ್ಲೊ. ೨೦-೨೫ ಮಿನಿಟಾ ನಾಟಕ ಆಸ್ಲೇರಿ ದಾಣುಂ ದಿ ಆಮ್ಮಿ ಕರೈತಾತಿ ಮಳ್ಳೆ. ಮಕ್ಕಾ ಸ್ವರ್ಗು ಲಾಗ್ಗಿ ಆಯಿಲೆ ವರಿ ಜಾಲ್ಲೆ.ಸಿಲೆಕ್ಟ ಜಾವ್ಕಾ ನ್ಹಯಿ? ಹಾಂವೆ ಬರೈಲೆ  ಶಂಭುಲಿ ಮಾಗ್ಣಿ ದಾಣುಂ ದಿಲ್ಲಿ. ತಾನ್ನಿ ಕೋರ್ನು ಪ್ರಸಾರ ಜಾವ್ಚೆ ತಾರೀಖ ದಿಲ್ಲಿ. ಆನ್ನಿ ಸಂಭಾವನಾ ಮ್ಹೋಣು ೭೫ರೂ, ಹಾಂವೆ ಕೆಲೆಲಿ ಪೈಲೆ ಉತ್ಪನ್ನ.
ಆತ್ತಾ ಕೊಂಕಣಿ ಭಾಷಾಕ ಮಾನ್ಯತಾ ಮೆಳ್ಳಾಂ. ಆಠವೆ ಪರಿಚ್ಛೇಧಾಂತು ಆಯಿಲಿ. ಕರ್ನಾಟಕಾಂತು ಕೊಂಕಣಿ ಸಾಹಿತ್ಯ ಅಕಾಡೆಮಿ ಆಯ್ಲಿ. ಕೊಂಕಣಿ ಪ್ರತಿಭಾ ವಿಂಚುಚಾಕ ಸಹಕಾರ ದಿಲ್ಲೊ. ತಿಸ್ರೆ ಐಚಿಕ ಭಾಷಾಮ್ಹೋಣು ಸ್ಕೂಲಾಂತು ಶಿಖೈತಾ ಆಸ್ಸಾತಿ. ಕೊಂಕಣಿ ಚಳುವಳಿ ಕರ್ನಾಟಕಾಂತಿ ದಿ|| ಬಂಗಾರಪ್ಪ ಮುಖ್ಯಮಂತ್ರಿ ಆಶ್ಶಿಲೆ ತೆದನಾ ಪ್ರಾರಂಭ ಜಾಲ್ಲಿ. ತೆದನಾ ಕೊಂಕಣಿಕ ಮಸ್ತ ಮೆಳ್ಳಾ ಎಂ.ವಿ ಕಾಮತ್ ಭಾವಾಜಿನ ಸಾಂಗಿಲ ವರಿ ಆಮ್ಮಿ ಸ್ವಾತಂತ್ರ್ಯ ಜಾವ್ನು ಶ್ರೀ ಮಹದೇವ ಶ್ಯಾನಭಾಗ ಹಾಂಗೆಲೆ ಮುಖಂಡತ್ವಾರಿ ಹಾಂವೆ ಬರೆಯಿಲಿ ಮಸ್ತ ನಾಟಕ ರೇಡಿಯೊಂತು ಪ್ರಸಾರ ಜಾಲ್ಲಿ. ಆನಿ ಬೆಂಗಳೂರು ದೂರದರ್ಶನಾರಿ ಭಾವ ಗೀತಾ ಕಾರ್ಯಕ್ರಮ ಕೆಲ್ಲಿಲೆ ಆಯ್ಕನು, ಪೊಳೋನು ಸ್ವರ್ಗಾಂತು ಆಶ್ಶಿಲೆ ಮೆಗೆಲೆ ದೋನಿ ಭಾವಜಿ, ಕೊಂಕಣಿ ಸಂಘಟನ ಜಾಲೆಲಿ ಪೊಳೋನು ಆನಂದ ಭಾಷ್ಪ ಘಾಲತ್ತಾತಿ. ಮ್ಹಳ್ಳೆಲಿ ವಿಶ್ವಾಸು ಮಾಕ್ಕಾ ಆಸ್ಸ. ಹಾತ್ತಾಕ ಬಾಂದಿಲೆ ವಾಚ ಪಳೈಲೆಕಿ ಎಂ.ವಿ ಕಾಮತಾಲೊ ಆನಿ ರೇಡಿಯೋ ಪಳೈಲೆಕಿ ಎಸ್.ವಿ ಕಾಮತಾಲೊ ಉಡ್ಗಾಸು ಎತ್ತಾ.                  - ಅನಿಲ ಪೈ ಶಿರಸಿ

ಕೆ.ಕೆ. ಪೈ ಪುತ್ಥಳಿ ಅನಾವರಣ

    “ದೂರದರ್ಶಿತ್ವಾಚೆ, ನಿರಂತರ ಸಮಾಜಮುಖೀ ಚಿಂತನೆಚೆ ಕೆ.ಕೆ. ಪೈ ತಾಂಗೆಲೆ ಜೀವನ - ಸಾಧನೆ ಸರ್ವಕಾಲಾಕ ಆದರ್ಶನೀಯ, ಸ್ಮರಣೀಯ ಮ್ಹೊಣು ವ್ಹಡ ಉದ್ಯಮಿ ಆನಿ  ಕೊಂಕಣಿ ಭಾಷಾ ಆನಿ ಸಾಂಸ್ಕೃತಿಕ ಪ್ರತಿಷ್ಠಾನಾಚೆ ಅಧ್ಯಕ್ಷ ಡಾ| ಪಿ. ದಯಾನಂದ ಪೈ ತಾನ್ನಿ ಸಾಂಗಲೆ. ಬ್ಯಾಂಕರ್, ದಾನಿ, ಸಾಮಾಜಿಕ ಮುಂದಾಳು, ಕೊಂಕಣಿ ಖಾತ್ತಿರಿ ವಿಶೇಷ ಸೇವಾ ಪಾವೆಯಿಲೆ ದಿವಂಗತ ಕೆ.ಕೆ. ಪೈ ತಾಂಗೆಲೆ ಪುತ್ಥಳಿ ಮಂಗಳೂರ್‍ಚೆ ವಿಶ್ವ ಕೊಂಕಣಿ ಕೇಂದ್ರಾಂತು ಅನಾವರಣ ಕೋರ್ನು ತಾನ್ನಿ ಉಲೈತಾಶ್ಶಿಲೆ.   ಕೆ.ಕೆ. ಪೈ ಮಾಮ್ಮಾಲೆ ಉಡಗಾಸಾಕ ವಿಶೇಷ ದತ್ತಿನಿಧಿ ಸ್ಥಾಪನ ಕರ್ತ ಮ್ಹೊಣು ಶ್ರೀ ದಯಾನಂದ ಪೈ ಮಾಮ್ಮಾನಿ ಹೇ ವೇಳ್ಯಾರಿ ಸಾಂಗ್ಲೆ. ಮಣಿಪಾಲದ ಕೆ.ಕೆ. ಪೈ ಟ್ರಸ್ಟ್ ಮೆನೇಜಿಂಗ್ ಟ್ರಸ್ಟಿ - ಮಣಿಪಾಲ್ ಮೀಡಿಯಾ ನೆಟ್‌ವರ್ಕ್ ಲಿ. ಚೆ ವ್ಯವಸ್ಥಾಪಕ ನಿರ್ದೇಶಕ ಟಿ. ಸತೀಶ್ ಯು. ಪೈ ಮುಖೇಲ ಸೊಯರೆ ಜಾವ್ನು ಆಯ್ಯಿಲೆ. ಆನ್ನೇಕ್ಳೆ ಸೊಯರೆ ಜಾವ್ನು  ’ತರಂಗ’ಚೆ ವ್ಯವಸ್ಥಾಪಕ ಸಂಪಾದಕಿ ಸಂಧ್ಯಾ ಪೈ ತಾನ್ನಿ ದಿ|| ಕೆ.ಕೆ. ಪೈ ಮಾಮ್ಮಾಲೆ ವೈಶಿಷ್ಠಪೂರ್ಣ ವ್ಯಕ್ತಿತ್ವ   ಖಾತ್ತಿರಿ ಸಾಂಗ್ಲೆ.
    ಕೊಂಕಣಿ ಭಾಷಾ ಆನಿ ಸಾಂಸ್ಕೃತಿಕ ಪ್ರತಿಷ್ಠಾನಾಚೆ (ವಿಶ್ವ ಕೊಂಕಣಿ ಕೇಂದ್ರ) ಅಧ್ಯಕ್ಷ ಬಸ್ತಿ ವಾಮನ್ ಶೆಣೈ  ತಾನ್ನಿ ಯೇವ್ಕಾರ ಕೆಲ್ಲಿ. ಕಾರ್ಯದರ್ಶಿ ವೆಂಕಟೇಶ್ ಎನ್. ಬಾಳಿಗಾನಿ ಕಾರ್ಯಕ್ರಮ ನಿರೂಪಣ ಕೆಲ್ಲಿ. ಎಂ. ರಘುನಾಥ್ ಶೇಟ್ ಆನಿ ಕೆ.ಕೆ. ಪೈ ತಾಂಗೆಲೆ ಪೂತು ಹೇ ವೇಳ್ಯಾರಿ ಉಪಸ್ಥಿತ ಆಶ್ಶಿಲೆ. ಕೇಂದ್ರಾಚೆ ವಿದ್ಯಾರ್ಥಿನಿಧಿ ಕಾರ್ಯದರ್ಶಿ ಪ್ರದೀಪ್ ಜಿ. ಪೈ ತಾನ್ನಿ ಆಬಾರ ಮಾನಲೆ.

ಶ್ರೀ ಮಹಾಲಸಾ ನಾರಾಯಣೀ ದೇವಕ್ಷೇತ್ರ, ಹರಿಖಂಡಿಗೆ

ಹರಿಖಂಡಿಗೆಚೆ ಶ್ರೀ ಮಹಾಲಸಾ ನಾರಾಯಣೀ ದೇವಿಕ್ಷೇತ್ರಾಂತು ಮಾರ್ಗಶೀರ್ಷ ಮಾಸಾಚೆ ೧೮-೧೨-೨೦೧೨ಕ ಚಂಪಾಷಷ್ಠಿ ಚಲಯಾರಿ, ೨೧-೧೨ಕ ಶ್ರೀ ಗುರು ಚರಿತ್ರಾ ಪಾರಾಯಣ ಆರಂಭ ಜಾಲ್ಲೆ. ೨೭-೧೨ಕ ಶ್ರೀ ಗುರು ದತ್ತಾತ್ರೇಯ ಜಯಂತಿ ಚಲ್ಲೆ. ಮಾಘ ಮಾಸಾಂತು ೧೩-೦೨-೧೩ಕ ಶ್ರೀ ಗಣೇಶ ಜಯಂತಿ, ೨೬-೨ಕ ಗುರು ಪ್ರತಿಪದಾ ಆನಿ ೧೦-೩-೧೩ಕ ಶ್ರೀ ಮಹಾ ಶಿವರಾತ್ರಿ ಉತ್ಸವು ಚಲೀಲೆ ಖಬ್ಬರ ಮೆಳ್ಳಾ.
ರಾಂದ್ಪಾ ಟಿಪ್ಸ್
೧. ಪಯಲೆ ದಿವಸಾಚೆ ದಾಳಿಯೋಯ ಉರಲ್ಯಾರಿ, ಜೀರೆಂ, ಸೋಯಿ ವಾಟ್ಟುನು ಘಾಲ್ನು ವರ್ನ ಕರಾ. ನಾಂವೆ ರಾಂದಯಕಾಯಿ ಸಿಜ್ಜೊನು ಘಾಲ್ನು, ಕೊಳಂಬೆ ಮಾಸೋಲು ಘಾಲ್ನು ಕೊಳಂಬೊ ಕರಾ. ಮಸ್ತ ರುಚಿ ಜಾತ್ತಾ. ೨. ಆತ್ತ ನವೆಂ ಆಂಬ್ಲಿ ಸೂರು ಜಾಲ್ಲೆ. ತಾಜ್ಜೆ ಕರಂಬಿ ಕೆಲಯಾರಿ ತೀನ್ಚಾರ ದಿವಸಾನಿ ತ್ಯಾ ಮೋವು ಜಾತ್ತಾ. ತೆದ್ದನಾ ಒಲ್ಲಿ ಮಿರ್ಸಾಂಗ ಸೋಯಿ ಥೊಡೆ ಘಾಲ್ನು, ವಾಟ್ಟುನು ತಾಕ್ಕಾ ಹೀಂಗು ನಾಂವೆ ಲೊಸೊಣಿ ಮೆಳೇಯಲ್ಯಾರಿ ಚಾಂಗ ಟೇಸ್ಟ ಎತ್ತಾ.
೩. ಪಯಲೆ ದಿವಸಾಚೆ ಸೀತ ಉರಲ್ಯಾರಿ ತಾಜ್ಜೆನ ಜೀರಾ ರಾಯಸ್, ಪ್ರೈಡ್ ರೈಸ್, ಪಲಾವು ಇತ್ಯಾದಿ ಕೊರಯೇತ.  ೪. ಇಡ್ಲೆ ಉರಲ್ಯಾರಿ ತಾಜ್ಜೆ ರುರಾವು(ಉಪ್ಪಿಟ್ಟು) ಕೊರಯೇತ. ನಾಂವೆ ಲೋಣಿ ಜಾಂವೊ ತ್ಹೂಪ ಘಾಲ್ನು ಕಾಯಲೇರಿ ಬಾಜ್ಜೊವೇತ. ಕೊತ್ತಂಬರಿ ಪಾಲ್ಲೆ ಚಡ್ನಿ ಉರಲೇರಿ ಮಸ್ತ ರೂಚಿ ಜಾತ್ತಾ.
ಪೊರನೆ ಕಪಡೆಂ ಅಸ್ಸಿ ಕರಾ
೧. ಬೆಡಶೀಟ್ ಪೊರನೆ ಜಾಲಯಾರಿ ಗಟ್ಟಿ ಬದಿ ಕಾತ್ತೋರ್ನು ಪಿಲ್ಲೊ ಕವರ್ ಕೊರಯೇತ. ಗ್ರೈಂಡರಾಕ, ಮಿಕ್ಸರಾಕ ಕವರ ಕೊರಯೇತ. ರಾಂದಪ ಕರತಾನಾ ಹಾತ್ತಾಂತು ವಾಪರಚೆ ಕಪಡೆ ಕೊರಯೇತ. ಮಸ್ತ ಲಡ್ಡ ಜಾಲಯಾರಿ ನ್ಹೆಲ, ಗ್ಯಾಸಾ ಕಟ್ಟೊ ಫುಶ್ಶಾಕ ವಾಪರೇತ.
೨. ಪೊರನಿ ಪ್ಯಾಂಟ್ ಕಾತ್ತೋರ್ನು ಬರ್ಮೋಡಾ ಕರಾ. ನಾಂವೆ ಕಿರಾಣಿ ಸಾಮಾನು ಹಾಡಚಾಕ ಚೀರಿ ಕರಾ. ನೈಟಿ ಪೊರನೆ ಜಾಲ್ಯಾರಿ ಮಿಕ್ಸರ್, ಗ್ರೈಂಡರಾಕ ಕವರ್ ಕರಾ. ನೈಸಿ ಫ್ರಿಜ್ಜಾ ಕವರ ಕೆಲಯಾರಿ ಚಂದ ದಿಸ್ತಾ.

ಮುಲ್ಕಿಂತು “ಮಹಾ ವಿಷ್ಣು ಯಾಗ

ಶ್ರೀ ವಿಜಯೇಂದ್ರ ತೀರ್ಥ ಸ್ವಾಮ್ಯಾಂಗೆಲೆ  ದಿವ್ಯ ಕರಕಮಲಾನಿ ಪ್ರತಿಷ್ಠಾಪನ ಜಾಲೇಲೆ ಮೂಲ್ಕಿ ಶ್ರೀ ಉಗ್ರ ನರಸಿಂಹ ದೇವು ಸಗಳೆ ಗೌಡ ಸಾರಸ್ವತ ಸಮಾಜಾಕ ಆನಿ ವಿಂಗಡ ಸಮಾಜಾ ಬಾಂದವಾಂಕ ಸೈತ ಮ್ಹೋಗಾಚೆ ಇಷ್ಟ  ದೇವು ಜಾವ್ನು ಅನುಗ್ರಹ ಕರ್ತಾ ಮುಲ್ಕಿಚೆ ಶ್ರೀ ವೆಂಕಟರಮಣ ದೇವಳಾಂತು ವಿರಾಜಮಾನ ಜಾಲ್ಲಾ., “ಉಗ್ರಂ ವೀರಂ ಮಹಾವಿಷ್ಣುಂ ಜ್ವಲಂತಂ ಸರ್ವತೋಮುಖಂ ನೃಸಿಂಹಂ ಬೀಷಣಂ ಭದ್ರಂ ಮೃತ್ಯು ಮೃತ್ಯುಂ ಸಮಾಮ್ಯಹಂ|| ನೃಸಿಂಹ ಅನುಷ್ಟಮ್ ಮಂತ್ರಾಚೆ ಹೇ ಶ್ಲೋಕಾಂತು ‘ನರಸಿಂಹ ದೇವಾಕ ಮೃತ್ಯುಚೊ ಮೃತ್ಯು ಮ್ಹೊಣು ಶ್ರೀ ಮಧ್ವಾಚಾರ್ಯಾನಿ ಸಾಂಗಲಾ. ಮರಣ ಜಿಕ್ಚೆ ವರ ದಿವ್ಚೆ ಬ್ರಹ್ಮಾಕ ಸೃಷ್ಟಿ ಕೆಲೇಲೆ ಭಗವಂತ ದಾಕೂನು ಹತ ಜಾಲೇಲೊ ಹಿರಣ್ಯಕಶಿಪಾಕ ಚಿರ್‍ಚೆ ಮೂರ್ತಿ ಹೇ ನರಸಿಂಹ ದೇವಾಲೆ.
ಶ್ರೀ ದೇವಳಾಚೆ ಭಜಕ-ಭಕ್ತಾಲೆ ಶ್ರೇಯೋಭಿವೃದ್ಧಿ ಆನಿ ಸದ$ ದೇವಾಲೆ ಅನುಗ್ರಹ ಖಾತ್ತಿರಿ ವಿಶೇಷ ಜಾವ್ನು ೧೪ ನರಸಿಂಹ ಮಂತ್ರ ಹವನ ಘೆಲೇಲೆ ಸಬಾರ ಮೈನ್ಯಾಚೆ ಸ್ವಾತಿ ನಕ್ಷತ್ರಾಚೆ ಪರ್ವಕಾಲಾಂತು ಶ್ರೀ ದೇವಳಾಂತು ಚಲೈಲಾ. ಹೇ ವಿಶೇಷ ಅನುಷ್ಠಾನಾಚೆ ಮಂಗಲಾಚರಣೆ ಜಾವ್ನು ಶ್ರೀ ದೇವಾಲೆ ಅಜ್ಞಾನುಸಾರ ತಶ್ಶಿಚಿ ಶ್ರೀಕಾಶೀಮಠಾಧೀಶ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ತಶ್ಶಿಚಿ ತಾಂಗೆಲೆ ಪಟ್ಟಶಿಷ್ಯ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಶುಭಾಶೀರ್ವಾದು ಘೇವ್ನು ದಿನಾಂಕ. ೩೦-೦೧-೨೦೧೩ ದಾಕೂನು ೩-೨-೨೦೧೩ ಪರ್ಯಂತ ಶ್ರೀ ದೇವಳಾಂತು ಶ್ರೀ ಮಹಾ ವಿಷ್ಣು ಯಾಗ ವಿಜೃಂಭಣೇರಿ ಸಂಪನ್ನ ಜಾಲ್ಲೆ. ತತ್ಸಂಬಂಧ ದಿನಾಂಕ. ೨೬-೦೧-೨೦೧೩ಕ ಪ್ರಾರ್ಥನ, ಮಹಾಸುದರ್ಶನ ಹವನ, ಅಣ್ಣಪ್ಪ ದೈವ ತಶ್ಶಿಚಿ ಗುಳಿಗ ದೈವಾಂಕ ನವಕ ಪ್ರಧಾನ ಹವನ ಆನಿ ಸೇವಾ, ದಿನಾಂಕ. ೨೭/೧ಕ ಮಹಾಲಕ್ಷ್ಮೀ, ಮುಖ್ಯಪ್ರಾಣ, ಗರುಡ, ಗಣಪತಿ ಪರಿವಾರ ದೇವಾಕ ವಿಶೇಷ ಹವನ ಆನಿ ಸೇವಾ,  ಹುಬ್ಬಳ್ಳಿಚೆ ವೇ|ಮೂ| ಡಾ|| ಪವನ ಭಟ್ ಹಾನ್ನಿ ಚಲೋನು ದಿಲೇಲೆ ಭಾಗವತ ಸಪ್ತಾಚೆ ಸುರುವಾತ, ರಾತ್ತಿಕ ದೇವಾಲೆ ಪೇಟೆ ಸವಾರಿ ಚಲ್ಲೆ. ೨೮/೧ಕ ಭಾಗವತ ಸಪ್ತಾಂತು ಶ್ರೀಮದ್ ವರಾಹ ವೈಭವ, ಕಪಿಲೋಪದೇಶ ಪ್ರಸ್ತುತ ಕೆಲ್ಲೆ.೨೯/೧ಕ ಪ್ರಾರ್ಥನ, ಉಗ್ರಾಣ ಮೂರ್ತು, ದ್ವಾದಶ ನಾರೀಕೇಳಾತ್ಮಕ ಗಣಹೋಮು, ಮೃತ್ತಿಕಾ ಹರಣ, ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಶುಭಾಗಮನ, ಆನಿ ಮಹಾ ವಿಷ್ಣು ಯಾಗಾಚೆ ಮಹಾಪ್ರಾರ್ಥನ, ಅಂಕುರಾರೋಹಣ, ರಾಕ್ಷೆಘ್ನ ಹವನ, ಬಲಿಪ್ರಧಾನ ಚಲ್ಲೆ. ೩೦/೧ಕ ಮಹಾವಿಷ್ಣುಯಾಗಾಚೆ ಪ್ರಾರ್ಥನ, ಮಹಾ ಸಂಕಲ್ಪ, ಧ್ವಜಾರೋಹಣ, ಕಲ್ಪೋಕ್ತ ಪ್ರಧಾನ ದೇವತಾ ಪೂಜನ, ಕುಂಡ ಸಂಸ್ಕಾರ ಪೂರ್ವಕ ಅಗ್ನಿ ಪ್ರತಿಷ್ಠಾಪನ ವಾಸ್ತು ಹವನ, ಸಾನಿಧ್ಯ ಮಂತ್ರ ಹವನ, ಮಹಾ ವಿಷ್ಣು ಯಾಗಾಂಗ ಸಂಖ್ಯಾಪೂರ್ತಿ ಪವಮಾನ ಹವನ, ಹರೇ ರಾಮ ಕೃಷ್ಣ ಮಿಳಿತ ಜಪ ಯಜ್ಞ ಪುಸ್ತಕ ಪೂಜನ, ಭೂರಿ ಸಮಾರಾಧನ, ಶಾಂತಿ ಪಾಠ ಇತ್ಯಾದಿ ಕಾರ್ಯಕ್ರಮ ಚಲ್ಲೆ. ೩೧/೧ಕ ರಕ್ಷತ್ರಯ ಹೋಮು, ಮಹಾ ನೈವೇಧ್ಯ, ಗೋ ಪೂಜಾ, ಗುರು ಪೂಜಾ, ಚಲ್ಲೆ. ೦೧/೨ಕ ಯಥಾವಿಧಿ ಬರೋಬರಿ ಸ್ವಸ್ತಿ ಪುಣ್ಯಾಹವಾಚನ, ಮೂಲಮಂತ್ರ ಹವನ, ಬಿಂದು ಮಾಧವ ದೇವಾಲೆ ಮಂತ್ರಹವನ, ಚಲ್ಲೆ. ೨/೨ಕ ಯಥಾವಿಧಿ ಬರಶಿ ವೆಂಕಟೇಶ ಮಂತ್ರ ಹವನ, ಶಾಂತಿ ಪಾಠ ಚಲ್ಲೆ. ಕಡೇರಚೆ ದಿವಸು  ೩-೨-೨೦೧೩ಕ ನಜರು ಕಾಣಿಕಾ, ಲಿಖಿತ ಜಪಯಜ್ಞ ಪುಸ್ತಕ ಶೋಭಾಯಾತ್ರಾ, ಮಹಾ ಪ್ರಾರ್ಥನ, ಯಜ್ಞ ಮಂಟಪಾಕ ಶ್ರೀ ದೇವಾಲೆ ಶುಭಾಗಮನ, ಸಾನಿಧ್ಯಮಂತ್ರ ಹವನ, ನರಸಿಂಹ ಮಂತ್ರ ಹವನ, ಮಹಾವಿಷ್ಣು ಯಾಗಾಂಗ ಸಂಖ್ಯಾಪೂರ್ತಿ ಪವಮಾನ ಹವನ, ಹರೇ ರಾಮ ಕೃಷ್ಣ ಮಹಾ ಮಂತ್ರ ಲಿಖಿತ ಜಪ ಯಜ್ಞ, ಪುಸ್ತಕ ವಿಶೇಷ ಪೂಜಾ ಆನಿ ಸಮರ್ಪಣ, ಬಲಿ ಪ್ರಧಾನ, ಮಹಾ ಪೂರ್ಣಾಹುತಿ, ಯಜ್ಞಾಂತು ಮಂಗಳಾರತಿ, ಶ್ರೇಯೋಗ್ರಹಣ, ರಕ್ಷಾ ಧಾರಣ, ಧ್ವಜ ಅವರೋಹಣ, ಯಜ್ಞ ವಿಸರ್ಜನ, ಮಹಾ ನೈವೇದ್ಯ, ದರ್ಶನ ಸೇವಾ, ಗೋ, ಬ್ರಾಹಣ, ದಂಪತಿ ಪೂಜಾ, ಭೂರಿ ಸಮಾರಾಧನ, ರಾತ್ರಿ ಪೂಜಾ, ದೀಪಾರಾಧನ, ಸಾನ ರಥೋತ್ಸವು, ನಿತ್ಯೋತ್ಸವು, ಭಂಡಿಗರುಡೋತ್ಸವು, ವಸಂತ ಪೂಜಾ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಚಲೇಲೆ ಖಬ್ಬರ ಮೆಳ್ಳಾ.

ಶುಭ ವಿವಾಹ

ವಂಡ್ಸೆ ಶ್ರೀಮತಿ ಶಕುಂತಳ ಹರಿದಾಸ್ ನಾಯಕ್ ಹಾಂಗೆಲೆಂ ನಾತ್ತು ಚಿ|| ಲಕ್ಷ್ಮಣ(ಅತೀಶ್) (ಶ್ರೀಮತಿ ಸುಜಾತ ಆನಿ ಶ್ರೀ ದಾಮೋದರ ನಾಯಕ್ ಕೊಪ್ಪ ಹಾಂಗೆಲೆ ಪೂತು) ಆನಿ ಚಿ||ಸೌ|| ಮೇಘ(ಶ್ರೀಮತಿ ಜ್ಯೋತಿ ಆನಿ ಶ್ರೀ ವಾಮನ ಪ್ರಭು, ಶಿವಮೊಗ್ಗ ಹಾಂಗೆಲಿಂ ಧೂವ) ಹಾಂಗೆಲೆ ಲಗ್ನ ತಾ. ೧೫-೦೨-೨೦೧೩ ದಿವಸು ಕೊಪ್ಪ -ಬಾಳಗಡಿ ಎಂ.ಎಸ್.ದೇವೇಗೌಡ ಸ್ಮಾರಕ ಒಕ್ಕಲಿಗರ ಸಮುದಾಯ ಭವನಾಂತು ವಿಜೃಂಭಣೇರಿ ಚಲ್ಲೆ.
ಚಿ||ರಾ|| ಸಂತೋಷ ವಿ (ಶ್ರೀಮತಿ ಶಾಂತಬಾಯಿ ಶ್ರೀ ಆರ್. ವಿಶ್ವನಾಥ ಕಾಮತ್, ಹೊಟೇಲ್ ಸ್ವಾಗತ್, ದಾವಣಗೆರೆ ಹಾಂಗೆಲೊ ಪೂತು) ಆನಿ ಚಿ|| ಸೌ|| ದೇವಿ(ಭಟ್ಕಳ || ಶಿರಾಲಿ ವಾಸಿ ಶ್ರೀಮತಿ ಅಪ್ಪು ಶ್ರೀ ನಾಗಪ್ಪ ಹಾಂಗೆಲೆ ಧೂವ) ಹಾಂಗೆಲೆ ಲಗ್ನ ತಾ. ೨೦-೨-೨೦೧೩ ದಿವಸು ಶಿರಾಲಿ ವೆಂಕಟಾಪುರಾಚೆ ಶ್ರೀ ಲಕ್ಷ್ಮೀ ವೆಂಕಟೇಶ್ವರ ದೇವಳಾಂತು ವಿಜೃಂಭಣೇರಿ ಚಲ್ಲೆ. ಆನಿ ಗರ್ಭರೋಹಣ ಪ್ರಯುಕ್ತ ಶ್ರೀ ಸತ್ಯನಾರಾಯಣ ಪೂಜಾ, ಸಂತೋಷಕೂಟ ತಾ. ೨೨-೦೨-೨೦೧೩ ದಿವಸು ವ್ಹರೆತಾಲೆ ಸ್ವಗೃಹ ಹೊಟೇಲ್ ಸ್ವಾಗತ್, ದಾವಣಗೆರೆ ಹಾಂಗಾ ಚಲೇಲೆ ಖಬ್ಬರ ಮೆಳ್ಳಾ. ದೊನ್ನೀ ವ್ಹರೆತು-ವ್ಹಕಳ್ಯಾಂಕ “ಸರಸ್ವತಿ ಪ್ರಭಾ ತರಪೇನ ದೇವು ಬರೆಂ ಕೊರೊಂ ಮ್ಹಣತಾ.

ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜ, ರಿಪ್ಪನಪೇಟೆ

ಶಿವಮೊಗ್ಗ ಜಿಲ್ಲಾ ರಿಪ್ಪನಪೇಟೆ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಂತು ವರ್ಷಂಪ್ರತಿ ಸಮಾಜಾಚೆ ಮ್ಹಾಲ್ಗಡೆ ಜಾಲೇಲೆ ದಿ|| ಗೋವಿಂದ ನಾರಾಯಣ ಕಾಮತ್ ಮಾಮ್ಮಾಲೆ ಸೇವಾರ್ಥ ಜಾವ್ನು ಚೋಲ್ನು ಆಯ್ಯಿಲೆ ಶ್ರೀ ಸತ್ಯನಾರಾಯಣ ಪೂಜಾ ಆನಿ ಸಮಾಜ ಬಾಂಧವಾಂಕ ಸಾಮೂಹಿಕ ಅನ್ನ ಸಂತರ್ಪಣ ಕಾರ್ಯಕ್ರಮ ದಿನಾಂಕ. ೧೪-೧-೨೦೧೩ ದಿವಸು ಚಲ್ಲೆ. ಪೂಜೆಂತು ಸಮಾಜಾಚೆ ಅಧ್ಯಕ್ಷ ಜಾಲೇಲೆ ಶ್ರೀ ಮಂಜುನಾಥ ಕಾಮತ್ ದಂಪತಿನ ವಾಂಟೊ ಘೇವ್ನು ಸಮಾಜಾಚೆ ಮ್ಹಾಲ್ಗಡೆ ಸುವಾಸಿನಿ ಬಾಯ್ಲಮನ್ಶೆಂಕ ಹೊಂಟಿ ಭರಲೆ. ಗಾಂವ್ಚೆ ಸರ್ವ ಬಾಂದವ ಹೇ ವೇಳ್ಯಾರಿ ಉಪಸ್ಥಿತ ಆಸ್ಸುನು ಶ್ರೀ ದೇವಾಲೆ ಪ್ರಸಾದ ಘೇವ್ನು ಪುನೀತ ಜಾಲ್ಲೆ.,

ಬೆಂಗಳೂರು ಶ್ರೀ ಕಾಶೀಮಠ

ಬೆಂಗಳೂರ್‍ಚೆ ಶ್ರೀ ಕಾಶೀಮಠಾಂಚೆ ಶ್ರೀ ಪಾರ್ಥಸಾರಥೀ ದೇವಾಲೆ ದಿವ್ಯ ಸನ್ನಿಧಿರಿ ದಿನಾಂಕ ೧೪-೧೨-೨೦೧೨ ದಿವಸು ಶ್ರೀಮದ್ ಭುವನೇಂದ್ರ ತೀರ್ಥ ಸ್ವಾಮಿ  ಪುಣ್ಯತಿಥಿ ಆರಾಧನ ಸಕ್ಕಾಣಿಪೂಡೆ ಪವಮಾನ ಅಭಿಷೇಕ, ಸಾಂಜ್ವಾಳಾ ಭಜನ, ರಾತ್ತಿಕ ಗುರು ಪೂಜಾ, ಶ್ರೀ ಗುರು ಗುಣಗಾನ, ಪೂಜಾ, ಪ್ರಸಾದ ವಿತರಣ ಇತ್ಯಾದಿ ಕಾರ್ಯಕ್ರಮ ಬರಶಿ ಚಲ್ಲೆ. ಮಂಜೇಶ್ವರ   ಚಂಪಾ ಷಷ್ಠಿ ಪ್ರಯುಕ್ತ ೧೮-೧೨-೨೦೧೨ಕ ಪಂಚಾಮೃತಾಭಿಷೇಕ, ಭಜನ, ಪೂಜಾ ಆನಿ ಪ್ರಸಾದ ವಿತರಣ ಚಲ್ಲೆ. ೨೩-೧೨-೧೨ಕ ಗೀತ ಜಯಂತಿ ಪ್ರಯುಕ್ತ ಸುಪ್ರಭಾತ, ದೀಪ ಪ್ರತಿಷ್ಠೆ, ಅಖಂಡ ಭಜನಾ, ಶ್ರೀ ಮದ್ಬಗವದ್ಗೀತಾ, ಶ್ರೀ ವಿಷ್ಣು ಸಹಸ್ರನಾಮ ಪಠಣ ಇತ್ಯಾದಿ  ಕಾರ್ಯಕ್ರಮ ಚಲ್ಲೆ. ತಾ. ೧೯-೨-೧೩ಕ ಮಧ್ವನವಮಿ ಪ್ರಯುಕ್ತ ಪವಮಾನಾಭಿಷೇಕ, ಭಜನ, ಶ್ರೀ ಗುರು ಪೂಜಾ, ಮಧ್ವ ಗುಣಗಾನ, ಫಲಾಹಾರ ವಿತರಣ ಇತ್ಯಾದಿ ಕಾರ್ಯಕ್ರಮ ಚಲ್ಲೆ. ಮಹಾಶಿವರಾತ್ರಿ ಪ್ರಯುಕ್ತ ತಾ. ೧೦-೩-೨೦೧೩ಕ ಅಭಿಷೇಕ, ಭಜನ, ರಾತ್ರಿ ಪೂಜಾ, ಫಳಾರ ವಿತರಣ ಇತ್ಯಾದಿ ಕಾರ್ಯಕ್ರಮ ಚಲ್ಲೆ.

ಶ್ರೀ ವೆಂಕಟರಮಣ ದೇವಳ, ಬೆಂಗಳೂರು

ಶ್ರೀ ವೆಂಕಟರಮಣ ದೇವಳ, ಬೆಂಗಳೂರು ಹಾಂಗಾ ೯ ವರ್ಷಾಚೆ ಅಖಂಡ ಭಜನಾ ತಾ. ೨೩-೧೨-೨೦೧೨ ದಿವಸು  ಸಾಂಜ್ವಳಾ ಆರಂಭ ಜಾವ್ನು ಪ್ರಾರ್ಥನ, ದೀಪಾ ಪ್ರಜ್ವಲಂ, ವಿಶೇಷ ಅಲಂಕಾರ ಪೂಜಾ, ಮಂಗಲ ಇತ್ಯಾದಿ ಚೇಲ್ನು  ತಾ. ೨೪-೧೨-೨೦೧೨ಚೆ ಸಕ್ಕಾಣಿ ಪೂಡೆ ಮುಕ್ತಾಯ ಜಾಲ್ಲೆ.  ತಾ. ೧೦-೨-೨೦೧೩ಕ ಶ್ರೀ ಗರುಡ ಜಯಂತಿ ಪ್ರಯುಕ್ತ ಪ್ರಾರ್ಥನ, ಅಭಿಷೇಕ, ಮಂಗಳಾರತಿ, ಪ್ರಸಾದ ವಿತರಣ ಇತ್ಯಾದಿ ಕಾರ್ಯಕ್ರಮ ಚಲ್ಲೆ. ೭ ವರ್ಷಾಚೆ ಶ್ರೀ ಗಣೇಶ ಜಯಂತಿ ತಾ. ೧೩-೦೨-೨೦೧೩ ದಿವಸು ಪ್ರಾರ್ಥನ, ಸಾಮೂಹಿಕ ಗಣೋಮು, ಸಾಮೂಹಿಕ ದೂರ್ವಾರ್ಚನ, ಸಾಮೂಹಿಕ ಸತ್ಯವಿನಾಯಕ ವೃತ, ಮಹಾಮಂಗಳಾರತಿ, ಪ್ರಸಾದ ವಿತರಣ ಇತ್ಯಾದಿ ಕಾರ್ಯಕ್ರಮ ಬರಶಿ ಚಲ್ಲೆ.

ಕೇರಳ ಕೊಂಕಣಿ ಸಾಹಿತ್ಯ ಅಕಾಡೆಮಿ ಉದ್ಘಾಟನೆ

ಕೇರಳ ಕೊಂಕಣಿ ಸಾಹಿತ್ಯ ಅಕಾಡೆಮಿ ಉದ್ಘಾಟನ  ಮುಖ್ಯಮಂತ್ರಿ ಉಮ್ಮನ್ ಚಾಂಡಿ ತಾನ್ನಿ ೨-೩-೨೦೧೩ ದಿವಸು ಕೆಲ್ಲಿಂತಿ. ಹೇ ವೇಳ್ಯಾರಿ ಉಲೈಲೆ ಅಕಾಡೆಮಿ ಅಧ್ಯಕ್ಷ ಪಯ್ಯನೂರು ರಮೇಶ ಪೈ ತಾನ್ನಿ “ಕೇರಳಾಂತು ಕೊಂಕಣಿ ಸಾಹಿತ್ಯಾಕ ಉತ್ತೇಜನ ದಿವಚಾಕ ಹೇ ಅಕಾಡೆಮಿ ಸ್ಥಾಪನ ಕೆಲ್ಲಯಾ ಮ್ಹಳ್ಳಿಂತಿ. ಹೇ ವೇಳ್ಯಾರಿ ಕೇರಳಾಚೆ ಸಂಸ್ಕೃತಿ ಮಂತ್ರಿ  ಕೆ.ಸಿ.ಜೋಸಪ್ ತಾನ್ನಿ ಅಧ್ಯಕ್ಷತಾ ಘೆತ್ತಿಲೆ. ರಾಜ್ಯ, ಕೇಂದ್ರ ಸರಕಾರಾಚೆ ವಿಂಗವಿಂಗಡ ಮಂತ್ರಿ, ಮಹೋದಯ, ಇತರ ಗಣ್ಯ, ಜಿಲ್ಲಾ ಮಟ್ಟಾಚೆ ನೇತಾರ, ಅಧಿಕಾರಿ ವರ್ಗ ವೇದಿಕೇರಿ ಉಪಸ್ಥಿತ ವ್ಹರಲೇಲೆ. ವ್ಹಡ  ಸಂಖ್ಯಾರಿ ಕೊಂಕಣಿ ಸಾಹಿತಿ, ಕಲಾವಿದ  “ಕೇರಳ ಕೊಂಕಣಿ ಅಕಾಡೆಮಿಚೆ ಸ್ಥಾಪನೆಕ ಸಾಕ್ಷಿ ಜಾಲ್ಲೆ. ಅಕಾಡೆಮಿ ನಿಮಿತ್ತ ಕೇರಳಾಚೆ ಕೊಂಕಣಿ ಸಾಹಿತಿ ಕಲಾವಿದಾಂಕ ಚ್ಹಡ ಮದ್ದತ್ ಮೆಳೋ ಮ್ಹೊಣು “ಸರಸ್ವತಿ ಪ್ರಭಾ ಆಶಯ ಕರ್ತಾ.

ಜಿ.ಎಸ್.ಬಿ. ದೇವಳಾಂತು ಲಡ್ಡು ಸೇವಾ

ಉಡುಪಿ ತಾ||ಚೆ ಪೆರ್ಡೂರು ಲಾಗ್ಗಿಚೆ ದೊಂಡೇರಂಗಡಿ ಶ್ರೀರಾಮ ಮಂದಿರಾಂತು ಸಬಾರ ವರ್ಷಾ ದಾಕೂನು “ಲಡ್ಡು ಸೇವಾ ಮ್ಹಣಚೆ ಹರ್‍ಕೆ ಪದ್ದತಿ ಚೋಲ್ನು ಎವ್ಚೆ ವಿಶೇಷ ಮ್ಹಣ್ಯೇತ.  ಸಂತಾನ, ಉದ್ಯೋಗ, ಆರೋಗ್ಯ, ಗಾಯಿ-ಗೊರವಾನಿ ಪೋರ ಘೆಲಯಾರಿ, ಘರ ಬಾಂದತಾನಾ, ಶಿಕ್ಷಣ ಇತ್ಯಾದಿ ಭಾಗ್ಯ ಅನುಗ್ರಹ ಕೊರ್‍ಕಾ ಮ್ಹೊಣು ಭಕ್ತ ಬಾಂಧವ ಅಸ್ಸಲೆ ಹರ್‍ಕೆ ಬಾಂದೂನು ಘೆತ್ತಾ ಖಂಯಿ. ಸುಮಾರ ೧೧೯ ವರ್ಷಾ ಮಾಕಸೀಚಿ ಭಜಕಾನಿ ಹಾಂಗಾ ಭಜನಾ ಕಾರ್ಯಕ್ರಮ ಚಲೋವನು ದಿಲೇಲ್ಯಾಕ ರೆಕಾರ್ಡ್ ಮೆಳ್ತ ಖಂಯಿ. ವರ್ಷಾಂತು ಏಕ ನಿರ್ದಿಷ್ಠ ದಿವಸು ದಿವಸ-ರಾತ್ರಿ ಭಜಕ ದೇವಳಾಕ ಎವ್ನು ಭಜನ ಕರತಾತಿ. ಭಜನಾ ಮಂಗಲೋತ್ಸವ ಜಾಲ್ಲ ಉಪರಾಂತ  ಅನ್ನ ಸಂತರ್ಪಣ ಚಲ್ತಾ. ತೆದ್ದನಾ ಭಜಕಾನಿ ಹರ್‍ಕೆ ರೂಪಾಂತು ಹಾಡ್ನು ದಿಲೇಲೆ ಬೊಂದಿ ಉಂಡೊ ಪ್ರಸಾದ ರೂಪಾಂತು ವಾಂಟಿತಾತಿ. ಹೇ ದೇವಳ ಗೌಡ ಸಾರಸ್ವತ ಸಮಾಜಾಚೆ ಆಡಳಿತಾಂತು ಆಸಲೇರಿಚಿ ಹಾಂಗಾ ಹರ್‍ಕೆ, ಭಜನ ಆನಿ ಪೂಜೆಂತು ಸರ್ವ ಸಮಾಜಾಚಿ ವಾಂಟೊ ಘೆತ್ತಾತಿ. ಅವುಂದು ಸುಮಾರ ೭೦,೦೦೦ ಉಂಡೊ ಹರ್‍ಕೆ ರೂಪಾಂತು ಶ್ರೀ ರಾಮ ದೇವಾಕ ಸಮರ್ಪಣ ಜಾಲ್ಲೆ ಖಂಯಿ.

೨೧ವೆ ಅಖಿಲ ಭಾರತ ಕೊಂಕಣಿ ಸಾಹಿತ್ಯ ಸಮ್ಮೇಳನ

“ಮಾತೃ ಭಾಷಾನ ಶಿಕಿಲೆ ಶಿಕ್ಷಣಚೀ ನೈಜ ಆನಿ ಪರಮೋಚ್ಛ ಶಿಕ್ಷಣ. ಕೊಂಕಣಿ ಚರ್ಡುವಾಂಕ ಕೊಂಕಣಿ ಮಾತೃ ಭಾಷೆಂತೂಚೀ ಪಾಠ ಶಿಕೋವಕಾ, ಇಂಗ್ಲಿಷ ಭಾಷಾ ಪಾಠ ತೆ ದುಸರೆ ಭಾಷಾ(Seಛಿoಟಿಜ ಐಚಿಟಿguಚಿge) ಪಾಠ ಜಾತಲೆ. ತಾಜ್ಯಾನ ಚರ್ಡುವಾಲ್ಯಾಂತ ಜಲ್ಮತ: ಯೆವಚೆ ಸೃಜನಶೀಲತಾ ನಾ ಜಾತಾ.  ಜಾಲೆಲ್ಯಾನ ಚರ್ಡುವಲ್ಯಾಂತ ಚಿಂತನಶಕ್ತಿ ವಾಡಚೆ ತಶಿಂ ಮಾಯ ಭಾಸೆನಚೀ ಶಿಕ್ಷಣ ದಿವಚೆ ಗರಜ ಆಸಾ.  ಇಂಗ್ಲಿಷ್ ಶಿಕ್ವಣಾನ ಚರ್ಡುವಾಲೆಂ ತಾಂತ್ರಿಕ ದೃಷ್ಠಿನ ಜ್ಞಾನ ಚಡತಲೆ ಶಿವಾಯ್ ತಾಂಗೆಲಾಂತ ವೈಚಾರಿಕತಾ, ಚಡ ಜಾಯನಾ ಅಶಿಂ ಜ್ಞಾನಪೀಠ ಪುರಸ್ಕೃತ, ಶ್ರೀ ಗಿರೀಶ ಕಾರ್ನಾಡ, ಗೊಂಯ ಮಡಗಾಂವಾಂತ ರವೀಂದ್ರ ಭವನಾಂತ ದಿ. ೧೫.೦೨.೨೦೧೩ಕ ೨೧ವೆ ಅಖಿಲ ಭಾರತ ಸಾಹಿತ್ಯ ಸಮ್ಮೇಳನ ಉಗ್ತಾವಣ ಕರತನಾ ಉಲಯಲೊ. ಗೊಂಯ ಮುಖೇಲಮಂತ್ರಿ ಶ್ರೀ ಮನೋಹರ ಪಾರಿಕ್ಕರ ಸಮ್ಮೇಳನಾಚೆ ಉಗ್ತಾವಣ ಸಮಾರಂಭಾಂತ ಉಪಸ್ಥಿತ ಆಶಿಲೆ.  ಕೇರಳಚೆ ಖ್ಯಾತ ಕೊಂಕಣಿ ಸಾಹಿತಿ ಶ್ರೀ ಆರ್.ಎಸ್. ಭಾಸ್ಕರ ಹಾನ್ನಿ ಸಮ್ಮೇಳನಾಂತ ನವೆಂ ಅಧ್ಯಕ್ಷ ಜಾವ್ನ ಉಲೋವಪ ದಿಲೆಂ.
ಡಾ. ಪ್ರಕಾಶ ವಜರೀಕರ ಹಾಂಗೆಲೆ ಅಧ್ಯಕ್ಷಪಣಾರಿ ಕೊಂಕಣಿ ನಾಟಕ ಖಂಯಚೆ ದಿಕೆನ, ಶ್ರೀ ಸಂದೇಶ ಪ್ರಭುದೇಸಾಯಿ ಹಾಂಗೆಲೆ ಅಧ್ಯಕ್ಷಪಣಾರಿ ಕೊಂಕಣೀ ಸಾಹಿತ್ಯಾಚೊ ಅಣಕಾರ, ಆನಿ ಡಾ. ಕಿರಣ ಬುಡಕುಳೆಂ ಹಾಂಗೆಲೆ ಅಧ್ಯಕ್ಷಪಣಾರಿ ಲೇಖನಾ ಫಾಟಲೀಂ ಸೃಜನ ಪ್ರಕ್ರಿಯಾ ಹ್ಯಾ ಪೂರಾಯ್ ವಿಷಯಾಚೆರ ಭಾಸಾಭಾಸ ಕಾರ್ಯಕ್ರಮ ಚಲಲೊ. ತಶೀಂಚಿ ಶ್ರೀ ಮೆಲ್ವಿನ್ ರಾಡ್ರಿಗಸ್ ಹಾಂಗೆಲೆ ಅಧ್ಯಕ್ಷಪಣಾರಿ ಲೇಖಕಾಂಚಿ ಅಭಿವ್ಯಕ್ತಿ ಸ್ವಾತಂತ್ರ್ಯ ಆನಿ ಮರ್ಯಾದಾ, ಶ್ರೀ ದಾಮೋದರ ಮಾವಜೊ ಹಾಂಗೆಲೆ ಅಧ್ಯಕ್ಷಪಣಾರಿ ಕೊಂಕಣೀ ಸಾಹಿತ್ಯಾಚೊ ಅಣಕಾರ, ಹ್ಯಾ ಪೂರಾಯ್ ವಿಷಯಾಚೆರ ಪರಿಸಂವಾದ ಕಾರ್ಯಕ್ರಮ ಚಲ್ಲೊ.
ಶ್ರೀಮತಿ ಗ್ವಾದಾಲೂಪ ಡಾಯಸ  ಆನಿ ಶ್ರೀ ರಮೇಶ ವೆಲೂಸಕಾರ ಹಾಂಗೆಲೆ ಅಧ್ಯಕ್ಷಪಣಾರಿ ದೋನಿ ಕವಿ ಸಮ್ಮೇಳನ ಸಂಪನ್ನ ಜಾಲೆಂ.ತಾರೀಕ ೧೫.೦೨.೨೦೧೩ ದಾಕೂನ ೧೭.೦೨.೨೦೧೩ತಾಂಯ ಚಲಲೊ ಹ್ಯಾ ೨೧ವೆ ಅಖಿಲ ಭಾರತೀಯ ಕೊಂಕಣಿ ಸಾಹಿತ್ಯ ಸಮ್ಮೇಳನಾಂತು ಕೇರಳ, ಮುಂಬಯ ಆನಿ ಮಂಗಳೂರಚೆ ಪಂಗಡಾನಿಂ ಸಾಂಸ್ಕೃತಿಕ ಕಾರ್ಯಾವಳ ಭಾರಿ ಸಂಭ್ರಮಾರಿ ಘಡೂನ ಹಾಳ್ಳೆಂ.
ಸಮಾರೋಪ ಸುವಾಳ್ಯಾಂತ  ಸ್ವಾಗತಾಧ್ಯಕ್ಷ ಶ್ರೀ ದತ್ತಾ ದಾ. ನಾಯಕ ಹಾನ್ನಿ ಯೆವಕಾರ ಸಮಿತಿಚೆ ಉಲೋವಪ, ನಾಮನೆಚೆ ಸಾಹಿತ್ಯೀಕ ಶ್ರೀ ವಿಕ್ಟರ್ ರಾಂಜೇಲ ಹಾನ್ನಿ ಮುಖೇಲ ಸೊಯರೆಂಲೆ ಉಲೋವಪ ದಿಲೆಂ. ಗೊಂಯ, ಕರ್ನಾಟಕ, ಕೇರಳ ಆನಿ ಮಹಾರಾಷ್ಟ್ರ ಪ್ರತಿನಿಧೀಂಗೆಲೆ ಪ್ರತಿಕ್ರಿಯಾ ಜಾತ್ತರಿ  ಯೆವಕಾರ ಸಮಿತೀಚೆ ಕಾರ್ಯಾಧ್ಯಕ್ಷ ಶ್ರೀ ಚೇತನ ಆಚಾರ್ಯ ಹಾನ್ನಿ ಉಪಕಾರ ಆಟಯಲೊ.  ಶ್ರೀಮತಿ ಅನ್ವೇಷಾ ಸಿಂಗಬಾಳಾನ ಸೂತ್ರಸಂಚಾಲನ ಕೆಲೆಂ.

ಶ್ರೀ ಎನ್.ಬಿ.ರಾಯ್ಕರಾಂಕ ಸನ್ಮಾನು

ಸಬಾರ ಹೋರಾಟ, ಚಳ್ವಳಿಂತು ಸಕ್ರೀಯ ಜಾವ್ನು ವಾಂಟೊ ಘೇವ್ನು ಯಶ ಪಾವ್ವಿಲೆ ಹಾನಗಲ್ಲಾಚೆ ಮ್ಹಾಲ್ಗಡೆ ವಕೀಲ ಶ್ರೀ ಎನ್.ಬಿ.ರಾಯ್ಕರ್ ತಾಂಕಾ ಮಾಜಿ ರಾಜ್ಯ ಪಿ.ಡಬ್ಲ್ಯೂ.ಡಿ. ಸಚಿವ ಶ್ರೀ ಸಿ.ಎಮ್.ಉದಾಸಿ ತಾನ್ನಿ ಆಲ್ತಾಂತು ಚಲೇಲೆ ಉ.ಕ.ಜಿಲ್ಲಾ ಚೆಲ್ಲಿಯಾ ಚರ್ಡುಂವಾಂಗೆಲೆ ಕಬ್ಬಡಿ ಪಂದ್ಯಾಟ ಆನಿ ಮ್ಹಾಲ್ಗಡೆಂ ನಾಗರಿಕಾಲೆ ದಿನಾಚರಣೆ ಸಂದರ್ಭಾರಿ ಆದರ ಪೂರ್ವಕ ಜಾವ್ನು ಸನ್ಮಾನ ಕೆಲ್ಲಿ. ಹೇ ವೇಳ್ಯಾರಿ ಜಿಲ್ಲಾ ಆನಿ ರಾಜ್ಯಮಟ್ಟಾಚೆ ಸಬಾರ ಗಣ್ಯ ಉಪಸ್ಥಿತ ಆಸ್ಸುನು ಶ್ರೀ ರಾಯ್ಕರ ಮಾಮ್ಮಾಕ ಅಭಿನಂದನ ಪಾವೈಲಿಂತಿ.

ಕೊಂಕಣಿ ಭಾಷಣಾಂತು ಪ್ರಥಮ ಸ್ಥಾನ

ಕುಮಾರಿ ವೈಷ್ಣವೀ ಶಾಂತಾರಾಮ ಪೈ ಬಿಳಗಿ(ಉ.ಕ.) ಹೀ ದಿನಾಂಕ. ೩೧-೧೨-೨೦೧೨ ದಿವಸು ಹಳಿಯಾಳಾಂತು ಚಲೇಲೆ ಉತ್ತರ ಕನ್ನಡ ಜಿಲ್ಲಾ ಮಟ್ಟಾಚೆ “ಪ್ರತಿಭಾ ಕಾರಂಜಿ ಸ್ಫರ್ಧೆಂತು ಕೊಂಕಣಿ ಭಾಷಣಾಂತು ಪಯಲೆ ಸ್ಥಾನ ಘೇವ್ನು ರಾಜ್ಯಮಟ್ಟಾಚೆ ಸ್ಫರ್ಧೆಕ ವಿಂಚೂನು ಆಯಲ್ಯಾ. ಹೀ ಎಸ್. ಆರ್. ಫ್ರೌಢ ಶಾಲೆ, ಬಿಳಗಿ(ಉ.ಕ.) ಹಾಂಗಾ ಎಸ್.ಎಸ್.ಎಲ್.ಸಿ. ವಿದ್ಯಾರ್ಥಿನಿ ಜಾವ್ನು ಶಿಕ್ತಾ ಆಸ್ಸ. ಆನಿ ಬಿಳಗಿ ಜಿ.ಎಸ್.ಬಿ. ಸಮಾಜಾಚೆ ಗೌರವ ಕಾರ್ಯದರ್ಶಿ ಜಾಲೇಲೆ ಶ್ರೀ ಶಾಂತಾರಾಮ ಎಚ್.ಪೈ ಆನಿ ಶ್ರೀಮತಿ ಶಾಂತೇರಿ ಎಸ್.ಪೈ ಹಾಂಗೇಲೆ ಧೂವ. ಮುಖಾವೈಲೆ ಸ್ಫರ್ಧೆಂತೂ ಹಿಕ್ಕಾ ಯಶ ಮೆಳೋ, ಆನಿ ಮುಖಾರಿ ಹಿಗೇಲೆ ನಿಮಿತ್ತ ಕೊಂಕಣಿ ಭಾಷೆಕ ಅಪಾರ ದೇಣಿಗಾ ಪಾವೊ, ಶಿಕ್ಪಣಾಂತು ಹಿಕ್ಕಾ ಚಾಂಗ ಯಶ ಮೆಳೋ ಮ್ಹೊಣು ಆಶಯ ಕರ್ತಾ, ಸರಸ್ವತಿ ಪ್ರಭಾ ತರಪೇನ ದೇವು ಬರೆಂ ಕೊರೊ ಮ್ಹಣತಾ.

ಮುಂಡಾಶಿ  ಸಮರ್ಥ ಪೈಕ ಅಭಿನಂದನ

ಸರಕಾರಿ ಸಂಯುಕ್ತ ಫ್ರೌಡಶಾಳಾ ವಳಕಾಡು ಹಾಂಗಾ ತಿನ್ನಿ ಕ್ಲಾಸಾಂತು ಶಿಕ್ತಾ ಆಶ್ಶಿಲೊ ಮುಂಡಾಶಿ ಸಮರ್ಥ ಪೈ ಹಾಣೆ ಶಾಳೆಚೆ ಸುವರ್ಣ ಮಹೋತ್ಸವಾಂತು ಚಲೇಲೆ ವಿವಿಧ ಸ್ಫರ್ಧೆಂತು ವಾಂಟೊ ಘೇವ್ನು ‘ಛದ್ಮವೇಷಾಂತು ಪ್ರಥಮ, ಸ್ಮರಣ ಶಕ್ತಿ ಆನಿ ಭಕ್ತಿಗೀತೆಂತು ದ್ವಿತೀಯ ಬಹುಮಾನ ಜಿಂಕ್ಲ್ಯಾ. ಹೋ ಮುಂಡಾಶಿ ಸುಧಾಕರ ಪೈ ಆನಿ ಮುಂಡಾಶಿ ಶ್ವೇತಾ ಸುಧಾ ಹಾಂಗೆಲೊ ಪೂತು. ಆನಿ ಅಲೆವೂರು ನರಸಿಂಹ ಕಿಣಿ ಹಾಂಗೆಲೆ ಭಜನಾ ಶಿಷ್ಯು. ಮುಂಡಾಶಿ ಶ್ವೇತಾ ಸುಧಾ ಹಾನ್ನಿ ಥೊಡೆ ವರ್ಷಾ ಪಯಲೆ “ಸರಸ್ವತಿ ಪ್ರಭಾಂತು “ಹೊಳೆಮಾ ಉವಾಚಾ ಮ್ಹಣಚೆ ಅಂಕಣ ಬರೈತಾಶ್ಶಿಲೆ ಹಾಂಗಾ ಉಡಗೋಸು ಕೋರ್ನು ಘೆವ್ಯೇತ. ಚಿ|| ಸಮರ್ಥಾಕ “ಸರಸ್ವತಿ ಪ್ರಭಾ ತರಪೇನ ದೇವು ಬರೆಂ ಕೊರೊಂ ಮ್ಹಣತಾ.