ವಿಶ್ವ ಕೊಂಕಣಿ ಕೇಂದ್ರ, ಮಂಗಳೂರು

ವಿಶ್ವ ಕೊಂಕಣಿ ವಿದ್ಯಾರ್ಥಿವೇತನ ನಿಧಿತಾಕುನ ಇಂಜಿನಿಯರಿಂಗ ಆನಿ ಮೆಡಿಕಲ್ (ಎಂ.ಬಿ.ಬಿ.ಎಸ್) ಉಚ್ಛ ಶಿಕ್ಷಣಾಚೆ ಆಕಾಂಕ್ಷಿಂಕ ಕೊಂಕಣಿ ಭಾಷಿಕ ಪ್ರತಿಭಾವಂತ ವಿದ್ಯಾರ್ಥಿಂಕ ವಿದ್ಯಾರ್ಥಿವೇತನ ದಿತ್ತಾ ಅಸಾ. ಹ್ಯಾ ನಿಮಿತ್ತಾನ ವಿಶ್ವ ಕೊಂಕಣಿ ಕೇಂದ್ರಾಚೆ ವಿದ್ಯಾರ್ಥಿ ವೇತನ ನಿಧಿ ತಾಕುನ ಸ್ಕಾಲರಶಿಪ್ ಘೆತ್ತಿಲ್ಯಾ ಇಂಜಿನಿಯರಿಂಗ್ ಆನಿ ಎಂ.ಬಿ.ಬಿ.ಎಸ್ ಅಧ್ಯಯನ ಕರಚೆ ವಿದ್ಯಾರ್ಥಿಂಕ ಕ್ಷಮತಾ ಶಿಬಿರ ೨೮-೧೨-೨೦೧೨ ತಾರ್ಕೆರ ಚಲ್ಲೆ.  ಮುಖೇಲ ಸೊಯ್ರೆ ಜಾವನ ಕೆನರಾ ಬ್ಯಾಂಕಾಚೆ ಡೆಪ್ಯುಟಿ ಜನರಲ್ ಮ್ಯಾನೇಜರ ಮಾನೆಸ್ತ ಎಮ್. ದಾಸಯ್ಯ ಹಾನ್ನಿ ವಿಶ್ವ ಕೊಂಕಣಿ ಕೇಂದ್ರಾಂತ ಉದ್ಘಾಟನ ಕೆಲ್ಲೆಂ.
ಕೊಂಕಣಿ ಸರದಾರ ಬಸ್ತಿ ವಾಮನ ಶೆಣೈಲೆ ಅಧ್ಯಕ್ಷತೆರಿ ಕಾರ್ಯಕ್ರಮ ಚಲ್ಲೆಂ. ವಿಶ್ವ ಕೊಂಕಣಿ ವಿದ್ಯಾರ್ಥಿವೇತನ ನಿಧಿಚೆ ಕಾರ್ಯದರ್ಶಿ ಮಾನೆಸ್ತ ಪ್ರದೀಪ ಜಿ. ಪೈ, ಕ್ಷಮತಾ ಚೆ ಸಂಚಾಲಕ ಮಾನೆಸ್ತ ಎಮ್. ಎನ್. ಪೈ ಆನಿ ವಿಶ್ವ ಕೊಂಕಣಿ ಕೇಂದ್ರಾಚೆ ಕಾರ್ಯದರ್ಶಿ ಮಾನೆಸ್ತ ವೆಂಕಟೇಶ ಎನ್. ಬಾಳಿಗಾ, ಮಾನೆಸ್ತ ಶ್ರೀ ಸಿ.ಡಿ. ಕಾಮತ, ಕೆನರಾ ಬ್ಯಾಂಕಾಚೆ ಅಸಿಸ್ಟಂಟ್ ಜನರಲ್ ಮ್ಯಾನೇಜರ ಮಾನೆಸ್ತ ಸತೀಶ ನಾಯಕ ಆನಿ ವಿಶ್ವ ಕೊಂಕಣಿ ಕೇಂದ್ರ ಭಾಷಾ ಸಂಸ್ಥಾನಾಚೆ ಸಹಾಯಕ ನಿರ್ದೇಶಕ ಮಾನೆಸ್ತ ಗುರುದತ್ತ ಬಂಟ್ವಾಳಕಾರ ಸಮಾರಂಭಾಂತ ಉಪಸ್ಥಿತ ಆಶಿಲಿಂಚಿ.
ಕುಡುಬಿ ಯುವಸಾಮರ್ಥ್ಯ ಸಂವರ್ಧನ
ವಿಶ್ವ ಕೊಂಕಣಿ ಕೇಂದ್ರಾಚೆ ವತೀನ ೨೨-೧೨-೨೦೧೨  ಕ ಕುಡುಬಿ ಜನಾಂಗಾಚೆ ಯುವ ಸಾಮರ್ಥ್ಯ ಸಂವರ್ಧನಾ ಶಿಬಿರ ಕೊಂಕಣಿ ಸರದಾರ ಬಸ್ತಿ ವಾಮನ ಶೆಣೈ ಹಾನ್ನಿ ವಿಶ್ವ ಕೊಂಕಣಿ ಕೇಂದ್ರಾಂತ ಉದ್ಘಾಟನ ಕೆಲ್ಲೆಂ.
ಕರ್ನಾಟಕ ರಾಜ್ಯ ಕುಡುಬಿ ಸಮಾಜ ಸೇವಾ ಸಂಘಾಚೆ ಅಧ್ಯಕ್ಷ ಮಾನೆಸ್ತ ಎಂ. ರಾಮೇಗೌಡ ಕಾರ್‍ಯದರ್ಶಿ ಮಾನೆಸ್ತ ನಾರಾಯಣ ನಾಯ್ಕ ಗೋಳಿಯಂಗಡಿ ಆನಿ ದಕ್ಷಿಣ ಕನ್ನಡ ಜಿಲ್ಲಾ ಕುಡುಬಿ ಸಮಾಜ ಸೇವಾ ಸಂಘಾಚೆ ಅದ್ಲೆ ಅಧ್ಯಕ್ಷ ಮಾನೆಸ್ತ  ಕೆ.ಎಸ್ ಗೌಡ ಹಾನ್ನಿ ಮುಖೇಲ ಸೊಯ್ರೆ ದಾವನ ಭಾಗಿ ಆಶಿಲಿಂಚಿ. ಮಾನೆಸ್ತ ಗುರುದತ್ತ ಬಂಟ್ವಾಳಕಾರ ಹಾನ್ನಿ ಸ್ವಾಗತ ಕರನ  ಕಾರ್‍ಯಕ್ರಮ ನಿರೂಪಣ ಕೆಲ್ಲೆಂ.                                                                 
೨೪-೧೨-೨೦೧೨ ತಾರ್ಕೆರ ಸಮಾರೋಪ ಸಮಾರಂಭ ಚಲ್ಲೆಂ. ಹ್ಯಾ ಶಿಬಿರ ಒಟ್ಟು ತೀನ ದೀಸ ಚಲ್ಲೆಂ. ವೇದಿಕೆರಿ ಕರ್ನಾಟಕ ರಾಜ್ಯ ಕುಡುಬಿ ಸಮಾಜ ಸಂಘದ ಕಾರ್ಯದರ್ಶಿ ಮಾನೆಸ್ತ ನಾರಾಯಣ ನಾಯ್ಕ, ಮಾನೆಸ್ತ ಎಂ ರಾಮೇಗೌಡ, ಉಡುಪಿ ಜಿಲ್ಲಾ ಕುಡುಬಿ ಶಿಕ್ಷಣ ನಿಧಿಚೆ ಅಧ್ಯಕ್ಷ ಎಚ್. ಬೆಳ್ಳ ನಾಯ್ಕ ಆನಿ ದಕ್ಷಿಣ ಕನ್ನಡ ಜಿಲ್ಲಾ ಸಮಾಜ ಸೇವಾ ಸಂಘಾಚೆ ಉಪಾಧ್ಯಕ್ಷ ಮಾನೆಸ್ತ ಕೆ.ಎಸ್. ಗೌಡ ಉಪಸ್ಥಿತ ಆಶಿಲಿಂಚಿ. ಉಡುಪಿ ಜಿಲ್ಲಾ ಕುಡುಬಿ ಸಮಾಜ ಸಂಘಾಚೆ ಉಪಾಧ್ಯಕ್ಷ ಸಿದ್ಧಾರ್ಥ ನಾಯ್ಕ ನರಿಕೊಡ್ಲು ಆನಿ ವಿಶ್ವ ಕೊಂಕಣಿ ಕೇಂದ್ರಚೆ ಭಾಷಾ ಸಂಸ್ಥಾನಾಚೆ ಸಹಾಯಕ ರ್ದೇಶಕ ಮಾನೆಸ್ತ ಗುರುದತ್ತ ಬಂಟ್ವಾಳಕಾರ ಹಾನ್ನಿ ವೇದಿಕೆರಿ ಉಪಸ್ಥಿತ ಆಶಿಲಿಂಚಿ.
ವಿಶ್ವ ಕೊಂಕಣಿ ಪ್ರಶಸ್ತಿ ಪ್ರಧಾನ ಆನಿ ಸನ್ಮಾನ
ಮಂಗ್ಳೂರಾಚೆ ವಿಶ್ವ ಕೊಂಕಣಿ ಕೇಂದ್ರಾಚೆ ವತೀನ ತಾ. ೧೨-೧೨-೨೦೧೨ ಮಂಗ್ಳೂರ ಟಿ. ವಿ. ರಮಣ ಪೈ ಕಾನ್ವೆನಷನ್ ಹಾಲಾಂತ ಚಲ್ಲೆಲಾ ಪ್ರಶಸ್ತಿ ಪ್ರದಾನ ಸಮಾರಂಭಾಂತು ವಿದ್ಯಾ ಕ್ಷೇತ್ರಾಂತ  ದೀರ್ಘಕಾಲ ಸೇವೆ ದಿಲ್ಲೆಲೆ ಮಾತೋಶ್ರೀ ವಿಮಲಾ ವಿ. ಪೈ ಆನಿ ೨೦೧೨ ವರ್ಷಾಚೆ ಅತ್ಯುತ್ತಮ ಕೊಂಕಣಿ ಪುಸ್ತಕ ರಂಗಕಾವ್ಯ ನಾಟಕ ಸಂಕಲನಾಕ ಸಾಹಿತಿ ಮಾನೆಸ್ತ ಪುಂಡಳೀಕ ಎನ. ನಾಯಕ ಆನಿ ಕೊಂಕಣಿ ಚಳವಳಿಚೆ ನೇತಾರ ಲೇಖಕ, ನಟ, ಕವಿ, ದಾರ್ಶಕ ನ್ಯಾಯವಾದಿ ಉದಯ ಎಲ್. ಭೆಂಬ್ರೆ ಹಾಂಕಾ ಸನ್ಮಾನ ಕೆಲೆಂ. 
ಶ್ರೀಮತಿ ವಿಮಲಾ ವಿ. ಪೈ, ಶ್ರೀ ಟಿ.ವಿ.ಮೋಹನದಾಸ ಪೈ ಮಣಿಪಾಲ ಬೆಂಗ್ಳೂರ ಸಂಸ್ಕೃತ ವಿಶ್ವ ವಿದ್ಯಾನಿಲಯಾಚೆ ಕುಲಪತಿ ಪ್ರೊ. ಮಲ್ಲೇಪುರಂ ಜಿ. ವೆಂಕಟೇಶ ಹಾನ್ನಿ ಸಮಾರಂಭಾಂತ ಮುಖೇಲ ಸೊಯ್ರೆ ದಾವನ ಭಾಗಿ ಆಶಿಲಿಂಚಿ. ಕೊಂಕ್ಣಿ ಸರದಾರ ಬಸ್ತಿ ವಾಮನ ಶೆಣೈ ಹಾನ್ನಿ ಆಯಿಲೆ ಸೊಯ್ರೆಂಕ ಆನಿ ಸಕಡ ಸಭಿಕಾಂಕ ಸ್ವಾಗತ ಕೆಲೆಂ.
ಮಾನೆಸ್ತ ಪುಂಡಲೀಕ ಎನ ನಾಯಕ ಹಾಂಕಾ ರಂಗ ಕಾವ್ಯ ನಾಟಕ ಸಂಕಲನಾಕ ಪ್ರೊ. ಮಲ್ಲೇಪುರಂ ಜಿ. ವೆಂಕಟೇಶ ಹಾನ್ನಿ ವಿಮಲಾ ವಿ. ಪೈ ವಿಶ್ವ ಕೊಂಕಣಿ ಸಾಹಿತ್ಯ ಪುರಸ್ಕಾರ ಪ್ರದಾನ ಕೆಲೆಂ.
ಕೊಂಕಣಿ ಫುಢಾರಿ, ಝುಜಾರಿ ಆನಿ ಲೇಖಕ ಉದಯ್ ಎಲ್. ಭೆಂಬ್ರೆ ಹಾಂಕಾ ಮುಖೇಲ ಸೊಯ್ರೆ  ಮಾನೆಸ್ತ ಟಿ.ವಿ. ಮೋಹನದಾಸ ಪೈ ಹಾನ್ನಿ ಜೀವಿತ ಸಿದ್ಧಿ ಸಮ್ಮಾನ ಪ್ರಶಸ್ತಿ ಪ್ರದಾನ ಕೆಲೆಂ. ಸಮಾರಂಭಾಚೆ ಅಧ್ಯಕ್ಷತಾ ಕೊಂಕಣಿ ಸರದಾರ ಬಸ್ತಿ ವಾಮನ ಶೆಣೈ ಹಾನ್ನಿ ಘೆತ್ತಿಲೆ.
ಶ್ರೀಮತಿ ವಿಮಲಾ ವಿ. ಪೈ ಹಾಂಕಾ ನಳಾಂದಾ ಆನಿ ಕೆನರಾ ಶಾಳಾ ವಿದ್ಯಾರ್ಥಿನ ಗೌರವ ದೀವ್ನು ಅಭಿನಂದನ ಕೆಲೆಂ. ವಿಶ್ವ ಕೊಂಕಣಿ ಕೇಂದ್ರಾಚೆ ಕಾರ್ಯದರ್ಶಿ ವೆಂಕಟೇಶ ಎನ್. ಬಾಳಿಗಾ ಹಾನ್ನಿ ಕಾರ್ಯಕ್ರಮ ನಿರ್ವಹಣ ಕೆಲೆಂ.  ಹೇಮಾ ನಾಯಕ, ಕಿಶೋರಿ ಭೆಂಬ್ರೆ, ಡಾ. ಗೀತಾ ಶೆಣೈ, ಗೀತಾ ಸಿ. ಕಿಣಿ,  ಮಾನೆಸ್ತ ಪ್ರದೀಪ ಜಿ. ಪೈ, ಕೆ. ಗೋಕುಲದಾಸ ಪ್ರಭು, ಮೆಲ್ವಿನ ರೊಡ್ರಿಗಸ, ಡಾ. ಕಸ್ತೂರಿ ಮೋಹನ ಪೈ, ಎಂ. ಆರ ಕಾಮತ,  ಗುರುಬಾಳಿಗಾ, ನರೇಶ ಆರ್ ಕಿಣಿ, ನಾರಾಯಣ ಕಾಮತ, ರಘುನಾಥ ಶೇಟ್ ಉಪಸ್ಥಿತ ಆಶಿಲಿಂಚಿ  ಮೀನಾಕ್ಷಿ ಪೈ ಹಾನ್ನಿ ವಂದನಾರ್ಪಣ ಕೆಲೆಂ.
ವಿಶ್ವಕೊಂಕಣಿ ಕೇಂದ್ರಾಚೆ ನಿಯೋಗ ದಾಕೂನು ಗೋವಾ ಮುಖ್ಯಮಂತ್ರಿ ಭೇಟಿ
ವಿಶ್ವ ಕೊಂಕಣಿ ಕೇಂದ್ರಾಚೆ ಏಕ ನಿಯೋಗ ಆಲ್ತಾಂತು ಗೋವಾಚೆ ಪಣಜಿಕ ವಚ್ಚೂನು ಗೋಂಯ್ಚೆ ಮುಖ್ಯಂತ್ರಿ ಮನೋಹರ್ ಪಾರಿಕರ್ ತಾಂಕಾ ಭೆಟ್ಟೂನು  ಮಂಗಳೂರಾಕ ಯವ್ಕಾ ಮ್ಹಣಚೆ ಆಮಂತ್ರಣ ದಿಲ್ಲೆ. ವಿಶ್ವ ಕೊಂಕಣಿ ಕೇಂದ್ರಾಚೆ ಟ್ರಸ್ಟಿ ಟಿ.ವಿ. ಮೋಹನದಾಸ ಪೈ, ಅಧ್ಯಕ್ಷ ಬಸ್ತಿ ವಾಮನ ಶೆಣೈ, ಆನ್ನೇಕ್ಳೋ ಟ್ರಸ್ಟಿ ಪ್ರದೀಪ್ ಜಿ.ಪೈ, ಸಹಾಯಕ ನಿರ್ದೇಶಕ ಗುರುದತ್ ಬಂಟ್ವಾಳಕರ್ ತಾನ್ನಿ ಹೇ ನಿಯೋಗಾಂತು ಆಶ್ಶಿಲೆ. ಮನೋಹರ್ ಪಾರಿಕರ್ ತಾನ್ನಿ ವಿಶ್ವ ಕೊಂಕಣಿ ಕೇಂದ್ರಾಚೆ ಕಾರ್ಯಚಟುವಟಿಕೆ ಖಾತ್ತಿರಿ ಸಂತೋಷ ವ್ಯಕ್ತ ಕೋರ್ನು ಸದ್ಯಾಂತು ಮಂಗಳೂರಾಕ ಭೇಟಿ ದಿವಚೆ ವಾಗ್ಧಾನ ಕೆಲ್ಲೆ.

ಶ್ರೀ ರಾಮಂದಿರ, ನಾಡ-ಗುಡ್ಡೆ‌ಅಂಗಡಿ
ಕುಂದಾಪುರ ತಾ||ಚೆ ನಾಡ ಗುಡ್ಡೆ‌ಅಂಗಡಿಚೆ ಶ್ರೀ ರಾಮಮಂದಿರಾಂತು ತಾಜ್ಜೆ ಮೂಲ ಸ್ಥಾಪನೇಚೆ ೪೪ಚೆ ವಾರ್ಷಿಕೋತ್ಸವು ತಾ. ೧೭-೧೨-೨೦೧೨ ಆನಿ ೧೮-೧೨-೨೦೧೨ ಅಶ್ಶಿ ದೋನಿ ದಿವಸು ವಿಂಗವಿಂಗಡ ಧಾರ್ಮಿಕ ತಥಾ ಸಾಂಸ್ಕೃತಿಕ ಕಾರ್ಯಕ್ರಮ ಬರಶಿ ಚಲೀಲೆ ಖಬ್ಬರ ಮೆಳ್ಳಾ. ೧೭-೧೨-೧‘೨ಕ ಗುರು ಗಣಪತಿ ಪೂಜನ ಆನಿ ಪ್ರಾರ್ಥನ, ಗಣಹೋಮು, ಪಂಚಾಮೃತಾಭಿಷೇಕ, ಶ್ರೀ ರಾಮ ಸಹಸ್ರ ನಾಮಾರ್ಚನೆ, ಫುಲ್ಲಾ ಅಲಂಕಾರ, ಮಹಾ ಪೂಜಾ, ಪ್ರಸಾದ ವಿತರಣ, ಪಾಲಂಖೀ ಉತ್ಸವಾಂತು ಪುರ ಮೆರವಣಿಗಾ, ವಿಶೇಷಾ ಭಜನಾ ಕಾರ್ಯಕ್ರಮ, ರಾತ್ರಿ ಪೂಜಾ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ವೇದಮೂರ್ತಿ ಶ್ರೀ ಜಿ. ವೇದವ್ಯಾಸ ಆಚಾರ್ಯ ಗಂಗೊಳ್ಳಿ ಹಾಂಗೇಲೆ ನೇತೃತ್ವಾರಿ ಚಲ್ಲೆ.
ಹೆರ್‍ದೀಸು ಸಾರ್ವಜನಿಕಾ ಖಾತ್ತಿರಿ ವಿಂಗವಿಂಗಡ ಸ್ಫರ್ಧಾ, ಆಹ್ವಾನಿಕ ಸ್ಕೂಲಾ ಚರ್ಡುಂವಾ ದಾಕೂನು “ಪ್ರತಿಭಾ ಕಾರಂಜಿ ಮ್ಹಣಚೆ ವೈವಿಧ್ಯಮಯ ಕಾರ್ಯಕ್ರಮು ಮಾಗಿರಿ ಸಾರ್ವಜನಿಕ ಸಮಾರಂಭ ಚಲ್ಲೆ. ಸಮಾರಂಭಾಚೆ ಅಧ್ಯಕ್ಷತಾ ಕೋಟ-ಸಾಲಿಗ್ರಾಮ ರೋಟರಿ ಅಧ್ಯಕ್ಷ ರೊ|| ನರಸಿಂಹ ಪ್ರಭು ತಾನ್ನಿ ಘೆತ್ತಿಲೆ. ಮುಖೇಲ ಸೊಯರೆ ಜಾವ್ನು ಸರ್ವಶ್ರೀ ಪ್ರವೀಣಕುಮಾರ ಶೆಟ್ಟಿ, ಶ್ರೀ ಶೇಖರ ಪೂಜಾರಿ, ನಾಡಾ ಶ್ರೀ ಪ್ರಸನ್ನ ಗಣಪತಿ ದೇವ್ಳಾಚೆ ಅಧ್ಯಕ್ಷ ಶ್ರೀ ಸತೀಶ ಶೇಟ್ ಆನಿ ಡಾ|| ಚಿಕ್ಕ್‌ಮರಿ ಆಯ್ಯಿಲೆ.  ಹೇ ಸಂದರ್ಭಾರಿ ಅಧ್ಯಕ್ಷ ಶ್ರೀ ಸತೀಶ್ ಎಂ. ನಾಯಕ್, ಕಾರ್ಯದರ್ಶಿ ಶ್ರೀ ಪ್ರಶಾಂತ ಪೈ ಆನಿ ಖಜಾಂಚಿ ಶ್ರೀ ನರಸಿಂಹಮೂರ್ತಿ ನಾಯಕ್ ಸಮೇತ ಅಪಾರ ಲೋಕ ಜಮಿಲೆ.
ಶ್ರೀ ಮಹಾಲಸಾ ಸಿದ್ದಿವಿನಾಯಕ ದೇವಳ, ಮಾದನಗೇರಿ
ಪ್ರತಿ ವರ್ಷಾ ಮ್ಹಣಕೆ ಮಾದನಗೇರಿ ಶ್ರೀ ಮಹಾಲಸಾ ಸಿದ್ಧಿವಿನಾಯಕ ದೇವಾಲೆ ಸನ್ನಿಧಿಂತು ಕಾರ್ತಿಕ ಮಾಸಾಚೆ ಸಂಕಷ್ಟಿ ಗಣಹವನ ತಾ. ೨-೧೨-೨೦೧೨ ದಿವಸು ಪ್ರಾರ್ಥನೆ, ಯಥೋಚಿತ ಪೂಜಾ, ಅಭಿಷೇಕ, ೧೦೮ ನಾರ್‍ಲಾಚೆ ಗಣಹವನ, ಪೂರ್ಣಾಹುತಿ, ಅನ್ನ ಸಂತರ್ಪಣ, ರಾತ್ತಿಕ ೧೦ ಗಂಟ್ಯಾಕ ದರ್ಶನ ಆನಿ ನಾರ್‍ಲಾ ಫಲ ಸಮರ್ಪಣ ಸೇವಾ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಬರಶಿ ಚಲೀಲೆ ಖಬ್ಬರ ಮೆಳ್ಳಾ. ಮಾದನಗೇರಿ ಶ್ರೀ ಮಹಾಲಸಾ ಸಿದ್ದಿವಿನಾಯಕ ದೇವಳಾಂತು ಧಾರ್ಮಿಕ ಕಾರ್ಯಕ್ರಮ ಆನಿ ಲಗ್ನ, ಮೂಂಜಿ ಕೊರಚಾಕ ಜಾವ್ಕಾ ಜಾಲೀಲೆ ಸುಸಜ್ಜಿತ ಕಲ್ಯಾಣಮಂಟಪ ಆನಿ ಭೋಜನಾಲಯ ಉಪಲಬ್ದ ಆಸ್ಸ.  ಅವುಂದೂ ವರ್ಷಾಚೆ ವರ್ಧಂತಿ ತಾ. ೩೧-೩-೨೦೧೩ ಕ ಚೊಲಚೆ ಆಸ್ಸ. ದೇವಳಾ ಖಾತ್ತಿರಿ ಖಂಚೇ  ಚಡ್ತೆ ಮಾಹಿತಿ ಜಾವ್ಕಾ ಜಾಲ್ಯಾರಿ ೦೮೩೮೬ ೨೭೯೮೦೪(ಘರ) ನಾಂವೆ ೨೭೯೩೪೦ (ಆಫೀಸ) ಹಾಂಗಾಕ ಸಂಪರ್ಕು ಕೊರಯೇತ.
ಉತ್ತರ ಕನ್ನಡ ಜಿಲ್ಲಾ ಕೊಂಕಣಿ ಪರಿಷತ್, ಶಿರಸಿ
ಶಿರ್ಶಿಚೆ ಉತ್ತರ ಕನ್ನಡ ಜಿಲ್ಲಾ ಕೊಂಕಣಿ ಪರಿಷತ್(ರಿ) ತರಪೇನ ಪುಸ್ತಕಾಂಚೆ ಉಗ್ತಾವಣ ಆನಿ ಸನ್ಮಾನ ಸಮಾರಂಭ ತಾ. ೧೫-೧೨-೨೦೧೨ ದಿವಸು ಶ್ರೀ ಕೇಶವೈನ್ ಸ್ಮಾರಕ ಸಭಾಭವನಾಂತು ಆಯೋಜಿತ ಕೆಲೀಲೆ. ಸಮಾರಂಭಾಚೆ ಅಧ್ಯಕ್ಷತಾ ನಾಮಾಂಕಿತ ಸಾಹಿತಿ ಶ್ರೀ ಆರ್.ಡಿ. ಹೆಗಡೆ, ಆಲ್ಮನೆ ತಾನ್ನಿ ಘೆತ್ತಿಲೆ. ಡಾ|| ವಿ.ಎಸ್.ಸೋಂದೆ ಮಾಮ್ಮಾಲೆ ‘ಅಂಕಣ ಲೇಖನಾಂಚೆ ಸಂಕಲನ ನೆನಪಿನ ಖಜಾನೆ ಮ್ಹಣಚೆ ಪುಸ್ತಕ ನಾಡೋಜ ಡಾ|| ಪಾಟೀಲ ಪುಟ್ಟಪ್ಪ ಹಾನ್ನಿ ಉಗ್ತಾವಣ ಕೆಲಯಾರಿ, ಶ್ರೀ ವಾಸುದೇವ ಶಾನುಭಾಗ ವಿರಚಿತ ಕೊಂಕಣಿ ಹಾಸ್ಯ ನಾಟ್ಕಾ ಗುಚ್ಛ “ಹಾಸ್ಯಾಂ- ಹಾಸೋವ್ಯಾಂ ಮ್ಹಣಚೆ ಪುಸ್ತಕ ಕೊಂಕಣಿ ಅಕಾಡೆಮಿ ಪ್ರಶಸ್ತಿ ವಿಜೇತ ಶ್ರೀ ಶಾ.ಮಂ. ಕೃಷ್ಣರಾಯ ತಾನ್ನಿ ಉಗ್ತಾವಣ ಕೆಲ್ಲೆ. ಸಮಾರಂಭಾಕ ಮುಖೇಲ ಸೊಯರೆ ಜಾವ್ನು ಮಧ್ಯಪಾನ ಸಂಯಮ ಮಂಡಳಿಚೆ ಅಧ್ಯಕ್ಷ ಶ್ರೀ ಸಚ್ಚಿದಾನಂದ ಹೆಗಡೆ, ಪತ್ರಕಾರ ಶ್ರೀ ಜಿ.ಯು.ಭಟ್, ಹೊನ್ನಾವರ ಹಾನ್ನಿ ಆಯ್ಯಿಲೆ. ಹೇಂಚಿ ವೇಳ್ಯಾರಿ ಡಾ|| ಪಾಟೀಲ ಪುಟ್ಟಪ ಆನಿ ೨೦೧೦-೧೧ ಸಾಲಾಚೆ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತ ಶ್ರೀ ಶಾ.ಮಂ. ಕೃಷ್ಣರಾಯ ತಾಂಕಾ ಪರಿಷದ್ ತರಪೇನ ಸನ್ಮಾನು ಚಲ್ಲೊ.
ನಿರ್ಮಾಲ್ಯ ಟ್ರಸ್ಟಾ ವತಿನ ಎನ್.ಬಿ.ಕಾಮತಾಂಕ ಸನ್ಮಾನು
“ಆಮ್ಕಾ ವಾಡ್ಡೊನು ಸುಸಂಸ್ಕೃತ ಜಾವ್ನು ಕೆಲ್ಲೆಲ್ಯಾ ಸಮಾಜಾಚೆ ಋಣ ಆಮ್ಮಿ ವಿವಿಧ ತರಾನಿ ಫಾರಿಗತ ಕೊರ್‍ಯೇತ. ೮೧ ವಯಾಚಾ ದ್ವಿಭಾಷಾ ಸಾಹಿತಿ ಮಾನ್ಯ ಎನ್.ಬಿ.ಕಾಮತ್ ಹಾನ್ನಿ ಹೆಂ ಕಾಮ ‘ಇಂಗ್ಲೀಷ್ ಸ್ಟಡಿ ಕ್ಲಬ್ ಮ್ಹಳ್ಳೆಲ್ಯಾ ನಾವಾರಿ ಕೊಲೇಜ ಆನಿ ಹೈಸ್ಕೂಲಾಚ್ಯಾ ವಿದ್ಯಾರ್ಥ್ಯಾಂಕ ಉಚಿತ ಆನಿ ನೀತಿಯುಕ್ತ ಇಂಗ್ಲೀಷ್ ವ್ಯಾಕರಣ ಶಿಕ್ಕೊಚೆ ನಿಜಾವ್ನು ಸರ್ವಾಂಕ ಆದರ್ಶನೀಯ ಮ್ಹೊಣು ಮುಂಬಯಿಚಾ ನಿರ್ಮಾಲ್ಯಾ ಚ್ಯಾರಿಟಿ ಟ್ರಸ್ಟಾ ಅಧ್ಯಕ್ಷ ಮಾನ್ಯ ಪಿ.ಎಸ್.ನಾಯಕ್ ಹಾನ್ನಿ ಅಭಿಪ್ರಾಯ ಪಾವ್ನು, ಎನ್.ಬಿ.ಕಾಮತ್ ದಂಪತೀಂಕ ಸನ್ಮಾನು ಕೆಲ್ಲೊ.
ಹೋ ಸಂಭ್ರಮಾ ಸಮಾರಂಭು ಎನ್.ಬಿ.ಕಾಮತ್ ಹಾಂಗೆಲೊ ಕಾಕರಮಠ ಸ್ವಗೃಹಾಂತು ‘ನುಡಿಜೇನು ಹಪ್ತಾಳ್ಯಚಾ ಸಂಪಾದಕ ಶ್ರೀ ಬಿ. ಹೊನ್ನಪ್ಪ ಹಾಂಗೆಲ್ಯಾ ಘನ ಅಧ್ಯಕ್ಷತೇರಿ ಚಲ್ಲೊ. ಶ್ರೀ ಹೊನ್ನಪ್ಪ ಹಾನ್ನಿ ಉಲೈತಾ “ಅತಿ ಕಠಿಣ ಜಾವ್ನು ಆಸ್ಚೆ ತಸ್ಸಾಲೆ ಇಂಗ್ಲೀಷ್ ವ್ಯಾಕರಣ ಉಚಿತ ಜಾವ್ನು ಅತೀ ಸುಲಭ ವಿಧಾರಿ ಕಸ್ಸಲೀ ಫಲಾಪೇಕ್ಷೆ ನಾಶಿ ಶಿಕ್ಕೊಚೆ ನಿಜಾವ್ನು ಶ್ಲಾಘನೀಯ. ಮ್ಹೊಣು ಸಾಂಗಲೆ. ಆನ್ನೇಕ ಸೊಯರೆ, ನಿವೃತ್ತ ಶಿಕ್ಷಣಾಧಿಕಾರಿ ಶ್ರೀ ಕಾಳಪ್ಪ ನಾಯಕ ಆನಿ ಎಚ್.ಆರ್.ನಾಯಕ ಹಾನ್ನಿ ಭಿ ಸಂದರ್ಭೋಚಿತ ಉಲ್ಲೈಲಿಂತಿ. ಶ್ರೀ ಜಿ.ಆರ್.ನಾಯಕ್ ಹಾನ್ನಿ ಎನ್.ಬಿ.ಕಾಮತ್ ವಿರಚಿತ ‘ಧನ್ಯ ಪಿ.ಎಸ್.ನಾಯಕ ಮ್ಹಳ್ಳೆಲೆ ಕವನ ಸುಶ್ರಾವ್ಯ ಜಾವ್ನು ಸಾಂಗ್ಲೆ. ತಶ್ಶಿಂಚಿ ಪಿ.ಎಸ್.ನಾಯಕ ಹಾನ್ನಿ ಎನ್.ಬಿ.ಕಾಮತ್ ಹಾಂಗೆಲ ಬದ್ದಲ ಬರೆಯಿಲೆ ಪದ ವಾಚನ ಕೋರ್ನು ಕಾಮತ ಶತಾಯಷಿ ಜಾವೊಂತಿ ಮ್ಹೊಣು ಹಾರೈಸಿಲೆ.
ಸುರವೇರಿ ಇಂಗ್ಲೀಷ್ ಸ್ಟಡಿ ಕ್ಲಬ್ಬಾಚೆ ವಿದ್ಯಾರ್ಥಿನ ಪ್ರಾರ್ಥನ ಕೆಲ್ಲಿ. ಎನ್.ಬಿ.ಕಾಮತ್ ತಾನ್ನಿ ಸ್ವಾಗತ ಕೆಲ್ಲೆ. ಶ್ರೀಧರ ಶೆಟ್ಟಿ ಸಂದೇಶ ವಾಚ್ಲೆ. ಇತರ ವಿದ್ಯಾರ್ಥಿನ ಸಂಸ್ಕೃತ, ಹಿಂದಿ, ಇಂಗ್ಲೀಷ, ಕನ್ನಡ ಗೀತಾ ಶ್ಲೋಕ ವಗೈರೆ ಸಾಂಗೂನು ಮನರಂಜನ ಕೆಲ್ಲ್ಲಿ. ಉಪನ್ಯಾಸಕ ಉಲ್ಲಾಸ ಹುದ್ದಾರ ಹಾನ್ನಿ ಕಾರ್ಯಕ್ರಮ ನಿರ್ವಹಣ ಕೆಲ್ಲೆ. ಶ್ರೀಮತಿ ಕುಮುದಾ ಹಾನ್ನಿ ವಂದನಾರ್ಪಣ ಕೆಲ್ಲಿ. ಕಡೇರಿ ವಿದ್ಯಾರ್ಥ್ಯಾಂಕ  ಪೆನ್ನ ಆನಿ ಸ್ವೀಟ್ಸ್ ವಾಂಟಿಲೆ.

Konkani News-1

ಚಿಕ್ಕಮಗಳೂರಾಂತು ದಾಸವಾಣಿ ದಶಮಾನೋತ್ಸವು

ಗೌಡ ಸಾರಸ್ವತ ಬ್ರಾಹಣ ಸಂಘ(ರಿ) ಚಿಕ್ಕಮಗಳೂರು ಹಾಜ್ಜೆ ಸಾಂಸ್ಕೃತಿಕ ಕಾರ್ಯಾವಳಿ ಪ್ರಕಾರ ಮಾಗಶಿಚೆ ೯ ವರ್ಷಾ ತಾಕೂನು ಚೊಲೋವ್ನು ಹಾಳ್ಳಿಲೆ ಖ್ಯಾತ ಗಾಯಕು ಶ್ರೀ ಪುತ್ತೂರು ನರಸಿಂಹ ನಾಯಕ್ ಹಾಂಗೆಲೆ ತೀನಿ ದಿವಸಾಚೆ ಕಾರ್ಯಕ್ರಮು “ದಾಸವಾಣಿ ಕಾರ್ಯಾಗಾರ “ಸುಗಮ ಸಂಗೀತ ಗಂಗಾ ಸಹಭಾಗಿತ್ವಾಂತು ಹ್ಹೆ ವರಸ ಡಿಸೆಂಬರ್ ೭, ೮ ಆನಿ ೯ ತಾರೀಕೆ ದಿವಸು ದಶಮಾನೋತ್ಸವಾಚೆ ಸಂಭ್ರಮಾಚರಣ ಜಿ.ಎಸ್.ಬಿ. ಸಮಾಜಾಚೆ ಶ್ರೀ ರಾಮದೇವ್ಳಾಂತು  ಭಾರಿ ವೈಭಾವಾಚೇರಿ ಸಂಪನ್ನ ಜಾಲ್ಲೆ. ಹ್ಹೆ ಕಾರ್ಯಕ್ರಮಾಚೆ ಉದ್ಘಾಟನಾ ಜಿ.ಎಸ್.ಬಿ. ಸಂಘಾಚೊ ಅಧ್ಯಕ್ಷ ಶ್ರೀ ಎಂ. ದೇವದಾಸ ಹೆಗ್ಡೆ ಆನಿ ಶ್ರೀ ಬಿ.ಎಸ್. ದಿನೇಶ ಪೈ ಹಾನ್ನಿ ದೀವ್ವೊ ಪೆಟ್ಟೊನು ಕೆಲ್ಲಿ. ಸಮಾರಂಭಾಚೆ ಅಧ್ಯಕ್ಷತಾ ಶ್ರೀ ಪರಶುರಾಮ ಜೋಶಿ ಆನಿ ಮುಖೇಲೆ ಸೊಯರೆ ಶ್ರೀ ಪುತ್ತೂರು ನರಸಿಂಹ ನಾಯಕ, ಶ್ರೀಮತಿ ಜ್ಯೋತಿ ಪ್ರಕಾಶ ಪೈ, ಶ್ರೀ ಬಾಲಕೃಷ್ಣ ಕಿಣಿ, ಶ್ರೀ ಎಸ್.ಎಸ್. ಪ್ರಸಾದ(ಮ್ಯಾಂಡೋಲಿನ್) ಬೆಂಗಳೂರು ಹಾನ್ನಿ ಉಪಸ್ಥಿತ ಆಶ್ಶಿಲಿಂತಿ. ತೀನ್ ದಿವಸು ಪರ್ಯಂತ ಹೇ ಕಾರ್ಯಾಗಾರ ಅಪಾರ  ಶಿಬಿರಾರ್ಥಿ ಲೋಕಾಂಲೆ ಉಪಸ್ಥಿತೀಂತು ಸಾಂಗ ಜಾವ್ನು ಚಲ್ಲೆ.
ಡಿಸೆಂಬರ್ ೯ ತಾರೀಖೆಕ ಚಲೇಲೆ ಸಮಾರೋಪ ಸಮಾರಂಭಾಚೆ ಅಧ್ಯಕ್ಷತಾ ಡಾ|| ಜೆ.ಪಿ.ಕೃಷ್ಣೇಗೌಡಾ ಆನಿ ಶ್ರೀಮತಿ ರೇಖಾ ಹುಲಿಯಪ್ಪ ಗೌಡ ಹಾನ್ನಿ ಘೆತ್ತಿಲೆ. ಮುಖೇಲ ಸೊಯರೆ ಜಾವ್ನು ಕರ್ನಾಟಕ ಸಕಾರಾಚೆ ಮಂತ್ರಿ ಶ್ರೀ ಸಿ.ಟಿ.ರವಿ, ಉಡುಪಿ ಶ್ರೀ ಹನುಮಾನ್ ಮೋಟಾರ್‍ಸ ಸಂಸ್ಥೆಚೆ ಮುಖ್ಯಸ್ಥು ಶ್ರೀ ವಿಲಾಸ್ ನಾಯಕ್, ಶ್ರೀ ಪಿ. ಸುರೇಶ ಮಲ್ಯ, ಪಿ.ಡಬ್ಲೂ.ಡಿ.ಚೊ ವಿ.ಇ.ಇ ಶ್ರೀ ನಾರಾಯಣ ಮಲ್ಯ, ಪ್ರದೀಪ ಪೈ ಆನಿ ಕನ್ನಡ ಆನಿ ಸಂಸ್ಕೃತಿ ಇಲಾಖೆಚೊ ನಿರ್ದೇಶಕು ಶ್ರೀ ಎಂ.ಎಸ್. ಚಂದ್ರಪ್ಪ ಹಾಂಗೆಲೆ ಉಪಸ್ಥಿತೀಂತು  ಚಲ್ಲೆ. ಶ್ರೀ ನರಸಿಂಹ ನಾಯಕ್ ಹಾಂಗೆಲೆ ಸುಶ್ರಾವ್ಯ ಭಕ್ತಿಗೀತಾ ಆನಿ ನವ್ಯಾ ಹೆಗ್ಡೆ, ಶ್ರೀಮತಿ ರಾಧಿಕಾ ನಾಯಕ್, ಆನಿ ಕು|| ಪ್ರಮಥ ಹಾಂಗೆಲೆ ನೃತ್ಯ ಪ್ರದರ್ಶನ ಸಮಾರಂಭಾಚೆ ಮುಖೇಲ ಆಕರ್ಷಣ ಜಾವ್ನಾಶ್ಶಿಲೆ. ಸಂಗೀತ ಗಂಗಾಚೊ ಕಾರ್ಯದರ್ಶಿ ಶ್ರೀ ಮಂಜುನಾಥ ಕಾಮತ್ ಹಾಂಗೆಲೆ ಸುಪರ್ದಿಂತು ಕರ್ನಾಟಕ ಕನ್ನಡ ಆನಿ ಸಂಸ್ಕೃತಿ ಇಲಾಖೆ ಮೂಖಾಂತರ ಹ್ಹೊ ದಶಮಾನೋತ್ಸವ ಕಾರ್ಯಕ್ರಮು ಜಿ.ಎಸ್.ಬಿ. ಆನಿ ಇತರ ಸಮಾಜಾಚೆ ಅಪಾರ ಲೋಕಾಂಗೆಲೆ ಉಪಸ್ಥಿತೀಂತು ಭವ್ಯ ಜಾವ್ನು ಸಂಪನ್ನ ಜಾಲ್ಲೆ.
ಶುಭ ವಿವಾಹ
ಕುಮಟಾ ಚಿತ್ರಿಗಿಚೆ ಸುರೇಖಾ ವಸಂತ ಭಂಡಾರಕರ್ ಹಾಂಗೆಲಿಂ ಧೂವ ಚಿ||ಸೌ|| ಗೀತಾಂಜಲಿ ಆನಿ ಸಿದ್ದಾಪೂರ್‍ಚೆ ಶ್ರೀಮತಿ ರಾಜಶ್ರೀ ರಮೇಶ ಬೇಂಗ್ರೆ ನಾಯಕ ಹಾಂಗೆಲೊ ಪೂತು ಚಿ|| ರಾಮಚಂz ಹಾಂಗೆಲೆ ಲಗ್ನ ತಾ. ೧೬-೧೨-೨೦೧೨ ದಿವಸು ಕುಮಟಾಚೆ ಶಾಂತೇರಿ ಕಾಮಾಕ್ಷಿ ದೇವಳಾಂತು ವಿಜೃಂಭಣೇನ ಚಲ್ಲೆ.
ಹೊನ್ನಾವರ್‍ಚೆ ಶ್ರೀಮತಿ ಜಯಶ್ರೀ ವಿಶ್ವನಾಥ ಪ್ರಭು ಹಾಂಗೆಲೊ ಪೂತು ಚಿ|| ಅನಿಲ ಆನಿ ಉಡುಪಿಚೆ ಶ್ರೀಮತಿ ಸಖು ಪುಂಡಲೀಕ ಕಾಮತ್ ಹಾಂಗೆಲಿ ಧೂವ ಚಿ||ಸೌ||  ಪ್ರಿಯಾ ಹಾಂಗೆಲೆ ಲಗ್ನ ತಾ. ೨೦-೧೨-೨೦೧೨ ದಿವಸು ಉಡುಪಾಚೆ ವರದೇಂದ್ರ ಕಲಾ ಮಂದಿರಾಂತು ವಿಜೃಂಭಣೇರಿ ಚಲ್ಲೆ. ವಧು- ವರಾಂಕ ಶುಭಾಶಯು.
ವರದಿ : ಶ್ರೀಮತಿ ಕಲಾವತಿ ಬಿ. ಕಾಮತ್, ಹುಬ್ಬಳ್ಳಿ

Saraswati Prabha Konkani

ಉಪನಿಷದಾಚೆ ಕಾಣಿ

ಅನಾದಿ ಕಾಲಾಂತು ಮ್ಹಳಯಾರಿ ಮಾಕ್ಕಾ ದಿಸ್ತಾ ಶ್ರೀಮದ್ ಭಾಗವತ ರಚನಾ ಜಾವ್ಚೆ ಪಶಿ ಪೂಡೆ  ಜಾಲೇಲೆ ವಿಷಯು. ಏಕ ವ್ಹೋಡ ಋಷಿ ಲೋಕಾಲೆ ಸಂತ ಸಮ್ಮೇಲನಾಂತುಲೆ ವಿಷಯು. ಹೆ  ಪೂರಾ ಮೇಳ್ನು ಜಗಾಚೆ, ಜೀವಿಲೆ ಬರೇಪಣಾ ಖಾತ್ತಿರಿ ಚರ್ಚೆ/ ಜಿಜ್ಞಾಸು ಕೋರ್ನು ಜಾತ್ತಾ. ತೆ ಮ್ಹಳ್ಯಾರಿ ಆಮಗೇಲೆ ಹಿಂದೂ ವ ಸನಾತನ ಧರ್ಮಾಂತು ಮುಖ್ಯ ಗ್ರಂಥ ಚಾರಿ ವೇದ. ತಾಂತು ಅಜಮಾಸ ಏಕ ಲಾಕ್ ಸ್ತೋತ್ರ ಆಸ್ಸ. ತಾಂತು ೮೦,೦೦೦ ಶ್ಲೋಕ  ಕರ್ಮಕಾಂಡಾ ವಿಷಯು ಆಸ್ಸ. ಆನಿ ೨೦,೦೦೦ ಶ್ಲೋಕ ಜ್ಞಾನ ಕಾಂಡಾಂತು ಆಸ್ಸ. ಜಾಲ್ಯಾರಿ ಪರಮಾತ್ಮಾಲೆ ವಿಷಯು ಖಂಚೇ ಶ್ಲೋಕ ನಾ. ಹಾಜ್ಜೇನ ಸಮ್ಮೇಲನಾಂತು ವಾಂಟೊ ಘೆತ್ತಿಲೆ ಋಷಿ ವ ಸಂತಾಂಕ ಭಾರೀ ದುಃಖ ಜಾತ್ತಾ. ಅಖಿಲಾಂಡ ಕೋಟಿ ಬ್ರಹ್ಮಾಂಡ ನಾಯಕ ಜಾಲೇಲೊ ಪರಮಾತ್ಮಾ ಖಾತ್ತಿರಿ ಏಕ್ಕಾ ಏಕ ಶ್ಲೋಕ ನಾ ಮೂ ಮ್ಹೊಣು. ಅಶೀ ಚರ್ಚಾ ಜಾತ್ತಾನಾ ಹೇ ನಿರಾಶ ಜಾಲೇಲೆ ಸಮಯಾಂತು ಶ್ವೇತಾಶ್ವರ ಮ್ಹಳೀಲೊ ಮುನಿ ಉಟೋನು ರಾಬ್ತಾ, ಆನಿ ಸಾಂಗ್ತ ಮ್ಹಳೇರಿ “ತುಮಕಾ ಪೂರಾ ಜನಾಂಕ ಹಾಂವ ಪರಮಾತ್ಮಾಕ ದಾಕಯತಾ. ಪರಮಾತ್ಮಾಕ ಹೇ ಪ್ರಾಪಂಚಿಕ ಚರ್ಮ ಚಕ್ಷು ಆನಿ ಪಂಚಭೂತ ನಿರ್ಮಿತ ದೋಳೆ, ಖಾನ ಇತ್ಯಾದಿನಿ ಪಳೋವಚಾಕ ಜಾಯನಾ. ಜಾಲ್ಯಾರಿ ಕೋಣ ಏಕ ಮನುಷು, ಏಕ ಗುರುಲೆ ಅನುಗ್ರಹ ಕೆಲಯಾರಿ, ಪರಮಾತ್ಮಾಕ ಪಳೋವಚಾಕ ಜಾತ್ತಾ. ಶ್ವೇತಾಶ್ವರ ಉಪನಿಷದಾಚೆ ೬ಚೆಂ ಅಧ್ಯಾಯು ೨೩ಚೆಂ ಶ್ಲೋಕಾಂತು ಸಾಂಗ್ತಾ "ಯಸ್ಯ ದೇವೇ ಪರಾ ಭಕ್ತಿರ್ಯಥಾ ದೇವೇ ತಥಾ ಗುರೌ.
ಹಾಜ್ಜೆ ಸಾರಾಂಶ ಮ್ಹಳೇರಿ ಖಂಚೊ ಮನುಷ್ಯು ಪರಮಾತ್ಮಾಕ ಕಶೀ ಆರಾಧನ ವ ಸೇವಾ ಕರತಕಿ, ತಿತ್ತುಲೇಚಿ ಸಮರ್ಪಣ ಭಾವಾಂತು ತಾಂತುಲೆ ಏಕ ತಿಲಾಂಶ ಸೈತ ಊಣೆ  ಜಾಯನಾಶಿ ಗುರು ಸೇವಾ ಕೋರ್ಕಾ. ತಸ್ಸಲೆ ಮನುಷ್ಯಾಕ ಗುರುಲೆ ಅನುಗ್ರಹ ಜಾವ್ನು ಪರಮಾತ್ಮಾಲೆ ದರ್ಶನ ಘಡತಾ. ಹಾಂತು ಖಂಚೇಯಿ ಸಂಶಯು ನಾ. ಪರಮಾತ್ಮಾಲೆ ಸಂತಾಲೆ ಭಜನೇಂತು ಒಟ್ಟೂ ದಿಲ್ಲಾ.  |ಗುರುವಿನ ಗುಲಾಮ ನಾಗುವ ತನಕ ದೊರೆಯಾದನ್ನ ಮುಕುತಿ|
ಗುರುಲೆ ಮಹತ್ವ ದಾಖೈಚೆ ಘಟನಾ ನಾಮದೇವಾನಿ ಸಾಂಗಿಲೆ ಆಸ್ಸ.  ಏಕ ಪಂತಾ ಗೋರ ಕುಂಬಾರಲೆ ಘರಾಂತು ಜ್ಞಾನದೇವ, ಸೋಪಾನ, ನಿವೃತ್ತಿ, ಮುಕ್ತಾಬಾಯಿ ಆನಿ ಇತರೆ ಭಕ್ತ ಉಪಸ್ಥಿತೀಂತು ನಾಮದೇವ ಎತ್ತಾ. ಜ್ಞಾನ ದೇವು ಸಾಂಗ್ತಾ ಗೋರಖಾಕ “ಹೇ ಗೋರಾ, ತುಕ್ಕಾ ಖಂಚೆ ಮಡಕೆ ಪಕ್ವ ಜಾಲ್ಯಾಲೆ ಕಿ ಯಾ ನಾ. ಮ್ಹೊಣು ಕಳ್ತಾ. ಏಕಾ ರಾಕಡಾಚೆ ವಸ್ತುನಿ ಮಾರ್ನು, ತಶೀಂಚಿ ಆಮಗೇಲೆ ಮಾತ್ತೆ ಮ್ಹಳೇಲೆ ಮಡಕೆ ಮಾರ್ನು ಸಾಂಗ ಖಂಚೆ ಮಡಕೆ (ಮಾತ್ತೆ) ಪಕ್ವ ಜಾಲ್ಯಾಕಿ ವ ನಾ ಮ್ಹೊಣು. ಗೋರ ಕುಂಬಾರ ಜ್ಞಾನದೇವಾನಿ ಸಾಂಗಿಲೆ ಮ್ಹಣಕೆ, ಏಕೇಕಾಚಿ ಸಂತಾಲೆ ಮಾತ್ತೆರಿ ಮಾರ್ನು ಪಳೆಯ್ತಾ ಆನಿ ಸಾಂಗ್ತಾ  ಪೂರಾ ಪಕ್ವ ಜಾಲ್ಯಾ ಮ್ಹೊಣು ಆನಿ ತಶ್ಶೀ ನಾಮದೇವಾಲೆ ಮಾತ್ತೆ ಪರೀಕ್ಷಾ ಕೊರುಂಕ ವತ್ತಾ. ತೆದ್ನಾ ನಾಮದೇವ ಗೋರಾಕ ಸಾಂಗ್ತಾ, “ರಾಭರೇ ಗೋರಾ, ಕಸ್ಸಲೆ ಮ್ಹೊಣು ತೂಂ ಮೆಗೇಲೆ ಪರೀಕ್ಷಾ ಕರ್ತಾ. ಮಾಕ್ಕಾ ಪ್ರತಿ ದಿವಸ, ಪರಮಾತ್ಮು ವಿಠ್ಠಲು ದರ್ಶನ ದಾಕೈತಾ. ಮಾಕ್ಕಾ ಪರೀಕ್ಷಾ ಕರೂ ನಾಕ್ಕಾ. ಮ್ಹಣ್ತಾ. ತೆದ್ನಾ ಗೋರ ಕುಂಬಾರ ಸಾಂಗ್ತಾ “ಮ್ಹಳ್ಯಾರಿ ನಾಮದೇವ ಅಪಕ್ವ ಮ್ಹಣ್ತಾ. ನಾಮದೇವ ಭೋಜನ ಕರನಾಶಿ, ಸೀದಾ ವಿಠ್ಠಲಾಲೆ ದರ್ಶನಾಕ ವಚ್ಚುನು ವಿಠ್ಠಲಾಲೆ ರಡತಾ. ಜಾಲ್ಯಾರಿ ದೇವು ಸಾಂಗ್ತಾ ನಾಮದೇವಾಕ, “ಪರಮಾತ್ಮಾಲಿ ಜ್ಞಾನಯುಕ್ತ ಭಕ್ತಿ ಜಾವ್ಕಾ ಜಾಲ್ಯಾರಿ ಗುರೂಲೆ ದಾಕೂನು ಅನುಗ್ರಹಿತ ಜಾವ್ಕಾ. ಹೇ ವಿಷಯು ಜಗಜ್ಜಾಹೀರ ಆಸ್ಸ. ಮ್ಹೊಣು. ನಾಮದೇವು ಸೂಕ್ತ ಗುರೂಕ ಸೊದ್ದುನು ಬಾಯರ ಸರ್ತಾ. ಘೂವ್ನು ಘೂವ್ನು ಕಡೇರಿ  ಏಕ ದೇವಳಾಕ ವತ್ತಾ. ಥಂಯಿ ಶಿವಲಿಂಗ ವಯ್ರಿ ಆಪಣಾಲೆ ಪಾಯು ದವರೂನು ಘೇವ್ನು ಯೋಗ ನಿದ್ದೆಂತು ಆಶ್ಶಿಲೆ ಏಕಳೋ ಮಾಂತಾರೇಕ ಪಳೈತಾ. ಕೋಪ್ಪುನು ತಾಕ್ಕಾ ಸೊವ್ತಾ.  ತೆದ್ದನಾ ತೊಂ ಮಾಂತಾರೊ “ಆಪ್ಪಣಾಕ ನಿಶ್ಶಕ್ತಿನ ಪಾಯು ಉಬ್ಬರೂನು ದವರಚಾಕ ಜಾತ್ತಾ ನಾ. ತೂಂಚಿ ಮೆಗೇಲೆ ಪಾಯು ಉಬ್ಬರೂನು ಶಿವಲಿಂಗ ನಾಶ್ಶಿಲೆ ಕಡೇನ ದವರಿ ಮ್ಹಣತಾ. ತೆದ್ದನಾ ನಾಮದೇವು ತ್ಯಾ ಮಾಂತರ್‍ಯಾಲೆ ಪಾಯು ಉಬ್ಬೋರ್ನು ದುಸ್ರೆ ಕಡೇನ ದವರಚಾಕ ವತ್ತಾ. ಜಾಲ್ಯಾರಿ ತಾಕ್ಕಾ ಥಂಯಿ ಏಕ ಶಿವಲಿಂಗ ದಿಸ್ತಾ. ತಾಣೆ ಖಂಯಿ ಪಾಯು ದವರಚಾಕ ಘೆಲ್ಯಾರಿಚಿ ತಾಕ್ಕಾ ಥಂಯಿ ಏಕ್ಕೇಕ ಶಿವಲಿಂಗ ದಿಸ್ತಾ. ತೆದ್ದನಾ ನಾಮದೇವಾಕ ಜ್ಞಾನೋದಯ ಜಾತ್ತಾ. "ಅಯ್ಯೋ ಮೆಗೇಲೆ ಅಜ್ಞಾನ ನ್ಹಂಹಿವೇ? ಶಿವಾನ ನಾಶ್ಶೀಲೆ ಜಾಗೋ ಆಸ್ಸವೇ? ಮ್ಹಣತಾ ತ್ಯಾ ಗುರೂಲೆ ಪಾಯು ಉಬ್ಬೋರ್ನು ಆಪಣಾಲೆ ಮಾತ್ತೆರಿ ದವರೂನು ಘೆತ್ತಾ. ತಾಗೇಲೆ ದಾಕೂನು ಉಪದೇಶ ಘೆತ್ತಾ. ಆನಿ ತಾಕ್ಕಾ ದಿಸ್ತಾ ಆಪಣಾಲೆ ವಿಠ್ಠಲು ವರೇಕ ಸರ್ವ ಬಗಲೇನ ಆಸ್ಸ ಮ್ಹೊಣು. ಗುರು ರೂಪಾರಿ ಆಶ್ಶಿಲೆ ದೇವು ಕೃಷ್ಣಾಕ ಭಕ್ತಿಪೂರ್ವಕ ನಮನ ಕೋರ್‍ಯಾ.
||ಕೃಷ್ಣಂ ವಂದೇ ಜಗದ್ಗುರುಂ||
- ಕೆ. ಜನಾರ್ಧನ ಭಟ್, ಮೈಸೂರು.

ಸಮಾಜಾಂತುಲೆ ಅಜ್ಞಾತ ಆದರ್ಶವಾದಿ ಕೆ. ಭರತ ರಾವ್

ಆಮ್ಗೆಲೆ ದೇಶಾಂತು ವಿಜ್ಞಾನ, ಲಲಿತಕಲಾ, ಕ್ರೀಡಾ, ಸಮಾಜ ಸೇವಾ ಆದಿ ಕ್ಷೇತ್ರಾಂತು ನಾಂವ ಪಾವ್ನು ಸನ್ಮಾನ, ಪುರಸ್ಕಾರ ಘೆತ್ತಿಲೆ ಸಬಾರ ಲೋಕ ಆಸ್ಸತಿ. ತಶೀಂಚಿ ಸರಳ ಆನಿ ಸಾತ್ವಿಕ ನಮೂನ್ಯಾರಿ, ಆದರ್ಶ ಸೋಣಾತ್ತಿಲೆ ಜನೋಪಯೋಗಿ ಜಾವ್ನು ಜೀವನ ಕೊರ್‍ಚೆ ಅಜ್ಞಾತ ಕರ್ಮಯೋಗಿ ಅನೇಕ ಆಸ್ಸತಿ. ಹೆ ದೊನ್ನಿಚೆ ವರ್ಗಾಚೆ ಜನಾಂಕ ಪ್ರಸಿದ್ಧಿ, ಪುರಸ್ಕಾರಾಚೆ ಆಸಕ್ತಿ ನಾತ್ತಿಲೆ ತಾಂಗೆಲೆ ಜೀವನ ವಿಧಾನ$ಚಿ ದುಸರ್‍ಯಾಂಕ ಚಾ$ಂಗ ಮಾದರಿ ಜಾವ್ನಾಸ್ತಾ. ತಸ್ಸಲ್ಯಾಂತು ಏಕ ಉದಾಹರಣ ಶಿವಮೊಗ್ಗ ಜಿಲ್ಲ್ಯಾಚೆ ಸಾಗರ ಗಾಂವ್ಚೆ ವಾಸಿ, ಕೆ. ಭರತ ರಾವ್.
ಸಾಗರ ಆನಿ ಆಸ್ಪಾಸಾಚೆ ಖೇಡೆ ಲೋಕಾಂಕ ಭರತರಾವ್ ಮ್ಹಳ್ಯಾರಿ ಅಪಾರ ಗೌರವ ಆನಿ ಮ್ಹೋಗು. ‘ರೆಡಿಯೊ ಆನಿ ‘ಸೈಕಲ್ ಭರತರಾವಾಂಗೆಲೆ ನಿಕಟವರ್ತಿ ಸಂಗಾತಿ ಮ್ಹೊಣು ತಾನ್ನಿ ಸಾಂಗತಾತಿ. ತಾಕ್ಕಾ ಸ್ವಾರಸ್ಯಾಚೆ ಇತಿಹಾಸಾಯಿ ಆಸ್ಸ.
ಸುಮಾರ ಸಾಠಿ ವರ್ಸಾ ಪೂಡೆ (೧೯೫೨) ಮುಂಬೈಂತು ತೀನಿ ವರ್ಷಾಚೆ ‘ರೇಡಿಯೋ ಮೆಕ್ಯಾನಿಕ್ ಶಿಕ್ಷಣ ಘೇವ್ನು ಭರತರಾವಾನಿ ಸಾಗರಾಚೆ ಜೆ.ಸಿ. ರಸ್ತೇರಿ “ಭಾರತ್ ರೇಡಿಯೊ ಹೌಸ್ ನಾಂವಾಚೆ ಫಲಕ ಘಾಲ್ನು ಏಕ ರೇಡಿಯೊ ರಿಪೇರಿಚೆ ದುಕಾನ ಸುರುವಾತ ಕೆಲ್ಲೆ. ತೆಂ ವೇಳಾರಿ ಆಶ್ಶಿಲೆ ಬುಶ್, ಮರ್ಫಿ, ಫಿಲಪ್ಸ್, ನಾಶನಲ್ ಎಕ್ಖೊ, ಫರ್ಗ್ಯುಸನ್, ನೆಲ್ಕೊ ಇತ್ಯಾದಿ ರೇಡಿಯೊ ಅಲ್ಪ ಖರ್ಚಾರಿ ರಿಪೇರಿ ಕೋರ್ನು ದಿವಚೆ ಪರಿಣೀತ ಮ್ಹೊಣು ತಾನ್ನಿ ನಾಂವ ಪಾವ್ಲಿಂ. ತಶೀಂಚಿ ಸಾಗರ ಗ್ರಾಮ ಆನಿ ಆಸ್ಪಾಸಾಚೆ ಹಳ್ಳಿಂಕ ಭೇಟಿ ದಿವಚಾಕ ತಾನ್ನಿ ಸೈಕಲ್ ವಾಪರ್‍ತಾ ಆಶ್ಶಿಲಿಂ. ಅಶ್ಶಿ ರೇಡಿಯೊ ಆನಿ ಸೈಕಲ್ ಹಾಂಗೆಲೆ ವ್ಯಕ್ತಿತ್ವ ಆನಿ ಗುರ್‍ತಾಚೆ ಲಾಂಛನ ಜಾಲ್ಲೆಂ!
ಸಾಠ ವರ್ಷಾ ಪೂಡೆ ರೇಡಿಯೊ ಆನಿ ಸೈಕಲ್ ಅತೀ ಉಪಯೋಗಿ ಆನಿ ಅನಿವಾರ್ಯ ವಸ್ತು ಜಾವ್ನಾಶ್ಶಿಲೆಂ. ಆಯಚೆ ದಿವಸಾಂತು ತಂತ್ರಜ್ಞಾನ ವಿಪರೀತ ವಾಡ್ಡುನು ಟಿ.ವಿ. ಕಂಪ್ಯೂಟರ್, ಸ್ಕೂಟರ್, ಮೋಟರ್ ಸೈಕಲ್, ಕಾರ್ ಎವ್ನು ರೇಡಿಯೊ ಆನಿ ಸೈಕಲ್ಲಾಚೆ ಉಪಯೋಗ ನೇಪಥ್ಯಾಕ ಘೆಲ್ಲಾ. ಜಾಲ್ಯಾರಿ ಆಶ್ಚಯಾಚೆ ವಿಷಯು ಮ್ಹಳಯಾರಿ ಭರತ್ ರಾವಾನಿ ಆಜಿಕಂಯಿ ಹೇ ದೋನ ವಸ್ತು ಸೋಣಿ. ೨೨ ವರ್ಸ ಪ್ರಾಯೇರಿ ಪ್ರಾರಂಭ ಕೆಲ್ಲೆಲೆ “ರೇಡಿಯೋ ರಿಪೇರಿ ಆನಿ ಸೈಕಲ್ ಸವಾರಿ ೮೨ ವರ್ಷಾ ಪ್ರಾಯೇಚೆ ‘ಯುವಕಾರ ಭರತರಾವಾನಿ ಆತ್ತಂಯಿ ಮುಖಾರ್ಸುನು ಹಾಣು ಚಾಲೂ ದವರ್ಲಾ. ತಾಂಗೆಲೆ ಸೈಕಲ್ ಸವಾರಿ ನಿಮಿತ್ತ ಗಾಂವ್ಚೆ ಮಖ್ಯಸ್ಥಾನಿ ತಾಂಕಾ “ಪರಿಸರ ಪ್ರೇಮಿ ಮ್ಹೊಣು ನಾಂವ ದಿಲ್ಲಾ.
ಭರತರಾವಾಲೆ ಜನಪ್ರಿಯತೆಕ ಆನ್ನೇಕ ಕಾರಣ ತಾಂಗೆಲೆ ಪ್ರಚಾರ ನಾತ್ತಿಲೆಂ ಸಮಾಜ ಸೇವಾ. ಸಾಗರಾಂತು ಭಗವಾನ್ ಶ್ರೀ ಸತ್ಯಸಾಯಿ ಸೇವಾ ಸಮಿತಿಚೆ ಪ್ರಮುಖ ಸದಸ್ಯ ಜಾವ್ನು ಸಮಾಜ ಸೇವಾ ಕರ್ತಾಚಿ. ಹೆ ಸಮಿತಿನ ‘ಹೊಸಕೇರಿ ನಾಂವಾಚೆ ಅಭಿವೃದ್ಧಿ ನಾತ್ತಿಲೆ ಹಳ್ಳಿಕ ದತ್ತ ಘೇವ್ನು ಅನೇಕ ನಮೂನ್ಯಾಚೆ ಸುಧಾರಣ ಕೆಲ್ಲೆಲ್ಯಾಂತು ಭರತರಾವಾಲೆಂ ಮುಖ್ಯ ವಾಂಟೊ ಆಸ್ಸ. ಡಾಕ್ಟರ ದಂಪತಿ; ಶ್ರೀ ಆನಿ ಶ್ರೀಮತಿ ರಾಮಚಂದ್ರ ಭಾಗವತಾಂಗೆಲೆ ಒಟ್ಟು ವಚ್ಚುನು ಹಾನ್ನಿ ಹಳ್ಳಿಚೆ ಜನಾಂಕ ಧರ್ಮಾರ್ಥ ವೈದ್ಯಕೀಯ ಚಿಕಿತ್ಸೆಚೆ ಸುವಿಧಾ ದಿತ್ತಾಚಿ. ಭರತರಾವಾಲೆ ಬಾಪ್ಪುಸು ಡಾಕ್ಟರ ವಾಸುದೇವ ರಾವ್ ಕಾಪು ಕಾಮತ್ ಕುಟುಂಬಾಚೆ ಆಸ್ಸುನು, ಸಾಗರ್‍ಚೆ ಲೋಕಾಂಕ ಸುಮಾರ ಅರ್ಧ ಶವಮಾನಾಪಶಿ ಚ್ಹಡ ಕಾಲ ನಿಸ್ವಾರ್ಥ ಜಾವ್ನು ವೈದ್ಯಕೀಯ ಸೇವಾ ದಿಲೇಲೆ ಮಹನೀಯ.  ತಶ್ಶಿ ಜಾವ್ನು ದೀನ ಜನಾಲೆ ಆರೋಗ್ಯಾಚೆ ಕಾಳಜಿ ಕೊರ್‍ಚೆ ಕ್ರಿಯಾಶೀಲತೆ ಭರತರಾವಾಂತು ರಕ್ತಗತ ಜಾವ್ನಾಸ್ಸ.
ಆನಿ ಏಕ ವಿಶೇಷ ಮ್ಹಳ್ಯಾರಿ ಸಾಗರಾಂತು ಆಠ್ವಡೇಕ ಏಕ್ಪಂತಾ ಲೋಕಾಂಕ ಮೆಳೋವನು ಭಜನಾ ಕಾರ್ಯಕ್ರಮ ಚಲೋವ್ಚೆ. ಭರತ್‌ರಾವಾನಿ ಸ್ವಪ್ರಯತ್ನಾನಿ ರಾಗ, ತಾಳ, ಶ್ರುತಿ ಅಧ್ಯಯನ ಕೋರ್ನು ಸುಶ್ರಾವ್ಯ ನಮೂನ್ಯಾರಿ ಭಕ್ತಿ ಸಂಗೀತ ಮ್ಹೊಣ್ಚೆ ಅಭ್ಯಾಸ ಕೆಲ್ಲಾ. ಹಾಂಗೇಲೆ ಭಾರ್‍ಯೆ(ಬಾಯ್ಲ) ಪ್ರೇಮಾ ಸಂಗೀತ ಶಿಕ್ಲೆ. ಹೆಂ ದಂಪತಿನ ಒಟ್ಟು ಮೇಳ್ನು ಭಕ್ತಿ ಸಂಗೀತ ಮ್ಹೊಣ್ಚೆ, ಸಾಗರ್‍ಚೆ ಲೋಕಾಂಕ ಏಕ ಸಂಭ್ರಮಾ ವಿಷಯು. ಉಮೇದ ಆಶ್ಶಿಲ್ಯಾಂಕ ಭರತರಾವ್ ತಾಂಗೆಲೆ ಹೆಂ ಕರಗತ ಕಲೆಚೆ ಶಿಕ್ಷಣ ಪುಕ್ಕಟ ಜಾವ್ನು ದಿತ್ತಾತಿ.
ಆರ್ತಾಂಚಿ ಸ್ಥಾನೀಯ ಪತ್ರಾಚೆ “ಹುರಿಗಾಳಾಂತು ಭರತರಾವಾಲೆ ಅಭಿಮಾನಿ, ಮುಸ್ಲಿಂ ಲತೀಫ್ ಮ್ಹಳ್ಳೆಲೆ ಪತ್ರಕಾರಾನ ಬರೆಯಿಲೆ ಅಶ್ಶಿ ಆಸ್ಸ; “ಇವರ ಆದರ್ಶತನಕ್ಕೆ ಕೆಲವು ಕಡೆಯಿಂದ ಸನ್ಮಾನ, ಪುರಸ್ಕಾರಗಳು ಸಿಕ್ಕಿವೆ. ಶ್ರೀ ಸತ್ಯಸಾಯಿ ದೇವಸ್ಥಾನದ ವತಿಯಿಂದ ಹಾಗೂ ಶ್ರೀ ವೆಂಕಟರಮಣ ದೇವಸ್ಥಾನದ ವತಿಯಿಂದ ಸನ್ಮಾನ ಮಾಡಿ ಅಭಿನಂದಿಸಿದ ದಾಖಲೆಗಳು ಇವೆ. ಆದರೆ ಇತರ ಸಂಘ, ಸಂಸ್ಥೆಗಳು ಹಾಗೂ ಸರಕಾರ ಇಂತಹ ಆದರ್ಶ ವ್ಯಕ್ತಿಯನ್ನು ಗುರುತಿಸಿ ಪ್ರೋತ್ಸಾಹಿಸದೇ ಇರುವುದು ಸಾಗರದ ಜನತೆಯ ದೌರ್ಭಾಗ್ಯವೇ ಸರಿ. ಇವರ ಉದಾರಿತನ ಮತ್ತು ಆದರ್ಶ ಹೀಗೆ ನಿರಂತರವಾಗಿ ನಡೆದು ಇಂದಿನ ಯುವಜನತೆಗೆ ಮಾರ್ಗದರ್ಶಿಯಾಗಲಿ ಎಂದು ನಮ್ಮೆಲ್ಲರ ಆಶಯ.
ಸಾಮಾನ್ಯಾಂತು ಅಸಾಮಾನ್ಯ ಜಾವ್ನಾಸ್ಸುಚೆ ಭರತರಾವ್ ದೀರ್ಘಾಯುಶ್ಯಿ ಜಾವ್ನು, ತಾಂಗೆಲೆ ಧ್ಯೇಯ ಸಾಧನೆ ಪರಿಪೂರ್ಣ ಜಾವ್ವೊ ಮ್ಹೊಣು ಆಮ್ಮಿ ಮಾಗ್ಗುಯಾಂ.
- ಕಾ. ಮೋ.ಶೆಣೈ, ಬೆಂಗ್ಳೂರ

ಡಾ|| ಟಿ.ಎಂ.ಎ.ಪೈ ಆತ್ಯುತ್ತಮ ಕೊಂಕಣಿ ಪುಸ್ತಕ ಪುರಸ್ಕಾರು ೨೦೧೧

ಮಣಿಪಾಲಾಚೆ ಡಾ|| ಟಿ.ಎಂ.ಎ.ಪೈ ಫೌಂಡೇಶನಾನ  ಪ್ರತಿ ವರಸ ದಿವ್ಚೊ ಡಾ|| ಟಿ.ಎಂ.ಎ.ಪೈ ಅತ್ಯುತ್ತಮ ಪುಸ್ತಕ ಪುರಸ್ಕಾರಾ ಖಾತ್ತಿರಿ ಮುಂಬೈಚೆ ಶ್ರೀಮತಿ ನಂದಿನಿ ಕಾಮತಾನ ಮಳಯಾಳಂ ಲಿಪಿರಿ ಬರೆಯಿಲೆಂ “ಅಯೋಧ್ಯಾ ಮ್ಹಳ್ಳೆಲೆಂ ಕೊಂಕಣಿ ಕಾದಂಬರಿ ಪುಸ್ತಕ ಆನಿ ಗೋವಾ ಮಾಪ್ಸಾಚ್ಯಾ ಶ್ರೀಮತಿ ನೂತನ ಸಾಖರದಾಂಡೆನ ಬರೆಯಿಲೆಂ ದೇವನಾಗರಿ ಲಿಪಿಚೆ “ಪಾಸವರ್ಡ್ ಕೊಂಕಣಿ ಕವಿತಾ ಸಂಗ್ರಹ ೨೦೧೧ ವರಸಾಚ್ಯಾ ಪುರಸ್ಕಾರಾಕ ವೆಂಚೂಣೂಕ ಜಾಲ್ಲಾಂ. ಸದ್ಯಾಕ ಮಣಿಪಾಲಾಂತು ವ್ಯವಸ್ಥಿತ ಜಾವ್ಚೆ ಸಮಾರಂಭಾಂತು ಪುರಸ್ಕಾರ ಪ್ರಧಾನ ಚಲತಾ.

ಶ್ರೀ ಹಳೇ ಮಾರಿಯಮ್ಮ ದೇವಳ, ಕಾಪು

ಕೊಂಕಣಿ ಮಠ ಶ್ರೀ ವೆಂಕಟರಮಣ  ಶ್ರೀ ಹಳೇ ಮಾರಿಯಮ್ಮ ದೇವಳ, ಕಾಪು ಹಾಂಗಾ ಮಾರ್ಗಶಿರ ಮಾಸಾಂತು ಚಲೇಲೆ ಕಾರ್ಯಕ್ರಮು. ಶ್ರೀಮದ್ ಭುವನೇಂದ್ರ ತೀರ್ಥ ಸ್ವಾಮಿ ಪುಣ್ಯತಿಥಿ, ರಾತ್ರಿ ಉತ್ಸವು(೧೪-೧೨-೨೦೧೨), ಷಷ್ಟಿ, ನಾಗದೇವಾಕ ಪಂಚಾಮೃತಾಭಿಷೇಕ, ಮಹಾ ಸಮಾರಾಧನ, ರಾತ್ರಿ ಉತ್ಸವು(೧೮-೧೨-೨೦೧೨), ಧನುರ್ವ್ಯತೀಪಾತಃ ಕಿಚಡಿ ನೈವೇದ್ಯ(೨೦-೧೨-೨೦೧೨), ದಶಮಿ ಉತ್ಸವು(೨೨-೧೨-೨೦೧೨), ಏಕಾದಶಿ ಭಜನ(೨೩-೧೨-೨೦೧೨), ಮುಕ್ಕೋಟಿ ದ್ವಾದಶಿ, ಪ್ರಾತಃಕಾಲ ಉತ್ಸವು, ಧೋಂಪಾರಾ ಮಹಾ ಸಮಾರಾಧನ, ರಾತ್ರಿ ಉತ್ಸವು(೨೫-೧೨-೨೦೧೨), ಶ್ರೀ ಹಳೇ ಮಾರಿಯಮ್ಮ ದೇವಳಾಂತು ಸಹಸ್ರ ಚಂಡಿಕಾ ಯಾಗಾಚೆ ವರ್ಧಂತ್ಯುತ್ಸವು, ಪಂಚದುರ್ಗಾಹವನ, ಭೂರಿ ಸಮಾರಾಧನ, ದುರ್ಗಾ ನಮಸ್ಕಾರ ಆನಿ ದೀಪಾರಾಧನ(೧-೧-೨೦೧೩), ಏಕಾದಶಿ ಭಜನ (೮-೦೧-೨೦೧೩)

Megele Uttar

ಮೆಗೇಲೆ ಉತ್ತರ(15-01-2013)

ಪಯ್ರಿ ಹಾಂವೆ ಕುಲದೇವಳಾಕ ಗೋಂಯ್ಕ ವಚ್ಚುನು ಯತ್ತಾಸ್ತಾನಾ ಏಕಳೊ ಸಹ ಪ್ರಯಾಣಿಕಾನ ಮಾಕ್ಕೇಕ ಪ್ರಶ್ನೆ ವಿಚಾರ್ಲೆ. “ಪಳೇಯಾ ಸಾರ್ ಸರಾಯಿ ಪಿವ್ಚೆ, ಬೀಡಿ, ಸಿಗರೇಟ ತಾಂಡಚೆ, ಡ್ರಗ್ಸ್ ಘೆವ್ಚೆ ಡೇಂಜರಸ್, ಆಮಗೇಲೆ ಆರೋಗ್ಯ ಪಾಡ ಕರತಾ, ಮ್ಹೊಣು ತುಮ್ಮಿ ಸಾಂಗ್ತಾಮೂ! ತಶ್ಶಿ ಜಾಲ್ಯಾರಿ ಖಂಚೇ ಚಟ ನಾತ್ತಿಲ್ಯಾಕ ಹುಷಾರ ನಾಶಿ ಜಾಯನಾಂವೆ? ಮ್ಹಣಚೇಚಿ ತ್ಯಾ ಪ್ರಶ್ನೆ. ಹಾಕ್ಕಾ ಖಂಚೆ ನಮೂನ್ಯಾನ ಜವಾಬ ದಿವ್ಕಾ ಮ್ಹೊಣು ಮಾಕ್ಕಾ ಥೊಡೆ ವೇಳು ಗಡಬಡ ಜಾಲೇಲೆ ವ್ಹಯಿ. ಜಾಲ್ಯಾರಿ ಸತ್ಯ ಕೆದ್ನಾಯಿ ಸ್ಪಷ್ಟ ಜಾವ್ನು ಆಸ್ತಾ. ಹಾಂವೆ ತಾಕ್ಕಾ ಏಕ ಲೊಕ್ಕಂಡಾ ತಾಂಬಿಯಾ ಉದಾಹರಣ ದಿಲ್ಲೆ.      ಕಸ್ಸಲೆ ಮ್ಹಳಯಾರಿ ಚರ್ಡುಂವ ಖೆಳ್ತಾ ಆಸತಾನಾ ಏಕ ತಾಂಬಿಯಾಕ ಮಾತ್ತಿ ಸಾರೋನು ಕೂಸ್ಸಡ ಕೋರ್ನು ದವರತಾತಿ ಆನಿ ಆನ್ನೇಕ ತಾಂಬಿಯೋ ಮಾತ್ತಿ(ಜಂಗ) ಖಾವ್ನು ಕೂಸ್ಸಡ ಜಾವ್ನು ಆಸ್ತಾ. ಪಳೈಚಾಕ ದೊನ್ನೀಚಿ ಕೂಸ್ಸಡಶಿ ದಿಸಲ್ಯಾರಿಚಿ ತಾಂತು ಫರಕ ಆಸ್ಸ ನ್ಹಂಹಿವೇ? ಮಾತ್ತಿ ಲಾಗ್ಗೂನು ಜಾಲ್ಲಿಲೆ ಕುಸ್ಸಡ ಧುಲ್ಯಾರಿ ವಚ್ಚುನು ಸೊಡ್ತಾ. ತ್ಯಾಂಚಿ ಜಂಗ ಲಾಗ್ಗಿಲೆ ಕೂಸ್ಸಡ ತಾಂಬಿಯಾಕ ಲುಕ್ಸಾನ ಕರ್ತಾ ಉರ್ತಾ. ತಶ್ಶಿಚಿ ಆಮಗೇಲೆ ಶರೀರಾ ವಿಷಯಾಂತು ಸಾಂಕಾ ಮ್ಹಳಯಾರಿ ಸೋರೋ ಪೀವ್ನು, ಸಿಗರೇಟ ತಾಂಡೂನು, ಡ್ರಗ್ಸ್ ಘೇವ್ನು ಅಂತ, ಶ್ವಾಸಕೋಶ, ಕಿಡ್ನಿ ಇತ್ಯಾದಿ ಅಂಗಾಕ ಜಾಲೇಲೆ ಲುಕ್ಸಾನ ಸಮ ಕೊರಚಾಕ ಜಾಯನಾ. ಮ್ಹಳಯಾರಿ ತಾಂಬಿಯೊ ಮಾತ್ತಿ ಖಾವ್ನು ಹಳು ಹಳೂ ಒಟ್ಟೊ ಜಾವ್ನು ವಚ್ಚೆ ವರಿ ತ್ಯಾ ಅಂಗ ಸೈತ ಒಟ್ಟೊ ಜಾವಚಾಕ ಪುರೊಂತಿ. ತೆದ್ದನಾ ದೆಕ್ಕು ಪೊಡಚೆ ಲಕ್ಷಣ ದೂಖಿ ಮಾತ್ರ ಜಾಲ್ಯಾರಿಚಿ ರಿಪೇರಿ ಕೊರಚಾಕ ಜಾಯನಾಶಿ ತಾಜ್ಜೇನ ಮರಣ ಥಾಂಯಿ ಯವಚೆ ಫಾವ ಆಸ್ತಾ. ತ್ಯಾಂಚಿ ಟೆನ್‌ಶನ್ನಾನಕಿ, ಇನ್‌ಫೆಕ್ಷನ್ನಾನಕಿ ನಾಂವೆ ಆಹಾರಾಂತು ಚ್ಹಡ -ಕಮ್ಮಿ ಜಾವ್ನು ಹುಷಾರ ನಾಶಿ ಜಾಲ್ಯಾರಿ ತಾಕ್ಕಾ ಅಗತ್ಯ ಚಿಕಿತ್ಸೆ ನಾಂವೆ ವಾಕ್ಕದ ದಿಲಯಾರಿ ಗೂಣ ಜಾತ್ತಾ. ಹಾಜ್ಜೇನ ಶರೀರಾಚೆ ಅಂಗಾಕ ಖಂಚೇ ಲುಕ್ಸಾನ ಆಸ್ಸ ಜಾಯನಾ. ಮ್ಹಳಯಾರಿ ತ್ಯಾ ಅಂಗಾಕ ಲಾಗ್ಗಿಲೆ ಕೂಸ್ಸಡ ಚ್ಹೊಖ ಜಾತ್ತಾ.
ಹೇ ಕಳ್ಯಾರಿಚಿ ಆತ್ತಾತ್ತ ಸಂತೋಷಾಕ ಪಾರ್ಟಿ, ದುಃಖ ಆಯ್ಯಿಲೆ ತೆದ್ದನಾ ಸೋರೋ ಪಿವಚೆ ಅಭ್ಯಾಸು ಚ್ಹಡ ಜಾತ್ತಾ ಆಸ್ಸುಚೆ ಖರೇಚಿ ದುರದೃಷ್ಟಾ ಖಬರ. ಸೋರೊ ಬೀರ, ವಿಸ್ಕಿ ಇತ್ಯಾದಿ ಖಂಚೆ ನಮೂನ್ಯಾನ ಆಸಲೇರಿ ತಾಂತಾಸ್ಸುಚೆ ಆಲ್ಕೋಹಾಲ್ ಆಮಗೇಲೆ ಶರೀರಾಕ ಲುಕ್ಸಾನ ಕರನಾಶಿ ಸೋಣಾ. ದುಷ್ಟಾನಿ ಕಿತ್ಲೆಚಿ ಸಂಭಾವಿತಾಲೆ ವೇಷು ಘಾಲ್ಯಾರಿಚಿ  ತಾಗೇಲೆ ದಾಕೂನು ಉಪದ್ರವ ಕಶ್ಶಿ ಚುಕನಾಂಕಿ, ತಶ್ಶಿಚಿ ಹೇ ಸೋರೋ ಕಿತ್ಲೇಚಿ ಮ್ಹೋವಾಳ ಆಸಲೇರಿಚಿ ಶರೀರಾಕ ತಾಜ್ಜ ನಿಮಿತ್ತ ಜಾವ್ಚೆ ಲುಕ್ಸಾನ ಬರೋನು ಸಾಂಗಚಾಕ ಜಾಯನಾ.  ತಾಜ್ಜೇನ ದುಡ್ಡು ತಿತ್ಲೇಚಿ ನ್ಹಂಯಿ, ಆರೋಗ್ಯಾಯಿ ಪಾಡ ಜಾತ್ತಾ. ಘರಾಂತು ಏಕಳೊ ಸಂಪಾದನ ಕೊರಚೆ ಮನುಷ್ಯಾಲೆ ಆರೋಗ್ಯ ಪಾಡ ಜಾಲ್ಲೆ ಮ್ಹಳಯಾರಿ ತ್ಯಾ ಘರ್‍ಚೆ ಸರ್ವಾಲೆ ಸಮಾಧಾನ, ಸೂಖ ನಾಶ ಕರತಾ.  ಸೋರೊ ಪಿತ್ತಾಲೊ ತ್ಯಾ ಪಿವಚೆ ದಾಕೂನು ಆಪಣಾಕ ಸೂಖ, ಸಂತೋಷು ಮೆಳತಾ ಮ್ಹೊಣು ಲೆಕತಾ. ಜಾಲಯಾರಿ  ತಾಜ್ಜ ದಾಕೂನು ಆಪ್ಪಣ ಅನಾರೋಗ್ಯಾಕ ಪೋಣು ದೂಖಿ, ಕಷ್ಟ ಭೊಗಚೆ ನ್ಹಂಹಿಸಿ, ಘರ್‍ಚಾಲೆ, ಕುಟುಂಬಾಚೆ ಸರ್ವಾಲೆ ಸೂಖ-ಸಂತೋಷ ನಾಶ ಕರತಾ ಮ್ಹಣಚೆ ವಿಸರ್ತಾ.  ತ್ಯಾ ಖಾತ್ತಿರಿ ಆಮ್ಮಿ ಕೆದನಾಂಯಿ ಯಾದ ದವರೂನು ಘೆವ್ಕಾ. ತತ್ಕಾಲಾಂತು ಮೆಳೇಚೆ ಥೊಡೆ ಸುಖಾ ಖಾತ್ತಿರಿ ಜೀವನಾಚೆ ಸಮಸ್ತ ಸೂಖ ಪಾಡ ಕೋರ್ನು ಘೆವಕಾವೇ? ತತ್ಕಾಲಾಚೆ ದುಃಖ ವಿಸರಚಾಕ ಜೀವನ ಪೂರ್ತಿ ದುಃಖ ಆಪೋವ್ನು ಘೆವ್ಕಾವೇ? ವೆಂಚೂನು ಘೆವ್ಚೆ ಜವಾಬ್ದಾರಿ ತುಮಗೆಲೇಚಿ, ಕಿತಯಾಕ ಮ್ಹಳಯಾರಿ ತಾಜ್ಜ ಪರಿಣಾಮ ಭೊಗತಾಲಿಂ ತುಮ್ಮೀ ನ್ಹಂಹಿವೇ?
ಸರ್ವಾಂಕ ದೇವು ಬರೆ ಕೊರೊಂ    - ಆರ್‍ಗೋಡು ಸುರೇಶ ಶೆಣೈ, ಸಂಪಾದಕು

ಶ್ರೀ ಆರೂರು ಲಕ್ಷ್ಮಣ್ ಶೇಟ್ ಹಾಂಗೆಲೆ “ಟಿಕ್ ಟಿಕ್ ಗೆಳೆಯಾ...

ಮೆಗೇಲೆ ಆತ್ಮೀಯ ಜಾಲೇಲೆ ಆರೂರು ಲಕ್ಷ್ಮಣ ಶೇಟ್ ಹಾನ್ನಿ ಸಿಂಡಿಕೇಟ್ ಬ್ಯಾಂಕಾಂತು ಆಶ್ಶಿಲ ತೆದನಾಂಯಿ ಮಾಕ್ಕಾ ಮಸ್ತ ಪರಿಚಿತ. ಏಕ ವರ್ಷ ಸರಸ್ವತಿ ಪ್ರಭಾಚೆ ದೀಪಾವಳಿ ವಿಶೇಷ ಅಂಕಾಚೆ ಗೌರವ ಸಂಪಾದಕ ಜಾವ್ನಯಿ ತಾನ್ನಿ ಮಾಕ್ಕಾ ಮಸ್ತ ಉಪ್ಕಾರು ಕೆಲೇಲೆ ಆಸ್ಸ. ಬ್ಯಾಂಕಾಂತು ಆಸತಾನಾಂಯಿ ತಾನ್ನಿ ಮಸ್ತ ಸಾಹಿತ್ಯ ಸೇವಾ ಕೋರ್ನು ನಾಂವ ಕಮಾಯಿಲೆ ಸರ್ವ ವಿದಿತ. ನಿವೃತ್ತ ಜಾಲ್ಲ ಉಪರಾಂತ ಸಾಹಿತ್ಯ ಸೃಷ್ಟಿ ಬರಶಿ, ವಿಂಗವಿಂಗಡ ಸಾಹಿತ್ಯ ಚಟುವಟಿಗೆಂತು, ಕಮ್ಮಟಾಂತು ವಾಂಟೊ  ಘೇವ್ನು ಕ್ರೀಯಾಶೀಲ ಜಾವ್ನು ಆಸ್ಸತಿ. ಕನ್ನಡ ಬರಶಿ ಕೊಂಕಣಿಂತು ಹಾನ್ನಿ ಸಾಹಿತ್ಯ ಸೃಷ್ಟಿ ಕೆಲ್ಲಾ. ಧಾರವಾಡ ಆಕಾಶವಾಣಿಚೆ ಜಾಯಿ-ಜೂಯಿ ಕೊಂಕಣಿ ಕಾರ್ಯಕ್ರಮಾಂತು ಹಾಂಗೆಲೆ ಮಸ್ತ ಕೊಂಕಣಿ ಭಾಷಣ, ಲ್ಹಾನ ಕಾಣಿ ಪ್ರಸಾರ ಜಾಲೀಲೆ ಆಸ್ಸ.   ಲ್ಹಾನ ಕಾಣಿ, ಪತ್ರಿಕಾ ಆಂಕಣ, ಲೇಖನ ಇತ್ಯಾದಿ ಸಾಹಿತ್ಯ ಪ್ರಕಾರಾಂತು ಹಾತು ಖೇಳೋವ್ನು ನಾಮಾಂಕಿತ ಜಾಲೇಲೆ ಶ್ರೀ ಶೇಟ್ ಮಾಮ್ಮಾನ ಆಪಣಾನ ಬರೆಯಿಲೆ ೪೫ ಲೇಖನ ಒಟ್ಟು ಕೋರ್ನು “ಟಿಕ್ ಟಿಕ್ ಗೆಳೆಯಾ... ಟಿಕ್ ಟಿಕ್! ಮ್ಹಣಚೆ ಕೃತಿ ಕನ್ನಡಾಂತು ಪ್ರಕಟ ಕೆಲ್ಲಯಾ.
ಕರ್ನಾಟಕಾಚೆ ಪ್ರಸದ್ಧ ದೈನಿಕ ಸಂಯುಕ್ತ ಕರ್ನಾಟಕ ದೈನಿಕ ಪತ್ರಾಚೆ “ಚೀತನ ಪುರವಣಿಂತು ಸತತ ಜಾವ್ನು ಪ್ರಕಟ ಜಾತ್ತಾ ಆಯ್ಯಿಲೆ ತಾಂಗೆಲೆ ಲೇಖನ ಒಟ್ಟು ಕೋರ್ನು ಸಂಕಲನ ರೂಪಾರಿ ಶ್ರೀ ಶೇಟ್ ಮಾಮ್ಮಾನ ಆಪಣಾಲೆ ಪಲ್ಲವಿ ಪ್ರಕಾಶನ ಮುಖಾಂತರ ಪ್ರಕಟ ಕೆಲ್ಲಯಾ. ತಾನ್ನಿ ಆಪಣಾಲೆ ಉತ್ತರ ‘ನಿವೇದನೆಂತು ಬರೆಯಿಲ ವರಿ ಹೀ ಲೇಖನ ತಾನ್ನಿ ಯುವಜನಾಂಗಾಕ ತಾಂತೂಯಿ ವಿದ್ಯಾರ್ಥ್ಯಾಂಕ ಜಾವ್ನೂ ಬರೆಯಿಲ ಖಂಯಿ.  ವ್ಹಯಿ ಏಕ್ಕೇಕ ಲೇಖನ ವಾಜ್ಜಿತಾ ಘೆಲ್ಲಿಲ ತಶ್ಶಿ ಆಮಕಾಯಿ ತಶ್ಶೀ ದಿಸ್ತಾ. ಪಯಲೆಚೆ “ಹೇ ಜಗ ಸೋಜಿಗ ಲೇಖನ ದಾಕೂನು ೪೫ಚೆ ‘ಕಂದಾ ನೀ ಸಂತಸದ ಸಿರಿಗಂಧ ಮ್ಹಣಚೆ ಸರ್ವ ಲೇಖನಾಂತು ಬರೋಪಿನ ಏಕ್ಕಾ ಪಶಿ ಚ್ಹಡ ಸಂದೇಶ ವಾಚಕಾಂಕ ದಿಲ್ಲಾ. ತ್ಯಾ ವಾಜ್ಜಿಲ್ಯಾರಿ ಪುರ್‍ಜಾಯ್ನಾ, ಆಮ್ಮಿ ಆಮಗೇಲೆ ಜೀವನಾಂತು ಕಾರ್ಯರೂಪಾಕ ಹಾಣು ಅನುಭವ ಘೆವ್ಕಾ. ಹಾಂತುಲೆ ಕೆಲವ ಲೇಖನಾಚೆ ನಾಂವ ಸೈತ ವಿಶಿಷ್ಠ ಜಾವ್ನು ಆಸ್ಸ. ಉದಾಹರಣೆಕ ಬೆಳಕಿನ ಬೇಟೆಗಾರನೇ, ರೆಡಿ. ಒನ್... ಟು... ತ್ರೀ... ಸ್ಟಾರ್ಟ್!, ಕಂದ -ಚಂದ-ಆನಂದ... ಚಂದಮಾಮಾ ಬಾ... ಬಾ.., ವೆಬ್ ಸೈಟ್, -ಇನ್ ಸೈಟ್, ಡ್ರೀಮ್ಗಳ ಡ್ರಿಲ್...ಥ್ರಿಲ್..ನಗ್ತೀರಾ ಪ್ಲೀಸ್ ಅಶ್ಶಿ ಸಾಂಗ್ತಾ ವಚ್ಚೆತ.  ನಾಂವ ಮಾತ್ರ ನ್ಹಂಹಿ ತಾಜ್ಜ ಭಿತ್ತವೇಲೆ ಹೂರ್ಣ ಸೈತ ತಿತ್ಲೇಚಿ ವಿಚಾರ ಯೋಗ್ಯ ಜಾವ್ನು ಆಸ್ಸ ಮ್ಹಣ್ಯೇತ.
ಶ್ರೀ ಆರೂರು ಲಕ್ಷ್ಮಣ ಶೇಟ್ ಹಾನ್ನಿ ಬರೆಯಿಲೆ ಲೇಖನ ಆಮಕಾ ಖಾಲಿ ವಿಷಯಾಚೆ ಮಾಹಿತಿ ಮಾತ್ರ ದೀವ್ನು ನುತ್ ರಾಬ್ನಾತಿ. ವಿಚಾರ ಕೊರಚಾಕ ಲಾಗೈತಾತಿ. ಬಹುಶಃ ಬರಯಚಾಂತು ಹ್ಯಾ ನಮೂನೋ ಮಸ್ತ ಪರಿಣಾಮಕಾರಿ ಮ್ಹೊಣು ಸಾಂಗಲ್ಯಾರಿ ಚೂಖಿ ಜಾಯಸನಾ.
ಕಶ್ಶೀ ಆಸ್ಸೊ ಶ್ರೀ ಆರೂರು ಲಕ್ಷ್ಮಣ ಶೇಟ್ ಮಾಮ್ಮಾಲೆ ಹೇ “ಟಿಕ್ ಟಿಕ್ ಗೆಳೆಯಾ... ಟಿಕ್ ಟಿಕ್ ಮ್ಹಣಚೆ ಕೃತಿ ಖಂಡಿತ ಸರ್ವಾನಿ ಏಕ್ಪಂತಾ ವಾಚ್ಚಿಕಾ ಜಾಲೇಲೆ ಮ್ಹಣಚಾಂತು ಆನ್ಮಾನು ನಾ. ಡೆಮ್ಮಿ ೧/೮ ಸೈಜಾಂತು ೧೭೬ ಪುಟಾಚೆ ಹೇ ಪುಸ್ತಕಾಚೆ ಆಕರ್ಷಕ ಮುಖಪುಟ ಮಲ್ಟೀಕಲರಾಂತು ಪ್ರಿಂಟ್ ಜಾಲ್ಲಾ. ಭಿತ್ತವೈಲೆ ಸಾಹಿತ್ಯ ಸೈತ ಚಾಂಗ ಮ್ಯಾಪಲಿಥೋ ಪೇಪರಾಂತು ಪ್ರಿಂಟ್ ಜಾಲ್ಲೆಲೆ ಆಸ್ಸುನು, ಆಸಕ್ತಿ ಆಶ್ಶಿಲ್ಯಾನ ಆರೂರು ಲಕ್ಷ್ಮಣ ಶೇಟ್, ಪಲ್ಲವಿ ಪ್ರಕಾಶನ, ನಂ. ೩೭, ‘ನಿಸರ್ಗ ಶಕ್ತಿ ಕಾಲನಿ, ಹುಬ್ಬಳ್ಳಿ - ೫೮೦೦೩೨. ಪೋನ್ ನಂಬರ್ ೯೩೪೧೩೬೩೭೮೮ ಹಾಂಗಾಕ ಸಂಪರ್ಕ ಕೋರ್ನು ಹಾಡೋವನು ಘೇವ್ಯೇತ. ಹಾಜ್ಜ ಮ್ಹೊಲ ರೂ. ೧೦೦/- ಮಾತ್ರ. ಹಾಂಕಾ ಹೇ ಮೂಖಾಂತರ ಅಭಿನಂದನ ಪಾವೈತಾ.    -ಆರ್‍ಗೋಡು ಸುರೇಶ ಶೆಣೈ.

ಸರಸ್ವತಿ ಪ್ರಭಾನ ಪ್ರಕಟ ಕೆಲೀಲೆ 

20 ವರ್ಷಾಕ 20 ಕೊಂಕಣಿ ಕೃತ್ಯೋ