ವಿಶ್ವ ಕೊಂಕಣಿ ಕೇಂದ್ರ: ವಿದ್ಯಾರ್ಥಿ ವೇತನ ವಾಂಟಿಲೆ

ಕೊಂಕಣಿ ಭಾಷ ಆನಿ ಸಂಸ್ಕೃತಿಕ ಉತ್ತೇಜನ ದಿವಚೆ ಖಾತ್ತಿರಿ ವಿಶ್ವ ಕೊಂಕಣಿ ಕೇಂದ್ರಾಕ ಕರ್ನಾಟಕ ಸರಕಾರಾನ ಘೋಷಣ ಕೆಲೇಲೆ ೫ ಕೋಟಿ ರುಪಯಾ ಪೈಕಿ ದೇಡ ಕೋಟಿ ರೂಪಯಿ ಇತ್ತುಲೆ ಭಿತ್ತರಿ ಹಸ್ತಾಂತರ ಕೆಲ್ಲ್ಯಾ. ವ್ಹರಲೀಲೆ ದುಡ್ಡು ಹಂತಹಂತ ಜಾವ್ನು ದಿತ್ತಾತಿ. ಮ್ಹೊಣು  ಕರ್ನಾಟಕ ಮುಖ್ಯಮಂತ್ರಿ ಜಗದೀಶ್ ಶೆಟ್ಟರ್ ತಾನ್ನಿ ಸಾಂಗಲೆ. ತಾನ್ನಿ ೨೫-೦೮-೨೦೧೨ ದಿವಸು ಮಂಗಳೂರಾಂತು “ವಿಶ್ವ ಕೊಂಕಣಿ ಕೇಂದ್ರಾ ತರಪೇನ ಚಲೇಲೆ ವಿದ್ಯಾರ್ಥಿ ವೇತನ ವಾಂಟಪ ಸಮಾರಂಭಾಚೆ ಮುಖೇಲ ಸೊಯರೆ ಜಾವ್ನು ಯೇವ್ನು ಉಲೈತಾಶ್ಶಿಲೆ. ಆನಿ ಹೇ ವೇಳ್ಯಾರಿ ತಾನ್ನಿ ೧೦ ಲೋಕ ವಿದ್ಯಾರ್ಥ್ಯಾಂಕ ಸಾಂಕೇತಿಕ ಜಾವ್ನು ವಿದ್ಯಾರ್ಥಿ ವೇತನ ವಾಂಟಿಲೆ.
ರಾಜ್ಯಸಭಾ ಸದಸ್ಯ ಅಸ್ಕರ್ ಫೆರ್ನಾಂಡೀಸ್ ಹೇ ಕಾರ್ಯಕ್ರಮಾಚೆ ಉದ್ಘಾಟನ ಕೆಲ್ಲಿಂತಿ. ಆನಿ ಆಪಣಾಲೆ ಭಾಷಣಾಂತು “ವಿಶ್ವಕೊಂಕಣಿ ಕೇಂದ್ರಾನ ಘಾಲ್ನು ಘೆತ್ತಿಲೆ ಹೇ ಕಾಮ ಸ್ತುತ್ಯರ್ಹ, ಆಮಗೇಲೆ ಚರ್ಡುಂವ ಚಾಂಗ ಜಾವ್ನು ಶಿಕ್ಕುನು ಮಂಗಳ ಗ್ರಹಾಕ ವಚ್ಚುನು ಯವ್ವೊಂತಿ ಮ್ಹೊಣು ಆಶಯ ವ್ಯಕ್ತ ಕೆಲ್ಲಿಂತಿ. ಆನಿ ತಾನ್ನಿ ಸಾಂಕೇತಿಕ ಜಾವ್ನು ೫ ಲೋಕಾಂಕ ವಿದ್ಯಾರ್ಥಿ ವೇತನ ವಾಂಟಿಲೆ. ಬ್ಲೋಸಂ ಫೆರ್ನಾಂಡಿಸ್ ಉಪಸ್ಥಿತ ಆಶ್ಶಿಲೆ.
  ಮಣಿಪಾಲ್ ಯೂನಿವರ್ಸಲ್ ಲರ್ನಿಂಗ್ ಸಂಸ್ಥೆಚೆ ಅಧ್ಯಕ್ಷ ಟಿ.ವಿ. ಮೋಹನ್‌ದಾಸ್ ಪೈ ತಾನ್ನಿ ದಿಕ್ಸೂಚಿ ಭಾಷಣ ಕೆಲ್ಲಿಂ.  ಸಗಳೆ ದೇಶಾಂತು ಆಸ್ಸುಚೆ ೧೨೧ ಕೋಟಿ ಜನ ಸಂಖ್ಯೆಂತು ಕೊಂಕಣಿ ಭಾಷಿಗಾಲೆ ಅಂಕಡೊ ಮಸ್ತ ಊಣೆ. ಆಮಕಾ  ರಾಜಕೀಯ ಇಚ್ಛಾ ಶಕ್ತಿ ದಾಖಯ್ಚೆ ತ್ರಾಣ ನಾ., ಅರ್ಥಿಕ ತ್ರಾಣ ನಾ. ಜಾಲ್ಯಾರಿ ಚಾಂಗ ಬುದ್ಧಿಮತ್ತಾ ಆಸ್ಸ. ಆರ್ಥಿಕ ಜಾವ್ನು ಅಶಕ್ತ ಜಾವ್ನಾಸ್ಸುಚೆ ಆಮಗೇಲೆ ಭಾಷೆಚೆ ವಿದ್ಯಾರ್ಥ್ಯಾಂಕ ಚಾಂಗ ಉನ್ನತ ಶಿಕ್ಷಣ ಮೆಳಚ ವರಿ ಕೊರಚೆ ಮೂಖಾಂತರ ೨೦೨೦ ಚೆ ಸುಮಾರಾಕ ಜಾಗತಿಕ ಜಾವ್ನು ಬಲಿಷ್ಟ ಕೊಂಕಣಿ ಸಮಾಜ ನಿರ್ಮಾಣ ಕೊರ್‍ಕಾ ಜಾಲ್ಲಾ ಮ್ಹಳ್ಳಿಂತಿ.
ವಿಶ್ವ ಕೊಂಕಣಿ ವಿದ್ಯಾರ್ಥಿ ವೇತನ ನಿಧಿಚೆ ಅಧ್ಯಕ್ಷ ರಾಮದಾಸ್ ಕಾಮತ್ ಯು. ತಾನ್ನಿ ಯೇವ್ಕಾರ ಕೆಲ್ಲೆ.  ವಿದ್ಯಾರ್ಥಿ ವೇತನ ನಿಧಿ ಆನಿ ತಾಜ್ಜೆ ಫಲಾನುಭವಿ ಅಂಕಡೊ  ವಷಾಚಾನ ವರ್ಷಾಕ ಚ್ಹಡ ಜಾತ್ತಾ ಆಸ್ಸ. ೨೦೧೦ಂತು ೫೦ ಲಾಕ್ ರೂ. ಆಶ್ಶಿಲೆ  ಮೊತ್ತ ಅವುಂದು  ೨ ಕೋಟಿ ರೂ.ಕ ಚಳ್ಳಾ. ೨೦೨೦ಭಿತ್ತರಿ ೨೫,೦೦೦ ಲೋಕ ಕೊಂಕಣಿ ಭಾಷೆಚೆ  ವಿದ್ಯಾರ್ಥ್ಯಾಂಕ ವಿದ್ಯಾರ್ಥಿ ವೇತನ ವಾಂಟೂಚೆ ಉದ್ದೇಶ ಆಸ್ಸುನು ಹಾಕ್ಕಾ ಸುಮಾರ  ೮ತಾಕೂನು ೧೦ ಕೋಟಿ ರೂ. ದುಡ್ಡು ಜಾವ್ಕಾ ಜಾತ್ತಲೆ ಮ್ಹಳ್ಳಿಂತಿ.
ಅಖಿಲ ಕರ್ನಾಟಕ ಕೊಂಕಣಿ ಖಾರ್ವಿ ಮಹಾ ಜನ ಸಭಾಚೆ ಅಧ್ಯಕ್ಷ ಕೆ.ಬಿ. ಖಾರ್ವಿ ಗೌರವ ಸೊಯರೆ ಜಾವ್ನು ಆಯ್ಯಿಲೆ. ವಿಶ್ವ ಕೊಂಕಣಿ ಕೇಂದ್ರಚೆ ಅಧ್ಯಕ್ಷ ಬಸ್ತಿ ವಾಮನ ಶೆಣೈ ತಾನ್ನಿ ಅಧ್ಯಕ್ಷತಾ ಘೆತ್ತಿಲೆ. ಭಾವೈಕ್ಯತಾ ಕೊಂಕಣಿ ಲೋಕಾಲೆ ರಗತಾಂತು ಆಸ್ಸ. ತಶ್ಶಿ ಜಾವ್ನು ಕೊಂಕಣಿ ಸಂಬಂಧ ಪಾವ್ನು ಚಾಂಗ ಕಾಮ್ಮ ಘಡತಾ ಆಸ್ಸ. ಹೇ ಚರಿತ್ರಾ ಆಮಗೇಲೆ ಮುಖಾವೈಲೆ ಪೀಳಿಗೇಕ ಪಾವೈಚೆ ಜವಾಬ್ದಾರಿ ತುಮ್ಚೇರಿ ಆಸ್ಸ. ಮ್ಹೊಣು ತಾನ್ನಿ ವಿದ್ಯಾರ್ಥಿ ವೇತನ ಘೆತ್ತಿಲೆ ಯುವ ಜನಾಂಕ ಆಪೋವ್ಣಿ ದಿಲ್ಲಿ.
    ವಿಧಾನ ಸಭಾ ಉಪ ಸಭಾಧ್ಯಕ್ಷ ಎನ್. ಯೋಗೀಶ್ ಭಟ್, ಜಿಲ್ಲಾ ಉಸ್ತುವಾರಿ ಸಚಿವ ಸಿ.ಟಿ. ರವಿ, ಸಂಸದ ನಳಿನ್ ಕುಮಾರ್ ಕಟೀಲು, ವಿಧಾನ ಪರಿಷತ್ ಸದಸ್ಯ ಕ್ಯಾ| ಗಣೇಶ್ ಕಾರ್ಣಿಕ್ ಹೇ ಸಮಾರಂಭಾಂತು ಉಪಸ್ಥಿತ ಆಶ್ಶಿಲೆ.     ವಿದ್ಯಾರ್ಥಿ ವೇತನ ನಿಧಿಚೆ ಕಾರ್ಯದರ್ಶಿ ಪ್ರದೀಪ್ ಜಿ. ಪೈ ತಾನ್ನಿ ಆಬಾರ ಮಾನಲೆ. ಮಹೇಶ್ ನಾಯಕ್  ತಾನ್ನಿ ಕಾರ್ಯಕ್ರಮ ನಿರ್ವಹಣ ಕೆಲ್ಲಿ. ವಿದ್ಯಾರ್ಥಿ ವೇತನ ಘೆತ್ತಿಲೆ ವಿದ್ಯಾರ್ಥಿ ತರಪೇನ ದೊಗ್ಗ ಲೋಕ ಉಲೈಲೆ. ವಿದ್ಯಾರ್ಥಿ ವೇತನ ಸ್ವೀಕಾರ ಕೆಲೀಲೆ ಯುವಜನ ಒಟ್ಟೂ ತಾಂಗೆಲೆ ಪೋಷಕ ವ್ಹಡ ಸಂಖ್ಯಾರಿ ಹೇ ಸಂದಭಾರಿ ಉಪಸ್ಥಿತ ಆಶ್ಶಿಲೆಂ.

ಕೊಂಕಣಿ ರಂಗ ವೈಭವ-೨೦೧೨

“ಭಾಸ ಮನುಷ್ಯಾಲೆ ಜೀವನ ಚಲೈಚೆ ಕೊಳ್ಕಿ. ಜೀವನ ಚಲೈಚಾಕ, ನವೀನ ಜೀವನ ಆಸ್ಸ ಕೋರ್ನು ಘೆವಚಾಕ ಮದ್ದತ್ ಕರ್ತಾ. ಅಶ್ಶಿ ಮ್ಹೊಣು ಉಡುಪಿ ಜಿಲ್ಲಾ ಉಸ್ತುವಾರಿ ಸಚಿವ ಕೋಟ ಶ್ರೀನಿವಾಸ ಪೂಜಾರಿನ ಸಾಂಗ್ಲೆ. ತಾನ್ನಿ ಬೈದೂಂರು ಲಾಗ್ಗಿಚೆ ಖಂಬದಕೋಣೆ ನಿರ್ಮಲಾ ಸಭಾಭವನಾಂತು ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಆನಿ ರಂಗ ವೈಭವ ಆಶ್ರಯಾರಿ ಚಲೇಲೆ ಕೊಂಕಣಿ ರಂಗ ವೈಭವ-೨೦೧೨ಕ ‘ದೂದ ವಕಸೂಚೆ ಮೂಖಾಂತರ ಉದ್ಘಾಟನ ಕೋರ್ನು ಉಲೈತಾಶ್ಶಿಲೆ. ಮಾಗಿರಿ ಉಲೈಲೆ  ತಾನ್ನಿ  ಕೊಂಕಣಿಗ ನಿಸ್ವಾರ್ಥಿ, ಸಹನಾಶೀಲ ಆನಿ ಸರ್ವಾ ಬರಶಿ ಗೌರವಾನಿ ಮೇಳ್ನು ವಾಂಚತಾತಿ. ಸರ್ಕಾರಾ ಕಡೇಚಾನ ಖಂಚೇ ಸೌಕರ್‍ಯ ಜಾವ್ಕಾ ಮ್ಹೊಣು ಅಪೇಕ್ಷ ಕೆಲೇಲೆ ನ್ಹಂಹಿ. ಹೇ ಸರ್ವಧರ್ಮ ಸಮ್ಮೇಳನ ವರಿ ದಿಸ್ತಾ ಆಸ್ಸ. ಮ್ಹೊಣು ಸಂತೋಷ ವ್ಯಕ್ತ ಕೆಲ್ಲಿಂತಿ. ಅಕಾಡೆಮಿ ಅಧ್ಯಕ್ಷ ಕಾಸರಗೋಡು ಚಿನ್ನಾ ಸಮಾರಂಭಾಚೆ ಅದ್ಯಕ್ಷತ ಘೇವ್ನು ಉಲೈತಾ ಕೊಂಕಣಿ ಭಾಷೆ ಆನಿ ಅಭಿವೃದ್ಧಿ ಖಾತ್ತಿರಿ ಆತ್ತ ಘಾಲ್ನು ಘೆತ್ತಿಲೆ ಕಾರ್ಯಕ್ರಮ ಆನಿ ಮುಖಾರಿ ಘಾಲ್ನು ಘೆವ್ಚೆ ಭಾಷಾಭಿವೃದ್ಧಿಚೆ ಸಬಾರ ಯೋಜನೆ ಖಾತ್ತಿರಿ ಸಾಂಗಲಿಂತಿ.
    ಸ್ಥಳೀಯ ಶಾಸಕ ಕೆ. ಲಕ್ಷ್ಮೀನಾರಾಯಣ, ಉಡುಪಿ ಎ.ಪಿ.ಎಂ.ಸಿ ಅಧ್ಯಕ್ಷ ಕುಯಿಲಾಡಿ ಸುರೇಶ ನಾಯಕ್, ಕುಂದಾಪುರ ಪುರಸಭಾ ಅಧ್ಯಕ್ಷ ಮೋಹನ್‌ದಾಸ್ ಶೆಣೈ ಸೊಯರೆ ಜಾವ್ನು ಏವ್ನು ಸಂದರ್ಭೊಚಿತ ಜಾವ್ನು ಉಲೈಲೀಂತಿ. ರಾಯಚೂರಾಚೆ ಚಾರ್ಟೆಡ್ ಅಕೌಂಟೆಂಟ್ ರಾಮಚಂದ್ರ ಪ್ರಭು (ನೃಪತುಂಗ), ಬೈಂದೂರು ಹೋಲಿ ಕ್ರಾಸ್ ಚರ್ಚ್ ಧರ್ಮಗುರು ರೆ.ಫಾ.ಪ್ರಾಸ್ ಕಾರ್ನೆಲಿಯೋ, ಸೌಖ್ಯ ಸಮೂಹ ಶಿಕ್ಷಣ ಸಂಸ್ಥೆ ಅಧ್ಯಕ್ಷ ರಿಯಾಜ್ ಅಹಮ್ಮದ್ ಶುಭಾಶಂಸನೆ ಕೆಲ್ಲಿಂತಿ. ಸಂಗೀತ ಕಲಾವಿದೆ ಶ್ರೀಮತಿ ಪ್ರಮೀಳಾ ಕುಂದಾಪುರ ಆನಿ ಸಾಹಿತಿ, ನಾಟಕಗಾರ  ಬರ್ನಾಡ್ ಜೆ ಕೋಸ್ಟ್ ಕುಂದಾಪುರ ಹಾಂಕಾ ಸಚಿವಾನ ಸನ್ಮಾನ ಕೆಲ್ಲೆ. ನಿಖಿತಾ ಕಿಣಿ ಆನಿ ತಂಡಾಚಾನ ಪ್ರಾರ್ಥನ ಕೆಲ್ಲೆ. ಡಾ. ಬಿ ದೇವದಾಸ್ ಪೈ ತಾನ್ನಿ ಆಬಾರ ಮಾನಲೆ. ಅಕಾಡೆಮಿಚೆ ಸಹಸದಸ್ಯ ಓಂಗಣೇಶ್ ತಾನ್ನಿ ಯೇವ್ಕಾರ ಕೋರ್ನು ಕಾರ್ಯಕ್ರಮ ನಿರೂಪಣ ಕೆಲ್ಲಿ.

ಕೊಂಕಣಿ ರಂಗ ಸಂವಾದ

“ಕಲಾ ಆನಿ ಸಂಸ್ಕೃತಿ ವಾಂಚೋಚಾಕ ರಂಗಸಂವಾದ ಆಯಚೆ  ಕಾಲಾಂತು ಪ್ರಸ್ತುತ. ಭಾಷಾಭಿಮಾನ ವಾಡ್ಡಯಚೆ ಖಾತ್ತಿರಿ ಸಾನ್ಪಣಾ ದಾಕೂನು ಚರ್ಡುವಾಂಕ ಭಾಸ, ಸಂಸ್ಕೃತಿ ಆನಿ ಕಲೆ ಖಾತ್ತಿರಿ ಜಾಗೃತಿ ಆಸ್ಸ ಕೊರಕಾ. ಕೊಂಕಣಿ ಭಾಸ ರಾಬಿಲೆ ಉದಾಕ ಜಾಯನಾಶಿ ಪೋವ್ಚೆ ಉದ್ದಾಕ ಜಾವ್ಕಾ. ತಾಜ್ಜ ಖಾತ್ತಿರಿ ಪೋಷಕಾನಿ ಚರ್ಡುವಾಂಕ ಸುರವೇಚಾನ ಕಳೋವ್ಕಾ. ಮ್ಹೊಣು ಖ್ಯಾತ ಉದ್ಯಮಿ ಸತೀಶ್ ನಾಯಕ್ ನಾಡಾ ತಾನ್ನಿ ಆಪೋವ್ಣಿ ದಿಲ್ಲಿ. ತಾನ್ನಿ ಖಂಬದಕೋಣಾಂತು ಚಲೇಲೆ ಕೊಂಕಣಿ ರಂಗ ಸಂವಾದ ಕಾರ್ಯಕ್ರಮ ಉದ್ಘಾಟನ ಕೋರ್ನು ಉಲೈತಾಶ್ಶಿಲೆ. ಕೊಂಕಣಿ ರಂಗಭೂಮಿ ಅಂದು-ಇಂದು-ಮುಂದು ವಿಚಾರಗೋಷ್ಠಿಂತು ಭಾಷಾ ಸಂಶೋಧಕ ಡಾ.ಜಯವಂತ ನಾಯಕ್ ಉಲೋನು “ಕೊಂಕಣಿ ಭಾಷೆಕ ೨೦೦೦ವಷಾಚೆ ಇತಿಹಾಸ ಆಸ್ಸುನ,  ಕೊಂಕಣಿ ರಂಗಭೂಮಿಕ ೧೦೦ ವರ್ಷ ಇತಿಹಾಸ ಆಸ್ಸುಚೆ ಸಂಶೋದನೇನ ಕೋಳ್ನು ಆಯಲಾ. ದಿ.ಬೋಳುಂತೂರು ಕೃಷ್ಣಪ್ರಭು ೧೯೧೨ಂತು ಬರೋವ್ನು, ನಿರ್ದೇಶನ ಕೆಲೇಲೆ ಚಂದ್ರಹಾಸ ಪ್ರಥಮ ಜಾವ್ನು  ರಂಗಮಂಚಾ ವಯರಿ ಪ್ರದರ್ಶಿತ ಜಾಲ್ಲೆ. ತಾಜ್ಜ ನಂತರ ಸಬಾರ ನಾಟಕ ಪ್ರದರ್ಶಿತ ಜಾವ್ನು, ಪ್ರಸಿದ್ದಿ ಪಾವ್ಲೆ. ಮ್ಹೊಣು ಸಾಂಗ್ಲಿಂತಿ.
    ಬಸ್ರೂರು ಶಾರದಾ ಕಾಲೇಜಾಚೆ ಉಪನ್ಯಾಸಕಿ ಶ್ರೀಮತಿ ಸುಮತಿ  ಶೆಣೈ ಕೊಂಕಣಿ ರಂಗದಲ್ಲಿ ಮಹಿಳೆಹಾಜ್ಜ ಖಾತ್ತಿರಿ ಉಲೈಲೆ.  ಕ.ಕೊಂ.ಸಾ.ಅ. ಅಧ್ಯಕ್ಷ ಕಾಸರಗೋಡು ಚಿನ್ನಾ ಅಧ್ಯಕ್ಷತೆ ಘೆತ್ತಿಲೆ. ಮಂಜುನಾಥ ಮಹಾಲೆ, ಪ್ರಕಾಶ್ ಭಟ್, ದೇವಿದಾಸ್ ಪೈ, ಶೀಲ ನಾಯಕ್ ಉಪಸ್ಥಿತ ಆಶ್ಶಿಲೆ. ಸಂಚಾಲಕ ಓಂಗಣೇಶ ತಾನ್ನಿ ಕಾರ್ಯಕ್ರಮ ನಿರೂಪಣ ಕೆಲ್ಲೆ. ಅವಿಭಜಿತ ದ.ಕ.ಜಿಲ್ಲೆಚೆ ಸಬಾರ ರಂಗಕರ್ಮಿ ವಿಚಾರಗೋಷ್ಠಿಂತು ವಾಂಟೊ ಘೆತ್ತಿಲೆ. ನಾಟಕೋತ್ಸವಾಚೆ ಅಂಗ ಜಾವ್ನು ಬೈಂದೂರು ಹೋಲಿಕ್ರಾಸ್ ಚರ್ಚ್ ಕಲಾವಿದಾನಿ ಸ್ವಾರ್ಥಿ ಸಂಸಾರು, ನಾಯ್ಕನಕಟ್ಟೆ ವೆಂಕಟರಮಣ ಸೇವಾ ಸಮಿತಿ ಸದಸ್ಯಾನಿ ಘಡೇ ಏಕ್ ಫಟ್ಟಿಕ್, ಶಿರೂರು ಮೇಸ್ತಾ ಕಲಾತಂಡ ಸದಸ್ಯಾನಿ “ತೇ ಕೋಣ...?, ಶಿರಾಲಿ ಮಾರುತಿ ನಾಟಕ ಸಂಘ ಕಲಾವಿದಾನಿ ಬ್ರಹ್ಮಾಲೆ ಗಾಂಟಿ ನಾಟಕ ಪ್ರದರ್ಶಿತ ಕೆಲ್ಲೆ.

 ರಂಗ ವೈಭವ- ೨೦೧೨ ಸಮಾಪನ

ಖಂಬದ ಕೋಣೆಂತು ದೋನಿ ದಿವಸು ಚಲೇಲೆ “ರಂಗವೈಭವ - ೨೦೧೨ ಹಾಜ್ಜೆ ಸಮಾರೋಪ ಕಾರ್ಯಕ್ರಮಾಚೆ ಆಧ್ಯಕ್ಷತ ಘೇವ್ನು ಉಲೈಲೆ ಕೊಂಕಣಿ ಅಕಾಡೆಮಿ ಅಧ್ಯಕ್ಷ್ಛ ಕಾಸರಗೋಡು ಚಿನ್ನಾ  “ಜಗಾಚೆ  ಅಗಣಿತ ಭಾಷೆ ಇತ್ಲೆ ಭಿತ್ತರಿ ಮೋರ್ನು ವತ್ತಾ ಆಸ್ಸ.  ಅಮೂಲ್ಯ ಜ್ಞಾನ ಭಂಡಾರ ಜಾಲೇಲೆ  ಭಾಷೆಂಕ ತಾಂಚೆ ಮೂಲ ಸ್ವರೂಪ, ತಶ್ಶೀಚಿ ಸೌಂದರ್ಯ ಬರಶಿ ವರೋನು ಘೆವ್ಚೆ ಪ್ರಯತ್ನ ಕೋರ್‍ಕಾ ಜಾಲ್ಲಾ. ಮ್ಹಳ್ಳಿಂತಿ ಪತ್ರಕರ್ತ ಯು.ಎಸ್. ಶೆಣೈ, ಕುಂದಾಪುರ ದೈವಜ್ಞ ಬ್ರಾಹ್ಮಣ ಸಮಾಜಾಚೆ ಉಪಾಧ್ಯಕ್ಷ ಅಶೋಕ ಶೇಟ್, ಕೊಂಕಣಿ ಖಾರ್ವಿ ಮಹಾಜನ ಸಂಘಾಚೆ ಅಧ್ಯಕ್ಷ ಕೆ. ಬಸವ ಖಾರ್ವಿ, ಕೊಂಕಣಿ ಖಾರ್ವಿ ಸಂಘಾಚೆ ಮಾಜಿ ಪ್ರಧಾನ ಕಾರ್ಯದರ್ಶಿ ಗಣಪತಿ ಶಿಪ್ಯಾ ಗಂಗೊಳ್ಳಿ, ಕುಂದಾಪುರ್‍ಚೆ ವಕೀಲ ರವಿಕಿರಣ ಮುರ್ಡೆಶ್ವರ, ವೆಂಕಟರಮಣ ಸೇವಾ ಸಮಿತಿ ಅಧ್ಯಕ್ಷ ದಾಮೋದರ ಪ್ರಭು ನಾಯ್ಕನಕಟ್ಟೆ, ಉಮೇಶ ಮೇಸ್ತ ಗುಜ್ಜಾಡಿ, ಉದ್ಯಮಿ ಎಂ.ಎಂ. ಮೀರನ ಸಾಹೇಬ ಮುಖೇಲ ಸೊಯರೆ ಜಾವ್ನು ಆಶ್ಶಿಲೆ.       ಮ್ಹಾಲಗಡೆ ಸಾಹಿತಿ ಕೆ.ಜಿ. ಶ್ಯಾನುಭೋಗ್, ನಾಟಕ ಕರ್ತ ಶಾಂತಾರಾಮ ಹೆಗ್ಡೆ ಕುಂದಾಪುರ, ಮಂಜುನಾಥ ರಾವ್, ತ್ರಿವಿಕ್ರಮರಾಮ ತಾಂಕಾ ಹೇ ಸಂದರ್ಭಾರಿ ಸಮ್ಮಾನ ಕೆಲ್ಲೆ. ಅಕಾಡೆಮಿ ಸದಸ್ಯ ಓಂ ಗಣೇಶ ತಾನ್ನಿ ಯೇವ್ಕಾರ ಕೆಲಯಾರಿ  ರಿಜಿಸ್ಟ್ರಾರ್ ಡಾ|| ದೇವದಾಸ ಪೈ  ತಾನ್ನಿ ಆಬಾರ ಮಾನಲೆ.

ಕೊಂಕಣಿ ಲಿಪಿ ಪರಿವರ್ತನಾ ಸಾಫ್ಟ್ ವೇರ್ ಕೊಂಕಣ್ ವರ್ಟರ್ ಅನಾವರಣ

ವಿಶ್ವ  ಕೊಂಕಣಿ ಕೇಂದ್ರಾಚೆ ಸಂಸ್ಥಾನ್ ವಿಭಾಗಾಚೆ ಸಹಾಯಕ ನಿರ್ದೇಶಕ ಗುರುದತ್ ಬಂಟ್ವಾಳ್‌ಕರ್ ತಾನ್ನಿ  ಅಭಿವೃದ್ದಿ ಕೆಲೇಲೆ ಕೊಂಕಣಿ ಲಿಪಿ ಪರಿವರ್ತನಾ ಸಾಫ್ಟ್ ವೇರ್ “ಕೊಂಕಣ್ ವರ್ಟರ್ಕ ಇನ್‌ಫೋಸಿಸ್ ಟೆಕ್ನಾಲಜೀಸ್‌ಚೆ ಮ್ಹಾಲಗಡೆ ಉಪಾಧ್ಯಕ್ಷ ಶ್ರೀ ರಾಮದಾಸ್ ಕಾಮತ್ ಯು. ತಾನ್ನಿ ಆಲ್ತಾಂತು ಮಂಗಳೂರಾಚೆ ಕೊಂಕಣಿ ಕೇಂದ್ರಾಂತು ಲೋಕಾರ್ಪಣ ಕೆಲ್ಲಿ. ಮಾಗಿರಿ ಉಲೈಲೆ ತಾನ್ನಿ “ಹೇ ಸಾಫ್ಟ್ ವೇರ್ ಖಾತ್ತಿರಿ ಆನಿ ಇತ್ತುಲೆ ಸಂಶೋಧsನ ಆನಿ ಆಭಿವೃದ್ಧಿ ಚಲ್ತಾ. ಹಾಜ್ಜ ಖಾತ್ತರಿ ಟ್ರೈನಿಂಗ್ ಆಯೋಜನ ಕೋರ್ನು ವಿಂಗವಿಂಗಡ ಸಮುದಾಯಾಚಾಂಕ ಮಾಹಿತಿ ದಿವಚೆ ಯೋಜನ ಆಸ್ಸ ಮ್ಹಳ್ಳಿಂತಿ. ಸಮಾರಂಭಾಂತು ರಾಕ್ಣೋ ಕೊಂಕಣಿ ಪತ್ರಾಚೆ ಸಂಪಾದಕ ಫಾ. ಫ್ರಾನ್ಸಿಸ್ ರೊಡ್ರಿಗಸ್, ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ ಬಸ್ತಿ ವಾಮನ ಶೆಣೈ, ಕಾರ್ಯದರ್ಶಿ ಎನ್. ವೆಂಕಟೇಶ್ ಬಾಳಿಗಾ, ವಿದ್ಯಾರ್ಥಿ ವೇತನ ನಿಧಿಚೆ ಕಾರ್ಯದರ್ಶಿ ಪ್ರದೀಪ್ ಜಿ. ಪೈ, ಚೆನ್ನೈಚೆ ಭಾಷಾ ತಂತ್ರಜ್ಞ ವಿನೋದ್ ರಾಜನ್ ಆದಿ ಗಣ್ಯ  ಉಪಸ್ಥಿತ ಆಶ್ಶಿಲೆಂ.
ಕೊಂಕಣಿ ಸಂವೇದನಾ, ಕಲಾವಿದಾಂಕ ಸನ್ಮಾನ
ಕೊಂಕಣಿ ಸಾಹಿತ್ಯ ಅಕಾಡೆಮಿ ತರಪೇನ ವಿಶಿಷ್ಟ ಸಾಮರ್ಥ್ಯಾಚೆ ಕೊಂಕಣಿ ಭಾಷಾ ಕಲಾವಿದಾಂಕ ಒಳಕ ಕೋರ್ನು ದಿವಚೆ   ‘ಕೊಂಕಣಿ ಸಂವೇದನಾ’ ಕಾರ್ಯಕ್ರಮ ಅಕಾಡೆಮಿಚೆ ಮಾಂಟೋವು ಹಾಂತು ಆಲ್ತಾಂತು ಚಲ್ಲೆ. ವಿಶಿಷ್ಟ ಸಾಮರ್ಥ್ಯಾಚೆ ಸಂಗೀತ ಕಲಾವಿದ ವಿಜಯ ಕುಮಾರ್ ಭಟ್ ತಾಂಕಾ ಹೇ ಸಂದಭಾರಿ ಸನ್ಮಾನ ಕೆಲ್ಲೆ. ಆನ್ನೇಕ್ಳೊ ಸಂಗೀತ ಕಲಾವಿದ ಕ್ಲೋಡ್ ಡಿಸೋಜ ತಾನ್ನಿ ಕಾರ್ಯಕ್ರಮ  ಉದ್ಘಾಟನ ಕೆಲ್ಲಿ. ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಕಾಸರಗೋಡು ಚಿನ್ನಾ ತಾನ್ನಿ ಅಧ್ಯಕ್ಷತಾ ಘೆತ್ತಿಲೆ. ಕೊಡಿಯಾಲ್ ಖಬರ್ ಪಾಕ್ಷಿಕಾಚೆ ಸಂಪಾದಕ ವೆಂಕಟೇಶ್ ಬಾಳಿಗ ಮುಖೇಲ ಸೊಯರೆ ಜಾವ್ನು ಆಯ್ಯಿಲೆ. ಶೀಲಾ ಕಾಮತ್ ತಾನ್ನಿ ಪ್ರಾರ್ಥನ ಮ್ಹಳ್ಳೆ. ರಿಜಿಸ್ಟ್ರಾರ್ ಡಾ.ಬಿ.ದೇವದಾಸ್ ಪೈ ತಾನ್ನಿ ಆಬಾರ ಮಾನಲೆ.ಸದಸ್ಯ ಸಂಚಾಲಕ ಮಹೇಶ್ ಆರ್. ನಾಯಕ್ ತಾನ್ನಿ ಕಾರ್ಯಕ್ರಮ ನಿರೂಪಣ ಕೆಲ್ಲ್ಲಿ. ಸಭಾ ಕಾರ್ಯಕ್ರಮಾಚೆ ಉಪರಾಂತ ವಿಶಿಷ್ಟ ಸಾಮರ್ಥ್ಯಾಚೆ ಸಂಗೀತ ಕಲಾವಿದ ವಿಜಯ ಕುಮಾರ್ ಭಟ್  ತಾಂಗೆಲ ತಾಕೂನು ಸಂಗೀತ ಕಾರ್ಯಕ್ರಮ ಚಲ್ಲ್ಲಿ. ತಾಂಗೆಲ ಪೂತು ಕಾರ್ತಿಕ್ ಭಟ್ ತಾನ್ನಿ ತಬ್ಲಾಂತು ಸಹಕಾರ ದಿಲ್ಲಿ.
ಕೊಂಕಣಿ ಸಮೃದ್ದ ಭಾಷೆ- ಮು.ಮ ಚಂದ್ರು 
ಕೊಂಕಣಿ ಭಾಷೆ ಏಕ ಸಮೃದ್ಧ ಜಾಲೇಲೆ ಆನಿ ಸುಂದರಭಾಸ. ಕೊಂಕಣಿ ಸಂಸ್ಕೃತಿ ವ್ಹರೋನು, ವಾಡ್ಡೋವ್ನು ಆನ್ನಿಕೆ ಸಮೃದ್ಧ ಕೊರಕಾ.   ಮ್ಹೊಣು ಕನ್ನಡ ಅಭಿವೃದ್ಧಿ ಪ್ರಾಧಿಕಾರಾಚೆ ಅಧ್ಯಕ್ಷ, ಚಿತ್ರ ನಟ ಜಾಲೇಲೆ ಮುಖ್ಯಮಂತ್ರಿ ಚಂದ್ರು ತಾನ್ನಿ ಸಾಂಗಲೆ.ತಾನ್ನಿ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೆ ಕೊಂಕಣಿ ಮಾಂಟೋವು ಹಾಂತು ದಿನಾಂಕ: ೨೫-೮-೨೦೧೨ಕ ವಾಂಟೊ ಘೇವ್ನು ಸಂವಾದ ಕಾರ್ಯಕ್ರಮಾಂತು ಉಲೈತಾಶ್ಶಿಲೆ.  ಸಂವಾದಾಂತು ತುಳು ಚಲನಚಿತ್ರ ನಿರ್ದೇಶಕ ಶ್ರೀ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್, ರಂಗನಟ ವಿಠೋಭ ಭಂಡಾರ್‌ಕರ್, ಶ್ರೀಮತಿ ಸ್ಮಿತಾ ಪ್ರಭು, ಶ್ರೀ ಎಂ.ಆರ್.ಕಾಮತ್. ಶ್ರೀ ಲಾರೆನ್ಸ್, ಶ್ರೀಮತಿ ಅನಿತಾ ಕಿಣಿ ಸಮೇತ ಸಬಾರ ಪ್ರತಿಷ್ಠಿತ ಲೋಕಾನಿ ವಾಂಟೊ ಘೆತ್ತಿಲೆ. ಅಕಾಡೆಮಿ ಸದಸ್ಯ ಶ್ರೀ ರಾಯ್‌ಕ್ಯಾಸ್ಟಲಿನೊ, ಶ್ರೀ ಮಹೇಶ್ ಆರ್ ನಾಯಕ್. ಶ್ರೀ ಅಶೋಕ್ ಶೇಟ್ ಮುಖ್ಯಮಂತ್ರಿ ಚಂದ್ರುಂಕ ಸ್ವಾಗತ ಕೆಲ್ಲಿಂತಿ. ಅಕಾಡೆಮಿ ರಿಜಿಸ್ಟ್ರಾರ ಡಾ| ಬಿ ದೇವದಾಸ ಪೈ ತಾನ್ನಿ ಯೇವ್ಕಾರ ಕೆಲ್ಲ್ಲಿ. ಸುಮಾರ ಏಕ ಗಂಟೋ ಚಲೇಲೆ ಸಂವಾದ ಕಾರ್ಯಕ್ರಮಾಂತು ಬರಪೂರ ಕೊಂಕಣಿ ಲೋಕ ಜಮೀಲೆ.
 ಕೊಂಕಣಿ ಶಿಕ್ಷಣ ಕಾರ್ಯಾಗಾರ
“ಕೊಂಕಣಿ ಭಾಷೆಚೆ ಭವಿಷ್ಯ ಕೊಂಕಣಿ ಶಿಕೈಚೆ ಶಿಕ್ಷಕಾಲೊ ಹಾತ್ತಾಂತು ಆಸ್ಸ. ತ್ಯಾ ವ್ಹರೋನು ಘೆವ್ಚೆ ಜವಾಬ್ದಾರಿ ತಾನ್ನಿ ಘೇವ್ನು, ಕೊಂಕಣಿ ಚರ್ಡುವಾಂಕ ಕೊಂಕಣಿ ಭಾಷಾಭಿಮಾನ ಯವ್ಚ ವರಿ ಕೊರುಕಾ. ಮ್ಹೊಣು ಕೊಂಕಣಿ ಆಕಾಡೆಮಿ ಅಧ್ಯಕ್ಷ ಶ್ರೀ ಕಾಸರಗೋಡು ಚಿನ್ನಾ ತಾನ್ನಿ ಸಾಂಗಲೆ.  ತಾನ್ನಿ ಕೊಂಕಣಿ ಶಿಕ್ಷಕ ಖಾತ್ತಿರಿ ಅಕಾಡೆಮಿನ ದಿ. ೬-೮-೨೦೧೨ ಆನಿ ೭-೮-೨೦೧೨ ದಿವಸು ಚಲೈಲೆ ಕೊಂಕಣಿ ಶಿಕ್ಷಣ ಕಾರ್ಯಾಗಾರಾಚೆ ಸಮಾರೋಪಾಂತು  ಉಲೈತಾಶ್ಶಿಲೆ. ಕೊಂಕಣಿ ಶಿಕ್ಷಕ ದಿನಾಚರಣೆ ಸಪ್ಟೆಂಬರ್ ೬ ದಿವಸು ಮಂಗಳೂರಾಂತು  ಆಚರಣ ಕರತಾತಿ ಮ್ಹೊಣು ತಾನ್ನಿ ಹೇ ವೇಳ್ಯಾರಿ ಸಾಂಗಲೆ.  ಡಿಸೆಂಬರಾಂತು ವಿದ್ಯಾರ್ಥಿಯುವಜನಸಮ್ಮೇಳನ ಆಯೋಜನ ಕೊರಚೆ ಆಸ್ಸ ಮ್ಹೊಣೂ ತಾನ್ನಿ ಸಾಂಗಲೆ. ಸಾಸ್ತಾನಾಚೆ ಸಂತ ಅಂತೋನಿ ಚರ್ಚ್ ಧರ್ಮಗುರು ವಂ| ವಲೇರಿಯನ್ ಫೆರ್ನಾಂಡಿಸ್ ಕಾರ್ಯಕ್ರಮಾಂತು ಉಪಸ್ಥಿತ ಆಶ್ಶಿಲೆಂ. ಹೇ ದೋನ ದಿವಸಾಚೆ ಕಾರ್ಯಾಗಾರಾಂತು ಸುಮಾರ ೫೩ ಶಾಳೆಚೆ ಶಿಕ್ಷಕಾನಿ ವಾಂಟೊ ಘೆತ್ತಿಲೆ. ಪ್ರಚಾರ ಸಂಚಾಲನಾಚೆ  ಸದಸ್ಯ ಜಾಲೇಲೆ ಶ್ರೀ ವಿತೋರಿ ಕಾರ್ಕಳ್ ತಾನ್ನಿ ಕಾರ್ಯಕ್ರಮ ನಿರೂಪಣ ಕೆಲ್ಯಾರಿ, ಅಕಾಡೆಮಿ ರಿಜಿಸ್ಟ್ರಾ ಡಾ| ಬಿ ದೇವದಾಸ ಪೈ ತಾನ್ನಿ ಆಬಾರ ಮಾನಲೆ.
ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜ, ಧಾರವಾಡ
ಧಾರವಾಡಾಚೆ ಗೌಡ ಸಾರಸ್ವತ ಸಮಾಜಾಂತು ಅಧಿಕ ಮಾಸ ಪ್ರಯುಕ್ತ ತಾ. ೯-೯-೨೦೧೨ ದಿವಸು ಲಘುವಿಷ್ಣು ಹವನ, ಅಧಿಕ ಮಾಸಾಚೆ ಮಹಾತ್ಮೆ ಖಾತ್ತಿರಿ ವೇ.ಮೂ. ಚರಣದಾಸ ಭಟ್ ತಾಂಗೆಲ ತಾಕೂನು ವಿವರಣ, ಮಹಾ ಮಂಗಳಾರತಿ, ಬ್ರಾಹಣ ಸುವಾಸಿನಿ ಪೂಜಾ, ಮಹಾ ಸಂತರ್ಪಣ ಇತ್ಯಾದಿ ಕಾರ್ಯಾಕ್ರಮ ಚಲ್ಲಿ. ಆನಿ ಶ್ರೀ ಗಜಾನೋತ್ಸವ ಪ್ರಯುಕ್ತ ತಾ. ೧೯-೯-೨೦೧೨ ದಾಕೂನು ೨೩-೦೯-೨೦೧೨ ಪರ್ಯಂತ ಶ್ರೀ ಗಣೇಶ ಪ್ರತಿಷ್ಠಾಪನ, ತ್ರಿಕಾಲ ಪೂಜಾ, ಗಣಹೋಮು, ಮೋದಕ ಹವನ, ಸಮಾರಾಧನ, ಭಜನ, ಭಕ್ತಿಗೀತಾ, ರಂಗಪೂಜಾ, ಶ್ರೀ ಗಜಾನನ ವಿಸರ್ಜನ ಇತ್ಯಾದಿ ಕಾರ್ಯಕ್ರಮ ಚೊಲಚೆ ಆಸ್ಸುನು ಧಾರವಾಡ ಸಮಾಜ ಬಾಂಧವಾನಿ ತನುಮನಧನಾನಿ ವಾಂಟೊ ಘೇವ್ನು ವಿಘ್ನ ವಿನಾಶಕಾಲೆ ಕೃಪೇಕ ಪಾತ್ರ ಜಾವ್ಯೇತ.

ಮೂಡುಬಿದಿರೆಚೆ ಮ್ಗಾಲಗಡೆ ವರ್ತಕ ಐ.ಯೋಗೀಶ್ ಪ್ರಭು ದೈವಾಧೀನ

ಮೂಡಬಿದ್ರೆಚೆ ಮ್ಹಾಲಗಡೆ ಆನಿ ಪ್ರಸಿದ್ಧ ಜಿನಸಿ ವರ್ತಕ ಇರುವೈಲು ಯೋಗೀಶ್ ಪ್ರಭು(೭೮) ಅಲ್ಪಕಾಲಾಚೆ  ಅನಾರೋಗ್ಯಾನಿ  ಕಲ್ಲಬೆಟ್ಟು ಗ್ರಾಮಾಚೆ  ಗಂಟ್ಟಾಲ್‌ಕಟ್ಟೆಚೆ ತಾಂಗೆಲೆ ಸ್ವಗೃಹಾಂತು ಆಲ್ತಾಂತು ದೈವಾಧೀನ ಜಾಲ್ಲೆ ಮ್ಹೊಣು ಕಳೋವಚಾಕ ಮಸ್ತ ವಿಷಾಧ ಜಾತ್ತಾ. ತಾನ್ನಿ ಬಾಯ್ಲ, ಪೂತು ಖ್ಯಾತ ವರ್ತಕ ಐ.ರಾಘವೇಂದ್ರ ಪ್ರಭು  ಆನಿ ತಿಗ್ಗ ಲೋಕ ಚೆಲ್ಲಿಯಾ ಚರ್ಡುವಾಂಕ ಸೋಣು ಘೆಲ್ಲಿಂತಿ.
೧೯೪೮ಂತು ಗಂಟಾಲ್‌ಕಟ್ಟೆಂತು ಆಪಣಾಂಗೆಲೆ ೧೬ ವರ್ಷ ವಯಾಂತು ಜಿನಸಿ ವ್ಯವಹಾರು ಸೂರು ಕೆಲೇಲೆ ತಾನ್ನಿ ೧೯೬೪ಂತು ಮೂಡುಬಿದಿರೆಕ ಯೇವ್ನು ಪೆಂಟಾಚೆ ಮಧ್ಯ ಭಾಗಾಂತೂ ಆಪಣಾಲೆ ವೈವಾಟ ಸೂರು ಕೆಲ್ಲೆ.  ಮೂಡುಬಿದಿರೆಂತೂ ಪ್ರಥಮ ಜಾವ್ನು  ಬಹುಮಹಡಿ ಇಮಾರತ್ ಬಾಂದಿಸಿಲೆ ಶ್ರೇಯ ತಾಂಗೆಲೆ.  ‘ಯೋಗೀಶೆರ್‍ನ ಅಂಗಡಿ ಮ್ಹಣಚೆ ತಾರೀಪಾ ಬರಶಿ ವ್ಯವಹಾರಾಂತು ಆಪಣಾಲೆ ಸರಳತಾ, ಶಿಸ್ತ ಆನಿ ಸಜ್ಜನಿಕೇನ ತಾನ್ನಿ ಸರ್ವಾಂಲೆ ಅಭಿಮಾನಾಕ ಪಾತ್ರ ಜಾಲೇಲೆ.
ಮೂಡುಬಿದಿರೆ ಶ್ರೀ ವೆಂಕಟರಮಣ ಆನಿ ಶ್ರೀ ಹನುಮಂತ ದೇವಳಾಚೆ ಮೊಕ್ತೇಸರ ಜಾವ್ನು, ಜಿ.ಎಸ್.ಬಿ. ಸೇವಾ ಸಮಾಜಾಚೆ ಸಕ್ರಿಯ ಪದಾಧಿಕಾರಿ ಜಾವ್ನು, ಇರುವೈಲು ಶ್ರೀ ದುರ್ಗಾಪರಮೇಶ್ವರೀ ದೇವಳಾಚೆ ಜೀರ್ಣೋದ್ಧಾರ ಸಮಿತಿ ಅಧ್ಯಕ್ಷ ಜಾವ್ನು ಹೇ ಪಯಲೆ ತಾನ್ನಿ ಅಪಾರ ಸೇವಾ ಪಾವಯ್ಲಾ.  ಕೆದನಾಂಯಿ ಶುಭ್ರ, ಶ್ವೇತ ವಸ್ತ್ರಧಾರಿ ಜಾವ್ನು, ಧಂವೆ ಟೊಪ್ಪಿ ಘಾಲ್ನು ಘೇವ್ನು ತಸ್ಸಲೆ ದಾರಾಳ ಮನಾನ ಸಾಮಾಜಿಕ, ಧಾರ್ಮಿಕ ರಂಗಾಕ ಮಸ್ತ ಸೇವಾ ಪಾವಯ್ಲ್ಯಾ.  ಸಂಘಪರಿವಾರಾಚೆ ಹಿತ ಚಿಂತಕ ಜಾಲೇಲೆ  ತಾನ್ನಿ ಹರಿ ಗುರು ಭಕ್ತ ಜಾವ್ನು ಆಪಣಾಂಗೆಲೆ ಅಪಾರ ಧಾರ್ಮಿಕ ಶ್ರದ್ಧೇನ ಶ್ರೀ ಕಾಶೀ ಮಠ ಸಂಸ್ಥಾನಾಚೆ ಶಿಷ್ಯವರ್ಗಾಂತು ಆಪ್ತ ಮ್ಹೊಣು ನಾಂವ ಪಾವ್ಲಿಂತಿ.
 ಶಾಸಕ ಕೆ.ಅಭಯಚಂದ್ರ ಜೈನ್, ಮಾಜಿ ಸಚಿವ ಅಮರನಾಥ ಶೆಟ್ಟಿ, ಆಳ್ವಾಸ್ ಶಿಕ್ಷಣ ಸಂಸ್ಥೆಚೆ ಅಧ್ಯಕ್ಷ ಡಾ.ಎಂ.ಮೋಹನ್ ಆಳ್ವ, ಬಿ.ಜೆ.ಪಿ ಜಿಲ್ಲಾ ಉಪಾಧ್ಯಕ್ಷ ಕೆ.ಪಿ.ಜಗದೀಶ ಅಧಿಕಾರಿ, ಕ್ಷೇತ್ರ ಪ್ರಧಾನ ಕಾರ್ಯದರ್ಶಿ ಸುದರ್ಶನ ಎಂ,  ಪುರಸಭಾಧ್ಯಕ್ಷ ರತ್ನಾಕರ ದೇವಾಡಿಗ, ಮೂಡುಬಿದಿರೆಚೆ ಶ್ರೀ ವೆಂಕಟರಮಣ ಆನಿ ಶ್ರೀ ಹನುಮಂತ ದೇವಳಾಚೆ ಆಡಳಿತ ಮೊಕ್ತೇಸರ ಜಿ. ಉಮೇಶ್ ಪೈ, ಮಂಗಳೂರು ತಾಲೂಕು ಎ.ಪಿ.ಎಂ.ಸಿ ಅಧ್ಯಕ್ಷ ಕೆ.ಕೃಷ್ಣರಾಜ ಹೆಗ್ಡೆ  ಆನ್ನಿ ಇತರ ಪ್ರಮುಖಾನಿ ತಾಂಗೆಲೆ ಘರ್‍ಕಡೆ ವಚ್ಚುನು ಐ. ಯೋಗೀಶ ಪ್ರಭು ತಾಂಗೆಲೆ ಅಂತಿಮ ದರ್ಶನ  ಘೇವ್ನು ಮಸ್ತ ಸಂತಾಪ ವ್ಯಕ್ತ ಕೆಲ್ಲೆ. ಆನಿ ದಿ|| ಪ್ರಭುಂಗೆಲೆ ಗೌರವಾರ್ಥ ಪ್ರಮುಖ ಜಿನಸಿ ವ್ಯಾಪಾರಸ್ಥಾನ ಆಪಣಾಂಗೆಲೆ ವೈವಾಟ ಬಂದ್ ಕೋರ್ನು ತಾಂಕಾ ಗೌರವ ಪಾವಯಲೆ.  ಸರಸ್ವತಿ ಪ್ರಭಾ ಕೊಂಕಣಿ ಮಾಸಿಕಾಚೆ ಅಜೀವಾ ಚಂದಾದಾರ ಜಾವ್ನಾಶ್ಶಿಲೆ ತಾನ್ನಿ ಪ್ರತಿವರ್ಷ ದೀಪಾವಳಿ ಸಂದರ್ಭಾರಿ ಜಾಹೀರಾತು ದೀವ್ನು ಆಮಕಾ ಪ್ರೋತ್ಸಾಹ ದಿತ್ತಾ ಆಶ್ಶಿಲೆ ಮ್ಹೊಣು ಆಮ್ಮಿ ಕೃತಜ್ಞತೇನ ುಡಗೋಸು ಕೋರ್ನು ಘೆತ್ತಾ ಆಸ್ಸತಿ.

ಆಕಾಡೆಮಿ ತರಪೇನ ಕೊಂಕಣಿ ಝೇಂಕಾರ

ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚಾನ ದಿ. ೧-೯-೨೦೧೨ ದಿವಸು ಅಕಾಡೆಮಿಚೆ ಮಾಂಟೋವುಂತು ಯುವಕಲಾವಿದ ಜಾಲೇಲೆ ಡೀಲನ್ ಆನಿ ಲವಿಟಾ ಆನಿ ತಂಡಾಚೆಲೆ ಕೊಂಕಣಿ ಝೇಂಕಾರ ಯುವ ಸಂಗೀತ ಕಾರ್ಯಕ್ರಮ ಆಯೋಜನ ಕೆಲೇಲೆ. ಕಾರ್ಯಕ್ರಮಾಚೆ ಉದ್ಘಾಟಕ ಜಾವ್ನು ಕೊಂಕಣಿ ನಾಟಕಕಾರ ಶ್ರೀ ಅರುಣ್ ರಾಜ್ ರೊಡ್ರಿಗಸ್ ಆಯ್ಯಿಲೆ. ಮುಖೇಲ ಸೊಯರೆ ಜಾವ್ನು  ಕೊಂಕಣಿ ಸಾಂಸ್ಕೃತಿಕ ಸಂಘಾಚೆ ಮಾಜಿ ಅಧ್ಯಕ್ಷ ಶ್ರೀ ಎಮ್.ಅರ್.ಕಾಮತ್ ತಾನ್ನಿ ಉಪಸ್ಥಿತ ಆಶ್ಶಿಲೆ. ಕಾರ್ಯಕ್ರಮಾಚೆ ಅಧ್ಯಕ್ಷತಾ ಅಕಾಡೆಮಿ ಅಧ್ಯಕ್ಷ ಶ್ರೀ ಕಾಸರಗೋಡು ಚಿನ್ನಾ ತಾನ್ನಿ ಘೆತ್ತಿಲೆ. ಹೇ ಸುವೇಳ್ಯಾರಿ ಖ್ಯಾತ ಸಂಗೀತಗಾರ ಶ್ರೀ ಮುರಳಿಧರ ಕಾಮತ್ ಆನಿ  ಶ್ರೀಮತಿ ಬಬಿತಾ ಡೇಸಾ ಹಾಂಕಾ ಸಾಧನಾ ಪುರಸ್ಕಾರ ದೀವ್ನು ಗೌರವ ಕೆಲ್ಲಿ. ಅಕಾಡೆಮಿ ರಿಜಿಸ್ಟ್ರಾರ್ ಡಾ.ಬಿ.ದೇವದಾಸ್ ಪೈ, ಸದಸ್ಯ ಜಾಲೇಲೆ ಮಹೇಶ ಆರ್. ನಾಯಕ್ ಆನಿ ಅಶೋಕ ಶೇಟ್ ಹೇ ವೇಳ್ಯಾರಿ ಉಪಸ್ಥಿತ ಆಶ್ಶಿಲೆ.

ಗಮಕ ವಾಚನ ಆನಿ ವ್ಯಾಖ್ಯಾನ

ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ತರಪೇನ ಯಲ್ಲಾಪುರಾಚೆ ಮಂಚಿಕೇರಿ ಗಾಂವಾಂತು ಆರ್ತ ಚಲೇಲೆ ಕೊಂಕಣಿ ಸಾಂಸ್ಕೃತಿಕ ಕಲಾ ಸಾಂಜ್ವಾಳ ಕಾರ್ಯಕ್ರಮಾಂತು ಹಾರ್ಸಿಕಟ್ಟಾಚೆ ಶ್ರೀ ವಿಶ್ವನಾಥ ಶೇm ಹಾನ್ನಿ ಭಾಮಿನಿ ಷಟ್ಪದಿನಿ ರಚನ ಕೆಲೇಲೆ ಹಜಾರ ಭರಿ ಪದ್ಯಾಂತು ಸೀತಾ ಸ್ವಯಂವರ ವಿಂಚೂನು ತಾನ್ನಿ ರಾಗಬದ್ಧ ಜಾವ್ನು ಗಾಯನ ಕೆಲ್ಲಿ. ತಾಂಗೆಲೆ ಗಾಯನಾಕ ಚಿಕ್ಕಮಗಳೂರು ಜಿಲ್ಲೆಚೆ ಗಮಕಕಲಾ ಪರಿಷತ್ತಾಚೊ ಅಧ್ಯಕ್ಷು ಆನಿ ಪ್ರವಚನಕಾರು  ಶ್ರೀ ರಾಮಚಂದ್ರ ಸುಬ್ರಾಯ ಶೇಟ್ ಹಾನ್ನಿ ವ್ಯಾಖ್ಯಾನ ಕೆಲ್ಲಿ. ತಾನ್ನಿ ಶ್ರೀ ರಾಮಚಂದ್ರಾಲಿಂ ಆನಿ ಸೀತಾ ಮಾತೇಲೆ ವಿಶೇಷ ಗುಣಗಾನ ಕೋರ್ನು ಜಮಿಲೆ ಪ್ರೇಕ್ಷಕಾಂಕ ಕೊಂಕಣಿಂತು ಸೀತಾ ಸ್ವಯಂವರಾಚೆ ಗೋಡಿ ವಾಂಟಿಲೆ. ಹೇ ಸಮಾರಂಭಾಚೆ ಅಧ್ಯಕ್ಷತಾ ಅಕಾಡೆಮಿ ಅಧ್ಯಕ್ಷ ಶ್ರೀ ಕಾಸರಗೋಡು ಚಿನ್ನಾ ತಾನ್ನಿ ಘೆತ್ತಿಲೆ. ರಜಿಸ್ಟ್ರಾರ್ ಶ್ರೀ ದೇವಿದಾಸ ಪೈ ತಾನ್ನಿ ಯೇವ್ಕಾರ ಕೆಲ್ಲಿ. ಶ್ರೀ ನಾಗೇಶ ಅಣ್ವೇಕರಾನಿ ಆಬಾರ ಮಾನಲಿ.  ಕಾರ್ಯಕ್ರಮಾಕ ಮಸ್ತ ಕೊಂಕಣಿಗ ಜಮ್ಮಿಲೆ.

ಗೌಡ ಸಾರಸ್ವತ ಬ್ರಾಹ್ಮಣ ಸಭಾ, ಮೈಸೂರು

ಮೈಸೂರಾಚೆ ಜಿ.ಎಸ್.ಬಿ ಸಭಾಚೆ ೪೭ ವರ್ಷಾಚೆ ಸರ್ವಸದಸ್ಯಾಂಗೆಲೆ ವಾರ್ಷಿಕ ಸಭಾ ತಾ. ೨೨-೦೭-೨೦೧೨ ದಿವಸು ಸಕ್ಕಾಣಿ ಗೋವಿಂದರಾವ್ ಮೆಮೋರಿಯಲ್ ಹಾಲಾಂತು ಸಭಾಚೆ ಅಧ್ಯಕ್ಷ ಜಾಲೇಲೆ ಶ್ರೀ ಎಂ. ಜಗನ್ನಾಥ ಶೆಣೈ ತಾಂಗೆಲೆ ಅಧ್ಯಕ್ಷಪಣಾರಿ ಚಲ್ಲೆ. ಶ್ರೀ ಸತೀಶ ಭಂಡಾರ್‌ಕರ ತಾನ್ನಿ ಸುರವೇಕ ಪ್ರಾರ್ಥನಾ ಮ್ಹಳ್ಳೆ. ಅಧ್ಯಕ್ಷ ಶ್ರೀ ಎಂ. ಜಗನ್ನಾಥ ಶೆಣೈ ತಾನ್ನಿ ಸುರವೇಕ ಸರ್ವಾಂಕ ಯೇವ್ಕಾರ ಕೆಲ್ಲಿಂತಿ. ಸರಲೀಲೆ ಸಮಾಜ ಬಾಂಧವಾಂಕ ಸರ್ವ ಏಕ ಮಿನಿಟ ಮೌನ ರಾಬ್ಬೂನು ಸಂತಾಪ ಪಾವೈಲೀಂತಿ. ಶ್ರೀ ಗುರುಪ್ರಸಾದ ಹೆಗಡೆ ತಾನ್ನಿ ಮಹಾಸಭಾಚೆ ನಡಾವಳಿ ವಾಜ್ಜಿಲೆ. ಸಭಾಚೆ ಕಾರ್ಯದರ್ಶಿ ಶ್ರೀ ಎಂ. ರಾಂಪ್ರಸಾದ್ ತಾನ್ನಿ ೨೦೧೦-೧೧ ಚೆ ವಾರ್ಷಿಕ ನಡಾವಳಿ ಸಭೆ ಮುಖಾರಿ ದವರ್‍ಲಿಂತಿ. ಖಜಾಂಚಿ ಜಾಲೇಲೆ ಶ್ರೀ ಕೆ. ಮಹೇಶ್ ಕಾಮತ್ ತಾನ್ನಿ ೨೦೧೧-೧೨ ಸಾಲಾಚೆ ಬಜೆಟ್ ಮಂಡನ ಕೆಲ್ಲಿಂತಿ. ಶ್ರೀ ವಸಂತ ಪೈ ತಾಂಗೆಲೆ ಆಬಾರ ಮನ್ನಣೆ ಬರಶಿ ಮಹಾಸಭಾ ಸಮಾಪ್ತಿ ಜಾಲ್ಲೆ.
ಸಮಾಜಾಚೆ ವಾರ್ಷಿಕೋತ್ಸವ ಪ್ರಯುಕ್ತ ೨೨-೦೭-೨೦೧೨ ದಿವಸು ಆದರ್ಶ ದಂಪತಿ ಕಾರ್ಯಕ್ರಮ ಘಡಲೆ. ಆದರ್ಶ ದಂಪತಿ ಸ್ಫರ್ಧೆಂತು ವಾಂಟೊ ಘೆತ್ತಿಲೆ ಜಿ.ಆರ್.ಎಸ್. ಫ್ಯಾಂಟಸಿ ಪಾರ್ಕಾಚೆ ಮುಖ್ಯಸ್ಥ ಜಾಲೇಲೆ ಶ್ರೀ ಸುಬ್ರಾಯ ಬಾಳಿಗ ಆನಿ ಶ್ರೀಮತಿ ಪುಷ್ಪಲತಾ ತಾಂಕಾ ಆತ್ಮೀಯ ಜಾವ್ನು ಸಂಮಾನ ಕೆಲ್ಲೆ. ಮಾಗಿರಿ ಕಾರ್ಯಕ್ರಮಾಂತು ಜಿಕ್ಕಿಲೆ ದಂಪತೀಂಕ ಬಹುಮಾನ ವಾಂಟಪ ಚಲ್ಲೆ. ಹೇ ಕಾರ್ಯಕ್ರಮಾಕ ಸಹಕಾರ ದಿಲೇಲೆ ಸರ್ವ ಸಮಾಜ ಬಾಂಧವಾಂಕ ಆನಿ ಪ್ರಾಯೋಜಕಾಂಕ ಶ್ರೀ ಸುರೇಶ ನಾಯಕ್ ಆನಿ ಮಮತಾ ಕಿಣಿ ತಾನ್ನಿ ಅಭಿನಂದನ ಪಾವಯ್ಲ್ಯಾ.
ಸಾಂಜ್ವಾಳಾ ಚಲೀಲೆ ವಾರ್ಷಿಕೋತ್ಸವಾಚೆ ಸಭಾ ಕಾರ್ಯಕ್ರಮಾಚೆ ಅಧ್ಯಕ್ಷತಾ ಸಮಾಜಾಚೆ ಅಧ್ಯಕ್ಷ ಜಾಲೇಲೆ ಶ್ರೀ ಜಗನ್ಮಾಥ ಶೆಣೈ ತಾನ್ನಿ ಘೆತ್ತಿಲೆ. ಮುಖೇಲ ಸೊಯರೆ ಜಾವ್ನು ಮಂಗಳೂರ್‍ಚೆ ಕೊಡಿಯಾಲ್ ಖಬರ ಕೊಂಕಣಿ ಪತ್ರಾಚೆ ಶ್ರೀ ವೆಂಕಟೇಶ ಬಾಳಿಗಾ ಆಯ್ಯಿಲೆ. ಸಮಾಜಾಚೆ ಉಪಧ್ಯಾಕ್ಷ ಶ್ರೀ ವಿಜಯನಾಥ ಭಟ್, ಕಾರ್ಯದರ್ಶಿ ಶ್ರೀ ಅಚ್ಯುತ್ ರಾಂಪ್ರಸಾದ ಕಾಮತ್ ತಾನ್ನಿ ವೇದಿಕೇರಿ ಉಪಸ್ಥಿತ ಆಶ್ಶಿಲೆಂ. ಶ್ರೀ ಸುರೇಶ ನಾಯಕ್ ತಾಂಗೆಲೆ ವಂದನಾರ್ಪಣೆ ಬರಶಿ ಸಭಾ ಕಾರ್ಯಕ್ರಮ ಮುಕ್ತಾಯು ಜಾಲ್ಲೊ. ಮಾಗಿರಿ ಸಮಾಜ ಬಾಂಧವಾ ದಾಕೂನು ವಿಂಗವಿಂಗಡ ಮನರಂಜನಾ ಕಾರ್ಯಕ್ರಮ ಚಲ್ಲೆ. ಆನಿ ಕೊಂಕಣಿ ಸಾಮಾಜಿಕ ನಾಟಕ “ಘರ ಘರಚಿ ಕಾಣಿ ಪ್ರದರ್ಶಿತ ಜಾಲ್ಲೆ. ಸಮಾಜ ಬಾಂಧವ ವ್ಹಡ ಸಂಖ್ಯಾರಿ ಸಮಾರಂಭಾಂತು ಉಪಸ್ಥಿತ ಆಶ್ಶಿಲೆಂ.
ಮೈಸೂರು ಜಿ.ಎಸ್.ಬಿ. ಸಭಾಚೆ ವಾರ್ಷಿಕೋತ್ಸವ ಪ್ರಯುಕ್ತ ತಾ. ೧೫-೦೭-೨೦೧೨ ದಿವಸು ಚಿತ್ತರ ಬರೈಚೆ ಸ್ಫರ್ಧಾ ಆನಿ ಗೀತಪಠಣ ಸ್ಪರ್ಧಾ ಆಯೋಜನ ಕೆಲೇಲೆ.
ತಾ. ೨೧-೦೭-೨೦೧೨ ದಿವಸು ನವೀನ ಜಾವ್ನು ಬಾಂದಿಲೆ “ಮುಕುಂದ ಸದನಾಂತು ಮೈಸೂರು ಜಿ.ಎಸ್.ಬಿ ಸಭಾಚೆ ಅಧ್ಯಕ್ಷ ಶ್ರೀ ಎಂ. ಜಗನ್ಮಾಥದ ಶೆಣೈ ದಂಪತೀನ ಗಣೋಮು ಚಲೋವ್ನು ದಿಲ್ಲೆ. ದಿ. ೨-೦೮-೨೦೧೨ ದಿವಸು ಜಿ.ಎಸ್.ಬಿ. ಸಭಾ ಆನಿ ಶ್ರೀ ಕಾಶೀಮಠಾಚೆ ಶ್ರೀ ರಾಮಂದಿರಾಂತು ಋಗುಪಾಕರ್ಮ ಹೋಮು ಬರಶಿ ಸಂಪನ್ನ ಜಾಲ್ಲೆ. ಹೇ ಪೂರಾ ಕಾರ್ಯಕ್ರಮಾಂತು ಸಮಾಜ ಬಾಂಧವ ವಿಶೇಷ ಸಂಖ್ಯಾರಿ ಉಪಸ್ಥಿತ ಆಶ್ಶಿಲೆಂ.

ಸರಸ್ವತಿ ಸೌಹಾರ್ದ ಸಹಕಾರಿ ನಿಯಮಿತ, ತೀರ್ಥಹಳ್ಳಿ
ಇಸ್ವಿ ೨೦೧೦ಂತು ಸುರುವಾತ ಜಾಲೇಲೆ ತೀರ್ಥಹಳ್ಳಿಚೆ ಶ್ರೀ ಸರಸ್ವತಿ ಸೌಹಾರ್ದ ಸಹಕಾರಿ ನಿಯಮಿತ ಹಾಜ್ಜೆ ತಿನ್ನೀಚೆ ಸರ್ವ ಸದಸ್ಯಾಂಗೆಲೆ ಮಹಾ ಸಭಾ ತೀರ್ಥಹಳ್ಳಿಚೆ ಶ್ರೀ ರಾಮಮಂದಿರಾಂತು ಸಹಕಾರಿ ಹಾಜ್ಜೆ ಅಧ್ಯಕ್ಷ ಜಾಲೇಲೆ ಶ್ರೀ ಬಾಳೇಬೈಲು ರಾಘವೇಂದ್ರ ಹಾಂಗೆಲೆ ಅಧ್ಯಕ್ಷತೆಂತು ೧೮-೦೮-೨೦೧೨ ದಿವಸು ಚಲ್ಲೆ. ಸುರವೇಕ ಸಹಕಾರಿಚೆ ಉಪಾಧ್ಯಕ್ಷ ಶ್ರೀ ಸಂದೇಶ ಜವಳಿ ತಾನ್ನಿ ಸಹಕಾರಿ ಅಭಿವೃದ್ಧಿಚೆ  ವಿವರ ವಿಸ್ತಾರ ಜಾವ್ನು ಸಾಂಗೂನು ಸರ್ವಾಂಕ ಯೇವ್ಕಾರ ಕೆಲ್ಲೆ. ಸಹಕಾರಿಚೆ ನಿರ್ದೇಶಕ ಶ್ರೀ ನಾಗರಾಜ ಪ್ರಭು ತಾನ್ನಿ ಸರ್ವಸದಸ್ಯಾಲೆ ನೋಟಿಸ್ ವಾಜ್ಜಿಲೆ. ನಿರ್ದೇಶಕ ಶ್ರೀ ಪ್ರಶಾಂತ ಮಕ್ಕಿಮನೆ ತಾನ್ನಿ ಮಾಕಶಿ ಮಹಾಸಭೆಚೆ ಕಾರ್ಯಾವಳಿ  ವಾಜ್ಜಿಲೀಂತಿ. ಸಹಕಾರಿಚೆ ವ್ಯವಸ್ಥಾಪಕ ನಿರ್ದೇಶಕ ಶ್ರೀ ಅಚ್ಚುತ್ ಬಿ.ಎಸ್. ತಾನ್ನಿ ವಾರ್ಷಿಕ ಆಡಳಿತ ವರದಿ ಆನಿ ಲೆಕ್ಕ ಪರಿಶೋಧಕ ವರದಿ ಮಹಾಸಭೆ ಮುಖಾರಿ ದವರ್‍ಲೆ.
ಶ್ರೀ ಸಂದೇಶ್ ಜವಳಿ ತಾನ್ನಿ ೨೦೧೧-೧೨ ವರ್ಷಾಚೆ ಮುನಾಪೇ ಅಂಕಿ-ಅಂಶ ಮಹಾಸಭೆ ಮುಖಾರಿ ಮಾಂಡೊನು ಶೇ. ೨೦  ಲಾಭಾಂಶ ವಾಂಟೂಚಾಕ ಸರ್ವಸದಸ್ಯಾಲೆ ಕಬೂಲಿ ಘೆತಲೀಂತಿ. ಆನ್ನೇಕ್ಳೋ ನಿರ್ದೇಶಕು ಶ್ರೀ ರಮೇಶ ನಾಯಕ್ ತಾನ್ನಿ ಮುಖಾವೈಲೆ ವರ್ಷಾಚೆ ಬಜೆಟ್ ಮಂಡನ ಕೆಲ್ಲಿಂತಿ. ಹೇಂಚಿ ಪಯಲೆ ಪಂತಾ ಸಹಕಾರಿಚೆ ಷೇರುದಾರಾಲೆ ಕುಟುಂಬಾಚೆ ಪ್ರತಿಭಾವಂತ ಚರ್ಡುವಾಂಕ ವಿದ್ಯಾ ಸಹಾಯಧನ ಬರಶಿ “ಸರಸ್ವತಿ ಪುರಸ್ಕಾರ ದೀವ್ನು ಗೌರವ ಕೆಲ್ಲೆ.
ಸಹಕಾರಿ ಅಧ್ಯಕ್ಷ ಶ್ರೀ ಬಾಳೇಬೈಲು ರಾಘವೇಂದ್ರ ತಾನ್ನಿ ಉಲೈತಾ “ದುಡ್ವಾ ಚಟುವಟಿಕೆ ಬರಶಿ ಸಾಂಸ್ಕೃತಿಕ, ಶೈಕ್ಷಣಿಕ, ಧಾರ್ಮಿಕ ಕ್ಷೇತ್ರಾಕ ನಿರಂತರ ಪ್ರೋತ್ಸಾಹ ದಿವಚೆ ಖಾತ್ತಿರಿ ಶಾಶ್ವತ ಯೋಜನಾ ಸಹಕಾರಿ ತರಪೇನ ಸುರುವಾತ ಕೊರಚಾಕ ಸರ್ವಸದಸ್ಯಾಂಗೆಲೆ ಸಹಕಾರ ಮಾಗಲಿಂತಿ. ಆನಿ ಸಹಕಾರಿಚೆ ಅಭಿವೃದ್ಧಿಕ ಕಾರಣಿಕರ್ತ ಜಾಲೇಲೆ ಸರ್ವಾಂಕ ಕೃತಜ್ಞತಾ ಪಾವೈಲೆ. ಮಹಾ ಸಭಾಂತು ಸಹಕಾರಿಚೆ ಸದಸ್ಯ ಬರಶಿ ನಿರ್ದೇಶಕ ಜಾಲೇಲೆ ಶ್ರೀಮತಿ ರಾಧಿಕಾ ಪ್ರಭು, ಭರತ್ ಕುಮಾರ್, ಸಿಪಿಸಿ ಕಿರಣ್ ಶೆಣೈ ಹಾನ್ನಿ ಉಪಸ್ಥಿತ ಆಶ್ಶಿಲೆಂ. ನಿರ್ದೇಶಕ ಜಾಲೇಲೆ ಶ್ರೀ ಕೆ.ಎಲ್.ಎನ್. ಹೆಗಡೆ ತಾನ್ನಿ ಕಡೇರಿ ಸರ್ವಾಲೆ ಆಭಾರ ಮಾನಲೆ.

ಅಡ್ಯಾರ ಗೋಪಾಳ ಪರಿವಾರಾಚೆ ವಾರ್ಷಿಕ ಸಮಾವೇಶ ೨೦೧೨
ಅಡ್ಯಾರ ಗೋಪಾಳ ಪರಿವಾರ ಏಕ ಹೋಡ ಕುಟುಂಬ. ಹೇ ಕುಟುಂಬಾಚೆ ಮೂಲ ತೆಗ್ಗ ಜಣ ಭೈಣ್ಯೊ. ಮ್ಹಾಲ್ಘಡಿ ಭೈಣಿಂಕ ೧೮೫೦-೬೦ ಇತ್ಲೇಕ ಮಿಜಾರ ಮಾಧವ ಶೆಣೈಕ ವ್ಹಾರ್ಡಿಕ ಕೋರ್ನು ದಿಲ್ಲಿ. ಮಧ್ಯೇಚೆ ಭೈಣಿಕ ಬಂಟ್ವಾಳ ಹಿರಂಕಿ ಬಡ್ಡಕಟ್ಟೆ ರಾಮಚಂದ್ರ ಶೆಣೈಕ ದಿಲ್ಲಿ. ಧಾಕ್ಲಿ ಭೈಣಿ ಮಿಜಾರ ಅಣ್ಣಪ್ಪ ಕಾಮತಿಕ ಬಾಯ್ಲ ಜಾವ್ನು ಚಮ್ಕಲಿ.
ಮಿಜಾರಾಚೆ ಕಾಮ್ತಿಲೆ ಕುಟುಂಬಾನ ಅಡ್ಯಾರ ಕುಟುಂಬಾಚೆ ಒಟ್ಟು ಸೊಯ್ರಿಕ ಕೆಲ್ಲಿ.  ಮಿಜಾರ್ ಅಣ್ಣಪ್ಪ ಕಾಮ್ತಿಲಿ ಮ್ಹಾಲ್ಘಡಿ ಧೂವ ಯಮುನಾ. ಹಿಕ್ಕಾ ಅಡ್ಯಾರ ರಾಮಚಂದ್ರ ಶೆಣ್ಯೆಲೊ ಪೂತು ಮಂಜುನಾಥಾಕ ದಿತ್ತಾತಿ. ಯಮುನಾಲೆ ಬಾಮ್ಣಾಂತಂಚೆ ನಾಂವ ಕಮಲಾ. ಕಮಲಾನ ಆನಿ ಮಂಜುನಾಥಾನ ಸಂಸಾರು ಕೋರ್ನು ಸಹ ಜಣ ಚೆರ್ಡುವ ಜಾತ್ತಾತಿ. ಮ್ಹಾಲ್ಘಡೆ ತೆಗ್ಗ ಜಣ ಎಕ್ಕಾ ಮಾಕ್ಷಿ ಎಕ್ಳಿ ಚೆಲ್ಯೊ ಜಾತ್ತಾತಿ. ತಾಂಗೆಲೆ ಮಾಗ್ಗಿರಿ ತೆಗ್ಗ ಜಣ ದಾರ್ಲೆ ಚೆರ್ಡುವಂ ಜಾತ್ತಾತಿ. ದಾರ್ಲೆ ಚೆರ್ಡುವಾಂ ಪ್ಯೆಕಿ ದೊನ್ನಿಂಚೊ ಗೋಪಾಳು. ಗೋಪಾಳು ಯಮುನಾಲೊ ಪಾಂಚಾಚೆ ಚೆರ್ಡು.
ಗೋಪಾಳು ಹೋಡು ಜಾಲ್ಲೆ ಮಾಗ್ಗಿರಿ ತಾಕ್ಕಾ ಯಮುನಾಲೆ ಧಾಕ್ಲೊ ಭಾವು ಮಂಜುನಾಥು ಯಾನೆ ಚೆರ್ಡಪ್ಪು ಹಾಗ್ಗೆಲೆ ಮ್ಹಾಲ್ಘಡಿ ಧೂವ ಅಂಬಾಲೆ ಒಟ್ಟು ವ್ಹಾರ್ಡಿಕ ಕರ್ತಾತಿ. ಅಂಬಾಲೆ ಬಾಮ್ಣಾಂತಂಚೆ ನಾಂವ ರಾಧಾಬಾಯಿ. ಗೋಪಾಳಾನಿ ಆನಿ ರಾಧಾಬಾಯಿನ ಸಂಸಾರು ಕೋರ್ನು ನವ್ವ ಜಣ ಜನ್ಮಾಂಕ ಯೆತ್ತಾತಿ. ತಾಂತು ದೊಗ್ಗ ಜಣ ಸಾನ ಆಸ್ತನಾಂಚಿ ಸರ್ತಾತಿ. ರಾಧಾಬಾಯಿಲೊ ಚಾರೀಚೊ ಚೆರ್ಡು ಮೋಹನು.
ಅಡ್ಯಾರ ಮೋಹನ ಶೆಣ್ಯೇನ ಎಂ ಬಿ ಬಿ ಎಸ್ ಕೋರ್ನು ಅಮೇರಿಕಾಕ ವೊಚ್ಚುನು ಪೆಥಾಲಜಿಂತು ಡಿ‌ಏಬಿಪಿ ಕೋರ್ನು ಭಾರತಾಕ ವಾಪಸ್ ಯೇವ್ನು ಬೆಂಗಳೂರಾಂತು ಸ್ವಂತ ನಿಜಿ ಲೆಬೋರೆಟರಿ ಕಾಣು ಪ್ರೇಕ್ಟಿಸ್ ಕೆಲ್ಲೆ. ಆತ್ತ ತೋ ತಾಗ್ಗೆಲಿ ಲೆಬೋರೆಟರಿ ಬಂದ್ ಕೋರ್ನು ರಿಟ್ಯೆರ ಜಾಲ್ಲಾ. ಮೋಹನಾನ ೨೦೦೭ ಇಸ್ವಿಂತು ಅಪ್ಣ್ಯಾಲೆ ಆವ್ಸು ಬಾಪ್ಸುಲೆ ಉಡ್ಗಾಸಾರಿ ಏಕ ಪರಿವಾರ ಸ್ಥಾಪನ ಕೆಲ್ಲೆ. ತಾಕ್ಕಾ ಅಡ್ಯಾರ ಗೋಪಾಳ ಪರಿವಾರ ಮ್ಹೋಣು ನಾಂವ ದಿಲ್ಲೆ. ಮೋಹನಾಲೆ ವಿಷಯಾಂತು ಆನಿಥೊಡಿ ಮಾಹಿತಿ ಕೊಳೂಂಕ ಪರಿವಾರಾಚೆ ವೆಬ್ ಸ್ಯೆಟ್ www.adyargopal.com ಹೇಂ ಪಳಯಾ.
ಹೇಂ ಪರಿವಾರ ೨೦೦೭ ಇಸ್ವಿ ಧೋರ್ನು ಪ್ರತಿ ವರ್ಸ ವಾರ್ಶಿಕ ಸಾಮಾನ್ಯ ಸಮಾವೇಶ ಕೋರ್ನು ಘೇವ್ನು ಆಯ್ಲಾಂ. ೨೦೧೨ ವರ್ಸಾಚೆ ಸಮಾವೇಶ ಬೆಂಗಳೂರಾಚೆ ಶ್ರೀ ಕಾಶಿ ಮಠ ಹಾಂಗಾ ಜೊಲೋಕಾ ಮ್ಹೋಣು ತಯ್ಯಾರಿ ಕೆಲ್ಲ್ಯಾ. ಅಕ್ಟೋಬರ ೧೪ ಆಯ್ತಾರಾ ಬೆಂಗಳೂರು ಶ್ರೀ ಕಾಶಿ ಮಠಾಚೆ ದೊನ್ನೀಚೆ ಮಾಳ್ಯೇರಿ ಸ್ವಾಮ್ಯೇಲೆ ಹಾಲಾಂತು ಸಕಾಣಿ ೯ ಘಂಟ್ಯಾಕ ಸೂರು ಜಾವ್ನು ಸಾಂಜೆ ೫ ಘಂಟ್ಯಾಕ ಮುಗ್ದತಾ.
ಆಮ್ಗೆಲೆ ಪರಿವಾರಾಚೊ ಉದ್ದೇಶು ವಿಶೇಷ ಕಸ್ಸಲೋಯಿ ನಾ. ಸಮ್ಮೇಳನಾಂಕ ಯೆವ್ಚೆ ಜಣ ಎಕ್ಳೆ ಎಕ್ಳ್ಯಾಂಕ ಲೆಕ್ತಲೆ ಜಾಲ್ಲೆಲೆ ನಿಮಿತ್ತ ತಾಂಗೆಲೊ ಗುರ್ತು ಕೋರ್ನು ಘೆತ್ತನಾ ಗಮ್ಮತ್ ಜಾತ್ತಾ. ಆಂಗಾಂತು ಝುಮ್ ಜಾತ್ತಾ. ಹೇ ಪರಿವಾರಾಂತು ಅಡ್ಯಾರ ಮಂಜುನಾಥ ಶೆಣ್ಯೆ, ಮಿಜಾರ ಮಾಧವ ಶೆಣ್ಯೆ, ಬಡ್ಡಕಟ್ಟೆ ಹಿರಂಕಿ ರಾಮಚಂದ್ರ ಕಿಣಿ, ಮಿಜಾರ ಅಣ್ಣಪ್ಪ ಕಾಮತ್, ಸಂಪಿಗೆ ಮಾಧವರಾಯ ಕಿಣಿ (ರಾಧಾಬಾಯಿಲೆ ಕುಳಾರ), ಮಂಚಕಲ್ (ಮುಂಡ್ಕೂರ) ಲಕ್ಶ್ಮಣ ಕುಡ್ವಾ (ರಾಧಾಬಾಯಿಲೆ ಮ್ಹಾವೇಲೆ ಕುಟುಂಬ) ಇತ್ಲೆ ಜಣಾಲೆ ದಾರ್ಲೆ ಆನಿ ಬಾಯ್ಲೆ ಸಂತಾನ ಸಕ್ಕಡ ಆಜೀವ ಸದಸ್ಯ ಜಾತ್ತಾತಿ. ಹಾನ್ನಿ ನೋಂದಾವಣೆ ಕರನಾ ನಾತ್ತಿಲೇಂಚಿ ಪರಿವಾರಾಚೆ ಸದಸ್ಯ ಜಾತ್ತಾತಿ. ನೋಂದಾವಣಿಂಕ ಜಾವ್ವೋ ಇತರ ಖಂಚೇಯಿ ಕಾರಣಾಂಕ ಕಸ್ಸಲೇಂಯಿ ಶುಲ್ಕ ನಾ. ಹಾಂಕಾ ಸಕ್ಕಡಾಂಕಯಿ ಹೇಂ ನೋಟೀಸ್ ಮೋಹನು ಜಾಹೀರ್ ಕರ್ತಾ.
೨೦೧೨ ವರ್ಸಾಚೆ ವಾರ್ಷಿಕ ಸಮ್ಮೇಳನಾಂಚೆ ಅಕ್ಟೋಬರ್ ೧೪ (೧೪-೧೦-೨೦೧೨) ತಾರೀಕೇಕ ಸಕಾಣಿ ಫಳಾರು, ದನ್ಪಾರಾ ಜೇವಣ, ಸಾಂಜೆ ತಾನ್ನೀಂಚೆ ಹೇಂ ಸಕ್ಕಡ ಆಸ್ಸ. ಹಾಕ್ಕಾ ಕಾಯೀಂ ಪ್ರವೇಶ ಶುಲ್ಕ ನಾ. ಜಾಲ್ಯಾರಿ ಹೇ ಪಟಿ ಹಾಜರ್ ಜಾವ್ಚೆ ಸದಸ್ಯಾಂಕ ಯೆವ್ಚೊ ವೊಚ್ಚೊ ಖರ್ಚು, ಲಾಟರಿ, ಗಿಫ್ಪ, ವಿದ್ಯಾರ್ಥಿ ವೇತನ ಹೇಂ ಸಕ್ಕಡ ಖಂಚೆಕೀ ಏಕ ಕಾರಣಾನ ದಿವ್ಚೆ ನಾ ಮ್ಹೋಣು ಕೆಲ್ಲಾಂ. ಹೇ ವಿಷಯಾಂತು ಆಮ್ಗೆಲೆ ಪರಿವಾರ ಸದಸ್ಯ ಮೋಹನಾಂಕ ಮಾಫಿ ಕರ್ತಾತಿ ಮ್ಹೋಣು ಲೆಕ್ತಾಂತಿ. ವಿವಿಧ ವಿನೋದಾವಳಿ, ಭಾಷಣ, ಸಂಗೀತ, ಭಜನ ಸಕ್ಕಡ ತಯ್ಯಾರಿ ಜಾತ್ತ ಆಸ್ಸ. ಮಂಚಕಲ್ ದಿ. ಸಂಜೀವ ಕುಡ್ವಾಲೊ ಪೂತು ದೇವಿದಾಸು ಹೇ ಸಮ್ಮೇಳನಾಂಚೊ ಆನರರಿ ಮೇನೇಜರು ಜಾವ್ನು ಶ್ರಮಿಸುಚಾಕ ಒಪ್ವಲಾ. ವಿನೋದಾವಳಿಂತು ಭಾಗ ಘೆತ್ತಲೆ ಸದಸ್ಯಾನಿ ತಾಂಗೆಲೆ ನಾಂವ ದೇವಿದಾಸ ಮಾಮ್ಮಾಂಕ ೯೬೬೩೦೮೮೧೬೦ ಹೇ ಮೊಬ್ಯೆಲ್ ನಂಬರಾಕ್ ಫೋನು ಕೋರ್ನು ನೋಂದಣಿ ಕೋರ್ನು ಘೇವ್ಕಾ. ಮೋಹನಾಂಕ  ಹೇ ವಿಳಾಸಾಕ ಈಮ್ಯೆಲ್ shenoylab@hotmail.com ಕರಾತಿ.
ಸಕ್ಕಡ ದಾರ್ಲೆ ಬಾಯ್ಲೆ ಸದಸ್ಯಾನಿ ಚೆರ್ಡುವಾಂಕ ಬರ್ಸಿಕ ಘೇವ್ನು ಸಮ್ಮೇಳನಾಂಕ ಯೇವ್ಕಾ.
ತುಮ್ಗೆಲೆ ದಿವಂಗತ ಮ್ಹಾಲ್ಘಡ್ಯಾಲೊ ಫೋಟೊ ಘೇವ್ನು ಯೇವ್ಕಾ. ಹೋ ಸಮಾರಂಭು ಆಮ್ಗೆಲೆ ಮ್ಹಾಲ್ಘಡ್ಯಾಂಕ ಉಡ್ಗಾಸು ಕೋರುಂಕ ಚೊಲೋಚೆ. ತಾಂಗೆಲೊ ಉಡ್ಗಾಸು ಕೊರೂಂಕ ತುಮ್ಮಿ ಸಕ್ಕಡ ಯೆಯ್ಯಾ. ಯೇವ್ನು ಸಮಾರಂಭ ಚಂದ ಜಾವ್ನು ಚೊಲ್ಚಾಕ ಸಹಕಾರು ದೀವ್ಕಾ ಮ್ಹೋಣು ಮೋಹನು ಮಾಗ್ತಾ. ನಮಸ್ಕಾರು.