ಗುರುವಾರ, ಆಗಸ್ಟ್ 30, 2012

Konkani News

ಶ್ರೀ ವೆಂಕಟೇಶ ಭಜನಾ ಮಂಡಳಿ, ಬೆಂಗಳೂರು
ಗೌಡ ಸಾರಸ್ವತ ಸಮಾಜ, ದ್ವಾರಕಾನಾಥ ಭವನ, ಬಸವನಗುಡಿ ಬೆಂಗಳೂರು ಹಾಂಗಾಚೆ ಶ್ರೀ ವೆಂಕಟೇಶ್ವರ ಭಜನಾ ಮಂಡಳಿ ತರಪೇನ ಆಷಾಢ ಏಕಾದಶಿ -ಏಕಾಹ ಭಜನ ತಾ|| ೩೦-೦೬-೨೦೧೨ ಆಷಾಢ ಏಕಾದಶಿ ದಿವಸು ಸಕ್ಕಾಣಿ ಪೂಡೆ ೬-೦೦ ಗಂಟ್ಯಾಕ ಸೂರ ಜಾವ್ನು ತಾ|| ೧-೭-೨೦೧೨ ದ್ವಾದಶಿ ದಿವಸು ಪ್ರಾತಃಕಾಲ ೬-೦೦ ಗಂಟ್ಯಾಕ ಮಂಗಲ ಭರಶಿ ಸಂಪನ್ನ ಜಾಲ್ಲೆ. ಹೇ ಏಕಾಹ ಭಜನೇಚೆ ಆರಂಭ ಹರಿದಾಸ ಸಂಗೀತ ರತ್ನ ಆನಿ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ವಿಜೇತ ಶ್ರೀ ಪುತ್ತೂರು ನರಸಿಂಹ ನಾಯಕ್ ಹಾನ್ನಿ ದೀವೊ ಜಳೋವನು ಕೆಲ್ಲೆ. ಮಾಗಿರಿ ಏಕಾಹ ಭಜನೆಂತು ವಾಂಟೊ ಘೆತ್ತಿಲೆ ಭಜನಾ ಪಾಳಿ ಅಶ್ಶಿ ಆಸ್ಸ. ೧. ಶ್ರೀ ವೆಂಕಟೇಶ ಭಜನಾ ಮಂಡಳಿ, ಬೆಂಗಳೂರು, ೨. ಶ್ರೀ ಲಕ್ಷ್ಮೀಕಾಂತ ಭಟ್ ಆನಿ ತಂಡ, ೩. ಶ್ರೀ ಅನಂತರಾಯ ಎಸ್. ಕಾಮತ್, ಶ್ರೀ ಗುಜ್ಜಾಡಿ ರಘುವೀರ ನಾಯಕ ಆನಿ ತಂಡ. ೩. ಶ್ರೀ ಮಟ್ಟಾರ್ ಸುರೇಶ ಕಿಣಿ ಆನಿ ಬಾಂವ ತಶ್ಶೀಚಿ ತಂಡ. ೪. ಶ್ರೀ ಕಾಪು ಪಾಂಡುರಂಗ ಶೆಣೈ ಆನಿ ತಂಡ. ೫. ಮಹಿಳಾ ವಿಭಾಗ, ದ್ವಾರಕಾನಾಥ ಭವನ, ಬೆಂಗಳೂರು. ೬. ಶ್ರೀ ಪಿ. ವೆಂಕಟೇಶ ನಾಯಕ ಆನಿ ತಂಡ. ೭. ಶ್ರೀ ಪಿ. ಮಧುಕರ ಪೈ ಆನಿ ತಂಡ. ೮. ಶ್ರೀ ಕೆ. ಮನೋಹರ ಪೈ ಆನಿ ಶ್ರೀ ಹೆಚ್. ಕಮಲಾಕ್ಷ ಕಿಣಿ ಆನಿ ತಂಡ. ೯. ಶ್ರೀ ಎಂ. ಮನೋಹರ ಮಲ್ಯ ಆನಿ ತಂಡ. ೧೦. ಶ್ರೀ ಕೃಷ್ಣಾನಂದ ವಿ. ಪ್ರಭು ಆನಿ ತಂಡ. ಆಹ್ವಾನಿತ ಭಜನಾ ಸೇವಾದಾರ : ಶ್ರೀ ಶಂಕರ ಶ್ಯಾನುಭಾಗ, ಕು| ಮಂಗಳಾರಾವ್, ಶ್ರೀ ಕೃಷ್ಣ ಪ್ರಿಯ ಭಜನಾ ಮಂಡಳಿ, ಶ್ರೀ ಕಾಶೀಮಠ, ಬೆಂಗಳೂರು, ಶ್ರೀ ರಾಮ ಭಜನಾ ಮಂಡಳಿ, ಅನಂತನಗರ, ಬೆಂಗಳೂರು, ಶ್ರೀ ವೆಂಕಟರಮಣ ಭಜನಾ ಮಂಡಳಿ, ಹರಿಖಂಡಿಗೆ. ಜಿ.ಎಸ್.ಬಿ. ಮಹಿಳಾ ವೃಂದ, ಮಲ್ಲೇಶ್ವರಂ ಬೆಂಗಳೂರು.
ಶ್ರೀ ಗಾಯತ್ರಿದೇವಿ ಸಿದ್ದಿವಿನಾಯಕ ದೇವಳ, ಮಂಗಳೂರು
ಪಂಚಮಹಾಶಕ್ತಿ ಶ್ರೀ ಗಾಯತ್ರಿ ದೇವೀ ಸಿದ್ಧಿವಿನಾಯಕ ದೇವಳಾಂತು ತಾ. ೧೫-೦೭-೨೦೧೨ ದಿವಸು ಕೊಂಕಣಿ ಸಾಹಿತ್ಯ ಅಕಾಡೆಮಿಚೆ ಅಧ್ಯಕ್ಷ ಶ್ರೀ ಕಾಸರಗೋಡ ಚಿನ್ನಾ ತಶ್ಶೀಚಿ ದೈವಜ್ಞ ಬ್ರಾಹ್ಮಣ ಸಮಾಜಾಚೆ ತರಪೇನ ಸದಸ್ಯ ಜಾವ್ನು ವಿಂಚೂನು ಆಯಲೀಲೆ ಶ್ರೀ ಎಂ. ಅಶೋಕ ಶೇಟ್ ತಾಂಕಾ ದೇವಳಾಚೆ ತರಪೇನ ಹತ್ಪೂರ್ವಕ ಜಾವ್ನು ಸನ್ಮಾನ ಕೋರ್ನು ಆದರ ದಾಖಯ್ಲೆ. (ಹಾಜ್ಜ ಖಾತ್ತಿರಿ ಏಕ ಪೋಟೋ ಮುಖಪುಟಾಂತು ಪ್ರಕಟ ಜಾಲ್ಲಯಾ) ಹೇ ಸಂದಭಾರಿ ದೇವಳಾಚೆ ಆಡಳಿತ ಆನಿ ಅನುವಂಶಿಕ ಮೊಕ್ತೇಸರ ಜಾಲೇಲೆ ಶ್ರೀ ಎಂ. ರಮೇಶಕೃಷ್ಣ ವಿ. ಶೇಟ್, ತಶ್ಶೀಚಿ ಮೊಕ್ತೇಸರ ಜಾಲೇಲೆ ಶ್ರೀ ಯು. ದೇವರಾಯ ಶೇಟ್, ಶ್ರೀ ಎಸ್. ರಮಾನಂದ ಶೇಟ್, ಆನಿ ಸೇವಾ ಸಮಿತಿ ಅಧ್ಯಕ್ಷ ಶ್ರೀ ಶ್ರೀಪಾದ ರಾಯಕರ ಉಪಸ್ಥಿತ ಆಶ್ಶಿಲೆ.
ದಶಾವತಾರ ಕೊಂಕಣಿ ಷಟ್ಪದಿ ಕಾವ್ಯ ಲೋಕಾರ್ಪಣ
ಕ್ಹೊಂಕಣಿ ಸಾಹಿತ್ಯಾಂತು ನ್ಹಂವೆ ನ್ಹಂವೆ ಸಾಹಿತ್ಯ ರಚೌನು ಗ್ರಾಂಥಿಕ ಕಾವ್ಯ ಪರಿಚಯ ಪ್ರಯತ್ನ ಕರತ ಆಶ್ಶಿಲೆ ಕಾರ್‍ವಾರಾಚೆ ದ್ವಿಭಾಷಾ ಸಾಹಿತಿ, ಬಹುಮುಖ ಪ್ರತಿಭಾವಂತು  ಶ್ರೀ ನಾಗೇಶ ಅಣ್ವೇಕರ, ಹಾನ್ನಿ ದಶಾವತಾರ ವರ್ಣನ ಭಾಮಿನಿ ಷಟ್ಪದಿ ಖಂಡಕಾವ್ಯ ಆನಿ ಸಂದೇಶ ರೂಪಾಚೆ ಹಸ್ತಪ್ರತಿ ದೈವಜ್ಞ ಸಮಾಜಾಚೆ ಪೀಠಾಧೀಶ ಶ್ರೀ ಶ್ರೀ ಸಚ್ಚಿದಾನಂದ ಜ್ಞಾನೇಶ್ವರ ಭಾರತೀ ಸ್ವಾಮಿಜೀಲೆ ಅಮೃತ ಹಸ್ತಾನಿ, ಧಾರವಾಡ್ಚೆ ಚಾತುರ್ಮಾಸ ವೃತಾಚರಣೆ ಸುವೇಳ್ಯಾರಿ ಆಲ್ತಾಂತು ಉಗ್ತಾವಣ ಕೆಲ್ಲಿ.  ಆನಿ ಹಾಜ್ಜೆ ಪ್ರಥಮ ಪ್ರಯೋಗ ಜಾವ್ನು ಶ್ರೀ ನಾಗೇಶ ಅಣ್ವೇಕರಾನಿ ಏಕ ಗಂಟ್ಯಾಚೆ ಕಾವ್ಯವಾಚನ ಆನಿ ವ್ಯಾಖ್ಯಾನ ಕಾರ್ಯಕ್ರಮ ಚಂದ ಜಾವ್ನು ಚಲೋವ್ನು ದೀವ್ನು ಭಾಷಾ ಬಾಂಧವಾಲೆ ಮನ ಸ್ತಬ್ಧ ಕೆಲ್ಲೆ. . ಕಾವ್ಯವಾಚನ ಆನಿ ವ್ಯಾಖ್ಯಾನಾಚೆ ದೊನ್ನಿ ಕಾರ್ಯಕ್ರಮು ೨೫-೭-೨೦೧೨ ದಿವಸು ಕಾರ್‍ವಾರಾಂತು ಶ್ರೀ ವಾಮನಾಶ್ರಮ ಸ್ವಾಮೀಜಿಲೆ ಚಾತುರ್ಮಾಸ ವೇಳ್ಯಾರಿ ಪ್ರಸ್ತುತ ಕೋರ್ನು ನಾಂವ ಘೆತ್ಲಿಂಚಿ.
ಜುಲೈ ೨೭ ತಾರೀಖೆಕ ಕಾರ್‍ವಾರಾಚೆ ಶ್ರೀ ಶಂಕರ ಮಠಾಂತು ಸಹಮಿತ್ರ  ಮೇಳ್ನು “ಶ್ರೀ ಕೃಷ್ಣ ರಾಯಭಾರ ಯಕ್ಷಗಾನ ತಾಳಮದ್ದಲೆ ಅತ್ಯಂತ ಯಶಸ್ವಿ ಜಾವ್ನು ಸಂಪನ್ನ ಜಾಲ್ಲೆ. ಸಬಾರ ವರ್ಷಾಚಾನ ಕನ್ನಡ ಆನಿ ಕೊಂಕಣಿ ದೊನ್ನೀ ಭಾಷಾ ಕ್ಷೇತ್ರಾಂತು ಸಮರ್ಥ ಸೇವಾ ಕರತಾ ಆಸ್ಸುಚೆ ಶ್ರೀ ನಾಗೇಶ ಅಣ್ವೇಕರಾಂಗೆಲೆ ಸಂಘಟನಾ ಚಾತುರ್ಯ ಆನಿ ಸೇವೆಕ ಸರ್ವಾನಿ ಮನ ಭೋರ್ನು ತಾರೀಪು ಕೆಲ್ಲೆ. ಕೃಷ್ಣ ರಾಯಭಾರಾಂತು ಭಾಗವತಿಕೆ ಕೃಷ್ಣ ಹೆಬ್ಬಾರ ಆನಿ ಮಂಜುನಾಥ ಹೆಗಡೆ ತಾನ್ನಿ ಕೆಲ್ಲೆ. ಮದ್ಲೆಗಾರ ಜಾವ್ನು ಪರಮೇಶ್ವರ ಭಟ್ಟ ಆಯ್ಯಿಲೆ. ಪಾತ್ರವರ್ಗಾಂತು ಕೃಷ್ಣ ಜಾವ್ನು ರಘುನಾಥ ನಾಯಕ್, ಕೌರವ ಜಾವ್ನು ಸುರೇಶ ಹೆಗಡೆ, ವಿದುರ ಜಾವ್ನು ಎಂ.ಎಂ. ಹೆಗಡೆ, ದ್ರೌಪದಿ ಜಾವ್ನು ವಿನಾಯಕ ಭಟ್, ಭೀಮ ಜಾವ್ನು ನಾಗೇಶ ಅಣ್ವೇಕರ, ಆನಿ ಧರ್ಮರಾಯ ಜಾವ್ನು ಆರ್.ಎನ್.ನಾಯ್ಕ ತಾನ್ನಿ  ಅರ್ಥ ಸಾಂಗಲೆ.
ಶುಭ ವಿವಾಹ
ಚಿ||ಸೌ|| ಮಾಲತಿ(ಶ್ರೀಮತಿ ಮಾಯಾ ಆನಿ ಶ್ರೀ ಮಾಧವ ಎನ್.ಪ್ರಭು, ಆವರ್ಸಾ ಹಾಂಗೆಲಿ ಧೂವ) ಆನಿ ಚಿ|| ಸುನಿಲ (ಶ್ರೀಮತಿ ಜಯಶ್ರೀ ಆನಿ ಶ್ರೀ ಪ್ರಕಾಶ ವೆಂಕಪ್ಪ ಬಾಳಗಿ, ಕುಮಟಾ ಹಾಂಗೆಲೊ ಪೂತು) ಹಾಂಗೆಲೆ ಲಗ್ನ ತಾ. ೨೪-೦೬-೨೦೧೨ ದಿವಸು ಆವರ್ಸಾಚೆ ಶ್ರೀ ಕಾತ್ಯಾಯನಿ ಬಾಣೇಶ್ವರಿ ದೇವಳಾಚೆ ಲಾಗ್ಗಿ ಆಸ್ಸುಚೆ ಶ್ರೀ ಕೃಷ್ಣ ಕಲಾಕೇಂದ್ರಾಂತು ವಿಜೃಂಭಣೇರಿ ಚಲ್ಲೆ. ಸರ್ವ ವ್ಹರಡೀಕೆ ವ್ಹರೆತು, ವ್ಹಕಲಾಂಕ “ಸರಸ್ವತಿ ಪ್ರಭಾ ತರಪೇನ ದೇವು ಬರೆಂ ಕೊರೊ ಮ್ಹಣತಾ. 
ಘರಾ ಮುಖಾರಿ
ಚಂದ ಚಂದ ಭಾಗ ಘರಾ ಮುಖಾರಿ
ತರಾ ತರಾ ಫೂಲ
ಬಾಗಾ ಭಿತರಿ
ದೊಸಣ ಪೂಲ ಕಾಗ್ದಾ ಫೂಲ
ಕಸ್ತೂರ ಮ್ಹೊಗರ,
ನಂತಾ ಫೂಲ ಕೇಳೆ ಫೂಲ
ದೊಳ್ಯಾ ಮುಖಾರಿ
ನಾಂಕಾ ಆಟೆ ಫುಲ್ತಾ
ಬಂಗ ಗೊಲ್ಯಾರಿ
ದೊಳೆ ದಾಂಪೂ ಜಾಯನಾ
ಫುಲ್ಲಾ ಮುಖಾರಿ
-ಭಕ್ತ ಆರ್. ಕಾಂಞಂಗಾಡ್

Konkani,s

ಶ್ರೀ ಪಾಯ್ದೆ ಮಾಸ್ತರಾಲೆ ವಿಶೇಷ ಹವ್ಯಾಸು
ಆಜಿ ಹರ್‍ಯೇಕ ಮನುಷ್ಯು ಪಾಯ್ದೊ(ಮುನಾಪೊ) ನಾಶಿ  ಖಂಚೆ ಕಾಮ ಕರ್ನಾ. ಖಂಚೇ ಹವ್ಯಾಸು ದವರ್ನು ಘೆತಲೀರಿಚಿ ತಾಜ್ಜೇನ ಖಾಂಯ್ತರಿ ಮುನಾಪೋ ನಾ ಕೀರ್ತಿ, ಪ್ರತಿಷ್ಠಾ ವಾಡ್ಕಾ ಮ್ಹೊಣು ಯವಜೂನು ಆಸ್ತಾ. ಜಾಲ್ಯಾರಿ ಪಾಯ್ದೆ ಮ್ಹೊಣು ನಾಂವ ಆಸಲೇರಿಚಿ ಖಂಚೆ ಪಾಯದೊ ನಾಶ್ಶಿಲೆ ಏಕ ವಿಶೇಷ ಹವ್ಯಾಸ ದವರೂನು ಘೆತ್ತಿಲೆ ಆಮಗೇಲೆ ಕೊಂಕಣಿ ಮನುಷ್ಯು ಯಲ್ಲಾಪುರ ತಾ| ಮಂಚಿಕೇರಿಚೆ                 ಶ್ರೀ  ಪಿ.ಎಸ್. ಪಾಯ್ದೆ ತಾನ್ನಿ. ಹಾಂಗೆಲೆ ಪೂರ್ತಿ ನಾಂವ ಪದ್ಮಾಕರ ಶಂಕರ ಪಾಯ್ದೆ. ದಿ. ೧೨-೦೪-೧೯೩೮ ಇಸ್ವೆಂತು ಜನ್ಮಿಲೆ ಹಾಂಗೆಲೆ ಬಾಪಯಿ ಕೃಷಿಕ ಆನಿ ಪಿ.ಡಬ್ಲ್ಯೂ.ಡಿ. ಕಂಟ್ರಾಕ್ಟರ್ ಶಂಕರ ಪಾಯ್ದೆ. ತಾನ್ನಿ ೧೯೬೨ ತಾಕೂನು ೧೯೬೭ ಪರ್ಯಂತ ಹೇ ಭಾಗಾಚೆ ವಿಧಾನಸಭಾ ಸದಸ್ಯ ಜಾವ್ನು ಜನಾನುರಾಗಿ ಜಾಲ್ಲೆಲೆ. ಹಾಂಗೆಲೆ ಪೂತು ಶ್ರೀ ಪದ್ಮಾಕರ ಹಾನ್ನಿ ಯಲ್ಲಾಪೂರ ತಾ||ಚೆ ಪಯಲೆ ಹೈಸ್ಕೂಲ್ ಮ್ಹಣಚೆ ಕೀರ್ತಿಕ ಪಾತ್ರ ಜಾಲೇಲೆ “ರಾಜ ರಾಜೇಶ್ವರಿ ಹೈಸ್ಕೂಲಾಂತು ಸುಮಾರ ೩೫ ವರ್ಷ ಸುದೀರ್ಘ ಕಾಳ  ಮಾಸ್ತರ ಜಾವ್ನು ಹಜಾರ ಭರಿ ಚರ್ಡುವಾಂಕ ಜ್ಞಾನದಾನ ಕೋರ್ನು “ಪಾಯ್ದೆ ಮಾಸ್ತರ ಮ್ಹಣಚೆ ಅಭಿದಾನಾಕ ಪಾತ್ರ ಜಾಲೇಲೆ, ಹಾಂಗೆಲೆ ಸಬಾರ ಹವ್ಯಾಸಾಂತು ಏಕ ಅಂಚೆ ಚೀಟಿ ಸಂಗ್ರಹ, ೧೯೪೭ಚಾನ ಆಯಚೆ ಪರ್ಯಂತಾಚೆ ಅಂಚೆ ಚೀಟಿ ಹಾಂಗೆಲಾಗ್ಗಿ ಆಸ್ಸ. ಹಾಂಗೆಲೆ ಸಂಗ್ರಹಾಂತು ಆತ್ತ ಲಾಗ್ಗಿ ಲಾಗ್ಗಿ ಪಂಚ್ವೀಸ ಹಜಾರ ರೂಪ್ಪಯಾ ಪಶಿ ಚ್ಹಡ ಮೌಲ್ಯಾಚೆ ಅಂಚೆ ಚೀಟಿ ಆಸ್ಸ ಖಂಯಿ. ತಾಂತು ಸ್ವದೇಶಿ ತಿತ್ಲೆ ನ್ಹಂಹಿಸಿ, ವಿದೇಶಿ ಅಂಚೆ ಚೀಟಿ, ಪಶು-ಪಕ್ಷಿಂಗೆಲೆ, ಫುಲ್ಲಾಚೆ, ಚಂದ ದೃಶ್ಯಾಚೆ ಅಂಚೆ ಚೀಟಿ ಸೈತ ಆಸ್ಸ.  ನ್ಹಂಹಿಸಿ ಶ್ರೀ ಪಾಯದೆ ಮಾಮ್ಮಾಲಾಗ್ಗಿ ವ್ಹರಡೀಕೆಚೆ ಲಗ್ನ ಪತ್ರಿಕೆಂತು ವಿಂಗವಿಂಗಡ ಆಕರ್ಷಕ ಭಂಗಿಂತು ಆಸ್ಸುಚೆ ಶ್ರೀ ಗಣಪತಿಲೆ ಚಿತ್ರಾಚೆ ವ್ಹಡ ಭಂಡಾರ ಆಸ್ಸ. ಮಸ್ತ ಲೋಕ ಲಗ್ನಪತ್ರಿಕಾ ಕೋಯ್ರು ಮ್ಹೊಣು ಲಗ್ನ ಜಾವಚೆ ಪಯಲೇಚಿ ಉಡ್ಡೋವನು ಸೊಡತಾತಿ, ಜಾಲ್ಯಾರಿ ಶ್ರೀ ಪಾಯದೆ ಮಾಮ್ಮಾನ ತ್ಯಾ ಒಟ್ಟು ಕೋರ್ನು ದವರೀಲೆ ಸಮಗ್ರ ಜಾವ್ನು ಪಳೈತನಾ ಕಲಾಸಕ್ತಾಂಗೆಲೆ ಮನ ಭೋರ್ನು ಯತ್ತಾ. ತಾನ್ನಿ ಹೇ ಸುಮಾರ ಚಾರ ಆಲ್ಬಾಮಾಕ ಲಾವ್ನು ದವರಲಾ ಮ್ಹಳಮಾಗಿರಿ ತಾಜ್ಜೆ ಗಾತ್ರ ತುಮ್ಮಿ ಕಲ್ಪನ ಕರಾ. ಹಾಜ್ಜ ಬರಶಿ ತಾನ್ನಿ ಗಂಗಾ ನಂಯ್ಕ ವಿಂಗ ವಿಂಗಡ ಕೋನಾನ ಧೋರ್ನು ಕಾಡಿಲೆ ಪೋಟೊ, ಕಾಳಿದಾಸಾಲೆ ಮೇಘ ಸಂದೇಶ ಪಸರ್‍ಚೆ ಆಕರ್ಷಕ ಚಿತ್ತರ, ಕೆ.ಎಸ್.ಆರ್.ಟಿ.ಸಿ ಸುರುವಾತ ಜಾಲೇಲ ತಾಕೂನು ಆಜಪರ್ಯಂತ ಬಾಯರ ಹಾಡಿಲೆ ಚಂದ ಚಿತ್ತರ.. ಅಶ್ಶಿ  ಸಾಂಗೂನು ಪೂರ್ತಿ ಜಾವಚಾಕ ಜಾಯನಾ ಮ್ಹಣಚೆ ತಿತ್ಲೆ ಚಿತ್ರ ಸಂಗ್ರಹ ಕೆಲ್ಲ್ಯಾ. ಹಾನ್ನಿ ಸಂಗ್ರಹ ಕೆಲೇಲೆ ಹೇ ಅಂಚೆ ಚೀಟಿ, ಚಿತ್ತರ, ಲಗ್ನಕಾರ್ಡ ಪೂರಾ ಸಮಾಧಾನಾನ ಪಳೇಯಚಾಕ ಕನಿಷ್ಟ ೮-೯ ಗಂಟೊ ಪೂಣಿ ಜಾವ್ಕಾ ಪಡ್ತಾ.
ಆತ್ತ ಪಾಯದೆ ಮಾಸ್ತರಾಂತ ೭೪ವರ್ಷ. ಹ್ಯಾ ಮಾಂತಾರಪಣಾಂತು ೨೦ಚೆ ತರ್ನಾಟೆನ ಲಜ್ಜೆ ಪಾವಚೆ ವರಿ ತಾನ್ನಿ ಲವಲವಕೇನ ಆಪಣಾಲೆ ವೈವಿಧ್ಯಮಯ ಪ್ರವೃತ್ತಿಂತು ಬುಡ್ಡೂನು ಆಸ್ಸತಿ. ತಾಜ್ಜ ಬರಶಿ ತಾನ್ನಿ ಶಿರ್ಶಿಚೆ ಚೇತನಾ ಸಹಕಾರಿ ಮುದ್ರಣಾಲಯಾಚೆ ನಿರ್ದೇಶಕ ಜಾವ್ನು, ಅಂಚೆ ಚೀಟಿ ಸಂಗ್ರಹಕರ ಸಂಘಾಚೆ ಅಧ್ಯಕ್ಷ ಜಾವ್ನು, ಮಂಚಿಕೇರಿ ಗ್ರಾಹಕ ವೇದಿಕೆಚೆ ಅಧ್ಯಕ್ಷ ಜಾವ್ನು ಸಮಾಜಾಕ ಸೇವಾ ಪಾವಯ್ತಾ ಆಸ್ಸತಿ. ಹಾನ್ನಿ ಬರೋಪಿ ವ್ಹಯಿ. “ಅಂಚೆ ಚೀಟಿ ವಿವರಣೆ, ಪ್ರಜಾಪ್ರಭುತ್ವ ವ್ಯವಸ್ಥೆ ಇತ್ಯಾದಿ ಲೇಖನ ಬರೋವ್ನು ಹಾನ್ನಿ ಲೋಕಾಂಕ ಜಾಗೃತಿ ಕೆಲ್ಲ್ಯಾ. ವ್ಯಯಕ್ತಿಕ ಜಾವ್ನು ಪಾಯದೊ ನಾತಲೀರಿಚಿ ತಾನ್ನಿ ಕೆಲೇಲೆ ಹೇ ಸಂಗ್ರಹ ಮ್ಹೊಲ ಬಾಂಚಾಕ ಜಾಯನಾತ್ತಿಲೆ ತಸ್ಸಾಲೆ ಮ್ಹೊಣು ದಾರಾಳ ಜಾವ್ನು ಸಾಂಗುಯೇತ. ಹಾಂಗೆಲೆ ತಸ್ಸಾಲೆ ಹವ್ಯಾಸ ಆಮಗೇಲೆ ಆಯಚೆ ತರ್ನಾಟೇನ ದವರೂನು ಘೆತಲೀರಿ ಬಹುಶಃ ತಾನ್ನಿ ನಾಕ್ಕ ನಾತ್ತಿಲೆ ದುಃಶ್ಚಟಾಕ ಪೋಣು ವಾಯ್ಟ ಜಾವಚೆ ಚುಕ್ತಾಶ್ಶಿಲೆ ಕಿತ್ಕಿ.?
ಹಾನ್ನಿ ಮಂಚಿಕೇರಿಂತು ಸುರವೇ ಶಿಕ್ವಣ ಘೇವ್ನು, ಕುಮುಟಾಚೆ ಗಿಬ್ ಹೈಸ್ಕೂಲ್, ಶಿರ್ಶಿ ಮಾರಿಕಾಂಬಾ ಹೈಸ್ಕೂಲಾಂತು ತ್ಯಾ ದಿವಸಾಚೆ ಇಕ್ರಾ ಕ್ಲಾಸಾ ಶಿಕ್ವಣ ಘೇವ್ನು, ಧಾರ್‍ವಾಡಾಕ ಯೇವ್ನು ಏಕ್ಕ ವೇಳ್ಯಾರಿ ದೈಹಿಕ ಆನಿ ಚಿತ್ರಕಲಾ ತರಬೇತಿ ಘೆತಲಿಂತಿ. ಮುಖಾರಿ ಶಾಳಾ ಶಿಕ್ಷಕ ಜಾವ್ನಾಶ್ಶಿಲೆ ತೆದನಾಂಯಿ ಆಪಣಾಲೆ ಶಿಕ್ವಣ ಮುಖಾರ್‍ಸುನು ಹಿಂದಿ ರಾಷ್ಟ್ರ ಭಾಷಾ ವಿಶಾರದ, ಮೈಸೂರು ವಿಶ್ವವಿದ್ಯಾಲಯಾಚೆ ಬಿ.ಎ.ಆನಿ ಬಿ.ಇಡಿ ಪದವಿ ಘೇವ್ನು ಹಿಂದಿ ಶಿಕ್ಷಕ ಮ್ಹೊಣು ಪದೋನ್ನತಿ ಪಾವ್ಲೆ. ಹಾಂಗೆಲೆ ಬಾಯ್ಲ ಶ್ರೀಮತಿ ಜಯಶ್ರೀ ಆನಿ ಪ್ರಸನ್ನ, ಪ್ರವೀಣ ಮ್ಹಣಚೆ ದೊಗ್ಗ ಲೋಕ ಚರ್ಡುಂವ. ನ್ಹಂಹಿಸಿ ಹಾನ್ನಿ ಪತ್ರಕಾರ ವ್ಹಯಿ. ಮುನ್ನಡೆ, ಜನಮಾಧ್ಯಮ, ಲೋಕಧ್ವನಿ, ಸಂಯುಕ್ತ ಕರ್ನಾಟಕ, ಕನ್ನಡ ಜನಾಂತರಂಗ ಪತ್ರಾಚೆ ರಿಪೋರ್ಟರ್ ಜಾವ್ನೂ ಸೇವಾ ಕೆಲ್ಲಾ. ಹಾಂಗೆಲೆ ಬಹುಮುಖ ಪ್ರತಿಮೆ ಸಾಂಗಿಲೆ ತಿತ್ಲೇಕ ಸಂಪಲೆ ಮ್ಹೊಣು ನಾ. ಅಸ್ಸಲೆ ಶ್ರೀ ಪಾಯದೆ ಮಾಸ್ತರಾಲೆ ಜೀವನ ಆಯಚೆ ತರ್ನಾಟೆಂಕ ಆದರ್ಶ ಜಾಂವೊ, ತಸ್ಸಾಲೆ ಆದರ್ಶ ದವರೂನು ಘೆತ್ತಿಲೆ ನವೀನ ಪೀಳ್ಗಿ ಹೇ ದೇಶಾಚೆ ಆಸ್ತಿ ಜಾಂವೊ, ಪಾಯದೆ ಮಾಸ್ತರಾಂಕ ಆನ್ನಿಕೆ ಮಸ್ತ ಕಾಲ ದೇವು ಚಾಂಗ ಆರೋಗ್ಯ, ಆಯುಷ್ಯ, ಕೀರ್ತಿ, ಪುರಸ್ಕಾರ ದೀವೊ ಮ್ಹೊಣು ಸರಸ್ವತಿ ಪ್ರಭಾ ಆಶಯ ಕರ್ತಾ.

Konkani News Saraswati Prabha

ಶ್ರೀ ಲಕ್ಷ್ಮೀ ವೆಂಕಟೇಶ ದೇವಸ್ಥಾನ ಬೇರೂಳ್ಳಿ.
ಹೊನ್ನಾವರ ತಾ||ಚೆ ಬೇರೂಳ್ಳಿ ಶ್ರೀ ಲಕ್ಷ್ಮೀವೆಂಕಟೇಶ ದೇವಳಾಂತು ವರ್ಷಂಪ್ರತಿ ಚೊಲಚೆ ಶ್ರೀ ದೇವಾಲೆ “ಭಜನಾ ಸಪ್ತಪ್ರಹರ ಕಾರ್ಯಕ್ರಮ ತಾ. ೨೯-೦೭-೨೦೧೨ ದಿವಸು ಸಕ್ಕಾಣಿ ೮-೩೦ಕ ಸೂರ ಜಾವ್ನು, ಧೋಂಪಾರಾ ಏಕ ಗಂಟ್ಯಾಕ ಮಹಾಪೂಜಾ, ರಾತ್ತಿಕ ೧೨ ಗಂಟ್ಯಾಕ ರಾತ್ರಿ ಪೂಜಾ, ಹೆರ್‍ದೀಸು ಸಕ್ಕಾಣಿಪೂಡೆ ೫ ಗಂಟ್ಯಾಕ ಕಾಕಡಾರತಿ, ತಾ. ೩೦-೭-೧೨ಕ ೭-೩೦ಕ ಮಹಾ ನೈವೇದ, ಮಹಾಮಂಗಳಾರತಿ, ಮಹಾಪ್ರಾರ್ಥನ, ತೀರ್ಥಪ್ರಸಾದ ವಿತರಣ, ಭಜನಾ ಮಂಗಲ, ಸಂತರ್ಪಣ ಇತ್ಯಾದಿ ಕಾರ್ಯಕ್ರಮ ಸಮೇತ ಚಲೇಲೆ ಖಬ್ಬರ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳ ಆಡಳಿತ ಕಮೀಟಿ ಅಧ್ಯಕ್ಷ ಶ್ರೀ ರಾಜೇಂದ್ರ ವಾಸುದೇವ ಪ್ರಭು ತಾನ್ನಿ ಕಳೈಲಾ. ಶ್ರೀ ದೇವಳಾಂತು “ಶ್ರೀ ಅನಂತ ವೃತ ತಾ. ೨೯-೦೯-೨೦೧೨ ದಿವಸು ಯಥಾವಿಧಿ ಪ್ರಮಾಣೆ ಘಡಚೆ ಆಸ್ಸ ಮ್ಹಣಚೆ ಖಬ್ಬರ ಸೈತ ಮೆಳ್ಳಾ.
ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜ, ಧಾರವಾಡ
ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೆ ತರಪೇನ ಸಮಾಜ ಮಂದಿರ ಸರಸ್ವತಿ ನಿಕೇತನಾಂತು ಶ್ರಾವಣ ಮ್ಹಹಿನ್ಯಾ ಪ್ರಯುಕ್ತ ಶ್ರೀ ವರಮಹಾಲಕ್ಷ್ಮೀ ವೃತ ತಾ. ೨೭-೦೭-೨೦೧೨ ದಿವಸು ಚಲ್ಲೆ. ಸುತ್ತಾಫುನ್ವೆ ಪ್ರಯುಕ್ತ ತಾ. ೨-೦೮-೨೦೧೨ ದಿವಸು ಸಕ್ಕಾಣಿಕ ಋಗುಪಾಕರ್ಮ ಹೋಮು, ಯಜ್ಞೋಪವೀತ ಧಾರಣ ಚಲ್ಲೆ.  ೯-೦೮-೨೦೧೨ ದಿವಸು ಶ್ರೀ ಕೃಷ್ಣಜನ್ಮಾಷ್ಟಮಿ ಪ್ರಯುಕ್ತ ಜನ್ಮಾಷ್ಟಮಿ ಪೂಜಾ, ತುಳಸಿದಳ ಅರ್ಪಣ, ನಾರ್‍ಲುಕೇಳಿ, ನೈವೇದ್ಯ ಚಲ್ಲೆ. ೧೫-೦೮-೨೦೧೨ ದಿವಸು ಸ್ವಾತಂತ್ರ್ಯ ದಿನಾಚರಣೆ ಪ್ರಯುಕ್ತ ಧ್ವಜಾರೋಹಣ, ಗೊಡಶೆ ವಿತರಣ, ೧೦೮ ಕಲಶಾಚೆ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜಾ, ಧಾ ಸಮಸ್ತಾಲೆ ಪ್ರಾರ್ಥನ, ನೈವೇದ್ಯ, ಮಂಗಳಾರತಿ, ಮಹಾ ಸಂತರ್ಪಣ ಚಲ್ಲೆ. ಮಾಗಿರಿ ‘ಚೂಡಿ ವಿನಿಮಯ ‘ಚೂಡಿ ಸ್ಪರ್ಧಾ ಬಾಯ್ಲಮನ್ಶೆ ಖಾತ್ತಿರಿ ಹಳದಿ-ಕುಂಕುಮ ಕಾರ್ಯಕ್ರಮ ಆಶ್ಶಿಲೆಂ ಖಬ್ಬರ ಮೆಳ್ಳಾ.
ಉಡುಪಿ ಶ್ರೀಲಕ್ಷ್ಮೀವೆಂಕಟರಮಣ ದೇವಳ
ಶ್ರೀ ಕೃಷ್ಣ ಕ್ಷೇತ್ರ ಉಡುಪಿಚೆ ಇತಿಹಾಸ ಪ್ರಸಿದ್ಧ ದೇವಳಾಂತು ಏಕ ಜಾಲೇಲೆ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜ ಬಾಂಧವಾಲೊ ವ್ಹಡ ದೇವಳ ಜಾಲೇಲೆ ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಳಾಂತು ವರ್ಷಂಪ್ರತಿ ಮ್ಹಣಕೆ ನಾಗರ ಪಂಚಮಿಚಾನ ಸೂರ ಜಾವ್ನು ಸಾತ ದಿವಸು ಪರ್ಯಂತ ದಿವಸು-ರಾತಿ ನಿರಂತರ ಜಾವ್ನು ಚೊಲಚೆ ಭಜನಾ ಸಪ್ತಾಕ ತಾ. ೨೩-೦೭-೨೦೧೨ ದಿವಸು ಧೋಂಪಾರಾ ೧೨.೦೫ಕ ಚಾಲನ ದಿಲ್ಲೆ.  ಸಮಾಜಾಚೆ ಗಣ್ಯ, ವಿಂಗವಿಂಗಡ ಭಜನಾ ಮಂಡಳಿ ಸದಸ್ಯ ಸಮೇತ  ಅಪಾರ ಭಕ್ತ ಬಾಂದವ ಹೇ ವೇಳ್ಯಾರಿ ಉಪಸ್ಥಿತ ಊರ್ನು ಶ್ರೀ ದೇವಾಲೆ ಕೃಪೇಕ ಪಾತ್ರ ಜಾಲ್ಲಿಂತಿ. ನಾಗರ ಂಚಮಿಚೆ ಹೇ ಶುಭಾವಸರಾಂತು ಶ್ರೀ ದೇವಾಕ ಮಸ್ಯಾವತಾರ ಅಲಂಕಾರ ಕೆಲೇಲೆ ಚೋವ್ನು ಜಮಿಲೆ ಸರ್ವ ಭಕ್ತ-ಬಾಂದವಾಲೆ ದೋಳೆ ಪಾವನ ಜಾಲ್ಲೆ.
ಶ್ರೀ ವೆಂಕಟರಮಣ ದೇವಳ, ಬೆಂಗಳೂರು
ಬೆಂಗಳೂರ್‍ಚೆ ಶ್ರೀ ಅನಂತ ನಗರಾಂತು ಆಸ್ಸುಚೆ ಶ್ರೀ ವೆಂಕಟರಮಣ ದೇವಳಾಂತು ಅಧಿಕ ಮಾಸ ಪ್ರಯುಕ್ತ ತಾ. ೧೮-೦೮-೨೦೧೨ ತಾಕೂನು ೧೬-೦೯-೨೦೧೨ ಪರ್ಯಂತ ಪ್ರತಿ ದಿವಸು  ವಿಶೇಷ ಪೂಜಾ, ವಿಶೇಷ ಅಲಂಕಾರ, ವಿಶೇಷ ಅಪ್ಪೋ ನೈವೇದ್ಯ ಸೇವಾ, ವಿಷ್ಣು ಸಹಸ್ರನಾಮ ಪಠಣ, ಶ್ರೀಮದ್ ಭಗವತ್‌ಗೀತಾಚೆ ೧೫ ಅಧ್ಯಾಯ, ಭಜನ ಆನಿ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಚೊಲಚೆ ಆಸ್ಸ ಮ್ಹೊಣು ಕೋಳ್ನು ಆಯಲಾ. ಆನಿ ವಿಶೇಷ ಕಾರ್ಯಕ್ರಮ ತಾ. ೦೨-೦೯-೨೦೧೨ ಕ್ಷೀರಾಭಿಷೇಕ, ಪವಮಾನ ಅಭಿಷೇಕ, ಪೂಜಾ, ಪ್ರಾರ್ಥನ, ನವಗ್ರಹಯುಕ್ತ ರಾಧಾಕೃಷ್ಣ ಪವಮಾನ ಹವನ, ಮಹಾಮಂಗಳಾರತಿ, ಪ್ರಸಾದ ವಿತರಣ, ಭಜನ, ಅಲಂಕಾರ ಇತ್ಯಾದಿ ಕಾರ್ಯಕ್ರಮ ಬರಶಿ ಚೊಲಚೆ ಆಸ್ಸ ಮ್ಹೊಣು ಕೋಳ್ನು ಆಯಲಾ. ತಾ. ೯-೯-೨೦೧೨ ದಿವಸು ಮಾಸಿಕ ಶ್ರೀ ಸತ್ಯನಾರಾಯಣ ಪೂಜಾ ಚೊಲಚೆ ಆಸ್ಸ ಖಂಯಿ. ಶ್ರೀ ಗಣೇಶ ಚತುರ್ಥಿ ಪ್ರಯುಕ್ತ ತಾ. ೧೯-೦೯-೨೦೧೨ ದಿವಸು ಪ್ರಾರ್ಥನ ಸಾಮೂಹಿಕ ಗಣೋಮು, ಮಹಾಮಂಗಳಾರತಿ, ಮೂಡಗಣಪತಿ ಪೂಜನ, ರಂಗ ಪೂಜಾ, ಮಂಗಳಾರತಿ, ಪ್ರಸಾದ ವಿತರಣ, ದೂರ್ವಾರ್ಚನ ಸೇವಾ, ವಿಶೇಷ ಅಲಂಕಾರ ಪೂಜಾ, ಉದಯಾಸ್ತಮಾನ ಸೇವಾ  ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಚೊಲಚೆ ಆಸ್ಸುನು ಭಕ್ತ ಬಾಂಧವಾನಿ ತನು, ಮನ, ಧನ ಸಮೇತ ವಾಂಟೊ ಘೆವ್ಕಾ ಮ್ಹೊಣು ವಿನಂತಿ ಆಸ್ಸ. ಖಂಚೆ ಚಡ್ತೆ ಮಾಹಿತಿಕ ಪೋನ್ ನಂ. ೦೮೦ - ೨೭೮೪೮೧೬೧ ಜಾಂವೊ ಮೊಬೈಲ್ ನಂ. ೯೪೮೦೬ ೯೬೮೮೨/೮೪ ಹಾಂಗಾಕ ಸಂಪರ್ಕ ಕೊರಯೇತ.
ಶ್ರೀ ಸಿದ್ಧಿ ವಿನಾಯಕ ದೇವಳ, ಹೊಸಪೇಟೆ
ಹೊಸಪೇಟೆಚೆ ಶ್ರೀ ಸಿದ್ಧಿವಿನಾಯಕ ದೇವಳಾಂತು ದಿನಾಂಕ. ೨೮-೫-೨೦೧೨ ದಿವಸು ಶ್ರೀ ಸಿದ್ಧಿ ವಿನಾಯಕ ದೇವಾಲೆ ೧೩ ವರ್ಷಾಚೆ  ವಾರ್ಷಿಕೋತ್ಸವು ಮಸ್ತ ವಿಜೃಂಭಣೇರಿ ಸಂಪನ್ನ ಜಾಲ್ಲೆ. ತ್ಯಾ ದಿವಸು ಸಕ್ಕಾಣಿ ಪೂಡೆ ಗಣಹೋಮು, ದೇವಾಕ ಶತಕಲಶಾಭಿಷೇಕ, ದಿರ್ಬಾಂಕೂರ ಪೂಜಾ, ಧೋಂಪಾರಾ ಮಹಾ ಮಂಗಳಾರತಿ, ಪ್ರಸಾದ ವಿತರಣ, ಅನ್ನಸಂತರ್ಪಣ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮ ಚಲೇಲೆ ಖಬ್ಬರ ಮೆಳ್ಳಾ.
ಹುಬ್ಳಿ ಕಾಮಾಕ್ಷಿ ದೇವ್ಳಾಂತು “ಸುತ್ತಾಫುನ್ನವ
ತಾ. ೧-೦೮-೨೦೧೨ ದಿವಸು ಹುಬ್ಳಿ ದೇಶಪಾಂಡೆ ನಗರಾಂತು ಆಸ್ಸುಚೆ ಶ್ರೀ ಕಾಮಾಕ್ಷಿ ದೇವಳಾಂತು ಶ್ರೀ ಗಣಪಯಿ ಪೂಜನ ಸಮೇತ ಋಗುಪಾಕರ್ಮ ಹೋಮು ಶ್ರೀ ಶ್ರೀಪಾದ ಭಟ್ಟ ಮಾಮ್ಮಾಲೆ ಯಜಮಾನ್ಪಣಾರಿ ಸಂಪನ್ನ ಜಾಲ್ಲೆ. ಹೇ ವೇಳ್ಯಾರಿ ಶಂಬರಿ ಭರಿ ಸಮಾಜ ಬಾಂಧವ ಯೇವ್ನು ಶಾಸ್ತ್ರಾನುಸಾರ ಯಜ್ಞೋಪವೀತ (ಜಾನ್ನುವೆ) ಧಾರಣ ಕೋರ್ನು ಪುನೀತ ಜಾಲ್ಲೆ. 
ಶ್ರೀ ಜ್ಞಾನೇಶ್ವರೀ ದೈವಜ್ಞ ಪೀಠಾಧೀಶ
ಕರ್ಕಿ ಶ್ರೀ ಜ್ಞಾನೇಶ್ವರಿ ಪೀಠ, ದೈವಜ್ಞ ಬ್ರಾಹ್ಮಣ ಮಠಾಧೀಶ ಜಾಲೇಲೆ ಪ|ಪೂ| ಶ್ರೀ ಶ್ರೀ ಸಚ್ಚಿದಾನಂದ ಜ್ಞಾನೇಶ್ವರ ಭಾರತಿ ಮಹಾ ಸ್ವಾಮ್ಯಾಂಗೆಲೆ ನಂದನ ನಾಮ ಸಂವತ್ಸರಾಚೆ ಚಾತುರ್ಮಾಸು ತಾ. ೦೩-೦೭-೨೦೧೨ ದಿವಸು ಧಾರ್‍ವಾಡಾಚೆ “ದೈವಜ್ಞ ಸಮುದಾಯ ಭವನಾಂತು ಸುರುವಾತ ಜಾಲ್ಲಾ. ತ್ಯಾ ದಿವಸು ಸಕ್ಕಾಣಿ ಪ|ಪೂ| ಸ್ವಾಮ್ಯಾ ತಾಕೂನು ವ್ಯಾಸ ಪೂಜಾ ಜಾಲ್ಲ ಉಪರಾಂತ ದೈವಜ್ಷ ಬ್ರಾಹ್ಮಣ ಸಮಾಜ ಸೇವಾ ಸಂಘ(ರಿ) ಧಾರವಾಡ ಹಾಜ್ಜೆ ಅಧ್ಯಕ್ಷ ಶ್ರೀಮತಿ ಆನಿ ಶ್ರೀ ರವಿ ಶ್ರೀಕಾಂತ ಗಾಂವಕರ ಹಾಂಗೆಲೆ ದಾಕೂನು ಸ್ವಾಮ್ಯಾಂಗೆಲೆ ಪಾದ್ಯ ಪೂಜಾ ಚಲ್ಲೆ. ಧೋಂಪಾರಾ ಇಕ್ರ ಗಂಟ್ಯಾಕ ಸಭಾ ಕಾರ್ಯಕ್ರಮಾಂತು ಮುಖೇಲ ಸೊಯರೆ ಜಾವ್ನು ಲೋಕಸಭಾ ಸದಸ್ಯ ಶ್ರೀ ಅನಂತ ಕುಮಾರ, ಬ್ರ. ಶ್ರೀ ವಿದ್ವಾನ ರಾಜೇಶ್ವರ ಶಾಸ್ತ್ರಿ, ಧಾರವಾಡ, ಅಖಿಲ ಕರ್ನಾಟಕ ದೈ.ಬ್ರಾ.ಸಮಾಜ, ಬೆಂಗಳೂರು ಹಾಜ್ಜೆ ಅಧ್ಯಕ್ಷಶ್ರೀ ರಾಮರಾವ್ ರಾಯ್ಕರ್, ದೈವಜ್ಞ ಬ್ರಾಹ್ಮಣ ಮಠ, ಕರ್ಕಿ ಹಾಜ್ಜೆ ಸಂಸ್ಥಾಪಕ ಆನಿ ಕಾರ್ಯಾಧ್ಯಕ್ಷ ಶ್ರೀ ಎಮ್. ಮೋಹನ ಶೇಟ್, ಶ್ರೀ ಆರ್. ಎಸ್. ರಾಯ್ಕರ್, ಕಾರವಾರ, ಶ್ರೀ ಸದಾನಂದ ಎಸ್. ಶೇಟ್, ಮುಂಬಯಿ, ಶ್ರೀ ಕೆ. ಸುಧಾಕರ ಶೇಟ್, ಮಂಗಳೂರು, ಅ.ಕ.ದೈ.ಬ್ರಾ. ಸಂಘಾಚೆ ಧಾರವಾಡ ವಲಯಾಧ್ಯಕ್ಷ ಜಾಲೇಲೆ ಶ್ರೀ ಎಮ. ಆರ್. ಶೇಟ್, ಶ್ರೀ ರಾಜೇಂದ್ರಕಾಂತ ಶೇಟ್, ಮಂಗಳೂರು  ಹಾನ್ನಿ ಆಯ್ಯಿಲೆ.  ಪ|ಪೂ| ಸ್ವಾಮ್ಯಾಂಗೆಲೆ ಆಶೀರ್ವಚನ ಜಾಲ್ಲ ಉಪರಾಂತ ಜಮ್ಮಿಲೆ ಸರ್ವ ಭಕ್ತ, ಅನುಯಾಯಿಂಕ ಮಹಾ ಪ್ರಸಾದ ವಿನಿಯೋಗ ಚಲ್ಲೆ. ಚಾತುರ್ಮಾಸ ವೇಳ್ಯಾರಿ ಪ್ರತಿ ದಿವಸು ೧೦-೩೦ ದಾಕೂನು ೧೨-೦೦ ಗಂಟ್ಯಾ ಪರ್ಯಂತ ಸ್ವಾಮ್ಯಾಂಗೆಲೆ ದರ್ಶನ ಆನಿ ಪಾದುಕಾ ಪೂಜಾ ಚಲ್ತಾ. ೧೨-೩೦ಕ ಶ್ರೀ ಜ್ಞಾನೇಶ್ವರಿ ಪರಿವಾರ ದೇವಿಕ ಮಹಾ ಮಂಗಳಾರತಿ, ತೀರ್ಥ ಪ್ರಸಾದ ವಿತರಣ, ೧-೦೦ ಗಂಟ್ಯಾಕ ಮಹಾ ಪ್ರಸಾದ ವಿತರಣ, ಸಾಂಜ್ವಾಳಾ ೪-೩೦ ದಾಕೂನು ೫ ಗಂಟ್ಯಾ ಪರ್ಯಂತ ಪ|ಪೂ| ಸ್ವಾಮ್ಯಾಂಗೆಲೆ ದರ್ಶನ, ಸಾಂಜ್ವಾಳಾ ೬ ಗಂಟ್ಯಾ ದಾಕೂನು ಭಜನ, ಕೀರ್ತನ, ಪ್ರವಚನ, ಯಕ್ಷಗಾನ, ವಿಂಗವಿಂಗಡ ಸಾಂಸ್ಕೃತಿಕ ಕಾರ್ಯಾವಳಿ, ರಾತ್ತಿಕ ೭-೩೦ಕ ದೇವಾ ಪೂಜಾ, ಮಹಾ ಪ್ರಸಾದ ಆಸ್ತಾ. ಪ್ರತಿ ಆಯ್ತವಾರು ಆನಿ ಬುಧ್ವಾರು ಪ|ಪೂ| ಸ್ವಾಮ್ಯಾ ದಾಕೂನು ವಿಶೇಷ ಆಶೀರ್ವಚನ ಆಸ್ತಾ. ತಾ. ೩೦-೦೯-೨೦೧೨ ದಿವಸು ಸಿಮೋಲಂಘನ ಆನಿ ಶೋಭಾ ಯಾತ್ರೆ ಭರಶಿ ಚಾತುರ್ಮಾಸ್ಯ ವೃತ ಸಮಾಪ್ತಿ ಜಾತ್ತಾ. ಚಾತುರ್ಮಾಸ್ಯ ವೃತ ವೇಳ್ಯಾರಿ ಸೀಮೋಲಂಘನ ದಿವಸಾಚೆ ಮಹಾ ಅನ್ನ ಸಂತರ್ಪಣ(ರೂ. ೭೫,೦೦೦/-), ಏಕ ದಿಸಾಚೆ ಪೂರ್ತಿ ಸೇವಾ (ರೂ. ೨೦,೦೦೦/-), ಸಂತರ್ಪಣಾ ಮಹಾದಾನಿ (ರೂ. ೧೦,೦೦೦/-), ಪಾದುಕಾ ಪೂಜಾ(ರೂ. ೫೦೦/-) ಭಿಕ್ಷಾವಂದನ ಇತ್ಯಾದಿ ಸೇವೆಕ ಅವಕಾಶ ಆಸ್ಸುನು ಆಸಕ್ತಾನಿ ಚಡ್ತೆ ಮಾಹಿತಿ ಖಾತ್ತರಿ ಪೋನ್ : ೦೮೩೬-೨೪೪೬೧೩೧ ಹಾಂಗಾಕ ಸಂಪರ್ಕು ಕೊರಯೇತ.
ಆಲ್ತಾಂತು ಧಾರ್‍ವಾಡಾಚೆ ನಾಟ್ಯಸಂಗಮ ಯಕ್ಷಗಾನ ಮಂಡಳಿ ತರಪೇನ “ಮಹಾಲಸ ಚರಿತ್ರೆ ಮ್ಹಣಚೆ ಯಕ್ಷಗಾನ ಖೇಳು ಚಲ್ಲೆ. ಹೇ ಪ್ರಸಂಗ ಹಾರ್ಸಿಕಟ್ಟಾ ವಿಶ್ವನಾಥ ಶೇಟ್ ಹಾನ್ನಿ ಬರೆಯಿಲೆ ಆಸ್ಸೂನು ಪಳೋವಚಾಕ ಅಪಾರ ಸಮಾಜ ಬಾಂಧವ ಜಮ್ಮಿಲೆ

ಶನಿವಾರ, ಆಗಸ್ಟ್ 25, 2012

ಶ್ರೀ ಸಂಸ್ಥಾನ ಕವಳೇ ಮಠಾಧೀಶ
ಶ್ರೀ ಸಂಸ್ಥಾನ ಗೌಡಪಾದಾಚಾರ್ಯ ಕವಳೇ ಮಠಾಧೀಶ  ಶ್ರೀಮದ್ ಶಿವಾನಂದ ಸರಸ್ವತಿ ಸ್ವಾಮೆಂ ನಂದನ ಸಂವತ್ಸರಾಚೆ ಚಾತುರ್ಮಾಸು ಗುರು ಪೂರ್ಣಿಮೆ ದಿವಸು ಮ್ಹಳಯಾರಿ ೦೩-೦೭-೨೦೧೨ ದಿವಸು ಮೃತ್ತಿಕಾ ಪೂಜಾ ಆನಿ ವ್ಯಾಸ ಪೂಜಾ ಕೋರ್ನು  ಮುಂಬೈಚೆ ವಾಲ್ಕೇಶ್ವರಾಚೆ ಶ್ರೀ ಕವಳೇ ಮಠಾಂತು ಸೂರು ಕೆಲ್ಲಿಂತಿ. ತತ್ಸಂಬಂಧ ಪ|ಪೂ| ಸ್ವಾಮೆಂ ತಾ. ೨೩-೦೬-೨೦೧೨ ದಿವಸು ಮುಂಬೈಕ ಆಯ್ಲಿಂತಿ. ಸ್ವಾಮ್ಯಾಂಗೆಲೆ ಚಾತುರ್ಮಾಸ ವೇಳ್ಯಾರಿ ೨೩-೦೭-೨೦೧೨ಕ ೧ಚೆ ಶ್ರಾವಣ ಸೋಮಾರ ಪೂಜಾ ವಿಜೃಂಭಣೇರಿ ಆಚರಣ  ಜಾಲ್ಲೆ. ತಶ್ಶಿಚಿ ೨೭-೦೭-೨೦೧೨ಕ ವರಮಹಾಲಕ್ಷ್ಮೀ ವೃತ, ೩೦-೦೭-೨೦೧೨ಕ ದೋನ್ನೀ ಶ್ರಾವಣ ಸೋಮಾರ ದಿವಸು ಪ್ರದೂಷ ಪೂಜಾ, ೬-೮-೨೦೧೨ಕ ತಿನ್ನೀ ಶ್ರಾವಣ ಸೋಮಾರಾ ಪಂಚಮಿ ಉತ್ಸವು, ೧೩-೦೮-೨೦೧೨ಕ ೪ಚೆ ಶ್ರಾವಣ ಸೋಮಾರಾ ಪೂಜಾ ಅಪಾರ ಭಕ್ತ ಬಾಂಧವಾಲೆ ಉಪಸ್ಥಿತೀರಿ ವಿಜೃಂಭಣೇರಿ ಚಲೇಲೆ ಖಬ್ಬರ ಮೆಳ್ಳಾ.  ಮುಖಾರಿ ಅಧಿಕ ಮಾಸ ಪ್ರಯುಕ್ತ ಅಗಸ್ಟ್ ೨೬ ಆನಿ ೩೧ ತಾರೀಖೇಕ (ದಶಮಿ ಆನಿ ಫುನ್ವೆ ದಿವಸು) ಅಧಿಕ ಮಾಸ “ಶ್ರೀ ವಿಷ್ಣು ಸಹಸ್ರನಾಮ ಪಠಣ ಸಮಾಜ ಬಾಂದವಾಲೆ ಆನಿ ಮಠಾಚೆ ಅನುಯಾಯಿ ಲೋಕಾಲೆ ಬರೇಪಣಾ ಖಾತ್ತಿರಿ ಆಯೋಜನ ಕೆಲೇಲೆ ಆಸ್ಸ.
ತಾಜ್ಜ ಉಪರಾಂತ ಸೆಪ್ಟಂಬರ್ ೧೯ ದಾಕೂನು ಅಕ್ಟೋಬರ್ ೧ -೨೦೧೨ ಪರ್ಯಂತ ಶ್ರೀ ಗಣೇಶೋತ್ಸವು ವಿಜೃಂಭಣೇರಿ ಘಡಚೆ ಆಸ್ಸ. ಅಕ್ಟೋಬರ್ ೧೬ -೨೦೧೨ ದಾಕೂನು ೨೪ ತಾರೀಕೆ ಪರ್ಯಂತ ನವರಾತ್ರಿ ಮಹೋತ್ಸವ ವಿಜೃಂಭಣೇರಿ ಘಡಚೆ ಆಸ್ಸ. ಶ್ರೀ ಗಣೇಶೋತ್ಸವ  ಶುಭ ವೇಳ್ಯಾರಿ ಭಕ್ತಾಧಿ ಲೋಕಾನಿ ಶ್ರೀ ಗಣಪತಿ ಅಥರ್ವಶೀರ್ಷ ಸಹಸ್ರ (ರೂ. ೧೦೦೧), ಗಣೋಮು, ರಂಗಪೂಜಾ(ರೂ. ೭೦೧/-), ಪುಷ್ಪ ಪೂಜಾ (ರೂ. ೭೦೧/-), ಪೂರ್ತಿ ದಿವಸಾಚೆ ಸೇವಾ (ರೂ. ೭೦೦೧/-), ಮೂಡ ಗಣಪತಿ ಪೂಜಾ (ರೂ. ೩೫೦೦/-)ಮೋದಕ, ಮಹಾ ಪೂಜಾ (ರೂ. ೩೦೦೧/-), ಅನ್ನ ಸಂತರ್ಪಣ(ರೂ. ೬೦೦೧/-), ಅಪೂಪ ನೈವೇಧ್ಯ(ರೂ. ೩೫೧/-), ಇತ್ಯಾದಿ ಸೇವಾ ಪಾವಯ್ಚಾಕ ಅವಕಾಶ ಆಸ್ಸ. ತಶ್ಶೀಚಿ ನವರಾತ್ರಿ ಮಹೋತ್ಸವ ವೇಳ್ಯಾರಿ ನವಚಂಡಿ ಅನುಷ್ಠಾನ(ರೂ. ೩೫,೦೦೧/-), ಬ್ರಾಹ್ಮಣ ಸುವಾಸಿನಿ ಭೋಜನ(ರೂ. ೩೫೧/-),  ಪುಷ್ಪ ಪೂಜಾ (ರೂ. ೭೦೧/-), ರಾತ್ರಿ ಪೂಜಾ (ರೂ. ೭೦೧/), ಏಕ ದಿವಸಾಚೆ ಸೇವಾ (ರೂ. ೩೦೦೧/-), ನಂದಾದೀಪ, ಅಭಿಷೇಕ, ಅನ್ನ ಸಂತರ್ಪಣ,  ಕುಂಕುಮಾರ್ಚನ ಸೇವಾ ಕೊರಚಾಕ ಅವಕಾಶ ಆಸ್ಸ. ಕಾರ್ತೀಕ ಏಕಾದಶಿ ಹೆರ್‍ದೀಸು ಮ್ಹಳಯಾರಿ ದಿನಾಂಕ ೨೫- ೧೧-೨೦೧೨ಕ ಗಂಗಾ ಪೂಜನ ಕೋರ್ನು ಪ|ಪೂ| ಸ್ವಾಮ್ಯಾಂಗೆಲೆ ವೃತ ಸಮಾಪ್ತಿ ಜಾತ್ತಾ. ಖಂಚೇ ಚಡ್ತೆ ಮಾಹಿತಿ ಜಾವ್ಕಾ ಜಾಲೇಲ್ಯಾನಿ ಮುಂಬೈ ವಾಲ್ಕೇಶ್ವರ ಶ್ರೀ ಕವಳೇ ಮಠಾಚೆ ಪೋನ್ ನಂ. ೨೩೬೨೫೫೬೬ ಹಾಂಗಾಕ ಸಂಪರ್ಕು ಕೊರಯೇತ.
ಶುಭವಿವಾಹ
ಸಿದ್ದಾಪೂರ್‍ಚೆ ದಕ್ಕೆರಬಾಳು ಶ್ರೀ ಶ್ರೀನಿವಾಸ ಎನ್. ಕಾಮತ್ ಆನಿ ದಿ|| ಪದ್ಮಾವತಿ ಕಾಮತ್ ಹಾಂಗೆಲೊ ನಾತ್ತು ಚಿ|| ಪಾಂಡುರಂಗ (ಶ್ರೀಮತಿ ವಿದ್ಯಾ ಆನಿ ಶ್ರೀ ಮಂಜುನಾಥ ಶ್ರೀನಿವಾಸ ಕಾಮತ್ ಹಾಂಗೆಲೊ ಪೂತು) ಆನಿ ಚಿ||ಸೌ|| ಸೌಮ್ಯ(ಶ್ರೀಮತಿ ಮಾಯಾ ಕಾಮತ್ ಆನಿ ಶ್ರೀ ಕಕ್ಕ ಸುರೇಶ ಕಾಮತ್, ಮಂಗಳೂರು ಹಾಂಗೆಲಿ ಧೂವ) ಹಾಂಗೆಲೆ ಲಗ್ನ ತಾ. ೨೬-೦೭-೨೦೧೨ ದಿವಸು ಮಂಗಳೂರ್‍ಚೆ “ಸಂಘನಿಕೇತನಾಂತು ವಿಜೃಂಭಣೇರಿ ಘಡಲೆ. ತತ್ಸಂಬಂಧ ವ್ಹರಡೀಕೆ ಸಂತೋಷಕೂಟ ತಾ. ೫-೦೮-೨೦೧೨ ದಿವಸು ಸಿದ್ದಾಪೂರ್‍ಚೆ ರಂಗನಾಥ ಸಭಾಗೃಹಾಂತು ವಿಜೃಂಭಣೇರಿ ಚಲ್ಲೆ.
ಚಿ|| ಸಂದೀ(ಶ್ರೀಮತಿ ಸುಮತಿ ಆನಿ ಶ್ರೀ ಸುರೇಂದ್ರ ಕಾಮತ್, ವಕೀಲ, ಧಾರವಾಡ ಹಾಂಗೆಲೊ ಪೂತು) ಆನಿ ಚಿ||ಸೌ|| ಗೀತಾ (ಶ್ರೀಮತಿ ಸುಮಂಗಲಾ ಆನಿ ಶ್ರೀ ಜನಾರ್ಧನ ಕಾಮತ್, ಕುಮಟಾ ಹಾಂಗೆಲಿ ಧೂವ.) ಹಾಂಗೆಲೆ ಲಗ್ನ ತಾ. ೧೨-೦೮-೨೦೧೨ ದಿವಸು ಕುಮಟಾಚೆ ಶ್ರೀ ಶಾಂತೇರಿ ಕಾಮಾಕ್ಷಿ ಸಭಾಗೃಹಾಂತು ವಿಜೃಂಭಣೇರಿ ಚಲ್ಲೆ. ಆನಿ ತತ್ಸಂಬಂಧ ವ್ಹರಡೀಕೆ ಸಂತೋಷ ಕೂಟ  ದಿನಾಂಕ. ೧೪-೦೮-೨೦೧೨ ದಿವಸು ಧಾರವಾಡಾಚೆ ಸರಸ್ವತಿ ನಿಕೇತನಾಂತು ಚಲ್ಲೆ.
ದೊನ್ನೀ ವಧು-ವರಾಂಕ “ಸರಸ್ವತಿ ಪ್ರಭಾ ತರಪೇನ ದೇವು ಬರೆ ಕೊರೊ ಮ್ಹಣತಾ.
ದುಃಖಾಶ್ರು
ಶ್ರೀ ಎಸ್. ಆನಂದ ಪ್ರಭು, ಬೆಜ್ಜವಳ್ಳಿ
ತೀರ್ಥಹಳ್ಳಿ ತಾ||ಚೆ ಬೆಜ್ಜವಳ್ಳಿಂತು ವ್ಯಾಪಾರಸ್ಥ ಜಾವ್ನು ಆಶ್ಶಿಲೆ ಶ್ರೀ ಎಸ್. ಆನಂದ ಪ್ರಭು, ಬೆಜ್ಜವಳ್ಳಿ ತಾನ್ನಿ ಅಲ್ಪಕಾಲಾಚೆ ಅನಾರೋಗ್ಯಾನಿ ತಾಂಗೆಲೆ ೬೯ ವರ್ಷ ವಯಾರಿ ತಾ. ೨೩-೦೬-೨೦೧೨ ದಿವಸು ದೈವಾಧೀನ ಜಾಲ್ಲಿಂತಿ ಮ್ಹೊಣು ಕಳೋವಚಾಕ ಮಸ್ತ ವಿಷಾಧ ಜಾತ್ತಾ. ತಾಂಗೆಲೆ ಆತ್ಮ ಸದ್ಗತಿ ಖಾತ್ತಿರಿ ಸಪಿಂಡೀಕರಣ ಶ್ರಾದ್ಧ ದಿನಾಂಕ. ೪-೦೭-೨೦೧೨ ದಿವಸು ಬೆಜ್ಜವಳ್ಳಿಚೆ ತಾಂಗೆಲೆ ಸ್ವಗೃಹಾಂತು ಚಲ್ಲೆ. ಆನಿ “ವೈಕುಂಠ ಸಮಾರಾಧನ ತಾ. ೦೫-೦೭-೨೦೧೨ ದಿವಸು ತೀರ್ಥಹಳ್ಳಿಚೆ ಶ್ರೀ ರಾಮಮಂದಿರಾಂತು ಚಲ್ಲೆ. ತಾಂಗೆಲೆ ಬಂಧು-ಮಿತ್ರ ಅಪಾರ ಸಂಖ್ಯಾರಿ ಹಾಂತು ಭಾಗಿ ಜಾಲ್ಲಿಲೆ. ಪರಮಾತ್ಮು ದಿ|| ಎಸ್. ಆನಂದ ಪ್ರಭು ಹಾಂಗೆಲೆ ಆತ್ಮಾಕ ಚಿರಶಾಂತಿ ದೀವೊ ಆನಿ ತಾಂಗೆಲೆ ಚರ್ಡ-ಬಾಳಾಂಕ ಹೇ ದುಃಖ ಭೊಗಚೆ ಶಕ್ತಿ ದಿವೊ ಮ್ಹೊಣು ಸರಸ್ವತಿ ಪ್ರಭಾ ದಯಾಮಯಾ ಲಾಗ್ಗಿ ಮಾಗತಾ.             -ವರದಿ : ಅಪ್ಪುರಾಯ ಪೈ
ಉಡ್ಪಿಂತು ’ಘರ್ ಘರ್ ಕೊಂಕಣಿ ’ ಕಾರ್ಯಕ್ರಮ
“ರಾಜ್ಯ ಕೊಂಕಣಿ ಸಾಹಿತ್ಯ ಅಕಾಡೆಮಿನ ಘಾಲ್ನು ಘೆತ್ತಿಲೆ  ’ಘರ್ ಘರ್ ಕೊಂಕಣಿ ’ ಕಾರ್ಯಕ್ರಮ ದಾಕೂನು ಕೊಂಕಣಿ ಬಾಂಧವಾಂತು ಪರಸ್ಪರ ಸ್ನೇಹ ಸಂಬಂಧ ಚ್ಹಡ ಜಾವ್ನು, ಸಮಾಜಾ ವಯರಿ ಸತ್ಪರಿಣಾಮ ಜಾತ್ತಾ ಮ್ಹೊಣು ಕರ್ನಾಟಕ ರಾಜ್ಯ ಕೊಂಕಣಿ ಅಕಾಡೆಮಿ ಅಧ್ಯಕ್ಷ ಕಾಸರಗೋಡು ಚಿನ್ನಾ ತಾನ್ನಿ ಸಾಂಗಲೆ. ತಾನ್ನಿ ಆಲ್ತಾಂತು ಉಡುಪಿಚೆ ರಂಗನಾಥ ಶೆಣೈ ಕಾಂಪೌಂಡಾಂತು ಆಸ್ಸುಚೆ ವೇ.ಮೂ. ಚೇಂಪಿ ರಾಮಚಂದ್ರ ಭಟ್ ತಾಂಗೆಲೆ ಘರಾಂತು “ಘರ್ ಘರ್ ಕೊಂಕಣಿ ಕಾರ್ಯಕ್ರಮ ಉದ್ಘಾಟನ ಕೋರ್ನು ಉಲೈತಾಶ್ಶಿಲೆ. ಏಕ ವರ್ಷಾಂತು ೫೨ ಘರಾಂತು ಹೋ ಕಾರ್ಯಕ್ರಮ ಚಲ್ತಾ. ಚರ್ಡುವಾಂಕ ಸಂಸ್ಕೃತಿ, ಸಂಸ್ಕಾರ, ಆಚಾರ-ವಿಚಾರ ಖಾತ್ತಿರಿ ಮಾಹಿತಿ ಮ್ಹಾಲ್ಗಾಡ್ಯಾನ ದಿವ್ಕಾ ಜಾಲೇಲೆ ತಾಂಗೆಲೆ ಕರ್ತವ್ಯ ಜಾವ್ನಾಸ್ಸ. ತ್ಯಾ ಖಾತ್ತಿರಿ ಮ್ಹಾಲ್ಗಾಡ್ಯಾನ ಚರ್ಡುಂವಾ ಬರಶಿ ಕೊಂಕಣಿಂತು ವ್ಯವಹಾರು ಕೊರ್‍ಕಾ. ಮುಖಾರಚೆ ದಿವಸಾಂತು ಘರಾಂತು ಕೊಂಕಣಿ ಸಾಹಿತ್ಯ ಆನಿ ಸಾಂಸ್ಕೃತಿಕ ಕಾರ್ಯಾವಳಿ ಚಲೋವಚಾಕ ಉತ್ಸಾಹ ಆಶ್ಶಿಲೆ ಸಮಾಜಾಚೆ ಕಲಾವಿದಾನಿ ಅಕಾಡೆಮಿಕ ಸಂಪರ್ಕ ಕೊರಯೇತ. ಮ್ಹಳ್ಳಿಂತಿ.
ಅಕಾಡೆಮಿ ಸದಸ್ಯ ಜಾಲೇಲೆ ಓಂ ಗಣೇಶ್ ಉಲೋವ್ನು “ಸ್ಥಳೀಕ ಕೊಂಕಣಿ ಪ್ರತಿಭೆಂಕ ಹುಜವಾಡಾಕ ಹಾಡಚಾಂತು ಅಸ್ಸಲೆ ಕಾರ್ಯಕ್ರಮ ಅಗತ್ಯ ಮ್ಹಳ್ಳಿಂತಿ. ಅಕಾಡೆಮಿ ರಜಿಸ್ಟ್ರಾರ್  ಡಾ.ದೇವದಾಸ ಪೈ, ಸದಸ್ಯ ಶ್ರೀ ಅಶೋಕ ಶೇಠ್, ನಗರಸಭಾ ಸದಸ್ಯ ಶ್ಯಾಂಪ್ರಸಾದ್ ಕುಡ್ವಾ, ಉದ್ಯಮಿ ಪ್ರಕಾಶ್ ಶೆಣೈ, ಸುರೇಶ್ ನಾಯಕ್, ಶಶಿಭೂಷಣ್ ಕಿಣಿ, ವಿವೇಕಾನಂದ ಶೆಣೈ, ಡಾ.ದಾಮೋದರ ಪೈ, ವಕೀಲ ಲಕ್ಷ್ಮಣ್ ಶೆಣೈ , ಪತ್ರಕರ್ತ ಮನೋಹರ ಪ್ರಸಾದ್ ಉಪಸ್ಥಿತ ಆಶ್ಶಿಲೆಂ. ಹೇ  ಸಂದಭಾರಿ ಪಲ್ಲವಿ, ಅದಿತಿ, ಅವನಿ, ನಿಧಿ, ಪೃಥ್ವೀಶ ತಾಂಗೆ ದಾಕೂನು ಕಾಣಿ, ರಾಕಾ ಭಟ್, ರಮ್ಯಾ, ಸ್ನೇಹಾ ಭಟ್, ವೀಣಾ ಕಾಮತ್, ಪ್ರತಿಮಾ ಪ್ರಭು ದಾಕೂನು ಗಾನ, ಪದ, ಕಾವ್ಯ, ರಮೇಶ್ ಭಟ್, ಹರಿಪ್ರಸಾದ್ ಭಂಡಾರ್ಕರ್ ದಾಕೂನು ಲ್ಹಾನ ನಾಟ್ಕುಳಿ ಸಹಿತ ವಿವಿಧ ಮನೋರಂಜನಾ ಕಾರ್ಯಾವಳಿ ಘಡಲೆ. ತಬ್ಲಾಂತು ಸತ್ಯ ವಿಜಯ ಭಟ್ ತಶ್ಶೀಚಿ ಹಾರ್ಮೋನಿಯಂತು ಪ್ರಸಾದ್ ಕಾಮತ್ ತಾನ್ನಿ ಸಾಥ ದಿಲ್ಲಿ. ಚೇಂಪಿ ರಾಮಚಂದ್ರ ಭಟ್ ಮಾಮ್ಮಾನಿ ಸ್ವಾಗತ ಕೆಲ್ಲಿ.  ಪೃಥ್ವೀಶ್ ಕಾಮತ್ ತಾನ್ನಿ ಕಾರ್ಯಕ್ರಮ ನಿರೂಪಣ ಕೆಲ್ಲೆ. ಕಡೇರಿ  ರಾಮಚಂದ್ರ ಭಟ್ ತಾನ್ನಿ ಆಭಾರ ಮಾನಲೆ.


ಕೊಂಕಣಿ ಮಾಂಟೊವ್
“ಕೊಂಕಣಿ ಭಾವಗೀತೆಂಚೆ ಗಾಯನ ಮಸ್ತ ಕಮ್ಮಿ ಆಸ್ಸ; ಹೇ ದಿಕ್ಕಾಂತು ಯುವಕಾರ ಆನಿ ವಿದ್ಯಾರ್ಥಿ ಲೋಕಾ ಕಡೇಚಾನ ಭಾವಗೀತಾ ಬರೋಸೂವ್ನು ಸಂಗೀತ ಸಂಯೋಜನ ಕೋರ್ನು, ಗಾಯಚೆ ಖಾತ್ತಿರಿ ತರಬೇತಿ ಕಾರ್ಯಾಗಾರ ಚಲೋವಚಾಕ ಠರೈಲಾ. ಮ್ಹೊಣು ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಕಾಸರಗೋಡು ಚಿನ್ನಾ ತಾನ್ನಿ ಸಾಂಗಲೆ. ಅಕಾಡೆಮಿ ತರಪೇನ ಆಲ್ತಾಂತು ಕೊಂಕಣಿ ಮಾಂಟೊವ್ಂತು ಚಲೇಲೆ ’ಕೊಂಕಣಿ ಸಂವೇದನಾ’ ಕಾರ್ಯಕ್ರಮಾಚೆ ಅಧ್ಯಕ್ಷತಾ ಘೇವ್ನು ತಾನ್ನಿ ಉಲೈತಾಶ್ಶಿಲೆ. ಕೊಂಕಣಿ ಸಂವೇದನಾ ಕಾರ್ಯಕ್ರಮಾಂತು ವಿಶಿಷ್ಟ ಸಾಮರ್ಥ್ಯಾಚೆ ಕಲಾವಿದ ಖ್ಯಾತ ತಬಲಾ ವಾದಕ ಮಂಗಳೂರ್‍ಚೆ ಎಸ್. ಶಿವಾನಂದ ಶೇಟ್ ತಾಂಕಾ ಗೌರವಾರ್ಪಣ ತಶ್ಶೀಚಿ   ತಾಂಗೇಲ ದಾಕೂನು ತಬಲಾ ವಾದನ ಕಾರ್ಯಕ್ರಮ ಚಲ್ಲೆ. ವೆಂಕಟೇಶ ರಾವ್ (ಹಾರ್ಮೋನಿಯಂ), ಶಿಲ್ಪಾ, ಲೋಕೇಶ್ (ಕೊಳಲು) ತಾನ್ನಿ ಸಾಥ ದಿಲ್ಲೆ.
ಸಂವೇದನಾ ಕಾರ್ಯಕ್ರಮಾಂತು  ವಿಶಿಷ್ಟ ಪ್ರತಿಭಾ ಆಸ್ಸುಚೆ ಕೊಂಕಣಿ ಮನುಷ್ಯಾಕ ಅಪೋವ್ನು, ತಾಂಕಾ ಸಮ್ಮಾನ ಕೋರ್ನು, ಕಾರ್ಯಕ್ರಮ ಪ್ರಸ್ತುತ ಕರತಾತಿ. ಶಿವಾನಂದ ಶೇಟ್ ತಬಲಾಚೆ ಅಪ್ರತಿಮ ಕಲಾವಿದ ಜಾವ್ನಾಸ್ಸತಿ, ತಾನ್ನಿ  ಕೊಂಕಣಿಚೆ ಏಕಲವ್ಯ’ ಮ್ಹೊಣು ಕಾಸರಗೋಡು ಚಿನ್ನಾ ಸಾಂಗ್ಲಿಂತಿ. ಖ್ಯಾತ ತಬಲಾ ಕಲಾವಿದ ಮಂಗಲದಾಸ್ ಗುಲ್ವಾಡಿ ಕೆ. ತಾನ್ನಿ ಹೊ ಕಾರ್ಯಕ್ರಮಾಚೆ ಉದ್ಘಾಟನ ಕೆಲ್ಲೆ.  ಕೊಂಕಣಿ ಸಂವೇದನಾ ಕಾರ್ಯಕ್ರಮಾಚೆ ಮೂಖಾಂತರ  ನಿಪ್ಪಿಲೆ ಕಲಾ ಪ್ರತಿಭಾವಂತಾಂಕ ಅವಕಾಶ ಮೆಳಚೆ ವರಿ ಜಾಂವೊ ಮ್ಹೊಣು ತಾನ್ನಿ ಇಚ್ಛಾ ವ್ಯಕ್ತ ಕೆಲ್ಲಿಂತಿ. ಸಂಗೀತ ಕಲಾವಿದ ಜಾಲೇಲೆ ವಸಂತಿ ಆರ್. ನಾಯಕ್ ಆನಿ ಪತ್ರಕರ್ತ ಆಗ್ನೆಸ್ ರೊಡ್ರಿಗಸ್ ತಾನ್ನಿ ಮುಖೇಲ ಸೊಯರೆ ಜಾವ್ನು ಆಯ್ಯಿಲೆ.             ಅಕಾಡೆಮಿ ಸದಸ್ಯ ತಶ್ಶೀಚಿ ಕಾರ್ಯಕ್ರಮಾಚೆ ಸಂಚಾಲಕ ಅಶೋಕ್ ಶೇಟ್ ತಾನ್ನಿ ಯೇವ್ಕಾರ ಕೆಲ್ಲೆ. ರಿಜಿಸ್ಟ್ರಾರ್ ಡಾ| ಬಿ. ದೇವದಾಸ್ ಪೈ ಮಾಮ್ಮಾನಿ ಆಬಾರ ಮಾನಲೆ. ಮಹೇಶ್ ನಾಯಕ್ ತಾನ್ನಿ ಕಾರ್ಯಕ್ರಮ ನಿರ್ವಹಣ ಕೆಲ್ಲಿ.
’ಕೊಂಕಣಿ ಕುಟುಮ್ ಆವಾರ್ಡ್ - ೨೦೧೨’
ಮೊಬೈಲ್, ಇಂಟರ್ನೆಟ್, ಫೇಸ್‌ಬುಕ್ ಹಾಜ್ಜೆ ಜಂಜಾಟಾಂತು ಮನುಷ್ಯು ಆಪಣಾಲೆ ಆವಯ ಭಾಸ ವಿಸರ್ತಾ ಆಸ್ಸ, ಮಾತೃ ಭಾಷಾ ವಿಸರ್ಲೇರಿ ಆಮಗೇಲೆ ಭವಿಷ್ಯಾಕ ಗಂಡಾಂತರ ಆಸ್ಸ ಮ್ಹೊಣು  ಖ್ಯಾತ ಸಾಹಿತಿ ಆನಿ ಲೇಖಕ ವಲ್ಲಿ ವಗ್ಗ ಮೈಸೂರು ತಾನ್ನಿ ಅಭಿಪ್ರಾಯ ಪಾವ್ಲೆ. ಮಂಗಳೂರ್‍ಚೆ ಸೆಬಸ್ಟಿಯನ್ ಪ್ಲಾಟಿನಮ್ ಜ್ಯುಬಿಲಿ ಹಾಲಾಂತು “ಕೊಂಕಣಿ ಕುಟುಂಮ್ ಬಹ್ರೈನ್ ತರಪೇನ ದಿಲೇಲೆ ’ಕೊಂಕಣಿ ಕುಟುಮ್ ಆವಾರ್ಡ್ - ೨೦೧೨’ ಘೇವ್ನು ತಾನ್ನಿ ಉಲೈತಾಶ್ಶಿಲೆ. ಮಾತೃಭಾಷೆಕ ಮ್ಹೋಗು ಆನಿ ಆದರ ದಾಖಯಕಾ. ಆನಿ ಮಾತೃಭಾಷೆಂತು ಪ್ರಕಟ ಜಾವಚೆ ಸಾಹಿತ್ಯಾಕ ಮ್ಹೊಲ ದಿವ್ಕಾ. ಮಾತೃಭಾಷೇಕ ಗೌರವ ದೀನಾಶಿ ಘೆಲಯಾರಿ ಸ್ವರ್ಗಾಂತೂ ಸೈತ ಜಾಗೋ ನಾ ಮ್ಹಣಚೆ ಖಬರ ಆಮಕಾ ಆಸ್ಸುಕಾ ಮ್ಹೊಣು ತಾನ್ನಿ ಸಾಂಗಲೆ.
ಹೇ ಸಮಾರಂಭಾಚೆ ಅಧ್ಯಕ್ಷತಾ ಘೇವ್ನು ಉಲೈಲೆ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಕಾಸರಗೋಡು ಚಿನ್ನಾ, “ಚಾಂಗ ಕಾಮ ಕೊರಚೆ ವೇಳ್ಯಾಂತು ತ್ಯಾ ಒಪ್ಪುನು ಘೆವ್ಚೆ ಆನಿ ತಾಕ್ಕಾ ಪ್ರೋತ್ಸಾಹ ದಿವ್ಚೆ ಕಾಮ ಕೆಲವ ಲೋಕ ಕರ್ನಾತಿ. ಖಾಲಿ ಪೊಡಜಾಳ ಮಾತ್ರ ಭೊಗತಾತಿ. ಹೇ ಭಾಷೆಚೆ ಅಭಿವೃದ್ಧಿಕ ಆಡ್ಬಳ ಜಾತ್ತಲೆ ಮ್ಹಳ್ಳಿಂತಿ.  “ಕೊಂಕಣಿ ಭಾಷೆ ಉಲೈಚೆ ೪೨ ಪಂಗಡ ಆಸ್ಸತಿ. ತಾನ್ನಿ ಉಲೈಚೆ ದಾಟಿಂತು ಭಿನ್ನತಾ ಆಸಲೇರಿಚಿ ಸರ್ವಾಲೆ ದೃಷ್ಟಿ ಏಕ್ಕಚಿ. ತ್ಯಾ ಕೊಂಕಣಿ ಭಾಷೆಚೆ ಗಟ್ಟಿಪಣ. ತ್ಯಾ ಆನಿ ಇತ್ತುಲೆ ಜಾಗೃತ ಜಾವ್ಕಾ, ಮಾತೃಭಾಷೆ ವಯಚೆ ಮ್ಹೋಗು ಆಮಕಾ ಸ್ಪೂರ್ತಿ ಜಾಂವೊ. ಮ್ಹಳ್ಳಿಂತಿ. ರಾಕ್ಣೊ ಹಪ್ತಾಳ್ಯಾಚೆ ಸಂಪಾದಕ ರೆ| ಫಾ| ಫ್ರಾನ್ಸಿಸ್ ರೋಡ್ರಿಗಸ್, ಕೊಂಕಣಿ ಪ್ರಚಾರ್ ಸಂಚಲನ್ ಆಡಳಿತ ಕಾರ್ಯದರ್ಶಿ ವಿಟೋರಿ ಕಾರ್ಕಳ್, ಕಾರ್ಯಕ್ರಮ ಸಂಘಟಕ ಜಾಲೇಲೆ ಟೈಟಸ್ ನೊರೊನ್ಹಾ ಉಪಸ್ಥಿತ ಆಶ್ಶಿಲೆ.ರಿಚರ್ಡ್ ಮೋರಸ್ ತಾನ್ನಿ ಯೇವ್ಕಾರ ಕೆಲ್ಲೆ. ವಿಲಿಯಂ ಪ್ರಾಸ್ ಪ್ರಶಸ್ತಿ ಪತ್ರ ವಾಚ್ಚಿಲೆ. ವಲ್ಲಿ ವಗ್ಗ ಮೈಸೂರು ತಾಂಕಾ ಪ್ರಶಸ್ತಿ ಪ್ರದಾನ ಚಲ್ಲೆ.
’ಘರ್ ಘರ್ ಕೊಂಕಣಿ’
ಕುಶಾಲ, ಚರ್ಚೆ, ಕುಶಲೋಪರಿ ಮಿಶ್ರಿತ ವಾತಾವರಣಾಂತು ಕೊಂಕಣಿ ಆಚಾರ ವಿಚಾರ, ಸಂಗೀತ. ಸಾಹಿತ್ಯ, ಜಾನಪದಾಚೆ ಚಂದಾಯ ದಾಖಯ್ಚೆ ’ಘರ್ ಘರ್ ಕೊಂಕಣಿ’ ಸರಣಿಚೆ ಪಯ್ಲೆ ಕಾರ್ಯಕ್ರಮ ಆಲ್ತಾಂತು ಮಂಗಳೂರ್‍ಚೆ  ಡಾ| ಮೋಹನ್ ಪೈ ತಾಂಗೆಲೆ ಘರ್‍ಕಡೆ ಚಲ್ಲೆ. ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ ಘಾಲ್ನು ಘೆತ್ತಿಲೆ ಹೇ ಕಾರ್ಯಕ್ರಮಾಚೆ ಉದ್ಘಾಟನ ಅಕಾಡೆಮಿ ಅಧ್ಯಕ್ಷ ಕಾಸರಗೋಡು ಚಿನ್ನಾ ತಾನ್ನಿ ಕೆಲ್ಲೆ. ಅಕಾಡೆಮಿಚೆ ರಿಜಿಸ್ಟ್ರಾರ್ ಡಾ| ಬಿ. ದೇವದಾಸ್ ಪೈ ತಾನ್ನಿ ಪ್ರಸ್ತಾವಿಕ ಜಾವ್ನು ಉಲೈಲೆ.
‘ಘರ ಯಜಮಾನ್’ ಡಾ| ಮೋಹನ್ ಪೈ ತಾನ್ನಿ ಕೊಂಕಣಿ ಶಾಸ್ತ್ರೀಯ ಗಾಯನ ಪ್ರಸ್ತುತ ಕೋರ್ನು ಕೊಂಕಣಿ ಭಾಷೆಚೆ ವ್ಹಡಪಣ ಸಾಂಗಲಿಂತಿ. ’ಘರ್‌ಕಾರಿಣಿ’ ಉಷಾ ಪೈ ತಾನ್ನಿ ಕಾರ್ಯಕ್ರಮ ನಿರ್ವಹಣ ಕೆಲ್ಲಿ. ಜಿ‌ಎಸ್‌ಬಿ, ಸಾರಸ್ವತ, ಕ್ಯಾಥೊಲಿಕ್, ದೈವಜ್ಞ ಸಮುದಾಯಾಚೆ ಬರಶಿ ಗೋಂಯ ಆನಿ ಕೇರಳಾಚೆ ಉಪ ಭಾಷಾ ಪ್ರಕಾರಾಚೆ ವಿಂಗವಿಂಗಡ ಕೊಂಕಣಿ ಉಪ ಭಾಷೆಂತು ವೊವ್ಯೊ, ಮ್ಡಣ್ಯೋ, ಕೊಂಕಣಿ ಲೋಕವೇದ, ಕೊಂಕಣಿ ಶಿಶುಗೀತಾ, ವಾಚನ, ಮ್ಹಾಲಗಡ್ಯಾಲೆ ಆನಿ ದಾಕಯ್ಲ್ಯಾಲೆ ಸಂಭಾಷಣ ಚಲ್ಲೆ. ಅಕಾಡೆಮಿ ಸದಸ್ಯ ಜಾಲೇಲೆ ಅಶೋಕ್ ಶೇಟ್ ಆನಿ ಮಹೇಶ್ ಆರ್. ನಾಯಕ್ ತಾನ್ನಿ ಉಪಸ್ಥಿತ ಆಶ್ಶಿಲೆ.

ಮಂಗಳವಾರ, ಆಗಸ್ಟ್ 21, 2012

ಚಿತ್ರಾಪುರ ಸ್ವಾಮ್ಯಾಂಗೆಲೆ ೧೬ ಚೆ ಚಾತುರ್ಮಾಸ ಆರಂಭ
ಭಟ್ಕಳ ತಾಲೂಕಾಚೆ, ಶಿರಾಲಿ ಚಿತ್ರಾಪುರ ಮಠ ಸಂಸ್ಥಾನಾಚೆ ೧೧ಚೆ ಗುರುವರ್ಯ ಜಾಲೇಲೆ ಪ. ಪೂ. ಶ್ರೀಮತ್ ಸದ್ಯೋಜಾತಶಂಕರಾಶ್ರಮ ಸ್ವಾಮ್ಯಾಂಗೆಲೆ ೧೬ಚೆ ಚಾತುರ್ಮಾಸ  ಕಾರ್ಯಕ್ರಮ ಅಂಗ ಜಾವ್ನು ದಿನಾಂಕ. ೦೩-೦೭-೨೦೧೨ ದಿವಸು ಸಕ್ಕಾಣಿ ಸಾಮೂಹಿಕ ಪ್ರಾರ್ಥನೆ ನಂತರ ವ್ಯಾಸ ಮಂಡಲ ಪೂಜಾ ವೇದೋಕ್ತ ಜಾವ್ನು ಚಲೈಲೆ. ದೇಶ ವಿದೇಶಾಚಾನ ಆಯ್ಯಿಲೆ ಅಪಾರ ಚಿತ್ರಾಪುರ ಸಾರಸ್ವತ ಸಮಾಜ ಭಾಂದವ ಹೇ ಶುಭ ಸಂದರ್ಭಾರಿ ಉಪಸ್ಥಿತ ಉರ್ನು ಹರಿ-ಗುರು ಕೃಪೇಕ ಪಾತ್ರ ಜಾವ್ನು ಪುನೀತ ಜಾಲ್ಲೆ. ಶ್ರೀ ಚಿತ್ರಾಪುರ ಮಠಾಚೆ ಸ್ಥಾಯಿ ಸಮಿತಿ ಅಧ್ಯಕ್ಷ ಜಾಲೇಲೆ ಶ್ರೀ ವಿನೋದ ಎನ್ನೆಮಡಿ, ಚಾತುರ್ಮಾಸ ಸಮಿತಿಚೆ ಸಂಯೋಜಕ ಜಾಲೇಲೆ ಶ್ರೀ ಅರುಣ ನಾಡಕರ್ಣಿ, ಶಿರಾಲಿ ಲೋಕಲ್ ಸಭಾ ಅಧ್ಯಕ್ಷ ಜಾಲೇಲೆ ಎಸ್.ಜಿ.ಕೊಪ್ಪಿಕರ ತಶ್ಶಿಚಿ ವಿಂಗಡ ಗಣಮಾನ್ಯ ಲೋಕ ಹಾಜರ ಆಶ್ಶಿಲೆಂ. ಭಕ್ತಾದಿ ಲೋಕಾನಿ ಸ್ವಾಮ್ಯಾಂಗೆಲೆ ಪಾದುಕಾ ಪೂಜಾ ಕೋರ್ನು ಗುರುಪೂರ್ಣಿಮೆ ಕಾರ್ಯಕ್ರಮ ಗಡಜ-ಗೌಜಾಂತು ಆಚರಣ ಕೆಲ್ಲಿಂ.  ಹೇ ಸಂದರ್ಭಾರಿ ಜಮ್ಮಿಲೆ ಹಜಾರಭರಿ ಭಕ್ತಾಧಿಂಕ ಅನ್ನ ಸಂತರ್ಪಣಾಯಿ ವ್ಯವಸ್ಥ ಕೆಲೀಲೆ. ಸಾಂಜವಾಳಾ  ಶ್ರೀ ಚಿತ್ರಾಪುರ ಮಠಾಚೆ ಮುಖ್ಯ ಸಭಾಂಗಣಾಂತು ಧರ್ಮ ಸಭಾ ಚಲ್ಲೆ. ಪ|ಪೂ| ಸ್ವಾಮ್ಯಾನಿ ಜಮಿಲೆ ಭಕ್ತಾಧೀಂಕ ಆಶಿರ್ವಚನ ದಿಲ್ಲಿಂತಿ. ಹೇ ಸಂದಭಾರಿ  ಗುರು ಪರಂಪರಾ ಚರಿತ್ರನೂತನ ಪುಸ್ತಕ ಪ|ಪೂ| ಸ್ವಾಮ್ಯಾಂಗೆಲೆ ಅಮೃತ ಹಸ್ತಾನಿ ಉಗ್ತಾವಣ ಜಾಲ್ಲಿ. ಚಾತುರ್ಮಾಸ ಸಮಿತಿಚೆ ಸಂಯೋಜಕ ಜಾಲೇಲೆ ಶ್ರೀ ಅರುಣ ನಾಡಕರ್ಣಿ ಸುರವೇಕ ಸರ್ವಾಂಕ ಸ್ವಾಗತ ಕೆಲ್ಲಿಂತಿ.  ಶ್ರೀ ಮಠಾಚೆ ಅಭಿವೃದ್ಧಿ ಆನಿ ಇತರ ಕಾರ್ಯಕ್ರಮ ಖಾತ್ತಿರಿ ಸ್ಥಾಯಿ ಸಮಿತಿಚೆ ಅಧ್ಯಕ್ಷ ಜಾಲೇಲೆ ಶ್ರೀ ವಿನೋದ ಎನ್ನೆಮಡಿ ತಾನ್ನಿ ಭಾಷಣ ಕೆಲ್ಲಿಂತಿ. ಪ|ಪೂ| ಸ್ವಾಮ್ಯಾಂಗೆಲೆ ಚಾತುರ್ಮಾಸ  ೩೦-೦೯-೨೦೧೨ ಪರ್ಯಂತ ಘಡತಾ ಮ್ಹೊಣು ಮಾಹಿತಿ ಮೆಳ್ಳಾ. 

GSB news

ಹಳಿಯಾಳಾಂತು ಜಿ‌ಎಸ್.ಬಿ. ಯುವವಾಹಿನಿಚೆ ೧೦ಚೆ ಸಮಾವೇಶು

ಆಲ್ತಾಂತು ಹಳಿಯಾಳಾಚೆ ಗಣೇಶ ಕಲ್ಯಾಣ ಮಂಟಪಾಂತು “ಉತ್ತರ ಕನ್ನಡ ಜಿಲ್ಲಾ ಜಿ.ಎಸ್.ಬಿ. ಯುವವಾಹಿನಿ ದಶಮ ಜಿಲ್ಲಾ ಸಮಾವೇಶು ವಿಜೃಂಭಣೇರಿ ಘಡಲೆ. ಗೋಂಯ್ಚೆ ಮುಖ್ಯಮಂತ್ರಿ ಶ್ರೀ ಮನೋಹರ ಪ್ರಭು ಪರಿಕ್ಕರ ತಾನ್ನಿ ಸಮಾವೇಶಾಚೆ ಉದ್ಘಾಟನ ಕೋರ್ನು ಉಲೈತಾ “ವಿದ್ಯೆ ಆನಿ ಸಚ್ಛಾರಿತ್ರ ಆಮಗೇಲೆ ಜೀವನಾಂತು  ರೂಢಿ ಕೋರ್ನುಘೆವ್ಕಾ. ವಿದ್ಯೆ ಹೇ ವಿನಯ ಶಿಕಯ್ತಾ, ಮುಖ್ಯಮಂತ್ರಿ ಜಾವ್ಚೆ ಪಯಿಲೆ ಹಾಂವಯಿ ತುಮ್ಗೆಲೆ ಮ್ಹಣ್ಕೆ ಏಕಳೋ ಸಾಮಾನ್ಯ ಮನುಷ್ಯುಚಿ. ಸಮಾಜ ಆನಿ ಪರಿಸರ ಒಟ್ಟು ರಾಬ್ಚೆ ಕಲೆ ಜೀವನಾಂತು ರೂಢಿ ಕೋರ್ನು ಘೆವ್ಕಾ. ಮ್ಹಳ್ಳಿಂತಿ. ಸಕ್ಕಾಳಿ ಸಭೇಚೆ ಅಧ್ಯಕ್ಷತಾ ಶ್ರೀ ಸುನೀಲ ಹೆಗಡೆ, ಶಾಸಕ ಹಾನ್ನಿ ಘೆತ್ತಿಲೆ. ವ್ಹರಲೀಲ ತಶ್ಶಿ ಸೊಯರೆ ಜಾವ್ನು ಜಿಲ್ಲಾ ಯುವವಾಹಿನೀಚೆ ಅಧ್ಯಕ್ಷ ಶ್ರೀ ರಾಘವ ವಿಷ್ಣು ಬಾಳೇರಿ, ಹಳಿಯಾಳ ಜಿ‌ಎಸ್.ಬಿ. ಸಮಾಜಧ್ಯಕ್ಷ ಶ್ರೀ ಮಂಗೇಶ ಆರ್. ದೇಶಪಾಂಡೆ, ಹಾನ್ನಿ ಉಪಸ್ಥಿತ ಆಶ್ಶಿಲೆ. ಹೇ ಸಂದರ್ಭಾರಿ ಹಳಿಯಾಳ ತಾ||ಚೆ ಮಾಲ್ಗಡೆ ವೈದ್ಯ ಡಾ|| ಎನ್.ಎಸ್.ದೇಶಪಾಂಡೆ ತಾಂಕಾ ಗೋಂಯ್ಚೆ ಮುಖ್ಯಮಂತ್ರಿನ ಸನ್ಮಾನು ಕೆಲ್ಲೊ.
ಧೋಂಪಾರಾ ಸಮಾವೇಶಾಚೆ ಮುಖೇಲ ಸೊಯರೆ ಜಾವ್ನು ಮಾಜಿ ವಿಧಾನಪರಿಸತ್ ಸದಸ್ಯ ಶ್ರೀ ವಿ.ಡಿ.ಹೆಗಡೆ, ಶಿರ್ಶಿಚೆ ಶ್ರೀ ರಾಮು ಎಚ್. ಕಿಣಿ, ಡಾ|| ವಿಜಯಾ ತೇಲಂಗ್   ಹಾನ್ನಿ ಯೇವ್ನು ತಾಂಗತಾಂಗೇಲೆ ವಿಚಾರ ಸಭೆಂತು ವ್ಯಕ್ತ ಕೆಲ್ಲೆ. ಮಾಗಿರಿ ಧಾರ್‍ವಾಡಾಚೆ ಪ್ರಖ್ಯಾತ ಚರ್ಡುಂವ ತಜ್ಞ ಡಾ|| ರಾಜನ್ ದೇಶಪಾಂಡೆ, ಗೇರು ಅಭಿವೃದ್ಧಿ ನಿಗಮಾಚೆ ಅಧ್ಯಕ್ಷ ಶ್ರೀ ವಿನೋದ ಪ್ರಭು, ಉದ್ಯಮಿ ಶ್ರೀ ಪ್ರಮೋದ ಪ್ರಭು ಹಾನ್ನಿ ಮುಖೇಲ ಸೊಯರೆ ಜಾವ್ನು ಆಯ್ಯಿಲೆ ಗೋಷ್ಠಿಂತು ಸಮಾಜಾಚೆ ಅಭಿವೃದ್ಧಿ ಬದ್ದಲ್ ತಾಂಗೆಲೆ ಅಭಿಪ್ರಾಯ ಸಾಂಗಲೆ. ಹುಬ್ಳಿ ಉದ್ಯಮಿ ಶ್ರೀ ಪ್ರಕಾಶ ಆರ್. ನಾಯಕ್,  ಜಿಲ್ಲಾ ಯುವವಾಹಿನಿ ಕಾರ್ಯದರ್ಶಿ ರವಿ.ಎಲ್.ಶ್ಯಾನಭಾಗ, ಹಳಿಯಾಳ ಜಿ.ಎಸ್.ಬಿ. ಯುವವಾಹಿನಿ ಸಂಚಾಲಕ ಶ್ರೀ ಪ್ರಸಾದ ಹುನ್ಸವಾಡಕರ್ ಹಾನ್ನಿ ವೇದಿಕೇರಿ ಉಪಸ್ಥಿತ ಆಶ್ಶಿಲೆಂ.
ಶೃತಿ ಆನಿ ಶಿವಾನಿ ಭೇಂಡೆ, ಹಾನ್ನಿ ಪ್ರಾರ್ಥನ ಸಾಂಗ್ಲೆ. ಶ್ರೀ ಜಯಂತ ತೆಂಡುಲ್ಕರ್ ಹಾನ್ನಿ ಸ್ವಾಮ್ಯಾಲೆ ಆನಿ ಗಣ್ಯ ಮಹನೀಯಾಂಗೆಲೆ ಸಂದೇಶ ವಾಚ್ಲೆ. ಯುವವಾಹಿನಿ ಅಧ್ಯಕ್ಷ ಶ್ರೀ ಮಂಗೇಶ ದೇಶಪಾಂಡೆ ಹಾನ್ನಿ ಸ್ವಾಗತ ಕೆಲ್ಲೆ. ಶ್ರೀಮತಿ ಜಯಶ್ರೀ ಕಾಮತ್ ಹಾನ್ನಿ ಹೆ ಸರ್ವ ಕಾರ್ಯಕ್ರಮ ನಿರೂಪಣ ಕೆಲ್ಯಾರಿ, ಶ್ರೀ ಸತೀಶ ಬಳ್ಕೂರ್ ಹಾನ್ನಿ ವಂದನಾರ್ಪಣ ಕೆಲ್ಲೆ. ಒಟ್ಟಾರೆ ಸರ್ವ ಕಾರ್ಯಕ್ರಮ ಚಂದಾಯೇರಿ ಘಡ್ನು, ಯಶಸ್ವಿ ಜಾಲ್ಲೆ. ಮಾಗಶಿ ಆಸ್ಸುಚೆ ಜಾಗೇರಿ “ಸಚ್ಚಿದಾನಂದ ಭವನ ಬಾಂಚೆ ಖಾತ್ತಿರಿ ಶ್ರೀ ಪರಿಕ್ಕರ್ ತಾನ್ನಿ ತ್ಯಾಚಿ ದಿವಸು ಭೂಮಿ ಪೂಜಾ ಕೆಲ್ಲಿ. ಜೆಲ್ಲೆಚೆ ಹರ್‍ಯೇಕ ಬಗಲೇಚಾನ ಪ್ರತಿನಿಧಿ ಯೇವ್ನು “ಆಮ್ಮಿ ಪೂರಾ ಏಕಚ, ಆಮ್ಚೆ ಭಿತ್ತರಿ ಏಕತ್ರ ಆಸ್ಸ, ಆಮಗೇಲೆ ಸಮಾಜ ಮುಕಾರ್‍ಸುಚಾಕ ಸಗಳ್ಯಾನಿ ಹಾತ್ತಾಕ ಹಾತು ಲಾವಕಾ ಮ್ಹಳೇಲೆ ಸಂದೇಶು ಪಸರಚೆ ತಶ್ಶಿ ಕೆಲ್ಲೆ.
ವರದಿ : ಜಯಲಕ್ಷ್ಮೀ ಜೆ. ದೇಶಪಾಂಡೆ, ಹಳಿಯಾಳಾ.

GSB, Konkani News

 ಶ್ರೀಮದ್ ವಿದ್ಯಾಧಿರಾಜ ತೀರ್ಥ
ಸ್ವಾಮ್ಯಾಂಲೆ ಚಾತುರ್ಮಾಸ ಆರಂಭ
ಗೋಕರ್ಣ  ಪರ್ತಗಾಳಿ  ಜೀವೋತ್ತಮ  ಮಠಾಧೀಶ  ಶ್ರೀಮದ್  ವಿದ್ಯಾಧಿರಾಜ ತೀರ್ಥ ಶ್ರೀಪಾದ ವಡೇರ ಸ್ವಾಮೆಂ ಬೆಳಗಾಂವಿಚೆ  ವಿದ್ಯಾಧಿರಾಜ ಸಭಾಗೃಹಾಂತು ಧಾರ್ಮಿಕ ವಿಧಿ ವಿಧಾನ ಬರಶಿ  ತಾ. ೮-೦೭-೨೦೧೨ ದಿವಸು ನಂದನ ಸಂವತ್ಸರದ ಚಾತುರ್ಮಾಸ ವ್ರತ ಸುರುವಾತ ಕೆಲ್ಲಿಂತಿ. ತ್ಯಾ ದಿವಸು ಸಕ್ಕಾಣಿ ೮-೦೦ ಗಂಟ್ಯಾಕ ಪ್ರಾರ್ಥನಾ, ೮-೩೦ಕ ಪ|ಪೂ| ಸ್ವಾಮ್ಯಾನಿಂ ಮೃತಿಕಾ ಪೂಜಾ ಕೊರಚೆ ಬರಶಿ ಚಾತುರ್ಮಾಸ ವೃತ ವಿಧಿ ಸುರುವಾತ ಜಾಲ್ಲಿ. ಮಾಗಿರಿ ಗಣೇಶ ಪೂಜಾ, ಪುಣ್ಯಾಹವಾಚನ, ದ್ವಾದಶ ಕಲಶಾರ್ಚನ ಸಮೇತ ವಿಂಗವಿಂಗಡ ಧಾರ್ಮಿಕ ವಿಧಿ ಚಲ್ಲೆ. ಧೋಂಪಾರಾ ೧೨ ಗಂಟ್ಯಾಕ ಪ|ಪೂ| ಸ್ವಾಮೆಂ ಮಹಾಪೂಜಾ ಕೆಲ್ಲಿಂತಿ. ಮಾಗಿರಿ ರಾಜ್ಯ, ಪರರಾಜ್ಯ ಚಾನ ಆಯ್ಯಿಲೆ ಅಪಾರ ಭಕ್ತಸ್ತೋಮಾಕ ಮಹಾಪ್ರಸಾದ ಚಲ್ಲೆ.
ಸಾಂಜ್ವಾಳಾ ೫ ಗಂಟ್ಯಾಕ ಪ|ಪೂ|ಸ್ವಾಮೆ ವ್ಯಾಸ ಪೂಜಾ ಕೋರ್ನು ಹಜಾರೋಭರಿ ಭಕ್ತಾಂಗೆಲೆ ಸಮ್ಮುಖಾರಿ ಚಾತುರ್ಮಾಸ್ಯ ವೃತ ಸ್ವೀಕಾರ ಕೆಲ್ಲಿಂತಿ. ೧೯೮೫ಂತು ಬೆಳಗಾವಿ ಶಹಾಪೂರ್‍ಚೆ ಮಾರುತಿ ಮಂದಿರಾಂತು ಸ್ವಾಮ್ಯಾಂಗೆಲೆ ಚಾತುರ್ಮಾಸ ಹೇ ಪಯಲೆ ಘಡಿಲೆ ಹಾಂಗಾ ಸ್ಮರಣ ಕೋರ್ನು ಘೆವ್ಯೇತ. ಅವುಂದು ಚಾತುರ್ಮಾಸು ಬೆಳಗಾವಿಚೆ ತಾಂಗೇಲೆ ಸ್ವಂತ ಶಾಖಾ ಮಠಾಂತು ಚಲ್ತಾ ಆಸ್ಸುಚೆ ಆನ್ನೇಕ ವಿಶೇಷ ಮ್ಹಣ್ಯೇತ. ಹೇ ನಂದನ ಸಂವತ್ಸರಾಂತು ಭಾದ್ರಪದ ಅಧಿಕ ಮಾಸ ಆಯ್ಯಿಲೆ ನಿಮಿತ್ತಾನ ಚಾತುರ್ಮಾಸು ತೀನಿ ಮ್ಹಹಿನೊ ಘಡಚೆ ಆಸ್ಸುನು ಸೆಪ್ಟಂಬರ್ ೩೦ಕ ಸಂಪನ್ನ ಜಾತ್ತಾ. ಅವುಂದೂಚೆ ಚಾತುರ್ಮಾಸ್ಯ ವೇಳ್ಯಾರಿ ೨೦೧೨ಚೆ ಸಪ್ಟಂಬರ್ ೧೩ ದಾಕೂನು ೧೫ ಪರ್ಯಂತ ಶ್ರೀ ಮಹಾವಿಷ್ಣು ಯಾಗ ಸಂಪನ್ನ ಜಾವಚೆ ಆಸ್ಸುನು, ಪ್ರತಿನಿತ್ಯ ತ್ರಿಕಾಲ ಪೂಜೊ, ಸಾಂಸ್ಕೃತಿಕ ಕಾರ್ಯಾವಳಿ, ಭಿಕ್ಷಾ, ಪಾದ್ಯಪೂಜಾ ಇತ್ಯಾದಿ ಚೊಲಚೆ ಆಸ್ಸುನು ಚಡ್ತೆ ಮಾಹಿತಿ ಖಾತ್ತಿರಿ ಮಠಾಚೆ ಅನುಯಾಯಿ ವ ಭಕ್ತಾಧೀನ  ಬೆಳಗಾಮ್ ಚಾತುಮಾಸ ಸಮಿತಿ,  ಶ್ರೀ ವಿದ್ಯಾಧಿರಾಜ ಸಭಾಗ್ರಹ, ರಾಮನಗರ, ಬೆಳಗಾಮ್-೫೯೦೦೧೦, ಪೋನ್ : ೦೮೩೧-೨೪೭೦೮೦೮/ ೨೪೭೦೮೦೭ ಹಾಂಗಾಕ ಸಂಪರ್ಕ ಕೊರಯೇತ. ಬೆಳಗಾಂವಿ ಚಾತುರ್ಮಾಸ್ಯ ಸಮಿತಿ ಪದಾಧಿಕಾರಿ ಅಶ್ಶಿ ಆಸ್ಸತಿ. ಶ್ರೀ ಎಸ್.ಡಿ. ಶಾನಭಾU(ಅಧ್ಯಕ್ಷ), ಶ್ರೀ ಕೆ.ಎನ್. ಪೈ(ಕಾರ್ಯಕಾರಿ ಅಧ್ಯಕ್ಷ), ಶ್ರೀ ಬಿ.ಪಿ. ಹೆಗq ಆನಿ  ಶ್ರೀ ವಿ.ಎನ್.ಪೈ(ಉಪಾಧ್ಯಕ್ಷ) ಶ್ರೀ ಎಸ್.ಎ. ನಾಯಕ್ ಆನಿ ಶ್ರೀ ಎಸ್.ಡಿ. ಪೈ(ಕಾರ್ಯದರ್ಶಿ)
ಬೆಂಗ್ಳೂರಾಂತು  ಓಂಗಣೇಶ್ ತಾಂಗೇಲೆ
’ಜಾದೂಗಾರನ ಜರ್ನಿ’ ಉಗ್ತಾವಣ
ಓಂಗಣೇಶ್ ತಾಂಗೆಲೆ ಜಾದುಗಾರನ ಜರ್ನಿ ಪುಸ್ತಕ ವಾಚ್ಚಿಲಿ ತೆದ್ದನಾ ಮಾಕ್ಕಾಯಿ ವಿದೇಶಾಂತು ಘೂಂವ್ವಿಲೆ ಸಬಾರ ಅನುಭವಾಚೆ ಚಿತ್ತರ ದೋಳ್ಯಾ ಮುಖಾರಿ ಆಯ್ಯಿಲ ವರಿ ಜಾಲ್ಲೆ. ಹೇ ಕೃತಿಂತು ಜಗ ಭರಿ ಘೂವ್ವಿಲೆ ತೆದ್ದನಾ ಖಂಚ ಖಂಚೆ  ಮಾನವೀಯ ಗೂಣ ದಿಸ್ಸೂನು ಯತ್ತಾ. ಮನುಷ್ಯು ಖಂಚೇ ದೇಶಾಂತು ವಾಂಚೂನು ಆಸಲೇರಿಚಿ, ತಾಂಗೆಲೆ ಜೀವನಕ್ರಮು, ಕಾಯ್ದೊ, ಸಂಸ್ಕೃತಿ, ಸಂಸ್ಕಾರ ವಿಂಗ ವಿಂಗಡ ಜಾವ್ನಾಸ್ಸಲೀರಿಚಿ, ಕಶ್ಶಿ ಮಾನವೀಯತಾ ಸರ್ವಾಕ ಮಿಕ್ಕೂನು ರಾಬತಾ ಮ್ಹಣಚೆ ಓಂಗಣೇಶ ತಾನ್ನಿ ಹ್ಯಾ ಕೃತಿಂತು ಅದ್ಭುತ ಜಾವ್ನು ಚಿತ್ರಣ ಕೆಲ್ಲಯಾ ಮ್ಹೊಣು ಪ್ರಖ್ಯಾತ ಚಲನ ಚಿತ್ರನಟಿ ಆನಿ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಚೆ ಮಾಜಿ ಅಧ್ಯಕ್ಷೆ ಡಾ|| ಜಯಮಾಲಾ ತಾನ್ನಿ ಸಾಂಗಲೆ. ತಾನ್ನಿ ಆಲ್ತಾಂತು  ಖ್ಯಾತ ಮ್ಯಾಜಿಶಿಯನ್, ಚಿತ್ರನಟ ಓಂಗಣೇಶ್ ತಾಂಗೆಲೆ ’ಜಾದೂಗಾರನ ಜರ್ನಿ’ ಪುಸ್ತಕ  ಉಗ್ತಾವಣ ಕೋರ್ನು ಉಲೈತಾಶ್ಶಿಲೆ.
ವಿಜಯ ಪುಸ್ತಕ ಪ್ರಕಾಶನ ತಶ್ಶೀಚಿ ರಂಗಚಿನ್ನಾರಿ(ರಿ) ಆಶ್ರಯಯಾರಿ ಬೆಂಗಳೂರಾಚೆ ಇಂಡಿಯನ್ ಇನ್ಸ್ ಸ್ಟಿಟ್ಯೂಟ್ ಆಫ್ ವರ್ಲ್ಡ್ ಕಲ್ಚರ್ ಸಭಾಂಗಣಾಂತು ಸಂಭ್ರಮಾಂಚೆ ಸಮಾರಂಭ ದಿವಲಿ ಫೆಟ್ಟೂನು ಉದ್ಘಾಟನ ಕೆಲೇಲೆ ಖ್ಯಾತ ಸಿನೇಮಾ ಸಂಗೀತ ನಿರ್ದೇಶಕ ವಿ ಮನೋಹರ್ ತಾನ್ನಿ ಉಲೋವ್ನು “ಘೆಲೇಲೆ ೨೫ ವರ್ಷಾಚಾನ ದೋಸ್ತ ಜಾವ್ನಾಶ್ಶಿಲೆ ಓಂಗಣೇಶ್ ಆನಿ ಹಾಂವ ಒಟ್ಟೂ ಸಿನೇಮಾ ಇಂಡಸ್ಟ್ರಿಕ ಆಯ್ಯಿಲೆ. ತಾನ್ನಿ ಶಾರೀರಿಕ ಜಾವ್ನು ಪಯಲೆ ವರಿ ಆಸಲೇರಿಚಿ ಭೌದ್ಧಿಕ ಜಾವ್ನು ಮಸ್ತ ವಾಡ್ಡಲೀಂತಿ. ಜಗ ಭರಿ ಘೂವ್ನು ಬರೆಯಿಲೆ ತಾಂಗೆಲೆ ಹೇ ಕೃತಿ ತಾಂಗೆಲೆ ಸಾಹಿತ್ಯ ಪ್ರೌಢಿಮೆಕ ಸಾಕ್ಷಿ, ಏಕ್ಪಂತ ವಾಚ್ಚಿಚಾಕ ಸೂರ ಕೆಲಯಾರಿ, ಸೊಡಚಾಕ ಮನ ಜಾಯನಾ ಜಾಲೇಲೆ ತಸ್ಸಾಲೆ ಪುಸ್ತಕ. ಮ್ಹಳ್ಳಿಂತಿ. ಅಧ್ಯಕ್ಷತಾ ಘೇವ್ನು ಉಲೈಲೆ ಕೊಂಕಣಿ ಅಕಾಡೆಮಿ ಅಧ್ಯಕ್ಷ ಕಾಸರಗೋಡು ಚಿನ್ನಾ ತಾನ್ನಿ “ ಕೊಂಕಣಿಗ ಓಂಗಣೇಶ್ ಜಾದೂಗಾರ ಜಾವ್ನು ೩೬ ರಾಷ್ಟ್ರ ಘೂವ್ವಿಲ ತಸ್ಸಾಲೊ ಏಕೈಕ ಕಲಾವಿದ, ಸಿನೇಮಾ ನಟನೆ ಬರ್ಶಿ ಸಾಹಿತ್ಯಾಂತು ಕೃಷಿ ಕರತಾ ಆಸ್ಸುಚೆ ತಾಂಕಾ ಸರಸ್ವತಿ ಒಲ್ವಲ್ಯಾ ಮ್ಹಣಚಾಕ ಸಾಕ್ಷಿ. ಅಸ್ಸಲೆ ಪ್ರತಿಬಾನ್ವಿತಾಂಕ ಪ್ರಶಸ್ತಿ ಸೊದ್ದುನು ಘೇವ್ನು ಯತ್ತಾ. ತಾಂಕಾ ಆನಿ ಇತ್ತುಲೆ ಶ್ರೇಯಸ್ಸು ಮೆಳೊ ಮ್ಹಳ್ಳಿಂತಿ.
ಕೃತಿಕಾರ ಓಂಗಣೇಶ್ ಉಲೈತಾ “ಕುಂದಪ್ರಭ ಪತ್ರಾಂತು  ಪ್ರಕಟ ಜಾಲೇಲೆ ಅಂಕಣಾಚೆ ಸಂಗ್ರಹಚಿ ’ಜಾದೂಗಾರನ ಜರ್ನಿ’ ಜಾವ್ನು ಹುಜ್ವಾಡ ಪಾವ್ತಾ ಆಸ್ಸ. ಮಾಗಶಿ ಅಸ್ಸಲೇ ಆನ್ನೇಕ ಕೃತಿ ’ಜಗದೊಳಗಿನ ಜಾದೂ’ ಬಾಯರ ಆಯ್ಯಿಲೆ ತೆದನಾಂಯಿ ಭಾರತ ಮಾತ್ರ ನ್ಹಂಹಿಸಿ ದುಬೈ ಬಹರೈನ್ ರಾಷ್ಟ್ರಾಚೆ ಕನ್ನಡಿಗ ತಾಕೂನು ಮೆಳೀಲೆ ಸಹಕಾರ ಪ್ರೋತ್ಸಾಹಚಿ ಆತ್ತ ಹೇ ಕೃತಿ ಬಾಯರ ಯವಚಾಕ ಕಾರಣ. ಮ್ಹಳ್ಳಿಂತಿ.
ಪ್ರಶಸ್ತಿ ವಿಜೇತ ಚಿತ್ರನಟ ದತ್ತಾತ್ರೇಯ ಪ್ರಥಮ ಕೃತಿ ಸ್ವೀಕಾರ ಕೆಲ್ಲಿಂತಿ. ಕೃತಿಪರಿಚಯ ಖ್ಯಾತ ಅಂಕಣಕಾರ ಸಾಹಿತಿ ಎಚ್ ಗಿರೀಶ್ ರಾವ್(ಜೋಗಿ) ತಾನ್ನಿ ಕೆಲ್ಲೆ. ಹೇಂಚಿ ವೇಳ್ಯಾರಿ  ಕೇಂದ್ರ ಸಾಹಿತ್ಯ ಅಕಾಡೆಮಿ ಪುರಸ್ಕೃತ ಗೋಪಾಲ ಕೃಷ್ಣ ಪೈ  ತಾಂಕಾ ಸನ್ಮಾನು ಚಲ್ಲೊ. ಮಾಲ್ಗಡೆಂ ಚಿತ್ರನಟ ನಿರ್ಧೇಶಕ ಕೆ ಎಸ್ ಎಲ್ ಸ್ವಾಮಿ. ನಟ ಶ್ರೀನಿವಾಸ ಮೂರ್ತಿ ಬರಶಿ ಓಂ ಗಣೇಶ ತಾಂಗೆಲೆ ಅಭಿಮಾನಿ ಲೋಕ ಅಪಾರ   ಸಂಖ್ಯಾರಿ ಉಪಸ್ಥಿತ ಆಶ್ಶಿಲೆಂ. ಸುರವೇಕ ಶ್ರೀಮತಿ ವಿಜಯಾ‌ಓಂಗಣೇಶ್  ತಾನ್ನಿ ಸರ್ವಾಂಕ ಸ್ವಾಗತ ಕೆಲ್ಲಿ. ಕುಮಾರಿ ಶ್ರದ್ಧಾಕಾಮತ್ ಪ್ರಾರ್ಥನೆ  ಕೆಲ್ಲೆ. ಪಿ ಸುಧಾಕರ ತಾನ್ನಿ ಆಬಾರ ಮಾನಲೆ, ಗಣಪತಿ ಹೊಬಳಿದಾರ್ ಸನ್ಮಾನಿತಾಂಕ ಒಳಕ ಕೋರ್ನು ದಿಲ್ಲಿಂತಿ. 

ಗುರುವಾರ, ಆಗಸ್ಟ್ 2, 2012

S.M.Krishnarao


 ಶ್ರೀ ಶಾ.ಮಂ. ಕೃಷ್ಣರಾಯಾಂಕ ೭೦ ಜಾಯ್ ದಿವಸು
“ಶ್ರೀ ಶಾ.ಮಂ. ಕೃಷ್ಣರಾವ್ ಹಾನ್ನಿ ಪನ್ನಾಸ ವರ್ಷ ಧರೂನು ಕನ್ನಡ ಸಾಹಿತ್ಯ ಸೇವಾ ಕರತಾ ಆಸ್ಸತಿ. ತಾನ್ನಿ  “ಕನ್ನಡ ಸಾಹಿತ್ಯಾಚೆ ಏಕ ಧ್ರುವ ನಕ್ಷತ್ರ ಮ್ಹಳ್ಯಾರಿ ಆಭಾಸ ಜಾಯನಾ. ಅ.ನ.ಕೃಷ್ಣರಾಯ ತಾಂಗೇಲೆ ಗಾಡ್ ಫಾದರ್ ಮ್ಹಣತಾತಿ. ೪೨ ವರ್ಷಾ ಮಾಕ್ಷಾನ ತಾನ್ನಿ ಅನಕೃ ಗೌರವ ಗ್ರಂಥ “ರಸಚೇತನ ಸಂಪಾದಕ ಜಾವ್ನು ಉಜ್ವಾಡಾಕ ಆಯಲ್ಲೆ. ತಾಜ್ಜ ನಂತರ ಪ್ರಸಿದ್ಧ ಸಾಹಿತಿ ತರಾಸು “ಬದುಕು ಬರಹ, ಬೀಚಿ ಗೌರವ ಗ್ರಂಥ “ತಿಂಮದರ್ಶನ(೧೯೭೭) ಭಾಯರ ಹಾಡಲೆ. ತಾಜ್ಜ ನಂತರ ವಿಶ್ವ ಭಾರತಿ ಪ್ರಕಾಶನಾಂತು ಅನಕೃ, ಬೀಚಿ, ದಯಾನಂದ ತೊರ್ಕೆ, ಪ್ರೊ. ಬಿ.ಕೆ. ಅನಂತಸ್ವಾಮಿ ಆದಿ ಅನೇಕ ಲೇಖಕಾಂಗೆಲೆ ಕೃತಿ ಉಜ್ವಾಡಾಕ ಹಾಡ್ಲೆ.
ಗೋಂಯಾಂತು ಪ್ರಥಮ ಕನ್ನಡ ಸಂಘ, ಪ್ರಥಮ ಕನ್ನಡ ಶಾಳಾ, ವಾಚನಾಲಯ ಸ್ಥಾಪನ ಕೋರ್ನು ಗೋಂಯಚೆ ಕೊಂಕಣಿ ರಾಜ್ಯಾಂತು ಕನ್ನಡ ಭಾಷಾ, ಕನ್ನಡ ಸಾಹಿತ್ಯಾ ಭೀ ರೊವುನು ವ್ಹಡ ರೂಖು ಕೆಲ್ಲೊ. ತಾಜ್ಜೆ ಫಲ ಬಿ.ಜೆ.ಪಿ. ಪಾರ್ಟಿನ ಘೆತ್ಲೆ ಮ್ಹಣ್ಯೇತ. ಕರ್ನಾಟಕಾಚೆ ಪ್ರಸಿದ್ಧ ಲೇಖಕಾಂಕ, ಕಲಾವಿದಾಂಕ ಗೋಂಯಾಕ, ಗೋಂಯಚೆ ಕಲಾವಿದಾಂಕ, ಲೇಖಕಾಂಕ ಕರ್ನಾಟಕಾಕ ಆಪೋನು ಹಾಡಿಲಿ ಶ್ರೇಯ ಶ್ರೀ ಶಾ.ಮಂ.ಕೃಷ್ಣರಾವಾಂಕ ಪಾವತಾ. ತಾನ್ನಿ ಏಕಳೆಂ ಕರ್ನಾಟಕ-ಗೋಂಯ ರಾಯಭಾರಿಸೆ, ಗೋಂಯ ಕರ್ನಾಟಕ  ಬ್ರಿಜ್‌ಶೆ  ಜಾಲ್ಲೆ. ಗೋಂಯಾಂತು ಥಂಯಿ ಥಂಯಿ ಕನ್ನಡ ಪತ್ರಿಕೇಕ ಏಜಂಟ್ ಭೀ ಕರ್ನು ಪತ್ರಿಕಾ ಪ್ರಸಾರಾಕ ಕಾರಣೀಭೂತ ಜಾಲ್ಲೆ. ದಲಿತಾಲೆ ಸಮಸ್ಯಾ, ಹೊಟೇಲ ಮಾಲ್ಕಾಲೊ ಸಮಸ್ಯಾ, ತಾಜ್ಜ ಬದಲ್ ಚಿಂತನ-ಮಂಥನ ಕೆಲ್ಲೇಲಿ ಕೀರ್ತಿ ತಾಂಕಾ ಪಾವತಾ. ಆಮಕಾ ಗೋಂಯ್ಕ ವ್ಹೋರ್ನು ಗುರ್‍ತು ಕೆಲೇಲೊ ಶಾ.ಮಂ. ಕೃಷ್ನರಾಯ ಹಾನ್ನಿ.
ಹಾನ್ನಿ ಜನ್ಮಿಲೆ ಬೆಳಗಾವಿಂತು. ಬಾಪಯಿ ಮಂಜುನಾಥ ಶ್ಯಾನಭಾಗ, ಆವಯಿ ಗಂಗಾದೇವಿ. ಶಾ.ಮಂ. ಹಾಂಗೆಲೆ ಸುರವೇ ತಾಕೂನು ಹೈಸ್ಕೂಲ್ ಪರ್ಯಂತಾಚೆ ಶಿಕ್ಷಣ ಸಿದ್ದಾಪೂರಾಂತು ಜಾಲ್ಲೆ. ಬಾಪಯಿ ಉದ್ಯೋಗ ನಿಮಿತ್ತ ಗೋಂಯಾಕ ಘೆಲೇಲೆ ನಿಮಿತ್ತ ಹಾಂಗೆಲೆ ಕಾಲೇಜ ಶಿಕ್ಷಣ ಗೋಂಯಾಂತು ಜಾಲ್ಲೆ. ಜಾಲ್ಯಾರಿ ಮಧ್ಯೆ ಶಿಕ್ಷಣಾಂತು ಸಬಾರ ಆಡ್ಬಳ ಯೇವ್ನು ಶಿಕ್ಷಕ ವೃತ್ತಿ ವಿಂಚೂನು   ಘೆತ್ಲೆ. ಹಾಜ್ಜ ಪಯಲೆ ತಾನ್ನಿ ಸಿದ್ದಾಪೂರ ತಾ||ಚೆ ಅಳವಳ್ಳಿ ಇಸ್ಕೂಲಾಂತು ಥೊಡೆ ಕಾಳ ಶಿಕ್ಷಕ ಜಾವ್ನು ಸೇವಾ ದಿಲೇಲೆ ಆಸ್ಸ.
ಬಾಹ್ಯವಿದ್ಯಾರ್ಥಿ ಜಾವ್ನು ಮೈಸೂರು ವಿಶ್ವವಿದ್ಯಾಲಯ ತಾಕೂನು ಘೆತ್ತಿಲೆ ಎಂ.ಎ. ಪದವಿ ಆನಿ ಮಾಗಿರಿ ಬಿ.ಎಡ್. ಪದವಿ. ಗೋಂಯಚೆ  ಗೌರ್ನಮೆಂಟ್ ಹೈಸ್ಕೂಲಾಂತು ಮಾಸ್ತರು ಜಾವ್ನು ಸೇರೂನು ಜ್ಯೂನಿಯರ್ ಕಾಲೇಜಾಚೆ ಪರ್ಯಂತ ಪಾಠ ಕೋರ್ನು ೪೧ ವರ್ಷಾಚೆ ಸುದೀರ್ಘ ಸೇವೆ ನಂತರ ನಿವೃತ್ತಿ ಜಾಲ್ಲಿಂತಿ.
ಗೋಂಯಾಂತು ಕನ್ನಡ ಬಾಂಚೆ ಕಾಮ ಹಾನ್ನಿ ಹಾತ್ತಾ ಘೇವ್ನು ತೆದ್ದನಾ ಥಂಯಿ ಆಶ್ಶಿಲೆ ಖಾಲಿ ೮೧೩ ಕನ್ನಡಿಗಾಂಕ (೧೯೬೧ ಜನಗಣತಿ ಪ್ರಕಾರ) ಕನ್ನಡ ಶಿಕೈಚೆ ಕಾಮ ಸೂರ ಕೆಲ್ಲೆ.  ತಾಜ್ಜೇನ ಕನ್ನಡಾಚೆ ಪರ್‍ಮೋಳು ಗೋಂಯಾಂತು ಆಯ್ಕೂಚಾಕ ಲಾಗಲೆ. ಮಡಗಾಂವ್ ಆಪಣಾಲೆ ಕಾರ್ಯಕ್ಷೇತ್ರ ಮ್ಹೊಣು ವಿಂಚೂನು ಘೇವ್ನು ೧೯೬೩ಂತು “ಗೋವಾ ಕನ್ನಡ ಸಂಘ ಸೂರ ಕೆಲ್ಲೆ. ಆನಿ ಆಪಣಾಲೆ ಹಾತ್ತಾಚಾನ ಸ್ತಂತ ದುಡ್ಡು ಖರ್ಚುನು  ಕನ್ನಡ ಕಾರ್ಯಕ್ರಮ ಚಲೈತಾ ಆಶ್ಶಿಲೆ ಖಂಯಿ.
ಹಾಂಗೆಲೆ ಸಾಹಿತ್ಯ ಕಾರ್ಯಕ್ರಮಾಕ  ಮಿ. ಶಿವಮೂರ್ತಿ ಶಾಸ್ತ್ರಿ, ರಾ.ಯ. ಧಾರವಾಡಕರ್, ಪಾಟೀಲ ಪುಟ್ಟಪ್ಪ, ಅ.ನ.ಕೃ ಆದಿ ದಿಗ್ಗಜಾಂಕ ಆಪೈಲಾ ಖಂಯಿ. ಮಲ್ಲಿಕಾರ್ಜುನ ಮನಸೂರ್, ಬಸವರಾಜ ಮನಸೂರ್, ಏಣಗಿ ಬಾಳಪ್ಪ, ಮಾಸ್ಟರ್ ಹಿರಣ್ಣಯ್ಯ ಇತ್ಯಾದಿ ಪ್ರಖ್ಯಾತ  ಕಲಾವಿದಾನಿ, ರಾಂಗೋಪಾಲ್, ಶ್ರೀನಿವಾಸಮೂರ್ತಿ ಇತ್ಯಾದಿ ಸಿನೇಮಾ ನಟಾನಿ ಯೇವ್ನು  ಕಾರ್ಯಕ್ರಮ ಚಲೋವ್ನು ದಿಲ್ಲಾ ಖಂಯಿ.
ಕನ್ನಡ ಪ್ರಚಾರ ಖಾತ್ತಿರಿ ಹಾನ್ನಿ ವಾಚನಾಭಿರುಚಿ ಯವಚಾಕ ಪುಸ್ತಕ ಪ್ರಕಟಣೆ, ನಾಟಕ ಪ್ರದರ್ಶನ ಇತ್ಯಾದಿ ಚಟುವಟಿಕೇಕ ಒತ್ತು ದಿಲ್ಲೆ. ನೈಶಿ ತಾಜ್ಜ ಖಾತ್ತಿರಿಚಿ ಹಾನ್ನಿ ರಾಜಧರ್ಮ (ಪೌರಾಣಿಕ), ಬಂಡಲ್ ಬಹದ್ದೂರ್, ಮುದ್ದಾಳರು, ಮಾಮೂಲು (ಸಾಮಾಜಿಕ ನಾಟಕಗಳು) ಆದಿ ನಾಟಕ ಬರೋವನು, ರಂಗಮಂಚ ವಯರಿ ಪ್ರದರ್ಶನ ಕೆಲ್ಲಿಂ. ಗೋಂಯಚೆ ದೇವಳಾ ಖಾತ್ತಿರಿ ಕರ್ನಾಟಕಾಚಾಂಕ ಕಳೋವ್ಕಾ ಮ್ಹೊಣು ಗೋಂಯಚೆ ದೇವ್ಳಾ ಖಾತ್ತಿರಿ ಬರೆಯಿಲೆ ಕೃತಿ “ದೇವಭೂಮಿ ಗೋಮಾಂತಕ ಆನಿ ಗೋಂಯಚೆ ಚಂದಾಯಿ ದಾಕೊವನು ದಿವಚೆ “ಸೌಂದರ್ಯನಿಧಿ ಗೋವಾ ಹೇ ನ್ಹಂಹಿಸಿ ಚರ್ಡುಂವಾ ಖಾತ್ತಿರಿ ಬರೆಯಿಲೆ ಕೃತಿ “ಗೋವ ಕಂಬ ಕುಲ, ವರಕವಿ ತಿಪ್ಪಯ್ಯ ಮಾಸ್ತರರು, ಬಸವರಾಜ ಮನ್ಸೂರ್, ಹಾವನೂರು ಸಂಸ್ಥಾನ, ಬಳ್ಳಾರಿ ಬೀಚಿ, ಅ.ನ. ಕೃಷ್ಣರಾಯರವರು ಇತ್ಯಾದಿ ಕೃತಿ ರಚನ ಕೆಲ್ಲಯಾ.
ಮನ್ಸೂರಾಲೆ ಘರಾಣಿಚೆ ವ್ಯಕ್ತಿ ಚಿತ್ರಣ ದಿವಚೆ ‘ಚಿಗುರು ನೆನಪು’ ಎಸ್.ಎನ್. ಕೇಶವೈನಾಂಗೆಲೆ ಜೀವನ ಚಿತ್ರಣಾಚೆ ‘ಬೆಳಕಿನ ಬದುಕು’, ನಟಶೇಖರ ಬಸವರಾಜ ಮನ್ಸೂರ್, ಪಾಪು (ಪಾಟೀಲ ಪುಟ್ಟಪ್ಪ), ಕುಂಚ ಬ್ರಹ್ಮ ಮಡಿವಾಳಪ್ಪ ಮಿಣಜಿಗಿ, ಮಹಾತ್ಮ ಜ್ಯೋತಿರಾವ್ ಪುಲೆ, ಅ.ನ. ಕೃಷ್ಣರಾಯ ಆದಿ ಲೋಕಾಲೆ  ವ್ಯಕ್ತಿಚಿತ್ರ ಪ್ರಕಟ ಜಾಲ್ಲಿಂತಿ. ತಾನ್ನಿ ೧೯೭೨ ಆನಿ ೧೯೭೩ಂತು ಅ.ನ.ಕೃಲೆಂ ‘ಬರಹಗಾರನ ಬದುಕು’ ಆನಿ ಚಿರಚೇತನ (ಮುನ್ನುಡಿಗಳ ಸಂಗ್ರಹ) ಕೃತಿ ಪ್ರಕಟಿ ಕೆಲ್ಲೆ.
 ಡಾ.ವಿ.ಎಸ್. ಸೋಂದೆ ಮಾಮ್ಮಾಲೆ ‘ಜನಸೇವಕ’, ಡಾ.ಬಿ.ಎಸ್. ಸ್ವಾಮಿಂಗೆಲೆ ‘ಮಧುವ್ರತ’ ಇತ್ಯಾದಿ ಗೌರವ ಗ್ರಂಥ ಸಂಪಾದನ ಕೆಲ್ಲಿಂತಿ. ತಾನ್ನಿ ಸಬಾರ ಗ್ರಂಥ ಕೊಂಕಣಿಚಾನ ಕನ್ನಡಾಕ ಅನುವಾದ ಕೋರ್ನು ಕೊಂಕಣಿ ಕನ್ನಡಿಗಾಲೆ ಸ್ನೇಹಸೇತು ಜಾಲ್ಲಿಂತಿ. ತಾಂತು ‘ರಶ್ಮಿ’ (ಕೊಂಕಣಿ ಕವಿತಾ), ‘ಮಗುವಿನ ಭಾಗಜಗತ್ತು’ (ಕೊಂಕಣಿ ಕಥಾಸಂಗ್ರಹ) ಆದಿ ಕೊಂಕಣಿಚಾನ ಮಾತ್ರ ನ್ಹಂಹಿಸಿ ‘ಯುಗ ಪ್ರವರ್ತಕ ಜೀವೊತ್ತಮತೀರ್ಥರು’ ಕೃತಿ ಮರಾಠಿಚಾನ ಅನುವಾದ ಕೆಲ್ಲಿಂತಿ.
ಹೇ ನ್ಹಂಹಿಸಿ ಸಮರಸ, ಕದಂಬ, ಅಭಿನಂದನ, ಕದಿರು, ಸಿಂಗಾರ, ಸ್ಮರಣೆ, ಚಂದನ, ಮಾಂಡವಿ, ರಶ್ಮಿ ಇತ್ಯಾದಿ  ಸ್ಮರಣ ಸಂಚಿಕೆ ಆನಿ ನ್ಯಾಷನಲ್ ಬುಕ್‌ಟ್ರಸ್ಟ್ ಖಾತ್ತಿರಿ ರಾಧೆಯಲ್ಲ, ರುಕ್ಮಿಣಿಯೂ ಅಲ್ಲ (ಹಿಂದಿಚಾನ  ಅಮೃತಾಪ್ರೀತಮ್) ಕೇಂದ್ರ ಸಾಹಿತ್ಯ ಅಕಾಡಮಿ ಖಾತ್ತಿರಿ ಕಾರ್ಮೆಲಿನ್ (ಕೊಂಕಣಿ-ಕಾದಂಬರಿ * ಲೇ. ದಾಮೋದರ ಮಾವಜೊ) ಇತ್ಯಾದಿ ಪ್ರಕಟ ಜಾಲ್ಲಾ. ಆಲ್ತಾಂತು ೮೦೦ ಪುಟಾಚೆ ಬೃಹತ್ ಮರಾಠಿ ಕಾದಂಬರಿ ಕನ್ನಡಾಕ ಹಾಣು ವಿಶೇಷ ಸಾಧನಾ ಕೆಲ್ಲಾ.  ಸಬಾರ ಸಂಘ-ಸಂಸ್ಥೆ ಬರ್ಶಿ ಸಂಬಂಧ ದವರೂನು ಘೆತ್ತಿಲೆ ತಾನ್ನಿ ಡೆಲ್ಲಿಚೆ ಕೆ.ಕೆ. ಬಿರ್ಲಾ ಫೌಂಡೇಶನ್, ಕೇಂದ್ರ ಸಾಹಿತ್ಯ ಅಕಾಡಮಿಚೆ ಸದಸ್ಯ ಜಾವ್ನು, ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನಾಚೆ ಕಾರ್ಯದರ್ಶಿ ಜಾವ್ನು,  ಕೊಂಕಣಿ ಸಾಹಿತ್ಯ ಸಮ್ಮೇಳನಾಂಚೆ ಪ್ರಧಾನ ಕಾರ್ಯದರ್ಶಿ ಜಾವ್ನು ಜೊಳ್ಳಾ. ಹಾಂಕಾ ಡೆಲ್ಲಿಚೆ  ಕರ್ನಾಟಕ ಸಂಘ ತಾಕೂನು  ‘ದೆಹಲಿ ಕನ್ನಡಿಗ’, ಕರ್ನಾಟಕ ಸಂಘ ಸಿದ್ಧಾಪುರ, ಬೆಳಗಾವಿ ಕಲಾವೃಂದ, ಗೋವಾ ಕನ್ನಡ ಸಂಘ, ಕನ್ನಡ ಸಾಹಿತ್ಯ ಪರಿಷತ್ತು, ಶಿರಸಿಚೆ ಅರ್ಬನ್ ಬ್ಯಾಂಕ್, ಕುಮಟಾಚೆ ಡಾ.ಎ.ವಿ. ಬಳಿಗಾ ಕಲೆ ಆನಿ ವಿಜ್ಞಾನ ಕಾಲೇಜು ಇತ್ಯಾದಿ ಕಡೇಚಾನ ಸನ್ಮಾನ ಮೆಳ್ಳಾ. ಬೆಂಗಳೂರಾಕ ಯೇವ್ನು ರಾಬಲ ಮಾಗಿರಿ ನೂತನ ಹಪ್ತಾಳ್ಯಾಚೆ ಸಂಪಾದಕ ಜಾವ್ನು ದೇಡ -ದೋನ ವರ್ಷ ಪತ್ರಿಕೇಚೆ ಜವಾಬ್ದಾರು ವ್ಹೋವ್ನು ಘೆತಲ್ಯಾ. ಆನಿ ೧೯೫೮ ಇಸ್ವೆಚಾನ ಬರೈತಾ ಆಶ್ಶಿಲೆ ತಾನ್ನಿ ತಾಂಗೆಲೆ ಸಾಹಿತ್ಯ ಸೃಷ್ಟಿ ಸುಮಾರ ೮೦ ಕೃತಿಂತು ಭರಿಲೆ ಆಸ್ಸಾ.
ರಂಗಭೂಮಿ, ನೃತ್ಯ, ಯಕ್ಷಗಾನ ಹೇ ಪೂರಾಯಿ ಕ್ಷೇತ್ರಾಂಚೆ ಸಾಧಕ ಬರೋಬರಿ ಶಾ.ಮಂ.ಲೆ ಸಂಬಂಧ ಆಶ್ಶಿಲೆಂ. ಮಾಯಾರಾವ್, ನಟರಾಜ್, ಕೆರೆಮನೆ ಶಿವರಾಮ ಹೆಗಡೆ, ಮಾ. ಹಿರಣ್ಣಯ್ಯ, ಶ್ರಿರಂಗ, ನಾಗೇಂದ್ರರಾವ್, ಬಸವರಾಜ ಮನ್ಸೂರ್, ಮಲ್ಲಿಕಾರ್ಜುನ ಮನ್ಸೂರ್, ಏಣಗಿ ಬಾಳಪ್ಪ, ಹಾಂಗೆಲೆ ಬರ್ಶಿ ಆತ್ಮೀಯ ಸಂಪರ್ಕ ದವರೂನು ಘೆತ್ತಿಲೆ ಶ್ರೀ ಶಾ.ಮಂ. ಕೃಷ್ಣರಾಯಾಂಕ ಕೊಂಕಣಿ ಸಾಹಿತ್ಯಾಚೆ ಪಿತಾಮಹ ಮ್ಹಣೊವಸೂನು ಘೆತ್ತಿಲೆ ಶೆಣೈಗೊಂಯ್‌ಬಾಬ್ ತಾಂಗೇಲೆ ಸಾಧನೆ ಖಾತ್ತಿರಿ ವಿಶೇಷ ಅಭಿಮಾನ ಆಸ್ಸ. ಅಸ್ಸಲೆ ಕೊಂಕಣಿ -ಕನ್ನಡ ಭಾಷಾ ಕ್ಷೇತ್ರಾಕ ವಿಪುಲ ಸೇವಾ ಪಾವಯಿಲೆ, ಶಂಬರ ಭರಿ ಪ್ರತಿಭಾವಂತಾಂಕ ಪ್ರೋತ್ಸಾಹ ದೀವ್ನು ಸಾಹಿತ್ಯ ಕ್ಷೇತ್ರಾಕ ಉಡ್ಗಿರೆ ದಿಲೇಲೆ ಶ್ರೀ ಶಾ.ಮಂ. ಕೃಷ್ಣರಾವ್ ಹಾಂಕಾ ೭೦ ವರ್ಷ ಭರಲಾ ಜಾಲ್ಯಾರಿ ಕನ್ನಡ-ಕೊಂಕಣಿ ದೊನ್ನೀ ಭಾಷಿಕಾ ದಾಕೂನು ತಾಂಗೆಲೆ ಸಾಧನೇಕ ತಕ್ಕ ಜಾಲೇಲೆ ಗೌರವ, ಅಭಿನಂದನ ಮೆಳೇಲ ನಾ ಮ್ಹಣಚೆ ಖರೇಚಿ ದುಃಖಾಚೆ ವಿಚಾರು. ಮುಖಾವೈಲೆ ದಿವಸಾಂತು ಪೂಣಿ ತಾಂಕಾ ಯಥೋಚಿತ ಗೌರವ, ಪ್ರಶಸ್ತಿ, ಪುರಸ್ಕಾರ ಪ್ರಾಪ್ತ ಜಾವೊಂತಿ ಮ್ಹೊಣು ಹಾಂವ ಆಶಯ ಕರ್ತಾ. ತಾಂಕಾ ೭೦ ವರ್ಷ ಭರಿಲೆ ಸುವೇಳ್ಯಾರಿ ತಾಂಕಾ ೩-೦೬-೨೦೧೨ ದಿವಸು ಬೆಂಗಳೂರಾಚೆ ಬಸವನಗುಡಿಚೆ ನ್ಯಾಷನಲ್ ಕಾಲೇಜ್ ಸಭಾಂಗಣಾಂತು ಅಭಿನಂದನಾ ಗ್ರಂಥ “ಪದಪಥಿಕ ಹಾಜ್ಜೆ ಉಗ್ತಾವಣ ಆನಿ ಗೌರವಾರ್ಪಣ ಕಾರ್ಯಕ್ರಮ ಚಲ್ಲೆ. ತಾಂಗೆಲೆ ಅಪಾರ ಅಭಿಮಾನಿ ಲೋಕ ಹೇ ವೇಳ್ಯಾರಿ ಉಪಸ್ಥಿತ ಉರ್ನು ತಾಂಕಾ ದೇವು ಬರೆಂ ಕೊರೊ ಮ್ಹಳ್ಳಿಂತಿ. ಹಾಂವಯಿ ತಾಂಕಾ ದೇವು ಆರೋಗ್ಯ ಭಾಗ್ಯ, ಕೀರ್ತಿ ದಿವುನು ರಾಕ್ಕೊ ಮ್ಹೊಣು ದೇವಾಲಾಗ್ಗಿ ಮಾಗಣಿ ಕರ್ತಾ. ಸರಸ್ವತಿ ಪ್ರಭಾಚೆ ಸರ್ವ ವಾಚಕಾ ತರಪೇನ “ದೇವು ಬರೆಂ ಕೊರೊಂ ಮ್ಹಣತಾ. 
- ಅನಿಲ ಪೈ, ಶಿರಸಿ