ಮೆಗೇಲೆ ಉತ್ತರ (ಸರಸ್ವತಿ ಪ್ರಭಾ 15-12-2011)

ಹರ್‍ಯೇಕ ದಿವಸು ಸಂಪತಾನಾ ಫಾಯಿ ಆನ್ನೇಕ ಚಾಂಗ ದಿವಸು ಯತ್ತಾ ಮ್ಹಣಚೆ ಭರ್‍ವಸ ಆಸ್ತಾ. ತಶ್ಶಿಚಿ ಪ್ರತಿ ಏಕ ವರ್ಷ ಮರತಾನಾ ಆನ್ನೇಕ ನವೀನ ವರ್ಷ ಜನ್ಮುನು ಆಸ್ತಾ. ಶಿಕ್ಷಣ ಸಂಪ್ಲೆ ಮ್ಹಳ್ಯಾರಿ ಉದ್ಯೋಗಾಚೆ ನಿರೀಕ್ಷಾ ಆಸ್ತಾ. ಅಶ್ಶಿ ಏಕ ಮುಕ್ತಾಯಾ ಮಾಕಶಿ ಆನ್ನೇಕಾಚೆ ಆರಂಭ ನಿಸರ್ಗ ನಿಯಮು. ಜಾಲ್ಯಾರಿ ತಾಂತು ಚಾಂಗ ಜಾಂವೊ ವಾಯ್ಟ ಫಲ ಘೆವಚಾಂತು ಆಮಗೇಲೆ ಮೆಹನತ್ತ ಆಸ್ತಾ. ಮೆಹನತ್ ಮ್ಹಳ್ಯಾರಿ ಜಾಗೃತಿ ಆನಿ ಶ್ರಮ. ಜಾಗೃತಿ ಆನಿ ವಾವ್ರೊ ಕರನಾಶಿ ಖಂಚೆಂತು ಯಶ ಮೇಳ್ನಾ. ಮೆಳ್ಯಾರಿಚಿ ತ್ಯಾ ಶಾಶ್ವತ ನ್ಹಂಹಿ. ಬಾಂದೂನು ದಿಲೇಲೆ ಬುತ್ತಿ, ಸಾಂಗೂನು ದಿಲೇಲೆ ಉತ್ರಾ ಮ್ಹಣಕೆ! ಯವಚೆ ದಿವಸಾಂತು ಆಪಣಾಕ ಚಾಂಗ ಜಾವ್ಕಾ ಮ್ಹೊಣು ಆಶ್ಶಿಲ್ಯಾನ ಆಯಚೆ ದಿವಸಾಂತು ಪ್ರಯತ್ನ ಕೊರಕಾ. ಸರ್ವ ಲೋಕ ನ್ಹವಂ ವರ್ಷಾಚೆ ಶುಭಾಶಯು ಸಾಂಗತಾತಿ. ದೀಪಾವಳಿ, ಸಂವ್ಸಾರಪಾಡ್ವೆಕ ಶುಭೇಚ್ಛೆ ವ್ಯಕ್ತ ಕರತಾತಿ. ತ್ಯಾ ತಾಂಗೇಲೆ ವ್ಹಡಪಣ. ಜಾಲ್ಯಾರಿ ತಾನ್ನಿ ಸಾಂಗ್ಲೆ ಕೂಡ್ಲೆ ಆಮಕಾ ಚಾಂಗ ಜಾತ್ತಾ ಮ್ಹಣಚೆ ವಾರೆಂ ಯವ್ನು ರುಕ್ಕಾಚಾನ ಆಂಬೊ ತುಂಟೂನು ಆಮಗೇಲೆ ಖೊಂಚೆಂತು ಯವ್ನು ಪಳ್ಳಿಲೆ ವರಿ! ತಸ್ಸಾಲೆ ಅದೃಷ್ಟ ಕಿತ್ಲೆ ಜನಾಂಕ ಆಸ್ತಾ?
ಆಮ್ಮಿ ಆನ್ನೆಕ್ಲೆ ಖಾತ್ತಿರಿ ಕೆದನಾಂಯಿ ಶುಭೇಚ್ಛೆ ಕೊರಕಾಚೀಚಿ. ತಾಜ್ಜೇನ ಆಮಗೇಲೆ ಮನಾಂತು ದ್ವೇಶ, ಜಾಳ ಇತ್ಯಾದಿ ಕೂಸ್ಸಡ ಭೋರ್ನು ರಾಬ್ಬನಾ. ಆಮ್ಮಿ ಪ್ರತಿ ದಿವಸು ನಾವ್ನು ಚ್ಹೊಕ ಜಾಯನ ಜಾಲಯಾರಿ ಆಮಗೇ ಲಾಗ್ಗಿ ಘಾಣಿ ಯಾನಾವೇ? ತಶ್ಶಿಚಿ ಆಮ್ಮಿ ಪ್ರತಿ ದಿವಸು ಆಮಗೇಲೆ ಮನ ಚ್ಹೊಕ ಕೋರ್ನು ಘೇನಾ ಜಾಲ್ಯಾರಿಚಿ ಮನ ಕೂಸ್ಸಡ ಜಾತ್ತಾ. ಆನ್ನೆಕ್ಲ್ಯಾಂಕ ಚಾಂಗ ಜಾಂವೊ ಮ್ಹೊಣು ಇಚ್ಛಾ ಪಾವಚೆ, ಅತಿಯಾಶೆ ಪಾವನಾಶಿ ಆಶ್ಶಿಲ್ಯಾಂತು ಸಂತೋಷ ಪಾವಚೆ ಹೇ ಪೂರಾ ಮನಾಚೆ ಚ್ಹೊಕ ಪಣಾಚೆ ನಮೂನೊ.
ಮನುಷ್ಯಾಲೆ ಮನ ಮ್ಹಣಚೆ ವಿಶಾಲ ಆಸ್ಸೂಕಾ. ಮನ ವ್ಹಡ ಕೋರ್ನು ಘೆವ್ಕಾ ಜಾಲ್ಯಾರಿ ಭಾವನಾಂಯಿ ವಿಶಾಲ ಜಾವ್ನು ಆಸ್ಸುಕಾ. ಕಿತ್ಲಕಿ ಲೋಕ ಆನ್ನೇಕ್ಲಿ ಯಶ ಪಾವ್ವಿಲೆ ತೆದ್ನಾ ತಾಂಕಾ ಪ್ರೋತ್ಸಾಹ ದೀನಾಂತಿ, ಕರಬೀತಾತಿ. ತಾಂಗೇಲೆ ಅಭಿವೃದ್ದಿ ಪಳೋವನು ಪೊಟ್ಟಾಂತು ಜಾಳ ಭೊಗತಾತಿ. ಪರತ ಪರತ ತಾಂಕಾ ಆಡಬಳ ಜಾವ್ನು ತಾಂಗೆಲೆ ಅಭಿವೃದ್ಧಿಕ ಮಾರ ಘಾಲತಾತಿ. ಆನ್ನೇಲ್ಲ್ಯಾಲೆ ಅಭಿವೃದ್ಧಿಕ ಆಡ ಜಾವ್ನು ಆಮ್ಮಿ ಅಭಿವೃದ್ಧಿ ಪಾವಚಾಕ ಸಾಧ್ಯ ಆಸ್ಸವೇ? ಖಂಡಿತ ನಾ. ಕಿತಯಾಕ ಮ್ಹಳ್ಯಾರಿ ಆಮ್ಮಿ ವಾಡಕಾ ಜಾಲೇಲೆ ವೇಳು ಪೂರಾ ಆಮ್ಮಿ ಆನ್ನೇಕ್ಲ್ಯಾಂಕ ಪಾಡೋವಚಾಕ ವಾಪರ್‍ತಾಮೂ! ತಾಜ್ಜ ಮಧ್ಯೆ ಘರಾ ತಾಪತ್ರಯ, ಉದ್ಯೋಗ ನೌಕರೀಂತು ಯವಚೆ ಕಿರ್‍ಕಿರಿ, ಸಂಬಂಧಿಕಾ ಘರ್‍ಕಡೆ ವಚ್ಚೆ, ಯವ್ಚೆ, ರೋಗ-ರುಜಿನಾ ಇತ್ಯಾದಿ ಸಮ ಕೋರ್ನು ಘೆವ್ಕಾಮೂ!  ಹೇ ಪೂರಾ ಜಾವ್ನು ಮಾಗಿರಿ ಆಪಣಾಲೆ ಅಭಿವೃದ್ಧಿ ಪೊಳೋವನು ಘೆವ್ಕಾ. ತ್ಯಾ ಖಾತ್ತಿರ ಆಮ್ಮಿ ಖಂಡಿತ ಜಾವ್ನು ಅಭಿವೃದ್ದಿ ಪಾವ್ಕಾ ಮ್ಹೊಣು ಆಸಲೇರಿ ವಿಂಗಡ ಲೋಕಾಂಕ, ತಾಂಗೆಲೆ ಯಶ, ಅಪಯಶ ದೊನ್ನೀ ವಿಸೋರೂನು ನಿರಂತರ ಪ್ರಯತ್ನಶೀಲ ಜಾವ್ನು ಆಸ್ಸೂಕಾ. ಆನ್ನೇಕ್ಳೊ ಕಿತ್ಲೊ ವ್ಹಡ ಜಾಲ್ಯಾರಿಚಿ ತೋ ಆಮಗೇಲೆ ಕಷ್ಟಾಕ ಖಂಡಿತ ಯಾನಾ, ದುರ್ಬಳೊ ಜಾಲ್ಲೊ ಮ್ಹೊಣು ಸಮಜೂವ್ಯಾ ಆಮ್ಮಿ ತಾಕ್ಕಾ ಕಿತ್ಲೆ ದಿವಚಾಕ ಜಾತ್ತಾ? ಹೇ ಜಾಗೃತಿ ಉಡಗಾಸಾಂತು ದವರೂನು ಘೇವ್ನು ಆಮ್ಮಿ ನವೀನ ವರ್ಷ ಸ್ವಾಗತ ಕೊರಚಾಕ ತಯಾರ ಜಾವಕಾ. “ನ್ಯೂ ಇಯರ್ ಪ್ರತಿ ವರ್ಷ ಎತ್ತಾ; ತಾಕ್ಕಾ ಆಮ್ಮಿ ತಯಾರ ಆಸ್ಸೊತಿ, ನಾಶಿ ಉರೊಂತಿ! ಜಾಲಯಾರಿ ಆಮಗೇಲೆ ಅಭಿವೃದ್ಧಿ ಖಾತ್ತಿರಿ ಹೇ ವೇಳ್ಯಾರಿ ಯೋಜನ ಘಾಲ್ನು ಘೆವಚಾಂತು ಆಮಗೇಲೆ ಬುದ್ದೊಂತಿಕ ಆಸ್ಸ.
ಸರ್ವಾಂಕ ದೇವು ಬರೆ ಕೊರೊಂ    - ಆರಗೋಡು ಸುರೇಶ ಶೆಣೈ, ಸಂಪಾದಕು

ದಿ ಶ್ಯಾಮರಾವ್ ವಿಠ್ಠಲ ಕೋ-ಆಪ್ ಬ್ಯಾಂಕಾಚೆ ೧೧೩ಚೆ ಶಾಖಾ ಧಾರವಾಡಾಂತು ಆರಂಭ

     ೧೯ಂ೬ಕ ಮ್ಹಳ್ಯಾರಿ ೧೦೫ ವರ್ಷಾ ಮಾಗಶಿ ಸೂರು ಜಾವ್ನು ನಿರಂತರ ಜಾವ್ನು ಇತ್ಲೆ ಸುದೀರ್ಘ ಕಾಳ ಗ್ರಾಹಕಾಂಕ ಸೇವಾ ಪಾವಯ್ತಾ ಆಸ್ಸೂಚೆ “ದಿ ಶ್ಯಾಮರಾವ್ ವಿಠ್ಠಲ ಕೋ-ಆಪ್ ಬ್ಯಾಂಕಾಚೆ  ೧೧೩ಚೆ ಶಾಖಾ ತಾ. ೧೫-೧೧-೨೦೧೧ ದಿವಸು ಧಾರ್‍ವಾಡಾಂತು ಕಾರ್ಯಾ ರಂಭ ಕೆಲೇಲೆ ಮಾಹಿತಿ ಮೆಳ್ಳಾ. ಕರ್ನಾಟಕ, ಮಹಾರಾಷ್ಟ್ರ ಸಮೇತ ೭ ರಾಜ್ಯಾಂತು ಹೇ ಬ್ಯಾಂಕಾಚೆ ಶಾಖಾ ಆಸ್ಸೂನು, ರೂ. ೧೧,೦೦೦ ಕೋಟಿ ಪಶಿ ಚ್ಹಡ ವಹಿವಾಟ ಚಲಯ್ತಾ ಆಸ್ಸೂಚೆ ದಿ ಶ್ಯಾಮರಾವ್ ವಿಠ್ಠಲ ಕೋ-ಆಪರೇಟಿವ್ ಬ್ಯಾಂಕ್ ಹಿಂದೂಸ್ತಾನಾಚೆ ಪಯಲೆ ತೀನಿ ಮುಖೇಲ ಸಹಕಾರಿ ಬ್ಯಾಂಕಾಂತು ಏಕ  ಮ್ಹೊಣು ಗುರ್‍ತು ಕೆಲ್ಲಾ. ಅನೇಕ ಐಟಿ ಪ್ರಶಸ್ತಿ ವಿಜೇತ ಹೇ ಬ್ಯಾಂಕ ಹುಬ್ಬಳ್ಳಿಂತು ಶಾಖಾಧಿಕಾರಿ ಶ್ರೀ ಕೃಷ್ಣಾ ಆರ್. ಪೈ ಹಾಂಗೆಲೆ ಸಮರ್ಥ ನಾಯಕತ್ವಾರಿ ಆಲ್ತಾಚೆ ಸುಮಾರ ವರ್ಷಾಚಾನ ಹಾಂಗಾಚೆ ಲೋಕಾಂಕ ಚಾಂಗ, ಬಹುಮುಖ ಸೇವಾ ಪಾವಯ್ತಾ ಆಯಲಾ.
ಆತ್ತ ಧಾರ್‍ವಾಡಾಚೆ ಲೋಕಾಂಕ ಸೇವಾ ಪಾವಯ್ಚಾಕ  ಹಾಂಗಾಚೆ ಸಿ.ಬಿ.ಟಿ. ಲಾಗ್ಗಿ ಆಸ್ಸೂಚೆ ತೇಜಾ ಮಹಲಾಂತು ಶಾಖಾ ಕಾಳ್ಳಾ. ತಾಜ್ಜ ಉದ್ಘಾಟನ ತಾ. ೧೫-೧೧-೨೦೧೧ ದಿವಸು ಉತ್ತರ ಕರ್ನಾಟಕಾಚೆ ಪ್ರಖ್ಯಾತ ಉದ್ಯಮಿ, ವಿ.ಆರ್.ಎಲ್. ಲಾಜಿಸ್ಟಿಕ್ ಲಿ. ಹಾಜ್ಜೆ ಅಧ್ಯಕ್ಷ ಆನಿ ಆಡಳಿತ ನಿರ್ದೇಶಕ ತಶ್ಶಿಚಿ ಎಂ.ಎಲ್.ಸಿ. ಶ್ರೀ ವಿಜಯ ಸಂಕೇಶ್ವರ ಹಾನ್ನಿ ಪಣ್ತಿ ಪೆಟ್ಟೋನು ಕೆಲ್ಲೆ. ಹೇ ಸಂದರ್ಭಾರಿ ದಿ. ಶ್ಯಾಮರಾವ್ ವಿಠ್ಠಲ ಕೋ‌ಆಪ್ ಬ್ಯಾಂಕಾಚೆ ಸಿ.ಇ.ಓ. ಶ್ರೀ ಶ್ರೀನಿವಾಸ ಜೋಷಿ, ವೈಸ್ ಚೇರಮೆನ್ ಶ್ರೀ ಸುರೇಶ ಹೆಮ್ಮಾಡಿ, ಡಿ.ಜಿ.ಎಮ್. ಶ್ರೀ ಸದಾನಂದ ಶಿರಾಲಿ, ಡಿ.ಎಮ್. ಶ್ರೀ ಸಂದೀಪ ನಾಡಕರ್ಣಿ, ಶಾಖಾಧಿಕಾರಿ ಶ್ರೀ ಸತೀಶ ಕೊಪ್ಪಕರ, ಬ್ಯಾಂಕಾಚೆ ಹುಬ್ಬಳ್ಳಿ ಶಾಖಾಧಿಕಾರಿ ಶ್ರೀ ಕೃಷ್ಣಾ ಆರ್. ಪೈ ಸಮೇತ ಹುಬ್ಬಳ್ಳಿ-ಧಾರವಾಡ ದೊನ್ನೀ ಬ್ಯಾಂಕ್ ಶಾಖೆಚೆ  ಸರ್ವ ಸಿಬ್ಬಂದಿ, ಶೇರ್‌ಹೋಲ್ಡರ್‍ಸ್, ಆನಿ ಆತ್ಮೀಯ ಗ್ರಾಹಕ ಉಪಸ್ಥಿತ ಆಶ್ಶಿಲೆಂ.
ಹೇ ಶಾಖೆಂತು ಬ್ಯಾಂಕ್ ವ್ಯವಹಾರಾಕ ಸಂಬಂಧ ಪಾವ್ವಿಲೆ ಸರ್ವ ಸೇವಾ ಉಪಲಬ್ಧ ಆಸ್ಸ. ತಾಜ್ಜ ಬರ್ಶಿ‌ಎ.ಟಿ.ಎಮ್., ಲಾಕರ, ಇಂಟರ್‌ನೆಟ್ ಬ್ಯಾಂಕಿಂಗ್ ಆದಿ ಸೇವಾ ಪ್ರಾಪ್ತ ಆಸ್ಸ ಮ್ಹೊಣು ಕೋಳ್ನು ಆಯಿಲಾ.  ಕೊಂಕಣಿ ಲೋಕಾ ತಾಕೂನು ಸ್ಥಾಪಿತ ಜಾಲೇಲೆ ಹೇ ಬ್ಯಾಂಕ ಇತ್ತುಲೆ ನಾಮಾಂಕಿತ ಜಾಲೇಲೆ ಕೊಂಕಣಿಗಾಂಕ ಪೂರಾ ಅಭಿಮಾನಾಚೆ ವಿಷಯು. ಹೇ ಬ್ಯಾಂಕಾಚೆ ಅಭಿವೃದ್ಧಿಕ ಹುಬ್ಬಳ್ಳಿ-ಧಾರ್‍ವಾಡಾಂತು ಆಸ್ಸುಚೆ ಸರ್ವ ಅಭಿಮಾನಿ ಕೊಂಕಣಿ ಬಾಂಧವಾನಿ ಸಕಾಲಿಕ ಪ್ರೋತ್ಸಾಹು ದೀವ್ನು ಹೇ ಬ್ಯಾಂಕಾ ನಿಮಿತ್ತ ಸಮಾಜಾಕ ಆನ್ನಿಕೆ ಚ್ಹಡ ನಮೂನ್ಯಾಚೆ ಸೇವಾ ಪಾವಯ್ಚೆ ವರಿ ಜಾವೋ ಮ್ಹೊಣು “ಸರಸ್ವತಿ ಪ್ರಭಾ ಆಶಾ ಕರ್ತಾ. ಶ್ಯಾಮರಾವ್ ವಿಠ್ಠಲ ಕೋ‌ಆಪ್ ಬ್ಯಾಂಕಾಚೆ ಧಾರ್‍ವಾಡ ಶಾಖೆಚೆ ಪತ್ತೊ ೧೧ ತೇಜಾ ಮಹಲ್, ೧೫೦/ಎ, ಮಾರ್ಕೆಟ್ ಪೋರ್ಟ್, ರೀಗಲ್ ಟಾಕೀಸ್ ಎದ್ರಾಕ, ಸಿ.ಬಿ.ಟಿ. ಲಾಗ್ಗಿ ಧಾರವಾಡ-೫೮೦೦೦೧. ಪೋನ್ : ೦೮೩೬-೨೪೪೭೩೭೩.

ಜಿ.ಎಸ್.ಬಿ. ಸಮಾಜ ಆನಿ ಕೊಂಕಣಿ ಖಬ್ಬರ 12/11

    ಶ್ರೀ ಮಹಾಗಣಪತಿ ಮಹಾಮಾಯಾ ದೇವಳ, ಶಿರಾಲಿ
     ಶಿರಾಲಿಂತು ಆಸ್ಸೂಚೆ ಶ್ರೀ ಮಹಾಗಣಪತಿ ಮಹಾಮಾಯಾ ದೇವಳಾಂತು ವರ್ಷಂಪ್ರತಿ ಚೊಲಚೆ ಮ್ಹಣಕೆ ವಾರ್ಷಿಕ ರಥೋತ್ಸವು ತಾ. ೨೬-೧೧-೨೦೧೧ ತಾಕೂನು ೫-೧೨-೨೦೧೧ ಪರ್ಯಂತ ಅತ್ಯಂತ ವಿಜೃಂಭಣೇರಿ ಚಲ್ಲಿಲೆ ಖಬ್ಬರ ಮೆಳ್ಳಾ. ತಾ. ೦೩-೧೨-೨೦೧೧ ದಿವಸು ‘ಬ್ರಹ್ಮರಥೋತ್ಸವು ಸಂಪನ್ನ ಜಾಲ್ಯಾರಿ, ತಾ. ೦೫-೧೨-೨೦೧೧ ದಿವಸು ಅವಭೃತೋತ್ಸವ ಬರೋಬರಿ ವಾರ್ಷಿಕ ರಥೋತ್ಸವ ಕಾರ್ಯಕ್ರಮ ಪೂರ್ತಿ ಜಾಲ್ಲೆ. ತಾ. ೦೩-೧೨-೨೦೧೧ ದಿವಸು ದೇವಳಾಚೆ ಆವರಾಂತು “ಕುಳಾವಿ ಮಹಾಸಭಾ ಘಡಲೆ. ಹೇ ಸಂದರ್ಭಾರಿ ಪ್ರಾರ್ಥನ, ಘೆಲೇಲೆ ವರ್ಷಾಚೆ ಮಹಾಸಭಾಚೆ ಕಾರ್ಯಕಲಾಪ ವರದಿ, ಅಧ್ಯಕ್ಷಾಲೆ ಭಾಷಣ,    ವಿಂಗವಿಂಗಡ ಕಾರ್ಯಕಲಾಪ, ಆಭಾರ ಮನ್ನಣ ಇತ್ಯಾದಿ ಕಾರ್ಯಕ್ರಮು ಚಲೇಲೆ ಖಬ್ಬರ ಮೆಳ್ಳಾ. ದೇಶಾದ್ಯಂತ ತಾಕೂನು ಆಯಲೀಲೆ ಕುಳಾವಿ ಮಹಾಜನ ಹಾಂತು ವಾಂಟೊ ಘೇವ್ನು ಆಪಣಾಂಗೆಲೆ ಸಲಹಾ, ಅಭಿಪ್ರಾಯ ವಾಂಟೂನು ಘೆತ್ಲೆ.
ಶ್ರೀ ಮಹಾಮಾಯಾ ಮಹಾಗಣಪತಿ ದೇವಳ, ಶಿರಾಲಿ
     ಹಾಂಗಾ 1೨ ವರ್ಷಾಚೆ “ಸಾಮೂಹಿಕ ಉಪನಯನ ಸಂಸ್ಕಾರ ಕಾರ್ಯಕ್ರಮು ೨೦೧೨ ವರ್ಷಾಚೆ ಅಕ್ಷಯ ತೃತೀಯ ದಿವಸು ಘಡೋನು ಹಾಡಚಾಕ ದೇವಳಾಚೆ ತರಪೇನ ಠರೈಲಾ. ಆಸಕ್ತ ಕುಳಾವಿ ಮಹಾಜನಾನಿ ಆಪಣಾಂಗೆಲೆ ಘರಾಂತು ಯುಕ್ತ ವಟು ಆಸಲೇರಿ ತಾಗೇಲೆ ನಾಂವ, ಗೋತ್ರ, ಜನ್ಮ ನಕ್ಷತ್ರ, ರಾಶಿ ಇತ್ಯಾದಿ ಮಾಹಿತಿ ತಾ. ೫-೦೪-೨೦೧೨ ಭಿತ್ತರಿ ದೇವಳಾಚೆ ಆಫೀಸಾಂತು ನೋಂದ ಕೊರಕಾ. ಚಡ್ತೆ ಮಾಹಿತಿ ದೇವಳಾಚೆ ಆಫಿಸಾಚಾನ ಘೆವ್ಯೇತ. ಮಾಹಿತೀಕ ಪೋನ್ : ೦೮೩೮೫- ೨೫೮೪೭೪ ಜಾಂವೊ ೨೫೮೨೭೪ ಹಾಂಗಾಕ ಸಂಪರ್ಕು ಕೊರ್‍ಯೇತ.
ಗೋವಾ ಕೊಂಕಣಿ ಅಕಾಡೆಮಿ ಥಾವ್ನ  ಬಸ್ತಿ ವಾಮನ ಶೆಣೈ , ಮಿರಾಂದಾ ಹಾಂಕಾ ಪುರಸ್ಕಾರ
     ಗೋವಾ ರಾಜ್ಯ ಸರ್ಕಾರಾಚೆ ಗೋವಾ ಕೊಂಕಣಿ ಅಕಾಡೆಮಿ ೨೦೧೧ ವರ್ಷಾಚೊ ಕೊಂಕಣಿ ಜೀವನ ಸೇವಾ ಸಾಧನಾ ಆನಿ ಸಾಹಿತ್ಯ ಪ್ರಾಜ್ಞ ಪುರಸ್ಕಾರ ಘೋಷಣ ಕೆಲ್ಲಾಂ. ಗೋವಾ ರಾಜ್ಯಾಂತುಲೆ ಭಾಯರ ರಾವಚೆ ಕೊಂಕಣಿ ಸಾಧಕಾನಿ ಕೆಲ್ಲೆ ಸಾಧನ ಆನಿ ಸೇವೆಕ ಫಾವೊ ಜಾವಚೆ ಮಾಧವ ಮಂಜುನಾಥ ಶ್ಯಾನುಭಾಗ ಕೊಂಕಣಿ ಭಾಷಾ ಜೀವಮಾನ ಸೇವಾ ಪುರಸ್ಕಾರ ವಿಶ್ವ ಕೊಂಕಣಿ ಸರದಾರ ಮಾನೆಸ್ತ ಶ್ರೀ ಬಸ್ತಿ ವಾಮನ ಶೆಣೈ ಹಾಂಕಾ ಕೊಂಕಣಿ ಭಾಷಾ ಚಳವಳಿಚೆ ಮುಖೇಲಪಣ ಆನಿ ಸಾಹಿತ್ಯ, ಕಲೆ, ಸಂಸ್ಕೃತಿ, ಜಾನಪದ ಕ್ಷೇತ್ರಾಚೆ ಅಭಿವೃದ್ಧಿಕ ದಿಲೆಲ್ಯಾ ಸೇವಾ ಮಾನ್ವುನ ಘೇವ್ನು, ತಶೀಂಚಿ ಸಾಹಿತ್ಯ ಆನಿ ಸಂಶೋಧನಾ ಖಾತಿರ ಜೀವಮಾನಾಚೆ ಸೇವೆಕ ಅಶಿಲೆ ಸಾಹಿತ್ಯ ಪ್ರಾಜ್ಞ ಪುರಸ್ಕಾರ ಮೈಸೂರಾಚೆ ಮಾನೆಸ್ತ ರೋಕಿ ವಿ. ಮಿರಾಂದಾ ಹಾಂಕಾ ಫಾವೊ ಜಾತಾ ಅಶಿಂ ಗೋವಾ ಕೊಂಕಣಿ ಅಕಾಡೆಮಿನ ಘೊಷಣ ಕೆಲ್ಯಾ. ಪುರಸ್ಕಾರ ರೂ.೨೫೦೦೦-೦೦ ಗೌರವ ಧನ, ಶಾಲ ಆನಿ ಮಾನಪತ್ರ ಜಾವನ ಆಸಾ.
ಡಾ ರೋಕಿ ಮಿರಾಂದಾ ಹಾನ್ನಿ ಕೊಂಕಣಿ ಭಾಷೆ ಖಾತಿರ ಮಸ್ತ ಸಂಶೋಧನಾತ್ಮಕ ಲೇಖನ ಆನಿ ಪುಸ್ತಕ ಬರಯಲಾಂ. ಕ್ರಿ.ಶ. ೧೬೦೦ ಕೊಂಕಣಿ ಭಾಷೆಚೆ ಮೂಳ ಕವಿ ಕೃಷ್ಣದಾಸ ಶಾಮಾಲೆ ಮಹಾಭಾರತ ವಿದೇಶಿ ಮಿಶನ ಹಾನ್ನಿ ರೋಮಿ ಲಿಪಿಂತ ಸಂಗ್ರಹ ಕೆಲ್ಲೆಲಾ ಪುಸ್ತಕ ಪೋರ್ಚುಗಲ ದೇಶಾಚೆ ಬ್ರಾಗಾ ವಿಶ್ವ ವಿದ್ಯಾಲಯಾಂತ ಆಶಿಲೆ, ಮಾನೆಸ್ತ  ಮಿರಾಂದಾನ  ಸಂಶೋಧನ ಕರ್‍ನ ಸಂಗ್ರಹ ಕೆಲ್ಯಾ. ಪುಸ್ತಕ ದೇವನಾಗರಿ ಆನಿ ಕನ್ನಡ ಲಿಪಿಂತ ಆರ್‍ತಾಂಚಿ ಪ್ರಾಚೀನ ಕೊಂಕಣಿ ಭಾರತ (ಖಂಡ-೧) ಪ್ರಕಾಶನ ಜಾಲ್ಲಾ.
ಮುಂಡ್ಕೂರು ಶ್ರೀವಿಠೋಬ ದೇವಳ

ಗೌಡ ಸಾರಸ್ವತ ಸಮಾಜಾಚೆ ಶೃದ್ದಾಕೇಂದ್ರ ಜಾಲೇಲೆ ಮುಂಡ್ಕೂರು ಶ್ರೀ ವಿಠೋಬ ದೇವಳಾಕ ಶ್ರೀಸಂಸ್ಥಾನ  ಗೌಡ ಪಾದಾಚಾರ್ಯ ಕೈವಲ್ಯಮಠಾಚೆ ಯತಿ ಶ್ರೀಮದ್ ಶಿವಾನಂದ ಸರಸ್ವತೀ ಸ್ವಾಮೆಂ ಭಜಕವೃಂದಾಚೆ ವಿನಂತಿ ಪ್ರಮಾಣೆ ಆಲ್ತಾಂತು  ಆಯ್ಯಿಲೆ ತೆದ್ದನಾ ಭವ್ಯ ಮೆರವಣಿಗೆ ಬರೋಬರಿ ತಾಂಕಾ ಪೂರ್ಣಕುಂಭ ಸ್ವಾಗತ ದೀವ್ನು ಆಪೋನು ಘೆತ್ಲೆ.
ದೇವಳಾಚೆ ಸಭಾಂಗಣಾಂತು ಚಲೇಲೆ ಧಾರ್ಮಿಕ ಸಮಾರಂಭಾಂತು ಶ್ರೀದೇವಳದ ಆಡಳಿತ ಮೊಕ್ತೇಸರ ವೆಂಕಟೇಶ ಕಾಮತ್ ಸ್ವಾಮ್ಯಾಂಗೆಲೆ ಪಾದ್ಯಪೂಜೆ ಕೆಲ್ಲಿಂತಿ. ಅರ್ಚಕ ವಿನಾಯಕ್ ಭಟ್,ರಮಾನಾಥ ಪ್ರಭು,ಪ್ರಭಾಕರ ಪ್ರಭು ಮುಂಬಯಿ,ಮಹಿಳಾ ಭಜಕ ವೃಂದಾಚೆ ಅಧ್ಯಕ್ಷೆ ಸಾವಿತ್ರಿ ಆರ್ ಪ್ರಭು,ರಘುವೀರ್ ಶೆಣೈ,ಕವಳೆಮಠಾಚೆ ಕುಳಾವಿ ಜಾಲೇಲೆ ವೆಂಕಟೇಶ ಭಟ್, ನಾಗರಾಜ ಭಟ್, ಯೋಗೀಶ್ ಭಟ್, ವಿಶುಕುಮಾರ್ ಭಟ್ ಆಡಳಿತ ಮಂಡಳಿ , ಭಜನಾಮಂಡಳಿ ಸದಸ್ಯ ಉಪಸ್ಥಿತ ಆಶ್ಶಿಲೆ. ಪ|ಪೂ|| ಸ್ವಾಮೆಂ ಅಪಣಾಂಗೆಲೆ ಆಶೀರ್ವಚನಾಂತು “ಸಾರಸ್ವತ ದೇವಳಾಂತು ಕಾರ್ತಿಕ ಮ್ಹಹಿನ್ಯಾಂತು ವಿಶೇಷ ದೀಪಾಲಂಕಾರ ಬರ್ಶಿ ಅತ್ಯಂತ ಶ್ರದ್ಧಾಭಕ್ತಿನ ಆಚರಣ ಕರತಾತಿ. ಸಂತಾಲೆ, ಭಕ್ತಾಲೆ ಅನುಗ್ರಹ ಖಾತ್ತಿರಿ ಅವತಾರ ಕೆಲೇಲೆ ಶ್ರೀ ವಿಠಲಾಲೆ ಉಪಾಸನ ಸ್ವಾರ್ಥ ರಹಿತ ಜಾವ್ನು ಶೃದ್ಧಾಭಕ್ತಿನ ಕೊರಚೆ ನಿಮಿತ್ತಾನಿ ಚಡ್ತೆ ಪುಣ್ಯಫಲಪ್ರಾಪ್ತಿ ಜಾತ್ತಾ. ಪರಮಾತ್ಮ ಖಾತ್ತಿರ ಸಂಶಯ ದೃಷ್ಠಿ ಕೊರಚಾಕ ನಜ್ಜ. ಶರಣಾಗತ ಜಾವ್ನು, ಪ್ರಾಮಾಣಿಕತೆನ ಅಪಣಾಂಗೆಲೆ ಕರ್ತವ್ಯ ಕರತಾ ರಾಬಿಲೇರಿ ತೆದ್ದನಾ ಮಾನವಜನ್ಮ ಸಾರ್ಥಕ ಜಾತ್ತಾ  ಮ್ಹಳ್ಳಿಂತಿ.ಜಗನ್ನಾಥ ಕಾಮತ್ ತಾನ್ನಿ ಯೇವ್ಕಾರ ಕೋರ್ನು  ಕಾರ್ಯಕ್ರಮ ನಿರೂಪಣ ಕೆಲ್ಲಿ.

ಸರಸ್ವತಿ ಪ್ರಭಾ ಕೊಂಕಣಿ ಮಾಸಿಕಾಚೆ

15 ಡಿಸೆಂಬರ್ 2011 ಸಂಚಿಕೆಯ ವಿಶೇಷತಾ

* ಪುರುಷೋ  ವಾವ ಯಜ್ಞ (ಮನುಷ್ಯೂಚಿ ಯಜ್ಜ) ಲೇಖು, * ಲಗ್ನಾ ಹೇಳ್ಕಿ (ಹಾಸ್ಯ ಲೇಖು), ಮೈನ್ಯಾ ಕಾಣಿ . ಸೂಣ್ಯಾಲೆಂ ಸಂಸಾರು ಆನಿ ದುರಾಸೆ ಫಲ, * ಆರೋಗ್ಯ ವಿಭಾಗಾಂತು ``ದಾರ್ಲಯಾಂಕ ಸ್ತನ ಕ್ಯಾನ್ಸರ್ ಯೆತ್ವೆ?, * ಯಜ್ಜೋಪವೀತ ಆನಿ ತಪ್ತ ಮುದ್ರಾಧಾರಣ(ಲೇಖು),, ಧಾರವಾಹಿ``ಪ್ರಾಪ್ತಿ'' ಆನಿ ಕರ್ನಾಟಕದಾದ್ಯಂತಾಚೆ ಕೊಂಕಣಿ, ಜಿ.ಎಸ್.ಬಿ. ಸಮಾಜಾಚೆ ವಿಂಗವಿಂಗಡ ಖಬ್ಬರ.

ಸರಸ್ವತಿ ಪ್ರಭಾ ಕೊಂಕಣಿ ಮಾಸಿಕದ ದೀಪಾವಳಿ ವಿಶೇಷ ಪುರವಣಿಯನ್ನು (15 ನವೆಂಬರ 2011) ಓದಿದ್ದೀರಾ?

ಇನ್ನೂ ಓದದಿದ್ದರೆ ಇಂದೇ ಓದಿರಿ

ಈ ವಿಶೇಷ ಪುರವಣಿಗೆ ಜಾಹೀರಾತು ನೀಡಿ ಉಪಕರಿಸಿದ ಕರ್ನಾಟಕದಾದ್ಯಂತದ ಎಲ್ಲಾ ಅಭಿಮಾನಿ ಕೊಂಕಣಿಗರಿಗೆ ನಾನು ತುಂಬು ಹೃದಯದ ಕೃತಜ್ಞತೆಯನ್ನು ಈ ಮೂಲಕ ಅರ್ಪಿಸುತ್ತಿದ್ದೇನೆ.

ನಿಮ್ಮ ಪ್ರೀತಿಯ

ಆರ್ಗೋಡು ಸುರೇಶ ಶೆಣೈ